الثلاثاء، يناير 12، 2010

انا بحمل الشركه المسئوليه

تحديث على السريع كده
انتهت منذ لحظات مباره مصر ونيجيريا بفوز مصر 3 -1 مبروك لكل المصريين
*****************
محدثكم الفقير الى الله عبده باشا الرايق
من هنا
ومن على كرسى الكمبيوتر الخاص بى وامام كل وكالات الانباء البحريه والقبليه ..الفرعيه منها والرئسيه
ومن منطلق الاتفاق العالمى لحقوق الانسان الذى تم انعقاده فى قهوه كمونه مقر اقامه العبد لله الليليه
اتشرف انا عبده باشا الرايق ان القى لحضراتكم خطابى الهام جدا جدا فيرى اندى فيرى فيرى امبورتنت
بسم الله
وبسم الشعب
مضت على امه الضاحكون اياما عجاف من الاضطهاد والتمييز الغير مسبوق والمنقطع النظير من الشركه المسئوله عن توصيل النت للعبد لله
خمسه شهور متتاليه والعبد لله يدفع فلوس النت للشركه التى كنت لا اعرف حتى اسمها
ولا حتى اسم الموزع المتعاقد معى
كل ما اعرفه هو محل الكمبيوتر الذى اتعامل معه
كل شهر يا ولداه اروح كده زى الباشا ادفع ال 95 جنيه وصاحبنا بتاع الكمبيوتر يحلف برحمه كل الميتين على مستوى محافظه السويس ابتداء من عجرود الى بورتوفيق ان النت هيجى عندى بعد يومين
وانا استنى اليومين
واستنى
واستنى
واتارى اليومين مالهومش ايند نيفر نيفر نيفر
وانا زى الجدع كده ارجع للمحل .. والمحل يرجع يحلف برحمه الميتين والحيين ان النت هيجى
ان ذا لاست بعبقريتى الفذه وبعد ايام طويله عرفت اسم الشركه واسم الموزع
واتصلت بالشركه
وقالوا الخط شغال والنت شغال عندك وان هندريد بريزينت
روحت للمحل قالى العيب اكيد من وصله التليفون بتاعتك
جبت اخصائى تليفونات
وكعيت كشف مستعجل 40 جند كل جند ينطح جند
ولف السبع لفات على كل الاسلاك وكتب روشته ان الاسلاك سليمه والعيب مش فى التليفون
سافرت وروحت وجيت والحال على ما هو عليه
اتصل بيا اخويا الجريت مان خالد همس الاحباب وشرحت له القصه قالى اكيد العيب فى الجاك الواصل للجهاز
وفرحت جدا بأعراب خالد للجمله
ولكن الحال على ما هو عليه
ولان العبد لله اصلع فلم اتمكن من شد شعرى مما اضاف لحالتى النفسيه سوء بعد سوء
قلت فى بالى طيب العيال مخليفنها ليه ؟؟؟ بالطبع لازم ينفعوا ابوهم وقت الزنقه
وفعلا قعدت اشد فى شعر العيال لغايه لما ارتحت وهديت اعصابى وده عاد عليا بمنفعه ماديه كبيره وهى ان العيال مارحوش للحلاق طوال الفتره اللى فاتت
اما انا بقى كنت منتظم جدا والله فى دفع الفلوس
مش عارف ليه !!!!!!!!!!!!!!!
يمكن اكون خايف انى مدفعشى يقوموا يفصلوا النت عنى
زى الفنان عادل امام لما دفع الفاتوره وهو مش عنده تليفون اصلا
او يمكن كانوا كل مره يسجدونى ويقولوا والله والمصحف النت هيرجع بعد يومين تلاته بس فى حاجه عندك
عملت ويندوز 3 مرات يمكن يكون العيب فى الويندوز
غيرت كارت الفاكس
رشيت على الجهاز ملح وبخرته يوم الجمعه وقت الصلاه
دبحت للجهاز ارنب ..قلت اهى حاجه باربع رجول تسد الغرض
خليت ابن اخت مراتى بيبى رضيع يلعب فى زراير الجهاز يمكن يفك النحس
غيرت جهاز الروتر
غيرت الكرسى اللى بقعد عليه وانا قاعد على الجهاز
غيرت مكان الجهاز وجبته فى الصاله رغم تعرضى الدائم والمستمر للحك كانى قاعد فى اتوبيس بسبب ضيق المكان
اخر حل وصلت له انى اشترك فى تليفون جديد واشترك فى وصله جديده من الشركه بدون موزع ولا محل كمبيوتر ولا غيره
وفكرت انى اشترى جهاز كمبيوتر جديد

