القذافى اهبل ولا احنا برياله

اخوانى الاعزاء واخواتى العزيزات
سؤال غريب الح على دماغى ايام اللامعقول اللى احنا عايشينها دى السؤال هو
القذافى اهبل ولا احنا برياله ؟؟؟؟؟؟
عارفه الجواب 99وتسعه دايره % هيقولوا انه اهبل
وانا مع الاجابه دى لكن
هيئه الاذاعه البريطانيه ال بى بى سى نظمت للقذافى محاضره فى 2007 لطلبه جامعه اوكسفورد البريطانيه  عبر الدائره المرئيه الفضائيه  واللى زاد الطين بله ان القاعه اتملت طلبه على اخرها وعملوا شاشه كبيره بره القاعه للطلبه الغلابه علشان يلحقوا ركب التقدم بفكر العقيد
وحتى اليابان غزاها الاخ العقيد بفكره والقى محاضره فى جامعه ميجى اليابانيه
وكمان القى محاضره عن الاسلام فى ايطاليا فى 2009 اسفرت عن اسلام 3 ايطاليات
بالذمه ده اسمه كلام ؟؟؟؟؟؟؟؟؟؟؟؟؟
واحد زى القذافى يحاااااااااااااااضر
لا وفين ؟؟ فى بريطانيا واليابان وايطاليا !!!!!!!!!!!
طبعا كل خطابات الفذافى وافعاله وحركاته بتبين انه مريض نفسى بجنون العظمه حتى انه ادى لنفسه لقب ملك ملوك افريقيا
وخصوصا الخطاب الاخير له فى البيت الخربان بتاعه كله كوم والخطاب ده كوم لوحده
انا مش هتكلم عن الخطاب
لان الرئيس اللى بيوصف شعبه بالمقملين والفيران اقل من الكلام عنه !!!!!!!!!
ولكن السؤال
ليه الدول الكبيره دى والمتقدمه دى سابته يحاضر عندها ؟؟؟؟
هل لانهم ارادوا ان يشاهدوا التطور الطبيعى للقرود حسب نظريه التطور ؟؟
ام لانهم ارادوا ان يثبتوا للطلبه انهم متحضرون ودى نوعيه لرئيس دوله عربى لاثبات تخلفنا ؟؟
ام لان القذافى دفع نظير المحاضرات دى والموضوع كله شو ؟؟
ام لانه فعلا عبقرى بشهاده الغرب واحنا اللى برياله ؟؟
ام نحن متقدمون بدليل ان الاهبل عندنا محاضر كبير عندهم ؟؟
ام هم بقى ولا مؤاخذه الصيت ولا الغنى ومن بره هلاهله ومن جوه يعلم الله ..طلعوا ميفهموش فى الباميه خالص ؟؟
ام ان الطلبه دول بيدرسوا علم نفس ودى كانت حاله بيدرسوها ؟؟
اللى يعرف الاجابه يريح اختكم المسكينه فرنسا هانم ويقولى عليها والاجر والثواب على الله

انا اسف ياريس

للاسف الشديد رفع المرتزقه شعار جديد بيقول انا اسف ياريس ومش عارف اسف على ايه لكن اصحاب الثوره المضاده والمنتفعين من النظام رفعوا هذا الشعار فكان لابد لى ان اشاركهم الاسف للريس يمكن ينول العبد لله ولو حتى عشره مريار دورار نصيبى من مسح الجوخ

.....

انا اسف ياريس *** ياريتك طلعت كويس
اسف لانى اتهنت . طول السنين وسكت
اسف لانى امنت .. بعدلك وانت خنت

انا اسف يا ريس *** ياريتك طلعت كويس
اسف ياريس لانى خلاص . عطيتلك بروحى كل الاخلاص
وعطيتنى العادلى الهجاص . ملا قلبى وصدرى رصاص

انا اسف ياريس *** ياريتك طلعت كويس
اسف لانى مقلتش جاى .. سنين طويله معرفشى ازاى
تاكل سيادتك الاكل الهاى .. وعشايى انا كبايه شاى

انا اسف ياريس *** ياريتك طلعت كويس
اسف لانى وصفتك زعيم .. ووصفتنى انت طور وبهيم
عايش انت فى هنا ونعيم .. وعايش انا على عود برسيم

انا اسف ياريس *** ياريتك طلعت كويس
اسف لان كلابك خانونى .. سرقوا مالى وكمان هانونى
وجنابك سيبتهم ياكلونى .. وفى عضمى كمان شاركونى

انا اسف يا ريس *** ياريتك طلعت كويس

ومش اسف لان التار .....بضرب الحديد والنار

جالى لحد باب الدار.... وخلاص مبقيتشى حمار

سجل يا تاريخ

رغم اشتراكى فى مدونه الضاحكون ورغم وجود مدونتى (عبده الرايق ) ورغم اشتراكى فى الفيس بوك الا ان علمى بيوم الثوره يوم 25 يناير شرف لا ادعيه فلم اكن لحقيقه الامر اعرف بهذا اليوم نظرا لابتعادى كثيرا عن عالم التدوين .. الا اننى علمت بالمظاهرات يوم الثلاثاء بعد الظهر وانا فى عملى ولم اتوقع ابدا ماحدث بعد ذلك ..عدت الى منزلى القريب جدا من شارع الجيش او ميدان الاربعين بعد العصر لاجد طريق شارع الجيش مغلق ولابد ان اتخذ طريق الترعه للوصول الى منزلى لم اشاهد شىء وعدت الى المنزل .. بعد اذان المغرب تلقيت عده تليفونات من اصدقائى يحذروننى من النزول الى القهوه التى اجلس عليها يوميا بالقرب من الميدان ولكن هذا التحذير دفعنى الى النزول .. تزلت مسرعا الى شارع صدقى لاجد بعض العاملين معى فى الطريق ..ذهبنا مباشره الى شارع صدقى بعد صلاه العشاء فوجدنا الطريق الى ميدان الاربعين مغلق تماما بالكثير من الجنود فغيرنا مسارنا الى شارع جانبى يؤدى الى الميدان وفعلا وجدت كل السويس هناك شباب يجرى ويصرخ فى الظلام والقنابل المسيله للدموع تنهال على الجميع ..اخذت اقترب كثيرا لاصل الى مقدمه الاحداث ...انه فعلا منظر رهيب ..اننا فى موقف مواجهه مع الشرطه .. سمعنا ان هناك شهدين سقطا فى الاحداث .. وترددت اشاعات ان الشرطه اختطفت فتاه من المتظاهرين .. وجدت نفسى موجه صغيره وسط بحر الشعب ..كان الجميع غاضب .. ظهرت حماسه مقاومه السويس للحصار فى عام 73 .. خبر استشهاد اثنين واختطاف فتاه الهب المدينه .. لم اشاهد هذه الحماسه ابدا منذ عودتى صغيرا الى السويس فى عام 75 وانا ابن 9 سنوات .. عدت مسرعا الى المنزل لاحضر تليفون ابنى لاصور الاحداث لجوده صوره ..وبعد عودتى قمت بتصور بعض المشاهد وتلقيت خبر اصابه عاملين معى ..واحدهما تم نقله الى مستشفى التأمين الصحى بحوض الدرس .انتقلت فورا الى المستشفى فمنعونا من الدخول بعد معرفتهم اننا اتينا لشاب من شباب المظاهرات ..وبعد جدال استمر طويلا تم طردنا الى الخارج الا اننا دخلنا بمعرفتنا الخاصه . وجدنا الشاب مصاب بخمس طلقات من الخرطوش فى رجله وكتفه من الخلف .. وللاسف الشديد امتنع الاطباء فى المستشفى عن عمل اى شىء له !!!!!! .. اننا نعرف انه فى الحروب يداوى الاطباء فى المعارك المصابيين من الاعداء عند اسرهم .. ونحن نعرف ان تجار المخدرات والقتله والخارجين على القانون يعالجون اذا اصيبوا اثناء اعتقالهم ..ولكن هنا ...لم يتم علاج المصاب الا فى اليوم التالى بحجه ان علاجه لا يتم الا بأمر النيابه !!!!! لا اعرف ان كان هذا هو القانون ام قانون الغاب .. وللاسف فى اليوم التالى ونظرا لتحرك الطلقات فى كتف الشاب ورجله تم اجراء جراحه استمرت 5 ساعات تم فيها تقطيع جسده للبحث عن الطلقات

فى اليوم التالى خرجنا للاخذ بالثأر ..اشتعلت السويس ..اشتعل ميدان الاربعين .. اشتعل شارع الجيش ..واشتعلت عيوننا وحلوقنا من القنابل المسيله للدموع .. ( اشهد لك ياشعب السويس البطل )

فى يوم الخميس تكرر الحال ( وللاسف تم احراق مبنى المطافى فى هذا اليوم )

جمعه الغضب ..بعض الصور هنا نظرا لكثافه الاعداد بطول الشارع ونظرا لكثره الاحداث ساستعين معى ببعض شاهدى العيان

كانت جمعه مختلفه ..كانت جمعه النهايه للدوله عندنا فى السويس ..تجمع رجال السويس كلها ..خرجت السويس عن بكره ابيها ..خرج شبابها ورجالها ..بعد الصلاه مباشره تلاقت الامواج امام قسم الاربعين ...هدرت العاصفه واذر الاسود ..واندفعنا الى الحريه فتهاوى امامنا كل شىء تهاوت القنابل المسيله للدموع وانهارت السيارات المصفحه وانهار قسم الاربعين ..انهار الظلم والفساد ..انهار منبع الجريمه لا مانعها ..انهار جنود الامن المركزى واسرعوا يختبئون فى المبانى المجاوره للقسم وتفرقت الاحداث

شاهد عيان :- فى برج الدوشى امام القسم قام شيخ كبير بحمايه مجموعه من فلول الامن المركزى وحث الناس على عدم التعرض لهم وكان الجنود فى حاله يرثى لها فتبرع بعض الشباب الثائرين الذين كانوا يتعقونهم بأحضار طعام لهم حتى ان حرامى ممن كانوا يسرقون المحلات كان يحمل كرتونه معلبات وعندما شاهد المنظر وقف واخرج من الكرتونه بعض المعلبات واعطاها للجنود ( لعل علماء النفس يتحيرون مثلى فى هذا الموقف )

