الثلاثاء، سبتمبر 30، 2008

اديني الحقنة بسرعة

أديني الحقنة بسرعة
ده حضراتكم الكابوس الي شوفته بعيني محدش قالى
أصل ايه
بعيد
عنكم كده كنت اعدة مرة في محاضرة في الكلية
المحاضرة كانت في مدرج كبيييييييييييييييييير ومليان ياما علي عينه
يعني خير ربنا كتير والحمد لله

قوم ايه
لقيت راجل جرم كده دخل علينا في اخر المحاضرة ولابس خير الله اما اجعله خير ابيض في ابيض و وشوش الضاكتور في ودنه
وهنا حسيت بانه هيعمل الدنيئة معانا
بيني وبينكم فكرني بأيام زمان
ايييييييييييييييييييييون
ايام ما كنت ابقه اعدة طفلة بريئة منكسرة في المدرسة ذى الودعة الي جواها ام الخلول ومقفولة عليها وسوست جوه وريحتها طلعت
والاقي بردو الحكيمة داخلة توشوش الأستاذ في ودنه وريحتها بنج
وهنا اعرف ان في عملية تعذيب هتحصل

يعني من الاخر دي مؤامرة خبيثة
غرضها الأساسى غز هؤلاء المنكسرين فى(؟؟؟؟؟؟؟؟؟) او فى اي حتة بقه
ومنعا للشوشرة لازمن وحتما ولابد
يتم التمويه عن الموضوع عشان محدش يكوت من الزئاريد الصغيرين أحباب الله (نيهاهاهاهاها)
بس علي مين
كنت بدرك في سعتها انهم ناويين يدونا حقن
وفى هذه اللحظة كنت بحاول استخبي في اي مكان
صحرا إن كان او بركان
حتى فى ذات مرة استخبيت ورا برميل الزبالة الكبير...وافشوني بردو ولاد التيييييييييييييت
المهم
لقيت الضاكتور ادا الراجل ابو
بلطو ابيض ده الميكروفون وأطلق له العنان
وذي ما يكون غمزله كده بجنب عينه (دكتور نمس الدكتور ده) وقاله
"ابسط يا عم...روش ....عيش يا سيدى...خلص منهم الجديد والقديم"
لا وايه مش بس كده ده قامله كمان وسابله المحاضرة وهج طفش
وهنا ادركت ان الضاكتور خاف من حاجة وقلق وقال يا فكيك
شوف الراجل
الضاكتور الناقص
مش يحذر اولاده احباب الله
لا
طلع يجري الجبان
المهم لقيت الجدع ابو بالطو بدأ فى القاء بعض
الكلمات المؤثرة الرنانة المنتقاه علي مسامع حضراتنا
وبيني وبينكم انا في الحجات دي بتاثر اوي
"يا اخواني تبرعوا بالدم لانقاذ اطفال السرطان...نقطة دم منكم ممكن توهب الحياه لطفل مريض...الدم حاجة منقدرش نصنعها...يعني مصدرها الوحيد ومصنعها الوحيد هو اجسامكم...تبرعوا من اجل رسم البسمة علي وجوه الاطفال الغلابة"
وكلام كبير بصراحة قطع قلبي
اوي واثر في مشاعريري الفاضحة
وبيني وبينكم الكلام اشتد اوي ولقيت الجدع بيغرينا
"وكمان بندي بردو دباديب...وكور ...وعصير من ابو 175...وعندنا بطعم الفراولة والكوكتيل والكاكا...يعني كله هيشرب وكله هينبسط"
يوه يا جدعان...لما بتيجوا علي الجرح كده وتغزوا

الراجل ابو بالطو كان معاه جدع تاني ما
شي بيلف علي المدرجات ومعاه اكياس التبرع بالدم
والي يتجرأ ويبصله بس... بأى شكل من الاشكال... لازمن وحتما ولابد ياخد كيس

ده حكم القوى يا رجاله
دول ناس متربية علي الدم ياهووووووه
فوقوا كده وصحصحوا

بيني وبينكم انا كنت اعدة في اول بنg
ومش هنكر اني أتاثرت وحسيت اننا لازم نعمل حاجة من اجل الاطفال المرضى
لكن بردو قلت لنفسي
"اسأل ا
ستشير"
لسة بسأل الجدع الي ماشي وبستشيره فى الموضوع وبقوله كده بهبل وعته
"هي الحقنة بتوجع يا برنس؟"
لقيته ما صدق
قام رازع ايده بكيس
كبير علي البينg
ولا كيس الخضار
والكيس واصل فيه حقنة
بسن عريض ولا سن الساطور
وخرطوم طويييييييييييل ولا خرطوم الجنايني



