الثلاثاء، سبتمبر 30، 2008

اديني الحقنة بسرعة

أديني الحقنة بسرعة
ده حضراتكم الكابوس الي شوفته بعيني محدش قالى
أصل ايه
بعيد
عنكم كده كنت اعدة مرة في محاضرة في الكلية
المحاضرة كانت في مدرج كبيييييييييييييييييير ومليان ياما علي عينه
يعني خير ربنا كتير والحمد لله

قوم ايه
لقيت راجل جرم كده دخل علينا في اخر المحاضرة ولابس خير الله اما اجعله خير ابيض في ابيض و وشوش الضاكتور في ودنه
وهنا حسيت بانه هيعمل الدنيئة معانا
بيني وبينكم فكرني بأيام زمان
ايييييييييييييييييييييون
ايام ما كنت ابقه اعدة طفلة بريئة منكسرة في المدرسة ذى الودعة الي جواها ام الخلول ومقفولة عليها وسوست جوه وريحتها طلعت
والاقي بردو الحكيمة داخلة توشوش الأستاذ في ودنه وريحتها بنج
وهنا اعرف ان في عملية تعذيب هتحصل

يعني من الاخر دي مؤامرة خبيثة
غرضها الأساسى غز هؤلاء المنكسرين فى(؟؟؟؟؟؟؟؟؟) او فى اي حتة بقه
ومنعا للشوشرة لازمن وحتما ولابد
يتم التمويه عن الموضوع عشان محدش يكوت من الزئاريد الصغيرين أحباب الله (نيهاهاهاهاها)
بس علي مين
كنت بدرك في سعتها انهم ناويين يدونا حقن
وفى هذه اللحظة كنت بحاول استخبي في اي مكان
صحرا إن كان او بركان
حتى فى ذات مرة استخبيت ورا برميل الزبالة الكبير...وافشوني بردو ولاد التيييييييييييييت
المهم
لقيت الضاكتور ادا الراجل ابو
بلطو ابيض ده الميكروفون وأطلق له العنان
وذي ما يكون غمزله كده بجنب عينه (دكتور نمس الدكتور ده) وقاله
"ابسط يا عم...روش ....عيش يا سيدى...خلص منهم الجديد والقديم"
لا وايه مش بس كده ده قامله كمان وسابله المحاضرة وهج طفش
وهنا ادركت ان الضاكتور خاف من حاجة وقلق وقال يا فكيك
شوف الراجل
الضاكتور الناقص
مش يحذر اولاده احباب الله
لا
طلع يجري الجبان
المهم لقيت الجدع ابو بالطو بدأ فى القاء بعض
الكلمات المؤثرة الرنانة المنتقاه علي مسامع حضراتنا
وبيني وبينكم انا في الحجات دي بتاثر اوي
"يا اخواني تبرعوا بالدم لانقاذ اطفال السرطان...نقطة دم منكم ممكن توهب الحياه لطفل مريض...الدم حاجة منقدرش نصنعها...يعني مصدرها الوحيد ومصنعها الوحيد هو اجسامكم...تبرعوا من اجل رسم البسمة علي وجوه الاطفال الغلابة"
وكلام كبير بصراحة قطع قلبي
اوي واثر في مشاعريري الفاضحة
وبيني وبينكم الكلام اشتد اوي ولقيت الجدع بيغرينا
"وكمان بندي بردو دباديب...وكور ...وعصير من ابو 175...وعندنا بطعم الفراولة والكوكتيل والكاكا...يعني كله هيشرب وكله هينبسط"
يوه يا جدعان...لما بتيجوا علي الجرح كده وتغزوا

الراجل ابو بالطو كان معاه جدع تاني ما
شي بيلف علي المدرجات ومعاه اكياس التبرع بالدم
والي يتجرأ ويبصله بس... بأى شكل من الاشكال... لازمن وحتما ولابد ياخد كيس

ده حكم القوى يا رجاله
دول ناس متربية علي الدم ياهووووووه
فوقوا كده وصحصحوا

بيني وبينكم انا كنت اعدة في اول بنg
ومش هنكر اني أتاثرت وحسيت اننا لازم نعمل حاجة من اجل الاطفال المرضى
لكن بردو قلت لنفسي
"اسأل ا
ستشير"
لسة بسأل الجدع الي ماشي وبستشيره فى الموضوع وبقوله كده بهبل وعته
"هي الحقنة بتوجع يا برنس؟"
لقيته ما صدق
قام رازع ايده بكيس
كبير علي البينg
ولا كيس الخضار
والكيس واصل فيه حقنة
بسن عريض ولا سن الساطور
وخرطوم طويييييييييييل ولا خرطوم الجنايني



الحق يتقال انا توهت شوية واتوهمت يا جدعان
بس الحمد الله ان رزعه ايده دي منزلتش علي افايا بردو
ربك بيسترها علي الغلابة اللى ذي
ده سيبكم اصلا من اني عندي فوبيا وجنون ورعب من الحقن
لا...دي كمان الحقنة ولا سيف الجدع صلاح الدين
وفى لحظتها
لقيت صفير...وتصفيق حاد
واللى يصوت بقه...والى يشيلني ويجري يلف بيا...واللى ياخدني بالاحضان ويشئولني لفوق...وحركات
وفى فسوة ادركت ان انا بقيت كبش الفدا
الجدع الي هيضحوا بيه من اجل ان الكل يعيش
شوف الاندال
إن مكناش رجاله دفعة واحدة