شاهد عيان :- قمنا بحمايه ضابط مباحث الاربعين محمد صابر وانتشلناه من وسط المتظاهرين بعد ان قمنا بعمل كردون حوله لمنع المتظاهرين من الفتك به بعد ان تعاملوا معه بقسوه شديده

شاهد عيان :- تم انتقاء المخبر قنديل بالاسم من قبل المتظاهرين ( نظرا لما كان يقوم به من مصائب فى حق الناس حيث لم يفرق بين كبير وصغير ووصل به الحال الى ربط الناس فى دراجته وسحلهم فى الشوارع ) وتم الهجوم عليه من قبل المتظاهرين وكاد فعلا ان يموت .. بل ان البعض ظنه مات فتركوه

شاهد عيان من قوات الامن :- (هذا الشاهد مهم لانه من معسكر الامن ) لم ننام طوال 4 ايام . كان المتظاهرين بيجوا الظهر ويفضلوا يهدوا فينا للفجر وترجع تانى يوم الكره .قعدنا 4 ايام فى الشارع .اول 3 ايام كان معايا خوذه وصداده لكن يوم الجمعه سلمونى بندقيه ألى و3 خزنات رصاص (اثنان من اخوات هذا المجند كانوا مع المتظاهرين ) بعد ان انهزمنا اختبأت مع مجموعه من زملائى فى برج المبيع الجديد وخلعنا زى الامن المركزى وهربنا بالملابس الداخليه وبعض الناس اعطونا ثياب نهرب بها .وقمت بتسليم سلاحى الى قوات الامن فى شارع شل وهربت بجلدى

شاهد عيان :- 6 من ضباط المباحث فى قسم الاربعين والسويس وفيصل كنا نخبئهم فى منزل احد الضباط فى مدينه السلام لمده 3 ايام وكانوا يستعملون نورا التليفونات خوفا من ان يقوموا باشعال المصابيح فينكشفون

شاهد عيان :- قام الاهالى بحرق جميع معارض تاجر المخدرات صديق المحافظ المدعو ابراهيم فرج سواق التاكسى الذى اصبح من اثرياء السويس بالتجاره المحرمه وصداقه المحافظ الاكثر اجراما فى تاريخ السويس ( صاحب الكاس والنساء ) بعد ان قام بقتل بعض الشباب

شاهد عيان :- اعتلى اثنان من قوات الامن سطح القسم واخذا يقذفان الحجاره الكبيره على المتظاهرين ونجحوا فى ابعادهم لفتره ولكن احد الشباب استولى على السلاح القاذف للقنابل المسيله للدموع وكقناص ماهر من امام مبنى قصر الشوق اطلق عده قنابل على الفردين فنزلا من على سطح القسم ( انقلب الحال المتظاهرين يطلقون القنابل على الشرطه )

شاهد عيان :- اسرنا جنديين فاريين بجوار سينما مصر وكدنا نفتك بهم لولا بكاء احدهم وتوسله لنا ان نتركه فتركناه واوصلناه بعيدا عن المظاهرات

شاهد عيان :- رتبه كبيره فى القسم وربما يكون المأمور قام المتظاهرين باقتياده خارج القسم ونظرا لكبر سنه قال له المتظاهرون لن نضربك سنتركك ولكن بعد ان تخلع ملابسك العسكريه وبالفعل خلع البدله العسكريه فتركوه

واخيرا

واخيرا

واخيرا حرر شعب السويس المدينه من الاحتلال وهربت الشرطه

كاذب من يقول فى وسائل الاعلام من الضباط احنا كان معانا سلاح وكنا ممكن نقمع المظاهره ..كاذب والف كاذب لان شعب السويس الذى دحر اليهود بمدرعاته فى 73 كان قادرا ان يبيد هؤلاء الادعياء كلهم حتى ولو استعملوا كل اسلحتهم ولكن شعب السويس وخاصه بعض كبار السن وبعض العقلاء قاموا بمنع مجزره كامله لكل انواع الشرطه فى المدينه

تحيه وتقدير لكل اهلى فى المدينه الباسله

تحيه وتقدير لكل شعب مصر فى كل المحافظات

تحيه وتقدير لروح الشهداء

جلسه محاكمه العادلى

الحاجب :- القضيه رقم واحد المتهم حبيب ابراهيم العادلى

القاضى :- بسم الله الرحمن الرحيم فتحت الجلسه

سرور :- احمد فتحى مصطفى سرور دكتوراه فى القانون الجنائى جامعه القاهره 79سنه حاضر عن السيد الوزير

القاضى :- اسمها حاضر عن المتهم مفيش هنا وزير

سرور :- اممممممممممم حاضر عن المتهم

النيابه :- اطالب بتوقيع عقوبه الاعدام فى ميدان عام على المتهم نظير ما فعله من خيانه عظمى بحق مصر

سرور :- خيانه ايه وعظمى ايه . خلينا واقعيين وخلينا نتكلم بالعقل والقانون

القاضى :- ياريت يا استاذ تتكلم لما اسألك

سرور :- اصلا على رأى المرحوم كمال الشاذلى الله يرحمه محدش فاهم حاجه

القاضى :- اتفضل يا استاذ قول دفاعك

سرور :- بسم الله الرحمن الرحيم ( يا ايها الذين امنوا ان جاءكم فاسق بنبأ فتبينوا ان تصيبوا قوم بجهاله فتصبحوا على ما فعلتم نادمين ) صدق الله العظيم . سيدى القاضى حضرات المستشارين ان موكلى السيد حبيب العادلى اشهد له بروحى وبشرفى على ولاءه الشديد وحبه الكبير لمصرنا الحبيبه حفظها الله من كل شر واشهد على حرصه التام على كل فرد من شعب مصر العظيم .. سيدى القاضى . ان هؤلاء الشباب المفسدين فى الارض والذين عاثوا فى الارض فسادا يستحقون ان يهلكهم الله بل يستحقون اكثر من ذلك بكثير لانهم مرتدون نعم سيدى القاضى انهم مرتدون على الدين ووجب قتلهم . سيدى الرئيس ان التظاهر بدعه من بدع الغرب .. نعم ان التظاهر بدعه لم تكن موجوده ايام رسول الله صلى الله عليه وسلم كما ان ميدان التحرير لم يكن له وجود ايام رسول الله صلى الله عليه وسلم .. لذلك فانا اقول لسيادتكم ان هؤلاء الشباب المفسدين فى الارض قد قاموا ببدعه وكل بدعه ضلاله وكل ضلاله فى النار ولذلك احق عليهم حكم الرده . وبناء عليه يصبح موكلى السيد حبيب ابراهيم العادلى برىء من ذنبهم براءه الذئب من دم ابن يعقوب ... كما انه قام بمحاربه المرتدين كما حاربهم سيدنا ابو بكر الصديق رضى الله عنه لذلك اقترح من عدالتكم ان نطلق عليه لقب سادس الخلفاء الراشدين

النيابه :- انهم شباب اطهار ابرياء ضحوا بأنفسم فى سبيل الحريه فاطلق عليهم المتهم زبانيته ليقتلوهم ويحرقوهم ويفزعوا اطفالهم ونسائهم .. هذا المتهم هو المسئول الاول عن قتل زهره شباب مصر هو المسئول الاول عن دخول البلطجيه بالخيول والجمال فيما يسمى بموقعه الجمل

سرور :- سيدى القاضى . النيابه تحاول خلط الاوراق فكما هو معروف تاريخيا ان موقعه الجمل كانت ايام الخليفه الرابع على بن ابى طالب كرم الله وجهه بعد مقتل سيدنا عثمان بن عفان . وعليه لايمكن ان تنتسب موقعه الجمل الى زماننا هذا وبناء عليه اطالب بشطب القضيه وتوجيه الشكر الى الرجل العظيم حامى الدين والوطن السيد حبيب العادلى

النيابه :- سيدى الرئيس حضرات المستشارين انا لا افهم ما يقوله الشيخ سرور ولكنى افهم شىء واحدا . دماء الشهداء . واموال المصريين .. سيدى الرئيس لنقل ان مرتب العادلى مليون جنيه شهريا اى ان مرتبه 12 مليون جنيه ولنقل ان المتهم تقاضى مرتبه فور مولده اى انه تقاضى مليون جنيه شهريا منذ بدايه ولادته وبما ان عمره 73 سنه يصبح مجموع مرتبه 876 مليون جنيه وبأضافه الحوافز وبدل عمل نقول الاجمالى مليار جنيه منذ مولده الى الان .... ان ثروه المتهم الان 8 مليار جنيه من اين لك هذا ؟؟؟؟؟؟؟؟؟؟؟؟

سرور :- ياجماعه ياريت نفهم احنا بنقول ايه .. وبلاش نرمى الناس الابرياء بالتهم الجزافيه ..ان موكلى حاصل على نوط الامتياز من رئيس الجمهوريه عام 86 و97 وهذا النوط هو تجاره رابحه تدر الكثير من الربح الحلال خالصا لوجه الله لذلك ارجو ان نكون واقعيين ولا نرمى الحق بالباطل حتى لايضيع الحق بيننا

الرايق :- نو نو نو وى ار دونت يضحك علينا اجيين ايون احنا مش هينضحك علينا تانى

القاضى :- انت مين ؟؟؟؟؟ ومين اذنك تتكلم ؟؟؟؟

الرايق :- اوه ماى فرند القاضى .. انا صوت ضايع من زمااان .. يييس ورحمه ابويا يييس انا صوت ضايع من زمان .. الاستاذ سرور ده رأس الحراميه هو مطبخ القوانين هو اللى ضييع مصر هو اللى رجعنا وراء سيدى القاضى اطالب بمحاكمه فتحى سرور وصفوت الشريف وزكريا عزمى .. ماى فرند القاضى وى ار لازم نمسك رأس الحيه مبارك وجمال وعلاء وسرور والشريف وعزمى مع كبش الفداء احمد العز .. ماى فرند القاضى لازم نسابق الزمن ..ماى فرند القاضى لو كنت موجود عندنا فى السويس يوم التلات والاربع والخميس والجمعه كنت هتسمع بودانك شباب السويس وهو بيقول احنا طلعنا اليهود مش هنقدر نطلع ولاد الكلب دول .. والله العظيم سمعتها بودانى وانا فى وسط المظاهره قبل ما يرموا جنبى اكتر من قنبله من قنابلهم المسمومه اقسم بالله انى بقيت زى الغريق فى وسط البحر نااااااااااااااااااااااااااار وشطه فى وجههى وفى حلقى وفى عينى سيل من الدموع ... ماى فرند القاضى سرع ..وحياه يوور فاذر سرع .. دول بيرتبوا ازاى يهربوا بفلوسنا ويمحوا جرايمهم

