الاثنين، أغسطس 25، 2008

فلسفة التخديعه

هو :السلام عليكم
هى : عليكم السلام - ايه رجعت من الشغل بدرى ليه النهاردة؟؟؟
هو: بدرى من عمرك وبعدين ده استقبال تحبى ارجع هو فيه مشكلة لو جيت بدرى ؟؟
هى : لا مفيهاش مشكلة يعنى برد انت جيت بدرى؟
هو علشان جيت والشمس طالعه يعنى لا يا ستى انت بس نسيتى ان الساعة اتغيرت
هى : اه صحيح دى الساعه اتغيرت وان اقول هو النهار اتعفرت ليه
هو:نهار ايه اللى اتعفرت ده النهار طول
هى:اه بس الواحد بيصحى من النوم يلاقى الساعه 9
هو: بصوت منخفض قصدك تقولى 1
هى: ثوانى يكون الأكل جاهز ادخل غير هدومك وريح شوية ولما يجهز الاكل هصحيك
هو : ماشى ودخل يريح جتته شوية
مضت ساعه وايقظ الجوع الرجل من النوم ونادى وقال هو لسه كثير على الأكل
هى: لا خلاص شوية وهعلق عليه
هو : نعم ت إيه تعلقى على مين هو انت لسه هاااااااااااتطبخى وقام مفزوع يجرى لقى امامة طشت كرنب مسلوق وكسرونة تخديعه فطبعا كان مدروخ رجله دخلت فى التخديعه اتلسوعت وشالها بسرعه ايه انتى كمان عاملة كرنب؟
هى: ايه بس اللى صحاك ثوانى والاكل يكون جاهز ثوانى


هو: قصدك سواعى مش انت عارفة انى نازل كمان من غير فطار
هى: هاقوم اعلق على الكرنب اهه


هو:تعلقى ايه انت لسة بتلفى الكرنب ده محتاج يومين لوحدهم اللف ده
هى : لا كلها ساعة زمن

هو:طيب مفيش أى حاجة اكلها طيب
هى: لا مفيش اصلى كنت غاسلة النهاردة

هو:يعنى فى حد فى الدنيا يعمل كدة غسيل ومحشى وكرنب كمان فى نفس الوقت طيب كنتى خليه بتنجان ويشاو بايده على رأسة ويحركها دائرايا
هى:ما انا مخدتش بالى ان الوقت بيعدى وطول ما انا لاقية الشمس طالعه بقول لسه بدرى على ما تيجى
هو:يا ستى ده المحشى ده بيتعمل فى يومين على الاقل يوم تشترى فيه الكرنب وتقطعيه وتسلقية ويوم تعملى التخديعة وتلفية
هى :معلهش بقى لو جعان انزل هات لنا سندوتشات ونخلى المحشى لبكرة
هو:بيغلى طيب مقلتيش كدة من الاول ايه --- اجيب سندوتشات ايه
هى: هات اى حاجة فول وطعمية اى حاجة

هو: فول وطعمية هيعملوا ايه بس شقة الفول بقت ب 75 قرش يعنى لو جبنه 10 سندوتشات هيبقوا ب 7 جنيه ونصف يا داى خراب البيوت فكر شوية كدة و افتكر جوعه والمحشى والتخديعة اللى وقع فيها وقال لا لا انا هجيب ُقرص وجاب ورجع البيت تانى
هى : الله امال فين السندوتشات
هو:لا انا جبت ٌقرص
هى : وجايب كثير ليه كدة

هو : علشان ناكل والباقى نطلع بيه الأرافه بكرة
هى: ليه هو مين اللى مات ؟؟؟؟؟؟؟؟

هو:لحد دلوقتى مفيش فيه حد مات بس اكيد فيه واحد منا هو اللى هيوزع على روح التانى
هى:طيب متنساش تتصل علشان تجهز مفاتيح الترب
هو:جاااااااااااااااااااااى وراح فى غيبوبة عميقة هو موت وخراب ديار

الطائر الحزين

الجمعة، أغسطس 22، 2008

شلووووووووووووت سعادتى



البطالة هي عنواني ومطرحي ...
وقلة فلوسي هي الشعار الرسمي لمرحلتي الراهنة يعني جيبي مطلع لسانه من الجلابية وبيشم هوا علي طول ...أتاري جيبي عامل حالة عصيان مُسلح وكل ماأقوله أتلم ياجيبي وأدخل مكانك أحسن بالمقص راح أقص لسانك..يقوللي لأة أتلمي أنتي وأمليني شوية فلوس تغزي بيهم عين العدو...ياسيدي أدخل وبلاش فضايح .. يرد ببرود أنا وراكي والفضيحة هاتبقي بجلاجل
وكنت طول عمرى أقعد جنب الحيطه و اسمع الزيطه ...قلت لأ انا لازم أدخل فى وسط الزيطه وأعمل شوية هوليلة .... فقد نويت نية صادقة إني أترشح لعضوية مجلس الأمة سابقاً .. مجلس الشوعب الهوائية حالياً ...مش عشاني عشان مصر ...مانتم عارفين ..وحافظين ان مصر هى أمى ونيلها بيجري جوه دمى
بصراحه الكدب خيبة عشاني الأول وعشانكم بعدين وعشان مصر في الآخر خااااااااااالص ... وماتقولش أيه أدينا لمصر قول مصر هاتدينا أيه الأول يافالح... أنا أحب أبقي واضحة وصريحة من أولها حد شاف عضوة بالوضوح ده ؟
همتكم معايا بقي عشان اترشح بقلب جامد, هاتسند عليكم , أوعوا أطلع بأتسند علي حيطة مايلة أحسن أظبطلكم قرار إزالة يزيلكم... ولما يسئلوني انتي تبع مين هاقول لهم أنا تبع الناس إللي قاعدة علي الترعة بتتهوي وتمصمص في زعازيع القصب وطول ماانتم قاعدين مستربعين علي الترعة تبقوا أهلي وناسي... ده أنا بنت الترعة .. وعشان انتم حبايبي ومني وعليا هاأقولكم عن سبب ترشيحي للمجلس الموقر بس حسك عينك منك له تفتنوا عليا وتبوظوا عليا الشغلانة أروح فيكم في ستميت ألف داهية ... مش داهية واحدة بس ... وأهو نتفسح سوي هناك
أرجع معايا ياابني انت وهو في الزمن لوري بس حاسب تخبط في الحيط ... بالظبط لما كنت بنوتة بضفيرة ومصاصة ...أصلي طوووووووووول عمري من وأنا صغيرة وانا امر علي المجلس في التليفزيون مرور الكرام ... لا أغنية تفرفشك ولا رقاصه تبسطك ..ولا نكته تزغزغك ... وعمر ماشدّني غير النوم الهادي فى الركن البعيد الهادى ..اقلب المحطه من هنا واقعد أتاوب من هنا .. أومال ايه مش إخوانى ولازم اشاركهم الجهاد فى سبيل النوم ...
سمعت أوشاعة بتقول أن الركن ده مرشوش بماده نام يا نونا نام وادبحلك جوزين حمام ..والماده دى بتسيب المفاصل وتخلي السبع مش قادر يواصل, أو حتي يحط منطق فبينام من غير ماينطق
سمعت كمان ان اخونا هرقليز ابو دراع حديد ..وحديد على حديد يفعل الله مايريد ... مش عارفينه ولا ايه ؟؟؟؟ .. أيوة هو ده إللي واكلها والعة من غير مالسانه يطلع فقافيق وبقابيق... البيه الكبير بيأكل أعضاء الحزب الوطواطى أكل من اللي قلبك يحبه ... مقابل انهم يقولوا موافقون ويبصموا علي كلامه من غير لت وعجن ولا كاني وماني عند دكان الزلباني... نظام أكلني وأنا أمنجهك

