السبت، يوليو 04، 2009

قناه الضاحكون الفضائيه... نشره الاخبار


عبده الرايق ...... والان سيداتى انساتى سادتى موعدنا مع نشره الضاحكون الاخباريه.....

موجز النشره
*************
-- القبض على صاحب مخبز يبيع خبز صالح للاستهلاك الادمى
-- اخلاء سبيل موظف الحى المتهم بشراء بنطلون جينز
-- فوز مصر ببطوله كاس العالم فى البلاى ستيشن
-- منع مسئول كبير من السفر بتهمه الاستيلاء على اموال البنوك
-- مصر تحصد جميع ميداليات دوره العاب المتوسط
**********
كان هذا هو الموجز واليكم الانباء بالتفصيل والكروشيه
-- علمت قناه الضاحكون الاخباريه من مصدر موثق فى الشهر العقارى ان مباحث التموين برئاسه الجنرال محمود شوال قد القت القبض اول امس على صاحب مخبز بلدى يبيع خبز صالح للاستخدام الادمى .. وكانت عده بلاغات قد تطايرت الى مكتب مباحث التموين تفيد بان المخبز المذكور يقدم خبزا نظيف وابيض ووزنه كبير وصالح للبشر ..وعلى الفور توجهت قوه من المباحث الى المخبز حيث تم القبض على صاحب المخبز متلبسا ببيع العيش النظيف وتم العثور ايضا على اجوله دقيق صالح للاستخدام الادمى وعلى الفور لكعه الجنرال بالقلم وامسك بالدقيق النظيف وصرخ فى صاحب المخبز قائلا ..من اين لك هذا ؟؟؟؟؟؟؟؟؟؟؟؟؟
ومعنا الان مراسل قناه الضاحكون على ابو غدير ..ايه الاخبار عندك يا على ؟؟؟
على ابو غدير :- الحمد لله الحمد لله .. اشكرك يارب واحمد فضلك .. دلوقتى انا اقدر اموت وانا مرتاح
الرايق :- يا خى ما تموت ولا تعيش فى ستين داهيه ..بس اعرف فى ايه
على ابو غدير :- الحمد لله يا رايق قدرت اوصل للفرنه قبل المباحث واشتريت عشره ارغفه نضاف من بتوع الاستهلاك الادمى .. الحمد لله اخيرا هاكل العيش النضيف ..انا مش عايز حاجه تانى من الدنيا
الرايق :- مبروك عليك يابن المحظوظه ...بس يابخت من نفع واستنفع ..ابقى ابعت لى ولو لقمه ادوقها انا كمان اقبل ما اموت ....
-- تم امس اخلاء سبيل السيد خ -ص- س الموظف بالحى من التهمه الموجهه له بشراء بنطلون جينز جديد .. هذا وقد وصل الى المباحث ان الموظف الكحيان صاحب الكام ملطوش العمى والمرتب التعبان قد اشترى بنطلون جينز جديد بشوكه .. وعلى الفور اصدر السيد الجنرال مصطفى رشوه امر دكتاتوريا بتشكيل قوه خاصه من 25 لواء و50 عميد 77 عقيد و4 مقدم و 21 راقد و 113 نقيب وشويه ملازمين و 700 عسكرى . لمراقبه الموظف وفى ليله ليلاء تأكدت التحريات على خروج الموظف بالبنطالون من فيللته المطله على الكورنيش .واثناء قيامه بركوب سيارته الشبح الخاصه قامت القوه بالقبض عليه متلبسا بالبنطالون .. وقد قامت القوه بمعاينه الفيلا المكونه من طابقين و20 غرفه وحديقته الخاصه ولم تعثر على اى بناطيل جديده اخرى .. هذا وقد نفى المتهم امام النيابه تهمه الرشوه فى وجود 15 من كبار المحاميين للدفاع عنه واستشهد بمديره منزله السيده كوثر التى اقرت انه اشترت البنطالون من جارتها بالقسط للموظف الكحيان
-- مبرووووووووووووك لكل المصريين .. الف الف مبروك لمصر كلها .. فقد استطاع المواطن على ابراهيم الفوز ببطوله كأس العالم لكره القدم فى لعبه البلاى ستيشن .. وكان المواطن المحظوظ يلعب بالصدفه مع اصدقائه .. وبسبب براعه المواطن استطاع الفوز بالكأس .. وعلى الفور اصدر الرئيس على فيفا رئيس مراجيح المولد برقيه تهنئه للمنتخب المصرى واتجه هو ووفد رسمى من المراجيح لاستقبال المواطن على ابراهيم من امام السايبر وقام السيد الرئيس بتسليم المواطن 5 اسطوانات فيفا 2007 واسطوانه دراكولا وكره الشوراع .. هذا وقد اصدر السيد الرئيس قرارا مراجيحيا باعتبار اليوم عيدا قوميا لافريقيا والعالم العربى