وعلى رأى المثل

عبده الرايق :- ما تروحى يا بت يا حنين تستلفى لنا من جارتنا ام شوشو دكر بط نعمل بيه الموسم

حنين:- لا يا بابا مش رايحة (دى مفيش حاجة تيجى من الغرب تسر القلب)

وبعدين ما تفك عن كيسك يا بابا وتنزل تجيب لنا فرخة بيضة ولا حتى لحمة من بتاعة القوات المسلحة دول بيقولوا الكيلو فيها ب35 جنية بس

عبده الرايق:- كل ده علشان جبت لكم ربع كيلو بسبوسة الشهر اللى فات صحيح (المال السايب يعلم السرقة)
واد يا خالد يا خالد تعالى انت يا ضنايا روح لخالتك ام شوشو استلف لنا منها دكر البط وانا هجيب لك شبشب بصابع هدية فى عيد رأس السنة القمرية

خالد:- لا يا عم السنة اللى فاتت قلت لى هتجيب لى كرة بنج بونج علشان اعملها سندوتش مجبتش لا يا عم( يا نحلة لا تقرصينى ولا عاوز عسل منك)

يعنى اعمل ايه ابعت امكم ولا ابعت مين

شوف صبرنى نايمة جوه بقالها 3 ايام وابنك التانى مش عارف مش باين فى الشقة قال يعنى الشقة كبيرة اوى شوفه مرمى فى اى جحر
الرايق :- صحيح ما هو (ما ضيق الزريبة إلا على الحمارة الغريبة)

فرنسا من بعيد :- اعااااااا اعااااااا بنقول على مين حمارة يا رجل انت دا انت وولادك ينفات لكم بلاد
يا ستى انا لا شتمت ولا يحزنون صحيح (ياما فى الحبس مظاليم)
وبعدين هو محدش راضى يروح يستلف ليه من الجيران دكر البط

فرنسا :- عيال حسيسة عندهم دم مش زى ناس (واللى يعمل يا خويا ضهرة صندرة يستحمل بقى الدوس) والله خايفة ولادك تتشرب منك وتبقى (فولة واتقسمت نصين) هو انتم بيحوء فيكم حاجة صحيح (جوه وبرة فرشت لك وانت يا مايل و مين يعدلك)

الرايق :- هتفضلى تردحى لى كثير كدة بدل ما تشمللى وتروحى تجيبى دكر البط صحيح قلة الاصل متوفرة (خد الاصيلة لو على حصيرة)

فرنسا : شوفوا الراجل العايب اقوله ايه يقول لى ايه يعنى هو احنا لما مش عاوزين نشحت من حد يبقى كدة اجرمنا
(غلبت احايل فيك والطبع فيك غالب وديل الكلب عمرة ما يتعدل لو علقوا فية قالب)

الرايق :- انتوا فاكرين انى بشحت علشان مش معايا نو نيفر بت انا بعتبرة فن الشحاتة فن ومحتاج دراسة وقدرة على الاقناع وهتشوفوا هنجيب الدكر ده ولا لا واللى فى طبع صعب يبطله (يموت الزمار يا فرنسا و سنانة بتلعب قصدى صوابعة بتلعب)

الطائر :- ايه الدوشة دى صوتكم جايب لفوق سطوح الجيران
فرنسا :- ابوك عاوز يستلف من الجيران بط
الطائر : اللى اعرفة من ايام زمان اللى بيستلف حاجة بيرجعها وانت هترجع بقى دكر البط ايه عظم فى قفة (على اد لحافك مد رجليك يا والدى)

الرايق :- نقطنا بسكاتك يا خويا انت ايه اللى نزلك من السطوح ولا اقول لك روحى صحى لى اختك صبرنى (الطائر بصوت واطى مقدرش على الحمار هيتشطر على البردعة)
الطائر :- صبرنى صبرنى قومى قومى ابوكى عاوزك
صبرنى :- هو الواحد ميعرفش يرتاح فى البيت ده شوية دا انتم عيلة (ينفات لكم بلاد) ايوة يا بابى
الرايق:- تعالى يا حبيبتى انتى اللى بجيب لك كل حاجة وانت اللى هتسمعى كلامى
صبرنى:- انت بتقول الكلام ده ليا انا انت بتجيب لى انا (صبرنى فى سرها افتكر لك ايه يا بصلة غير كل قطمة بدمعة)
الرايق :- شوفى يا صبرنى لو استلفتى لنا دكر البط من عند الجيران هجيب لك الصندل اللى بيزمر اللى كان نفسك فيه لما اخذتى الابتدائية من 15 سنة (صبرنى فى صوت مسموع شوية عشمنى بالحلق خرمت انا ودانى)

صبرنى:- قالت طيب انا هروح بس علشان تعرفوا انى مش بخاف من حد
سابت الباب مفتوح وراها وخبطت على طنطها ام شوشو وقالت لها
بكل ادب واحترام وذوق ممكن يا طنط دكر بط سلف لحد ما بابا يقبض مكافاة خروجة على المعاش
ام شوشو وبنتها بيضحكوا ضحكة خبيثة وقالوا ومالوا يا حبيبتى وكمان معاها الحلة اللى هتسوه فيها

ورجعت صبرنى بكل ظفر و انتصار فستحظى بصندل هيزمر بعد صبر 15 سنة وقالت فى زهو المنتصر (ما يجيبها الا رجالها)

الرايق بخبث :- شفتم وسائل الاقناع هو ده اللى عاوزكم تتعلموا وصحيح (اللى يتكسف من بنت عمه ما يتستلفش منها ريال)

يلا خدى يا ماى وايف يا حبيبتى اعملى لنا دكر البط ده
فرنسا : هقوم اعملة مع انى عارفة (مهما عملت مش عاجب وان رضيت العين يغضب الحاجب)
وشمرت عن ساعد الجد و ضغطت على سنانها ونتعت الحلة بالبطة ودخلت على المطبخ
خرطت البصل وجهزت التوابل اللى راكناها ايوة كدة يا بت يا فرنسا وريهم نفسك فتحت الحلة وبعدين راحت رئعة ميت صوت حيانى
هرع الكل لها
هى دى البطة يا فالح انت وعيالك
دى البطة موقوذة ومتردية ونطيحة وكمان اكلها السبع تقرب وتشم دى كما ميتة ومنتنة
و انا اقول الوليه ام شوشو الناقصة دى على غير عادتها اديتكم البطة بالساهل
(ما هو لو مكنش فيه الخير مكنش رماه الطير) و (الحاجة اللى ماتهمك وصى عليها جوز أمك)

الرايق مذهوق وأسقط فى يدة
(جوعة علي جوعة بقت الصبية زعزوعة)

فرنسا : (هو كدة المنحوس منحوس ولو علقوا على رأسة فانوس)
خالد:( جت الحزينة تفرح ملقتلهاش مطرح)
صبرنى : هقوم اعمل جبنة قديمة ومش (جبنتك القديمة تغنيك عن اكل الحمير قصدى حمارتك العارجة تغنيك عن سؤال اللئيم)

الطائر : هقول لكم حاجة وقولوا ورايا
(يادي الشيلة يادي الحطة روحنا علي جمل ورجعنا علي قطة)
القوم من وراه
يادي الشيلة يادي الحطة روحنا علي جمل ورجعنا علي قطة
يادي الشيلة يادي الحطة روحنا علي جمل ورجعنا علي قطة

كل سنة وانت رايق .. يا رايق

اليوم 11-4 -2010

عيد ميلاد اخونا وحبيبنا عبده باشا الرايق سليل عائلة الرايق الفرعونية الاغريقية الكوالامبورية 

ويعتبر9عبده الرايق الحفيد رقم 16180 فى عائلة الرايق فجده الاكبر احمس الرايق موحد القطرين وبانى الاهرامات وجده الرايق الاصغر بانى مصر الحديثة والقائم بشئونها الروقانية

لذا ننهتز هذه الفرصة العظيمة 
ونتقدم له بخالص التهانى 
بمناسبة عيد الميلاد الذهبى 

كل سنة وانت طيب

وعقبال مليون سنة

تورتة بمناسبة عيد الميلاد

تورتة مخصوص علشان الرايق واحفاده 

تورتة علشان المدونين والمدونات

وطبعا انا اخدت نصيبى مقدما

طبعا الرايق لا يقبل الهدايا النقدية اوالعينية

ومتبرع بيها وبمصروفه اليومى لابنائه الغلابة حنين القلب وخالد 

دمت لنا زخرا يا رايق 

ويا ريت كل يوم تعمل عيد ميلاد

وكل سنة وانت طيب 

حنين القلب - همس الاحباب

مبروووووووك حنين القلب

الف الف الف مليون مبروك ابنتى الغاليه حنين القلب على المولود الجديد
مبروك علينا كلنا اصغر عضو فى عائله الرايق

****** الاستاذ الكبير\ عمر اشرف ******

على فكره يا حنين اسراء راسها والف برطوشه انها لازم تكلم النونو وتشيله
احاول اقنعها ان النونو فى الاسكندريه واحنا هنا فى السويس ولكن هى مش فاهمه حاجه
احاول اقنعها ان الاسكندريه محافظه والسويس محافظه تانيه خالص وان عدد محافظات مصر حوالى 16 محافظه بعد انضمام المحافظتان الجديدتان اكتوبر وحلوان
وان الجمهوريه تنقسم جغرافيا الى عده محافظات ونجوع وكفور
وان المسافه بين السويس والاسكندريه اكتر من 14 ساعه وحوالى 850 كليو متر
وان الثوار فى سنه 1919 قاموا بكسر خطوط السكك الحديديه التى تربط بين المحافظات وبعضها
لكن هى مش قادره تفهم كلامى نهائى
ومصممه انها تروح بكره الاسكندريه
اقولها يا اسراء انتى كبرتى دلوقتى وعندك 4 سنين ونصف يعنى مفروض تكونى فاهمه التضاريس الجغرافيه للوطن العربى وطبيعه عوامله وتقسيماته الاستعماريه وما قبل الاستعماريه والانشقاقات الداخليه التى اثرت تأثرا مباشرا على الحدود الدوليه
الا اننى كمن ينادى فى مالطه
وهى اكيد فاهمه بس بتستهبل
عموما
الف الف الف الف مليار مبروك مره تانيه