وطبعا انا كده بقيت شراب مخروم
استحالة اعرف ارجع في كلامي
انا اتنصبلي صوان
وكهارب
اذاي يعني ارجع في كلامي
مين هيشيل الليلة دي
ده العالم دي تنزل فيا ضرب لحد ما اورم
ومكنش امامي غير اني اجر اذيال الخيبة والالم وانجر انكشح علي عربية الاسعاف وفي ايدي الشيكارة الي هتبرع فيها بالدم
كل ما احاول اتراجع او اكوت من اي زقاق جانبي
الاقي العالم ولاد التوووووووت ورايا بيزفوني وبيأمنوا المونطقة عشان مفكرش اهرب
انا الان بقيت من مشاهير الدفعة
والصوحافة بتلاحقني بأقلامها الصفراء والخضراء
يعني مينفعش اطلع نادلة
هخر دم يعني هخر دم
بصيت من بعيد علي عربية الاسعاف بالسرير الى جواها بمنظر الناس الي بتتبرع كنت هموت
واصلا اصلا انا عندي هيستريا من الحقن
أيشحال بقه جو البنج والعصير والدباديب ده
قربت براحة من العربية و انا ركبي بترزع في بعض
وريقي ناشف...وعيني مبرئة
لقيت صحبتي جوة العربية بتتشفط
بيني وبينكم
قربت اوي منها عشان اشوف ايه بيحصل بالظبط
واتعظ واتخذ قراراتي السريعة
مهما كانت العواقب
حتي لو هاخد علي افايا

ولما شفت الحقنة الي راشقة في عروقها
ودمها الي شغال تنقيط فى الكيس
لقيت نفسي انهارت في العياط
واترعشت اوي
وطبعا بعيط وبترعش لاني مدركة ان ده الي هيحصل معايا كمان شوية
يا مرك يا مها يا بنت عمو زين
إلا الحقنة

ولا وهيشفطوكى يا بت
جه الدكتور وجرني من افايا وخرجني برة العربية
"وقالى مالك يا ست انتي...انتي هتخوفيها؟!...يعني هي جامدة وانتي الي هتخوفيها"
قلتله وانا بعيط وبتشحتف
"بقولك ايه يا عمو....هو أنا ينفع امشي"
قالى ما تمشي يا ست انتي...انتي هتأرفينا...كتك دهية
قلت الحمد الله افراج
ويل يا ويل ويل يا ويل
بس الراجل اللئيم لمح شوال الدم في ايدي
وادرك اني الفريسة بتاعتهم
راح مناديني بعزم ما فيه
"انتي يا بت انتي...خدي هنا"
يا لهويييييييييييييييييييييييييي
- نعم يا عم انت
- انتي كنتي جاية ليه؟
- معرفش ...أصل ولاد الحلال دلوني وقالولي انكم بتفرقوا عصير هنا وكور ودباديب وحجات حلوة كتير...واكياس دم كمان وانا جاية اخد فى الكيس ده بجنية فول
راح الراجل الدكتور بصلي اوي كده وزئرلي زئرة
قلت الراجل ده هياكلني علي افايا
ويقولى "وكمان ناوية تهربي بالكيس يا دزمة"

وقلت في سر بالى "الجدع ده لو مد ايده هرشقله الحقنة في صدره واطلع اجري"
لقيته بيقولي "انتي وزنك كام؟"
قلتله "انت عاوزة كام يا باشا"
"انتى كمان بتهرجى...كتك دهية"
"انا وزني 51 كيلو يا ريس"
راح بصصلي بأرف كده (ما انا مش هنفعه بقه) وقالى
"لا...وزنك يجي اقل من خمسين....بقولك ايه انتي تروحي تتبرعي بالعضم احسن"
ونتش من ايدي كيس الدم الفاضى
روحت انا بقه اتلككت ورحت امثل بقه واقول
"لئااااااا...انا لازم انول الشرف ده...اذاي تحرمني يا راجل انت من شرف المحاولة...وعهد الله لا اتبرع يا عم الحاج...انا لازم اكون عضو نشط فى المجتمع...ايد علي ايد النيل يجري والدم يزيد...نحكم عقلنا نتبرع كلنا...نحكم عقلنا ناخد كور كلنا...نحكم عقلنا البوكس يلمنا...انا مش هتعتع من هنا إلا بكورة وعلبة عصير بطعم الدوافة...يا ريتنى كنت معاهم"
لقيت الجدع بيسرح كده وشاكله عاوزني اوزن نفسي عنده عشان يتأكد
لقيت نفسي ريقى بينشف تاني وقلتله بصوت هادي وطيب
"بس عارف...انت راجل حقاني....أه وربنا...انا اصلا بت معندهاش دم...وكمان انا لسة وزنة روحي امبارح لقيتني يا دوبك خماشر كيلو ونص"
روح يا شيخ إلهي لا توعا ولا تستوعا
اشوف فيك ابرتين

كانت معكم متبرعة مصر الاولى
مها زين (إنها الحياه)

الأحد، سبتمبر 21، 2008

عيد فطر سعيد

تحديث
============
اسره فريق العمل بمدونه الضاحكون يسعدها ان ترحب بعضو فريق العمل الجديد
الفنان ورسام الكريكاتير
اسلام ديو

تحديث

***********
اخواتى واخوانى الاعزاء كل سنه وانتم طيبين
الرجاء من الاخ عبده الدخول الى الدرافت للاهميه
فرنسا هانم
****************
كل عام وانتم والامه الاسلاميه بخير
*****************
الرسوم الفنيه لعائله الرايق اهداء عضو فريق العمل الجديد
**********
اسلام ديو



اخوانى الاعزاء زوار وضيوف مدونه الضاحكون
اطال الله عمركم

نظرا
لانشغال عائله الضاحكون فى اغتنام خيرات العشر الاواخر من رمضان
فقد قررنا التوقف الى ليله عيد الفطر

