الأحد، ديسمبر 21، 2008

بيت الاشباح

النهارده فرحى يا جدعان عايزه كله يبقى تمام
ايوه اخيراً
وبعد وجع قلب وجمعيات وسلفيات .ونوادر وحكايات
الشقه جهزت وطبعا علشان انا بنت حلال مصفيه ..وبحب اللوبيا والملوخيه ..لقينا شقه فى رشدى قريبه جدا من البحر... والراجل صاحب البيت الله يعمر بيته متساهل معانا جدا تخيلوا شقه فى رشدى 4 غرف وريسبشن ومطبخ و2 حمام لا وكمان سوبر لوكس بكاااام 5000 جنيه....طبعا مش مصدقيينى .. لكن هو ده اللى حصل ..وقال لينا كمان ان اول ايجار شهرين هديه منه لينا... بمناسبه جوازنا المبارك .... وكنا شويه وهنبوس ايده وامى تزغرد.. وانا ارقص وخطيبى يبوس فى الراجل زى ما يكون لسه راجع من العراق
لكن ...وما اداراك ما لكن ......

الجمعه اللى قبل الفرح حصلت حاجه غريبه اوى.....( الاطفال الصغيريين يبتعدوا ) .... بعد ما طلعنا العفش وفرشنا وروحنا خلاص ...تانى يوم لقيت الجيران اللى فى العمارة اللى فى وشنا بيتصلوا بيه وبيقولوا ليه الحقى العفش بتاعك كله فى الشارع...انا قولت ازاى ومين اللى نزله دحنا فى الخامس طيب ولو حرميه مش سرقوا العفش ليه؟؟؟؟؟.... قالت ليه مش عارفه تعالى وخلاص وطبعا لان العمارة اللى انا فيها مش فيها ولا بواب ولا جيران غيرى روحت وطلعت العفش تانى وفرشنا العفش من جديد ....وخلاص


وجه اليوم الموعود
والفرح خلص وجوزى عمال يغنى اسبقنى يا قلبى اسبقنى ع الجنه الحلوة اسبقنى ....وانا اغنى على عش الحب وطير ياحمام ....والمعازيم يغنوا الجوز الخيال والعربيه على راسى يا هانم وعنييا ... ووصلنا الشقه واحنا الاتنين بنغنى وابتدى وابتدى المشوار واه يا خوفو واه يا خفرع من اخر المشوار ... وفتحنا الشقه ولقيت النور كله مولع والتليفزيون والغساله والتسجيل والمرواح حتى الكشاف الاحتياطى ...كله كان شغال

بعلى العزيز بص لى وقالى : مين عمل كده ؟؟؟؟ قولتله وانا مزبهله : ولا اعرف انا كنت هنا امبارح وطفيت كل حاجه قبل ما امشى.... قالى وهو بيحاول يتماسك : يمكن تكونى نسيتيهم ....قولت: يمكن..... بس انا بقول فى سرى انا متاكده انى طافيه كل حاجه بس يلا خلى الليله تعدى.... قالى : قومى جهزى العشا ....دخلت اجهز العشا ومش لقيت عشا .. طبعا انا قلبى سقط فى رجلى ازاى ماما تنسى العشا ...اتصلت بماما . قالتلى : انا مجهزه العشا كله عندك فى المطبخ ...قولت ليها وانا فى حيره : خلاص يا ماما يمكن تكون قطه اكلته ....ماما سكتت ....راح جوزى سالنى فين العشا ؟؟؟؟ قولتله : مش لاقياه باين قطه اكلته... قالى: نعم نعم نعم ..هو من اولها هنصيع على بعض ولا ايه ؟؟؟ قطه هتاكل ديك رومى محشى حمام ...والحمام محشى فريك... وبرامين رز وصنيه بطاطس؟؟؟ ... قولتله : ممكن بتحصل فى احسن عائلات القطط ... قالى: لا يا حدوقه ..لا ياماما ..ده اهلك استخسروا الديك اللى مربينه ..عايزه تفهمينى ان القطه اكلت الديك بالعضم بتاعه ... وغمزت بالبطاطس .. وحدقت بالمخلل ؟؟؟ .. قولتله وانا بصراحه محتاره : ربنا يسامحك انا هتخمد من غير اكل.... قالى : خلاص يا روحى ولا يهمك ناكل اى حاجه خفيفه من التلاجه

قولت: ماشى.... ولسه بجيب الاكل لقيت النور قطع راح جوزى قالى هاتى شمعه قولت ليه مش عندى نسيت اجيبه قالى ماشى هنزل اجيب مهو يوم باين من اوله.. وفضل جوزى يبرطم وهو نازل على السلم وانا مش عارفه بيقول ايه ...
هو نزل وانا قولت ادخل ادام المرايا افك شعرى واسرحه وفتحت الكشاف اللى فى الموبيل وابص فى المريا والقى ورايا واحد مشنوق وعينه حمرا وبيبص ليه ويضحك

طبعاً صرخت وجريت على باب الشقه افتحه مش بيفتح وكان فاضل ثوانى وارمى نفسى من البلكونه ولقيت جوزى بيقولى : فيه ايه؟؟؟

قولتله : فيه حد مشنوق فى السقف فى اوضه النوم .... طبعا دى ليله الدخله جوزى عمل فيها عنتره بن شداد وقالى :ازاى استنى كده ادخل اشوف ...دخل وانا حاسه انه داخل على اعصابه وخرج يقولى: مفيش اى حاجه قولتله : ازاااااااى ؟؟؟؟؟ دنا شوفته بعينى؟؟؟ .. قالى : والله ما فيه حاجه معلش يا حبيبتى يمكن يكون علشان مش نمتى كويس من امبارح قولت يمكن يلا ننام وبكرة يحلها ربنا قالى يلا يا ام عيالى طبعا انا فى سرى بقول عيالك ابقى قابلنى لو شوفت منى صرصار بعد الخضه دى ..

وصممت منا نايمه فى اوضه النوم ونمت على كنبه الانتريه ..ولسه هغمض عينى لقيت النور جه وحاجات فى المطبخ عماله تتكسر الحلل بتطير والمغرفه بترقص وانا وقفت اتفرج على الحفله الغنائيه فى المطبخ ومحمد فؤاد بيغنى كامننا وجريت اصرخ وانادى على جوزى... جوزى قالى : فيه حاجه غلط انا مش فاهمها ...قولتله : فعلا باين الجوازة دى عليها لعنه الفراعنه ولا ايه ؟

قالى ننام وبكرة ربنا يحلها وعلشان اضمن انى اتخمد اخدت قرص منوم وجوزى كمان اخد ونمنا ولسه بفتح عينى ولقيت نفسى نايمه فى ميداااااااااااااااان


العفش كله فى الشارع واحنا نايمين فى الشارع والناس ملمومه حوالينا.. واللى يقول محدش قالهم ليه يا جماعه ؟؟ واللى يقول منه لله 5000جنيه فى يوم وانا قومت جرى على الشقه اللى عرفنا فى الاخر انها مسكونه فعلا بالجن والعفاريت .........

وسبنا الشقه وحاليا بندور على عشه ايجار جديد كانت معكم حنين المعفرته من امام احدى بيوت الاشباح