وروشني وأنا أنعنشك

وانا ياعمو هرقليز باشا بصمجية من الدرجة الأولي وعمري ماهافتح بقي بكلمة
وبأحب الكفتة والممبار وياريت لو تدوقني الكافيار ... ماتخافش حتة كوفتاية تشتري صوتي وصوت إللي خلفوني كماااااان ... غير بقي الفلوس اللي ممكن توصل لمليون جنيه مرتبات علي حوافزعلي كله ... يعني أنام نومة هنية وأكل أكلة شهية وأرفع أيدي وأقول موافقون وآخد الفلوس والحوافز وماتنسوش بدالات السفر وبدالات العلاج
ياحلولي ياحلولي وده أيه ده اللي بيحصلي
والله وباضيتلك في الزريبة يامفقوعة
وكمان هاأطلع في التلافزيون ... وأعمل باي باي لماما وأطلع لساني للواد حُكشة الميكانيكي
إللي مبوظلي العربية الكارو اللي كنت بأسوقها قبل ماادخل علي المجلس
ياحلاوة ياولاد دي شغلانة هايلة,هايلة أوي
بصوا بقي لو خدمتوني ورشحتوني هاأسلق لكم قوانين علي مقاسكم, تفصيل يابويا تفصيل ... يعني اللي عاوزله واسطة عشان يشتغل في شركة بترول ويعوم علي وش الفتة ... أمضة صغننة من صوابعيني إللي شبه صوابع المرحومة زينب وهايتحقق لكم المراد وأبقوا أفتكرونا في البسبوسة, واللي عاوزله إمضة عشان يسافر يتعالج برة .. أو يستجم من نفسه انا ممكن اخدمه برموش عينيا بس هو يقشر وأنا عليا التنفيذ واللي عاوز حتة أرض يسقعها ويعمل عليها شوربة وتنغنغه بعد خمس سنين مافيش مشاكل دي حاجة بسيطة خالص .. أبسط من محشي البتنجان اما بقي اللي عاوز ابنه ينجح في ثانوية القطة العامية ويجيب مجموع يدخله اجدعها كلية فماعنديش مانع ادخله لجنة الامتحانات المحظوظة اللي ورقها متظبط للمحظوظين

وهازرع لكم جنب المجلس فدان كوسة بحاله عشان الحبايب وأهل الترعة اللي جارنا
ساعدوني وأنا هاأساعدكم
وساعتها بس هاأقدر أقول بنِفس إن شالووووووووت سيادتي دفعة للأمام
واللي عاوز شلوت ينقله النقلة التمام ماعنديش أي مانع ياعمنا الهُمام
وهأدعيلكم في المجلس قيل النوم وبعده ...وقبل الأكل وبعده, أن ربنا ينفخ في صورتكم وتييجوا تتجمبزوا جنبي في المجلس

أنتخبوني أنتخبوني ودقني أهيه لو من تاني راح تشوفوني
لووووووووووووووولي لوووووووووووووووووولي
عقبال عندك ياأم جُعلص
وأحلي سلام لسيد قشطة والبت هنومة النعسانة

