الثلاثاء، يوليو 29، 2008

برا وجوا فرشتلك وانت مايل ومين يعدلك


ركز شويه حتد التشابه فى علاقه المرأه بالرجل وعلاقه توم وجيرى.......
سومه:اصطبحنا واصطبح الملك لله....
بطيخ لايمها لحسن والنعمه اسيبلك البيت وامشى ومنتش شايف وشى تانى
بطيخ:ياله الباب يفوت عربيه مرسيدس ....التاكسى اللى يودى
ابليس الله يكرمه:لالالا دا كلام واحد مش فارقه معاه ...كرامتك يا سومه
سومه:ايوه يا عم ابليس انفخ فيها انت لحد ما تولع بجاز
ابليس:يا ستى دا انا بنصحك الحق عليا
بطيخ:وكمان بتكلمى نفسك ....وتبرطمى طبعا دى اخلاق واحده متربيه انا غلطان
ابليس :طبعا انت غلطان اديها قلمين على خلقتها خليها تفوق هى فاكره نفسها بنت بارنديلو
بطيخ:هى اسمها بارنديلو....
ابليس :اسمعها كدا .....يا عم فكك ....خليها تغور
سومه:يعنى بتشتم فى سرك دى عمايل واحد محترم...
ولميت الهدوم ....تاكسى...وركبت .....وزعابيب امشير بتتنطط قدامى....جرز ورنيت...باب واتفتح ...وترحي
سوسن:سوماااااااااااا ....ازيك وازى بطيخ .....لسه كنا فى سيرتك
اخدت فى وشى ودخلت على الاوضه
سوسن :ماما سومه مش طبيعيه....
ماما:بت يا سومه مالك فى ايه ماداهيه تكونوا اتخانقتوا دا انتوا لسه فى شهر العسل
سومه:بلا عسل بلا بصل....دا انسان مش مظبوط....ومعندوش قناعه
ماما:بغض النظر عن الشعارات .... مش هو دا بطيخ اللى فضلتى تحلمى
سومه:دا كان كابوس يا ريتنى كنت صحيت قبل ما يتم
ماما: خبر ايه بس يا حبيبتى....
سومه:البيه واقف بيعاكس فى الشباك....
ماما:مش ممكن تكونى ظالماه؟؟؟
سومه:شوووووووووووفته بعينى ومحدش قالى
ماما:يا حبيبتى كبرى دماغك....دا طبع الرجال
الراجل لو اتجوز كل ستات الدنيا وبقى واحده حيتمنى يتجوزه
سومه:ياماما دا كلام...؟؟؟
وانا اللى كنت واخداه عاقل
ماما:وحد قالك انه اهبل يا بنتى لا سمح الله.....دا داء فيهم وميبطلوه لو ايه حصل

بقولك ايه الراجل عمره ما يبص برا غير لو جوه يسد النفس ....
سومه:طب اسمعى ....ضربت شعرى اصفر وعملت موزنبليه....ولبست شفتش
ماما:وبعدين
سومه:قالى هايل يا حبيبتى بقيتى الخالق الناطق شبه الاراجوز...وسابنى ومشى...
ماما:ما تلاقيكى نيلتيها مكياج قوى....عارفاكى لما تعكى....

سومه:تانى يوم....فردت شعرى واديته بنى.... وقلت اعمل تسريحه شبه الصينيين....اول ما دخل قالى توكا توكا وانحنى احتراما ليا..
ماما:جمييييييييييييييل....

سومه:وسحب نفسه من سكات ونزل رجعلى بدكتور نفسانى بيقولى مجنونه
ماما:ماهو حد برضو يعمل فيها يبانى.....اديها عشره بلدى ....دا البلدى يوكل

سومه:تالت يوم.....اديته لون اسود....اسود على راسه وعلى راس اللى جايبينه....ولبست زى مشخلله الرقاصه.....لسه بقوله اخاصمك اه
طلع ربع جنيه فى ايدى ويقولى كله على الله.....فاكرنى بشحت
فتح التليفزيون وقعد يتفرج على الستات اللى فيه ويبصلى بغلب وزعل ويقولى نعمه واللى يكرها يعمى...
ماما:وهو كان حد ضربه على ايدى
سومه:كل شويه يقولى انا اتعميت .....انتوا ضحكتوا عليا....خدعتونى
قوليلى يا ماما هو انا عفريت
ماما:ليه يا حبيبتى

سومه بعياط ونويح:اول ما بيصحى بيقولى يا حفييييييييييييييييييظ .....بدل صباح الخير...تصورى يا ماما

الاخت الصغرى لسومه:يا عاااااااالم الصوت ارحمونى ....ياخواتى عاوزه اسمع سى عموره افندى(بتنهيده)
سومه:بالزمه انا متخانقه وانتى هنا بتحبى على
جرس الباب .....تررررررررررررررررررررررن......افتحوا الباب
الكل فى نفس واحد :مييييين بطيخ.....؟؟
سومه:ايه اللى جابك احنا مش متخاصمين.....وقلت الباب اللى يودى
بطيخ:اصل النور قطع فى الشقه.....وبخاف اقعد لوحدى قلت اجى اخدك تطفشى العفاريت واهو نتونس مع بعض...هاهاهاه
سومه:هىءهىءهىء لا خفيف ...احسن خللى العفاريت تاكلك.....ومناديتش للحلوه اللى فى الشارع اللى عمال تعاكسهالى ليل نهار ...تونسك ليه
بطيخ:يا ريييييييييت ....(قالها بهمس).....اقصد اصلها مرضيتش.....
سومه:نعم....يعنى انت طلبت
بطيخ:لا يا حبيبتى .. .. وتسيب المحل لوحده ازاى بس...انا محبش قطع الارزاق...
سومه:يعنى هى دى مشكلتك معاها.....اقعدلكم انا فيه

بطيخ:تكون خدمه العمر.....
سومه:افندم
بطيخ :يا حبيبتى انا بهرج معاكى انا عمرى ما استغنى عنك...

بالعقل كدا....ساعات تشترى فرده جزمه ضيقه شويه بس بتستخسرى الفلوس وبتلبسيها...
سومه:مين دى انا جزمه
بطيخ:شوفى اديكى فهمتينى غلط.....اقصد انها مهما كانت ضيقه حصبر عليها لحد ما توسع وتبقى على قدى
سومه:بطيخ انتبه....انت لسه مستمر فى الغلط
بطيخ:طول عمرك نواياكى سوده....طيب خدى عندك مثل تانى...
.فرضا انا اشتريت شراب واكتشفت ان لونه مش ماشى على هدومى
سومه:غير الهدوم...
بطيخ:افرضى معنديش غير طقم واحد
سومه:غير الشراب.....انت تقصد انك عاوز تغيرنى..!!؟؟؟
بطيخ :لا يا حبيبتى انا معييش فلوس اجيب شراب جديد....
ممكن استلف واحد من جارنا.....
وارجعهوله بس مقدرش استغنى عن شرابى القديم
عشان حمارتك العارجه تغنيك عن سؤال اللئيم........
وفجاه سومه تتخيل نفسها اتقلبت حماره ...ثم تهز راسها مستبعده تلك الفكره.....
الام:سومه .....سوووووووماااااااااااااااااااااااااا....انتى معانا..؟؟؟
سومه:ها اه يا ماما ....انتوا كنتوا بتقولوا ايه....؟؟؟
ماما:اسم الله عليكى يا حبيبتى....بطيخ عاوز يحدد معاد الفرح....

سومه:فرح...يعنى احنا لسه متجوزناش....؟؟ !!!
اه والله دا كان حلم....طب اقرصونى.....
خلاص فرررررررررررررررركش مفيش جواز
بطيخ:فى ايه بس
سومه: سورى يا بطيخ.....بطلت رجيم البرسيم
بطيخ:بتقولى ايه..؟؟
سومه:ورلك على حماره تانيه.....اقولك روح للصرماتى يوسعلك الجزمه.....ولا نقى شراب عدل
لا حول ولا قوه الا بالله......باينها رجعت تتجنن تانى وتجيلها الحاله.....وتم تاجيل الزواج لحين علاج العروسه
وتنتهى القصه....ولا ينتهى الحمار ...اقصد الحوار هههههههه
قال على راى المثل برا وجوا فرشتلك وانت مايل ومين يعدلك......
سارى على جميع الرجال


تحياتى للجميع سومه_87

السبت، يوليو 26، 2008

عشاء ليله الدخله


بعد فترة خطوبه دامت لاربع سنوات ظل الخطيب طوالها يمنى نفسه بهذا اليوم الموعود واقترب الموعد والكل يعد ويجهز لتلك الليله السعيده وقبل يوم العرس
سألته حماته :ها يا حبيبى تحب بقى نعملك عشا ايه يوم الدخله؟؟؟؟؟؟؟؟؟؟
العريس : بصى بقى يا ستى انا اكتر حاجه باحبها هى السمك بكل انواعه فانتى بقى جهزيلى شوية سمك كده على جمبرى وتبقى حاجه تفتح النفس
مصمصت شفايفها هى وبناتها اخوات العروسه وردت واحده منهن :ايه ده انت عايز الناس تاكل وشنا وتقول احنا ماجبناش اكل كويس ما ينفعش اختارلك حاجه تانيه
العريس وهو مخنوق منها :مين بس اللى هايعرف هو انا هاخد الاكل اروح افرجه للناس ده هو يادوب من الدار للنار فورا وبعدين هو فى احلى ولا اشيك م السمك
حماته : اختار لك حاجه تانيه وبلاش السمك بلا كلام فارغ
العريس : مش مختار و اللى تحبوا تاكلوه اعملوه
(حاجه تسد النفس)
فى سره طبعا
وجه اليوم الموعود والليله كانت طويله اصل العروسه كانت من مدينه وهو من مدينه تانيه تبعد عنها حوالى 3 ساعات وركب العربيه اللى مستلفها وراح مسافر يجيب العروسه ومجوع نفسه على الاخر عشان العروسه ماتقولوش انت واكل نص بطن من اولها؟
ماطولش عليكوا العريس جاب العروسه وخلص الفرح وجوه بطنه 30 واحد بيجروا ورا بعض من الجوع
راح لشقته مع عروسته وطبعا اهلها واهله وكان فى ناس مايعرفهمش ودخلوا كلهم الشقه يتفرجوا و العريس واقف على حيله ياخد العزا.....اقصد يتلقى التهانى لحد لما حصل على الاستقلال(هو تخيل ده فى وقتها مكانش يعرف ان ده كان بداية الاحتلال الابدى السرمدى)
وجه بقى وقت العشا والصينيه معديه قدامه رايحه للسفره وعليها الاكل ملفوف بقى بورق الومنيوم لزوم السفر الطويل
واشعلت العروسه شموع الفرح وحطتها على السفره بكل رقه ورومانسيه
وقالتله: ها يا حبيبى تحب نبدا بايه فى الاكل
العريس بفجعنه : هو الاكل فى ايه وايه وايه يا حبيبتى
العروسه : معرفش والله استنى كده
وبدات تكشف الاكل
- فى جوز حمام وصينية رقاق وصينية رز معمر ووزه او بطه مش عارفه يا حبيبى
العريس هايعيط من الجوع: انا راجل اعز الحمام فى بينى وبينه عشره مقطوعه من زمان ونفسى اقبله اسلم عليه وابوسه ناولينى فرده بقى
افتح يا سمسم
العروسه بتناوله الحمام قالها : بقولك ايه انا مش عارف اكل فى الشموع الوالعه دى ممكن بعد اذن حضرتك انتى وجو الرومانسيه الهايل ده اولع بس النور اللى مكلفنى الشئ الفلانى انا نفسى من زمان اشوف الليله دى كلها فارجوكى نخليى النور والع الليله دى بس وبعدين نبقى نشيل عداد الكهربا بعد كده لو حبيتى
العروسه : بس كده يا حبيبى حاضر واضاءت الانوار
وراى الحمامه فى يده
العريس : ايه دههههههههههههههههههه الحمام مش مقلى ليه هما جايبينه مسلوق بس
وبعدين مش قادرين يشيلوا راسه منه؟!!! سايبنها ليه مدلدله كده

قالت وهى مندهشه وخايفه الليله تقلب بغم : دقايق يا حبيبى واسويهالك
مسك ايديها بسرعه: رايحه فين مش من اولها كده انتى ما صدقتى تجرى على المطبخ ما ينفعش
بلاها حمام ياستى خير ربنا كتير اهوه
شوفى بقى طول ما فى رقاق فى الاكل انا معنديش مشكله
هاتى السكينه يا جميل