الثلاثاء، ديسمبر 16، 2008

الزمار ورعايه ال 100 فار

تحديث
********
انا الدكاتره عبده الرايق واسف لانى مسحت البوست بتاع فرنسا اللى فات بالتعليقات لان عدد التعليقات الخارجه كانت 350 تعليق يعنى عايز عشر سنين عبقال لما امسحهم وانا بكسل امسح عينى اصلا
رحت ماسح البوست ونزلته من جديد
يعنى فى ناس علقت على البوست ده قبل كده .. انا اسف لهم
غلطه مطبعيه
*********************************************
اخواتى المدونات واخوانى المدونين
سلام الله عليكم
انهارده هاكمل لكم حكايه الزمار والملك
بس ارجو اللى مقراش الجزاء الاول يقراه من اللينك ده
**************
ندخل بقى فى المفيد
الزمار بيكلم الملك والوزير وبيقولهم ..... الميت بعد ماوقع منى فى البير ... فكرت بسرعه وناديت على ابن الميت وقولتله :- خلى النسوان تزغرد واعمل فرح كبير .. ابوك اتحول لحمامه وطار للجنه .. ووصانى قبل ما يطير اقولك تعمل فرح كبير وتردم البير دى بسرعه .. والراجل صدقنى وخلى النسوان تزغرد وبسرعه جابوا طوب وحجاره وردموا البير .. وانا قاعد اتفرج عليهم وكل واحد يسلم عليا ويبوسنى ويدينى فلوس ... من ده جنيه ومن ده اتنين ومن ده نص جنيه ومن دى بريزه ومن دى شلن ومن ده 5 جنيه .... لغايه لما قمت مليان فلوس .. رحت اشتريت اكل وحشيش يكفينى شهر بحاله .. وانا راجع لقيت معايا فلوس بالعبيطه .. رحت موزعها على الغلابه اللى قابلتهم ..
الملك طبعا اتغاظ وكان هيفرقع وقال فى سره :- حظك حظ عوالم .. حتى الميت كسبت منه
وخرج الملك من عند الزمار وهو بيضرب كف على كف وبيقول وحياه امك لاجيب مناخيرك الارض وفى تانى يوم بعت الملك مندوب من عنده للزمار قاله الملك عايزك ضرورى فى القصر ... وراح الزمار وقابل الملك وطبعا معرفش انه الراجل اللى بيجيله ويحشش معاه .. وعرض عليه الملك .. انه يشتغل عنده سياف .. ويجوزه اميره من الاميرات ... وطبعا الملك فهمه انه لو رفض هتتقطع رقابته ... عمنا الزمار وافق وهو متضايق .
طبعا الملك كانت عنده خطه متخرش الميه .ولا الكهرباء كمان .... كانت خطه الملك انه يحمل على الزمار هو والوزير ويروحوا يسهروا معاه يوماتى علشان يخلصوا التموين بتاعه من الحشيش والاكل وطبعا مش هيقدر يشتغل اى شغلانه طالما هو شغال عند الملك سياف
المهم
خلصوا الاكل والحشيش من عند الزمار فى خلال 15 يوم .. وكان باقى على القبض بتاعه 15 يوم ... الملك عرض على الزمار انه يجيب معاه اكل وحشيش لكن الزمار رفض . وقاله :-انتم ضيوفى ولا يمكن تدفعوا مليم احمر
المهم
تانى يوم جه الملك والوزير ولقيوا الزمار عنده اكل وحشيش بالهبولى استغرب الملك والوزير وقالوا للزمار جبت منين كل ده ؟؟؟؟ الزمار قالهم :- ابدا اتصرفت ... بعت سيف الملك .. ورحت عند النجار وعملى سيف اخوه الخالق الناطق من الخشب الملك قاله :- طيب افرض الملك قالك تقطع رقبه حد هتعمل ايه ... رد الزمار وقاله :- ياعم قول يا باسط تلاقيها هاصت .. انا من يوم ما اشتغلت الشغلانه دى وانا بهش دبان .. ولا شغله ولا مشغله
خرج الملك من عند الزمار وهو فرحان وملعلع .. وقال للوزير:- بكره تجيبلى واحد مذنب محكوم عليه بالاعدام ... وفعلا جمع الملك الامراء والوزراء .. وكبار رجال الاحتكار .. وكبار الحاشيه . وولاد الحراميه .. ونادى على الزمار وقاله :- يا سياف .. اقطع رقبه المذنب ده
الزمار وقف مذهول محتار وقال فى نفسه :- ايه الحظ التعبان موله ده .. 15 يوم من غير اى شغلانه ويوم ما ابيع السيف يجيبولى مصلحه.... ده ايه النحس الدكر ده !!!!!!!!
المهم .... الزمار فكر بسرعه وبص للمتهم وقال للملك :- معلشى يا مولانا انا لايمكن اقطع رقبه الراجل ده ابدا ... الملك بص له وقاله :- نعم نعم يا روح طنط ...انت شغال عند ام ترتر ولا عند ام اللالى ؟؟؟؟ انت عبيط ياض ... اقطع رقبته دلوقتى حالا ... ولا ورحمه امى الملكه الكبيره رشا ..اقطع انا رقبه اللى خلفوك .... الزمار قاله :- يا مولانا الملك .. انا بصيت فى عين الراجل ده لقيته مظلوم ...... الملك قاله :- ولد انت يا روح امك انت هتهزر ؟ .. ولا هنهرج بقى سوا ؟ .. هى مش طلباك وحياه والدك دلوقتى ....القاضى قال الراجل ده يتشنق وانت تقولى مظلوم ؟؟... يلا ياض اقطع رقبته بسرعه... ولا مش ناوى تيجبها البر انهارده...... الزمار قال :- يا امراء يا وزراء يا كبار الحراميه .. انا برىء من دم الراجل المظلوم ده .. يا رب لو الراجل ده برىء اجى اطلع السيف يبقى خشب ... ورفع السيف لفوق وبص وقال :- الله الله .... الحمد لله ... السيف اتحول لخشب ... الراجل برىء .. الراجل برىء
طبعا الملك مقدرشى يتنفس ولا يقول حاجه ... لكن بسرعه بص للزمار وقاله :- تعالى يا راجل يا بركه فى حضنى .. انا ناويت اجوزك بنتى لانك راجل مبروك ... بس بشرط ... مهر بنتى يكون غالى قوى .. وانا عارفك مفلس وممعكشى اللضى .. علشان كده انا هديلك 100 فار مختومين بختم الملك .. تاخدهم عندك وترعاهم لمده شهر ... 30 يوم .. كل يوم تخرجهم يتفسحوا من الفجر للمغرب فى الصحراء وترجعهم يناموا .. وبعد 30 يوم تجيبهم هنا قدام الوزراء والامراء .. ولو نقص فار هاقطع راسك .. ولو جبت ال 100 فار هجوزك بنتى
عمنا الزمار مشى مع الحراس وهما ماسكين الاقفاص اللى فيها الفيران وهو بيندب حظه ... ويقول فى نفسه .. انا ايه اللى رمانى الراميه السوداء دى .. الله يخرب بيت ابو الملك على بنته على الوزراء على المحتكرين على العز والوز على الفيران فى يوم واحد.... المهم وصل الزمار البيت ومشى الحراس .. وقعد الزمار يبص للفيران وهو مش عارف يعمل ايه ؟؟؟ وراح فاتح قفص وخرجت الفيران فى العشه بعد ما قفلها كويس .. وقعد يبص للفيران وهى بتجرى يمين وشمال وهو بيقول لنفسه :- والله نهيايتك هتكون على رجلين الفيران العبيطه الهبله ام بدوى دى يا زمار يابن ام زمار..
وطلع المزمار بتاعه وقعد يزمر بيه ويسلى نفسه ويودع الدنيا الفانيه ... وفجاءه اداها نغمه شديده من مزماره ... لقى الفيران كلها جريت ودخلت القفص ... راح مخرجهم تانى .. واداها نفس النغمه لقى الفيران برضه جريت ودخلت القفص ... راح مجرب القفص التانى .. برضه نفس النظام ... راح طالق كل الفيران .. واداها النغمه الفيران كلها دخلت الاقفاص .. راح طالقهم فى الصحراء .. وكل فار مشى على راسه .. وهو يزمر الفيران تيجى بسرعه وتدخل القفص
المهم...
الحال ده استمر 27 يوم .. وكل يوم يجى الحراس يطمنوا على الفيران بالليل يلاقوهم 100 فار .. لغايه لما زوجه الملك قالت للملك :- انت لازم تتصرف خلاص ال 30 يوم هيخلصوا ..وانا لايمكن اجوز بنتى للزمار الشحات الحشاش ده .. لو ده حصل انا هكهرب نفسى .. او اولع فى نفسى .. او اتفرج على القمر الاوروبى وابقى منحرفه و افضحكم
الملك قالها :- لا طبعا انا لايمكن اوافق على كده ابدا .. اوربى مين وزفت مين..هو احنا قادرين على فضايح النايل سات ؟.. بكره هابعت الوزير يتصرف باى شكل ويجيب من الزمار فار .. علشان العدد ينقص واطير رقبته
وفعلا بعت الملك الوزير وقاله عايزك تجيبلى فار باى تمن من الاتمان . وفكر الوزير .. وطبعا الناس دى مكاره زى ما احنا عارفينهم .. الوزير عمل نفسه راجل كبير فى السن وغير شكله وراح للزمار وقاله وهو بيعيط :- انا مراتى هتموت .. وانا راجل عجوز واعمى البصر وعندى 10 اولاد كلهم عميان .. ومراتى هى الوحيده اللى بتشوف بعنيها وبتخدمنا كلنا .. ولو ماتت كلنا هنموت وراها. والحكيم واصف لها كبده فار من بتوع الملك تاكلها على يومين ساعه اذان الفجر... الزمار قاله :- بس دى فيها حياتى انا لو اديتك فار هيقطعوا رقبتى .. الوزير قاله :- انا مستعد اديلك 100 الف جنيه فى الفار الواحد ... راح الزمار قاله :- لا يا عم لا 100 الف جنيه ولا حاجه انا هبيعلك الفار ب 10 الاف جنيه بس ... وعندى شرط واحد .. انى اختم دراعك بختم العبيد ... الوزير بص له وقاله :- ختم العبيد ؟؟؟ انت هتهرج ؟؟؟ لا انا لايمكن اختم دراعى ابدا بختم العبيد .... الزمار قاله :- خلاص براحتك .. ولا تزعل بلاش .. دراعك معاك وفيرانى معايا ..والغاوى ينقط بطاقيته ...سمعنى بقى احلى سلام عليكم ...
المهم الوزير وافق .... ودفع الفلوس واتختم بختم العبيد واخذ الفار وفلسع ... وبعد ما مشى بالفار زمر الزمار بزمارته نط الفار من ايد الوزير ورجع جرى على القفص تانى ... راح الوزير للملك ايد وراء وايد قدام .. وتانى يوم راحت الملكه للزمار متنكره وحاولت تاخد فار من الفيران .. وبرضه باع لها الزمار الفار ب 10 الاف جنيه وختمها بختم العبيد .. واخر يوم راح الملك للزمار واتكرر معاه نفس الحواروبعد ما تموا ال 30 يوم اجتمع الوزراء والامراء والساده اعضاء مجلسى كوكاكولا وسفن اب وجابوا الزمار والفيران ووجدوا الفيران تمام التمام ... وطبعا الملك عمره ما هيطلع عيل قدام البلطجيه بتوعه اعضاء حزب اسم النبى حارسه .. راح قايل للزمار :- خلاص انا هجوزك بنتى لكن اخر شرط هشرطه عليك انك تجيب شوال وتملاه كلام ... الزمار قاله :- انت مستقصدنى يا عمنا ولا ايه ؟؟؟ ازاى هملىء الشوال كلام ؟؟؟ .... الملك قاله :- هو ده شرطى واخر شرط هشرطه ...
الزمار قاله :- وانا موافق بس لازم يشهد عليا الوزير والملكه والملك .... الملك فرح وقال هو ده عز الطلب .. الزمار قال :- نبدء بالوزير .. تعالى يا سياده الوزير علشان اتكلم فى الشوال وانت بس اللى تحكم الشوال اتملىء ولا لا ... الوزير جه جنب الزمار ووقف ومد بوزه جوه الشوال مع الزمار ... راح الزمار همس فى ودن الوزير وقاله :- اول كلامى الوزير جه يشترى منى فار وهو متنكر وفاكر انى مش هاعرفه .. لكن انا كشفته وبعت له الفار ب 10 الاف جنيه وختمته بختم العبيد .. تحب افضحك قدام الناس ؟؟؟ ... ولا تقول الشوال اتملىء ؟؟؟ ...الوزير صاح باعلى صوته وقال :-الشواااااااااااااااااال اتملىء كلام يا خلق
جه الدور على الملكه ...
واتكرر معاها ومع الملك نفس الحوار .. والاتنين صاحوا باعلى صوتهم ..
الشوااااااال اتملىء كلام .. الشوال اتملىء كلام
واتجوز الزمار بنت الملك
وهنا ادرك ام حسين الصباح .. فنزلت تجيب المفتاح
مولااااااااااااااااااااااااااااااى
نيااااااااااااااااااااااااااااو
********************
مقتبسه من حكايه قديمه
روتها لكم
خالتكم
فرنسا هانم