انا بحمل الشركه المسئوليه

تحديث على السريع كده

انتهت منذ لحظات مباره مصر ونيجيريا بفوز مصر 3 -1 مبروك لكل المصريين

*****************

محدثكم الفقير الى الله عبده باشا الرايق
من هنا
ومن على كرسى الكمبيوتر الخاص بى وامام كل وكالات الانباء البحريه والقبليه ..الفرعيه منها والرئسيه
ومن منطلق الاتفاق العالمى لحقوق الانسان الذى تم انعقاده فى قهوه كمونه مقر اقامه العبد لله الليليه
اتشرف انا عبده باشا الرايق ان القى لحضراتكم خطابى الهام جدا جدا فيرى اندى فيرى فيرى امبورتنت
بسم الله
وبسم الشعب
مضت على امه الضاحكون اياما عجاف من الاضطهاد والتمييز الغير مسبوق والمنقطع النظير من الشركه المسئوله عن توصيل النت للعبد لله
خمسه شهور متتاليه والعبد لله يدفع فلوس النت للشركه التى كنت لا اعرف حتى اسمها
ولا حتى اسم الموزع المتعاقد معى
كل ما اعرفه هو محل الكمبيوتر الذى اتعامل معه
كل شهر يا ولداه اروح كده زى الباشا ادفع ال 95 جنيه وصاحبنا بتاع الكمبيوتر يحلف برحمه كل الميتين على مستوى محافظه السويس ابتداء من عجرود الى بورتوفيق ان النت هيجى عندى بعد يومين
وانا استنى اليومين
واستنى
واستنى
واتارى اليومين مالهومش ايند نيفر نيفر نيفر
وانا زى الجدع كده ارجع للمحل .. والمحل يرجع يحلف برحمه الميتين والحيين ان النت هيجى
ان ذا لاست بعبقريتى الفذه وبعد ايام طويله عرفت اسم الشركه واسم الموزع
واتصلت بالشركه
وقالوا الخط شغال والنت شغال عندك وان هندريد بريزينت
روحت للمحل قالى العيب اكيد من وصله التليفون بتاعتك
جبت اخصائى تليفونات

وكعيت كشف مستعجل 40 جند كل جند ينطح جند
ولف السبع لفات على كل الاسلاك وكتب روشته ان الاسلاك سليمه والعيب مش فى التليفون
سافرت وروحت وجيت والحال على ما هو عليه
اتصل بيا اخويا الجريت مان خالد همس الاحباب وشرحت له القصه قالى اكيد العيب فى الجاك الواصل للجهاز
وفرحت جدا بأعراب خالد للجمله
ولكن الحال على ما هو عليه
ولان العبد لله اصلع فلم اتمكن من شد شعرى مما اضاف لحالتى النفسيه سوء بعد سوء
قلت فى بالى طيب العيال مخليفنها ليه ؟؟؟ بالطبع لازم ينفعوا ابوهم وقت الزنقه
وفعلا قعدت اشد فى شعر العيال لغايه لما ارتحت وهديت اعصابى وده عاد عليا بمنفعه ماديه كبيره وهى ان العيال مارحوش للحلاق طوال الفتره اللى فاتت
اما انا بقى كنت منتظم جدا والله فى دفع الفلوس
مش عارف ليه !!!!!!!!!!!!!!!
يمكن اكون خايف انى مدفعشى يقوموا يفصلوا النت عنى
زى الفنان عادل امام لما دفع الفاتوره وهو مش عنده تليفون اصلا
او يمكن كانوا كل مره يسجدونى ويقولوا والله والمصحف النت هيرجع بعد يومين تلاته بس فى حاجه عندك
عملت ويندوز 3 مرات يمكن يكون العيب فى الويندوز
غيرت كارت الفاكس
رشيت على الجهاز ملح وبخرته يوم الجمعه وقت الصلاه
دبحت للجهاز ارنب ..قلت اهى حاجه باربع رجول تسد الغرض
خليت ابن اخت مراتى بيبى رضيع يلعب فى زراير الجهاز يمكن يفك النحس
غيرت جهاز الروتر
غيرت الكرسى اللى بقعد عليه وانا قاعد على الجهاز
غيرت مكان الجهاز وجبته فى الصاله رغم تعرضى الدائم والمستمر للحك كانى قاعد فى اتوبيس بسبب ضيق المكان
اخر حل وصلت له انى اشترك فى تليفون جديد واشترك فى وصله جديده من الشركه بدون موزع ولا محل كمبيوتر ولا غيره
وفكرت انى اشترى جهاز كمبيوتر جديد
والغريب ان الكل
الشركه
والموزع
وصاحب محل الكمبيوتر
الكل اجمع ان النت شغال عندى عشره على عشره
طيب العيب فين ؟؟؟؟؟؟
الله اعلم
انهارده بس
كنت فى الحمام وابنى كان قاعد على الجهاز بيلعب
عادى يعنى بتحصل فى احسن الجهازات
الاقى الولد دخل على النت وعمنا جوجل مشرف الجهاز
الولد قالى بابا النت جه
خرجت من الحمام الاقى النت شغال وتمام التمام
سؤال حلقه اليوم
العيب كان فين ؟؟؟؟؟؟؟؟؟
1 - العيب من الشركه والموزع وبتاع المحل
2 - العيب فى جهازى انا اصلا والحمد لله اتعالج لوحده
3 - العيب من زعل عمنا جوجل باشا كعب الغزال منى
4 - العيب من عدم دخولى للحمام طوال ال 5 شهور الماضيه
اللى يعرف الحل يبعت على تليفون الضاحكون والاجر والثواب على الله

فى نهايه خطابى

اتوجه بالشكر الكبير لكل من سئل عنى فى فتره غيابى وكل من ارسل لى اميل

وكل من حدثنى تليفونيا اخى الكريم خالد واخى الكبير ابو خالد واخى الكريم الطائر الحزين وبنتى الكتكوته حنين القلب وبقولك اسراء بتسلم عليكى يا نونه

المسحراتى .. وكحك العيد

همس الاحباب وحنين القلب: اعزائى مشاهدى قناة الضاحكون يسعد مساكم بكل خير وكل عام وانتم بخير بمناسبة انتهاء عيد الفطر المبارك وقدوم عيد الروقان والضاحكون
ونظرا لان الضاحكون قضوا العيد فى بهجة وسرور بمناسبة خروج الرايق من معتقله بكفالة كبيرة عبارة عن إتنين قرص عجوة ونص كيلو كحك من غير عجوة
فيسعدنا ان ننقل لكم على الهواء مباشرة أحداث اول ايام عيد الضاحكون
منظر داخلى على الشقه وكل واحد وواحدة من العيله بيجهز نفسه للعيد
عبده الرايق : هااااى افرى بدى ... اصحوا يا بيبول كبروا مع الناس اللى عماله تكبر ويلا علشان تصلوا صلاة عيد الاضحى .
همس الاحباب : كل سنة وانت طيب يا روقة وبعدين هى الحبسة اثرت على الة الزمن عندك النهاردة عيد الفطر مش الاضحى يا روقة .
عبده الرايق : أضحى ولا فطر كله عيد وكلها صلاة يا سقراط عصرك ، بت يا حنين كويتى القفطان بتاعى الجديد .
حنين القلب :جديد ايه يا حسرة دى كل رقعه فيه تسد عين الشمس انت هتصلى بيه ده يا بابتى ولا هتشحت بيه ؟؟
همس الاحباب : لا هيلم الكحك والبسكويت .. سيبك منه يا نونه كويتى البدله بتاعتى وجهزتى الجزمة اللميع ؟؟
حنين القلب : يا خرابى بدلة تصدق بالله دى البيجامه أنضف منها فيه بدله لونها فوشيا والقميص ازرق والبنطلون اخضر انت مجمعها من الصين ؟؟ !!!
همس الاحباب : دى تايوانى يا جاهلة والصين خدوها ولبسوها للمفتش كرومبو ..
فرنسا هانم : بت يا صبرنى روحى هاتى الصاجات بتاعت الكحك من الفرن واوعى تلبسى هدومك الجديده .
صبرنى يا رب : بت يا صبرني ؟؟ عيب عيب والله . العيله دي مش عارفه قيمتي . طب ايه رايك مش قاااااايمه قومي الست حنين تروح هى بدل ماهى قاعده كده.مش شاطره غير تولع لنا فى هدومنا بس .

حنين القلب : يا سلام يا اختى مش عاجبك مكوتى مش كفاية شغالة فلبينية ليكم من اول رمضان .