وكل عام وانتم بخير
********

الرجاء من الساده افراد العائله الموقره اتخاذ اماكنكم المعتاده
واللى هيخنصر مليم احمر يا ويله ياسواد ليله
وللعلم التفتيش ذااااااااااااااااااااااتى
الرايق مسئول باب الوصول رقم 1 رجال
وفرنسا مسئوله باب الوصول رقم 2 حريم
********************

اعاد الله عليكم جميعا تلك الايام بالخير واليمن والبركات



الجمعة، سبتمبر 19، 2008

راندا ....ولى لى و الخيم الرمضانيه

جرس الباب بيرن، ترررررررن

لي لي تفتح الباب وتستقبل رندا صديقتها

رندا: لى لى ازيك جوزك هنا ولا خرج

لى لى: خرج نزل المكتب، تعالي اتفضلي ازيك عامله ايه

رندا: طيب تمام اوى يلا نعمل كوبايتين شاى فى الحبشتكة

لى لى: حبشتكة؟ ماشى الكلام، اتفضلى وانا هادخل اعمل الشاي

رندا: لا تعالى نرغى مع بعض ونعملة سوا

لى لى: رندا، تعرفي الخيم الرمضانيه؟ انا نفسى اروح مرة هناك تعالى نروح

رندا: لوحدنا؟ اصل الخيام دى بتكون سهرة لا طبعا الى بيروح لوحدة يبقى صايع ّدى بتكون سحور اصلا

لى لى: ما احنا هنروح علي اساس اننا منعرفش حاجه ، ساذجين مش من البلد دى

رندا: انتى عارفة اصلا بتبتدى من الساعة كام الخيمة

من الساعة 12 بالليل صياعة صياعة ّ

لى لى: نفسى اروح اشوف فيه ايه، الناس بتعمل ايه، اكيد فيها حاجات حلوة، تعالي بكرة لما اجوزنا ينزلوا شغلهم بعد الفطار ناخد بعض ونروح

رندا: اقولك انا قبل لما تروحى ونقرر هنروح ولا بعدها

رندا: دى بقى ياعم تلبسى الحتة الى هى واحد عضلات و طووووويل اوى يستقبلك

لى لى: واشمعنى يعنى طووووويل اوى، هايطفوا بيه الفوانيس بعد الليلة ما تخلص؟

رندا: هههههههههه الطويل دة بقى بيطلع من المصباح مش عارفة طلع امتى، يقولك فين التكتس بتاعة الحجز تتخضى وتديهالة

لى لى وده فاكر نفسه شمعة ده ولا ايه؟

رندا: هههههههههه، ويدخلك مغارة على بابا، وطبعا جوة الاربعين حرامى، كل كبارات البلد

لى لى: هما السادة الوزراء هايكونوا موجودين؟ وعلى بابا ذات نفسه؟ ياحلاوتك ده كده اكيد هايدفعونا ضرايب ومخالفات ومش بعيد يولعوا في الخيمة وهما ماشيين، ماهو وزارة الماس

الكهربائى هاتعترف بمسؤليتها عن الشرارة، ما علينا كملى

رندا: تقعدى بقى من هنا والكل يبص لبعضة والستات تقعد تسئل دة الموديل دة حلو ياترى سنيييه من فرنسا ولا من ايطاليا

لى لى: مش مشكلة، عندى فستان من ايام جدتى عملاهولها سنية الخياطة من ستين سنة، يعنى سنييه عن ابوه، لأ عن جده

رندا: واول لما تقعدى تلاقى واحد شايل زمارة طوووووويلة يتضح بعد كدة انها شيشة وتلاقى كل واحدة وواحد ماسك فى ايدة زمارة بيزمر بيها

لى لى: يادي الشيشة، دي خلاص زي ما يكون شالو الدعم من كل حاجه وحطوه علي الشيشة لغاية ما الشعب ولع

رندا: ايوة على كل بطاقة شيشة ، شيشة لكل مواطن

لى لى: يلا ماهو المواطن محتاج برضو ينفخ، وبعدين

رندا: وبعد كدة ياعم تطلع مغنية ملعلطة تغنى اغانى الكليبات الجديدة والكل يقعد يسقف يسقف كان فى انتحابات فى البلد تقوليش فى مجلس الشعب

لى لى: دي مش خيمة رمضانيه، دي خيمة مرضانية، ايه الهسس ده؟ المهم وبعدين

رندا: قوم اية الكل يقعد يتنطط على الكراسى وكان ياختى الكرسى بقى بسوست والى عامل نفسة بية برة يطلع من القعدة هدومة برة

لى لى يتنطتوا ليه؟ هى الشيشة لسعتهم؟

رندا: ههههههه قوم اية بقى الراجل من دول يمسك الحتة بتاعة ويرقص بيها فرحان بقى رمضان وكدة والسحور بقى ييجى وكان الناس دول مش بياكلوا فى بيتهم، اشى كُوبية واشى ورق عنب واشى محمر ومشمر

لى لى: شقيانين ، تعبانين، راقصين ومشييشين

رندا: على الاخر لما الكل يقعد ياكل وكانهم اصلا بيصوموا، وبعد لما ييجى بقى الفجر تلاقى الكل روح بيتة

لى لى: من غير ما يصلوا الفجر جماعه؟

رندا: بقولك اية سيبك من الهلس دة وتعالى نتفرج على المسلسلات احسن خلينا مستورين فى البيت

لى لى: يا خسارة، انا افتكرت الخيمة الرمضانية دي عاملة زي ما تزوري سيدنا الحسين كده، كلها حاجات اثرية وحلوه وجو يرجعك بالزمن لورا، طلعت ترجع لورا بس مش بالزمن، بزيادة الذنوب