الحق يتقال انا توهت شوية واتوهمت يا جدعان
بس الحمد الله ان رزعه ايده دي منزلتش علي افايا بردو
ربك بيسترها علي الغلابة اللى ذي
ده سيبكم اصلا من اني عندي فوبيا وجنون ورعب من الحقن
لا...دي كمان الحقنة ولا سيف الجدع صلاح الدين
وفى لحظتها
لقيت صفير...وتصفيق حاد
واللى يصوت بقه...والى يشيلني ويجري يلف بيا...واللى ياخدني بالاحضان ويشئولني لفوق...وحركات
وفى فسوة ادركت ان انا بقيت كبش الفدا
الجدع الي هيضحوا بيه من اجل ان الكل يعيش
شوف الاندال
إن مكناش رجاله دفعة واحدة

وطبعا انا كده بقيت شراب مخروم
استحالة اعرف ارجع في كلامي
انا اتنصبلي صوان
وكهارب
اذاي يعني ارجع في كلامي
مين هيشيل الليلة دي
ده العالم دي تنزل فيا ضرب لحد ما اورم
ومكنش امامي غير اني اجر اذيال الخيبة والالم وانجر انكشح علي عربية الاسعاف وفي ايدي الشيكارة الي هتبرع فيها بالدم
كل ما احاول اتراجع او اكوت من اي زقاق جانبي
الاقي العالم ولاد التوووووووت ورايا بيزفوني وبيأمنوا المونطقة عشان مفكرش اهرب
انا الان بقيت من مشاهير الدفعة
والصوحافة بتلاحقني بأقلامها الصفراء والخضراء
يعني مينفعش اطلع نادلة
هخر دم يعني هخر دم
بصيت من بعيد علي عربية الاسعاف بالسرير الى جواها بمنظر الناس الي بتتبرع كنت هموت
واصلا اصلا انا عندي هيستريا من الحقن
أيشحال بقه جو البنج والعصير والدباديب ده
قربت براحة من العربية و انا ركبي بترزع في بعض
وريقي ناشف...وعيني مبرئة
لقيت صحبتي جوة العربية بتتشفط
بيني وبينكم
قربت اوي منها عشان اشوف ايه بيحصل بالظبط
واتعظ واتخذ قراراتي السريعة
مهما كانت العواقب
حتي لو هاخد علي افايا

ولما شفت الحقنة الي راشقة في عروقها
ودمها الي شغال تنقيط فى الكيس
لقيت نفسي انهارت في العياط
واترعشت اوي
وطبعا بعيط وبترعش لاني مدركة ان ده الي هيحصل معايا كمان شوية
يا مرك يا مها يا بنت عمو زين
إلا الحقنة

ولا وهيشفطوكى يا بت
جه الدكتور وجرني من افايا وخرجني برة العربية
"وقالى مالك يا ست انتي...انتي هتخوفيها؟!...يعني هي جامدة وانتي الي هتخوفيها"
قلتله وانا بعيط وبتشحتف
"بقولك ايه يا عمو....هو أنا ينفع امشي"
قالى ما تمشي يا ست انتي...انتي هتأرفينا...كتك دهية
قلت الحمد الله افراج
ويل يا ويل ويل يا ويل
بس الراجل اللئيم لمح شوال الدم في ايدي
وادرك اني الفريسة بتاعتهم
راح مناديني بعزم ما فيه
"انتي يا بت انتي...خدي هنا"
يا لهويييييييييييييييييييييييييي
- نعم يا عم انت
- انتي كنتي جاية ليه؟
- معرفش ...أصل ولاد الحلال دلوني وقالولي انكم بتفرقوا عصير هنا وكور ودباديب وحجات حلوة كتير...واكياس دم كمان وانا جاية اخد فى الكيس ده بجنية فول
راح الراجل الدكتور بصلي اوي كده وزئرلي زئرة
قلت الراجل ده هياكلني علي افايا
ويقولى "وكمان ناوية تهربي بالكيس يا دزمة"