صبرني يارب : فلبنيه؟؟؟ ولا تحصليها اصلا .
همس الاحباب : بصى يا نونا يا شعنونة انتى اختى ومحدش عارف بقيمتك غيرى بقولك ايه هى فلوس العيدية بتاعتك فيين ؟؟؟!! احسن سامع ان الرايق ناوى يأمم كل العيديات
حنين القلب :نعم نعم يأمم ايه هو انا عبيطة متخافش انا شايلاهم فى مكان ما يخطرش على بال بشر جوه مرتبة السرير .
همس الاحباب : جوه مرتبة السرير .. برافو عليكى كده فعلا مش هتتأمم كده ممكن تتصادر
الطائر الحزين : بت يا حنين غسلتى شرابى ولا لسه ؟؟
حنين القلب : اه يا خويا وجالى ضيق نفس وروحت المستشفى اخدت نفس صناعى وكلوكوز ربنا يخليك يا طائر ابقى غيره كل شهرين مش لازم يكمل السنه معاك كامله
همس الاحباب : ليه انتى مش شايفاه بيلبس الشراب فوق الجزمة لحمايتها من عوامل الجو
عبده الرايق: يلا يا بشر علشان تلحقوا الصلاة .
همس الاحباب : روح انت يا عم ومش ليك دعوة بيه انا رايح اقعد مع اصحابى على القهوة احنا متعودين نسهر مع بعض يوم الوقفه ونخرج الصبح بدرى
صبرنى يا رب: روحوا انتوا انا عايزة انام انا مش نمت من امبارح ما بطلتش شغل فى البيت والتنضيف والكحك سبوني فى حالي بقى .
فرنسا هانم : روحوا انتوا وانا هجهز ليكم الفطار
همس الاحباب : اه والنبى يا فرنسا عايزين فتة وفخدة ضانى احسن طالعين من رمضان هفتانين بلاش الكحك واللبن بتاع الاطفال الرضع وانت يا طائر مش رايح تصلى ؟؟!!!
الطائر الحزين : سبونى فى حالى انا رايح اخترع جهاز احط فيه الجنيه من ناحيه يطلع من الناحيه التانيه ورقه بمتين جنيه .
عبده الرايق :ايفرى بدى .. براحتكم وانتى يا بت حنين ؟؟
حنين القلب : انا معاك يا بابتى احنا مش متفقين من امبارح ننزل بدرى علشان نلم العديه والكحك والبسكويت من الناس اللى كنا بنصحيهم يتسحروا طول رمضان ولا انت غيرت رايك وهنروح نصلى ؟؟
عبده الرايق: نونو نو احنا نروح نلم العديه ولوعلى الصلاه نبقى نصلى الظهر فى الجامع
همس الاحباب : مسحراتى يا رايق انت وحنين...!! وكل ما اسئلكم رايحين فين تقولوا رايحين نعتكف..ومن اول رمضان مقضيناها اعتكاف اصحى يا نايم وحد الدايم .. رمضان كريم

عيله تجنن ...قسم شرطه قطاع خاص

عبده الرايق .... والان موعدنا مع حلقه جديده من حلقات عيله تجنن وحلقه اليوم بعنوان ( قسم شرطه قطاع خاص )
******
الرايق :- هااااااااى ايفرى بدى ... هاااااااى بالجمله علشان انا مستعجل .. بسرعه يلا يا اولاد لموا العفش بتاعكم علشان هنعزل ونسيب الشقه دلوقتى
فرنسا هانم :- نسيب ايه يا رايق ؟؟؟ انت اتجننت ولا ايه ؟؟ وهنروح فين ان شاء الله ؟؟
الرايق :- انا عامل حسابى على كل حاجه واجرت شاليه فى العين السخنه .. منها نسكن ومنها نبلبط فى الميه
الطائر الحزين :- طيب وهنسيب الشقه ليه يا رايق ؟؟؟
الرايق :- انا عندى مشروع العمر .. هنكسب دهب وهنلعب بالفلوس لعب
همس الاحباب :- لا معلشى يا رايق انا مش مشترك معاكم فى المشروع ده
الرايق :- وااااات ؟؟؟؟ يو دونت مشترك ؟؟؟ احنا هنعمل جمعيه ؟؟؟ يلا كله يقوم يلم عزاله
صبرنى يارب :- فى ايه بس يابابا ؟؟ ارحمنا بقى يا روووقه .. انا خلالالالالالالالاص جانى ضيق تنفس من مشاريعك
الرايق :- المشروع المره دى فووول اوبشن .. يلا يا ولاد ... يا ولاد ..انتم يا بشر ... يو دونت سبيك وز مى ؟؟؟ ولد يا طائر مش عايز تتكلم ليه ؟؟
الطائر الحزين :- لا ابدا يا رايق .. اصل حواجبى بتوجعنى ومش هاقدر اتكلم معاك
الرايق :- وانت يا همس الاحباب ؟؟؟
همس الاحباب :- لا ابدا يا رايق ..اصلى لسه حالق دقنى ومش هاقدر اتكلم معاك
الرايق :- وانتى يا فرنسا هانم كعب الغزال
فرنسا هانم :- وانا شارحه لسه حالقه دقنى مع خالد ومش هاقدر اتكلم معاك
الرايق :- ماشى يا فرنسيس .. وانتى يا صبرنى يارب
صبرنى يا رب :- معلشى بقى يا روووقه اصلى باكل لبانه تشيكلتس بالموز . والدكتور محرج عليا ماتكلمشى باللبانه
الرايق :- ماشى يا بشر ... وانتى يا حنين القلب
حنين القلب :- انا معاك يا بابا وكلى ودان صاغيه ..مالكشى دعوه بالبشر دول انا بس اللى مقدره مواهبك .. ايه بقى المشروع يا رووقه
الرايق :- انا فعلا مخلفتش الا حنين القلب .. بصى يا نونه .. بصوا يا بيبول كلكم ..انا نويت اعمل الشقه دى قسم شرطه قطاع خاص
الطائر الحزين :- نعم نعم نعم ... قسم شرطه ايييييييييييييييييه ؟؟؟؟
الرايق :- ايه بالراحه على حواجبك شويه لتوجعك يا طائر ... اشمعنى دلوقتى بتزعق ...بقولك قسم شرطه قطاع خاص
فرنسا هانم :- وانا كنت عملت ايه فى دنيتى ياااااااااااااااما ... يالهوووووووووووووووووووووى
الرايق :- بطلى صويت يا فرنسا لحسن دقنك يوجعك ...ايه يا قوم مش عاجبكم قسم شرطه قطاع خاص ؟؟؟ مش دلوقتى فى قنوات بالهبل قطاع خاص ؟؟ وكل واحد مسمى قناته براحته ؟؟ يعنى مثلا عندكم قناه حنبعل بتاعه تونس ... فى قناه فى الدنيا اسمها حنبعل
حنين القلب :- انا عن نفسى قعدت شهرين علشان اعرف اسم القناه دى ... يعنى ايه حنبعل يا بابا ؟؟؟؟؟
الرايق :- سؤال وجيه يا نونه ... بصى يا بنتى .. انا سألت العلامه الجهبز الاستاذ حسن باشا الفراش عن اسم قناه حنبعل ... قام رمى المقشه على يمينه والجردل على شماله وقالى ..قناه حنبعل اسمها على اسم الاستاذ حنا جوز بنت صاحب القناه .. وجوز يعنى بعل ..راحوا قالوا قناه الاستاذ حنا بعل بنت صاحب القناه ..وبعدين اختصروا الاسم ل حنبعل
الطائر الحزين :- منك ومن الفيلسوف حسن باشا الفراش نستفيد يا رايق ... قناه حنبعل اسمها على اسم القائد التونسى العظيم حنبعل امير قرطاج اللى عبر جبال الالب علشان يحارب الرومان فى قلب روما
الرايق :- يااااااااااااا سلام !!!!!!!! ايش فهمك انت يا طائر ؟؟؟ بقى اصدقك انت واكذب العلامه حسن باشا الفراش ... نو نو نو
همس الاحباب :- يعنى دلوقتى عايز ايه يا رايق ؟؟؟
الرايق :- انا خلاص كلمت حسنين الرايق ابن عمى فى البلد علشان يبعت لى من هناك كام راجل زى ضلفه الباب ... ودول هيبقوا امناء الشرطه بتوعنا وهنعمل القسم هنا وناخد غرامات وكفالات وكله بالدورر
فرنسا هانم :- وانا معاك فى مشروعك يا رايق ... بس عندى سؤال
الرايق :- ايوه كده يا روح الرايق اسئلى
فرنسا هانم :- مش كل قسم لازم يكون فيه زنزانه ؟؟؟؟ فين بقى الزنزانه ؟؟؟
الرايق :- ههههههههه ودى هتفوتنى برضه يا فرنسا .. الاوضه بتاعه البنات ليها قفل ورزه .. وهى دى الزنزانه
فرنسا هانم :- بس دى ممكن المساجين يهربوا منها
الرايق :- نو نو نو ... انا محضر لها قفل مستورد .. وكمان الرزه بتاعتها من النوع الحديدى فووول اوبشن
فرنسا هانم :- خلاص يا رايق بس علشان يطمئن قلبى على المشروع ادخل جوه الاوضه ونجرب نقفل عليك ونشوف يمكن تقدر تطلع
الرايق :- عظيمه يا فرنسا ... انا هادخل الاوضه وادى القفل اهو اقفلوا عليا
فرنسا هانم :- ايوه كده يا روووقه عظيييييييييييييم خليك بقى جوه الزنزانه
الرايق :- نو نو نو ... فرنساااااااااا .. ولد يا خالد .. ولد يا طائر ..بنت يا حنين .. بنت يا صبرنى يا رب ... يا ناس ..يا خلق ... انا مظلوووووووووووم
***************
وهكذا ايها الاخوه والاخوات زوار مدونه الضاحكون تم حبس الرايق فى الزنزانه التى اختارها بنفسه الى ما بعد رمضان حتى تستطيع اسره الضاحكون ان تقضى ايام شهر رمضان المبارك بدون مشاكل وقلق الرايق
وكل عام وانتم بخير

