الخميس، أبريل 25، 2013

قناه -- مصر 26---

الاخوه الاعزاء نستسمحكم فى ارجاء باقى حلقات روايه ( الصندوق الاسود للثوره ) لحين اكمال الملفات
=============
الرايق :- هااااااااى اند هاواى ايفرى مسسز رايق
مسسز رايق :- ياما جاب الغراب لامه !!!!!!! مالك يا مدهول يا رايق .... ايه الورق اللى فى ايدك ده كله ؟؟؟
الرايق :- شط اب يور نوزينج  يا وليه يا مفتريه .. دونت سبيكنج ويزنج مى 
مسسز رايق :- ايه الهبل اللى بتقوله ده يا رايق .. هو مال الانجليزى بتاعك بقى بساريا كده ليه ؟
الرايق :- نو نو نو .. ماىينج انجلشنج اذنج فيرىنج ويلنج يا متخلفه انتى ... الثوره المجيده بتاعه 25 يناير غيرت كل شىء والريس بتاعنا ولله الحمد بيعلمنا الانجليزى الصح 
مسسز رايق :- هو احنا كنا بنتعلم انجليزى غلط ؟؟؟
 الرايق :- ياسنج ..احنا فعلا كنا بطاطا يا ام التخلف انتى  .. احنا كنا بقر فى الانجليزى يا ملعونه انتى
مسسز رايق :- ليه الغلط ده يا رايق ؟؟؟ انتا لسانك طول قوى كده ليه ؟؟
الرايق :- نو نو نو .. انا لسانى مش طويل ولا حاجه ده التقدم والانجلش الحديث يا جهله .. ماى ريس ..اور مستر بريذدنت ..هيعلمنا الانجلش الصح .. تعرفى مسسز رايق ان احنا كان بيضحك علينا فى الانجلش ؟؟؟
مسسز رايق :- ازاى يا فالح ؟؟؟
الرايق :- هاو اار يو ؟؟؟ كان بيضحكوا علينا وبيقولنا الاعلام الفاسد انها تعنى كيف حالك 
مسسز رايق :- طيب ماهى كيف حالك فعلا
االرايق :- هاهاهاهاهاهاها ...نو نو نو الريس بتاعى قالى انه الريس بتاعه قاله انه الريس بتاع بتاعه قاله ان هاو اار يو معناها الساعه كام يا متخلفه ... بصى مسسز رايق احنا خلااااااااااااص هنحارب الاعلام الفاسد 
مسسز رايق :- هى هى هى هى هى  هتحاربه بايه يا عنتر ؟؟؟
الرايق :- قناه مصر 26 
مسسز رايق :- ايه ؟؟؟ مش فاهمه حاجه
الرايق :- طبعا يا جاهله انتى للاسف اكتر من 90 فى الميه من المصريين مش فاهمين حاجه .. بصر يا مسسز رايق انا هافهمك كل حاجه والحمد لله ان الشرشوحه اختك سقراطه مش هنا انا عاوز اقولك
سقراطه :- انا هنا يا طاووس عصرك واوانك . انا هنا يابتاع الانجليزى المفسخ ..انا هنا ياسى رايق
الرايق :- قل اعوذ برب الفلق .. انتى لسه فى عداد الاحياء يا سقاريطوا  ؟؟؟
مسسز رايق :- عبده !!!! عيب مش كده دى برضك اختى
الرايق :- بصى يا اخت النمله انتى بصى يا مسسز رايق انا اختارونى فى القناه الجديده مصر 26 
سقراطه :- اسم الله على مقامك وهندامك وعلى وراك وقدامك  اسم الله على شكلك ورسمك ولونك واسمك ... هو يا خويا اختاروك للقناه دى ازاى ؟؟؟
الرايق :- بصى يا سقراطه يا غالاطه انتى .. انا رحت اشترى كوز بطاطا من الراجل اللى جنبى فى الحى .. قالى مفيش بطاطا يا رايق خد ترمس . قلت له .. يس يس يس اعطنى قرطاس من الترمس المملح وذدنى من البليله واكرمنى اكرمك الله
الراجل بصلى وقالى انت تنفع مذيع فى قناه مصر 26 انت معاك دكتوراه فى ايه ؟؟؟.. قلت له انا الدكاتره عبده الرايق يا متخلف 24 رساله ماجستيير و20 دكتوراه اساسى و2 احتياطى 