والغريب ان الكل
الشركه
والموزع
وصاحب محل الكمبيوتر
الكل اجمع ان النت شغال عندى عشره على عشره
طيب العيب فين ؟؟؟؟؟؟
الله اعلم
انهارده بس
كنت فى الحمام وابنى كان قاعد على الجهاز بيلعب
عادى يعنى بتحصل فى احسن الجهازات
الاقى الولد دخل على النت وعمنا جوجل مشرف الجهاز
الولد قالى بابا النت جه
خرجت من الحمام الاقى النت شغال وتمام التمام
سؤال حلقه اليوم
العيب كان فين ؟؟؟؟؟؟؟؟؟
1 - العيب من الشركه والموزع وبتاع المحل
2 - العيب فى جهازى انا اصلا والحمد لله اتعالج لوحده
3 - العيب من زعل عمنا جوجل باشا كعب الغزال منى
4 - العيب من عدم دخولى للحمام طوال ال 5 شهور الماضيه

اللى يعرف الحل يبعت على تليفون الضاحكون والاجر والثواب على الله
فى نهايه خطابى
اتوجه بالشكر الكبير لكل من سئل عنى فى فتره غيابى وكل من ارسل لى اميل
وكل من حدثنى تليفونيا اخى الكريم خالد واخى الكبير ابو خالد واخى الكريم الطائر الحزين وبنتى الكتكوته حنين القلب وبقولك اسراء بتسلم عليكى يا نونه

هناك 25 تعليقًا:

حنين القلب يقول...

اووووووووووووووول تعليق
وحشتنا يا بابتى والله
اروح اقرى وراجعه

شفـقــة و إحســــان يقول...

عودا احمد
اخيرا عبده باشا رجع يا ولاد
مبرووووووووووووووووووووووووووووووووك
ومبروك رجوع النت وربنا يستر ويفضل سليم
ماتغبش تانى عننا
كل سنة وانت طيب

عبده الرايق يقول...

مبروك يا جماعه فوز مصر على نيجيريا
يبدو ان انهارده يوم السعد عندى
النت يرجع ومصر تفوز

عبده الرايق يقول...

حنين الغاليه
اقرى براحتك خااااااااااااالص
انا مش مستعجل
ايه انتى فين ؟؟؟
لسه مخلستيش قرايه ؟؟؟؟؟
ااااااااااه
مدرس العربى
انا ناسى ان انتى طالعه لابوكى الباشا عبده الرايق وبتقرى العربى بالعافيه
اصل انا وانتى ثقلفتنا عاااااااااااااااااااااااااااليه قوى

عبده الرايق يقول...

شفـقــة و إحســــان
شكرا جزيلا شفقه هانم واحسان بيك
واتمنى الا تكون شفقه هانم مستمره فى عنادها المستمر لاحسان بيك
انا بس بهدى النفوس يا جماعه

حنين القلب يقول...

هههههههههههههههههههههههه

الاجابه رقم 4
هههههههههههههههههههههههههههههه

والله البيت كان مظلم من غيرك يا بابتى وكويس انك رجعت علشان تلم شمل عليتنا ده
وعلشان كمان تبقى تعملى سبوع عمر على المدونه

حنين القلب يقول...

سلملى على حبيبتى اسراء وحوده ومحمد واحمد وام محمد

ربنا يبارك ليك فيهم
ويبارك ليهم فيك

صيدلانيه طالعه نازله يقول...

طب ممكن احذف اجابتين و بعدين اتصل بصديق عشان اعرف مين السبب
غالبا العيب كان فى الجمهور اللى هو احنا حضرتك
ههههههههههههههههههههه
حمد الله على السلامه و نورت الشاشه يا عم عبده

الشموع السوداء يقول...

فيه احتمال اخر ان ايدين ابنك هي اللي مبرةكة وجابت اللي معرفتش تجيبه
البوست دمه لذيذ اوي
ومبروك لمصر

عبده الرايق يقول...

حنين القلب
كنت عارف ان انتى هتختارى الاجابه الرابعه
لانكى عارفه ان فى عداوه مستحكمه بينى وبين الحموم
عموما ياستو انا
ان شاء الله نحتفل كلنا بسبوع عمر على المدونه
واهى حاجه بيقدمها لنا عمنا النت ببلاش
اما لو قلتى انى هاعمل سبوع حقيقى واجيب حلويات والذى منه كنت هافكر الف مره قبل ما اكتب الرد عليكى
ويمكن كنت مسحت تعليقك فى الخباثه كده من غير احم ولا دستور

عبده الرايق يقول...

