الأحد، مارس 29، 2009

تابعونا ...لا تسيبونا

حنين القلب ...اعزائى مشاهدى قناه الضاحكون الفدائيه موعدنا الان مع حلقتكم الاسبوعيه منبر الضاحكون ..منبر لا منبر له .. ونتناول فى حلقه الليله الخلافات العربيه الداخليه واثارها على الشارع العربى ويسعدنا ان نستضيف الاستاذ كامل الاوصاف المسئول الاعلامى للجامعه العربيه فى الضاحكون ..كما يسعدنا تلقى مداخلاتكم على تليفون الضاحكون 03000333 ..اهلا وسهلا استاذ كامل الاوصاف شغلنى
كامل :- اهلا وسهلا بيكى يا استاذه حنين القلب
حنين القلب :- عايزين نعرف من حضرتك اولا سبب الخلافات الداخليه العربيه وطرق حلها
كامل :- هههههههه خلافااااااات ..ههههههه ياستو انا مفيش بين العرب اى خلافات على الاطلاق دى اشاعات مغرضه اطلقها الاوروبييون والامركان وبتوع التلات ورقات ..لكن احنا سمنه على عسل وفطير على قشطه صدقينى يابنتى مفيش اى خلافات بين العرب
حنين القلب :- لا يا استاذ انا مش مع سيادتك ..فى خلافات داخليه حتى ان الرؤساء العرب انفسهم اعترفوا ان هناك خلافات بينهم
كامل :- هههههههه بصى يا حنين يا بنتى ..صدقينى انا ..مفيش اى خلافات بين العرب دى احقاد اطلقها البعض ..والرؤساء العرب تماشوا معها من اجل كسر العين ..وانتى عارفه عين الحسود فيها عود يا حلاوه عريسنا قمر وعروسته نقاوه
حنين القلب :- طيب هيحسدونا على ايه بس ؟؟؟
كامل :- ههههههههه لا اصحى يا مدام ..احنا من شعوب القمه فى العالم الحالى احنا وبكل فخر الالفه بتوع العالم كله من شرقه لشماله ومن غربه لجنوبه ..واضربلك مثل ..هاتى اصغر طفل فى الوطن العربى من اى دوله عربيه ويكون بيتكلم ..مش طفل رضيع يعنى ..وكلميه بالعربى هتلاقيه يتكلم معاكى زى اللبلب . روحى بقى فى اى جامعه اوروبيه او امريكيه وكلمى الطلبه بتوعها بالعربى ..ههههههههه ...هتلاقيهم طور الله فى برسيمه ..
حنين القلب :- طيب ما حضرتك لو عكست الايه ورحت اى بلد اوروبى مثلا فرنسا هتلاقى كل الاطفال بيتكلموا فرنساوى وهتيجى هنا هتلاقى برضه شباب جامعاتنا طور الله فى برسيمه
كامل :- ههههههههه يا مدام حنين .عمنا الكبير سيد مكاوى الله يرحمه قال الارض بتتكلم عربى ..ومش بس الارض لالالالالا ده الجبل والبحر والنخل كمان بيتكلم عربى ..صح ولا مش صح ؟؟؟ ..وبعدين انا اصر واصر واظل اصر ولغايه بكره الصبح هاظل اصر ان العرب متماسكون واننا معا رمانه الميزان ونحن بعون الله قادرون .....