رندا: ايوة هما بيرجعوا لورا والله صح

لى لى : اشربى الشاى احسن برد، وخلينا نشوف احسن سعد الدالى

مع تحيات لى لى ورندا

الثلاثاء، سبتمبر 16، 2008

حسنه قليله

اخوانى الاعزاء
كل سنه وانتم طيبين
رمضان شهر الخير
لكن فى ناس بتستغل الخير ده اسوء استغلال
كاميرا الرايق رصدت هذا الحوار
*******
شحات 1 :- ايوه يا عم رمضان جه وهترخ على دماغك الجنود رخ
شحات 2 :- قل اعوذ برب الفلق ..طيب ما الحال من بعضه وانت بتتنغنغ على الاخر فى رمضان والسنه اللى فاتت اشتريت حته ارض تانيه ...بقى عندك دلوقتى ...خمس حتت
شحات 1 :- خمسه وخميسه فى وشك وفى عينك ومناخيرك وكلاويك من جوه ...وبعدين انا عندى اراضى ...الهم والباقى عليك انت وولادك عندكم اربع عماير كل عماره تنطح عماره
شحات 2 :- يعنى هو احنا بنشحت ....ده واجب ولازم الناس تدفعه فى رمضان ...وحسنه قليله تمنع مسلسلات كتيره
شحات 1 :- الا قولى انت مأجر كام عيل السنه دى
شحات 2 :- يادى النق الدكر ....انا هالبسهم كلهم ازرق زى ترس السويس ....علشان يمنعوا العين ...يلا بقى سلام عندى مشوار للبنك

الأحد، سبتمبر 14، 2008

100 عصير وصلحه

تحديث
*********
وصل عدد زوار المدونه فى اقل من اربعه اشهر اكثر من 6 الاف زائر
يعنى 6000 × 10 جند × 5 × 40
ياااااااااااه ... يادين النبى ..ده الواحد كان بقى من الاعيان ولا الحوجه للسلفيات
نحاول نعيد الجدوله
***********************************
الرايق :- بلبيز مسز رايق ووير ذا العصير

مسز رايق :- اصبر بس يا خويا انا بجهز العصير اهه
الرايق :- انا حران وصقعان وعطشان ...يعنى من الاند كده انا عايز عصير قصب وعصير مانجه وعصير جوافه وتمر وعرقسوس وبلح مبلول ..اخو سعديه المبلوله ..وعناب وسوبيا
مسز رايق :- ليه كل ده ؟؟؟ هى كبايه عصير واحده علشان تعرف تاكل
الرايق :- نو نو نو انا عايز كل انواع العواصيرات ...انا دونت ليه دعوه ...انا عطشان وهاشرب المحيط
مسز رايق :- على راى المثل اطبخى يا جاريه كلف يا سيدى
الرايق :- جاريه ايه ومثل بلدى ايه نو نو نو المثل بيقول ..اطلب عيونى ياسيدى وانا استلف واجيب اللى انت عايزه
مسز رايق :- حاضر يا رايق انا هاشترى كل اللى انت عايزه ...
************
على الفطاااااااااار
************
مسز رايق :- عبده انت مأكلتش حاجه
الرايق :- هات الكوبايه واقعد لاعبنى ده العصير معايا وبطنى واجعنى

السبت، سبتمبر 13، 2008

احتشاااااااااااااااااااام

مفروسة:ياخرااااااااااااابي الحقوا يا عيال الحقوا

المسلسل ده؟؟؟

اخوها:ماله يا مفروسة

مفروسة:شوفت الممثلين لابسين إيييييييييه؟؟ بحملات... و كت....وقصير....ولا الهدوم الشفافه و المحزقه

اخوها:طيب و ايه يعنى...ما احنا بنشوفهم كده طول السنة عادى

مفروسة:لا مش عادي...يعنى لازم يحترموا الشهر الفضيل...يحتشموا شويه

ولا الممثله من دول بتبقى عامله عملية احلال و تجديد وتنتهز الفرصه ان الناس كلها شايفه

\لألألأ كده مش يصح

المفروض انهم مادام بيعهملوا تمثليات لرمضان علشان تتسوق..يراعوا المظهر..

أخوها:يافالحه المسلسلات بنتفرج عليها بعد الفطار...يعنى مافيهاش حاجه

مفروسة: و ما تنساش انت كمان انها بتتعاد الصبح..والناس صايمه

اخوها:ايوه بس ديه بتتعاد للستات .. و اللى بيتفرج عليها الصبح الستات

مفروسة:لية يا ابن امي و ابويا....هوه انت ست يا فالح

اخوها:انتى حتغلطي يا بت

مفروسة:مش انا ده انت...انت يا خويا مش بتفضل طول نهار رمضان قاعد تتفرج على حلقات بلليل علشان شغلك بالليل و مش بتلحق تتفرج؟؟؟؟؟؟؟؟؟؟؟؟؟؟؟؟

اخوها: ها..مممممم....ايوه بس...اصل بس...

مفروسة:انت حتبسبس.......قولي غلط و لا مش غلط يافالح

اخوها:غلط يامفروسة فعلا لازم يراعوا ان المسلسل بيتعاد الصبح و الناس صايمه لازم شوية احتشام

مفروسة:طيب يا اخويا احتشام باحتشام قوم البس القميص و البنطلون بدل الشورت و الفانله اللى انت قاعد بيهم فى البلكونة من اول لما صحيت

الجمعة، سبتمبر 12، 2008

صايم والله اعلم

الرايق :- صباح الخير ياحسن باشا يا فراش

حسن الفراش :- بااااااااااشا وفراش ؟؟؟؟ ايه ياعمنا انت بتصبح ولا بتتريق

الرايق :- سيبك انت من الكلام ده ايه الناس اللى واقفه هناك دول
حسن الفراش :- دول مواطنين جايين يخلصوا اوراق عند حامد افندى
الرايق :- طيب واقفين بره كده ليه ؟

