الثلاثاء، سبتمبر 09، 2008

العيب عيب عبدو البواب!!؟؟

كان ما كان من سومه وبطيخ فى اول يوم رمضان


سومه:الوو صباح الخير يا طيخه...

بطيخ:الوو ...انا فين وانتى مين....

سومه:بتدعك فى ودانك ليه يا حبيبى اجيبلك سلاكه
بطيخ:عرفتى منين انى بدعك ودانى ...وانتى متاكده انك سومه...طيب هاتى اماره

سومه:اه انا سومه وبالاماره بتصل بيك عازماك اول يوم رمضان انت وطنط اوعوا متجوش

بطيخ:احم احم سومه هو مين اللى طابخ بالظبط؟؟

سومه:ههههه متخافش ولا يكون عندك اى فكره ...

بطيخ:معناه ماما هى اللى طابخه يا حبيبتى ؟؟؟

سومه:لا طبعا مش حخليها تحط ايدها فى الاكل انا عاوزه اشرفك قدام امك يمكن تبطل نأوزه عليا

بطيخ:اسكووووووووووتى مش ماما صحتها تعبانه جدااا يعنى كنت بقول ناجلها ليوم العيد حتى الواحد يكون فاطر وعامل حسابه

سومه:بطيييييييخ قسما عظما لو ما جيت لاكون لاغيه الخطوبه خالص ومفشكله الموضوع...انت ازاى مش واثق فيا

بطيخ:حاضر حاضر خلاص من عينى انا جى ان شاء بس بلاش زرزره ...الله

طيب ما تدينى حماتى اكلمها

سومه:بطيييخ

بطيخ:خلاص مش مشكله رمضى عليها انتى نيابه عنى

___________

ماما:سومه يا حبيبتى انتى ناويه تطبخى لوحدك

سومه:اه يا ماما يا حبيبتى ارتاحى انت خالص ومتقلقيش

سوسن:طيب سؤال هو الاكل اجبارى ولا اختيارى يعنى ممكن اكمل صيام للسحور

انا اصلى انا يعنى .... كنت بقول لو اساعدك واريحك

سومه:لا يا حبيبتى متخافيش انا حتكفل بالامور

الاخت الصغرى:مع نفسكم ان شاء الله انا نازله افطر مع صحباتى سلام

سومه :بنت انتى يا بت ارجعى هنا ماشى يا مقروده انتى الخسرانه

سوسن بتهمس لماما:الحمد لله ضمنا حد يعيش من العيله ويدعيلنا لما نموت مع انى متاكده انها ندله ومش حتفتكرنا

____________

سومه :عبده يا عبده انت يا عبدووووووووووووو........

عبدو البواب:نعم يا ست سومه

سومه:هاتلى اتنين كيلو خرشوف....اممم وفرختين صغيرين متقطعين اربع ....اه وكيس نشا عشان المهلبيه....وهات الكرنبه الصغيره دى....وهات كيلو ريش ضانى ...وياريت كيلو بتنجان....وكيلو سمك فيليه.....متنساش حزمتين ملوخيه...وكيس مكرونه ريجينا...

الله انت متنح ليه يا جدع انت...خد معاك 50 جنيه تتنطط فوق تحت تجيب بيهم الطلبات....

البواب :هااا من عينى يا ست سومه ....عن ازنك ....(بيهمس)باينها حتقلب بحريقه النهارده...

____________

سوسن:البواب جاب الطلبات خلاص؟؟

هوااا....هو انتى حتعملى ايه النهارده

سومه:شوفى يا ستى حعمل عقبال عندك ملوخيه بالسمك شوفتها فى التليفزيون شكلها يجنن

وحعمل بتنجان بالمهلبيه

وحعمل سلطة خرشوف بالمايونيز وقليلا من القرفه

وحعمل مكرونه بالريش الضانى

والفراخ حقطعها مع الكرنب واعمل اكله صينى اسمها توكا

والحلو صوابع احمد ابن ذينب وبقلاوه بالزبده

سوسن:شوفى هو بغض النظر عن صوابع احمد والمهلبيه بس الحمد لله الحاجه الوحيده اللى عارفاها مكرونه بريش ضانى...حتلحقى تعملى دا كله

سومه:ههههههه يا بنتى اصلا اصلا الاكل تقريبا خلص...الفضل للصينين ..كله نى فى نى....

سوسن :شنشنششنشنش (سوسن شمت ريحه)........ايه دا فى ريحه شياط الحقى

سومه:شياط ايه يا عبيطه دى اللحمه بس بتتشوى

_________

ترررن

سومه:بطيخ ازيك يا حبيبى ...ازيك يا طنط اتفضوا نورتونا

طنط ام بطيخ:نحمده يا بنتى ربنا يستر....قالولى انك طبختى النهارده

سومه:اه حتدوقى وتقوليلى رايك بقى .... اتفضلى يا طنط اتفضل يا بطيخ

الافطار جاهز ياله يا ماما سوسن ياله خلاص مدفع الافطار

بطيخ:امال فين المفعوصه اختك ؟؟

سومه:راحت تفطر مع صحبتها

طنط ام بطيخ:نفدت بجلدها...بصوت واطى....بس تعرفى الاكل شكله هاااااااااايل

سومه:ولسه الطعم

بطيخ :سومه هى الفرخه شايفها حمرا لسه...حاسسها مستويتش!!