ناولته سكينه يقطع بيها الرقاق
مسك العريس السكينه وبدا فى سعاده المجانين يعمل شوية اكروبات بالسكينه ويلفها زى بتوع السيرك من فرحته(مكنش عارف اللى فيها)
واخيرا راح بالسكينه موجها سلاحها ونصلها الحاد جدا للرقاق القابع فى الصينيه الكبيره
وبدا يحاول التقطيع
واتاه صوت من الرقاق يدل على انه حط السكينه فى حاجه ناشفه
فحول ايده بالسكينه ليمين الصينيه
ثم ليسارها
ثم للوسط
كلها مش مستويه ثم حولها لوجه زوجته قائلا:
هو مين اللى عمل الاكل ده يا وليه قصدى يا عروسه
قالتله: الجيران يا حبيبى اصل احنا مش كنا فاضيين فنزلنا الاكل عشان يحطوه فى الفرن وهما رجعوه لنا ملفوف فى ورق الالمونيا
العريس وهو بيحاول يكتم الاصوات اللى بدات تطلع من بطنه نتيجة ماتش المصارعه الحره اللى جواها : ولا يهمك يا حياتى مش فى بطه؟ ولا وزه دى ؟؟؟؟؟؟؟انا كنت مخليها للاخر عشان عارف انها هى اللى هاتسد معايا الحمد لله ربنا حققلى امنيتى
فضت العروسه ورق الالمونيا اللى تسبب للعريس فى اصابته بما يسمى فوبيا الالمونيا بعد كده وبقى عنده من يومها عاده ان الاكل ما يتقدملوش متغطى باى غطا مهما كان
وقالت له ان شاء الله يا حبيبى هاتكون البطه ِحلو......هاااااااااااااااااااا وشهقت الزوجه وقطعت كلامها وبصت لعريسها والاسى يملأ عينيها
العريس : ايه طلعت بلاستيك ولا ايه؟؟!!!!
قالتله لا بس الظاهر يا حبيبى الجيران معندهمش لا زيت ولا سمنه لانها هى كمان مسلوقه بس مش مقليه
العريس :هو انتى فهمتى امك انى هاجيبلك شغاله؟؟؟؟
العروسه :لأ..... ليه يا حبيبى
العريس : اصل اللى باعت الاكل ده باعته لناس هاتعمل دخلتها فى مطبخ، هى امك فكرّت ايه؟؟؟ اننا هانقعد ناكل ولا نكمل تسويه فى الاكل؟؟؟؟(حسره عليا)
يالا حصل خير

العروسه وهى بتطلع حاجه من البطه وتحاول تخفيها: حقك عليا حبيبى انا مش عارفه اقولك ايه
العريس وقد لمحها منفعلا ورفع حاجب ونزل التانى: ايه اللى فى ايدك ده هما حاطينلى ايه فى الاكل انا عارف ان امك مش بتحبنى ورينى كده؟؟.....
فردت المسكينه كفها وقالتله لا انت فاكر ايه؟؟؟ ده انا لقيت دبوس تحجيبه مرشوء فى البطه
العريس:عاملينلى عمل؟؟؟؟؟؟؟؟؟هو ده بقى العمل اللى بيعملوه على رجل بطه؟؟؟؟؟؟؟
قام وهو بيقرا المعوذتين فمسكته العروسه قائلة : عمل ايه بس؟؟ ياسيدى هاتلاقى اللى بيلف الورق على البطه حاول يشبكه بدبوس فرشئه فى البطه
بدات البطه تصعب عليا من الدبوس اللى كان مرشوء فى صدرها طول الزفه والسفر
وفجاه تذكر اههههههههه؟ولمعت عينه : صينية الرز المعمررر وعاد ليسن اسنانه من جديد
وبيضرب المعلقه فى صينية الرز وهو بيقولها : قومى شوفيلنا شويه طماطم كده على شوية مخلل فى التلا.....وقطع كلامه صوت اصطدام الملعقه فى الرز مصدرةً صريراً معدنياً عالياً
وقلب الملعقه التى بها حبات الرز فى الصينيه وراحت تناسب منها حبات الرز الصلبه وتصطدم بالصينيه وتتطاير هنا وهناك
جز العريس على اسنانه وقال : ماله بس السمك كانوا خايفين من كلام الناس والفضايح؟؟؟؟؟؟؟؟دول هايتفضحوا فضيحه ... ده انا هاصور الى حصل وابعته على يوتيوب( أب لود وكده)
العروسه وهى مستكينه: طيب نعمل ايه دلوقتى يا حبيبى هو انت لسه جعان قوى؟
العريس وهو مفقوع : هو انا كلت اساسا عشان تقوليلى انت لسه جعان؟؟؟ ، انا مش فاهم ايه الاكل البلاستيك اللى اهلك عاملينه ده
وبدات تراوده خواطر وافكار شريره
الشيطان جه جنب ودنه : بص بقى انت تكلم اهلك فى الموبايل وتقولهم يبعتولك اكل تانى وهما هايقوموا بالواجب وتبقى كده دبحت لعروستك واهلها القطه من بدرى
العريس بص للشيطان بطرف عينه وقاله محتدا عليه : انا ما ينفعش اعمل كده
الشيطان: ليه فيها ايه دى؟
العريس : اصلى مش معايا رصيد الرصيد خلص فى الفرح (علامات الاسف تملأ وجهه علشان ماشحنش تانى قبل ماييجى الشقه)
الشيطان : طب بص انت فاتح باب الشقه وعلى حسك وصيحلها جامد
العريس: يا عم انا قادر اصيح ده انا واقع م الجوع
العروسه رفعت ايديها من على خدها : انت سرحان فى ايه مش بترد ليه
العريس منتبها: اه عندى فكره مش اختى جت الصبح انا كنت شايفها عماله تحط فى التلاجه معلبات وكده بصى قومى افتحيلنا علبيتين 3 سالمون وتونه وسخنيلنا رغفين عيش بلدى من الفريزر على كام حته طماطم على كوبايتين عصير وتعالى
العروسه قالت وهى متاخده: وهو ده يصح فى ليله زى دى ده حتى يبقى عيب فى حقنا
العريس و جسمه كله بيتهز : ننننننننننننننننننننننننننننننعمممممممممممممم وهو كل اللى فات ده مش عيب
انام جعان يعنى عشان يطلع اهلك حلوين و موجبين قومى يا ياست انتى يالا احسن والله اخدك انتى والصينيه واوديكوا لاهلك زى ما البياعين بيرجعوا المرتجع بتاع البضاعه الاكسباير
قامت العروسه وحضرت العشا
وجات الصينيه عليها علب التونه والسلمون والجبنه ام طماطم والعصير
وبدا الزوج يمد ايده وهو بيقول لعروسته : مش كانوا عملوا سمك وجمبرى احسن من اللى بناكله ده اديها رسيت فى الاخر على سلمون وتونه
بصى بقى انا هاكل وانتى بعد الاكل اعمليلى كوباية شاى وهاتلاقينى منتظرك جوه ماتتاخريش
راحت العروسه بعد العشا!!!! تعمل الشاى ورجعت واتصدمت لما بصت على عريسها وهو حاضن المخده ومكعور نفسه فى ركن السرير الجوانى وصوت شخيره يعلو ويعلو ويعلو ويعلووووووووووووووو
وصباحيه مباركه يا عرايس


بقلم الدفاع
.
aldefaa.blogspot.com

الأربعاء، يوليو 23، 2008

4 - عائله الضاحكون ...اتصل معانا تكسب لبانه

تحديث
**********
اسره مدونه الضاحكون والاب المسكين عبده الرايق ...ينقل اليكم التهنئه بالتؤام الجديد فى عائلتنا الموقره
اللى متعرفشى تنظيم الاسره نهائى
ودعونا نرحب بالتؤام الجديد
.
حنين القلب
.
كاميليا
.
ويعلن الاب عبده الرايق والام فرنسا عن تلقى النقطه على العنوان التالى
خمسه وسبعون حاره الضاحكون
***********************************
اخوانى الاعزاء
تم اختيار تدوينه فلسفه الزرار لابنى العزيز الطائر الحزين لتذاع على اذاعه البرنامج العام
برنامج الاستاذ الكبير صلاح حجازى انت تسأل والكمبيوتر يجيب
وذلك يوم الاحد الموافق 27 - 7 -2008
التاسعه وعشر دقائق صباحا
على موقع البرنامج