الجمعة، نوفمبر 28، 2008

جغرافيا زمان ... فى برطمان

هااااااا ى ايفرى بدى
اخوكم العلامه الكبير الدكاتره عبده الرايق وقع فى مطب ... نجانى منه ربنا سبحانه وتعالى
طبعا الفتره اللى فاتت كنت بعانى من العصب السابع فى الناحيه اليمين من الوجه ..ووقفت حركات الحاجب اليمين والعين اليمين والودن اليمين وفرده المناخير اليمين والخد اليمين ... يعنى كل الصواميل بتاعه الناحيه اليمين كانت مفوته
وطبعا كان خروجى قليل
وانا من صغرى وانا مش بحب بتاتا الدروس الخصوصيه ..وبذاكر لاولادى ومش بياخدوا دروس نهائى
مره كنت بذاكر للمدعو محمد الرايق ابنى .وهو دلوقتى فى اولى اعدادى وكنت بذاكر له درس الجغرافيا بتاع الكواكب
وفوجئت انهم عملوا تقلص لعدد الكوكب بقوا 8 كواكب بدلا من تسعه
طبعا انا كنت فاكر النقص ده علشان الغلاء والضرايب .وكده وحركات
طلع ان المقروص فى مصارينه وفى نواضره بلوتو قمر ... المضروب ده كان بيستغفلنا طول المده دى وهو قمر مش كوكب ..صحيح يا ناس كواكب ناقصه تربيه ...
المهم يا ساده الموقف اللى حصل بعد كده
بعد ما ضربت الغداء ومليت بطنى كويس رغم انف دكتور السكر ودكتور الاعصاب . لبست المريله وجهزت القلم الرصاص والاستيكه وناديت على الاولاد .. وكان دور محمد فى المذاكره ... قلت له وانا كلى براءه .. ها يا محمد هنذاكر ايه انهارده ؟؟؟
قالى انا اخدت درس الفصول الاربعه فى الدراسات ومش فاهمه ... وراح الولد الله يستره جايب الكتاب وجه .. وكان فاتحه على الدرس بتاع الفصول اربعه
انا طبعا بكل غرور وكبرياء وتعالى قفلت الكتاب وانجعصت كده ولا اكنى احمد زويل عالم الفلك الكبير ذات نفسه .. وبدءت اشرح
شوف يابنى احنا قبل كده قلنا ان الكواكب تدور حول الشمس فى مدارات بيضاويه .. وده بيخلى ناحيه تبقى قريبه من الشمس وتخلى الجو صيف لان الشكل البيضاوى فيه ناحيتين قريبين من الشمس وناحيتين بعيد عن الشمس يعنى لما الارض بتقرب يبقى صيف ولما بتبعد يبقى شتاء
بصيت للواد الشرير الشقى محمد باشا الرايق لقيته سرحان وبيبص لحواجبى وانا بتكلم . لان فى حاجب بيتحرك والتانى فى بيات شتوى بفعل العصب السابع نجاكم الله
قلت للولد . خليك معايا يا محمد ما تسرحشى ... الولد بص لى وقال . يبقى يا بابا كده هيبقى عندنا اتنين صيف واتنين شتاء ومفيش ربيع ولا خريف
طبعا انا بصراحه اتكتمت وسكت , وخصوصا لما الولد قال الكلام ده وفتح الكتاب على الصفحه بتاعه الدرس .. وبصراحه لقيت الولد عنده حق
هنا بقى اشتغلت العبقريه الدكاتوريه الرايقاويه .وقلت للولد طيب روح شوف ماما بتنادى عليك وبعدين نكمل الدرس
الولد راح يشوف امه .. وانا مسكت الكتاب احاول افهم حاجه ..للاسف نو نو نو ... مفهمتش اى حاجه
خصوصا ان اخر عهدى بالجغرافيا ايام ابن الحراميه المقروص بلوتو رحمه الله عليه لما كنت فى اولى ثانوى وبعدين دخلت علمى علوم ونسيت اى متعلقات خاصه بالجغرافيا وحتى نسيت ان الارض كرويتون تلف حول نفسوها
المهم
الولد رجع بسرعه وقالى ماما مش بتنادى عليا
طبعا انا يكفيكم ربنا من شر الزنقه خصوصا لما تبقى مزنوق مع ابنك او بنتك .. كنت مستعد ادفع اى جند واخرج من المطب ده
رحت عامل حركه قرعه وقلت للولد روح خد 5 ازايز بيريل وغيرهم من السوبر ماركت
الولد برضه بص لى وهو متابع حواجبى وقال . طيب السوبر ماركت ليه يا بابا ما انزل السبت للبقال واجيب من الدكان اللى تحت البيت
قلت نو نو نو اصلى انا عايز ب 5 جند بيض بلدى وهات معاك زيتون وتمن جبنه وتمن حلاوه
الولد راح ناحيه الباب وقابلته امه مسز رايق الله يمسيها بالخير واتكلمت معاه .. وجات ناحييتى وقالت . هو انت مدى الواد 100 جنيه ليه ممعكشى فكه ؟؟؟؟؟
قلت لها لا مش مشكله انا عازمكم على العشاء انهارده على حسابى
راحت نادت على الولد من على السلم ووقفت اتكلمت معاه
انا طبعا خمنت كده بذكائى الفذ منقطع النظير انها ادت للولد فلوس علشان يجيب الاكل . وقالت له هات من فلوس بابا البيريل بس .. لانها بتاخد مصروف شهرى ..شامل كل حاجه الا البيريل
المهم قريت الدرس كويس والحمد لله فهمته بعد عذاب اليم . وعرفت ان الارض لا تدور راسيا ولكن تدور على محور بزاويه 23 درجه ونص وبيكون محورها ثابت فى اثناء الدوران وده بيخلى نص الكره قريب من الشمش والنص التانى بعيد عن الشمس ولما الارض بتلف بيتغير النصفين ولما بتكون الشمس على خط الاستواء بيكون نص الكره ربيع والنص خريف لان الشمس بتتوزع بالتساوى على النصفيين . عليا النعمه الكلام بتاع المحور ده عمرى ما سمعت عنه ابدا ....فى ايامنا . ماكنشى فى محور الارض ولا حتى روتانا الارض ولا دريم الارض
ربنا يرحمك ويسامحك يا بلوتو يا ابن خالتى ام بلوتو ويبشبش النيزك اللى تحت دماغك
طبعا انا لما فهمت جريت على البلاكونه الحق الولد قبل ما يشترى البيض والزيتون ويدمر 15 جند على الاقل
لكن تاتى الرياح بما لاتشتهى المراكب ولا حتى اللنشات
لقيت الولد داخل العماره
واول ما دخل لقيته بيدينى 12 جند من ال 100 جند
قلت له ايه ده ياض ؟ فين الباقى ؟
قالى ماما ناديت عليا وقالتلى خليهم نص جبنه براميلى ونص جبنه رومى ونص حلاوه و3 كياس عيش ونص لانشون و ب 10 جنيه بيض و5 بيريل وكيلو لبن وخمس علب زبادى و2 بيفى وطقم كونو للترفيه بعد وليمه العشاء