بقلم


المفقوعه مرارتها

الثلاثاء، أغسطس 19، 2008

الرايق ورساله الدكتوراه

اخوانى فى كل مكان
الدكاتره عبده باشا الرايق يحييكم
انا مش فيرى فيرى هااابى بالاحداث الحاليه فى كوكبنا العزيز
احنا خلاص التخلف عندنا ذاد عن حده بالهبولى ...وكل الكواكب اللى بتطير حوالينا فى الجو اتقدمت واحنا لسه محلك سر...لسه قاعدين تحت العارضه بنمص قصب ...يقال والعهده على الراوى ..العلامه الكبير الواد حسن الفراش .. ان الكواكب التانيه وصل التقدم فيها لدرجه انهم بيجوا هنا بالليل واحنا نايمين ويدخلوا المعاصر بتاعتنا ويعملوا عصير قصب لنفسهم ويمشوا من غير ما يدفعوا ولا مليم ..والواد حسن برضه قالى... والدمع فى عينيه ..ان الناس بتوع الكواكب التانيه بيضحكوا علينا برضه واحنا نايمين ويدخلوا السينمات بتاعتنا ويشغلوا الافلام ويتفرجوا عليها براحتهم ...ده برضه يرضى حد ؟؟؟
ياناس ..يابشر ...يابيبول .. بلييز لسن تو مى
ده وصل بيهم الامر انهم بيتسربوا للقهاوى بتاعتنا ويشربوا الشيشه واحنا نايمين على ودانا
وبكده يخربوا اقتصادنا القومى والكوكبى ... ويدمرون حضاره كوكبنا العظيم
انا دوووونت هاااابى انا فيرى فيرى زعلان
احنا لازم نهتم بالكوكب بتاعنا ....ومن اجل التضحيه فى سماء العلم
ومن اجل رفع المعاماه عن كل البيبول
ومن اجل كوكبنا العزيز
قررت انا الدكاتره عبده باشا الرايق
عمل دكتوراه عن تطوير الكوكب لملاحقه الكوكب الاخرى
ويسعدنى ويشرفنى ان تكونوا اول من يناقش تلك الرساله
*************************
الرساله ...ليوسف شاهين
نو نو نو
قصدى رساله الدكتوراه للدكاتره عبده باشا الرايق
******************
اننا نعرف مدى تخلف كوكبنا ..وتاخرنا عن الكواكب الاخرى ..وان عرف الدواء قتل الداء
وما طار عصفور وارتفع الا كما طار وقع
وحسنه قليله تمنع كواكب كتيره
لذلك هيا بنا نضع يدينا فى ايدى بعضينا ... حتى ننهض بكوكبنا البكر الرشيد الى قمه الكواكب
احنا لا يهمنا بلوتو ولا حتى كوتوموتو ...ولا يهمنا اورانوس ولا حتى كفر الجاموس
اخوانى طبعا انا سامع واحد قاعد متكى على الكرسى وبيقول الحل ايه يا دكاتره ؟؟؟؟
اقوله ارمى اللبانه من بقك الاول ياولد وانت بتكلم الدكاتره عبده باشا الرايق
الحل ياسيدى بسيط
خامسا
******
احنا ليه مصرين ان السنه تبقى 12 شهر ؟؟؟؟؟
هو ده سر تخلفنا ....لابد من القضاء على منبع التخلف
لازم نخلى السنه 11 شهر ...او 13 شهر
وبكده ننير الطريق امام مليارات الشباب للمضاربه فى الاقتصاد ورفع حاله الجوع والتخلف العالمى العام علميا واقتصاديا وسياسيا ..ومن الان نو نو نو لل 12 شهر
اولا
***********
لازم نغير التغير الجغرافى المنتظر ...التغير الشامل الكامل المتكامل فى اسماء المحيطات
المحيط الاطلنطى والهادى والهندى
الاسماء دى سبب الكوارث واقامه الحروب
وهى السبب الاكبر فى معاناه ست البيت لانها بتحمض الاكل بسرعه
وسبب معاناه الباعه الجائلين لانها بتطفش منهم الزباين
يقال والعهده على الراوى برضه العلامه الكبير حسن الفراش ان كواكب المجموعه الشمسيه والبالغ عددها 46 كوكب واربع نجوم 215 قمر واتنين خداديه ولحاف ... قد استطاعت بكل جهد واناء وكد واكتداد ان تغير اسماء محيطاتها وده سبب تفوقها ورقيها ووصولها الى نهائيات لوس اورانوس لالعاب البلى والكازوز
ان الامانه تقتضى علينا ان نذكر للشعوب ان الاوان قد أن للتغيير
ذكر لى العلامه الكبير حسن الفراش ...انه قد قابل اسر تنتحر فى جماعات بسبب عدم تغير اسماء المحيطات ...وقال لى ايضا العلامه ..ان الناس تنتحر بالملايين مطالبه باسماء جديده
مثل محيط ...فرفر ..هوهو ..ياسو ...نيييو ..بااااكو
وانا اقول يجب علينا فعلا الانجذاب الى التقدم ..لا العوده الى التأخر
سابعا
*****
المصيبه الكبرى فى سبب تخلف كوكبنا هى المصايف
كل الناس بتصيف خلطبيطا بدون رقى واذدهار وفته وخضار
مفيش تخطيط مفيش نظام ....هرجله وقله وعى وقله ضمير... لازم نقنن التصييف ونزول البلاجات
بمعنى
اباءنا وجدودنا من سن 60 فيما فوق لا يعومون ولا يصيفون الا فى المحيطات
اخواتنا من سن 30 الى 60 لا يعومون الا فى البحار المفتوحه
شبابنا من سن 15 الى 30 لايعومون الا فى الخلجان
ابناءنا من سن 5 الى 15 لا يعومون الا فى القنوات
اطفالنا من سن يوم الى 5 سنوات لايعومون الا فى الترع
يعنى من المفترض ان تتوزع العائلات حسب السن وكل واحد ياخد ساندويتشاته ويروح مكتب التنسيق
ومكتب التنسيق يكون مسئول مسئوليه كامله وشامله عن توزيع المصييفين
وتكون الاولويه لاصحاب المجموع العالى قصدى السن العالى
وبكده نقدر ننهض بالاسره وبالكوكب حتى نساير التقدم العلمى الفيزيائى الكميائى الاستاتيكاتى الديناميكاتى
ونسحب البساط من تحت اقدام كوكب المشترك ..وكوكب العطار
وفى نهايه رسالتى احب ان اشكر صاحب مصنع الاقلام الذى اهدى لى القلم المكتوب به الرساله
واحب ان اشكر صاحب مصنع الاسمنت الذى قدم لى الورق الكبير بتاع الشكاير حتى اسهب فى كتابه الرساله
واحب ان اشكر عم محمد العربجى على مجهوده الرائع فى المساهمه فى توصيل الدكاتره عبده الرايق يوميا الى المنتجع العالمى بالمنوفيه عاصمه استراليا للسهر فى كتابه الرساله
الرايق فى 74 اغطسس 2008
السويس جنب الشارع العمومى على شمال الرصيف

دى رساله الدكتوراه بتاعتى اللى ناوى اقدمها للمناقشه تحت اشراف اللجنه العليا لدراسه احوال الكواكب
برئاسه العلامه الكبير حسن باشا الفراش
وعضويه كلا من امين السرك ابو مرسى الحدق ... وامين السندوق مصطفى السايب
بالاشتراك مع الممثل الكبير مرسى الوحش
وانا الدكاتره عبده الرايق
لا اريد من تلك الرسائل سوى رفعه الكوكب وتوقيف ولاد
الحراميه بتوع القصب من سرقه قصبنا
وسرقه افلامنا واحنا نايمين على ودانا
وتوقيف حراميه الشيشه لان الشيشه هى عماد الاجيال القادمه وما من امه سرقت شيشتها الا وغرقت على شوشتها
ملحوظه
******
انا عندى دكتاروهات بالعبيطه ...اكتر من 57 دكتوراه و 105 ناسسجتير..ومش محتاج الدكتوراه دى
لكن انا بعمل من اجل كوكبى العزيز
كوكب
كوكب
اممممممممممممممممممم
هو احنا فى كوكب ايه ؟؟؟؟؟؟؟؟؟؟؟؟؟؟؟
يادى المصيبه الدكتوراه هتروح منى
حد يقولى احنا فى كوكب ايه ربنا يسترها معاكم دنيا واخره

مع تحيات
الدكاتره
عبده باشا الراااااااااااااااااااايق

السبت، أغسطس 16، 2008

شبكه الهنا

التدوينه بقلم :إيما ..أم البنين

مدونة: يوميات أم البنين

omelbanen-ema.blogspot.com

شبكة الهــنــا

ساميه وسامي زوجين مكافحين ..جمع الحب بين قلبهم ..أصلهم كانوا جيران ..يعني نظام ساكن قصادي وبحبه ..بدؤوا حياتهم في شقه صغيره لكنها كانت جميله ...إتنازلت ساميه عن شوية حاجات مقابل إنها تعيش مع سامي في عش الزوجيه الصغير..مع الإنسان إللي بتحبه ..