http://dear.to/cairo
***********************
فرنسا :- هههههههه ..ضحكونى بتوع التليفزيون دول... بالذمه ده سؤال ...هما فاكرينا ايه ؟؟ براميل طرشى ؟؟ ولا فاكرينا قلل قناوى ؟؟الحق يارايق السؤال ده ...ولا صحيح انت مبتعرفشى تقراء ..بيقولك ماهى عاصمه جمهوريه مصر العربيه ..1 - كلوريد الصديوم 2 - القاهره 3 - زعزوعه القصب
مواطن مصرى : اه ما انا اتصلت اصلى كنت عارف الاجابه فقلت لهم كلوريد الصوديم لان مش معقول يكون قصدهم على القاهرة يعنى دى زحمه حتى
الرايق :- كلوريد الصديووووووووم ؟؟؟؟.....واتصلت منين بقى يا حيله مامتك وباباك
مواطن مصرى :- متخافشى يا دكاتره اتصلت من تليفونى المحمول والمكالمة اخدت و قت قصير معايا نص ساعة فى الاول بيوصفوا لك ازاى حتضغط على رقم الاجابه و ازاى تتصل بيهم
الرايق :- طيب يشكروا بيوصفولك ازاى تتصل بيهم ...بيدوك العنوان يعنى
مواطن مصرى :- طيب مانا اتصلت و السؤال اتعاد خماشر تماناشر مرة بس لعلمكم انا حاسس المره دى انى حكسب هما قالوا اتصل اكتر فرصتك فى الموز تكتر و انا بحب الموز اوى
بلطجيه هانم عويل (مفقوعه ):-غلطان يامواطن بيه غلطان مفروض إللي يتشملل ويدفع دم قلبه عشان يشترك في مسابقة ذي دي يكون علي الأقل من المحظوظين ... لكن واحد ذيك أبوه الرايق وأمه فرنسا ... تجيب الحظ منين يامسكين .... ده انتم عيلة الحظ يفوت عليها ويقول لها أفيييييييييييييييييييييييه ريحتكم وحشة أبقوا أستحموا الأول
الرايق :- حماتى العزيزه ..لسانك بقى اطول من الطريق الدائرى ...بابور ظلط لما يفرمهولك
واحدة مفروسة : ههههههههههه لأ و انتي الصادقه يا تيته بلطجيه ..اللي يشترك فى مسابقه من دول لازمن و لابد يكون صاحب المسابقه...خاله...عمه...جوزخالته...جارهم...ولا حتي الراجل اللي سلم عليه صدفه يوم وفاة ابو واحد صاحبه
صبرني يارب(ووشها مقلوب زي السماوي كده ) : يااااااااااالااااااااا اهو رزق الهبل على المجانين . امال يعنى البت ام ضب الي فى الاعلان دي تكسب فلوس بالعبيطه ازاي . وتعمل عمليه وتشيل الضب وتحط بلونات فى كل منطقه و تتجوز مليونير اهبل يجيبلها جزيره ازاي ومنين الا من جيوب ال...........الهبل( وهي بتجز على سنانها بصوت واطي وبتبص حواليها وهى منقوطه منهم ) ها يا بابا هتعرف تجاوب على السؤال ده ولا هتكسفنا زى كل دور
الرايق :- اوه نو ..سؤال سهل فيرى فيرى سهل ..طبعا الاجابه هى القاهره ...هو احنا مش هنعرف نجاوب ولا ايه ؟؟ لانها معروفه كلوريد الصديوم عاصمه النمسا وزعزوعه القصب دى جزيره فى كوكب المشترك ...روح ياض يامواطن يا بتاع كلوريد الصديوم انت ياصايع ..روح هاتلى التليفون يمكن اكسب ..وانتى يا حماتى يا مسحوبه من لسانك يا مفقوعه ..مال الحظ ومال واحد ابوه الرايق وامه فرنسا بس بجد انتى عندك حق انا بختى مهبب ..يعنى لوكان بختى كويس كنت اتجوزت حفيده دراكولا دى ؟؟ ..وامها بلطجيه هانم عويل ..روحى يابت يا مفروسه هاتى التليفون الواد مواطن ده نايم على نفسه وهيودينا فى داهيه ..انتى فاكره يا مفروسه الترتلبيت اللى كان عايز يعمله لديكور المدونه قعد فيه 16 سنه وكل مانسأله يقولك متستجلوش يا جماعه انا جاى واحنا نقوله ماتيجى ياعم النايم يقولنا مادينى جاى اهه بس بمشى فى الجزمه الاول فاكر نفسه محمد صبحىبس يا ولاد انا حاسس انى هاكسب المره دىواحدة
.
مفروسة:ممممممممممم تصدق انت فعلا ممكن تكسب يا بابا...بس قولى الاول تليفونك مشحون..ولا بطاريته فاضيةومشحون فلوس...ولا زي صاحبه..فلسان افندى ..اصل لازمن ولابد تملاه فلوس زي الحصاله تمام الكرت ابو 100..ولو كفى كمااان ..اقولكش خليه ابو 200وانا حقولك تعمل ايه....تتصل بالرقم...حتلاقى مزيكا..حتفضل تسمعها و تنااااااام ...وفجأه تقوم مفزوع على وليه تقولك..لو عاوز الاجابه الاولى دوس واحد..ولو التانيه دوس تلاته و لو التالته دوس اتنين....و انت بقى ياعم الرايق لسه صاحي و مش واخد خوانه وعاوز تقول القاهرة اللي هيه اجابه 2 تقم دايس اتنين...و فرحان...تلاقى الوليه هيه هيه برضه طلعتلك...تقولك ..نأسف إجابتك خاطئه...وتقوم رازعه السماعه فى خلقتك....انت بقى دمك يغللى و تفضل وراها بالساعات....تخلص كارت ...و تدخل على التاني ...و الموضوع هوه هوه يتعادوفجأه تاخد بالك انك لازمن تدوس 3 ياعم الروقااان ....وههههههههههههههههه اخدو منك 200جنيه...وانت قاعد بالبيجامه و فى بيتكم..و بالهنا و الشفا يا معلم
الرايق :- نو نو نو ....انا الدكاتره الرايق ومش هيقدروا يغلبونى انا هدوس 1 و 2 و 3 مع بعض وهما يختاروا
الطائر الحزين : بابا ماما انا طلعت انصح منكم وعملت اللى بابا علمه لنا واحنا صغيرين لحد ما كبرنا وبقي كل واحد فينا زى الحيطة حيطة لا حيطة ايه ده فيه ناس معانا يعملوا معانا عمارة من الاساس لحد الروف اللى فوق المهم مش هطول عليكم عملت أيه اقول لكم انا عملت ايه نزلت تحت عند طنط سونة جارتنا وقلت لها ممكن اعمل تليفون قالت اتفضل يا بنىقمت طالب الرقم فى الخباثة واستنى الست اللى مأسوف على شبابها دى ترد عليا ابدا فين لقيتها ردت وقالت ادخل رقم الاجابة الصحيحة وتصن شويتين لقيت المدعوء بطيخ افندى جوز الست سونة جه من الشغل و دخل خد حمام و طنط سونة حضرت له الغدا و اتغدوا بس ناس معندهاش دم دا انا عندهم بقالى 3 ساعات محدش عزم عليا بأى حاجة حاجة سخيفة فرى فرى سخافة بصراحة هههههههه الوليه ردت تانى وقالت اخر فرصة لك ادخل الرقم الصحيح فكتبت اتنين قالت الاجابة صحيحة تفضل استلم جايزتك فقمت قافل السكة فى وشها امال ما هى رزعانى على التليفون بقالى 4 ساعات بابى تصدق معرفتش هستلم الجايزة منين (فلحوس انا صح)
الرايق :- طبعا فلحوس ..استلمى خليفتك المليحه يا فرنسا يا مليحه
فرنسا :- مالك بالواد يارايق حاطط نئرك من نئره ليه ؟؟؟؟
appy:- ايييييييه الدوشه دى على العصر فيه ايه انتم مالكم كده متجننين على الارقام دى انتم مش فاهمين حتى فى الاجابات بتتصلوا ليه اللى يقولك كلوريد واللى يقول قعد اربع ساعات واللى يقول القاهرة ايه ده انتم اصلم اصلم مش فاهمين ان فيه واحد قاعد على التليفونات دى بيلم الارقام وبعدين يقعدوا يعاكسوا فى خلق الله لو البنت اللى اتصلت صوتها حلو يرجع يعاكسها تانى ويا عينى بقى لو طلعت هبله وصدقت الكلام ده يبدأ يستغل فيها ويتغرغر بيها ومش عاوزة اسمع نفس حد يقولى عرفتى منين سامعين ما عدا انتى يا ماما انا هقولك فى الاستبوخس بس اعملى ليه مج شاى وانجليش كيك لغايه ما اقول بنجور لخرفانى
الرايق :- قصدك ايه يا مقصوفه الرقبه ....يعنى الواد اللى كان بيعاكس كل شويه مكانشى بيعاكسنى انا ؟؟؟؟
صبرني يارب : الصبر من عندك يا كرييييييييييييييييييييييم نفوخي يا عااااااااااااااااااالم
قوس قزح : محدش يجيب ليا سيرة 0900 دى ابدااااا .. اخر مرة قلت ابعت اغنية بحبك يا حمار للجو بتاعى و طلبت الرقم ابو 0900 للاغانى و الرسايل قالوا اختيار من الئايمة نوع الاغنية و قعد يرص فى ئايمة لحد ما بقيت نايمة على نفسى و فى الاخر جاب العاطشفى .. اختارتها قالى اختارى المغنى و تانى يرص و انا ادفع يرص و انا ادفع لحد ما خلص الكارت بتاعى و طالعت الست قالت ليا لقد نفذ رصيدكم فى حب الحمار يا ......... .... و على فكرة بقى السؤال ده فيه اختبار ذكاء علشان مصر مالهاش عاصمة .. لها محطة بس .. عمركوا سمعتوا حد بيقول لسواق تاكسى عاصمة مصر !!!
الرايق :- احسن يا ................
نيجرو : عارفين إيه أجمد حاجة في السؤال ده؟ المزة اللي...... قصدي الآنسة المحترمة اللي في الإعلان اللي عمالة تتأصع... قصدي عمالة تتمايل على أنغام الموسيقى الراقية اللي في الخلفية .. يا سلااااام .. و نعم النسوا... إحم ..و نعم التربيةاوعوا يا بنات حسكم عينيكم حد يتغرر بيكم و يقولكم هنطلعكم في التلافزيون ... انتم بنات عائلات محترمات .. إحنا نبحلق فيهم في التلافزيون و بس .. إنما اخواتنا لااااااااا
مواطن مصرى :- اشطه يابو النجارين
نيجرو :- بص يا مواطن هات ودنك..عارف يا واد يا نايم .. ديك النهار كنت قاعد بأتفرج يا معلم على قناة المسابقات إياها و كان فيه واحدة إنما إيييييه؟ .. اتصلت يا ريس و ساعة عمال أزاول فيها و أنا أشاساً ماعرفش السؤال كان عن إيه .. لغاية ما الكارت أبو 200 ذهوب تحويشة خمس تسع سنين اتفرتك يا معلم .. على مفيش.
مواطن مصرى :- ومين سمعك يا خويا انا اتلسعت اكتر من كده بكتير
هيما :- بابا الرايق انا عايز من ده يابا .. عروسة عاملة زى حلاوة المولد ولا واقفة تتهز زى عود القش المسوس وبالعة عرسة على الفطارحد يناولنى التلفون المعوق بتاعى عشان أتصل على البت ام ضب دى عشان أعاكسها ........
سومه (جارتهم الحشريه): سمعتكممممممممممممممممممم
قفشتك يا طاير.....يا ابو سنه طايره .....قال سونه قال اسمها سومه ....قال على راى المثل مشافوهمش وهم بيسرقوا شافوهم وهم بيتحاسبوا.....طبعا الحق لازم ولابد يرجع لاصحابه...عاجبك كدا يا فرنسا....
فرنسا :- ياختى الواد بيهزر ..انتى تملى كده حاطه مناخيرك معانا
سومه الحشريه :- منه لله ابنك اللى تنقطع طرطوفه صوابعه قبل ما يطلب المايصه بتاعه الاعلان.....فاتوره التليفون جاتلى بخمشمييييييييييييييييت برطوش.....والله ما مفوتاك من هنا غير لما اخد من ابوك الرايق 550 جنيه ينطح جنيه....500 حق الفاتوره و50 حق قعادك على الكورسى لمده 4 ساعات.....امال ايه واحمد ربنا انى محسبتش فرق العمله يا رايق.....ولا فاتوره النور.....كمان التليفون متوصل بالكهرباء....امال ايه لاسلكى....من اللى عمركم ما شفتوه يا عيله الرايق
الرايق :- شط ااب يوور ماوس ....احنا عمرنا ما شفنا اللاسلكى ؟؟؟ احنا بيجيلنا منه بالهبل من الخارج وطازه كمان لكن احنا مبنرضاش ناكله ...اصل فيه لحم خنزير والعياذ بالله
حماة الرايق بلطجية هانم العويل : أنتم هاتفرجوني علي مزاجكم ياللي تنشك في نواضرك منك ليه ليها للرايق ... أنا قاعدة من صباحية ربنا مستنية حلقات توم وجيري .. إلهي وانت جاهي إللي يضيع الحلقة مني ... تقع عليه مية مطينة وهو لابس لبس العيد الجديد ... إلا مافيه عيل يقوللي خدي الريموت في أيدك ياتيتة وفرجينا علي مزاجك بلا وكسة ماهو العيب علي أبوكم .. إلا ماعرف يربي دكرين بط هايعرف يربي ولاده حسرة قلبي علي حظك يابنتي
الرايق :- ماتيجى نروح مشوار للجزار يا حماااااااااااااااااااااتى
.
بقلم
.
فريق العمل بمدونه الضاحكون

الأحد، يوليو 20، 2008

يوم من عمرى

زى اى واحدة مخطوبة حلمت ان انا و خطيبى نجرى على رمل البحر وقت المغرب و نرش بعض بالميه زى الافلام - اصل اختكم عندها احلام يقظة كتير - و اعيش بقى يوم من ايام العمر اللى متتنسيش و مكدبتش خبر و اقترحت علي خطيبى نسافر يوم اسكندرية ..
اتبسط و قال ياريت
كان اول حاجة لازم نعملها نقنعهم فى البيت عندى
طبعا اخد كلمتين فى جنابه الاول بعدها وافقوا بشرط ناخد معنا ناطورجى و اخدنا مجبرين اختى الصغيرة
لما وصلنا اسكندرية كان فى اول الصيف كان البحر مقلوب و عالى على حظنا ..نوة غير متوقعة ..المهم لفينا شوية بالعربية فى اسكندرية و قلنا نروح ابو قير نتغدى هناك على البحر الميت يعنى لا نوة ولا موج .. وقفنا نختار السمك اللى هيتعمل لنا و بعدها سالت على الحمام و ياريتنى ما سالت و كنت فضلت بكرامتى احسن
الرجل شاور على عشة كده و قالى اهو يا هانم ..فين .. اهو العشة دى .. دى فيها حمام ..اه فيها حمام و افرنجى كمان
و دخلت برجلى محدش غصبنى و كأنى دخلت بلاعة و مش اى بلاعة لا بلاعة بسكانها اشى صراصير رايحة شغلها و نمل سهران طول الليل مروح بيته و العناكب بتلقط رزقها هنا و هناك
طبعا نفسى اسدت و لا دخلت الحمام و لا اكلت و لا رضيت اقعد حتى فى المكان وقعدت فى العربية لحد ما هم خلصوا اكل
بعد ما اتحركنا لاقيت اختى بتصرخ و بتقولى بطنى وجعانى
جرينا على المستشفى طلع مغص كلوى و الدكتور ادها مسكن مهدىء
هنا قلت لا نرجع القاهرة لحسن تتعب اكتر و تبقى مشكلة مشنا على الكورنيش بالعربية و انا ببص على البحر و بفتكر اغنية فيروز شط اسكندرية يا شط الهوا روحنا اسكندرية و قلبنا الهوا و يا دوب طلعنا على الصحراوى و مفيش نص ساعة و راحت العربية جات لها سكتة قلبية - اصلها كانت عربية نص عمر - وبقت ماشيه على سرعة 10 كم
قلت له فى ايه ..
رد بمنتهى الهدوء مش عارف يظهر الموتور فوت .. قلت فى سرى الله هو هيعمل زى الافلام و يقولى تعالى نبات فى اى اوتيل للصبح .. و الشيطان بقى اخد و ادى مع احلام اليقظة عندى و فؤت على لااااااااا مش هنبات .. قالى نبات فين .. قلت له هنا فى اى اوتيل ..قالى و مين قالك انى هسيب العربية ( قال يعنى ال بى ام )
الدنيا بدات تضلم و احنا ركنين على جنب الطريق قال ايه مستنى الفرج اقصد مستنى اى عربية دورية راكبة و فجاة لمحت خيال حد بيبص عليا من الشباك.. صرخت و الخيال كمان زعق و طلع بندقية فى وشى ..
كان غفير كأنه هربان من مسلسل حدائق الشيطان و خطيبى - اللى هو جوزى دلوقتى - بيكلمه بكل هدوء و يقوله انت مين و عايز ايه .. قاله انتم اللى مين و واجفين هنا ليه
.
و مين اللى ورا دى ،
.
حكينا الحكاية ان العربية عطلانة و ان اللى ورا دى اختى و تعبانة .. صمم يزقنا و خطيبى يقنع فيه انها مش قصة زق و هو مفيش فايدة .. و فضل يزق لحد ما بقينا بعيد عن المنطقة اللى مسئول عنها
فضل خطيبى سايق العربية على سرعة 10 دى يمكن حوالى 10 متر كمان - عمل مجهود و الله
و فجاة شاف عربية الاتارى على الجانب التانى من الطريق وراح واقف و قالى هنستناهم لما يلفوا و يرجعوا و فييين بعد ساعة - و انا طبعا مفيش فى بالى طول الوقت ده غير اشكال الزعيق و الخناق اللى هشوفها فى البيت لما اروح - وصلت الدورية الراكبة و ركنت قدامنا زى الافلاام الاجنبية و نزل منها الظابط و جيه لنا و سال خطيبى فى ايه فحكى له الحكاية و انه عايز نص نقل يشده للقاهرة بص الظابط فى العربية و قالى انتى مين قلت له خطيبته ..قال
.
و مين اللى ورا دى
.
و عيونه كلها شك فيا و فيها قلت له اختى تعبانة ونايمة .. مالها .. قلت مغص كلوى و واخدة مسكن .. يعنى مش واخدة حاجة تانية .. حاجة تانية ازاى يعنى ؟؟ .. راح باصص لخطيبى و قاله تعالى ورا و اداله حبل من العربية ربطه فى عربيته و شده لحد مكان كده زى الكافتيريا و فيها نقطة مرور صغيرة و نزلت انا و خطيبى شاف البطايق و عمل محضر و طلب ونش علشان يشد العربية و استنينا الونش فى العربية و كل ظابط او عسكر او اى حد معدى ميسألناش غير سؤالين انتم اتمسكتوا ليه
.
و مين اللى ورا دى !!
.
لحد ما وصل الونش و نزل منه رجل عريض المنكبين شالولح قاله هاخد منك 200 جنيه و وقتهاالمبلغ ده مش معنا بعد الغدا و الفسح و المستشفى قال خلاص اشدك للقاهرة بس هاخد البطاقة بتاعتك و الرخصة و نتحاسب هناك و لما شافنى فى العربية قرب و قاله مين دى رديت انا و قلت له انا خطيبته و اللى ورا دى اختى تعبانة
المهم شدنا لحد البوابات و بعدها بحوالى 100 متر ركن و نزل و جالنا و قال بصوت مفيهوش نقاش تعال انت جنبى و هى تسوق علشان تورينى الطريق للبيت انا قلت معرفش اسوق هسوق ازاى و خطيبى ولا كأنى اتكلمت و مشى مع الرجل كأنه منوم و هو بيقولى امسكى بس الديركسيون كويس
قاعدة مكان السواق و مشى الونش و فضلت ماسكة الديركسيون جااامد لدرجة انى صوابعى ابيضت فوق منه و بردو بيتحرك تحت ايدى
من على بعد شوفت كوبرى و الونش هيطلع عليه قعدت اعمل كلاكس علشان انا اصلا بخاف من الكبارى و انا مش سايقة ما بالكم بقى و انا روا عجلة القيادة كل القران اللى حفظاه وقتها قلته و انا مغمضة عينيا و بين كل أية و أية اصرخ فى اختى علشان تصحى تشاركنى الفزعة دى و هى فى عاشر نومة و نزلنا مع على الكوبرى و دخلنا شارع ضيق يعدى عربية بالعافية و العربيات راكنة فيه يمين و شمال و كنت هاخد كل عربيات الشارع بالحضن بس ربنا ستر
ركن الونش وانا طبعا ركنت وراه لازق و الرجل نزل فك الحبل و طلع خطيبى لبيته جاب الفلوس و مفتاح عربية باباه ونزل ادى الفلوس للرجل و ادنا البطاقة و الرخصة و مشى
و وصلنا تحت البيت عندنا الساعة اربعة الفجر و طبعا وقتها خلاص بطلت افكر فى رد فعل اهلى ..
ركن العربية فقلت له احنا لازم نسيب بعض
بمنتهى الهدوء : ليه
لسببين الاول انا قطعت الخلف خلاص بعد اليوم ده و التانى اهلى هيقطعونى و يقتلوك
بردو بمنتهى الهدوء : طيب
و نزلت و بعد كام متر لاقيته بينده عليا تانى ( فرحت و قلت هيرجع فى كلامه و يقولى مش هقدر على بعدك و هتستحمل اى حاجة علشانك )