.
والى لقاء جديد بعد الشهر الفضيل

عيله تجنن .. عقد احتراف

والان اعزائى مشاهدى قناه الضاحكون الفدائيه موعدكم مع مسلسل عيله تجنن .. وحلقه بعنوان ( عقد احتراف )
*********
حنين القلب :- بابا ...يابابا ...بابا ..اصحى يا رايق .. اصحى وبلاش نوم المغارب ده
الرايق :- خير اللهم اجعله خير ... فى ايه يا مقصوفه الرقبه انتى ؟؟؟ ايه الغاغه اللى انتى عملاها دى ؟؟ وات هابن ؟
حنين القلب :- فى اتنين عايزينك بره وبيقولوا انهم جايين يكتبوا معاك عقد ؟؟؟؟
الرايق :- عقد ؟؟؟؟ جايين منين دول ؟؟؟
حنين القلب :- بيقولوا حاجه زى سيتى ولا ستتى مش عارفه بقى .
الرايق :- اااااااااااااه ... اكيد بتوع فريق سيلتك اللى هبد الاهلى بالخمسه ... واكيد سمعوا من الولد حسن الفراش بمواهبتى الفذه فى كره القدم وجايين يتعاقدوا معايا ... اسمعى يا بت يا حنين .. حد من اخواتك ولا فرنسا هنا ؟؟؟
حنين القلب :- مفيش غيره اللى متلقح بره قدام التليفزيون من 3 ايام
الرايق :- خااااااااااااااااااالد ... هو لسه قاعد مستنى المذيعه لما تنام ويتفرج عليها ...عموما بصى ..معاكى رصيد فى تليفونك ؟؟؟
حنين القلب :- ايوه معايا 42 جنيه ...لييييييييييييييه ؟؟؟؟؟
الرايق :- اسمعى ..روحى قدمى للضيوف حاجه ساقعه ..وادخلى اوضتك واول ما تسمعينى اكح ..اطلبى نمره البيت واستنى لغايه لما افتح عليكى وانا هاجيبلك عشر كروت من ابو 100 جند اول ما امضى العقد طوالى
حنين القلب :- حاضر يا بابا ..انا طول عمرى بشجع مواهبك وبقول عليك ان نجمك لازم يسطع .. انت الامل والمنى يا رووقه ... بس انا عمرى ما شفتك بتلعب كوره ابدا ابدا يا بابا
الرايق :- روحى يا غلاباويه انتى وبلاش لكاعه ... واوعى تنسى ..اول ما اكح تتصلى بنمره البيت فاهمه ؟؟؟ وانا هالبس الملابس الرياضيه بتاعتى واخرج اقابلهم
***********
فى الصاله
********
الرايق :- هااااااااااااااااى باااااااااااااى شاااااااااااو ... يو سبيك انجليزى ؟؟ ولا يو سبيك فرنساوى ؟؟؟
ضيف 1 :- اهلا بيك يا فندم احنا بنتكلم عربى
همس الاحباب :- ايييييييييييييييه ده يا رايق ؟؟؟؟ ايه اللى انت لابسه ده ؟؟؟؟ لباس صعيدى ابيض وفانله بيضاء بحمالات ؟؟؟؟
الرايق :- ومنزلتش تحت ليه يا فالح علشان تشوف الكوتشى ؟؟ ..معلشى يا جماعه اصلى لسه جاى من التدريب وانا بحب اتدرب كده
ضيف 2 :- ولا يهمك يا فندم انت فى بيتك وبراحتك
الرايق :- كح كح كح كح
جرس تليفون البيت يرن ترررررررن تررررررررررررن تررررررررررن
الرايق :- يوووووووووووه ده ترنك ..اكيد من ايطاليا اصلى فريق برشلونه بيجرى ورايه من اسبوعين .... الووو ..ايوه انا الرايق .. مندوب برشلونه ؟؟ اهلا وسهلا ... نو نو نو ..متحاولشى ..بتقول كام ؟؟ 70 مليوم رورو ..نو نو نو ...انا مش هاوافق باقل من 100 مليوم جند مصرى ..وفكروا وانا منتظر
همس الاحباب :- ممكن كلمه على جنب لو سمحت يا بابا
الرايق :- تعالى يا همس ..خير فى ايه ؟؟
همس الاحباب :- ايه اللى انت لابسه ده قدام الناس ؟؟ حرام عليك فضحتنا ..وايه حكايه برشلونه الايطالى ده كمان ... انا طول عمرى اعرف انه اسبانى .. واليورو اللى مش عاجب سيادتك بالشىء الفلانى يا رووقه ...على كل حال ..بلاش عمايلك السوداء ارجوك يا رايق ..انا فى نص هدومى
الرايق :- طبعا يا ولد فى نص هدومك علشان الدنيا حر ...وبعدين ايش عرفك انت فى الرورو والجند المصرى .. تعالى بس نقعد مع الناس علشان دول قالوا لاختك حنين انهم من نادى سيلتك وجايين يمضوا معايا عقد احتراف .... كح كح كح كح كح كح
جرس التليفون يرن ترررررررن ترررررررررررن ترررررررررن
الرايق :- الووووووو ..مين ؟؟؟ ريال مدريد ؟؟؟ هو انا ناقصكم انتوا كمان ؟؟...نو نو نو ..ده كتير قوى..مش كل شويه تسوقوا عليا خلق الله ..بلاش كده .. حرام عليكم كل الناس بتقولى وافق يا رايق على عرض الريال علشان الناس دول غلابه ووقعوا فى عرضك ...بتقول كاااااام ؟؟؟ ... 75 مليوم رورو ...نو نو نو ..اقل من 110 مليوم جند مصرى مش هاقبل ..فكروا وردوا عليا ..مع السلامه
ضيف 1 :- الله يكون فى عونك يا استاذ رايق
الرايق :- نو نو نو ...كابتن عبده الرايق ..صدقونى معايا مش هتخسروا ابدا
ضيف 2 :- وحضرتك مركزك ايه يا كابتن عبده يا رايق ؟؟؟
الرايق :- مركز مغاغه
ضيف 2 :- ههههههه ... وحضرتك بقى بتلبس فانله رقم كام ؟؟؟
الرايق :- شوف يا كابتن .. من كاااااااااااام سنه كنت بلعب انا والخطيب مع بعض ..وانا كنت رقم 10 والخطيب رقم 10 وبعدين حصل بينا سوء تفاهم ..اصلى الخطيب كان بيغير منى ..واتخانقنا وقسمنا الرقم هو 5 وانا 5
ضيف 2 :- يعنى حضرتك رقم 5 ؟؟؟
الرايق :- نو نو نو .. الخطيب اعتزل وساب الخمسه بتوعوا ..وانت فاهم بقى الدنيا بتغلى انا دلوقتى رقم 647 ... كح كح كح كح كح
جرس التليفون يرن ترررررررررن ترررررررررن تررررررررن
الرايق :- برضه ترنك ..الوووووو ..مين ؟؟ منتخب البرازيل ؟؟... نو نو نو .. سبق وقلتلكم الرايق مش للبيع ابدا .. ايام ايجيبشن ..ايام فيرى فيرى ايجيبشن انا لايمكن استغنى عن منتخب بلادى ابدا .. نو نو نو ..الرايق لايمكن يستغنى عن منتخب بلاده علشان 80 مليوم رورو ..نو نو نو ..لكن لو وصلتوا المبلغ ل 120 مليوم جند مصرى انا موافق
همس الاحباب :- احنا متأتسفين قوى يا جماعه ..بس حضراتكم فعلا من نادى سيلتك ؟؟؟
ضيف 1 :- سيلتك ؟؟؟؟ سيلتك مين يا فندم ؟؟ احنا من سيتى غاز ... وجايين نكتب معاكم عقد الغاز الطبيعى
همس الاحباب :- هههههههههههههه وشووووووووووووبش للفانله الداخليه واللباس يا رايق
الرايق :- ههههههههه ... يا خساره رصيدك يا نونه ...ويا شماتك فيا يا ميسيى انت وكاكا

حمام السباحة

همس الاحباب وحنين القلب ...الان اعزائى مشاهدى قناه الضاحكون الفدائيه موعدكم مع المسلسل الضاحك ( عيله تجنن ) وحلقه اليوم بعنوان حمام السباحة

همس وحنين فى جلسة عائلية مع الرايق : بص يا عم الحج بما انه ما فيش مصيف ولا فسح فى سنتكم الحلوة دى فقررنا نحن ابناء الرايق انك تشتركنا فى حمام سباحة فى نادى الرايق لبناء العظام

حنين القلب : همس ايه نادى الرايق لبناء العظام ده .....ده بتاع التأهيل والعلاج العظمى للمكسورين ؟؟؟

همس الاحباب : لا يا متخلفة انتى العظام اساس الاجسام هو فيه جسم من غير عظم

حنين القلب : اه العرسه جسمها من غير عضم يلا ما علينا اهو اى مكان نروح نتفسح فيه بدل الترعه اللى بابا بياخدنا نلف حوليها كل يوم دى

همس الاحباب : العرسة على اساس انها اختك فى الرضاعة ما علينا المهم ايه رايك يا رايق!!؟؟؟

الرايق : نو نو نو انا مش موافق على الكلام الفارغ ده سباحة ايه وغوص ايه يا ولاد

حنين القلب : ليه بس يا بابتى حرام عليك احنا زهقنا

همس الاحباب : وبعدين يا عم الحج متخافش انا مظبط كل حاجة انا اعرف واحد مسئول مهم جدا هيخلص كل حاجة وببلاش كماان

حنين القلب : اكيد تعرف رئيس مجلس الادارة او مدير النادى طالما مسئول مهم

همس الاحباب : لا طبعا بقولك مهم جدا تقوليلى رئيس ومدير نو نو نو

الرايق : ياض با خالد اوعى تكون تعرف الوزير نفسه ده كده ممكن ابقى رئيس نادى

همس الاحباب : وزير نو نو نو اكبر من كده بكتير يا رايق

حنين القلب : انت ياض ما تنطق وخلصنا ولا اغزك بالمطواة أعملك نفق مشاة

همس الاحباب : البت دى مولودة فى السلخانة قسم التشفية من غير سلخ بصى يا بت انتى انا مظبطلكم مع مسئول كبير قوى داخل النادى مسئول غرف خلع الملابس على سن ورمح

الرايق وحنين فى صوت واحد : ميييييييييين يا روح طنط !!!!!!!!؟؟؟؟؟؟؟

همس الاحباب : يا جماعة ريلاركس ده مسئول مهم جدا وبعدين مين هيشحتنا ملابس النزول لحمام السباحة ولا انتوا هتنزلوا بهدومكم الكستور والدمور دى

فرنسا هانم : الواد خالد عنده حق انا على نفسى اجهزلكم حلة المحشى والاكل من دلوقتى

همس الاحباب : محشى وحلل وملاية على اساس اننا رايحيين جنينة الحيوانات ده نادى يا مامتى

وبعد الاشتراك فى النادى وفى احد الايام ذهبت عيلة الرايق الى حمام السباحة

وعند الدخول من بوابة النادى ابتدأت كوارث عائلة الرايق

اللقطة الاولى
حنين القلب بدأت وصلة الرقص الشرقى والزغاريط من البوابة حتى الوصول الى حمام السباحة وكانها بتحيى زفة فى الحارة

اللقطة الثانية
همس الاحباب واخد معاه عدة الصيد والسنارة ومصمم انه يصطاد سمك من حمام السباحة ويعزم العيلة على جمبرى واستاكوزا

اللقطة الثالثة
الدكاترةعبده باشا الرايق مصمم ينزل حمام السباحة بالجلابية وبيقولهم انا حفيد الرايق الكبير اللى عدى المانش ولا اتبل كمه .