وفي يوم وبعد العشاء المتين ..وكباية الشاي التمام قعدوا قعدة صفا أمام التلفزيون مع شوية لب وسوداني وكانت قعده عال العال لحد ما طلع المذيع إياه أبو دم خفيف بتاع تسعين دقيقه ..وقال خبر جميل ..الخبر بيقول:

إن في قرية مصريه من الصعيد قرر أهل الرأي والمشورة فيها إن الشبكه هتتلغي من القرية يعني كل عروسه هتتجوز مش هيجيلها شبكه وده تعاونا من الاهالي مع العرسان الغلابه إللي بيطلع عينهم في عمل شقة وتجهيزها من كله ..ما البنات دلوقت عايزين يتجوزوا بكل الكماليات..وكمان شبكه.. دي حوسة إيه دي يا ربي...

لحد هنا والقعده كانت جميله... لكن الست ساميه إتسرعت وإتشكت في لسانها إللي عرفت بعد كده إنه كان عايز قطعه..وقالت ..

والله برافو عليهم ..قرار سليم ..أما ناس عاقلين بصحيح ..يعني هما البنات هيعملوا إيه بالشبكه لما يتجوزوا وبيتهم ناقص غساله ولا تلفزيون..أو ما يتجوزوش من أصله ..

وهنا كانت الكارثه ..إنتهزها سامي فرصه جات له على طبق من فضه ورد زي الصاروخ ..

ولما ده رأيك.. ليه بقى إتشمللت وإشتريتي شبكه ..ما طلعتيش عاقله ليه وقلت نوفر تمنها ونجيب بيه حاجه في البيت ليه ..أهو كنت رحمتيني ..

ردت ساميه وهي مذهوله من رده إللي أسرع من سرعة الضوء..

وهو إنت كمان ما كنتش عايزني أجيب شبكه ..ليه هو أنا كنت طلبت منك حاجه ..ولا أهلي فتحوا بقهم وطلبوا منك شبكه بكذا ألف جنيه زي باقي الأهالي الناصحين ما بيعملوا ..

بس برضوا إشتريتي شبكه ..

يعني إيه كنت عايز تتجوزني ببلاش كده من غير شبكه..

خلاص يبقى ما تقوليش ..والله برافو عليهم ..والبنات هتعمل إيه بالشبكه ..والكلام إياه ده ..بلاش الشعارات دي وحيات أبوك..

طبعا ساميه سمعت سيرة أبوها إتحمقت وقالت:

ما لك ومال أبويا دلوقت ..الحق عليه إتساهل معاك كتير ..قال ده شاب لسه متخرج ..وبيبني نفسه بنفسه ..هنكون إحنا والزمن عليه ..ورضي بكل إللي قلته ..

بس برضو جبت شبكه..يعني مقصرتش..

وأنا كمان إخترت شبكه تمنها معقول علشان مكلفكش

وليه ما إخترتيش حاجه أرخص من كده..!!!

وهاختار أرخص من كده إيه

ما هو إنت طلعت ناصح ومرضتش تنزل معايا ننقي الشبكه ولمحتلي من بعيد بالمبلغ إللي في حدوده أشتري الشبكه ..

ونزلت أنا مع عمتي ننقي الشبكه ..وفضلت يا ولداه واخد الصاغه رايحه جايه لحد ما جالي كساح علشان ألاقي شبكه تمنها على قد فلوسك..وعمتي الأروبه تختار حاجات تحفه وأنا أقولها لأ مش عاجباني أصلها بلدي ..وهي طبعا في منتهى الجمال..كل ده ومش عاجبك..كنت أعمل إيه أكثر من كده..!!!

يعني لو كنت قلت لك بلاش شبكه ..كنت ها توافقي ..؟

تستعد ساميه للرد ..ولكن سامي لا يعطيها الفرصه للرد ..ويقول :

لو قلت آه تبقي كدابه ..دا كان شيء لازم حتى لو كنت إنت مش مقتنعه ..ولو إنك أكيد كنت مقتنعه وبالثلث كمان..

تشعر ساميه إنها مش عايزه تقول رأيها ..لأنه تسرع وقال رأيها بالنيابه عنها ..ولكن تسيبه لأ طبعاً وإلا ما تبقاش ساميه بنت أم ساميه ..

يعني كنت عايز زفه وفرح ومعازيم ..وقاعه قد الدنيا ..

ونيجي نفرج الناس على علبة الشبكه تطلع فاضيه وفيها دبلتين وواحده منهم فضه كمان ..دي تبقى كاسفة إيه دي ..دي كانت طنط كوكي ولا طنط سوسو أكلوا وشي وعملوها فضيحه في العيله لمدة عشر سنين قُدام.

شفت يعني الموضوع موضوع ناس ومظاهر وبس ..يبقى بلاش كلام الشعارات ده ..ملوش لازمه..

أنا مش بقول شعارات..

وبكل خبث..يرد سامي ..

خلاص لو كلامك ده مش شعارات بيعي الشبكه إللي مش محتاجاها دي وهاتي بتمنها الغسالة الفل أوتوماتيك إللي عماله تزني عليها كل شويه ..

وبدون أن تشعر ساميه بالخيَه إللي بيرسمها لها سامي ..ترد بكل عزم وتصميم ..

وماله ..إنزل إنت إحجز الغساله وأنا ها خد الشبكه أبيعها عند الصايغ إللي في أول الشارع ..

تدخل ساميه غرفة النوم علشان تجيب العلبه أم قفل إللي قفلاها على الشبكه ..

ولكنها فجأه تتذكر حاجه مهمه جداً ..راحت عن بالها ..دي باعت الشبكه من سنتين لما حبوا يدخلوا التليفون ومكنش معاهم فلوس وقتها ..يعني مفيش شبكه

تخرج ساميه مندفعة من غرفتها علشان تنتقم من سامي وتثبت له إنها مش بتقول كلام شعارات ..

سامي... سامي ...

مفيش سامي ..ما كانش موجود في الشقه ..واضح كده إنه راح يحجز الغساله ..