قالى : و اللى ورا دى !!!
.
بقلم
.
قوس قزح

الخميس، يوليو 17، 2008

3 - عائله الضاحكون ...البطاله الجزء الثانى

اخوانى فى كل قارات العالم التسعه ..يسعد الدكاتره عبده باشا الرايق وفريق العمل بمدونه الضاحكون ان نقدم لكم الجزء الثانى من البطاله ...وهى من مشكلات العصر التى تواجه العديد من الاسر المصريه

*******************

فرنسا :- استلموا بقى يا ولاد اهه المحروس طلع مع مفروسه وصبرنى يارب من الاوده
الرايق :- شط ااب يور ماوس يا فرنسيس ..وانتوا يا عيال مش عايز ضحك ..ولا عايز حد يغمز لاخوه ..ابوكم الدكاتره عبده الرايق صرح من صرارحات مصر ...اى حد هيضحك عليا همده على رجله ..فاهمين

صبرنى يارب :- ايه يا ابو الروقان مالك في ايه ؟؟ بقى معقول يا جميل انت تروح بكره الشغل وانت واثق من نفسك وتدخل على اتخنها مدير فيكى يا منطقه ولا يهمك منه . ولو قالك ربع كلمه ادينى بس رنه تلاقينى كابسه على افكاره هناك .الا عملتلي ايه يا ابو الروقان فى طلب التعيين بتاعي ؟؟؟

الرايق :- تعيين مين وزفت مين هو فى حد بيتعين دلوقتى ...نو نو نو دلوقتى فى رفد بس ..حتى ممكن تترفدى قبل مايعينوكى ..ذاتس فيرى فيرى ايزى

آبى :- ايه يا داد مالك بس ما تكبر الدى وتعلى الجى يا جميل قولى من واحد نوتى ده اللى مزعلك وانا اوعدك انطحه بخرفانى البمبى وانت عارف بقولك ايه تعالى نقعد فى الشمس شويه نظبط الدنيا وهتفك ان شاء الله فكك من العالم الوحشه دى

الرايق :- شمس ؟؟؟؟ ايه البنت المخبوله دى فى برضه فى الدنيا شمس تطلع الضهر ؟؟؟ ..ياما لسه هنشوف وياما تعاليلى ياما وشوفى ابنك الرايق جراله ايه

همس الاحباب : صباح الخير عليكو جميعا ايه يا مامتى هو بابا ضارب بوز كده ليه وراسم ميه وحداشر على وشه صبح صبح يا عم الحج.... روق يا روقة وخليها تفك

فرنسا :- ميه وحداشر بس ؟؟؟ ده راسم الف ميه وحداشر ..اصل ابوك اترفد من الشغل ..قوم باركله وهنييه

همس الاحباب : نو نو نو مش ممكن انا لا اقبل بتلك الاهانة بابا أترفد من شغله والسلم بقى شاغر يا خسارة يا ولاد بابى روقة ولا يهمك انا عندى ليك شغلانه ...ايه رايك تشتغل صبى حلاق عند بولو اتاكل الشهد يا روقة وعيشتنا اتبقى فل .

الرايق :- حد يناولنى ايد المقشه اكسر نافوخ الواد ده ...بولو ؟؟؟انا الدكاتره عبده بيه الرايق اشتغل عند بولو ؟؟؟

قوس قزح :- بابا ايه رايك نرشحك علشان تكون شيخ عاطلين الحى و نعمل مشروع لتجميل المنطشقة دعاية لك و نبعت نشترى كام برميل بويه فوشيا على كام برميل بيستاج و نلون الحارة كلها و نخلى شباب الحارة يلونوا معنا بدل قاعدتهم على القهوة اللى خلت البيوت لونها اسود و نبعت نشترى ورد من فرنسا .. لاااااا بلاش سيرة فرنسا دى هتقول نجيب جرجير و فجل نزرعه فى الحارة .. نشترى ورد صناعى من الصين احسن - اصل عيال الحارة بتاكل الطبيعى - و نوزعه قدام البيوت و بكده يا روقة تستحق لقب شيخ عاطلين الحى و شيخ الفنانين كمان

الرايق :- بتتريقى يا فنانه ...وحياه جدى الكبير احمس باشا لخلى ايامك كلها بالوان الطيف الخمستاشر ياقوس قزح يابنت فرنسا

قوس قزح : انا اتريق بردو يا روقة ده كل كبرات البلد لما بيرشحوا نفسهم بيعملوا كده بيلموا الشباب من على القهاوى و يشغلوهم لحسابهم و بعد ما تخلص الانتخابات يسقعوهم لحد الانتخابات الجاية .. انا عايزاك تسقعلك كام واد حليوة كده من على القهوة اهو حتى لو منجحتش فى الانتخابات اهو عندك بنات هتموت و تتجوووووووووز

الرايق :- هو البطاله طالما ورانا حد هيعرف يتجوز ...خليكم قاعدين مع امكم لغايه لما تخللوا ...ونعبيكم فى برطمانات ونحط عليكم تاريخ انتهاء الصلاحيه

نيجرو: يا صباح الدوشة عليكم و قلبة الدماغ صلاحيه ايه وبتاع ايه ؟؟ ... إيه يا روقة؟ بجد الحوار اللي بتقول عليه أم باريس ده؟ ... هيرفدوك من الشغل؟ ... يا دي النيلة ... هي القهاوي ناقصة ترابيزات ... عايزك فى كلمه ياروقه لوسمحت هات ودنك ..إيه يا روقة عملت إيه؟ ... بص احنا شباب زي بعضينا و مش هافتن عليك ... عينك زاغت كده ولا كده على واحدة من موظفات الشركة و المدير قفشك و انت بتعاكسها؟

الرايق :- عينى زاغت كده ولا كده ؟؟؟؟....هى امك خلت ليا عنين اصلا ؟؟ ده يابنى اللى يعيش مع فرنسا يطلع معاش بعد سنه واحده

نيجرو :- ها... قول الحقيقه ياباباتى .. مانا عاذرك .. الله يكون في عونك...واى حد مكانك متجوز ماما فرنسا هعذره برضه ..ولا تزعل نفسك يا أبو الروقان .. و إذا كان على مصروفي .. يا عم ولا تقلق .. هأمشّي نفسي بالقرشين اللي كنت باقلّبهم منك

الرايق :- ابنى حبيبى معاك فلوس ؟؟؟؟؟ ايوه كده يا نيجرو تعالى فى حضن بابا

نيجرو :- اااه اصل انت ما تعرفش .. ماهو أصل الكتاب ابو خمسة كنت بأقولك بعشرة و أبو عشرة بخمسة و عشريين و كده يعني .. يلا أهو جه و قتهم أمشّي بيهم نفسي لحد ما اشوفلي شغلانة .. أهو .. أقفلي قدام قدرة فول في محل فول و طعمية .. قدام سحارة عيش في مخبز .. اشتغل في الفاعل .. اسرح بمناديل في اشارات المرور .. .. و كلها شغلانات شريفة .. و الشغلانة بتجيب شغلانة .. المهم ما يفوتنيش التوك توك
الرايق :- سيبك من الشغل والتوك توك دلوقتى ...وتعالى ورينى محوش كام ...انا ابوك وخايف حد يسرقهم منك

appy:- بص يا دادا متصدقشى كلام الواد نيجرو.. ده بكاش صدقنى ..بص معايا فى الشغل المدير المالى الراجل الرخم ده عمل فيها عبدوو حركات مش انت يعنى وحب يوصل لرئيس مجلس الاداره على قفا المدير العام قووووووم ايه فنشووه ليه بقى علشان يعرف ان الله حق واهو قاهد فى البيت بقاله شهر مش عارف يتنيل يشتغل ولا لاقى شغل فى مكان فمتعملش فيها السيفن مان وتقول هلاقى شغل طيب اصرف انا بقى على خرفانى وبطوط منين اعقل كده وبص لاور فيوتشر الله يكرمك

الرايق :- متخافيش يا appy الفيوتشر بخير كل الحكايه تهديد من المدير بفصلى من الشغل ...وازمه البطاله اللى فى البلد مخلياهم ياخدوا راحتهم بالقوى

حماة الرايق بلطجية هانم العويل (مفقوعه ) :- أيه إللي سمعته من مراتك ده يارايق ؟! كدة تجيبوني علي ملي وشي من الساحل الشمالي وتبلغوني بالخبر المقندل ده ... أومال مين هايدفع تمن عملية شفط الدهون إللي هاأعملها الشهر الجاي ...
الرايق :- حماتى الغاليه انا الدكاتره عبده الرايق ممكن اولع فيكى النار و اسيحلك الدهون دى ...انما لو عايزه فلوس سلف عليكى وعلى البنت المجنونه سومه الحشريه جارتنا مراه المدعوء بطيخ الاهبل
حماة الرايق بلطجية هانم العويل (مفقوعه) :- انت أتجننت يارايق عاوزني أستلف تمن العملية من جارتكم الحيزبونة سومة ... عشان في الطالعة والنازلة تزلني وتزلكم بيها ... وتقوللي ياللي شافطة شكك ...... بت يافرنسا قومي لمي هدومك يابت أنتي مالكيش قاعدة مع الشحات ده ... الواد بلية صبي العجلاتي لسة مطلق مراته وعايز يغيرها ... ده عقبال أملتك عنده أسطول عجلات قد الدنيا هاتتنغنغي في عزه وهايعوضنا عن سنين الضنك إللي عيشناها مع الرايق وهايعمللي عملية شد وش في أمريكا ... يالا قومي يقطع الرايق وسنينه ... هو ده راجل يتبكي عليه ... جاته خيبه عليه وعلي عياله
فرنسا :- عايزانى اتطلق يا ماما ومعايا كوم اللحم ده ؟؟؟؟
الرايق :- ياستى لو كان على كوم اللحم ميهمكيش ..بس انتى قشرى
فرنسا :- بتقول ايه يا رايق ؟؟؟؟
الرايق :- لا ابدا بقولك معاكى رصيد تبعتيلى 5 جند ؟؟؟؟


مع تحيات فريق العمل

بمدونه الضاحكون

الاثنين، يوليو 14، 2008

الأشارب


تحديث

أحب أن أعلن عن عدم مسئوليتى عن الزلزال الذى ضرب مصر المحروسة فى صباح يوم الثلاثاء الموافق الخامس عشر من شهر يوليو العام الثامن بعد الألف الثانية الميلادية ..... و شكرا


حاجة تانية ... أنا كنت فاكر إن أزمة الأشارب دى أزمة خاصة بيا لوحدى .. لكن اكتشفت من التعليقات (و ذهلت فى نفس الوقت) إنها مشكلة عامة لدى العنصر الرجالى ... بل و العنصر النسائى يقر و يعترف بها .... يا رب صبرنا


حاجة تالتة ... يا بتوع جامعة حلوان خلوا بالكم من عيالكم ... و قد أعذر من أنذر

------------

بيبقى يوم مش فايت يوم ما بتسوقنى الأقدار إنى أنزل مع إحدى أخواتى البنات الاثنتين عشان نشترى أشارب لإحداهما .. و بيبقى عندى إنى أروح أحرك الهرم من مكانه أهون عليا من مشوار الأشارب ده..أصلا أختى لما بتطلب منى إنى أروح معاها مشوار الأشارب دة بتبقى عارفة إنها بتطلب منى طلب شاق ..