مع تحيات اخيكم


فقيد ال 100 جند

الدكاتره الكبير ...عبده الرايق

السبت، نوفمبر 22، 2008

الزواج على الطريقة المحاسبية

الاخ ميزان بيحب الاخت ميزانية وعايز يتجوزها وراح بيتهم يطلب ايدها من والدها دار الحوار الاتى :

ميزان : عمى يسعدنى ويشرفنى انى اقترض ايد بنتكم ذات الاصول الثابتة الانسة ميزانية

ابو ميزانية : ما عندناش بنات للاقتراض يا ابنى واصولنا كلها غير متداولة

ميزان : ليه كده يا عمى ده انا عاملك دراسة جدوى ومقدملك كشف حساب ما يخرش الميه

ابو ميزانية : يا ابنى انا خايف تبقى زى اصحاب القروض وتهرب بره البلد

ميزان : مش ممكن ابدا يا عمى ده ميزانية بورصة حياتى وكل اسهمى وام اولادى متمم حسابى وفائض افندى

ابو ميزانية : علشان كده البورصة انهارت والاسهم خسرت يا ميزان افندى.

ميزان : لا يا عمى دى ازمة مالية عالمية اما ميزانية اسهمها ضد الانهيار

يا عمى انا ياما سجلت اشعارى واشواقى فى دفتر اليومية فى ميزانية دى ميزانية هى ارباح حياتى وخسارتها .

ميزانية : وانا يا حبيبى ياما عملت موازين مراجعة حبا فيك مع انه كل ارصدتها وهمية

ميزان : اكيد يا روحى حساب الاستاذ بتاعك كان فيه خطا فى الترحيل .

ميزانية : لا يا حياتى بس انت كنت بالنسبة لى ديون معدومة ومن غير مخصص كماااااان

ميزان : وانتى يا حياتى خزنتى السرية وكل ارصدتى المشكوك فى تحصيلها

ابو ميزانية : خلاص يا ولاد نعمل برنت اوت بكل الارصدة والحسابات ونجهز ميزانية

ميزان : وانا يا عمى عليا الاشهار ومصاريف التاسيس وكتابة العقد

ابو ميزانية : اشهار ايه وتاسيس ايه انت اتتجوز محل ولا دكانة

ميزان : لا يا عمى قصدى مصاريف الفرح والتجهيز والبركة فيك تسحبلنا على المكشوف قد 2 مليون جنيه نجهز نفسنا بيهم .

ابو ميزانية : سحب على المكشوف انا كل ارصدتى فى البنوك متجمدة رهن مقابل القروض المسحوبة

ميزان : قروض ورهن هو حضرتك حوت القروض المعروف اللى سرقت البنوك

ميزانية : بابا حوت قروض يا مفلس يالى ايحجزوا عليك ويعملوك تفليسه

ميزان : انا ايحجزوا عليا يا بورصة منهارة يا ديون معدومة..

فعلا طلعتى ميزانية متفبركة وارصدتك وهمية .

ميزانية : لا حووش حووش قال انت اللى طلعت ميزان مراجعة ارصدته مظبوطة

ميزان : على الاقل احسن منك ياللى شبه دفتر الشطب .

ميزانية : انا دفتر شطب يا مخزن الخردة يا مستودع الكهنة .

ابو ميزانية : خلاااااااص يا ولاد الف مبروك وربنا يتمم بخير

انا كده اتاكدت من الارصدة الافتتاحية والحساب الختامى .

خالد

همس الاحباب

الأحد، نوفمبر 16، 2008

فلسفة اللى عاوز يعدد


هو : عارفة الست المريضة اللى جوزها موظف بسيط بتقول جوزها عاوز يعدد؟

هى: يعدد هو فيه راجل بيعدد؟

هو: ايوة امال مين اللى بيعدد؟؟

هى : سلامة نافوخك انت شربت حاجة النهاردة من برا يا خويا؟

هو : لا ولا من جوه وحياتك

هى : طبعا الست هى اللى بتعدد؟

هو : انت عاوزة تجننينى ولا ايه انا مش ناقصك على المسا

هى : انت اللى مش عارفة مالك هو انا غلطت فى ايه؟

هو : وفجأة نطت فى رأسة فكرة وقال ااااااااااااه فهمتك

انا مش قصدى الرجل بيعدد يعنى بيلهوى وبيخرابى وبيدهوتى قصدى بيعدد يعنى عاوز يتجوز على مراته

هى : اه انا قصدت ان الست هى اللى بتعدد وبتقولى يا حوستى ويا لهوتى لما بسلامته يتكل

هو : اه ما انا اخيرا فهمت كدة لهوى براحتك وخرابى براحتك

هى : بس الرجل هيسيب مراته ويعدد !!!!!!!!!!!!!!!

هو : عادى بقى ما انت كمان عاوزة تعددى فى اقرب فرصة

تصبحى على خير

الاثنين، نوفمبر 10، 2008

يموت الزمار ... وصوابعه بتلعب

اخواتى العزيزات واخوانى الاعزاء



انهارده هاحكى لكم حكايه سمعتها وعجبتنى واتمنى ان تعجبكم
*********************

زمااااااااان قوى ايام الدنيا ما كانت شده حيلها وكانت دنيا بنت ناس .. ورخيصه ... كان فى بلد حاكمها ملك اسمه سنديب .. ووزيره اسمه غنديب . فى ليله من الليالى الملك جاله حاله ارق ومش عارف ينام .. قال للوزير .. يا وزير :- انا مش جايلى نوم وعايز املص من القصر وابص على الرعيه واشوفهم عايشين ازاى


الوزير قاله وماله يا ملك ..تعالى يابا نتمشى ونشوف الرعيه بس لازم نتخفى علشان محدش يشوفنا ... الملك قاله :- نتخفى ازاى ياض يا وزير ؟


الوزير قاله :- نلبس ملابس عاديه من سوق الجمعه ونبقى زى الرعيه تمام


الفكره عجبت الملك اصله كان بيحب المغامرات وبيحب يلعب بالناس .. لبس الملك والوزير هدوم من الرخيصه ام تلات ابيض ونزلوا يتفسحوا فى المدينه ... وهما ماشيين شافوا عشه بعيده قوى خارج المدينه وفيها لمبه زيت منوره .. الملك قال للوزير :- عشه مين دى يا غنديب ؟؟ .. رد الوزير وقال :- ورحمه امى ما اعرف يا ملك الملوك .. الملك قاله :- امال انت وزير ازاى ؟؟ تعالى نشوف العشه دى بتاعه مين


راح الملك والوزير للعشه ودخلوا لاقيوا راجل قاعد بيشرب حشيش وهيمان مع نفسه بيناجى سقف العشه وبيتكلم مع اللمبه