الأربعاء، أغسطس 13، 2008

ليلة العمر


حبايبى البنوتات القمورات .
انهارده هاحكيلكم عن ليله العمر ..
ليله سعديه المبلوله
استنوا متستعجلوش هتعرفوا حالا مين هى سعديه المبلوله أهىء أهىء أهىء
طبعاً يا جماعه اليوم ده بيكون اسعد يوم فى حياه كل بنت وكل واحده بتحلم بيه وانا كنت زى البنات بحلم بالفستان الابيض والفارس اللى لابس ابيض فى ابيض اللى هيخطفنى على الحصان الابيض
او حتى الحمار الابيض ابو عربية كارو .
المهم بعد طول انتظار جه اليوم الموعود
واخيراً
البنت حنين بقت عروسه وصحيت يوم الفرح على اغنيه ما تزوقينى يا ماما ..اوام يا ماما.. ده عريسى هياخدنى بالبيجامه يا ماما.. ومامتى واقفه فى المطبخ بتعمل اكل الفرح وجه خطيبى واخواته البنات علشان يروحوا معايا الكوافير .
ويا ريتهم ما كانوا راحوا
واحده تتخانق عايزة نفس الميك اب بتاعى والتانيه عايزة تسريحه الشعر والتالته عايزة تقيس الفستان بتاعى قلت خليهم يحلموا وبلاش انا !!!!!!!!
خرجنا من الكوافير وكل واحدة مسكت ايد وانا واقفة محتارة امسك ديل الحصان ولا امسك رجل البنطلون !!
ورحنا الاستوديو وصمموا اننا نتصور كلنا سوا طبعا مهى دى مش صور فرح لالا ...دى صور للتجنيد.. ولا صوره فريقنا القومى لما فاز بكاس افريقيا دى حتى باين من اسمها صور زفاف مش صور لحاف ...بصراحه انا كنت بصالهم وايدى بتاكلنى عليهم ...لكن برضه مسكت اعصابى ورحت بصه للمحروس جوزى وقولتله ...بكل غيظ... قولى يا حبيبى ما تخليهم يروحوا معانا الشقه .... وانا جايبه هدوم كتير يغيروا ويتعشوا ويناموا جنبنا والسرير كبير يساع من الحبايب الف
قالى لا يا حبيبتى..... انا هروح ابات عند امى وهما اللى هيباتوا معاكى رحت مزغرطة لولوووووووولى !!!
وقولت خير ما فعلت ما هو اليوم باين من اوله . ضباب يا ولدى ضباب ضباب ضباب
وصلنا الفرح ويا ريتنا ما وصلنا قال ايه مصممين انهم يقعدوا فى الكوشة مكانى قعدت افكر فى بالى ...هما البنات دول ملاحيس ولا ايه ؟؟ ...طب اروح اقعد انا بقى مع المعازيم ولا اجيب كرسى واقعد قدام القاعة واسلم على الضيوف واقولهم شكر الله سعيكم
ولا اروح اشتريلى ربطتين فل واقعد استرزق منهم قدام القاعه .....
المهم مش هطول عليكم ..خلصت الزفة وقولنا نخرج نتفسح وطبعا اخواته اللى وشهم علينا زى القمر راحوا معانا
رحنا القلعه وصممت اتصور فوق الصخرة وكان معانا مصور الفيديو وبعلى المصون يقولى بلاش وانا مصممه وفعلا طلعت على الصخرة ويا دوب بظبط نفسى وهوووووووووووووووووب جت موجه غرقتنى كلى بقيت شبه الكتكوت المبلول ... وكمان ايه كنت هقع فى البحر بس ربنا ستر لحقونى وراح جوزى قالى يلا بينا نروح قولت ابص فى المرايا لو ينفع اكمل الفسحه ويا ريتنى ما بصيت!!!!

مييييييييييييين دى ؟؟؟؟
سعديه المحروقه
لالالالالالالالالالالا
بقت سعدية المبلولة !!!
وصلنا البيت وفتح الشقه وكان معانا المصور وصاحبه ووقفت قدام الباب وقولت شيلنى يا حواش قالى ليه وانتى اتشليتى قولتله شلنى خلى اليوم ده يعدى على خير فعلا شالنى (هو يطول دنا حتى صغنونه وخفيفه) ويقولى ادخل برجلى اليمين ولا الشمال قولتله انت عندك الاتنين شمال يا حبيبى .. فضل محتار شويه يفكر فين رجله اليمين وفين الشمال وفى والاخر جاى يخطى اول خطوه فى الشقه وهووووووووووووووووووب اتكعبل فى السجاده والعروسه الحلاوه اللى شايلها اتكعورت على وشها وبقت فتافيت سكر .
صرخت بكلمه واحده طلقننننننننننننننننننننى ونتج عن الجوازة اللى ما يعلم بيها الا ربنا دى يا جماعه شرخ فى ايدى اليمين ورباط ضاغط طول شهر العسل مع انى كان نفسى يكون جبس علشان اديله بيه على دماغه.

نصيحه لكل شاب وكل فتاة بلاش تخليه يشيلك وشليه انتى ومن البلكونه وارميه .

واتمنى لكم حياه زوجيه سعيده

كان معكم اختكم سعدية المحروقة


الأحد، أغسطس 10، 2008

الفقــى لمــا يســـعد ..



الفقى لما يسعد .. تيجى له قرايتين فى ليلة

وانا قاعد عطلان بعد الدراسة سنين طويلة

اصحى من بدرى .. اسقى الزرع وآكل بليلة

وانزل اشترى الجرنال والفطار .. عشان العيلة

أصل أنا عايش مع امى وابويا .. واختى جليلة

افتح الجرنال، اشوف الوظايف الخالية اعمل هوليلة

ياااه .. خمس صفحات كاملين وظايف؟ افرح ياحليلة

هيه، مطلوب مندوب يندب حظه مع الشُغلة والشغيلة

يلف طول النهار على قدمه لحد ما تطلعله فيها بوقليلة

مطلوب ساعى يسعى بين المكاتب بالشاى والقهوة التقيلة

مطلوب سكرتيرة حسنة المظهر رشيقة .. عيونها كحيلة

مطلوب شغالة مقيمة ، يتيمة صحتها حلوة تمام مش عليلة

اقفل الجرنال، مفيش شغل ليا ، اعمل ايه؟ ما باليد حيلة

اشغل الراديو اسمع الى ربات البيوت وأبلة فضيلة

وأقلب فى قنوات الدش افلام واغانى منيلة بستين نيلة

هو ده يومى من صباحه لمساه

وفى يوم مش ممكن ابداً أنساه

قريت مانشيت كبير احمر فحواه

ان دفعتى هايعيونوها دفعة مستثناه

مع انى متخرج من ست سنين ياولداه

جريت رهوان قدمت اوراقى مستوفاه

وقعدت انتظر بقى الجواب لاصفر اياه

شهر ، اتنين ، تلاتة ، اربعة، وا يأساه

وف يوم سمعت البوسطجى بينادى

يافلان الفلانى انزل بسرعة هنا غادى

جالك جواب بريد مُسجل .. مش عادى

عايز الاول حلاوتى نهارك ياحلو .. نادى

فتحت الجواب، ايه ده؟ وزارة الزراعة؟؟

دا أنا ليسانس آداب تاريخ يا جماعة!!