وقلت في سر بالى "الجدع ده لو مد ايده هرشقله الحقنة في صدره واطلع اجري"
لقيته بيقولي "انتي وزنك كام؟"
قلتله "انت عاوزة كام يا باشا"
"انتى كمان بتهرجى...كتك دهية"
"انا وزني 51 كيلو يا ريس"
راح بصصلي بأرف كده (ما انا مش هنفعه بقه) وقالى
"لا...وزنك يجي اقل من خمسين....بقولك ايه انتي تروحي تتبرعي بالعضم احسن"
ونتش من ايدي كيس الدم الفاضى
روحت انا بقه اتلككت ورحت امثل بقه واقول
"لئااااااا...انا لازم انول الشرف ده...اذاي تحرمني يا راجل انت من شرف المحاولة...وعهد الله لا اتبرع يا عم الحاج...انا لازم اكون عضو نشط فى المجتمع...ايد علي ايد النيل يجري والدم يزيد...نحكم عقلنا نتبرع كلنا...نحكم عقلنا ناخد كور كلنا...نحكم عقلنا البوكس يلمنا...انا مش هتعتع من هنا إلا بكورة وعلبة عصير بطعم الدوافة...يا ريتنى كنت معاهم"
لقيت الجدع بيسرح كده وشاكله عاوزني اوزن نفسي عنده عشان يتأكد
لقيت نفسي ريقى بينشف تاني وقلتله بصوت هادي وطيب
"بس عارف...انت راجل حقاني....أه وربنا...انا اصلا بت معندهاش دم...وكمان انا لسة وزنة روحي امبارح لقيتني يا دوبك خماشر كيلو ونص"
روح يا شيخ إلهي لا توعا ولا تستوعا
اشوف فيك ابرتين

كانت معكم متبرعة مصر الاولى
مها زين (إنها الحياه)

هناك 25 تعليقًا:

(احمد سكر ) يقول...

ههههههههههههههه
ههههههههههههه

ورب العزه انتى مشكله

ههههههههههههه

البوست رغم انه طويل

بس جنان والله

ال بجنيه فووول ال
ههههههه

وبيقولك اتبرعى بالعضصم

يدوووووووب

ههههههههههه

كل سنه وانتى طيبه يامها

وكل سنه وانتم طيبين ياضاحكون

احمد

غير معرف يقول...

هاهاهاهاهاهاها
اااااااااااااااه يانى
يالهوتيييييييييي
فكرتيني بالذى مضى
عارفه بقى انا كنت باعمل ايه
يوووووه دى حكايه
كنت باروح كل عربيه واتشملل فيها والضحكه الخبيثه على وشي البرئ
اقولهم عاوزه اتبرع
ينزلوا فى ايدي تفعيص
وفى الاخر الجمله المشهورة
انتى ماعندكيش عروق
كانت لعبه حلوه لحد ما جه يوم وحلفوا انهم ياخدوا منى اللى حيلتى
هيييييييييه داكان يووووم
فكرتيني والله بيه ممكن اكتب عنه بوست
:) كل سنه وانتى طيبه

مهندس مصري بيحب مصر يقول...

يا بنتي ليه ده كله
دا أنا من كتر ما إتبرعت بالدم مش فاكر عددهم
دا الموضوع سهل خالص
هي اول شكة بس و بعدها الدم بيسيل لداخل الكيس و الموضوع كله نص لتر و انتي عندك 5 لتر على الأقل يعني بتتبرعي بـ 10% بس

دا انا كنت بأتبرع مرة كل ترم في الكلية
كانوا بييجوا بعربية غسعاف برضه بس كانوا بيفرشوا في صالة اتحاد الطلبة

كانت ايام حلوة :)
ده غير العصير و الحاجات التانية

مهندس مصري بيحب مصر يقول...

إسعاف*

نوسه وريمان فى هاكونا مطاطا يقول...

أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد

سمر الشافعى يقول...

ههههههههههههههه
هههههههههههه
ههههههههههههههه

يالهوى عليكى يامها دا انتى شرباتايا خالص

وكنتى عاوزه تكتبى بالفصحه ومش عاجبك العاميه

النبى ماتتعبى نفسك وخليكى كدا زى ماانتى

بس بينى وبينك حكايه التبرع دى صعبه

دا انا نفسى ببقى مرعوبه وانا بغز المسكين الغلبان اللى هيتبرع بسن الابره

لانها اصلا تخينه حبتين وبتوجع

احمدى ربك انك نفدتى بجلدك اهو بيقطع من هنا ويوصل هنا هيا دى حكمتهه فى انه خلقك صغنونه

عشان موقف منيل بنيله زى دا

بعد كدا متبقيش تنسحبى من لسانك وتسالى ماهو لو كنتى سكتى كان حد تانى سال وخادوه عالبوكس قصدى الاسعاف

كل سنه وانتى طيبه

ابن حـجـر الـعـسـقـلانـى يقول...