-- اصدر السيد رئيس هيئه المنع قرارا بمنع السيد صلاح الهباش من السفر للخارج وذلك لتورطه فى قضيه استيلاء كبرى على اموال البنوك وقيمتها مليار ونصف مليار جنيه مصرى .. وكان قرار المنع قد صدر قبل شهرين بعد التأكد من صحه المعلومات الا ان تأخير صدور القرار يرجع الى تقاعص السيد صلاح عن السفر بحجه عدم البعد عن مصر ام الدنيا مصدر رزقه ورزق عياله .. وبعد محاولات كبرى تم اقناع المواطن بالسفر اول امس وفور سفر المواطن سالف الذكر خرج القرار بمنعه من السفر والبحث عنه داخل مصر
-- مره تانيه مبروك لمصر وزغرووووووته حلوه لكل اعضاء البعثه المصريه فى دوره العاب البحر المتوسط .. فقد فازت مصر بجميع الميداليات الذهبيه والفضيه والبرونزيه بترتيب الاول بدون منازع .. وللاسف مفيش تانى ولا تالت لان البعثه المصريه حصدت جميع الميداليات .. والجدير بالذكر ان البعثه ارادت توفير العناء والجرى والصرمحه وصرف الفلوس على الفاضى واثرت على ذلك بشراء عدد كبير من الميداليات الذهبيه والفضيه والبرونزيه وقامت البعثه بتوزيعها على افرادها بدلا من السفر ووجع الدماغ وكفى الله المؤمنين شر القتال
***********

مع تحيات فريق العمل
.
بمدونه الضاحكون

هناك 30 تعليقًا:

عبده الرايق يقول...

معلش بقى يا خالوووووووود
ارجع اخد اول تعليق تانى
هكذا الايام يا ولدى ..يوم لك ويوم عليك
وبعدين انا جاى انهارده من رأس سدر مخصوص بدرى علشان اخد منك اول تعليق

Me7'o يقول...

ههههههههههههه

أنا كل ما أخش المدونة دى أضحك الأول وبعدين أقرأ

ومعلش بقى يا خالد
يعنى أنا أسيب الماتش وملحقش لا أول ولا تانى تعليق

Me7'o يقول...

معلش بقى
أنا مش عارف أعلق
أصلى كل ما أخش أعلق أشوف الصورة بتاعت عبده الرايق
أضحك
والله إنت أب زى العسل
تحياتى


"وفور سفر المواطن سالف الذكر خرج القرار بمنعه من السفر والبحث عنه داخل مصر"

ههههههههه

عبده الرايق يقول...

Me7'o
والله احنا يسعدنا ابتسامه حضرتك
مدونتنا اصلا الهدف منها رسم الابتسامه على الوجوه
وطالما حضرتك بتدخل وتضحك ده شرف كبير ونجاح عظيم لنا
شكرا جزيلا على تعليقك الجميل

عبده الرايق يقول...

بالمناسبه مبروك فوز مصر على رواندا 3-صفر

أحــوال الهـوي يقول...

شكرا علي فشرة الاخبار

اللامعقولة

و عجبني اخر خبر

تصور بدل الصرف علي المرتزقه من الرياضيين نشتري الميداليات من الذهب الحقيقي
بلا لعب بلا و جع راس و حرقة دم

تحياتي

maiosha يقول...

هههههههههههههههههه

لأ نشرة نشرة يعنى
ومراسلين واخبار حصرية
إيه الحلاوة دى كلها

هههههههههههههههه

متشفولى شغلانة معاكم ربنا يخليكم إنشاله حتى ابقى رئيسة المحطة

Me7'o يقول...

والله يا باب عبده

أنا اللى يسعدنى قوى تعليقك المهذب جداً على كلامى المتواضع جداً

تحياتى ليك
وتحياتى لكل الأسرة

والف مبروك لمصر

حنين القلب يقول...

هههههههههههههههههههههههه

وربنا عسل يا روقه
ومين رئيس هيئه المنع ده ؟؟؟؟
اول مرة اسمع عن الهيئه دى
ومبرررررررررررررروك لمصر

ومصر اليوم فى عيد
لولولىىىىىىىىىىىىىىى

تسلم ايدك

حنين القلب يقول...