هاشتغل ايه انا فيها؟ اكونش مُنقذ مجاعة؟

او باحث فى الجذور التاريخية للبلاعة؟

متابع حشرات يمكن!

او حتى زرعة لسة بُرعم

ماهو فى اخر الشهر هايدونى ايه يا حسرة

غير مرتب حٌصرم


كاميليا

الخميس، أغسطس 07، 2008

5 عائله الضاحكون .....طب فايف ستارز

اخوانى الاعزاء
زى اى عائله ممكن نتعب واى فرد مننا يمرض ... وزى اى عائله ممكن نودى مريضنا لمستشفى حكومى ...لكن توهنا فى الطريق ومش لقين مستشفى حكومى ..فرنسا عيانه مننا ..وقدمنا المستشفى الخاص لكن عفش بيتنا كله ميجيش تمن ليله فى المستشفى الخاص ...نعمل ايه ؟؟؟؟؟؟
**************************************
الرايق :- اه يابطنى ..اه يا دماغى... اه يا شعرى ...لا بلاش شعرى ..اه يا مناخيرى اه يا ضهرى
مفروسه :- بابا ..انت ياسى بابا ..ماكفايه زن هو انت اللى تعبان ولا ماما كده هتخلينا نتخايل
الرايق :- اه منك انتى يا مقصوفه الرقبه ماهى فرنسا تتعب وانا ادبس فى الدواء ..كل مانجيب لها علاج ونروح لدكتور تانى يغير العلاج ..ويكتب علاج جديد ..وانا بقى يصعب عليا ارمى العلاج القديم اقوم شاربه كله ..وعلى راى المثل وجعك يابطنى ولا كب الدواء ...اه ياعينى ..هو انتوا طفيتوا النور ولا ايه ؟؟؟؟
...قولولى اعمل ايه ياعيال مش قادر اوديها مشتشفى خاصه ..اسيبها كده تموت فطيس ولا ابيعها لبتاع الروبابيكيا .
. همس الاحباب :- اه يابطنى...... اااااااااااااااااااااااااااااااااااااااااااااااااااااه
الرايق :- مالك ياولد يا خالد
همس الاحباب :- خالد مين بقى يا عمونا هو البتاع اللى كان فى ازازه العصيرده وشربتهولى امبارح دواء ؟؟؟؟
الرايق :- طبعا دواء انتى قلتلى هات حبه عصير يابابا وانا كنت زهقت من طعم وريحه الدواء قلتلك خد الازازه كلها ليك بالهنا والشفاء
همس الاحباب :- هنا وشفا ...ااااااااااااااااااااااه ...يا بطنى

بلطجيه هانم عويل :- ربنا ما يحرمكم من الهبل يا عيله الرايق بنتي أنا تروح لبتاع روبابيكيا ..منك لله يارايق ماهو برضه البركة فيك انت وعيالك جبتوا لبنتي الضغط بطلباتكم إللي مابتخلصش
ماهو لو أنت بتسمع الكلام وتوديها لدكتور عليه القيمة معاه دكتوراه بحق وحقيقي
لكن انت بتستخسر في بنتي وموديها لدكتور حمير الفيزيتة بتاعته حزمتين برسيم ...والاكاده بتشربوا الدواء بتاعها انت والمفعوص اللى اسمه خالد ده كمان
ده جوز بنتي التانية ربنا يعلي مراتبه كمان وكمان لما مراته بتتعب بياخدها جري علي مستشفي أستثماري
تخرج منها ذي الحصان مش انت يارايق مستخسر في بنتي ... ماهو أنت لو وديتها لدكتور كبير من الأول كان زمانك ريحت ووفرت

الرايق :- حماتى الغاليه بلطجيه .......ههههههههههههه مستشفى استثمارى ؟؟؟؟ هى دى معموله للشعب الغلبان يا حماتى ...دى معموله للاغنياء والسياح العرب ..اما اللى زينا اخرته يقعد على الرصيف ويشم ريحه الدواء من بره ..دى بقت مستشفيات خمس نجوم يا حماتى

مفروسة:هههههههههه روبابيكيا يا رايق فرنسا تبيعها لبتاع روبابيكيا.....و كل ده علشان كام روشتة اتغيرت...امال يعني ماجبتش سيرة التحاليل والاشاعات يا ابو الروق...ده كل دكتور تدخله يبص فى الروشته القديمه على التحاليل القديمه..و كانه ركبه عفريت...وقعد ينونو زيك كده...و تلاقيه يكتبلك روشته غيرها و يباصيك على معمل تحاليل تاني....و في الاخر بما اننا بتنجان على الآخر مش عارفين فيه إيه....انت عارف البت انتصار اللى فى اول الشارع ابوها الله يرحمه...كح قامو جريو بيه على الدكتور كتبلهم دوا و قلهم لازمن ولابد تعملوا تحليل...الراجل يا حبة عيني عملهم..جه سخن و الكحه زي ماهيه...قاموا جري راحو لدكتور تاني...و عملو نفس المشوار يا عيني...فضلوا عالى الموال ده قول شهر..و عدي عقبال امالتك و املت امي ...على 15 دكتور ب 15 روشته ب 15تحليل...شوفت الناس ..مش انت بتعيط من 3روشتات.......بس يا رايق ما سالتنيش الراجل مات ليه؟؟؟؟؟ انا اقولك جه فى يوم يا حبة عيني مش عارف هوه بياخد من انهي دوا...فقام قالك عليا الطلاق لآخدهم كلهم...و خادهم من هنا وراح على البساتين فى اول طيارة.....
انت لسة بادري يا عمونا...انت لسه فى التالت هههههههههههههه

الرايق :- التالت يا مقصوفه الرقبه ليه قالولك عليا برجع

مفروسه :- بص يابابا انت توكل على الله و دخلها مستشفى خاص ياخدو منها كليه على قرنيه..و تدفعلهم برضه..يعني يشركوها و تدفعلهم....فى الوقت ده بالتمام..حتنفع ياخدها بتاع الروبابيكيا...هههه قال روبابيكيا قال

