الأحد، يوليو 26، 2009

حمام السباحة

همس الاحباب وحنين القلب ...الان اعزائى مشاهدى قناه الضاحكون الفدائيه موعدكم مع المسلسل الضاحك ( عيله تجنن ) وحلقه اليوم بعنوان حمام السباحة

همس وحنين فى جلسة عائلية مع الرايق : بص يا عم الحج بما انه ما فيش مصيف ولا فسح فى سنتكم الحلوة دى فقررنا نحن ابناء الرايق انك تشتركنا فى حمام سباحة فى نادى الرايق لبناء العظام

حنين القلب : همس ايه نادى الرايق لبناء العظام ده .....ده بتاع التأهيل والعلاج العظمى للمكسورين ؟؟؟

همس الاحباب : لا يا متخلفة انتى العظام اساس الاجسام هو فيه جسم من غير عظم

حنين القلب : اه العرسه جسمها من غير عضم يلا ما علينا اهو اى مكان نروح نتفسح فيه بدل الترعه اللى بابا بياخدنا نلف حوليها كل يوم دى

همس الاحباب : العرسة على اساس انها اختك فى الرضاعة ما علينا المهم ايه رايك يا رايق!!؟؟؟

الرايق : نو نو نو انا مش موافق على الكلام الفارغ ده سباحة ايه وغوص ايه يا ولاد

حنين القلب : ليه بس يا بابتى حرام عليك احنا زهقنا

همس الاحباب : وبعدين يا عم الحج متخافش انا مظبط كل حاجة انا اعرف واحد مسئول مهم جدا هيخلص كل حاجة وببلاش كماان

حنين القلب : اكيد تعرف رئيس مجلس الادارة او مدير النادى طالما مسئول مهم

همس الاحباب : لا طبعا بقولك مهم جدا تقوليلى رئيس ومدير نو نو نو

الرايق : ياض با خالد اوعى تكون تعرف الوزير نفسه ده كده ممكن ابقى رئيس نادى

همس الاحباب : وزير نو نو نو اكبر من كده بكتير يا رايق

حنين القلب : انت ياض ما تنطق وخلصنا ولا اغزك بالمطواة أعملك نفق مشاة

همس الاحباب : البت دى مولودة فى السلخانة قسم التشفية من غير سلخ بصى يا بت انتى انا مظبطلكم مع مسئول كبير قوى داخل النادى مسئول غرف خلع الملابس على سن ورمح

الرايق وحنين فى صوت واحد : ميييييييييين يا روح طنط !!!!!!!!؟؟؟؟؟؟؟

همس الاحباب : يا جماعة ريلاركس ده مسئول مهم جدا وبعدين مين هيشحتنا ملابس النزول لحمام السباحة ولا انتوا هتنزلوا بهدومكم الكستور والدمور دى

فرنسا هانم : الواد خالد عنده حق انا على نفسى اجهزلكم حلة المحشى والاكل من دلوقتى

همس الاحباب : محشى وحلل وملاية على اساس اننا رايحيين جنينة الحيوانات ده نادى يا مامتى


وبعد الاشتراك فى النادى وفى احد الايام ذهبت عيلة الرايق الى حمام السباحة

وعند الدخول من بوابة النادى ابتدأت كوارث عائلة الرايق

اللقطة الاولى
حنين القلب بدأت وصلة الرقص الشرقى والزغاريط من البوابة حتى الوصول الى حمام السباحة وكانها بتحيى زفة فى الحارة

اللقطة الثانية
همس الاحباب واخد معاه عدة الصيد والسنارة ومصمم انه يصطاد سمك من حمام السباحة ويعزم العيلة على جمبرى واستاكوزا

اللقطة الثالثة
الدكاترةعبده باشا الرايق مصمم ينزل حمام السباحة بالجلابية وبيقولهم انا حفيد الرايق الكبير اللى عدى المانش ولا اتبل كمه .

اللقطة الرابعة
فرنسا هانم استغلت الفرصة احسن استغلال وجابت الهدوم الوسخة معاها ونزلت تغسلهم فى حمام السباحة وبجوارها بنتها العزيزة حنين القلب بتصبن المواعين وحلل البيت
وعليه ايها السادة الكرام تم شطب عضوية الرايق والعائلة الكريمة من حمام السباحة وتحويلها الى الترعة المجاورة

مع تحيات فريق العمل
بمدونة الضاحكون

هناك 32 تعليقًا:

همس الاحباب يقول...

معلش يا حنين انتى والرايق
الامور ترجع لطبيعتها مرة اخرى

همس الاحباب يقول...

وبما انكم مش موجودين اساسا فى المدونة
احب اقولكم تعيشوا وتاخدوا غيرها
وسمعنا احلى سلام صعيدى شحط محط

همس الاحباب يقول...

