الخميس، أغسطس 22، 2013

الضاحكون كانت على حق فى الصندوق الاسود

ودارت الايام
ومرت الايام
واثبت الضاحكون انهم على حق فقد تم تنزيل بوستات الصندوق الاسود للثوره فى شهر يناير اى قبل 30 يونيو ب6 اشهر ومن يقرأ الان حلقات روايه الصندوق الاسود للثوره يجدها على حق تماما فى كل كلمه كتبت
= = = = = = = =
دعوت صديق لى يدعى احمد عادل من مواليد الجيزه ومقيم فى السويس ويعيش فى ابو كبير بالشرقيه ومستقر فى طنطا بالغربيه .. وعندما سألته عن محافظته ذكر لى معظم محافظات مصر حتى اننى اصبت بالبله ولم استطع ان اعرف منه شئ .. المهم دعوته الى قراءه الصندوق الاسود للثوره .. وفعلا احضر اللاب توب الخاص به وبدء فى القراءه
 احمد عادل متعلم مثقف معاه بكاليريوس وليسانس الاداب ...سألته يوما ازاى بكاليريوس من كليه الاداب فقال لى متعجبا من غبائى المزمن ..بكاليريوس تربيه من كليه الاداب يعنى فلسفه وعلم اجتماع على لغه عربيه على تربيه على فيزياء على خلطه بكاليريوس وليسانس ..طبعا اخوكم الرايق فى الامور دى ميعرفشى الا شهاده الابتدائيه وشهاده الميلاد علشان كده بلعت الموضوع ده وشربت بكالريوس وليسانس اجتماع ولغه ومعرفشى ايه
المهم اخونا احمد عادل قعد ساعه وربع يقرأ البوستات ... وانا قاعد العب فى مناخيرى واطرقع صوابعى والعب فى التراب الجميل الموجود فى مكان العمل 
بعد الساعه وربع خلص اخونا احمد عادل البوستات ورفع وجهه عاليا تجاهى واخذ ينظر لى طويلا لمده اربع دقائق متصله دون ان ينزل عينه عنى حتى اصابنى الخوف والذهول من موقفه وانتظرت رد فعل شديد منه فقد كان ينظر تجاهى حتى ان نظراته اخترقت حدود لحمى وعظامى 
واخيرا وبعد اربع دقائق حسبتها ساعات نظر تجاهى وقال بكل شده وحسم (( الكتابه دى بالعربى يارايق ؟ ))
خسئت يا غريب الطباع وخسئت جيوشك ( ذلتنى ساعه وربع وفى النهايه تقلى الكتابه دى عربى ؟)
الا ان صديقى الغريب قال لى انا بتكلم جد يا رايق
قلت له حرام عليك بكاليريوس ليسانس اداب وطنشتها وسكت مواليد كل المحافظات وسكت وتيجى تقولى الكلام ده عربى ولا ايه 
الا انه قال لى بجد انا مش فاهم حاجه ..خد انت يا رايق اقرأ واشرح لى الحكايه ايه
قعدت اقرأ له من الحلقه الاولى 
وتبادلنا الادوار
انا اقرا واشرح له .. وهو يلعب فى مناخيره ويطرقع صوابعه وتطور معه الامر الى تلعيب حواجبه واللعب فى التليفون المحمول 
وهنا اعتقدت
نونونونو
دونت اعتقدت بل ادركت ان البوستات هبله وعبيطه وقررت انى اشطبها من المدونه
وهنا تدخل الذكاء المتخفى داخل شخصيه صديقى الغريب وقال ( لا تشطب ايه انا فاهم كل حاجه )
فرحت وضحكت وانبسطت وقلت للغريب طيب ايه رأيك؟
قالى فى ايه ؟
قلت له فى البوستات يا حماده شوف التاريخ دى من شهر يناير
الا اننى وجدت ملامح احمد قد تغيرت وظهر عليه الذعر والخوف والهلع وقال لى بتقول ايه ؟؟؟ شهر يناير !!!!
عرفت ان صديقى اخيرا فهم انى كتبت بوستات تقرأ الثوره قبل اناس كثيرون وفرحت جدا بصديقى الذى قام سريعا واغلق اللاب ووضعه داخل الشنطه البلاستيك المقطعه اللى تقرف الكلب وقال لى وهو سبتسم ويمسك يدى بقوه (( انا بشكرك جدا يا رايق والله بشكرك علشان عيد ميلاد اخويا فى شهر يناير وانا كنت ناسى .. اروح اشترى هديه على السريع من الماركت اللى قصدنا ))
وجرى صديقى احمد عادل واحسست فعلا انه الغريب من نوعه
ونظرت عليه فوجدته يخرج من الماركت ومعه تلات نفافيخ وزماره ومسدس ميه ويشير ناحيتى بعلامه النصر ليشكرنى على تاريخ ميلاد اخيه
للاسف الشديد لم تكن هناك احذيه او طوب اوحتى قله اضربه بها وتركته يذهب دون ان يدرى اننا فى شهر اغسطس
هذا هو صديقى الغريب احمد بك عادل
وهذا هو قطاع كبير من الشعب حاليا
فانت تجلس الان مع اى شخص يحدثك عن خيانه الجيش وبعد ان تقنعه يحدثك عن خيانه الاخوان ثم يعود بعد يوم ليشتم الجيش ثم يعود ليبكى ويبكى ويبكى على كل شى
ودعونى الان ابكى على معرفتى باحمد عادل
ابكى على يكاليريوس  ليسانس الاداب قسم الكنافه

هناك 3 تعليقات:

غير معرف يقول...

هههههههه
هههههههههههههه
هو بجد شخصيه خالد الغريبه دى
هههههههههههه
ههههههههه
تحياتى لك يا روقه

نافذه علي العالم يقول...

رائع

تصميم وبرمجة مواقع يقول...

جيد