اللقطة الرابعة
فرنسا هانم استغلت الفرصة احسن استغلال وجابت الهدوم الوسخة معاها ونزلت تغسلهم فى حمام السباحة وبجوارها بنتها العزيزة حنين القلب بتصبن المواعين وحلل البيت
وعليه ايها السادة الكرام تم شطب عضوية الرايق والعائلة الكريمة من حمام السباحة وتحويلها الى الترعة المجاورة

مع تحيات فريق العمل

بمدونة الضاحكون

دستور يا مبارك

عبده الرايق .... سيداتى وانساتى وسادتى دلوقتى موعدنا مع حلقه جديده من برنامج ( انت والدستور) وتقدمه لكم المظيعه حنين القلب
المخرج :- ايه يا جماعه فين الضيف ؟؟؟ حرام عليكم الوقت بيسرقنا فاضل عشر دقايق ونطلع هواء
همس الاحباب :- المخرج عنده حق يا حنين فين الضيف بتاعك ؟؟ثم انتى مش جاهزه ليه ؟؟
حنين القلب :- صبركم عليا شويه يا جماعه .. وبعدين انا جاهزه من بدرى ولابسه الفستان بتاع العيد وحاطه كحل .. ها اعمل ايه تانى ؟؟؟؟
همس الاحباب :- كل ده مش مهم .. المهم الضيف بتاعك مجاش ليه ؟؟؟
حنين القلب :- انا سئلت ابويا العبقرى عبده الرايق ......
همس الاحباب :- ميييييييييييييييييييين ؟؟؟؟؟؟؟؟ .سئلتى مين ياختى ؟؟؟؟؟؟
حنين القلب :- ايه مالك مادد بوزك كده ليه ؟؟؟ ومالك متحنط زى المومياء الفرعونى كده ليه ؟؟ بقولك سئلت ابى العبقرى عبده باشا الرايق
همس الاحباب :- لا ابدا ولا حاجه ... وهكذا كانت نهايه حنين القلب ... برضه يا مسلمه حد يعتمد على الرايق ؟؟؟ حرام عليكى نفسك ... انتى يابنتى عمرك مارحتى لدكتور عيون ابدا ؟؟؟
حنين القلب :- ايه يا همس مالك متحامل ليه كده على ابونا الرايق ... انا شايفه انه عبقرى بس انتوا اللى مش واخدين بالكم منه .. نونونو... الرايق لازم ياخد فرصته فى الحياه
المخرج :- وانا اخد صابونه من الاخراج .. حرام عليكم فاضل خمس دقايق .. حاولوا تتصرفوا وتجيبوا اى ضيف تانى
همس الاحباب :- هى لعبه ؟؟؟ ضيف تانى مين ؟؟ يعنى هنجيبه من السوبر ماركت ولا من الجمعيه ؟؟ دا برنامج بيتكلم عن الدستور وحريه المواطنين فى الدول الناميه .. والناس اللى بتفهم فى الدستور قليلين جدا.... وقال ايه ...الرايق هيجيب ضيف بيفهم فى الدستور... بطلوا ده واسمعوا ده..ياما لسه هنشوف وياما
حنين القلب :- انت ياض يا همس .. بلاش شغل الحموات الفاتنات ده ..انا واثقه ومتأكده من امكانيات الرايق ... انا مع الرايق قلبا وقالبا.... ههههههههههههههههه ... الرايق وصل ...هييييييييييييييييييييييه ... كايد العزال يا رووووقه ..تحيا جمهوريه مصر العربيه
الرايق :- هااااااااااى ايفرى بدى ... انا جيت قبل البرنامج بدقيقه واحده ... انا راجل مظبوط طول عمرى ..عمرى ما كنت ساده ولا زياده ..دايما مظبوووووووووووط ... يلا بقى شوفوا لنا حاجه ناكلها انا والاستاذ علام الضيف بتاعنا
المخرج :- تاكل ؟؟؟؟؟؟؟ حرام عليك هتطير البرج اللى فاضل فى نافوخى يا رايق ... فين الضيف ؟؟؟؟
نيو علام :- انا هنا ..انا هنا يابن الحلال
همس الاحباب :- ايه ده يا رايق ؟؟؟ الشيخ ده ماله ومال الدستور وحريه المواطنين ؟؟؟
الرايق :- يلا ياض العب بعيد ... انت دونت تفهم اى حاجه ...يلا الااونه ..الا دوى ...الا تريى ..فتح المزاد
المخرج :- اطلع بره يا رايق .. وانتى يا حنين القلب ..جاهزه ؟؟؟؟
حنين القلب :- ايوه اتفضل انا جاهزه
المخرج :- ثرى .. تو ..وان ..هواء
حنين القلب :- والان سيداتى انساتى سادتى موعدنا مع حلقه جديده من برنامج ( انت والدستور ) وحلقه اليوم بعنوان الدستور وحريه المواطنين فى الدول الناميه ..ويسعدنا ان نستضيف الاستاذ ..علام ..اهلا وسهلا يا استاذ علام
نيو علام :- اهلا بيكى يا حنين القلب ..وانا اسمى نيو علام ..او سوبر علام ..او هابى علام ..لكن انا بفضل نيو علام
حنين القلب :- اهلا بيك يا استاذ نيو علام ... عايزين نعرف من سيادتك سر الملابس الغريبه دى على استاذ فى الدستور ..بصراحه الملابس دى بتفكرنى بالدراويش بتوع زمان
نيو علام :- هههههههههه ..دراويش دراويش ..يابو الريش انشاله تعيش
حنين القلب :- طيب احنا نعرف ان الدستور وضع اساسا لحمايه المواطن من سطوه الحكام ..الا انه يستخدم الان لبسط نفوذ الحكام وخاصه فى الدول الناميه ..فهل هو دستور للمواطن ام دستور للحكومه
نيو علام :- هههههههه ..كلامك مظبوط والله يا حنين .. هذا هو الجول المظبوط والله هو الجول المظبوط .. شوفى يا بنتى ..الدستور معمول اساسا للاسياد .. مش للمواطنين الغلابه التعبانين ..لالالالالالالا الدستور للاسياد بس ..اما العبيد فلا دستور لهم
حنين القلب :- لكن حضرتك راجل قانون وراجل دستور ..ازاى تفرق بين المواطنين ؟؟ هو الدستور مش بيقول المواطنين امام الدستور سواء ؟؟؟
نيو علام :- سووووووووووووواء ؟؟؟؟؟ لالالالالالالالالالا طبعا فى عبيد وفى اسياد ...هو ده الدستور.. واذا حد قال غير كده يبقى اهبل ..العبيد عبيد ..والاسياد اسياد ...والاسياد هما الدستور وهما اللى بيعملوا الدستور .. جاهز ماشى ..تفصيل ممكن ..تيك اواى على الرحب والسعه ...لكن الدستور للاسياد فقط ..انتى مش بتسمعى الناس بتقول دستور يا اسيادنا ؟؟؟
حنين القلب :- انا مش مع حضرتك فى الكلام ده ..مش هو ده الدستور..مش هو ده الدستور ..ارجوك يا مخرج وقف البرنامج ..ودلوقتى مع فاصل اعلانى
المخرج :- ايه الكلام ده يا بشر ؟؟؟ ده لعب عيال
همس الاحباب :- لالالالالالالا دى بركات الرايق ...انا اول ما شميت ريحه الرايق عرفت انها هتخرب
الرايق :- بس يا ولد منك ليها ...شط اب يوور ماوس ...كلوز ذا دوور ..وات اذ يوور نيم ؟؟ سورى يا جماعه ..سورى يا بشر ...فى سوء تفاهم يا جدعان .انا للاسف كنت فاكر انكم عايزين تتكلموا عن الدستور بتاع العفاريت والجن ...بتاع دستور يا اسيادنا ..رحت جايب الشيخ نيو علام موديل 2009 وقلتله اننا هنتكلم عن العفاريت والجن ودستور يا مبارك ...دستور يا مباركين ..دستور يا اسيادنا
همس الاحباب :- وادى النتيجه ...حرام عليك البرنامج يا رايق حرااااااااااااااااام حرااااااااااام
الرايق :- بس ياض ...اسكت .. تتصور انا مش شايف فرق بين الدستورين ... كله دلوقتى محصل بعضه ..وكله بيخدم الاسياد ..ان كان عالم تالت ولا عفاريت كله دستور
و .... دستور يا مبارك ...دستور يا مباركين ..دستور يا اسيادنا