عشان كدة قبل ما تطلب منى الذهاب معها عشان نشترى الأشارب بيسبق هذا الطلب سؤال فى ظاهره البراءة و فى باطنه العذاب الأليم : انت فاضى النهاردة ؟؟

فأنا بتلقائية و انا مش واخد بالى أرد و أقول لها: أيوة فاضى ..

فتبدأ بالابتسام حيث لا يوجد ما يستوجب الابتسام مما يدعونى للتوجس و تبدأ علائم القلق فى الظهور على وجهى .. و يقابل ذلك ظهور الابتسامة بشكل أكثر ابتهاجا على وجهها ربما محاولة منها لامتصاص قلقى .. أو ربما مستمتعة بما سوف أتعرض له بعد دقائق قليلة من صنوف العذاب الأليم .. فتتبع أختى السؤال السابق بسؤال آخر إجابته معروفة بالنسبة لها ألا و هو: طب ما تيجى معايا نشترى أشارب؟؟..

و هنا يسقط فى يدى و تخرسنى الصدمة .. طبعا لازم أوافق و إلا أمى (اللى هى أم أبو العساقيل... فاكرينها؟؟) هاتتعامل معى بما لا يقبله أى عسقول لذلك أضطر صاغرا إلى الموافقة لتبدأ رحلة العذاب

و فى طلب الأشارب .. ننزل من البيت و نحن نعرف وجهتنا .. نتجه مباشرة إلى المول الأولانى .. و عبارة "المول الأولانى" ليها مدلولات كتيرة .. أول هذه المدلولات موجود فى كلمة "مول" لأنه بالتأكيد أى مول هايحتوى على ما لا يقل عن عشرة محلات لبيع الأشاربات مما يجعلك تدرك مقدما عدد المحلات التى سيتم تفنيدها بحثا عن الأشارب .. أما كلمة "الأولانى" تعنى أن هناك مول "تانى" و ربما "تالت" و دة معناه إن العشرة محلات اللى فى المول الأولانى التى تم غربلتهم طلبا للأشارب لم يوجد فيهم أثر لأشارب يحقق الشروط المستحيلة التى تشترطها أختى فى الأشارب .. و دة يجعل احتمال إن محلات المول التانى يبقى فيها الأشارب المعجزة اللى يحقق مطالب أختى احتمال مستحيل تقريبا و إلا كنا لقينا أشارب مناسب فى المول الأولانى

و أحب أقول لكم إن الحصول على اتنين كيلو لبن عصفور كناريا استرالى يعد أيسر بكثير من الحصول على الأشارب اللى فى خيالها .. و بصراحة أنا كل رجائى فى الدنيا إنها تدرك هذه الحقيقة لأنها لو أدركتها يا إما هاترضى تتنازل شوية عن بعض شروطها فى الأشارب .. أو ماننزلش أصلا من البيت بغرض البحث عن شىء لا يوجد إلا فيما وراء الطبيعة .. أو نبحث عن الأشارب المطلوب فى كتب الخيال العلمى .. أو نحاول استخراج الأشارب من أساطير الأولين

اللى يغيظ .. إن الأشارب من دول بيبقى مناسب لكن بيترفض لوجود مجموعة معينة من الأسباب .. فى حين إن أشارب تانى ممكن يترفض لخلوه من الأسباب التى تم رفض الأشارب السابق نتيجة وجودها فيه .. أو نصل إلى أشارب مناسب مبدأيا من ناحية اللون و القماش و لكن يتم رفضه لأنه توجد عليه مثلا وردة صغيرة مش باينة ذات لون بنفسجى .. فى حين إنها لما تلف الأشارب هاتلاقى الوردة مش هاتبان .. لكن مافيش فايدة .. الحكم صدر على الأشارب المسكين بالرفض و لا رجعة فيه .. و أحيانا تتوالد أسباب رفض الأشارب من بعضها البعض .. يعنى ممكن يتم رفض أشارب عشان فيه إطار بنى .. و لما نلاقى أشارب تانى أخوه طبق الأصل فى محل تانى لكن بدون الإطار البنى يطلع نوع القماش مش عاجبها .. و لما نلاقى فى محل خامس أشارب قماشه كويس و من غير زفت بنى يطلع سبب الرفض إنها عايزة يكون فيه تشجيرة بنى أسطورية الإيحاء عشان شكل الأشارب يبقى حلو .. و لما نلاقى الأشارب اللى يحل المعادلة التفاضلية دى فى محل عشرتاشر نلاقى إن سبب رفضه هو احتواء الأشارب على ورقة شجر بنى و هى مش بتحب لا ورق الشجر .. و لا اللون البنى .. طب يا ستى نولع فى اللون البنى خالص .. تقول لى: لأ .. لازم بنى عشان هايليق على الهدوم البيج .. و أخيرا نوصل لأشارب هو بالظبط اللى هى عايزاه و كأن الوحى قد نزل على مصمم هذا الأشارب بالمواصفات التى فى مخيلة أختى تماما و لولا يقينى بأن مصمم هذا الأشارب هو بشر مثلنا لقلت أنه يعلم الغيب .. و لكن حينها يكون مزاج أختى قد تغير .. و تتذكر أن أشاربا شاردا من مئات الأشاربات اللى فاتوا علينا أثناء الرحلة هايكون مناسب أكتر و لازم نرجع ندور عليه .. فى هذه اللحظة تبدأ فى الظهور عليا أعراض الإصابة بالانشكاح فى الشمبرلاح .. و نبدأ رحلة العودة متحملا آلام إصابتى بالانشكاح للبحث عن الأشارب الفذ بمعاودة تفنيد المحلات اللى فحصناها من بداية الرحلة .. التساؤل المهم الذى يطرح نفسه الآن .. هل هانلاقى الأشارب الذبلة اللى رجعنا عشانه و لا لأ ؟؟ دة أمر بيتوقف على دعاء السيدة الوالدة (اللى هى أم أبو العساقيل عشان ما تنسوش) .. لو هى داعية عليا يبقى مش هانلاقى الأشارب فأبتدى أعانى ويلات استمرار البحث عن الأشارب الفلتة .. أما بقى لو لقيناه هايكون دة معناه إن برضه أمى داعية عليا لأننا بعد ما نلاقيه مش نشتريه بقى و نخلص .. لأ .. تبدأ أختى فى تطبيق سلسلة الشروط الماوراء الطبيعية على الأشارب ليحصل الأشارب على حكم قاطع مانع جامع لا راد له بالرفض التام و الغير مبرر ثم ننطلق لنكمل رحلة البحث عن المجهووول فى غياهب المووول

الغريب إن أختى فى وسط معركة الأشاربات هذه و تحت مثار النقع فوق رؤوسنا فى الليل الذى تهاوى كواكبه (على رأى الباشمهندس بشار بن برد) بتكون فى منتهى النشاط و فى أفضل حالاتها النفسية و بتتحرك بمنتهى الحماس .. و كأن مجرد عملية تمشيط المول و محلاته هى الهدف و ليس شراء الأشارب هو الهدف.. واحد صاحبى مرة قال لى إن الحالة النفسية لزوجته بعد الرجوع من مشوار شراء أى حاجة بتبقى أفضل ميت مرة من حالتها النفسية بعد الرجوع من نزهة

مرة أختى و هى بتبتدى تفاوضنى على الذهاب معها فى رحلة أشارب .. نويت فى بالى نية و أضمرت أمرا .. قلت لنفسى إننا و احنا بننقب عن الأشارب فى صحراء المول أنا هاقوم بعمل معين أطلع منه بنتيجة و لما أواجه أختى بالنتيجة دى بعد الرحلة هاتقدر تدرك بنفسها عدم معقولية الشروط اللى هى مشترطاها فى الأشارب .. فقلت بدل ما أنا واقف مستنى خارج المحل ما باعملش حاجة أنا أسلى نفسى و أقتل الملل بإنى أعد عدد الأشاربات اللى فى المحل .. بعد كدة أجمع المجموع النهائى فى نهاية الرحلة لعدد الأشاربات فى كل المحلات اللى روحناها عشان أحسسها بالكم الهائل من الأشاربات اللى هى رفضتها فى السبيل إلى اختيار الأشارب سعيد الحظ .. و كنت متوقع إن العدد هايبقى حوالى خمسميت أشارب

روحنا المول الأولانى .. و من محل لمحل .. و أنا مشغل العداد .. (و للأمانة .. اليوم دة روحنا مول واحد فقط مش مولين.. يعنى الرقم اللى هانوصل له كمان شوية ممكن تضربوه فى اتنين و انتم ضميركم مستريح) فى نهاية الرحلة هالنى عدد الأشاربات اللى أختى تصفحتها و رفضتها عشان تشترى فى الآخر على مضض أشارب مش عاجبها و رضيت بيه بالعافية عشان ما تروحش البيت فاضية

و الله العظيم عدد الأشاربات اقترب من خمسة آلاف أشارب .. خمسة آلاف أشارب يا عالم يا هوووووووو ...... خمسة آلاف أشارب مافيهومش واحد يحقق المعادلة اللوغاريتمية الصعبة

معنى كدة إن أنا لو فكرت أشتغل بياع أشاربات فأنا محتاج يكون عندى فى المحل خمسة آلاف أشارب عشان أتمكن من بيع أشارب وحيد .. دى بالتأكيد تبقى تجارة خاسرة .. و لما واجهتها بالحقيقة المذهلة و أنا متخيل إنها هاتدرك هول ما فعلته و هاتبدأ فى التراجع عن معتقداتها أمام هذا الدليل القاطع لقيتها بتقول لى:"و إيه يعنى خمستلاف أشارب .. دة أنا كان نفسى يبقى فيه أكتر من كدة عشان ألاقى الأشارب اللى أنا بادور عليه" .. أنا مش هاقول على اللى حصل لى ساعتها لكن أنا هاذكر وقتها إن مرصد حلوان قام برصد هزة أرضية مقدارها ستة و سبعة من عشرة درجة على مقياس ريختر و مركز الهزة الأرضية كان مكان بيتنا

نداء إلى كل من قرأ هذه التدوينة .. لو كنت تنتمى إلى عالم الرجال فأنا أنصحك عند قيامك بمثل هذا المشوار (و هاتعمله هاتعمله .. دة قدر يابنى)
إما أن تتظاهر قبلها بأنك ميت .. أو تتسلح فى أول الرحلة بشريط كامل من المهدئات لأنك ستستهلكه بالكامل حتى نهاية الرحلة

أما لو كنتِ تنتمين إلى عالم النساء .. فأرجوكن يا معشر النساء .. تعالين على أنفسكن و تنازلن و لو بمقدار قليل عن شروطكن فى الأشارب .. حتى عشان خاطر بياعين الأشاربات يعرفوا يلقطوا رزقهم .. و الله أنا لو شوفت واحدة فيكن لابسة أشارب درجة لونه تختلف بقدر بسيط - أو بقدر كبير حتى - عن درجة لون باقى الهدوم و لا هايفرق معايا .. بل بالعكس .. دة أنا هاقدرها جدا و هاقدر مقدار التضحية اللى قامت بيها و تنازلت للدرجة إنها تسمح بهذا الاختلاف الطفيف فى درجات الألوان

بصوا بقى من الآخر .. أنا يوم ما أتجوز أنا هاتجوز يا إما واحدة مش محجبة أصلا .. أو لو محجبة أنا هاشترط فى عقد الزواج إن زى ما العصمة هاتكون فى إيدى .. برضه حق اختيار الأشارب هايكون فى إيدى .. و ماشى يا بينى آدمين