حسن الفراش :- اصل البيه لسه مشرفش بيجى متأخر فى رمضان
بعد الساعه 9 ونص

الرايق :- ايه يا حسن باشا الناس بتزيد مش بتقل

حسن الفراش :- استاذ حامد لسه واصل دلوقتى

الرايق :- نو نو نو الساعه داخله على 10 هو جاى ماتينيه ولا ايه ؟؟؟؟

حسن الفراش :- هههههههه كلها ساعه ويروح يصلى الضهر الساعه 11 ويرجع الساعه 1 ... ياخد كام طلب ويروح بيتهم

الرايق :- ليه يا عمنا احنا بنصوم عن الاكل والشرب وحامد افندى بيصوم عن الشغل ولا ايه ؟؟؟

الأربعاء، سبتمبر 10، 2008

صواريخ رمضان

بووووووووووووووووووووم
الرايق :- ايه اللى فرقع ده الحرب قامت ؟؟؟؟؟؟
مسز رايق :- ده صوت الصواريخ من قبل رمضان وعيال الحته مستلمنا بالصواريخ
بوووووووووووووووووووم
الرايق :- صواريخ ؟؟؟؟؟؟؟؟؟؟ نو نو نو انا عارف هترر مش هيجبها البر معانا
مسز رايق :- هترر مين يارايق ...اسمه هتلر ..وبعدين دى صواريخ بيضربها العيال فى الحته
بوووووووووووووووم
بوووووووووووووووووم
بووووووووووووووووم
الرايق :-العيب مش على العيال العيب على اهاليهم اللى معرفوش يربوهم قبل ما نعتب على العيال ونقول عيال لازم ولابد ندور على دور الاسره ........دى اسره بايظه من غير ظابط ولا رابط
بووووووووووووم
بووووووووووووووم
بوووووووووووووووم
الرايق الصغير :- بابا نادى على ابنك اشترى بفلوسه كلها صواريخ وعماله يضربها على السلم والجيران بتشتمه

الثلاثاء، سبتمبر 09، 2008

العيب عيب عبدو البواب!!؟؟

كان ما كان من سومه وبطيخ فى اول يوم رمضان


سومه:الوو صباح الخير يا طيخه...

بطيخ:الوو ...انا فين وانتى مين....

سومه:بتدعك فى ودانك ليه يا حبيبى اجيبلك سلاكه
بطيخ:عرفتى منين انى بدعك ودانى ...وانتى متاكده انك سومه...طيب هاتى اماره

سومه:اه انا سومه وبالاماره بتصل بيك عازماك اول يوم رمضان انت وطنط اوعوا متجوش

بطيخ:احم احم سومه هو مين اللى طابخ بالظبط؟؟

سومه:ههههه متخافش ولا يكون عندك اى فكره ...

بطيخ:معناه ماما هى اللى طابخه يا حبيبتى ؟؟؟

سومه:لا طبعا مش حخليها تحط ايدها فى الاكل انا عاوزه اشرفك قدام امك يمكن تبطل نأوزه عليا

بطيخ:اسكووووووووووتى مش ماما صحتها تعبانه جدااا يعنى كنت بقول ناجلها ليوم العيد حتى الواحد يكون فاطر وعامل حسابه

سومه:بطيييييييخ قسما عظما لو ما جيت لاكون لاغيه الخطوبه خالص ومفشكله الموضوع...انت ازاى مش واثق فيا

بطيخ:حاضر حاضر خلاص من عينى انا جى ان شاء بس بلاش زرزره ...الله

طيب ما تدينى حماتى اكلمها

سومه:بطيييخ

بطيخ:خلاص مش مشكله رمضى عليها انتى نيابه عنى

___________

ماما:سومه يا حبيبتى انتى ناويه تطبخى لوحدك

سومه:اه يا ماما يا حبيبتى ارتاحى انت خالص ومتقلقيش

سوسن:طيب سؤال هو الاكل اجبارى ولا اختيارى يعنى ممكن اكمل صيام للسحور

انا اصلى انا يعنى .... كنت بقول لو اساعدك واريحك

سومه:لا يا حبيبتى متخافيش انا حتكفل بالامور

الاخت الصغرى:مع نفسكم ان شاء الله انا نازله افطر مع صحباتى سلام

سومه :بنت انتى يا بت ارجعى هنا ماشى يا مقروده انتى الخسرانه

سوسن بتهمس لماما:الحمد لله ضمنا حد يعيش من العيله ويدعيلنا لما نموت مع انى متاكده انها ندله ومش حتفتكرنا

____________

سومه :عبده يا عبده انت يا عبدووووووووووووو........

عبدو البواب:نعم يا ست سومه

سومه:هاتلى اتنين كيلو خرشوف....اممم وفرختين صغيرين متقطعين اربع ....اه وكيس نشا عشان المهلبيه....وهات الكرنبه الصغيره دى....وهات كيلو ريش ضانى ...وياريت كيلو بتنجان....وكيلو سمك فيليه.....متنساش حزمتين ملوخيه...وكيس مكرونه ريجينا...

الله انت متنح ليه يا جدع انت...خد معاك 50 جنيه تتنطط فوق تحت تجيب بيهم الطلبات....

البواب :هااا من عينى يا ست سومه ....عن ازنك ....(بيهمس)باينها حتقلب بحريقه النهارده...