صيدلانيه طالعه نازله
هههههههههههههههه
اهى الدكتوره جابت المفيد
تتصورى انا كانت تايهه عن نافوخى الفكره دى
الجمهور هو السبب
اذن
ومن منطلق ان الجمهور لازم يتحمل عواقب افعاله
يبقى لازم يدفع حساب ال 5 شهور
والحساب 5 شهور فى 95 جند يساوى 785 جند
يبقى لازم نعمل حمله لسداد الضرر ده
وانشاله كل فرد من المدونين يتبرع ولو بالف جند

عبده الرايق يقول...

الشموع السوداء
اهلا وسهلا بالشموع السوداء ضيفه جديده على المدونه
ممكن يكون كلامك مظبوط وايدين الولد مباركه
يبقى كده مع رأى صيدلانيه طالعه ونازله وصلنا ل 6 احتمالات
وهلما جرا
تحيات الرايق لكى
وتحيات اسره مدونه الضاحكون

واحدة مفروسة يقول...

هههههههههههههههههههههههههه
الاجابة رقم اربعه
هههههههههههههههه
و ديه مش عاوزة ذكاوة و لا مذاكرة فى المنهج ولا دروس خصوصية
ههههههههههههه
حمدا لله على سلامت النت

حنين القلب يقول...

عبده الرايق

كده برضه يا روقه
طيب انا هعمل سبوع بجد وعقيقه كمان واياك مش تيجى بقى
وهجيب ليك عربيه همر تاخدك من السويس لاسكندريه وترجعك كمان
هااااااااااا موافق

بس اوعى تنسى هديه الواد عمر
بص هو مش طماع هاتله شقه والعفش علشان نجوزوه بدرى
اوووووووووووك
ربنا ما يحرمنا منك يا بابتى

همس الاحباب يقول...

حمدلله على السلامة
ونورت المدونة من جديد يا رايق
وبعدين 5 شهور فى 95 يبقى الناتج 785 بس
انت قديم قوى يا رايق
العلم لا يكيل بالبتنجان يا روقة
حاصل ضرب 5 فى 95 هيطلع 9589 شامل ض رائب المبيعات والضرائب العقارية
كل سنة وانت والاسرة الكريمة بخير وسعادة

صبرني يارب يقول...

ايه ده ده انا هارفع قضيه على الشركه دي

طب كنت اندهلي يا بابا انا عندي خبره فى هاذوها المواضيع

الجيران واخدين مني وصلات بسعر التكلفه يا اخويا ومجننين امي ومقضياها خدمات عامه بالتليفون


طيب يلا بقى عايزه شغل

قولي نعمل ايه واحنا نعمل

أبو حميد يقول...

أنا حطيت السؤال ده فى مدونتى . يا ريت تشرفنا بتعليقك يا فندم :)

لو ممكن تغير حاجة .... هى إيه؟

أبو حميد يقول...

أنا حطيت السؤال ده فى مدونتى . يا ريت تشرفنا بتعليقك يا فندم :)

لو ممكن تغير حاجة .... هى إيه؟

مش بمزاجى يقول...

ههههههههههههههههههههههه
ههههههههههههههههههههههههههههههههه
المدونة دمها خفيف اوووووى
بس انا ممكن اطلب مساعدة الجمهور

اسمي أحمد .. لو مخانتنيش الذاكره !! يقول...

هههههه

ما شاء الله .. ايه الأسلوب الراقي ده بس ؟ .. نمسك الخشب .. بجد تحفففففففه

اتمنى أتشرف بزيارة حضرتك في مدونتي الجديده و أشوف تعليقك على إحدى صفحاتها

رابط المدونه
http://ra7alaat.blogspot.com/

شكرا لوقتك

The Queen يقول...

الاجابة رقم .....5
ههههههههه
يا سيدي متدقش
المهم انه رجع وبنشوف كتاباتك الظريفة
حمدا الله على السلامة

eman mohamed يقول...

تعالى مدونتى الجديده مش هتخصر حاجه بس هتؤل رايك

الأرمـوطــي يقول...

هههههههههههه بوست هايل موتنى من الضحك وانا رائى ان الى حصل دة ناتج عن الانشكاح المحلى فى الامان ياللى والعيب على الجيب وعيب اخو شعيب والحق على عبد الحق......بالتوفيق دايما

شهووووده يقول...

هو يمكن الجهاز كان عنده بلهارسيا وخف منها ولله الحمد

بوست جميل جدا اضحك الله سنك

المجاهد الصغير يقول...

السلام عليكم
كل سنه وانتم طيبين
ندعوكم لمشاركه مسابقه المولد النبوى
فى مدونتى المتواضعه
وفى جوائزززززززز وهدايا ...
فى انتظاركم
وفقكم الله +