بقلم

ابن حجر العسقلانى


الجمعة، يوليو 11، 2008

بنات الهوب هوب




من قيمة خماشر سنة كدة(يعنى يعملوا بتاع 3 سنين تعبانين) كنت في سنة تانية كلية
وبالصلاتو ع النبى كده انا كنت وحش كاسر...مسمار اللاووظ بيبرم فى ايتها مهمة او مسابقة او نشاط...يعنى من الاخر برشق فى اى حاجة تمر من أودام عينى ومن ورايا ومن ايتها إتجاه
مش بعتق
(يلا بقه شباب متهور)
وقال أيه خير الله ما اجعله خير لمحت وسمعت إن الماراثون (مسابقة الجرى يعنى) بتاع الجامعة بعد يومين.
قوم ايه بقه...الدم ضرب في نفوخى...والوطنية جريت في عروقى...وعروق رقبتي نطرت لبرة...وقلت لنفسي
"كليتك بتناديكى يا بطلة...مصر محتجاكي يا بت...املى الاستمارة الله يخرب بيتك هتضيعينا"
وخلاص قررت إن المرة دي تبقه بتاعتى...وخليها المرة الجاية بقه للعيال التانية تفرح
( يلا خلوا الكل ياكل وينبسط)
وخلاص قررت انى ابدا بقه مشوار التدريب الطويل اللى هيمكننى من الفوز
وطلعت علي نادى جنبنا كده وقررت ألفلى التراك كده قيمة لفتين وتلت...اهه بردو حاجة تلين العضلات اللى نشفت من يجي كتير.
يوه يا جدعان لما الواحد يعمل حاجة عشان مصر...وعشان الولاء.
يا رجاله انا كلى مصر...انا قلبى لمصر...والكبدة لمصر...وبردو الفشة لمصر (مش عرفة لحد دلوقت كان ايه صلة مصر بالموضوع...بس ما علينا)
نزلت يا رجاله فى التراك وانا غضنفر جثور...وحسة ان مصر كلها اعدة من ورايا تغنيلى فى حس واحد ذى فريق كورال أطفيح البلد وبيقولوا
"اتقدم...أه أه أه...أتقدم...أه أه أه...أتقدم اتقدم وحرام عليك يا معلم...بكرة هتشوف الموت...أتراجع بقه واتندم...أتعلم واتندم واتنيل"
وانا مركزتش خالص مع الاغنية...ولا سمعت كلام العالم بتوع الكورال ولا عملت بنصيحتهم (يا ريتنى سمعت وعملت
بيها)
طلعت يوم المسابقة علي قارعة الطريق...قصدى على خط البداية...بيبدأ من علي باب الجامعة وبينتهى فى أقاصى الواحات
أصل انا احب افهمكم واوعيكم يا رجالة...حاكم احنا جامعتنا مترامية الاطراف...تمتد من الغروب الشرقى لوادى حوف...ثم تتمحور كده حوالين نفسها وتطلع على صفط اللبن وترجع تخرم تانى من الداخلة والخارجة والفرافرة لحد السلوم ثم وادى النطرون.
ما علينا
البنات يا اخونا كانت هتجرى 3 كيلو ...والولاد بينى كانوا هيجروا قيمة 350 كيلوونص...مش واثقة بالظبط...يمكن يزيد عليهم كمان حبة حلوين بتوع 30 كيلوكمان.
الولاد مش مهم...الاهم البنات اللى أول ما شفتهم..ادركت وتيقنت ان الكاس ليا.
وقلت في سر بالى" هع هع ها...يا مرك يا حلوان...دي بناتك يا حلوان...بقه البنات التعبانة والهفتانة دى هما ممثلينك فى الاوساط الرياضية
(بغض النظر عنى وعن هفتانى...أنا بتكلم في الحق دلوقتى...طلعونى انا خالص من الموضوع ده)
كانت كذا عربية إسعاف راكنة علي جوانب الطريق...وفى إنتظار طلقة الإنطلاق عشان يلموا العالم الفطسانة اللى هتترمى علي السكة.
سحبت نفس ثقة كبير...وقلت فى سر بالى
"اهربى يا بت منك ليها...كتكم الخيبة...وايه اللى جبركم علي المر يا عالم يا فاضية"
وفى لحظة و من قبل حتى ما أخرج نفس الثقة اللى سحبته...لقيت قيمة 3 اتوبيسات محملة ناس...جم وركنوا علي جنب.
طب انا مش عرفة طيب الناس اللى جوة دي جاية تشجع ولا تضرب ولا ايه في سنتهم الحمرا .
والاقيلكوا وحوش...غجر...اكلى لحوم بشر...نازلين من الاتوبيسات.
مين دول يا رجاله...وحياه ابوكم حد يقولى.
"دول بنات تربية رياضية حلوان...فراعنة الجامعة...البنات امات عضلات دول...أيه هتنسى ولا ايه...فكرك انتى انهم كانوا ممكن يفوتوا المسابقة دي؟...مش قلنالك اتعلمى واتندمى...كتك دهية" (اللى بيردو عليا دول فريق الكورال ...اصلهم جهم عشان يشجعونى ويترحموا عليا)
انا بقه وبصوتى الحيانى "ويك ويك ويك...جاي جاي جاي...يا ابن ويا ابن ويا ابن...يا ولود ويا ولود ويا ولود"
وبصيت لروحي فجاة... لقيتني...تعبت من المفجأة...ونزلت دمعتى.
انا مش عارفنى
طب بصوا انا عرفة ومدركة إن الجرى فى مجاهل حلوان ضار جدا بالصحة وقد يسبب الوفاه...يعنى سلعوة تنط عليا تؤرمنى...ديب شارد يجرى ورايا يأزأزنى...دنياصور مخنوق شوية من الحر يطلع عليا ويناولني مقلب حرامية...تعبان حامل فى بيضتين يطلع همه فيا...يعنى اى حاجة من الجو ده.
يعنى انا لازم يا اخوانى اتحلى بالفطنة والإفتطان...الإنتحار حرام وكلنا عارفين...بلاش بقه المرة دي وخلوني اتقى ربنا في صحتى وعافيتى.
لكن علي مين...اومال فريق الكورال ده جاى يترحم علي مين.
هتجرى يعنى هتجرى.
وفى فسوة...لقيت المسدس بيضرب نار...نار بجد مش طلق يعنى...حاكم الناس دى مش بتجري غير بالنار واللسوعة.
وكان لازمن ولابد فى هذه البوليكة أن أجرى وبعزم ما فيا وإلا هنداس...دى سكة اللى يروح ميرجعش...النار واللسوعة من ورانا...والصحرا من امامنا.
وفضلت اجرى واجرى وأجرى واجرى وأجرى وأجرى
انى الاقي نهاية ولا بوادر نجاه....مفيش.
واجرى واجرى واجرى واجرى واجرى واجرى
والعالم بتتسقط ذى البيتنجان من فوق سجرته...والاسعاف تلم.
وكل اللى يتعب يوقف اتوبيس من الاتوبيسات اللى ماشية ملازمانا ويعد يطلع فى روحه براحته وعلي رواقه بقه.
وانا اقول ابدا...مش انا اللى فضيحتي وجرستى تبقه بجلاجل وحناجل...لئه.
لكن خلاص بقه...طب ليه الغلب؟....إن كانت مصر هى السبب فى حماستى دى...فمصر خلاص باعتني عند اول محطة...وانا هنا بجرى بطولى...كفاية كده...كفاية غلب.
وفجاة
لقيت اللى من بعيد وعلي مدد الشوف بينادى عليا
"يلا يا احمر...اجرى يا احمر...شد يا احمر"
أصلي صراحة كنت لابسة احمر...والعالم اللى كانت بتشجعنى كانوا شوباب من المدينة الجامعية طلين من البالكونات (حاكم احنا مدينتنا الجامعية جوة الجامعة في الصحرا علي ايدك اليمين كده وانت داخل)
وبدل ما ابصلهم وازعقلهم واقولهم ايخرص ياض منك ليه...لقيت الدم بيضرب تاني في عروقى(مهى شغلانة بقه)...وحسيت إن ده اليوم المشهود... اليوم اللى اتدربت عشانه قيمة ساعتين وربع.
عينى احمرت ذى بروسلى...وعروق رقابتى نطرت لبرة... وجسمى كله اتنفض..وحسيت ان الكاميرا بتلف حوالينى وبتجبنى من كل حتة ذى ما في الافلام الاكشن...وخير الله اما اجعله خير قال ايه بعيد عنكم كده لقيت بوءى بيتحرك وكأنى بتكلم وبعدين الكلام يخرج بعد شوية ولقيتني بقول
"لئااااااااااااااا...مش انا يا غجر....سوف انتقم منكم يا اوباش"
وقمت تاني وفضلت اجرى وانا شغال في ودني اغنية " اللى بنا بنا مصر...كان في الاصل حلوانى" (من حلوان يعنى).
واعدت اجرى أجرى أجرى اجرى أجرى
لحد ما لقيت راجل واقف من بعيد بيسجل رقم كل واحد يعدي عليه...علشان يضمنوا ان محدش يخرم من بركة السبع ولا حاجة.
كنت سعتها بزحف علي ركبى...ولسانى خارج لبرة...وسألته بكل انكسار
"هاه يا كابتن فاضل ادايه"
يرد يقولي "أجرى يا بنتى اجرى"
وانا اقوله " الله يكرمك يا عم الحج فاضل اد ايه"
وهو يرد وهو متأثر اوى " يا بنتي اجرى خلاص خلاص اجرى يا بنتي"
الله يخرب بيتك علي بيت بنتك ..ايه يا راجل انت في سنتك الكوبيا دي...يا ابا انهار واعترف فاضل اد ايه...صارحنى يا حاج
"خلاص يا بنتي كلها كيلو..يلا هوب هوب"
الله يخرب بيت الغلب...مين الراجل ده يا جدعان...هو كيلو بطاطس...ده كيلو هوب هوب.
وببركة دعا الكروان قدرت ازحفلى حبة حلوين.
وخلاص بقه فاضل خطوتين علي خط النهاية...وكانوا أغتت خطوتين.
لقيت بقه مناخيري بتنزف وغلب...ما احنا بنجرى في عز الولعة...مش مهم شهر ايه ...المهم إن فصول حلوان كلها صيف ومعندناش احنا شتا خالص...وإن كان عاجبكم.
وصلت للخط وانا بفيص
بصراحة الحق يتقال...ناس معرفهاش شالتني وجريوا بيا...معرفش بيحيوني ولا بيهربوني...لحد الان مش قادرة اعرف.
والناس ادوني كده ظرف ابيض فى ايدي كده في الدرا من غير ما حد ينقرهم عشان الحسد بردووالعين وحشة.
كان جواه بتاع عشرين جنية كده مفكوكة خمستين وعشرة...وفوقهم 40 قرش برايز.
يا هناي يا سعدي يا مصر...مبسوطة يا مصر؟!
قال ايه أخدت المركز الاول علي مستوى الكلية (يعنى يعمله بتاع المركز الحداشر علي مستوى الجامعة)
أصله طبيعى وأكيد وحتما ولابد أن العشرة الاوائل لازمن يكونوا من من بنات الهوب هوب.
ولا ايه؟


بقلم


مها زين


انها الحياه






الثلاثاء، يوليو 08، 2008

2 - عائله الضاحكون ...البطاله جزء اول


اخوانى فى كل مكان انهارده موعدكم مع مشكله ممكن تحصل فى اى بيت مصرى ..وممكن ليه ...دى فعلا بتحصل فى اغلبيه البيوت المصريه ...البطاله ..والبطاله نوعين ..بطاله الشباب المقبل على الحياه وبطاله رب الاسره ..وانا الدكاتره عبده الرايق بقول ان اسوء انواع البطاله بطاله رب الاسره ...انهارده احنا هنتكلم عن بطاله رب الاسره ...وهناخد فى طريقنا بطاله الشباب لفه كده على الماشى .... علشان المشكله عويصه شويه قسمناها على حلقتين ...ودلوقتى تعالو ا نشوف المصيبه اللى حلت على عيله الرايق

لحلقه الاولى من البطاله

**********************

فرنسا :- ياولاد حد يخش يشوف ابوكم ويقوله كلمتين انا بصراحه غلبت معاه ..امبارح اتخانق مع المدير بتاعه وراسه والف زعزوعه قصب انه يسيب الشغل ...وانتم عارفين لو ابوكم قعد من الشغل يمكن مايلاقيش شغلانه تانيه ..ولا يمكن ليه ده اكيد مش هيلاقى شغل هو حد فى البلد لاقى يشتغل .. وبعدين انا حاسه كده انهم رفدوه ... وانا لوحدى مرتبى مش هيكفى البيت ..مالكم ساكتين ليه ؟