المنظر عجب الملك قوى وقال للراجل :- انت قاعد هنا لوحدك ليه يا عمنا ؟


الراجل بص عليه وقاله :- وانت تطلع مين ؟؟؟ الوزير رد وقال :- احنا تايهين فى الصحراء ولقينا عشتك قلنا نسهر معاك وتدلنا على طريقنا


الراجل قال :- يا 100 الف مرحب بالضيوف انا هاجيب لكم العشاء .. رد الملك وقال :- لا احنا هنشرب معاك نفسين حشيش ونمشى بس عايزين نعرف ايه حكايتك وقاعد هنا ليه لوحدك ؟؟


الراجل قال :- بص يا شيخ العرب انت وهو .. كلام فى سركم انا كل يوم اقوم الصبح امسك الغربال واحط فيه شويه رمله واغربلهم الاقى بريزه اطلع بيها على السوق اجيب عيش واكل وحشيش وزيت للمبه ويفضل معايا قرشين اديهم لاى حد غلبان اقابله فى طريقى


الملك قاله :- طيب ما تخليهم معاك لبكره .. رد الراجل وقال بكره اغربل رمل جديد والاقى بريزه جديده


المهم شرب الملك والوزير مع الراجل واتبسطوا وقال الملك للراجل :- انت اسمك ايه ؟


رد الراجل وقال :- انا اسمى زمار


الملك قاله :- طيب يا زمار بكره تروح لقصر الملك وهناك هتلاقى شغل والملك هيحسن اليك قوى قوى


رد زمار وقال :- ملك ايه ؟ الملك لله ؟ انا مش بحب الملك ده راجل اهبل وعبيط وعنده وزير حمار


الملك اتغاظ منه وقاله :- طيب ممكن بكره تحتاجه


رد زمار وقال :- انا احتاج للعبيط الاهبل ابو رياله ده ؟؟؟ دا يبقى اخر يوم فى حياتى


خرج الملك من عند زمار وقرر انه يجيبوه زاحف على ايده ورجله ... وقال للوزير :- ابعت ناس يسرقوا الغربال بتاع الزمار وخلينا نشوف هيجيب منين البريزه


وفعلا سرق جنود الملك غربال الزمار


وتانى يوم راح الملك للعشه هو والوزير ولبسوا لبس تانى خالص وغيروا شكلهم .. وراحوا للعشه لاقيوا العشه منوره بلمبتين زيت .. راحوا داخلين العشه لاقيوا زمار بيشرب حشيش وعماله بيكلم سقف العشه وضاربها صارمه


الملك قاله :- سلام عليكم


رد زمار وقال :- وعليكم السلام اتفضلوا ... هو انتوا كمان تايهين ؟؟


الوزير قاله ايوه عرفت منين ؟؟؟


قاله اصل فى اتنين امبارح جم هنا وقالوا احنا تايهين وسرقوا منى الغربال اللى كنت بلاقى فيه البريزه .. رحت نازل السوق ومشيت ابص للاكل وانا جعان لمحنى صاحب مطعم وقالى تعالى ساعدنى وانا ااكلك .. وفعلا ساعدته وفى اخر اليوم ادانى ريال واكل كتير .. رحت اشتريت لمبه زيت كمان وجبت ببريزه كامله حشيش ..واديت الباقى لاول غلبان قابلته


راح الملك قاله :- طيب ماتروح الصبح للملك يمكن تلاقى عنده شغل احسن من البهدله دى


رد زمار وقال :- ملك ايه الحمار الاهبل ده .. انا اموت من الجوع ولا انى اروح للملك


خرج الملك من عند زمار وقال للوزير :- بكره الفجر تطلع منادى ينادى اى واحد هيفتح المطعم بتاعه هيتشنق


وتالت يوم راح الملك للعشه هو والوزير ولابسوا لبس تانى .. لاقيوا العشه منوره بتلات لمبات زيت ونورها ساطع من بعيد


دخلوا على الزمار وسلموا عليه وعرفوا قصته


قالهم الزمار :- انا مش عارف مين بيلعب معايا الدنيئه .. انهارده رحت المطعم لقيته قافل سئلت على صاحبه الناس قالت المنادى خرج وقال اى صاحب مطعم هيفتح انهارده هيتشنق .. رحت انا قاعد قدام المطعم ومش عارف اعمل ايه .. وبصيت لقيت الجزار بيدبح جمل وعماله يفلفص منه .. رحت ماسك معاه .. لغايه لما دبح وسلخ وقطع .. راح مدينى لحمه ونص جنيه .. رحت مشترى لمبه جديده وبريال حشيش واشتريت اكل كتير واديت اول غلبان قابلته الباقى كله اللى معايا


الملك قاله :- طيب ماتروح للملك يمكن ينقذك من الهيلمان ده


رد الزمار وقال :- والله انا بشك فى الملك ده . . من يوم ما جات سيرته وانا متعكنن من اللى خلفوه .. انا اموت ولا انى اروح للاهبل ابو رياله ده


خرج الملك متغاظ وقال للوزير :- بكره الفجر تطلع منادى ينادى اى محل جزار هيفتح هيتشنق


رابع يوم راح الملك العشه لاقى نور ساطع من بعيد .. دخل هو والوزير العشه لاقيوا كذا لمبه زيت ومعاهم كلوب والزمار قاعد ومتسلطن وبيكلم سقف العشه ..سألوه عن حكايته قالهم


انا حاسس ان الملك الاهبل وراء كل اللى بيحصل لى ده .. انهارده خرج منادى ينادى اى جزار هيفتح المحل بتاعه هيتشنق .. ر حت لقيت الجزار قافل .. وربنا كرمنى بشغلانه الملك ولا اللى خلفوه مش هيقدر يمنعها .. ولو طلع نص جيشه ينادى


الملك قاله :- شغلانه ايه دى ؟


الزمار قال :- انهارده اشتغلت حانوتى .. ( خلى الملك الاهبل بقى يطلع منادى ينادى اى حد هيموت انهارده هيتشنق ) كنت قاعد مستنى الجزار يفتح لقيت واحد بيجرى وهو بيعيط ويقول اااااااااه يابويا ... سئلته مالك .. قالى ابويا مات وانا رايح اجيب الحانوتى ... انا قلت للراجل انا حانوتى ممكن اجى معاك اغسله واكفنه .. رحت رايح معاه .. وقلت محدش يقف معايا وانا بغسل الميت .. خرج كل الناس وسابونى اغسله لوحدى جنب البير بتاع الميه .. لكن وانا بغسله بالصابون اتزحلق ووقع منى فى البير .........


**********


معلشى علشان الحكايه طويله هكملها فى تدوينه تانيه


على فكره الحكايه دى انا سمعتها


يعنى مش تاليفى


**********


مع تحيات فرنسا هانم

الثلاثاء، نوفمبر 04، 2008

شــاعر .. وربــة منـزل



فى يوم مشرق جميل .. جلس الشاعر يتأمل زوجته .. يتذكر أنها حبه الأول وأنها كانت أقصى أمانيه ..


ملهمته التى تعلم الشعر من أجلها .. وألهب قلوب الكثيرين بقصائده الحارة إليها ..


تأملها كثيراً وهى جالسة أمامه .. عاوده الحنين للشعر بعد عشر سنوات زواج ..


قال: هذا قلمٌ ملأته بمداد رحيق الحب .. وهذه ورقة بيضاء فى صفاء عيونك ..