عيله تجنن ...طوابع البريد

عبده الرايق ..... والان اعزائى مشاهدى قناه الضاحكون الفدائيه موعدكم مع المسلسل الضاحك ( عيله تجنن ) وحلقه بعنوان طوابع البريد
********
الرايق :- هاااااااى اند هاااااااى ايفرى بدى ... يو اار فيرى اند فيرى محظوظيين بيبول
فرنسا هانم :- ههههههههه ...محظوظيين ؟؟؟ !!!!!!!! طيب بلاش تيجى منك انت يا رووقه .. خليها فى سيرك احسن
الرايق :- نو نو نو ... انتى دايما كده وقفالى زى الرغيف فى الزور يا فرنسيس .. احنا خلاص هنبقى من اصحاب الملايين ... وداعا للفقر ..وداعا للهدوم المقطعه ...وداعا للسلف والدين
همس الاحباب :- وحياه جدك الرايق الكبير اللى حرر اسبرطه القديمه بلاش انت يا رايق .... احنا مش مستعدين نسمع اى حاجه تانى
الرايق :- ولد يا همس ... شط اب يوور ماوس ...كلوز يور بق .. المره دى بجد وجدانى ..انا هاكسب ملايين الدورارات ..وهنلف القارات التسعه كلها ... من اول قاره زحل لغايه قاره استراريا
الطائر الحزين :- زحل ؟؟؟ .. نو نو نو زحل ده مش قاره يا رايق دى محطه سكه حديد على حدود نفيشه
الرايق :- بتنونو ليه يا طائر ؟؟؟؟ بلاش نو نوه ...زحل دى قاره كبيره ...جنوب الهند ...وعموما مش هى دى البروبليم ... المشكله دلوقتى انكم تسمعونى وتصدقونى وتحطوا ايديكم فى ايدى
حنين القلب :- معلشى يا بابا انا ايدى فيها بصل مكان التقليه ..خليها الاسبوع الجاى لما نشترى صابونه ونغسل ايدينا
صبرنى يارب :- وانا ايدى فيها مونوكير ومش هينفع احطها فى ايدين حد
فرنسا هانم :- وانا ايدى فيها واوا ... وميكركروم
همس الاحباب :- وانا ايدى خارج نطاق الخدمه
الطائر الحزين :- وانا لسه متوضئ معلشى يا رايق خليك لمره تانى
الرايق :- نو نو نو انتم مش فاهمين حاجه ...انا الرايق ...انا الحضاره .. انا الانحباس الحرارى ... انا حفيد احمس العظيم بانى الاهرامات .. انا الدكاتره الكبير الحاصل على 22 رساله دكتوراه ... اسمعونى ارجوكم لاخر مره ... بلييز ..ليسنت تو الرايق
حنين القلب :- خلاص بقى يا جماعه نسمع بابا المره دى
الرايق :- كم انتى عظيمه يا ابنتى الموقره حنين ..بصوا بقى يا بشر .. قريت عن مسابقه مجموع جوايزها 30 مليون دورر وانا والحمد لله واثق من الفوز على الاقل ب 29 ونص مليون دورر
همس الاحباب :- وايه المسابقه دى ان شاء الله
الرايق :- مسابقه لهواه جمع طوابع البريد القديمه ..وانا استطعت انى اجمع اقدم طابع بريد فى العالم بتاع الملكه فرتوريا ملكه فرنسا سنه 1840
الطائر الحزين :- قصدك الملكه فيكتوريا ملكه بريطانيا
الرايق :- انا دونت كير ... ميهمنيش فيكتوريا ولا فرتوريا انا يهمنى الجايزه وبس
همس الاحباب :- الظاهر الموضوع بجد يا جماعه
فرنسا هانم :- والطابع ده معاك يا رايق ؟؟؟
الرايق :- طبعا يا مزمزين فرنسيس هانم كعب الغزال ..انا معايا اقدم مجموعه طوابع فى التاريخ ...وخلاص هاكسب الجايزه وهنروح اوروبا ونتفسح فى كنشاشا وبنج يانج وافريكانو
حنين القلب :- وهتجبيلى عريس يا بابا ؟؟؟؟
الرايق :- وهاجبيلك اجدع عريس يا حنونه ... وهنقيه بايدى ..وهاجبيلك معاه كمان ضمان خمس سنين وقطع غيار اصليه
صبرنى يارب :- الظاهر كده هتلعلع يا جدعاااااااااااااااااااااااااان
فرنسا هانم :- ازغرد يا خواتى ... لولللللللللللللللللللللللللللللللللللللللللللللى
الطائر الحزين :- وفين بقى المجموعه دى يا بابا ؟؟؟
الرايق :- اهه فى الشنطه دى معايا
همس الاحباب :- الرايق يا يعيش يا يعيش ..يعيش يعيش يعيش
الطائر الحزين :- ورينا بسرعه المجموعه يا رايق
الرايق :- هنا الجمال ..هنا الفلوس ..هنا الدورارات ..هنا كنشاشا ..هنا النغنغه ..كله فى الورقه دى
همس الاحباب :- ايه ده ؟؟؟؟ ده عنوان موقع على النت
الرايق :- طبعا يا ولاد ..انا قريت الاعلان رحت كاتب على جوجل صوره اقدم طوابع فى العالم .. راح جوجل باشا الله يستره .. جابلى كل الصور اللى موجوده للطوابع وبعدين ....
وات ايز زيس ؟؟؟ ايه يا بشر ؟؟ فى ايه ؟؟ بتسبونى زى كل دور وتمشوا ليه ؟؟؟ رايحين فين ؟؟؟ وات ايز زا بروبليم ؟؟؟ ... وانتى يا حنين ماشيه برضه معاهم ؟؟؟؟
حنين القلب :- خلالالالالالالالالالالالالالالالالالالالالاص انا طهقت ... وهترهبن ومش هتنيل اتجوز علشان ترتاح يا رايق

**********

مع تحيات فريق العمل

.

بمدونه الضاحكون

قناه الضاحكون الفضائيه... نشره الاخبار

عبده الرايق ...... والان سيداتى انساتى سادتى موعدنا مع نشره الضاحكون الاخباريه.....

موجز النشره

*************
-- القبض على صاحب مخبز يبيع خبز صالح للاستهلاك الادمى
-- اخلاء سبيل موظف الحى المتهم بشراء بنطلون جينز
-- فوز مصر ببطوله كاس العالم فى البلاى ستيشن
-- منع مسئول كبير من السفر بتهمه الاستيلاء على اموال البنوك
-- مصر تحصد جميع ميداليات دوره العاب المتوسط

**********
كان هذا هو الموجز واليكم الانباء بالتفصيل والكروشيه
-- علمت قناه الضاحكون الاخباريه من مصدر موثق فى الشهر العقارى ان مباحث التموين برئاسه الجنرال محمود شوال قد القت القبض اول امس على صاحب مخبز بلدى يبيع خبز صالح للاستخدام الادمى .. وكانت عده بلاغات قد تطايرت الى مكتب مباحث التموين تفيد بان المخبز المذكور يقدم خبزا نظيف وابيض ووزنه كبير وصالح للبشر ..وعلى الفور توجهت قوه من المباحث الى المخبز حيث تم القبض على صاحب المخبز متلبسا ببيع العيش النظيف وتم العثور ايضا على اجوله دقيق صالح للاستخدام الادمى وعلى الفور لكعه الجنرال بالقلم وامسك بالدقيق النظيف وصرخ فى صاحب المخبز قائلا ..من اين لك هذا ؟؟؟؟؟؟؟؟؟؟؟؟؟

ومعنا الان مراسل قناه الضاحكون على ابو غدير ..ايه الاخبار عندك يا على ؟؟؟

على ابو غدير :- الحمد لله الحمد لله .. اشكرك يارب واحمد فضلك .. دلوقتى انا اقدر اموت وانا مرتاح

الرايق :- يا خى ما تموت ولا تعيش فى ستين داهيه ..بس اعرف فى ايه

على ابو غدير :- الحمد لله يا رايق قدرت اوصل للفرنه قبل المباحث واشتريت عشره ارغفه نضاف من بتوع الاستهلاك الادمى .. الحمد لله اخيرا هاكل العيش النضيف ..انا مش عايز حاجه تانى من الدنيا

الرايق :- مبروك عليك يابن المحظوظه ...بس يابخت من نفع واستنفع ..ابقى ابعت لى ولو لقمه ادوقها انا كمان اقبل ما اموت ....
-- تم امس اخلاء سبيل السيد خ -ص- س الموظف بالحى من التهمه الموجهه له بشراء بنطلون جينز جديد .. هذا وقد وصل الى المباحث ان الموظف الكحيان صاحب الكام ملطوش العمى والمرتب التعبان قد اشترى بنطلون جينز جديد بشوكه .. وعلى الفور اصدر السيد الجنرال مصطفى رشوه امر دكتاتوريا بتشكيل قوه خاصه من 25 لواء و50 عميد 77 عقيد و4 مقدم و 21 راقد و 113 نقيب وشويه ملازمين و 700 عسكرى . لمراقبه الموظف وفى ليله ليلاء تأكدت التحريات على خروج الموظف بالبنطالون من فيللته المطله على الكورنيش .واثناء قيامه بركوب سيارته الشبح الخاصه قامت القوه بالقبض عليه متلبسا بالبنطالون .. وقد قامت القوه بمعاينه الفيلا المكونه من طابقين و20 غرفه وحديقته الخاصه ولم تعثر على اى بناطيل جديده اخرى .. هذا وقد نفى المتهم امام النيابه تهمه الرشوه فى وجود 15 من كبار المحاميين للدفاع عنه واستشهد بمديره منزله السيده كوثر التى اقرت انه اشترت البنطالون من جارتها بالقسط للموظف الكحيان
-- مبرووووووووووووك لكل المصريين .. الف الف مبروك لمصر كلها .. فقد استطاع المواطن على ابراهيم الفوز ببطوله كأس العالم لكره القدم فى لعبه البلاى ستيشن .. وكان المواطن المحظوظ يلعب بالصدفه مع اصدقائه .. وبسبب براعه المواطن استطاع الفوز بالكأس .. وعلى الفور اصدر الرئيس على فيفا رئيس مراجيح المولد برقيه تهنئه للمنتخب المصرى واتجه هو ووفد رسمى من المراجيح لاستقبال المواطن على ابراهيم من امام السايبر وقام السيد الرئيس بتسليم المواطن 5 اسطوانات فيفا 2007 واسطوانه دراكولا وكره الشوراع .. هذا وقد اصدر السيد الرئيس قرارا مراجيحيا باعتبار اليوم عيدا قوميا لافريقيا والعالم العربى

-- اصدر السيد رئيس هيئه المنع قرارا بمنع السيد صلاح الهباش من السفر للخارج وذلك لتورطه فى قضيه استيلاء كبرى على اموال البنوك وقيمتها مليار ونصف مليار جنيه مصرى .. وكان قرار المنع قد صدر قبل شهرين بعد التأكد من صحه المعلومات الا ان تأخير صدور القرار يرجع الى تقاعص السيد صلاح عن السفر بحجه عدم البعد عن مصر ام الدنيا مصدر رزقه ورزق عياله .. وبعد محاولات كبرى تم اقناع المواطن بالسفر اول امس وفور سفر المواطن سالف الذكر خرج القرار بمنعه من السفر والبحث عنه داخل مصر
-- مره تانيه مبروك لمصر وزغرووووووته حلوه لكل اعضاء البعثه المصريه فى دوره العاب البحر المتوسط .. فقد فازت مصر بجميع الميداليات الذهبيه والفضيه والبرونزيه بترتيب الاول بدون منازع .. وللاسف مفيش تانى ولا تالت لان البعثه المصريه حصدت جميع الميداليات .. والجدير بالذكر ان البعثه ارادت توفير العناء والجرى والصرمحه وصرف الفلوس على الفاضى واثرت على ذلك بشراء عدد كبير من الميداليات الذهبيه والفضيه والبرونزيه وقامت البعثه بتوزيعها على افرادها بدلا من السفر ووجع الدماغ وكفى الله المؤمنين شر القتال

***********

مع تحيات فريق العمل

.
بمدونه الضاحكون