سومه: حبيبتى يا فرنسا قالبى عندك يا اختى كله من عبده اللى حيجيبلك الكافيه
منهم لله الرجاله....قال ياخدونا لحم ويرمونا عضم ويقولك روبابيكيا
حقه ملكش حق يا سى الرايق.....اسمعى يا اختى بلا علاج بلا بتاع هى وصفتى اللى تخليكى زى الحصان اه امال ايه ماهو مش كل من دخل كليه الطب ولبس بالطو يتقالوا دكتور...عصبى راسك برباط ...وهاتى معلقتين فربوخ على معلقتين تريوخ....واغليهم وبالشفا وادعيلى
هو احنا ياختى طول عمرنا سمعنا عن مستشفيات وعن دكاتره قطيعه تقطع الطب وسنينه....

appy:- بقول ايه انا بودى الخرفان بتاعتى عند دكتور المفروض انه متخرج يا عينى باطنه بس علشان مرتبه مش بكفيه بيشتغل بعد الضهر بطرى ايه رايكم بقى نورديها هناك وعلى فكرة كشفه مش غالى

مواطن مصرى : لا اله الا الله الملك و الدوام لله
وا اسفاه .. ماماتى تعبانه ...يا عم رايق ما تطلع من تحت البلاطه و نوديها مستشفى الجولف اللى سعاد نصر عملت فيها العملية
اصلهم بيقولوا عليها انها حلوه زى اغلب المستشفيات , و بيقولوا ان عملية سعاد نصر نجحت بس المريضة ماتت
يبقى العيب فى المريضة مش فى المستشفى!
و الا اقولك تعالى نوديها اى مستشفى عام اهى تقعد لها يجى خماشر تمناشر سنة فى الاستقبال لحد ما يجى دورها
و لما يجى دورها الدكتور ينسى ابن اخته فى بطنها بس العملية تنجح!

الرايق :- مستشفى حكومى ...هههههههههه هى لسه فى مستشفى حكومى ؟؟؟؟؟
بذمتكم لسه فى مستشفى حكومى ؟؟؟؟؟؟؟؟؟؟

الاثنين، أغسطس 04، 2008

زيت العفريت للتخسيس





طبعا عارفين النحله والدبور وهى غاويه طبعا الفرجه على التليفزيون طول الوقت وخاصه بانوراما دراما اللى فى نص المسلسل بتعمل 100 اعلان

النحله :- ايه زيت زعبوط العفريت لتطويل الشعر ده

الدبور :- ما تجبيه يا ستى عادى يمكن القرون الاستشعاريه بتاعتك تطول ولسانك يقصر شويه

النحله :- طيب يلا هات 300 يورو نجيب

الدبور :- اتصلى يالا لما نشوف اخرتها فى البتنجان اللى بيطلع علينا ده

النحله :- الو ممكن زيت زعبوط العفريت لو سمحتى وهيوصل امتى وحسابك كام (400يورو) بالتوصيل اوك هستنى بكرة تشاااو

تانى يوم

الدبور :- وصل يالا استعمليه ورينا النتيجه بقى وربنا يعديها على خير يا قلبى

النحله :- بعد شهر ولا اى حاجه يا ديبو يا حبيبى اعمل ايه هو احنا اتنصب علينا انا هتصل ازن عليهم

الدبور:- شوفى حاجه تانيه ده اعلان عن التخسيس تلات عبوات لتلات مناطق عبارة عن محروق قشر البطيخ مع زيت نمله مفقوع مرارتها ورجلين ضفدعه مطلق وسحليه مقلوبه على قفاها

النحله :- ايوة وبيقولا هيدوا عليه جهاز لشد ونفخ وفك وربط الاجنحه حلو قوى وكل ده ب1000يورو بس

الدبور :- اتصل واجيب الجهاز معاه كمان يمكن تبقى شبه النحله بوسى ولا حاجه

النحله :- بعد اسبوعين ايه ده انا جلدى لونه عمل كده ليه وكمان الجهاز فيه خرم من ايه

الدبور :- اسكتى يا نونو مش لما نزلت وسط المخ بتاع آبى لقيت بيتباع الحاجات دى هناك وبارخص كتيييير جتنا نيله هنفضل كده طول الوقت نجرى ورا اعلانات والحاجات موجوده فى السوق بس اللى يدور

آبى :- بسسسسسسسسس منك لها زهقتنونى فى عيشتى والله اسيب عليكم خرفانى يا طقم تخلف زيت زعبوط العفريت لما يلهفك انت وهى ولا قشر بطيخ يتفتح على دماغك ولا جهاز يكهربك ومنعرفش نشدك منه انتم مالكم مش بتفكروا ليه وتعرفوا ان كل ده ممكن يكون فيه الكويس واللى مضر كل حاجه تجروا زى المخابيل على التليفون وكل ده علشان مش عاوزين تهزوا طولكوا وتنزلوا الاماكن تشوفوا الحاجات على الطبيعه انتم وصل بيكم الكسل لكده زهقتونى منكم لله يعنى ربنا ادانا عقل نفكر بيه ولا نعمله باميا الحاجات متوفرة فى كل مكان فى الازهر وحارة اليهود وكل بلد فيها لو مش قادرين تعالوا القاهرة هتلاقوا خلوا اصحابكوا يسألوا والحاجات ارخص اللى بيجى فى التليفزيون بيكون زفت وغالى حتى جربته على خرفانى الوانتهم اتغيرت طيب جزاء ليكوا هولع فى التليفزيون وابقوا خلوا بقى زيت جلد الصورصار ولا كريم حراشيف التمساح تجيب لكم واحد وابقوا اتغطوا بجلد التعلب المكار اللى بيقولوا لكم عليه الله يجننكوا الاعلانات والكسل هيجننوكوا والكارثه انكم خلاص مستنين يقولوا لكم توصيل الشغل مجاننا للبيت تصبحوا على جهاز تويستر يعلى الفولت بتاعكوا ولو سمعت صوت حد فيكوا هحطه فى سرير البيبى اللى اشتريته من اعلان امبارح لانه مش هيكفى غير واحد فيكوا مش بيبى علشان هيقع جتكم القرف اتخمدوا
آبى هانم بتنجانى