قالت: هو انا هرجع المدرسة تانى ولا ايه؟


قال: انثرى حروفك .. أكتبُى


قالت: ماشى .. طب ملينى .. أكتب ايه؟


قال: أكتبُبى عنى .. عن شوقى ووجدى


قالت: شوقى مين؟ ومين وجدى ده كمان؟


قال: أكتبى اننى ما ارتويت من حبك ابدا .. واننى لا زلت ظمآن


قالت: فهمت .. هاقوم احضر الأكل اهو


قال: أنظرى الى عيناى كما كنتِ تفعلين .. واحتضنى اهدابى


قالت: تصدق؟ عنيك حمرا .. قوم نام شوية قبل الولاد ما يرجعوا


قال: لم أقصد .. اقتربى من قلبى.. انصتى .. أتسمعين هذه الدقات؟


قالت: آه .. ده باين الولاد جم من المدرسة .. الباب بيخبط


قال: ايه الست دى؟ طب قومى ياختى افتحى الباب وحضرى الغدا


قالت: تأمرنى .. فيهتز القلب .. وأسير بأمر الهوى .. مكبلة بقيود العشق



تحياتى


كاميليا

الأربعاء، أكتوبر 29، 2008

بلاش تمسك ايد مُزة

فى يوم من الايام كنت قاعد ولا بيا ولا عليا كان يوم عجب خلصت شغل الساعة 8 بالليل زميلى فى الشغل بيقولى وراك حاجة قلتله يا بنى ما انت عارف انى لا مرتبط ولا حد لسه اتكلم عليا فاضى طبعا خير..
- قالى طب يلا بينا
- على فيين يا عم !!!
-هنروح مشوار قريب من هنا مش هتتاخر
-ولا تاخرنا احنا ورانا ايه يلا بينا
المهم وصلنا شارع التحرير و وقفنا قدام فندق
- وقالى يلا بينا نطلع الدور الثامن
- نعم الثامن اشمعنى يا حاج
- هنقابل ناس صحابى منتظرينى فوق
- صحابك وفى فندق يا بنى انت اخرك غرزة ابو المعاطى وشركاه
ما علينا طلعنا فى الاسانسير للدور الثامن وصاحبى بيسال عامل الاسانسير هو النايت ف الدور التامن قاله اااااااه يا باشا اتفضل
- نااااااااايت يا نهارك ابيض !!!
- متخافش تعالى بس
- لا يا عم مفيناش من كده نااااايت يا فضيحتااااه انا لسه بالسلوفانة ياعم وجااااى من الصعيد طازة تقولى نايت وديسكو ده كانوا فى النجع طخونى عيارين..
المهم دخلنا وعينك ما تشوف الا النور كل الاحبة اتنين اتنين وانت يا قلبى دقاتك زادت ليه
قعدنا على الترابيزة انا وصاحبى ولقيت مزة جااااااااية لابسة ومش لابسة وسلمت على صاحبى وبتقولى هاااااااى
قولتلها هاااااااااى ورحمة الله وبصيت لقيتها مسكت ايد صاحبى وقعدت تهرج معااااااه
وانا قاعد اتفرج على اللى بيحصل فى المكان وجسمى بيشر ميه وبقيت زى الفار المبلول اللى طالع من طشت ميه سخنة ووشى جايب الوااااااان الطيف السبعتاشر.

بصراااحة اول مرة اتعرض لموقف زى كده ولقيت صاحبى بيقول للمزة استاذ خالد زميلى
طبعا انا من جوايا مولع وبالعن دى زمالة ودى معرفة يا جدع المهم شوية ولقيت واحد جااااااااى تشربوا ايه يا بهوات

- مش عايز اشرب حاجة انا عايز امشى .
- تمشى ايه استنى عيب هاتله كنز يا متر
- ااااه دى رشوة بترشينى بكنز ماشى لما ننزل بس
طبعا الجدع ما كدبش خبر وجاب 2 كنز وجاب لب ابيض يجى بنص جنيه كده
قلت هو ده اللى بيقولوا عليه المزة وقعدت قزقز لب وانا متنح كده وببص فى الارض من الغيظ والخجل ااه والله كان لسه عندى دم وبتكسف .
وفجاة لقيت حاجة واقفة جنبى بصيت كده من تحت لفوق لقيت سيقان واحدة ست واقفة جنبى وبتقولى ازيك انا ولاء انت اسمك ايه؟؟؟
- ااااانا مش فاكر انا ميين طب انا فييييين ؟؟؟
اااااه نسيت اقولكم انا بصراحة اتخضيت لقيت حاجة سمرة كده وطويلة اطول من الليلة السودة
افتكرتها الشاويش عطيه بصراحة وكان هاين عليه اعيط وافتكرت محمد هنيدى فى فيلم صعيدى فى الجامعة الامريكية كل الناس شافت الليلة الحمرا الا انا شفت الليلة السودة
ولقيتها بتقولى هاااااااات ايدك ..
ايد مين يا ستى لا يمكن ابدا ايد النجعاوى الكبير تلمس ايد حرمة ولا عاش ولا كان انا محدش يمسك ايدى ابدا غير امى علشان تعدينى الشارع ..
المهم صاحبى منسجم وعايش الحياة وانا ساكت خااااالص وهاين عليه اقوم ارميه من الدور التامن واستريح منه .

- طب مش يلا بينا كفاية كده انا عندى مشوار وعايز امشى

- يا عم احنا لسه قاعدين ومشوار ايه اللى جه فجاة
-يا عم ورايا مشوار مهم جدا رايح اقص ضوافرى وبعدين انا اتخنقت منك يلا بينا مش كفاية عمود النور اللى واقف جنبى
لقيته بيقولى طب نحاسب ونمشى يا متر الحساب
حاااااضر يا باشا الحساب 66 جم وخدمة وتبس يبقى 100 جم
طبعا انا سمعت الرقم وفطست على نفسى من الضحك انا اللى كنت قاعد مكتوم من الصبح
عجبنى قوى والخدمة يبقى الحساب 100 جم فعلا الخدمة تستاهل بصراحة .

- صاحبى بص كده وازبهل وبيقولى معاك فلوس
- قلتله اااااه بس ليه قالى علشان تدفع الحساب ااااااه ماشى مفيش مانع ما هو حسابك تقيل معايا اصلا .
اللى كان عاجبنى فى الموقف اننا اخدنا 2 كنز وبنص جنيه لب يعنى الحساب يطلع كده 3 جم بالظبط و97 جم خدمة يا بلاااااش كله ده علشان مسكت ايد واحدة طب يا جدع كنت جيت مسكت ايدى الاتنين كماان وخدت منك 10 جم بس.
وقال ايه الاخت ولاء كانت عايز تمسك ايدى الحمد لله كان زمانك دافع 200 جم بدل مسكة ايد ولاء .
نزلنا فى الاسانسير وطبعا انا ببص لصاحبى ومش قادر امسك نفسى من الضحك لدرجة قعدت فى الاسانسير وهو شغال يضرب فيه يا بنى فضحتنا حرام عليك والراجل بتاع الاسانسير يبص ومندهش
هو الجدع ده شرب ايه ده لسه طالع من ربع ساعة هو دماغه خفيفة كده
صاحبى لا مش شرب حاجة بس اتجنن الواضح .
ومن هذا اليوم كل ما شوف صاحبى افتكر منظره هو وماسك ايد المزة ومنشكح واتخيل منظره بعد الحساب اموووووت على نفسى من الضحك .
وده جزاء من يفكر يمسك ايد مُزة لوحده .


الخميس، أكتوبر 23، 2008

جامعة الزكازيخ..فرع زيورخ











جاء يوم الفرحة المنشودة

ونجح أخي الصغييييير في الثانوية العامة...وهاتك يا زغاريد من الست الحاجة والجارات قابلها العريس بمزيج من الشكر والتأفف بعد أن زادت عن حدها...

وفي المساء...وبعد العشاء...والتورتات والجاتوهات والهدايا والبالونات ..اجتمعت الأسرة الكريمة لتقرر مستقبل آخر العنقود

وقبل ما أكمل لابد أن أوضح لكم ان المحروس كبر وترعرع عندما بدأت أسرتنا تشهد عصر الانفتاح الاقتصادي...فتعود أن كل لبسه "مارقات" يعني ماركات وانه لازم يخرج في الويك إند ويسافر يتفسح بره في الأجازات -طبعا مش باحقد عليه ولا حاجة مانا لحقتلي سنتين تلاتة برضه- وأيضا هو الوحيد من ضمننا اللي دخل مدارس لغات وكل صحابه عاليين أوي وبيعملوا أعياد ميلادهم في الفور سيزونز وحاجات كده -معلش أصل أنا محدش أعرفه أصلا يعرف يعني ايه عيد ميلاد-

المهم وبالنظر لمجموع أخي المجتهد المشرف توصلنا إلى أنه ممكن يحالفه الحظ ويدخل كلية سباكة السودان ، ولو حول صرف صحي أسوان بعدها بسنة يبقى تمام...

طبعا محدش استجرى يقول كده وش حرصا على مشاعره الغضة ، فاستدرك أبي الموقف وقال له: مجموعك كده يا دوب يجيبك تجارة أسيوط ولا حاجة ، بس انتا كده هتبعد أوي..خلينا ننام ونبقى نشوف الدنيا فيها ايه

ومنذ الصباح التالي وحتى أسبوعين تاليين وأخي الجميل الرقيق كعب داير -يا حرام- على الجامعات الخاصة المصرية والأجنبية ، يسحب ملف بـ 300 جنيه هنا ، ويملى استمارة بـ 500 جنيه هنا ، ويعمل انترفيو لمدة ساعتين هنا ، واختبار ذكاء بالفرنساوي كده مالوش لازمه -هما هياخدوه هياخدوه بس لو طلع غبي هيدفعوه أكتر-

لحد ما قلبه اتنحر من المشوره واللف والدوران هو والسائق والسكرتير بالسيارة المكيفة ، لكن هنعمل ايه...لازم يشقى علشان مستقبله...مش هو اللي خاب ومجابش مجموع؟..يبقى يستحمل بأه اللي بيحصله..