بصراحة بصراحة انتم مش عيلة تجنن
انتوا بقيتوا فضيحة وسط العائلات
وبعدين مالها الترعة
ولا الطشت اشتكى مننا
وبعدين احنا عيلة بنستحمى فى المناسبات فقط

وانتى يا ست حنين محسسانى انك تحية كاريوكا ولا زكية شخلع
بترقص وتزغرط فى نادى حرام عليكى

همس الاحباب يقول...

اما فرنسا والرايق بصراحة استغلوا الفرصة صح وعملو كل اللى فى نفسهم
اما انا طلعت شاطر وطلعت كل المواهب فى فن الصيد
حد يحب ياكل جميرى واستاكوزا

عاشقه الرومانسيه يقول...

حنين القلب بدأت وصلة الرقص الشرقى والزغاريط من البوابة حتى الوصول الى حمام السباحة وكانها بتحيى زفة فى الحارة
*****************************
انا مش هاعلق
كفايه انى اتخيل منظرها
ههههههههههههههههههههههههههه
(:
عليا النعمه انتوا عيله مسخره

Me7'o يقول...

واحد رايح يصطاد
والتانى بالجلابية
والتالتة بتزغرد وبترقص وبتصبن
والرابعة رايحة تغسل المواعين

أقول إيه بس

حد يعمل كده قدام الهاى كلاس
نو نو نو

مكنش العشم

ومكنش ناقص غير أسنس شادية والعملية تبقى آخر منجهة

رندا يقول...

وحشتنونى كوووووووولكم اوى
مش هعلق اكتر من كدة
لان وحشتى ليكم اكبر من اى تعليق

الفراغ يقول...

سلام عليكم
مالقتش احسن من التعليق هنا علشان ابعتلك سلام كبير قوى قوى واقولك وحشتنى
والمدونه وحشتنى قوى
وقلت اجى اضحك معاك هنا
ازيك يا خالد وازى همس الحب والقلب
اهو انا فاكره اهو انك ابو همس
ههههههههههههههههههه
بس مت على روحى من الضحك على السناره بتاعة الرايق(اكيد غداكوا سمك ماحصلش(مغسول بصابون غسيل محترم)
وحشتنى يا خالد قوى
والى لقاء

عبده الرايق يقول...

وات ايز زيس ؟؟؟؟؟؟؟؟
فضايح على الهواء مباشره ؟؟
نو
نو
نو
انا فيرى فيرى فيرى مقموص منك ياخالد
انا برضه كنت بصطاد سمك فى حمام السباحه؟؟؟
نو
نو
نو
انا كنت جايب معايا شبكه محترمه علشان اصطاد القروش
وما ادراك ما القروش

عبده الرايق يقول...

فرنسا هانم
انا بعت ليكى اكثر من اميل وانتى مش بتردى
لعل المانع خير

همس الاحباب يقول...

عاشقة الرومانسية
هههههههههه
ومال لو شوفتى الزفة على حق كنتى عملتى ايه
يا بنتى احنا عيلة المواهب والخزعبلات
هههههههه
نورتى يا دودو
والف مبروك على الخطوبة مقدما

همس الاحباب يقول...

ميخو
هههههههه
ازيك يا هندسة
انا بصراحة ناوى اتبرا من العيلة دى
واسرح فى الاشارات بورد وفل
وعلب مناديل
ايه رايك تيجى تساعدنى
هنكسب فلوس كتير قوى
ونبعد عن العيلة الغم دى
منورنا دايما يا محمد
تحياتى

همس الاحباب يقول...

رندا
حمدلله على السلامة
وانتى كماان والله يا ام خالد
ربنا يطمنا عليكى دائما وتنورينا
تحياتى

همس الاحباب يقول...

الفراغ
ازيك يا ست الكل
وانتى كماان ليكى وحشة كبيرة اكبر من سمكة القرش بتاعت الرايق
حمدلله على السلامة يا ست الكل
نورتى المدونة والضاحكون واليلوج سبوت كله
ربنا ما يحرمناش منك ابدا

همس الاحباب يقول...

عبده الرايق
هههههه
فضايح الضاحكون على الهواء مباشرة
انت عارف احنا مش بنحب نخبى حاجة عن الشعب
يلا خلى الشعب يعيش

الطائر الحزين يقول...

اعتذار شديد اللهجة موجه للجميع للغياب

اعذرونى



خالد انت مشفتنيش وانا راكب على الحمار و ولبشة القصب جانبى ومعدى على شط البيسين وعلى الزراعية ......

Pink Dreams يقول...