واحدة مفروسة:- يااااااااااااالهوييييييييييي مين ده اللي بسيب الشغل؟؟!!! و خناقة إيييه اللي بتتكلمي عنها.؟؟؟؟؟ياااخراااابي ليكونو عاوزين يخفضوا الموظفين قامو خلقوا مشكلة معاه؟؟؟؟و لا يمكن مسك عليهم غلطة!!!اااه ماهم اليومين دول اللي يكشفهم و يكشف الاعيبهم يتخانقوا معاه و يقرفوه..لغايه لما يقول جاااااااي و يمشي يالهوي يالهويي..لحسن يكونوا حيخصصوا المدعوءه اللي بيشتغل فيها؟؟؟؟ اااااه ماهم يقعدوا يعملوا البحر طحينه من بتاعة رشيدي الميزااان...وهيه و لاميزان ولا نيله...و ميزانهم مش موزون اصلاا و بعدين يستغنوا عن الموظفين....انتي عارفه ...البت نجاة زميلتي..ابوها قالوله البنك اللي بيشتغل فيه حيخصخصوه..كل واحد يمضى على استقالته و حنرجع نعينه بآضعاف المرتب....قوم الراجل من عبطه مضى........ومضى قطار العمر بيه وعمل حادثة على قضبان متكسرة.....واهه قاعد على القضبان يبكي...غباءه فى انه صدقهم...قال و إيه ماسك مرايا و على نغمه واحده عمال يقول ..إخص و يبص فى المرايا و يقول ..إتفوه..خصخصوه...إخص إتفوه خصخصوه...إخص إتفوه خصخصوه

قوس قزح :- يعنى بقى عنده اجازة مفتوحة هييييييييييييييه .. اروح اتفق معاه بقى و نشوف هنعمل ايه فيها بابتى يا بااابتى

فرنسا :- فرحانه ان ابوكى اترفد ...اشوف فيكى يوم بالوان الطيف الخمستاشر يا قوس قزح

بلطجيه هانم عويل (مفقوعه ) :- بقى المدير النص لبة ده يقدر يرفت الرايق بيه ... هو يقدر يمشي خطوة من غير جوز بنتى حبيبي ده إن ماكانش المدير هو اللي يركع تحت رجلين الرايق ويقوله المصلحة هاتخرب من غيرك يارايق ماتسيبناش ياروقة .. هانشحت من غيرك ... ماتسيبناش نلوص ياأبو الروقان ... ابقوا قولوا تيته مفقوعة دي مابتفهمش في أيتها حاجة .. ودخلوني مدرسة فكرية وقولوا الست دى نزل علي نافوخها التخفيض

فرنسا :- الف بعد الشر على نافوخك يا ماما ...وبعدين موسم التخفيضات لسه بدرى عليه

مواطن مصرى : يوووووووه هو كل يوم لازم نصحى على صوتكم دا ايه وجع الدماغ ده , ماله سى الحاج بابا ماهو اكيد انجعص على المدير و عمل فيها رئيس مراجيح مولد النبى و قعد يقوله نو نو نو و رطن له بالكلمتين الانجليزى اللى اخدهم فى سنه رابعة ابتدائى انا لو من المدير ارفده بس اتعين انا مكانه اه كفايه علية كده و كفاية على المدير كمان انا ممكن امسك مكانهم هما الاتنين سبونى بقى اقوم آكل اوو نو زيس ايز فرى كريزى بيت على راى ابو الروقان سى بابا

فرنسا :- والنبى ماحد هيرفد نافوخى من راسى الا انتى يا بتاع الديناصورات ...بقى عايز تاخد مكان ابوك فى الشغل ؟؟؟ اصبر عليا شويه يا اسلام يابن فرنسا ...انشاء الله هاعمل اكله من اكلاتك واكلهالك لوحدك

آبى :- براحه شويه يا فرنسيس هانم انا مش فاههمه حاجه هو عبده بيه هيسيب الشغل؟؟... يبقى كده مفيش مارينا السنه دى ولا ايه طيب حتى بلاش شرم الشيخ هو ليه بابا بيعمل كده فينا يعنى لو مش عجبه القعده على السلم يعملوا له مكتب على السطوح ويقعد فى مكانه

فرنسا :- مارينا ؟؟؟ طيب احنا مارينا دعوه ...تعاليلى ياما شوفى بنتك ام باريس جرالها ايه

سومه المجنونه الحشريه :- سلام عليكم يا جماعه..فيه ايه يا فرنسا ياختى ؟؟...الجيران لبعضيها ..انا سمعت من خرم الباب ان سى الرايق رفدوه ...قعدت اصحى فى المدعوء بطيخ جوزى يجى معايا نعزييكم ونتفرج عليكم ...بصلى وقالى انا مروحشى للاشكال الحوش دول ...قلت له اخرس يا طيخه ..فرنسا دى ست ولا كل الستاتيت...ورحت واخده ديلى فى سنانى وجيت جرى اتفرج عليكم ...اصلى بحب الفرجه ومبحبش الحكايات دى تفوتنى ابدا ...

فرنسا :- فيكى الخير يا حبيبتى ..اتفرجى براحتك ...وبعدين مكنتيش تعبتى نفسك وانا كنت اسجللك المصيبه فيديو

سومه المجنونه الحشريه :- ولا يهمك يا فرنسا ...فيديو ايه وزفت ايه ؟؟ انا بحب اتفرج على الهواء .. شوفى بقى يا فرنسا ...انا حاسه كده ان الرايق اختلس فلوس وعلشان كده ادوله صابونه وفرقعوه ...والراجل مبيختلسى فلوس الا لو كان فى ست تانيه ...خلى بالك يا فرنسا ..انا جايه وقصدى خير ياختى ...قطيعه تاخد الرجاله فى مركب واحده واولهم طيخه جوزى حبيبى

الطائر الحزين:-بابا بابا رد عليا انت مش سامعنى ولا ايه ولا كمان شايفنى ؟؟؟؟؟؟

فرنسا :- يا مجايبك يافرنسا ..ياخلفتك البيضاء يا فرنسا ...بتكلم مين ياحبيبى ؟؟ هو فين ابوك الرايق اصلا ؟؟

الطائر الحزين :- انا عارف انكم كلكم كذابين والناس اللى ماشية فى الشارع كمان كذابين- مش انت يا ماما يا فرنسا وانتم يااخواتى وانت يا عم زينهم يا حلاق مش كل ما تشوف ابويا كنت تقوم تقف وتقول له اتفضل يا بيه ؟

فرنسا :- فين زينهم الحلاق ده ؟؟؟الواد خرف ولا ايه ؟؟؟ ولا يكون فاكر نفسه على المسرح

الطائر الحزين :- مش انتم قلتم كلكم ان بابا هو المدير وكان بيقعد كثير ميروحش الشغل وكنتم بتقولوا عليه المدير- منظرى هيكون ايه قدام صحابى لما يعرفوا ان ابويا اللى مخلفنى هيبقى عواطلى - بس انا عارف بابا مستر رايق اكثر منكم ميسبش الشغل ابدا الا اذا كان نايم على شغلانه تانية هتأكلنا الشهد اكيد فيه شغلانه تانية -

فرنسا :- نايم على شغلانه تانيه ؟؟؟؟؟؟؟؟ هو حد فى البلد لاقى تانيه ولا تالته ؟؟؟

هيما :- وحدووووووووووووووووووه يا جدعان .... ليه بس الشقاوه دى هو حد لعب فى ترومستات التلاجة ولا إيه ؟؟؟ الدنيا حر حد يحط فيشة التلاجة ياخوانا

فرنسا :- اهى كملت والحانوتى وصل

هيما :- ايه فى ايه يا بشريه ؟؟؟ ! قولولى بس مين مزعل بابا وإحنا نقطعوه ونسلخوه وبعد كده هنحطه فى اكياس ..ونعينه فى التلاجة ..وأهو يساعد على كيلوين البطاطس اللى بنجيبهم اول الشهر..

فرنسا :- هو انا كل واحد يجى اغنيهاله ما عبيها فى شريط كاسيت احسن ..ابوك هيسيب الشغل ..

هيما :- مصيبه لحسن يعمل زى واحد صاحبى هيشتغل بعد ما يتخرج فى القطر وهيشيل خشبة ويحط عليها جهاز ضغط وترمومتر ويمشى فى القطر ويقول " أقيس ضغط ...أقيس حرارة ... تقيس ضغط مرتين نقيس لك الحرارة هدية يالا ...مين يقيس قرب يابيه قرب ياباشا

مفروسة( لأمها):إييييه.؟؟؟؟ إييييه؟؟؟؟؟شغل إيه اللي يسيبه ده.؟؟؟!!!!!!..حد يبقى فى شغلانه اليومين دول و يسيبها....لييييه؟؟؟!!!!....شايف المرتب بتاعه إن شاء الله بيقضينا...ده يا حسره..إن كفانا عيش حاف مش يكفينا غموس...و بيكمل باقى الشهر سلفيااات....اما ادخلله اشوف النصيبة اللي حتطبل و ترقص على واحده ونص على دماغنا ديه

صبرني يارب(بتكلم نفسها) : حلو كمان هايسيب الشغل تبقى كملت قال يعنى لاقي الاشغال بتجري ورانا . ما انا اهو اتخرجت وقاعده زي خيبتها . طب ان شاء الله لو حصل وساب الشغل يبقى ننسى الجواز والجهاز والعيشه والى عايشينها .جواز ايه ده احنا هانجوع يا معلمي. لما اقوم ادخل مع البنت مفروسه واقوله انا كمان كلمتين


الى اللقاء مع الجزء التانى
ومواجهه مع الرايق والبطاله

الأربعاء، يوليو 02، 2008

1 -- عائله الضاحكون ....ازمه السكن

الاخوه الكرام ضيوف مدونه الضاحكون

يسعدنا ان نقدم لكم الحلقات الكوميديه ..عائله الضاحكون ..باقلام فريق العمل
وطبعا كان من حظ العبد لله السيىء انى اكون الاب ..وده لانى ساتزوج من الحيزبونه ام لسان طويل.. اطول من لاعيبه السله ..مرضعه نفرتيتى وجليسه اخناتون ...الشاويش فرنسا هانم ...ونصيبى ان يكون لى اولاد ..طالعين لامهم لسانهم فالت منهم ...مره حبيت اعاقبهم وامنع عنهم المصروف قاموا باعوا كل هدومى لبتاع الروبابيكيا ..وخلولى شورت وفانله وكتبوا عليها رقم 10 وقالولى انت راس الحربه يابابا
اسيبكم مع الحلقه الاولى

فرنسا :- أيه يارايق مالك ياخويا أكلك مش زى عوايدك ...مالكشى نفس ولا أيه ..شايفاك مابتلحسى طبق الفول زى كل يوم ..وقاعد وحاطط خدك على ايدك وشايل طاجن ستك مدام حنفى

الرايق :- أوه نو فرنسيس ..بلاش البجاحه وطوله اللسان قدام العيال ..يو آر فرى كريزى
فرنسا :- أنا مجنونه يا رايووقه ..وحتى يا خويا لو أتجننت مين هيكون السبب ؟؟؟ هو فى غيرك دا أنت تجنن بلد بحالها
الرايق :- شوفى يا فرنستى ..أنا خلاص الرمان البلى بتاع مفاصلى فرط من الشقه دى ..أنا بفكر ناخد شقه كبيره ..يعنى ممكن ندور على شقه فيها 15 او 20 اوضه و5 حمامات ...نفسى بقى اخد اوضه ..مش الاوضه اللى سى هيما عملها تلاجه ...والبت مفروسه مالياها عرايس ودباديب ولا خالد اللى بقول عليه ولد طالع لابوه الرايق باشا .... كل شويه يجبلى عيلين تلاته ويخبيهم ولما اسأله يقولى اصلى بولو الحلاق شلفطلهم شعرهم ولا البنت المخبوله appy جايبالى برسيم وحطاهولى تحت المخدات وفى الدولاب وتحت السرير وكل ما اكلمها تقولى ..حرام يبابا اصل خرفانى يتما ابوهم وامهم ماتوا فى حادثه طياره

فرنسا :- أسكت يارايق .. ماتشبطش العيال .. خلى العيال ساكته وراضيه

مفروسه :- ساكتين ؟! إحنا ساكتين من غلبنا ..أووووووف .. أنتو مش حاتشوفولنا علبة أكبر من ديه شوية.؟؟؟؟!!!...أنا خلااااص أتفعصت فى الشقة...و هدومي مش بلاقيها من كتر الزحمه... ناقص تحطولنا فى الشقه عسكرى مرور ...لاااازم كل يوم ساااااااعة علشان أدور على هدومي؟؟؟!!!!..

الرايق :-طيب مانتوا إللى عشرتاشر كان لازم تهلوا وراء بعض ؟؟؟ هو طابور جمعيه ؟؟؟

مفروسه :- يعني كان لازم العزوة..و العيال الكتير ... إييييييييه ما كانش فيه كونجيه على أيامكو؟؟؟!!!!!انتو تشوفولكو صرفة..فى الحشرة اللى أنا محشوراها ....