____________

سوسن:البواب جاب الطلبات خلاص؟؟

هوااا....هو انتى حتعملى ايه النهارده

سومه:شوفى يا ستى حعمل عقبال عندك ملوخيه بالسمك شوفتها فى التليفزيون شكلها يجنن

وحعمل بتنجان بالمهلبيه

وحعمل سلطة خرشوف بالمايونيز وقليلا من القرفه

وحعمل مكرونه بالريش الضانى

والفراخ حقطعها مع الكرنب واعمل اكله صينى اسمها توكا

والحلو صوابع احمد ابن ذينب وبقلاوه بالزبده

سوسن:شوفى هو بغض النظر عن صوابع احمد والمهلبيه بس الحمد لله الحاجه الوحيده اللى عارفاها مكرونه بريش ضانى...حتلحقى تعملى دا كله

سومه:ههههههه يا بنتى اصلا اصلا الاكل تقريبا خلص...الفضل للصينين ..كله نى فى نى....

سوسن :شنشنششنشنش (سوسن شمت ريحه)........ايه دا فى ريحه شياط الحقى

سومه:شياط ايه يا عبيطه دى اللحمه بس بتتشوى

_________

ترررن

سومه:بطيخ ازيك يا حبيبى ...ازيك يا طنط اتفضوا نورتونا

طنط ام بطيخ:نحمده يا بنتى ربنا يستر....قالولى انك طبختى النهارده

سومه:اه حتدوقى وتقوليلى رايك بقى .... اتفضلى يا طنط اتفضل يا بطيخ

الافطار جاهز ياله يا ماما سوسن ياله خلاص مدفع الافطار

بطيخ:امال فين المفعوصه اختك ؟؟

سومه:راحت تفطر مع صحبتها

طنط ام بطيخ:نفدت بجلدها...بصوت واطى....بس تعرفى الاكل شكله هاااااااااايل

سومه:ولسه الطعم

بطيخ :سومه هى الفرخه شايفها حمرا لسه...حاسسها مستويتش!!

سومه:ايوه طبعا ما هودى طريقه صينيه الاكل نى فى نى

بطيخ:اه هى هى هى معلش جهل بقى ...هو انتى ازاى وقفتى المكرونه كدا ...!!

سومه:حمرتها يا حبيببى ورصيتها

طنط ام بطيخ:صينى برضك يا بنتى صح؟؟؟

سومه:تمام يا طنط

بطيخ :بقول ايه يا سومه مش كنتى عاوزه تلغى الخطوبه يعنى انا فى الوقت الحالى معنديش اى مانع

سومه:قصدك ايه ان اكلى مش عاجبك؟؟؟

بطيخ:لا يا حبيبتى هو انا اقدر... انا بس ....اممم ...بصى هو عموما هى مش غلطتك ....

سومه:يعنى ايه؟؟

بطيخ:يعنى الغلطه من عبدو البواب هو اللى نسى اهم طلب فى الطلبات

سومه:هو ايه اهم طلب

بطيخ: الاول نسى الطباخ الصينى والتانى لما نسى يجيب الطباخ الصينى نسى يجيب معاه الاسعاف الصينى برضك لزوم الطوارىء!!؟؟

_____________

متنسوش كلكم معزومين ع الفطار وخصوصا جمعاوى

ملحوظه
نونو عبدو البواب ملوش علاقه خاااااااااالص بعبدو الرايق....بس تشابه اسماء

والملحوظه التانيه

دى مش قضيه سومه لوحدها دى قضيه كل سيدات البيوت اللى بتتفزلك وتسمع كلام الشيف ميمى وسوسو وتوجع بطننا رجاء ارحمونا

____________
كانت معكم اجدع طباخة فى الكون الشيف سومه_87

الاثنين، سبتمبر 08، 2008

اطعموا قطاطكم وريحوا بالكم

سيداتى انساتى فى نهايه نشرتنا الاخباريه لهذا اليوم نترككم مع

لقطه اليوم والدكاتره عبده الرايق

المذيعه :- اهلا يادكاتره انت على الهواء

يادكاتره انت على الهواء

انت سامعنى

يادكاتره

الرايق :- ايوه يابنت اخوى سامعك بس بفتكر اللقطه ...انا كنت كاتب الكلام على ضهر تذكره الاتوبيس ...بس لقيتها

اخوانى الاعزاء

كاميرا الرايق التقطت لكم هذا الحوار

********************

مذيعه :- اهلا بيكم فى لقائنا الاكثر جرأه مع عائله القط مشمش ....نيييياو

مشمش :- نييياو مين يا مظمزبن ...اهلا بيكى

مذيعه :- انا عايزه اعرف احساسكم ايه فى شهر رمضان

مشمش :- انا بشكر الناس فى شهر رمضان لانهم بيعملوا الاكل ياكلوا ربعه والتلات ارباع ليا انا ومشمشه والاولاد ....وزى مانتى شايفه احنا فى رمضان تخنا وربربنا وربينا مجانص ..ويمكن كمان مراتى العزيزه مشمشه بقت مقلوظه وسمينه ...علشان كده بنقول لكل الناس ....ارموا الاكل براحتكم ...مشمش وعائلته فى انتظار معوناتكم

الرايق :- بدون تعليق

الأحد، سبتمبر 07، 2008

شوفولي سكينة او اي حاجة بسن

يا ولاد احنا بكرة معزومين عند عمتكم علي الفطار
وبتقول هتجيبلنا حاجة بنحبها
ويل يا ويل ويل يا ويل
يا تري عمتو بقه هتعملنا ايه
يا حلاوة يا ولاد يا تري هتجيبلنا فراخ مشوية وكفته من الراجل اللى فاتح تحت العمارة
ولا هتعمل محمر ومشمر وحركات وشقلبزنات
يا حلاوتك يا عمتو يا برنز يا حلاوتك وانت بتفنن وتهندز
***********
هاه يا عمتو عملالنا ايه انشاء الله النهاردة بقه احنا علي لحم بطننا من بتاع تلتاشر ظباطة
موفجأوة يا ولاود
الله...يا حلولي....يا طعامتك وانت بتدلع يا برنز