ههههههههههههههههههههههههههههههههههههههههههههههههههههههههههه

همس الاحباب واخد معاه عدة الصيد والسنارة ومصمم انه يصطاد سمك من حمام السباحة ويعزم العيلة على جمبرى واستاكوزا

ههههههههههههههههههههه

لابجد اكيد شكلك كان يجنن ويا عينى مفيش حاجه بتطلع ولا السناره بتغمز
ههههههههههههههههههه

بس اوعى تكون كنت مأجر واحد يحطلك السمك فى السناره

هههههههههههههههههه

بجد بوست تحفه

همس الاحباب يقول...

الطائر الحزين
حمد لله على السلامة يا جدع
فينك يا عمنا
والله كان شكلك تحفة بس العيب على الكاميرا نسيت اللقطة الجميلة دى
وبعدين كفاية فضايح على الهوا
نورتنا من جديد يا طائر

همس الاحباب يقول...

Pink Dreams
هههههههههههههه
مين قالك اوعى تكونى شفت الراجل وهو بيحط الكابوريا فى السنارة
بس سيبك انتى ما فيش اجمل من الصيد فى حمام السباحة
ههههههه
الحمد لله ان البوست عجب حضرتك
ومنورانا دايما يا ست الكل
تحياتى

فرنسا هانم يقول...

هههههههههههههه
هههههههههههه
وانا كنت بغسل الهدوم فى البيسين
ههههههههههه
تحيا جمهوريه مصر العربيه

فرنسا هانم يقول...

اكيد دى دسيسه من دسائس اللى ما يتسمى
طبعا عارفه يا خالد

حنين القلب يقول...

طيب يعنى ولا زغردت نافعه ولا غسلت الحلل نافعه
اومال انتوا مودينى هناك ليه
اوعوا تكونوا فاكرينى رايحه اعوم
نو
نو
نو
انا رايحه اساعد مامتى فى غسيل الهدوم والمواعيين
وربنا فى عون النادى
ههههههههههههههههههههههه

maiosha يقول...

هههههههههههههههههههههه
هههههههههههههههههههههههههه
هههههههههههههههههههههههههههه

لا لا بوست تحفة

البوست كله كوم والأربع لقطات الأخيرة دول كوم تانى
هههههههههههههههههه
بجد مسخرة..

بس كده أحسن ..هى الترعة مفيش غيرها .. منها واليها نعود

وحشتووووووووووونى كلكم نفر نفر

son's egypt يقول...

السلام عليكم
عيلة غريبة
كانوا بقوا في لبيت وريحوا نفسهم بدل التعب ده كله

عبده الرايق يقول...

وات ايز زيس ؟؟؟؟
البوست بتاعك يا خالووود جمع الاحبه الغاليين المختفيين من فتره فرنسا والطائر
الحمد لله اننا اطمنا عليكم
وعبقال من نطمئن على صبرنى يارب

همس الاحباب يقول...

فرنسا هانم
هههههههه
اسمه الفيسين يا ماما
وبعدين بلاش نتكلم ونقول على المحشى واللى جرى على البسيين
حمدلله على سلامتك
ونورتى المدونة يا فرنسا

همس الاحباب يقول...

فرنسا هانم
هههههههه
برىء يا بيه
يصراحة اول مرة يطلع مظلوم
بس ما فيش مانع نبلغ عنه ونرتاح منه
عامة رقم الانتر فول موجود عندنا
وكل فول وهو طيب

همس الاحباب يقول...

حنين القلب
ههههههههههه
ده اخرك يا ماما
وبعدين عوم ايه اللى انتى بتقولى عليه
انتى نسيتى انه اخرك العوم فى الطشت ولا ايه
قال عوم ويعدين انتى بتشوفى المياه فى الحنفية العمومية اللى على اول الشارع

همس الاحباب يقول...

ميوشا
هههه
حمد لله على السلامة ونورتى الضاحكون
وانتى كماااان وحشتنا تعليقاتك ووجودك الدائم
انا بقول كده انها عيلة مسخرة
ههههههههه
تحياتى

همس الاحباب يقول...

son's egypt
وعليكم السلام ورحمة الله
هى غريبة بعقل
انا بقول كده
ورحم الشاعر الكبير
عندما قال
من طلع من داره تقل مقداره
وخليكم فى بيوتكم احسن

همس الاحباب يقول...

عبده الرايق
الحمد لله انهم بخير
وعلى فكرة انا قابلت الطائر الحزين يوم الخميس فى القاهرة
وكنت مبسوط قوى انى شفته
والست صبرنى مشغولة كانت بتبلبط فى الترعة

كلمات حب يقول...

سال حبرك هنا وروانا بقطرا كاد الدمع
يستل منا امام تلك الكلمات العظيمه
فكم فخورين بك


كلمات حب

http://zawag.alnaddy.com/blog/article/266180