الجمعة، أغسطس 01، 2008

الصداع الشريرررر... والدماغ الخطير

الصداع الشريرررر... والدماغ الخطيررررر
تراتاتاتاتارا تيراراتتتتاراا تيراراتتتتتارتاراتيرارريرارارا
ههههههههه متستغربوش .. ده انا بس بدندن بمقدمة " انا قلبى خالى ولا انشغل بك " لليلى مراد
ما انا أصلى فى ساعات التجلى تلاقينى اشتغلت دندنة كده مع نفسى .. وانا بنضف الشقة ولا بغسل الاطباق
أحلى حاجة فى الدنيا دى لحظات الصفا والهدوء النفسى ولو انها قليلة جدا ونادرة أوى فى حياتنا .. ويمكن اهميتها جاية من ندرتها .. إيه ده ؟ خدوا بالكم دى نظرية اقتصادية عشان بس تعرفوا إنى مش زى اى حد ولا اى سبت وكلامى كله حكم هههههههههه
وعشان تعرفوا سبب الروقان .. تعالوا معايا واسمعوا الحكاية
يحكى فى قدييييييم الزمان ......... لا لا لا مش دى .. استنوا استنوا لقيتها أيوووووووه هى دى الحكاية .. صحصحوا معايا
بعد يوم شاق من الأشغال الشاقة المؤبدة الاسبوعية ونظام " اكنسى امسحى سيقى نفضى اكحتى اغسلى نضفى روقى .. اوعى تهلفطى او تتلكعى ولا تتجرمى شهلى لمعى " على رأى بنات المؤسسة فى مسرحية هالة حبيبتى
أصابنى صداع .. شرير .. متآمر .. صهيونى
أخدت له سيتال أقراص500 .. انه يسيبنى فى حالى أبدا ابدااااااااا .. خالص خاااااااااالص
وأنا أصلى من يوم ما حملت فى ابنى دودو وانا مش باخد غير سيتال اللى الدكتور كان كاتبهولى لأنه خفيف وغير مضر للحوامل والمرضعات .. يبقى أكيد أكيد ملوش الأضرار المعتادة للمسكنات الأخرى .. وطبعا السيتال العجيب معملش حاجة .. واستمر الصداع فى الدق والهبد فى طااااااخ طييييييييخ طوووووووخ فى رأس الغلبانة اللى هى انا .. طب أعمله إيه ده عشان يرحل عنى ؟؟ .. أعمله زار وأجيبله شمهورش وحبشتكاناته ولا أخبط راسى فى الحيط ولا اعمل ايه ؟؟؟
الرحمة من عندك يااااااااارب
قووووووووووم إيه ؟؟؟؟؟؟؟؟؟
واحدة جارتى بنت حلال قالتلى ان فيه واحد بيعدى كل يوم جمعة بعد الصلاة ومعاه ادمغة سليمة مش بتصدع .. أنا بينى وبينكوا مكدبتش خبررررررر وفحصت ومحصت وعملت استبيان بين الجيران أكدولى الخبررررررررررررررررررررررر
قعدت استنى يوم الجمعة .. وإذ فجأتن وأنا واقفة فى المطبخ ألاقى صوت عربية ماشية بتنادى .. " ادمغة سليمة للبيييييييييع .. بيب بيب بييييييييييب " قمت جريت على البلكونة وبصيت .. لقيت عربية نص نقل ملياااانة ادمغة .. بس المشكلة انى فى الدور الرابع ومش هاعرف أنقى كويس .. ولو نزلتله السبت ممكن يخمنى ويدينى دماغ مش مقاسى ولا تكون مصدعة ولا مخبوطة ولا حاجة .. قلت مبدهاش .. كان ابو دودو لسه مارجعش من بعد الصلاة .. رحت آخده دودو ونزلت تحت البيت وتوجهت للعربية ودار بينى وبين البائع هذا الحوار
أنا : إزيك يا حاج .. انا سمعت عنك كل خير .. عايزاك كده تنقيلى دماغ حلوة على مقاسى بس تكون زيرو .. " لا مش صلعة يعنى وكل واحد عارف نفسه ههههههههه قصدى تكون لسه بالتيكيت بتاعها "
الحاج : كل ادمغيتنا ميه ميه يا مدام .. شاورى انتى بس على اى دماغ تعجبك وهديكى عليها ضمان 6 شهور
أنا : بجددددددد .. خلاص هاتلى دى بس عرفنى طريقة الاستخدام .. وشاورتله على واحدة كده على يمينى
راح فاكيكهالى من كيسها وقاللى : ودى بتتلبس كده من الرقبة وقعد يشرحلى .. ودى طبعا يا مدام زى ما انتى شايفة فيها تجاويف خالية للعين والانف والفم والأذن .. ده غير انها مش بتغطى الشعر .. " يعنى زى الماسك اللى بيغطى البشرة بس "
أنا : ودى بتتلبس على طول ولا إيه ؟؟
الحاج : أيوه يا مدام البسيها على طول ما هو زى ما انتى شايفة كل دماغ لها لون بشرة مختلف .. وعلى حسب لون كل واحد بياخد اللون اللى يناسبه .. الأبيض بياخد الأبيض .. والأسمر بياخد الأسمر .. يعنى مش هتبان ده غير إنها مش بتتأثر بالماء ولا بالحرارة وتعمل على تلطيف حرارة الجسم .. والاهم أنها بتمنع وصول القلق والتوتر للعقل وتخلى اللى لابسها فى حالة انسجـــــــام
أنا قلت بالى : الراجل ده حافظ ولا فاهم ؟؟؟ معقول الكلام ده ؟؟؟
لقيته بيكمل .. وياريته ما كمل : واعتبريها زى طقم الأسنان

أنا : إيييييييييييه ؟؟؟ طقم الاسنان ؟؟؟؟؟؟ انت شايفنى هاتمة ؟؟؟؟؟؟؟؟؟
لا بقولك إيه خلى بالك .. ده انا أقرقشك وانت واقف
الراجل لحق نفسه وقاللى : مقصدكيش يا مدام العفو .. أنا بس قصدى انها سهلة فى التعامل معاها
أنا : خلااااااص .. أدينى هجرب ولو نفعت معايا .. هابقى آخد منك تانى لماما وزوجى .. واعين لإبنى فى جهازه .. مهو الصداع ده مش بيسيب حد
وأدينى أهه بكلمكوا وانا لابسة الدماغ العجيب ومتسلطنة عالآخر وبدندن " انا قلبى خالى ولا انشغل بك " يا سلاااااااااااام .. مفيش احلى من روقان البال
تحبوا اشتريلكوا المرة الجاية .. نسيت اقولكوا انها بـ 30 جند .. عشرين ليا .. وتمنها 10 هههههههه يظهر انى ها خلف الرايق فى الملاعب ههههههههههه
ها مين قال هات ؟؟؟؟؟
العرض سارى حتى نفاذ الكمية
أو نفاذ الصداع من الكره الأرضية
كانت معكم
سالى فوزى
من وحى صداع شرير متآمر