وبعد الكثير من الأحداث وسؤال الناس.. استقر الرأي على إحدى الجامعات العبيطة.. الغير عريقة.. لكنها أجنبية.. وفي مصاريفها معدية.. وكلها ناس مش جايبه حتى ستين الميه ، وأصر أخي أن يبتعد عن كلية التجارة و أن يدرس مانجمينت Management فاحترمنا جميعا رغبته وباركنا رؤيته

ووقع علي الاختيار لأصحبه يوم دفع الفيس fees أو الpayments وذهبنا سويا إلى "حرم" هذه الجامعة...
طبعا حرم ايه؟ دا الكباريه يتكسف منه.. أول ما دخلنا داعبت أنفي روائح متنوعة مختلطة من أغلى العطور وأثمنها وانا اللي كنت فاكره اني متعوده على البارفانات..جت لي كرشة نفس جامدة جدا ومبقتش عارفة أتنفس...
اللي فوقني عربية كده فظيعة وقفت أدام "الحرم" ونزلت منها واحدة...واحدة بجد شكلها مغنية مثلا أو ممثلة المهم راحت على شلة ولاد وبنات وسلمت عليهم وباستهم واحد واحد وواحدة واحدة.. وانا طبعا متنحة..كرشة نفس ايه..دانا هيجيلي سكته قلبية...لحد آخر واحد سلمت عليه وجت تبوسه زقها كده..قلت والله مجدع...لسا فيكي رجالة يا بلدي...
لقيته بيقولها: معلش يا "توفي" أصلي داخل لي برد!!!
نعم يا .....إلهي يدخلوك في تربتك بدري...وبعدين مين "توفي" دي؟ أكيد ده دلع تفيده...الله يرحم
بصيت الناحية التانية لقيت ولد مرصص اتنين بنات وعمالين يكتبوله على الجينز بتاعه!!!!! وهاتك يا ضحك وهزار وكلام بالفرنساوي والبنجالي
اكتشفت ان أخويا وصل المبنى وأنا لسا متنحه عند الباب
جريت علشان أحصله لقيت واحد وقف قدامي كده بسم الله ما شاء الله حيطه طول بعرض وبيبتسم ابتسامة عريضة...طبعا مفهمتش الموضوع وحاولت أعديه لقيته "بيرقص" بوضع شدة على القاف يعني زي لعيبة الكورة ومش عايز يعديني ،
قمت أنا تخنت صوتي وعليته كده و قلتله: انت هتهزر ولا ايه؟
قالي: اسمحيلي احنا أسرة love & live وبنرحب بيكي كطالبة جديدة معانا ولو تحبي تاخدي Tour في الكلية هاكون سعيد جدا باصطحابك...
بصراحة ذوقه أحرجني بعد ما "بعبعت" فيه وفرجت الناس عليه فاعتذرت بأدب وقلتله لأ ده أنا جايه مع أخويا...وجريت تاني بسرعة قبل ما تان تان يجي تاني
وصلنا الشباك
هو مش شباك...هو ريسبشن أنضف من أي ريسبشن بنك شفته بصراحة
اخويا قالي: نقعد لحد ما الدنيا تفضى
قلتله: لأ لازم نحجز مكان في الطابور ...فظل جالسا وطنشني وأنا رحت وقفت في الطابور كان قدامي اتنين بس
قعدت السكرتيرة تقولهم بالانجليزي هتدفعوا كاش ولا فيزا ولا شيك ، المهم أول ما مشيوا وجيت أقف لقيت بنت وقفت قدامي ..طبعا أنا -الغجرية- قلتلها : ايه؟ ما تقفي في الطابور...ضحكت أوي وقالتلي: دا دوري...قلتلها لأ أنا وقفت الأول
وتربست أنا بأه لحد ما لقيت أخويا النذل ...قصدي الشهم جاي بيشدني من دراعي وبيقولي يا بنتي الدور بالأرقام وأنا حاجز رقم بالتليفون من قبل ما نيجي !!

طبعا كان شكلي عار على الآخر ومن نظرات أخويا كانت واضحة جدا انو ندم وغلط انو جه معايا ومش هيكررها تاني...
قعدت جنبه وبعدين لقيت واحده جايه تسأله وتتكلم معاه على ورق التقديم وهاتك يارغي ، فبعد ما خلص بقوله: البنت دي مش محترمة عماله تكلمك وتضحك معاك ده بتاع ايه؟
قالي: يا بنتي Peace أنا معرفهاش أصلا بس كده يعني عيشي اللحظة...
قررت اني مش هتكلم تاني طول مانا في المكان ده حرصا على مرارتي من الفقعة

دفعنا دم قلبنا-المصاريف- الحمد لله ومشينا في طريقنا للباب وانا حاسة ان حاجة كابسه على نفسي..وعيني بدأت ترف ورجلي شنكلت وحاجات كده...قلت الله يكون في عون اللي بييجوا هنا كل يوم !!!
واحنا في العربية أخويا جالو تليفون من حد صاحبه فبيقول :الواد مؤمن عارفه ده الدحاح قبلوه في هندسة ..جامعة القاهرة...بيئة أوي...ايه القرف ده
أنا طبعا مسمعتش بقية المكالمة
بعدما قفل -وكأنه حس بأحاسيسي- لقيته بيبصلي وبيقولي: هوا انت صحيح متخرجة من جامعة ايه؟
قلتله: نفس الجامعة البيئة اللي صاحبك داخلها
احمر وجهه قليلا وقاللي : معلش بأه الزمن غير الزمن
ساعتها حسيت ان عندي 60 سنة
بقلم