سومه:ايوه طبعا ما هودى طريقه صينيه الاكل نى فى نى

بطيخ:اه هى هى هى معلش جهل بقى ...هو انتى ازاى وقفتى المكرونه كدا ...!!

سومه:حمرتها يا حبيببى ورصيتها

طنط ام بطيخ:صينى برضك يا بنتى صح؟؟؟

سومه:تمام يا طنط

بطيخ :بقول ايه يا سومه مش كنتى عاوزه تلغى الخطوبه يعنى انا فى الوقت الحالى معنديش اى مانع

سومه:قصدك ايه ان اكلى مش عاجبك؟؟؟

بطيخ:لا يا حبيبتى هو انا اقدر... انا بس ....اممم ...بصى هو عموما هى مش غلطتك ....

سومه:يعنى ايه؟؟

بطيخ:يعنى الغلطه من عبدو البواب هو اللى نسى اهم طلب فى الطلبات

سومه:هو ايه اهم طلب

بطيخ: الاول نسى الطباخ الصينى والتانى لما نسى يجيب الطباخ الصينى نسى يجيب معاه الاسعاف الصينى برضك لزوم الطوارىء!!؟؟

_____________

متنسوش كلكم معزومين ع الفطار وخصوصا جمعاوى

ملحوظه
نونو عبدو البواب ملوش علاقه خاااااااااالص بعبدو الرايق....بس تشابه اسماء

والملحوظه التانيه

دى مش قضيه سومه لوحدها دى قضيه كل سيدات البيوت اللى بتتفزلك وتسمع كلام الشيف ميمى وسوسو وتوجع بطننا رجاء ارحمونا

____________
كانت معكم اجدع طباخة فى الكون الشيف سومه_87

هناك 12 تعليقًا:

مواطن مصرى نايم يقول...

و الله بطيخ دا حتجيبى اجله يا سومه
حيموت اقرع
او عالسكينة
ههههههههههههههههه
بوست جميل يا سومة

مواطن مصرى نايم يقول...

هيييييييييييييييييه
تانى تعليق
احجز و اجى اعلق
هههههههههه

مواطن مصرى نايم يقول...

يعنى اروح اقرء و اجى الاقى مواطن مصرى نايم واخد التعليقات لحسابة و ابقى تالت تعليق كده ماشى

tamer.sala7 يقول...

مع ان بطيخ ده صعبان عليا

بس سؤال رفيع كدة

هو في خرشوف دلوقتي ؟؟؟

الدفاع يقول...

اعتقد ان الحاجه الوحيده اللى تنفع تتاكل فى اللخبطه دى هى بطيخ خطيبك

appy يقول...

يا ولاد الحلال وواحد بطيخ تايهه ومحدش لاقيه باين البت سومه قتلته هههههههههه
ايه البوست اللى اطول منك ده يا اوزعه هههههههه

M.K يقول...

ربنا يعين بطيخ أفندي عليك..
بس بجد أجدع وحده تطبخ صيني..

Doba يقول...

البوست زى العسل يا سمسمة
تصدقى ان انا بقالى فترة نفسى اجرب حاجة جديدة فى الأكلات ولسه كنت بلم الآراء

بس انتى وضحتيلى فعلا ان مينفعشى نجرب فى الناس الغلابة دول فى رمضان

نستنى لما يفطروا ويعدى رمضان وأجرب بقى فيهم براحتى

نيههاهاهاها

ضحكة شريرة لزوم اللى هعمله فيهم
البقاء للأقوى

هع
مين هناك
=================
يا بختها المفعوصة اللى هربت
اهى نفدت بأكله حلوة

تحياتى لخفة قلمك
هبة

سومه...مجنونه فى بلد عاقل يقول...

والله ما عرفت ان بوستى نزل غير النهارده مش تعطسوا ولا تقولوا اى حاجه

MaGn0liA... يقول...

بس فى اختراعات اكل بتنفع

انا بجربهم و الله :D

بوست حلوه

و هنجيب الاسعاف الصينى المره الجايه

هههههههههههههه


سلامات :)

عبده الرايق يقول...

ههههههههههههه
مع الاعتذار لبطيخ
السنه دى عمنا بطيخ مكانشى له طعم
سووووووووووومه يا حشريه
عليكى وعلى منجاوى
او جوافاوى
او شماماوى
اما بطيخ طلقيه بتلاته

جمعاوي يقول...

السلام عليكم سومة

بصى بقى هى غلطتك انك ما تابعتيش البوست اللى انا طلبت العزومة مع بطيخ باشا لأنى كنت اشترطت انى اعرف
وصفة الحلو (أحمد بن ذينب ) قبل ما آجى بس طالما انا ما عرفتش الوصفة يبقى العزومة معلش بقى هاضطر الغيها هههههههههه هانفد بجلدى على رأى طنط ام بطيخ هههههههههههههههه

بجد ضحكتينا يا سومة ومتشكر لحضرتك جدا على العزومة الطيبة دى وان شاء الله بعد رمضان ابقى اتعزم انا وبطيخ برده بس على صوابع احمد بن ذينب بس عاوزين نحلى بعد رمضان بقى ههههههه

دمتم لنا بخير ويلا سلام