وقعتينى من الضحك

فكرتينى بمثل بيقول "إن جالك الغصب خده بجميلة"


و كل سنة و انت طيبة

و كل سنة و انتم طيبين و ربنا يتقبل منكم الشهر الكريم

عبده الرايق يقول...

هههههههههههههه
والدكتور جرى كمان
طيب كان خد الميكروفون معاه
كل سنه وانتى طيبه يا مها
وعيد سعيد عليكى وعلى كل زوار المدونه

عبده الرايق يقول...

اخوااااااااااااااااااااااااانى
كل زوار المدونه
عيد سعيد
ونحن الان فى انتظار العيديه
اخوكم الرايق مفلس
خليكم جدعاااااااااااااااااان
وكل واحد يطلع من سكات الف دورر عيديه

حنين القلب يقول...

والله العظيم انتى عسل
عنيا دمعت من كتر الضوحك
احسن حاجه لما كنتى هترشقى الحقنه فى صدر الراجل
هههههههههههههههههههههه
يا حبيبتى مش احنا اللى نتبرع
التبرع ده للرجاله
انا برضه بخاف اوى من التبرع ده
ده انتى 51 وكنتى خايفه دنا 70 ومش افكر ابدا اتبرع بدمى
بصى نتبرع باى حاجه تانيه بلاش الدم
كل سنه وانتى طيبه
يا رب اشوفك عروسه قد الدنيا

حنين القلب يقول...

عبده الرايق
كل سنه وانت طيب يا بابتى
ويا رب السنه الجايه تكون بطلت تستلف
عديه ايه اللى عايزها
انا اللى عايزة العديه
والوقفه عددت من غير ما البس هدوم جديده
وبكرة العيد
روووقه لو مش جبت ليه هدوم عيد انا هطفش من البيت ده واشوف حد غنى يتبنانى
ماااااااااااشى
كل سنه وانت احن واجدع اخ فى عالم التدوين

كاميليا بهاء الدين يقول...

انتى تتبرعى بالعضم احسن

ههههههههههههههه

انتى مشكلة

بس مشكلة جميلة

اسلوبك حلو اوى .. تخيلتك فى كل المواقف

بجد روعة

عيد سعيد عليكى وعلى احبابك يارب

تحياتى

جنّي يقول...

السلام عليكم ورحمة الله وبركاته
عيدكم مبارك
تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر
كل عام وأنتي منصورة يا أمتي
أخوكم
سعيد

nona يقول...

هههههههههههههههههههههههههه
بجد انتى مشكلة
بس الكل بيقول ان التبرع شى سهل
انا عمرىى ما جربتة بس كنتى ناوية اجربة و اتبرع قريب
بس بعد مغامرتك دية هعيد التفكير تانى
اصلى زيك بترعب من الحقن
بس جدعة حلوة لسة وزنة نفسى لقيتنى 15 كيلو ههههههههههههههههههه

كل سنة و انتى طيبة يا مها
و عايزة اقولك ان فى حملة تبرع بالدم تانى اسبوع من شهر 11 و طبعا انتى اول واحدة معزومة و اول واحدة هتتبرع
و ليكى عليا اجبلك علبتين عصير دوافة و سندوتش فلول

Teawater يقول...

هههههههههههههههههههههههههههههههههههههههههههههههههههههههههههههههههههه

تحفه القصه ديه اوي

كل سنه وانتي طيب يا مها ويا ما هنشوف في المدرجات كتيييييير
تقبلي مروري

maha zein يقول...

يا يا جدعان
بقه ينفع كده اتاخد علي خوانة
ده البوست نزل بقه
اه يا زمن
كل سنة وانتوا بصحة وسلامة
وكل سنة واعذاء المدونة بخير وصحة وسلامة

مواطن مصرى نايم يقول...