مسسز رايق :- ايه الدكتوراه الاحتياطى دى يا رايق ؟
الرايق :- دكتوراه احتياطى يعنى دكتوراه ملوخيه يا ام الجهل انتى 
سقراطه :- قصدك دكتوراه فخريه يا ناصح
الرايق :- فخريه او ملوخيه مش هتفرق يا متخلفه انتى كمان .. انا عارف انتوا كده دايما تجتزوا الكلام من سياقه 
سقراطه :- سياقه ايه يابو سياقه ؟؟؟ انت قلت دكتوراه ملوخيه
الرايق :- دونت سبيك يا سقراطه يابلاطه انتى ... بكره هتشوفونى على القناه بعد ما نجحت فى اختبار القدرات
سقراطه :- انت نجحت فى اختبار القدرات ؟؟؟؟؟؟؟؟؟؟؟
الرايق :- طبعا الغل واكلك .. عارف كلك حقد على مواهبى وامكانياتى 
سقراطه :- لابجد ..هما امتحانوك فى ايه يا رايق ؟؟؟؟
الرايق :- سأااااالونى ....انا مييييين ؟؟؟؟ قلت لهم انا اللى الايام خانتنى  انااااا مييين انا مين انا مين ... الراجل قالى برافو يا دكاتره عبده الرايق انت بكره هتكون نجم القناه ... وهقدم برنامج لمده 4ساعات على الهوا اسمه (واعدوا لهم اعلاما حرا )
سقراطه :- واعدوا !!!!!!!!!!!!!
الرايق :- ايوه يا متخلفه انتى انا هحارب وائل ابن الابراشى ولميس بنت الحديدى وابراهيم ابن عيسى وجابر ابن القرموطى وغيرهم من قاده الاعلام الفاسد الفاجر وسأجرهم الى سؤ ما اجترفت اقلامهم واعلامهم .... بصى يا متخلفه انتى وهى ...الاعلام الفاسد بيقول ان مصر فى ازمه ومصر على وشك الافلاس .... نو نو نو .. الحقيقه ان الريس مرسى ليه انجازات كتييييييييييييير وهما مش عايزين يقولوها فى برامجهم ..
سقراطه :- طيب ايه هى انجازات الريس مرسى يا رابق ؟؟؟ وطيب لما هو ليه انجازات مش بيقولنا عليها ليه ؟؟؟ طيب احنا ليه مش شايفينها يا ناصح ؟؟؟
الرايق :- بصى يا متخلفه انتى الريس ليه فعلا اكتر من 55 مليون انجاز فى 8 شهور بس الراجل مكسوف يتكلم عنها علشان الناس متشعرش انه بيمن عليها ... بس الانجازات موجوده ...يعنى ..عندك 55الف بحث علمى فى اكبر جامعات العالم و5555 مشروع عملاق  و555 مليون فرصه عمل للاطباء 55 مليار فرصه عمل للمهندسين و555 مليار فرصه عمل لباقى افراد الوطن العزيز ..لان ابناء الوطن كلهم هنا فى الحته دى ..(يعنى فى قلبى ) 
سقراطه :- حيلك حيلك ياراجل يا اهبل ...كل المليارات دى ازاى ؟؟؟ ده العالم كله 6 مليار
الرايق :- هو دة الاعلام الفاسد يا متخلفه انتى ... انا راضى ضميرك ..حد وقفك فى الشارع فى طابور وقعد يعد فى البشر ؟؟؟ ولا انتى عديتى البشر بنفسك ؟؟؟
سقراطه :- لا طبعا 
الرايق :- خلاص بلاش تشويش على الحقائق يا متخلفه 
سقراطه :- ثم ايه حكايه الرقم 5 معاك
الرايق :- قل اغوذ برب الفلق ...علشان الحسد يا متخلفه انتى 
سقراطه :- طيب انت هتعرف تقراء الورق ده ازاى يا رايق وانت اصلا مييييح فى القراءه
الرايق :- الجماعه بتوع القناه الله يسترهم خدونى وحمونى ورشوللى مسك على هدومى وادونى كتاب معلم القراءه علشان اذاكر فيه 
مسسز رايق :- بلاش الحكايه دى يا رايق ...
الرايق :- شط ااب يور ماوس يا متخلفه انتى ... وعلى رأى المثل رزق الرايق على مصر 26
((( قريبا مع الرايق ومصر 26 )))