فرنسا :- صرفه ازاى يعنى ؟؟؟ قولى يا ستى عايزه ايه ؟؟؟ طلباتك ؟؟؟

الرايق :- ايه يا فرنسا ...براحه شويه على البنت ...شوفى المعامله الصح ( قولى عايزه ايه يا مضروبه لاكسر نفوخك )

مفروسه :-أنا عاوزة دولاب لوحدي و سرير لوحدي...البت مفقوعه بترفس بالليل..خلاص بطني بقت في ضهري من كتر الرفس....ولا إيدي طول الليل اخرجها من بقها زههههههههقت ... ماهو ياإما تشوفولكم صرفة في الزحمة دي ياإما هادبحلكوا البت مفقوعة وأخلص من قرفها

الرايق :- البنت مفروسه دى عندها حق كل يوم الاقيها على الفطار عماله تعد فى صوابعها خايفه لتكون مفقوعه اكلتهم ..وبعدين يامفروسه اوعى يوزك عقلك ولا يبطك عقلك وتقتلى البت مفقوعه لحسن يطلع لنا عفريت فى الشقه

الطائر الحزين :-بابا - ماما

الرايق :- أهلا بالفيلسوف .. أستلمى بقى يافرنسا

الطائر الحزين :- هو أنتم خلفتونا ليه ما دام مش قادرين على مصاريفنا؟؟؟؟

فرنسا :- اممممممممممممممممممممم ..وأنت طلباتك أيه كمان ؟؟؟

الطائر الحزين :- انا عاوز أجيب جيلاتى ولا أقول لكم أنا عاوز الفلوس بتاعتى إللى بابا خادها إللى كنت حاططها فى الحصالة الصفيح

الرايق :- وووووووووووولد ...يو آر كريزى ..شط يور ماوس

الطائر الحزين :- ايه فاكرينها ولا لأ؟؟؟؟... اللى كانت محطوطة تحت ليانة الكنبة الموجودة فى الصالة

الرايق :- أنا مش فاكر حاجه بتيتن (بتاتا انا فقدت الذاكره )

الطائر الحزين :- انا وفرت عليكم وريحكتم من مصاريفى أهه عاوز بس حقى ولا اقول لكم مش مهم انا ضحيت بكل حاجة اهوه بس المهم اننا نلاقى حاجة كويسة نقعد فيها كمان ممكن اطلع من المدرسة علشان اوفر شوية ما هو التعليم بقى زى قلته والله
الرايق :- تطلع من المدرسه ؟؟؟ نو نو نو ...انا حاطط كل امأل عائله الرايق عليك نفسى تدخل كليه الهندسه وتطلع دكتور قد الدنيا
- الطائر الحزين :-بابا ماما انا جات لى فكرة اننا نجيب سرير زى بتاع السجن بس ده باربع ادوار ننام عليه انا واخواتى بدل السريرين اللى موجودين ؟؟

الرايق :- هههههههههه تصدق يا فيلسوف ...الفكره دى الف الميه وامك بقى ايه ...سجان من النوع الاصلى ...يااااااااه الشاويش فرنسا ...هههههههه ..اسم على مسمى ..حلوه الفكره دى

فرنسا :- اصتبح يارايق وقول يا صبح

مواطن مصرى : أنا عن نفسى يا بشر مش فارقة معايا بس اهم حاجة السرير عاوز واحد اكبر من كده شوية عشان اخد راحتى فى النوووووم و كمان عاوز اوضه لوحدى بس مش عاوز حاجة تانية

فرنسا :- بس كده ؟؟؟؟ لأ عرفت تخلف يارايق الواد طالع قنوع على الاخر ..قال اوضه لوحده قال

مواطن مصرى :- اه صحيح الدولاب يكون درفتين و بالنسبة لترابيزة الكمبيوتر عاوز يكون فيها مكان للاسكانريعنى كمان عاوز كمبيوتر .

الرايق :- عايز ايه ياخويا كمبروتر ؟؟...ليه قالولك علينا ورثنا
مواطن مصرى :- يعنى حنجيب ترابيزة من غير الكمبيوتر بتاعها ..كومودينو بقى و تبقى كده تمام
الرايق :- علجم والله علجم ...جولى ولا تخبيش يا زين فين بقى المشكله فين ؟؟؟
مواطن مصرى :- المشكلة فى علبة التونة اللى احنا ساكنين فيها دى حينفع يكون فيها كل الحاجات دى يالا انا مليش دعوه اهم حاجة اللى انا عاوزه يتنفذ و الا الحاج يكون رايق لوحده يعنى واحنا لأ...... هيما ..ناولنى الشاى بتاعى لو سمحت.
الرايق :- فرجنى ياخويا على خطوتك ..وورينى عرض اكتافك ..ولا اقولك سمعنى احلى سلام هاودعك ..الشاى ده بتاعى احنا هننصب علي بعض انت شربت شايك ياخفيف
الطائر الحزين:- يا أبا يا أما هو انا يعنى اللى وقعت من قعر القفة يعنى لا هيبقى مهنينى على أكل ولا كمان كوباية شاى
الرايق :- وايه اللى طلعك للقفه ياولد ..انا مش قلت 176 مره القفه دى محدش يقعد فيها خاااااااااااالص ..وبعدين مزرجن ليه كده؟؟؟؟
الطائر الحزين :-ماهو كفاية اخويا التخين اللى واخد السريرين اللى فى الاوده لوحدة وانا واخواتى نايمين على طرف السرير وكل شوية الواحد يسمع صوت كركبة وكان فيه قنبلة انفجرت انا مش عارف ازاى هو اللى واخد كل السريرين وهو برده اللى بيقع
الرايق :- هههههههههه ...الواد ده عامل زى الكوره الشراب يخبط فى الارض ويرد تانى على السرير ..طالع لامه ...عارفين ياولاد ...اقولكم على سر ...امكم فرنسا هانم كانت مشتركه فى كأس العالم 1982 بس كانت هى الكوره ...وانتى ياض ياخالد مش نفسك فى حاجه أنت كمان
همس الاحباب :أنا عن نفسى هاخدها من قصيرها وأروح انام على السلم على الأقل أرتاح من صداعكم وازعاج اخواتى اللى ما يتسموا دول .
الرايق :- عيب يا ولد تقول على اخواتك اللى مايتسموا ...وبعدين السلم ده بتاعى انا ده ماركه مسجله
همس الاحباب : وبعدين انا ناوى افتح محل حلاقة فى الاوضة بتاعت بابا واجيب بولو الحلاق الخصوصى بتاعى أيه رأيك يا ماما آخد بابا عبده يحلق عنده ويا سلام لو مفروسة ومفقوعة كمان هايعملهم نيولوك جامد.حتى أسألى آبى كده انا خدتها ظبط شعرها هى والخرفان بتوعها عنده

appyا: كان مالها بقى خرفانى طيب دي مودبه وبتنونو حتي وصوتها حلو

الرايق :- صوتها حلو ؟؟؟؟؟ اعمللهم بقى شركه خرفانفون ..ولا مأماءه فون يمكن ياخدوا جايزه موبل فى الموسيقى


فرنسا :- إن كان ياخويا على الرايق خده ..وياريت مترجعهوش ..اما اخواتك البنات نو نو نو

الرايق :- ههههههههههه ..فرنسيس أنتى بتنونوى زى القطط ولا زى خرفان بنتك appy
فرنسا :- قطط ؟؟؟؟ يمكن..... اصلى شايفه قدامى فار
الرايق :- فار ؟؟؟؟ فين الفار ؟؟؟
فرنسا :- روح عند المرايه دى وانت تشوفه
همس الاحباب : طبعا بابا الرايق مبسوط منى لانى هاخد الأوضة بتاعته وهادفعله الإيجار بالدولار وهو ممكن يأجر السلم منى ويقعد فيه هو وماما فرنسا ... أهو طرواة وبعيد عن علبة السردين إللى أحنا فيها.
الرايق :- يابنى السلم ده اختصاصى انت اصلا مش هتعرف تقعد على السلم ...يابنى ده ليه قعده معينه باتجاه الصوصله
فرنسا :- الصوصله ....اسمها البوصله يادكاتره

الرايق :- بوصله ولا صوصله إحنا هنتجوزها ..خلينا فى الواد خالد ...وهتعمل كل ده ليه ياض ؟؟؟

همس الاحباب :على الأقل أستريح من الطائرالحزين إللى بيقلب الفلوس منى ويحطها جوه الحصالة بتاعته ولا قوس قزح إللى شغالة شخبطة على الحيطان وفاكرة نفسها بترسم تابلوه .

الرايق :- هى كمان طلعت فلوسك والفيلسوف الطائر الحزين عمال يذلنى عليها ...كُل حلو يا طائر وبلاش تحف فى البيض ...خلاص ياولاد من بكره هندور على شقه بِرحه
همس الاحباب : أيه رأيك يا روقة أنا ليا واحد صاحبى أسمه الحج بركة ممكن يديك شقة تمليك ومش هاتدفع كتير نص مليون يورو بس و هايديك عليها كيس بلح ولبشة قصب كمان

الرايق :- الحاج مين ياخويا ؟؟؟؟.....بركه ؟؟؟تصدق انا خايف منك انت بالذات يلا
عرفت منين الحاج حركه ده ؟؟؟انا لا هادفع يورو ولا دور
ر...انا عايز شقه وخلاص ..وعايز اوده كبيره العب فيها تنس

الطائر الحزين :- مامى أنا عاوز أعمل فتحة فى الجلابية علشان يبقى عندى خمس فتحات زى اللى عند بابا فى جلبيته

الرايق :- ولد ...اسكت ...هسسسسسسس ..بلاش فضايح ..الفتحات إللى فى الجلابيه دى من زماااااااان ...أصلى كنت بتخانق بيها مع العيال

الطائر الحزين :- وبعدين الواد همس المياس ده إللى بيقول إني بأخد الفلوس بتاعته ده شحات وجعان من يوم ما أتخلق ... هو حيلته إلا اللضه وكمان باصين لى فى البيضة إللى أول مرة أكلها من ست شهور ده انا كنت نسيت شكل البيض خالص قُُطع البياض على الصفار على الكل كليلة

الرايق :- محدش هيجيبلى كالو غير الولد الفيلسوف ده ...ست شهور يامفترى ؟؟؟؟....فاكر ياض زمان لما كنت فى تالته ابتدائى ...مش جبتلك ساندوتش بيض من المطعم ؟؟؟؟ اوعى تكون ناسى ...ولا تكون عامل نفسك ناسى

الطائر الحزين :- انسى ازاى يابابا ..مانتا ساعتها اخذت الساندويتش واديتنى الورقه وقلتلى اتفرج على الصور .زواكلت انت الساندويتش كله

صبرني يارب : بابا ماما انا جتلي فكره
الرايق :- صبرنى يارب عليكم قولى ياشجره الدر

صبرنى يارب :- ايه رايكم نقدم على شقه فى الاسكان ؟؟ ده انا سمعت إمبارح إن فيه شقق شرحه وبرحه ومتشطبه ميه ميه عشان الناس الى بيوتهم بتقع هي بتتأخرلها سنتين ثلاثه بس الصبر حلو وبعدين...... أوبااااااااااااااا نسيت بس احنا بيتنا ما وقعش .طب ما تيجوا نوقعه ده سهله اوي

الرايق :- ازاى يا فالحه ؟؟؟

صبرنى يارب :- هى بس صرختين من ماما فى وشنا مع جريتن من البت ابى وخرفانها تخلص الليله المهم تتصرفوا بقى عشان أنا جالي كساح من السرير القصير ده رجلي بتبقى خابطه فى باب الاوضه قافلاه .

قوس قزح :- بابتى مامتى أنا عايزة حيطة واحدة بس ... شوفتوا بقى أنا متساهلة معاكم إزاى و طول عمرى قنوعة و شاطرهأنا عايزاها علشان أعمل عليها فن تكعيبى تدويرى لولبى

الرايق :- ووات ؟؟؟؟؟؟؟؟؟ ايه التبعيبى تعبيبى لولبى ده ؟؟؟

قوس قزح :- ده فن يابابا بيعبر عن الحالة النفسية اللى إحنا بنمر بيها كل يوم وكل يوم أعمل ألوان جديدة و علشان الولد ده إللى بشوفه على السلم يبطل يخبى الالوان منى ويقولى انه مش عجبه فنى

الرايق :- عندكوا حق يا ولاد ..يلا بقى يا فرنسا هاتى ال300 جند اللى شايلاهم علشان ننقى لنا شقه معتبره

فرنسا :- أنت مش حاسس بالمشكله ولا أيه يارايق دى الشقق ولعت

الرايق :- ولعت ؟؟؟؟؟ طيب محدش بلغ المطافى ليه ؟؟؟ ماى فرند رئيس الميه ممكن أكلمه

فرنسا :- خليك عايش فى ميه البطيخ يارايق دى الشقه ال 3 أوض دلوقتى إيجارها يوصل 700 جنيه

الرايق :- ليه ؟؟؟؟؟؟؟ هو فى أيه ؟؟؟؟؟؟؟؟؟ علشان أيه ؟؟؟؟؟؟؟؟؟؟؟

فرنسا :- مرتبك كله مش هيكفى إيجار شقه يارايق
الرايق :-هو بصحيح يا فرنسا ..اصلى اتجوزتك كده على طول وطول ماحنا متجوزين منكتش فاضى اسألك ..انتى صحيح بتشتغلى ايه ؟؟؟؟

مع خالص تحيات

فريق العمل بمدونه الضاحكون