***********
فات بتاع اربعين فرسخ ولسة الاذان مأذنش
وريحة الجرع بتاع الفراخ المشوية والكفتة تعبتلي الرييش والامعاء
انتي يا ست ياللى اسمك عمتو انتي ....انتي عملالنا ايه بقه اخلصي انا تعبت
موفجأوة يا ولاود
صبرني يا رب....بس اكيد مفاجأة صاروخ ارض جو
طالما عمتو بتضم شفايفها كده وبتدلع يبقه خير اكيد
وحتما ولازمن ولابد وايز ربما الاكله افرنجي

***************
فات كتير اوي
اوي يا رداله وربنا
و لسة هقوم اشوف سكينة ولا اي حاجة بسن
متخفوش مش هقتل عمتي
حرام احنا في رمضان
لا انا كنت هموت غربان بطني اللى عماله تجعر وتهاتي وتويك وتجاي
لقيت المدفع بيتفنجر
احمدك يا رحيم
بس هو فين السفرة يعني والفرش والناس اللى بتجري والناس اللى بتيجي والمعالق اللى بتترصص و
العصير اللى بيتصبصب و الحركات دي
هما العالم اهلي دول ساكتين ليه؟
محدش بيعبر عن نفسه ليه؟
هي عمتي دي مسكالهم ذلة ولا ايه؟
ولا تكونش دي مش عمتي اصلا وفى مؤامرة هتتنصب النهاردة؟
الاذان اذن بصراحة
لقيت جوزها دخل المطبخ
قلت يبقه اكيد الراجل الطيب الخدوم الكومل ده بيجيب الاكل
لقيته خارج وقافل ايده علي حاجة ومتبت
طب ايه طيب؟
هو الجرع ده هيفطرنا حب العزيز ولا براغيت الست ولا ايه؟
ولا يكونش الجرع متبت علي مطوة قرن غزال وناوي يغزغزنا كلنا ويسرق دهبنا
مين دول يا جدعان؟
الجدع جوز عمتو ادانا كل واحد تلت بلحات في ايدنا
وكان ناقص يقولنا كده بصوت واطي فى ودننا
خدوا خدوا كلوا وانبسطوا ومتقولوش لحد
كله هياكل وكله هينبسط
صعبت عليا روحي اوي وقررت اكل البلح وانا ساكتة واعمل نفسي اصلا ان اكلتي المفضلة هي البلح
واني مش باكل غيره اصلا اصلا اساسا
حلو البلح اوي ومغذي وفيه فيتامين فلزات البريلليليوم
واوكسيد الفوسفات
انا اصلا عيشة عليه من زمان
ما تجوموا بينا نمشي
ونتبرا كلنا من عمتي دي

لقيتهم بيفرشوا المصليات ونويين نصلي المغرب وبالمرة العشا والتراويح
صليت معاهم ...مهو انا خلاص...صراحة البلح انتخني...وانا اللى استاهل....انا مخرجش من بيتي تاني
ابدا
خلصنا الصلاه ولقيت بقه الشغل ابتدا
صراحة ظلمتك يا عمتو
انا وحشة
انا كوخة
انا اوع وايع واع
الناس الحلوة بتحضر السفرة اهه
سامحني يا رب سامحني
متسرعة كده انا علطول
وماله لما نصلي الاول ونحمد ربنا وندعي
هو ده الصح
كتني دهية

تعالوا يا حلوين يلا الاكل جاهز
يطعمك ما يحرمك يا عمتو
اللهي وانتي جاهي ........
ولسة مكملتش
الاقي الوليمة المتينة
واسرتي كلها في اشكاح وزقتططة
يا اندال
طب ليه
طب ليه طيب؟
الوليمة المريعة اللى كانت مفخرة لبقية الاسرة الكريمة كانت
ان ان ان ائا
كرشة وفشة وسجق ولحمة راس وممبار والحجات الاوع دي
حلاوتك يا برنز
شوفولي سكينة او اي حاجة بسن طيب
وحياه ابوكوا بسرعة في حد هيتشق النهاردة ويتعمل لحمة راس
كل سنة وانتوا طيبين وفى بيوتكم فطرانين
وبعد الاذان مصليين
كانت معكم مها زين

الجمعة، سبتمبر 05، 2008

النظره الاولى لك

حسان :- نهاره اشطه واتنين فل وياسمين يا ارض احفظى ماعليكى

حسن :- ايه يا حسان رمضان كريم يا راجل انت مش صايم ولا ايه ؟؟

حسان :- طبعا صايم يا اخى بس النظره الاولى لك ...و بعدين دى موزه ولا بتوع السيما .. ايه الجمال والحلاوه دى ..انا غلطان انى اتجوزت ابن عمى ...كانت عينى فين من الحلاوه دى كلها كنت حاطط فيهم ششم .. ولا كنت مركب جوز كشافات صينى !!!

حسن :- حرام عليك يا حسان اتقى الله ... ده حرام ..وبعدين احنا فى شهر فضيل يا راجل وانت صايم

حسان :- انا مش قلتلك النظره الاولى لك ...طيب لسه النظره الاولى مخلصتشى ...لما انزل عينى تبقى خلاص فنيتو

حسن :- يعنى عينك خرمت جسم البنيه بقالك خمس دقايق وتقولى نظره اولى ...هى اولى ثانوى ولا ايه ؟؟ حاسب يا حسااااااااااااااااااااان حاسب العربيه كانت هدوسك وانت ماشى هيمان مش واخد بالك

حسان :- كده ضيعت عليا النظره الاولى !!!!!!