هههههههههههههههههههه
هههههههههههههههههههه
بوست زى العسل
هههههههههه
و الله وقعنى من الضحك

الحمد لله الواحد لحد دلوقتى كل ما يروح يتبرع يلاقى اللى واقف على باب العربيه بتاعة التبرع واحد مش مستحمى بقاله تلاتين سنه
برجع فكلامى فورا
ههههههههههههههه

فرنسا هانم يقول...

ابنتى الاموره
مها زين ايه الجمال ده كله
انا كل ما اقراء لكيى بوست بحس جدا بروحك العاليه
رزعه ايد مين اللى تنزل على قفاكى ؟؟؟
هو انتى مش وراكى ناس ولا ايه
طيب دا انا كنت اوله المنطقه باللى فيها

وانتى يا رايق سمعت الكلام ده وسكت ؟؟؟؟

صبرني يارب يقول...

يا لهوي كل ده خوف من الحقن

شوفي يا امي انا اتبرعت مره واحده بالدم وانا فى الكليه لوالد واحده زميلتنا

وبعدها مباشرة جالي انيميا مش من التبرع لا لا ده كان موضوع تاني
وبعدها اتجوزت وخلفت وتوغلت اكتر فى الانيميا

ومن هذا التاريخ وانا مش عارفه اتبرع مع اني نفسي

وكنت ماشيه فى الشارع مره ولقت واحده لطيفه كده قربت مني وقالتلى برضه على التبرع بالدم لمرضى السرطان

قلتلها بصي انا بيتى قدام شويه تعالوا بالاسعاف قدام البيت الله يصلح حالكم عشان لو جرالي حاجه ابقى فى منطقتي يعنى
بس هما ما رضيوش قالتلى اصل السواق راح يفطر
قلتلها طب بكره الصبح هابص من البلكونه لو لقيتكم هانزلكم
وطبعا طنشتني

يا خوافه يا مها من الحقنه

Empress appy يقول...

هههههههههه
طيب حد يمسك البنت دي اديها انا حقنه ههههههههههههههه
مها انتى بجد خليكي على اسلوبك ده يا بنتى احنا بنحبك كده والله

الطائر الحزين يقول...

وكان عيون التمرجى مكنش شايف غيرك
ما الدنيا مليانه ناس اشمعنى انتى يعنى يمكن كان عاوز ياخذ نقطة دم يصورها ويعمل بيها دعاية ولا حاجة

كل عام انت بخير

Unknown يقول...

بقا خمسين كيلو ورايحه تتبرعي
انت هاتتبرعي من هنا وتبقي 49 كيلو من هنا خمس ست تبرعات من دي وتبقي البنت المختفيه..
وبعدين انت دمك خفييييييييييييف قوي بجد
ودا لا يصلح للتبرع .. كفاتيه قوي تكتبلنا بيه هان وتمتعينا.
وسيبي العيانين للناس اللي عندها صحه
تحياتي

همس الاحباب يقول...

هههههههههه
هههههههههه
دايما كده بتتهورى وبعدين تتعورى
ما بلاش ياستى اللى انتى فيه
كان نفسى ياخدوا منك 3 لتر ولا حاجة
ولا اقولك خليهم 3 كيلو عضم اسهل
بس بجد البوست جامد قوى
بس ما قولتليش هم بتوع حلوان لسه بيعيدوا ولا ايه
مش شايف احتلال للمدونة
كل سنة وانتى طيبة

همس الاحباب يقول...

عائلة الضاحكون
عيد سعيد عليكم
وكل سنة وانتم معيدين ومن الكحك محرومين طالما ابوكم الرايق عمركم ما اتشوفوا الكحك ولا حتى السميط
كل سنة وانتم بخير
وكل زوار المدونة بخير وصحة وسعادة
مش انا جيت نورت البيت

الدفاع يقول...

المهم بقى فى حكاية التبرعا بالدم دى ان الناس تفضل تتبرع ولما حد يحتاج دم مايلاقيش ولو لقاه يبقى بفلوس يعنى هما ياخدوا الدم ببلاش ويبيعوه للناس بفلوس وبالواسطه كمان ده ان لقيته
كويس يا مها انك ماتبرعتيش كان شوية الدم اللى هاياخدوهم منك هايتباعوا بالشئ الفلانى طبعا لندرة الدم بتاعك ولانه مش موجود منه فى السوق
بس اعتقد ان اللى كان هاياخده مكانش هايستفيد منه قوى اصل انا واثق ان دمك هايكون خفيف جدا
تحياتى وكل سنه وانتى والجميع هنا طيبين