ست البنات


http://kaidakonna.blogspot.com/


الاثنين، أكتوبر 20، 2008

صبرني القديمه ماتت



ايه ما تقلقووووووش لسه فى صبرني جديده
شوفوا يا جماعه انا خلاص قررت اتغير من النهارده وبافكر اروح اخد دروس عند الرايق
أنا اكتشفت انى باشتغل ليلا نهارا عامله زي البالفلوف الى معلقينا فى الساقيه وكل ده بدون مقابل مادي لقيتنى على فيض الكريم يا بوي.
اي حد فيكم يقولي زي ما قالي جوزي : ايه النظره الماديه دي هاعوره اووووووك
أقولكم بقى بدأت ازاي الثوره دي :
فى الاول انا من غيظي من جوزي انه عاد بيطنش يودي هدومه للمكوجي واستريح على مكوتي بحجه انه مش فاضي يروح او ان
هدومه بقت قليله هايروح على طقمين ولا بتاع ( لانى شحت هدومه عشان بقت يرثي لها ومكسل ينزل يشتري )
المهم انا بقى اتغاااااظت منه اوي
وقلتله :بص يا عمنا اخرك معايا اسبوع من الان لو ما وفقتش اوضاعك وروحت اشتريت هدوم
وتودي هدومك للمكوجي زي الاول انا ما عدتش هاكويييييييييلك انسى يا عمر قصدي يا رضا
المهم قالي :ماشي
وبعدين بعد ما فات الاسبوع قوووووم صعب عليا ولقيته يا حبة عينى بيخرج بنفس الطقم بقاله 3 ايام ومش عايز
يغيره كسلان يكوي .
وقفت اكوي وانا متغاااااظه واول ما جه
قلتله وأنا باجز على سناااااااني: انا كوييييييتلك بس ايه رايك بقى انا من هنا ورايح هاخد ثمن المكوي
قالي: ياااااااااه بس كده من عنيه.
وحياتك عندي يا بيه هو اول كام يوم بس وبعد كده بقى خد عندك .
رضا :على فكره انتى اسعارك غاليه اوي
صبرني : هو احنا اسعارنا كده الى مش عاجبه يكوي بره ده القميص بجنيه والبنطلون 2 جنيه عااااااااااااادي يعنى
تاني مره
رضا : المكوى خلصت يا هاااااانم وانتى ما كوتيش
صبرني : ما فضيتش من امبارح اصلا ما انت شايف . وبعدين انت مش لسه لابس الطقم ده الصبح ؟؟؟
تأمير علني يا والدي .
بعد بقى ما التحويشه كبرت وبقوا اربعين جنيه حوشتهم فى شهر قوووووووم يطمع فيهم بقى
وكل شويه يقولي: مش داااااافع انتى مش نسيتى المفتاح اول امبارح جوه الشقه وكسرت الكالون وجبت واحد تاني ب15جنيه
ارد عليه : وانا ماااااااالي انت هاتحاسب المكوجي على الكالون بتاع باب شقتك وبعدين اساسا هو كان بايظ وانت كنت عايز تغيره نسييييييت ؟؟؟.
رجع فى كلاااااااااامه ومش عايز يدفع بس انا مش هاسيب حقي بقى كبرت فى دماغي
بعدين يوما فى ساعة رضا : قالي صبصب هاتعملي ايه بالفلوس دي يا صبصب .
انا وانا باستهبل : فلوس ايه يا ابو رياض .
رضا وهو فى عنيه براءة الاطفال : فلوس المكوى . انتى اكيد بتحوشيهم عشان تعمليلى بيهم مفجأه .
أنا مكشره عن انيابي : انسسسسسسسسسسسى ما تحسبش انت للفلوس دي خاااالص انساااااااهم هشششش غروش غروش .
رضا : لا بجد هاتعملي بيهم ايه ؟؟؟
أنا : هاعمل بيهم مشروع ياعم .
رضا : ماااااااشي هاتيهم اشغلهوملك معايا .
أنا : قدييييييييمه العب غيرها يا شاطر شربت من ده كتييييييير . ده انا بعون الله هابلغ عنك قريب انك زي شركات توظيف الاموال كده بس لما تروح لندن ابقى خدني معاك ياابو الروض
رضا : امال هاتعملي ايييييييه ؟؟؟ قولي بقى
صبرني : هاعمل بيهم زبادي وجبن وابعهم لك انت وولادك هههههههههههههههههههههههههه
ده بابا قالي ان علبة الزبادي فيها 4 معالق بالعدد بقت ب جنيه ونص ياعم وانا مغرقاكم زبادي وجبنه طازه
طب حتى ادفعولي الفرق بينه وبين الجاهز ايه الناس دي
رضا : لاااااااااااااااااا انا لازم اعرف بقى مين الى لاعب فى دماغك مييييييييييين انتى بقيتى ماديه اوي
أنا : انت لسه شوفت حاجه يا ضينايا لسسسسسه لازم اخد مرتب مش هانفضل طول عمرنا نشتغل ببلاش
يعنى بزمتك انا مش باشتغل اكتر من الناس الى انت مشغلهم فى المحل
مش بتديهم مرتب اشمعن انا بقىىىىىىى هاتيجى عليا انا وتوجع .
رضا : انتى جرالك ايه يا ست انتي ؟؟؟؟؟؟؟؟
أه بس عرررررررفت اكيد انت من يوم ما غيرتي لون شعرك والحكايه مأثره معاكيييييييي
ايه ده هو الصوت الى أنا سمعته وانا نايم ده لما كانت البنت بتعملك شعرك كان صوت شنيور بتخرملك مخك ؟؟؟؟
وأنا الى كنت فاكره سشوااااااااار .
أنا من الاول قلتلك بلاش تغييييييييييير لو الشعر ده بيبقى شكلك عامله زي الى مولعه فى شعرها
أنا وانا عنيه بطق شراااااار : مولعه فى شعرهاااااااااااااا . انا الحق عليااااااااااا باعمل نيو لوووووووك عشانك .
رضا : نيو لوووووووك اه بكام يا حلوه النيو لوك ده ابقى ادفعيه انتى بقى يا مااااااااديه
أنا : أأأأأأأاه طيب بقى انا هاوريلك الماديه على اصولها بقى والمخ المخروم الى بصحيح يا ابو الروض .
ومش عايزه اقولكم على عدد الضحايا بقى كانوا كام فى العاركه دي .
علشااااااااااااان كده باعلنها صريييييييييييحه
صبرني القديمه ماااااااااااتت من النهارده فى صبرني جديده

الخميس، أكتوبر 16، 2008

مبرووووووووووووك ........كاميليا


انهارده فرح يا جدعان
*************************
مبرووووووووووووك من كل قلوبنا
*********
مبرووووووووووووووك لغاليه الغاليين
*********************
اسره مدونه الضاحكون تتقدم باحلى التهانى بمناسبه زفاف العزيزه

زهره الكاميليا



واللى يحبنا ميضربشى نار فى فرحنااااااااااااااااااااااااااااااااااااااااااااااا




كل افراد فريق العمل بالمدونه يهنئون اختهم الغاليه كاميليا



مع خالص امنياتنا بزفاف سعيد


اجمل فرحه واجمل ليله
كاميليا




الف الف الف الف مليون مبروك

الاخوه الاعزاء تقام الليله فى المانيا حفله زفاف اختنا العزيزه وابنتنا الغاليه
زهره الكاميليا
واسره المدونه
*********************
مواطن مصرى نايم
*********
وابن حجر العسقلانى
***********
وهمس الاحباب
*************
وحنين القلب
****************
وقوس قزح
************
وسومه .. مجنونه فى بلد عاقل
***************
ومها زين
*************
اسلام ديو
*************
وكوكب ابى
************
والطائر الحزين
*************
وصبرنى يارب
************
وعبده الرايق
*************
وفرنسا هانم
************
يتقدمون جميعا بخالص التهنئه للغاليه

كاميليا


الأحد، أكتوبر 12، 2008

فلسفة الوقوف ع الباب

تحديث
نتقدم نحن اسرة مدونة فرنسا والرايق والضاحكون بخالص التهانى لزهرة الكاميليا بمناسبة زفافها
بارك الله لكما وبارك عليكما وجمع بينكما فى خير
=====================================
اهلا وسهلا اتفضلى كدة يا وحشة محدش بيشوفك ليه ؟ وايه الغيبة دى كلها 3 ايام محدش يشوفك ولا يسمع اخبارك اكيد انتى وحشة مقدمة قالتها لجارتها وهما على الباب

ثم قالت
ايه ده اما انا ست وحشة صحيح كل ده وما قلتش لك اتفضلى معلهش بقى اصلك وحشيتنى اتفضلى اتفضلى يا اهلا وسهلا

ولسه هتخطى قالت لها اقلعى الشبشب اصلى لسه منفضده السجادة
ودخلت معها الى الصالون وزوجها كان بالغرفة نايم وصحى على صوت الترحاب والبوس والاحضان
يعنى الست على بال ما دخلت بس أخذت لها نص ساعه وقوف على الباب
وقعدوا مع بعض اي مجتيش ليه بقى بقالك ثلاث ايام

قالت:اصلى كنت تعبانة هو انتى سألتى ولا عبرتى مين بقى اللى من حقة يزعل

ردت : معلهش بقى يا أختى ما انتى عارفة الظروف والعيال يعنى معرفش اسيبهم واجى لك لكن انتى لا عيل ولا تيل والست سمعت الكلمة زى الرصاصة واخدت على خاطرها واتقمصت ولوت بوزها ومعاها حق اصل فيه ناس بتحدف طوب

واللى قالتها قالت يقطعنى معلهش والله مقصدش

أحكى لى بقى ايه اخبارك وعاملة ايه انت وجوزك

والتانية تقوم تحكى و تحكى على هذا الحال بالساعات وتقول شفتى فلانه بتقول على فلانه التانية ايه وبعد ما تستعرض كل الحديث اللى دار واللى ما دارش تقول واحنا مالنا بس ازاى تقول عليها كدة هى مش كانت صاحبتها وقال على رأى المثل اللى بيته من زجاج ما يحدفش الناس بالطوب ولا يغير هدومة والنور مولع
وتقوم الضيفة والتانية طبعا لازم توصلها لحد الباب هى دى تيجى طبعا واجب وأول ما الباب يتفتح يا حضرات ويبقوا هما الاثنين بره الشقة تلاقى الكلام رجع تانى متعرفش ازاى وهات يا ودددددودددد ودددوددد
ويأتى صوت من غياهب الشقة وينادى ويقول انت يا ست يا اما تدخلوا جوه تكملوا كلام لا تقولى للضيفة تعدى عليكى فى وقت تانى
ترد وتقول دا انا بس بوصيها على شوية حاجات
يا ستى ما توصيها جوه

الوصية لازم تكون على الباب انا مش عارف ايه الحكمة من الكلمتين بتوع الباب دول نفسى افهم ليه دايما الكلام بيتجدد عند الوقوف على الباب اكيد فيه فلسلفة للموضوع و لا يمكن انا اللى متأخر عن ركب التقدم و ده شىء طبيعى وانا اللى مش عارف اساير ركب الحضارةعلشان كدة قلت العنوان فلسفة الوقوف على الباب ولا يمكن يكون موروث شعبى من ايام القدماء المصريين ووجدوه محفور على الصخريات اى حد يعرف ايه الفلسفة لا يتردد يساعد ويقول يمكن نعرف السبب واذا عرف السبب بطل العجب!!!!!!!!!