حسن :- اولى مين يا حسان العربيه كانت هتدوسك

حسان :- برضه ضيعت عليا النظره الاولى .. يلا تفرج بمزه غيرها

الأربعاء، سبتمبر 03، 2008

رانوس فمضان


بابا عاوز فانوس

حاضر

بابا عاوزة فانوس

حاضر

فاوزين عانوس من اللى بيحول وقوى يا وقوى

ولا الحانوس اللى بيقول جمضان رانا وبرحنا فه بغد عيابه ارلا همضان

ولا اللى بيقول بجرى بجرى بجرى والاجيام بتدرى والله لبه بسرى يا صهر الشيام

عفوا

الفوانيس صنع فى الصين

الاثنين، سبتمبر 01، 2008

نوم الصايم ....عباده


مفروسة:صباح الخير يا فرنسا ...حتأكلينا إيه اول يوم رمضاااان

فرنسا:صباح !!!!قولى مساء الخير ياختي ناموسيتك كحلى الساعه داخله على 2 و انتى بسلامتك و انتي و اخواتك نايمين؟؟؟!!!

مفروسة: الله..الله مش احنا فى رمضان؟؟!! نوم الصايم عباده و احنا صايمين...

و أصلا اصلا نصحي نعمل ايه هوه الواحد بيبقى قادر ينطق....الصراحه يامه..لازم الحكومه تدي البلد كلها أجازه فى رمضان

فرنسا:يا صلاة النبي ...و مصالح الناس يا مدهولة مين يعملها؟؟؟؟ و ابوكي يقعد على نفسي فى صباح رمضان كله مش كفايه عليا الاجازات الاسبوعيه و الساعتين اللى قيل الفطار؟؟؟!!! ....

مفروسة:سيبك بقى من النوم و الصحيان...قوليلي حتفطرينا إيه؟؟؟؟؟؟؟

فرنسا:عادي شوربه و رز و فراخ و خضار .....و شوية خشاف

مفروسة:::إيه!!!!!إيه؟؟!!......بسسسسسسسسسسسسسسسسس احنا صايمييييييييين.....أأأأأكل أأأأكل...هوه ده أكل...طيب اعملى صنية بطاطس كمان....ولا اقولك,,,,,شوية سامبوسك.....ولا اقولك....حبة كوفته....ولا اقولك...انتي شكلك تعبان ..انا حكلم المطعم يجيب الحاجات ديه دليفري

فرنسا: يا بت اتهدي و اهمدي...ماحدش حياكل كل الاكل ده...ده الصايم يادوب بياكل التمر و الخشاف و خلاص..اسمعى كلامي يا مدهولة

شوفوا البت برضه اتصلت و عملت الاوردر

مفروسة؟: انا حدخل انام بقى لغاية لما التمثليه اللى قبل المدفع تيجي

فرنسا:يابت اقريلك شوية قرآن ربنا يهديكي...و لا انزلى بيعي العرقسوس اللى ابوكي عامله ....

مفروسة:يووووووووووووووووه هو مافيش غيري انا صايمه...حدخل انااام

بووووووووووووووووووووووووووووم

المدفع ياولاد

اللهم اني لك صمت و على رزقك افطرت

مفروسة:الحمد لله شبعت...اقوم الحق التمثليااات

فرنسا: يا نهار ابوكي ملون...انتى يا بت....مأكالتيش ليه يا عين امك الاكل اللى انتى مدفعاني فيه دم قلبي؟؟؟

مفروسة:شبعت

فرنسا....وحياة امك؟؟؟؟؟؟؟؟!!!!!! لما يجي ابوكي يشوفله صرفه معاكي...

ياعني يا ربي هوه رمضان اكل و مسلسلات و بس

حسبنا الله و نعم الوكيل

بوست خفيف على المعده

اخوانى
واخواتى
اعضاء فريق العمل
وزوار المدونه الكرام
كل عام وانتم بخيركما وعدناكم بنزول بوست يومى للضاحكون فى مدوناتنا ..الضاحكون
عن السلوك السلبى فى الشهر الكريم
وهذا البوست الاول
الخفيف على المعده
************************
الرايق :- انتى ياست يا مسز رااااايق ...انتوا يابشر
مسز رايق :- خير ياخويا فى ايه ؟؟؟؟
الرايق :- فاضل كام على المغرب ؟؟؟؟
مسز رايق :- لسه ياخويا احنا لسه الضهر
الرايق :- نهارك بنى مبهدل ..ضهر !!!!!!!!!!! انا جعاااااان ..انا عطشااااااااااان

بعد شويه

الرايق :- انتوا يابشر ياناس ياهوه ....فاضل كام على المغرب
مسز رايق :- لسه بدرى احنا لسه العصر
الرايق :- نعععععععععععععععم .عصر !!!!!!!!ليييييييه ؟؟؟؟ انا جعااااااااااان انا عطشااااااااااااااان انا صايم يا عالم

بعد شويه

الرايق :- نو نو نو انا خلالالالالالالالالالالالالاص انتوا يابشر ...انتوا ياناس ..فاضل كام على المغرب
مسز رايق :- لسه ساعه ياخويا اصبر شويه
الرايق :- اصبر !!!!!!! انا جعان انا عطشااااااااااان محدش حاسس بيه
الرايق الصغير :- بابا مالك فى ايه ؟؟؟ كلنا صايمين زيك
الرايق :- وانت كمان صايم يا مفعوص ؟؟؟
الرايق الصغير :- طبعا يابابا ...ورحت جبت عيش فى الشمس ...ورحت جبت مخلل ...ورحت جبت تمر وعرقسوس ..ورحت اربع مشاوير اجيب طلبات لماما ...وانت عندك اجازه وقاعد مرتاح ..وماما برضه صايمه زيك تماما
لرايق :- انا قوى ياولد ..انا جامد ..انا ....انا ...اناهو فاضل كااااااااااااام على المغرب ياهووووووووووووووووه