بابتى
احسسسسسسسسسسن
الواد خالد ده فاقع مرارتى كل مرة يقولى اول تعليق
الحمد لله

انا كده اموت وانا مرتاحه

لو عرفوه هيحبوه يقول...

http://law3refoh.blogspot.com/2009/07/blog-post.html



تعرف على شكل نبيك

فرنسا هانم يقول...

وحشتونى جدا جدا جدا
ايها الضاحكون
والنبى مشغوله جدا جدا
سامحونى
والحمد لله انى اطمئنيت عليكم

فرنسا هانم يقول...

انا ملاحظه غياب الطائر الحزين وصبرنى يارب
انا تابعت اكثر من بوست ومش لقيت لهم اى تعليقات
يا ريت تطمنونى عليهم

☼♫♪ عمــاد الدين يــوسف ☼♫♪ يقول...

هههههههههههههههههههههههه

والله زي العسل
افكاركم هايله
تحياتي

Me7'o يقول...

أعزائى قناة الضاحكون
تم نقل الإرسال إلى المدونة الخاصة بى مع التنويه للقناة الخاصة بكم مع نبذة مختصرة عن جميع الأعضاء

أتمسوا بالخير

كيــــــــــــارا يقول...

ههههههههههههههه الا اكتشاف عيش صالح للاستخدام الادمي دي تحففففففففه

عبده الرايق يقول...

أحــوال الهـوي
واه واه واه
على وزن وجول وجول وجول
واه من المرتزقه الرياضيون
ياما نفسى اشتغل لو حتى اجيب الكوره من وراء الجون
مع ان العيال زمان كانوا بيقسموا نفسهم فريقين ويخلونى انا اجيب الكوره من وراء الجون بلوشى

عبده الرايق يقول...

maiosha
نو
نو
نو
رئيس القناه معروف مسبقا لان انتخابه بيتم حسب الماده 76 من الدستور
يعنى شالو الدو حطوا شاهين
يا قلبى لاتحزن

عبده الرايق يقول...

Me7'o
والله احنا اللى تشرفنا بحضرتك يا هندسه
تحياتى لك ولكل اهل بنى سويف

عبده الرايق يقول...

حنين القلب
مش عيب يا نونه تكونى بنت الرايق ومتعرفيش رئيس هيئه المنع
ده السيد المضحوك عليه دايما
وكل اللى بيتمنعوا بيسفلقوا بدرى بدرى
متقوليش مكشوف عنهم الحجاب

عبده الرايق يقول...

حنين القلب
هههههههههههه
ههههههههههههه
ههههههههههه
انا بضحك لان خالد لا لحق اول تعليق ولا اخره
عموما انا كلمته فى التليفون وهو مشغول جدا
والطائر برضه مشغول جدا
وفرنسا برضه مشغوله جدا
اصلهم كلهم محاسبين ودى تقفليلات السنه الماليه
ربنا معاهم

عبده الرايق يقول...

لو عرفوه هيحبوه
انا مش عارف حاجه

عبده الرايق يقول...

فرنسا هانم
لسه كنت بجيب فى سيرتك
انا عارف ان انتى مشغوله
واحب اطمنك على الطائر الحزين
وياريت صبرنى يارب تطمنا على نفسها لانى مش معايا رقمها

عبده الرايق يقول...

☼♫♪ عمــاد الدين يــوسف ☼♫♪
شكرا ليك
وشكرا جزيلا على الزياره

عبده الرايق يقول...

Me7'o
انا هاروح اشوف النبذه
وعموما شكرا جزيلا لحضرتك يا باشمهندس

عبده الرايق يقول...

كيــــــــــــارا
هههههههه
ماهو فى ظل العلف الغير مطابق للمواصفات والعيش الاسود
يبقى فعلا تحفففففففففففه

همس الاحباب يقول...

حقك يا رايق تاخد اول تعليق واخر تعليق
بس انا مبسوط ان البت حنين تاهت فى الزحمة وراحت عليها

همس الاحباب يقول...

بس ايه نشرة الاخبار الفظيعة المريعة
بجد تنفع مراسل لقناة الضاحكون فى بلصفورة البلد

همس الاحباب يقول...

فرنسا هانم رجعت يا جدعان
سبحان الله هما الضاحكون كلهم بقوا محاسبين ولا ايه
ربنا يستر على ميزانية المدونة

عبده الرايق يقول...

حمدلله على سلامه الساده المحاسبين كلهم
لسه الطائر
هو السنه الماليه بتاعتك لسه يا طائر ولا ايه