حنين القلب :- طيب انا دلوقتى عندى مداخله على الهواء من الاستاذ شريف من كفر ابو سنه ..اتفضل يا استاذ شريف بس والله ياريت بسرعه علشان وقت البرنامج
شريف :- بصى يا مدام حنين انا بس عايز اقولك انى انا زميل الاستاذ كامل ..ازيك يا كامل
كامل :- اهلا يا شريف
شريف :- اقلع النظاره وانت بتتكلم يا كامل
كامل :- وانت مالك يا جدع كل واحد حر
حنين القلب :- فى ايه يا جماعه ايه حكايه النظاره دى ؟؟
شريف :- يا مدام فى حد يلبس نظاره شمس بالليل ارجوكى بس اطلبى منه يقلع النظاره وانتى تعرفى السبب
حنين القلب :- ممكن تقلع النظاره يا استاذ كامل ده لو مش فى اى تشوه فى عين حضرتك
كامل :- لا ياستى ادى النظاره اهى قلعتها
شريف :- ايه بقى يا كامل... فى خلافات عربيه ولا لا ؟؟؟؟
كامل :- طبعا فى خلافات عربيه داخليه جذريه ودى ممكن تؤثر على المواطن العربى ... للاسف يا حنين يا بنتى احنا امه مفككه ..وامه تحاول بكل قواها ان تتجه الى التخلف ..لا الى التحضر .. احنا للاسف الشديد امه ضاعت معالمها فى ظل التفكك والانهيار والاستهبلال ونحن غير قادرون على الت ....
شريف :- خلاص يا مدام عرفتى الكتالوج بتاعه ؟؟ سلام بقى
حنين القلب :- شكرا استاذ شريف على المعلومه المهمه دى.. وانت يا استاذ نضاره ..قصدى يا استاذ كامل هات النضاره بتاعتك البسها شويه ...... ايوه كده تمام ...شكرا استاذ كامل الاوصاف على المعلومات المتميزه دى ..وانا من هنا اقول ان العرب بخير ونحن امه متحده ..قويه متماسكه ...وحصوه فى عين اللى ما يصلى على النبى
والى اللقاء فى حلقه قادمه
سنعود بعد قليل
***********
الضاحكون تلى شووب تقدم لكم اجمل منتاجاتنا من الملوحه ..سردين بساريا ..كلاب البحر..قطط بحر ..فسيخ محلى ومستورد ... ده بالاضافه لربطتين بصل هديه مع كل كيلو... فقط اتصل على 03000333 والسعر مفاااااااااااااااااجأه
**********
عدنا
عبده الرايق اعزائى المشاهدين والمشاهدات ..الواقفين والجالسات
موعدنا الان مع استديو الضاحكون التحليلى ..حيث تقام غدا مباراتان فى الدور قبل النهائى لكأس العالم لكره القدم فى تمام الساعه السابعه مساء بتوقيت الضاحكون الخامسه مساء بتوقيت شينجريششت.. المباراه الاولى بين منتخب الارجنتين ومنتخب المانيا... والمباراه الثانيه بين منتخب المانيا ومنتحب الارجنتين .. وقد علمنا من مصدر موثوق منه ان المباره الاولى ستنتهى بفوز منتخب الارجنتين بثلاثه اهداف نظيفه وسيسجل الاهداف اللاعب.. كده .. فى الدقيقه العاشره واللاعب... برضه ..فى الدقيقه الخمسين من ضربه جزاء واللاعب... ميصحش ...فى الدقيقه الاولى من الوقت المحتسب بدلا من الضائع ..اما المباره الثانيه فستنتهى بالتعادل بدون اهداف ..وسيسجل الهدف الوحيد اللاعب كريست بيانو
ويسعدنا ان نلتقى فى استديو الضاحكون التحليلى بالناقد الرياضى المعروف ورئيس اللجنه العليا لكره القدم العالميه سمير ابو صباع
استاذ سمير اهلا وسهلا بيك واحنا يسعدنا ان تكون ضيفنا فى استديو الضاحكون التحليلى لتلقى لنا الضوء على اللقائين المهمين فى الدور قبل النهائى لبطوله كاس العالم
ابو صباع :- كره قدم ايه وزفت ايه .. انا بصراحه كده مخبيش عليك مش بحب كره القدم ..ومبحبش سيرتها نهائى
الرايق :- ايه يا عمونا ده ... امال حضرتك رئيس اللجنه العليا لكره القدم العالميه ازاى ؟؟؟
ابو صباع :- اعمل ايه بس يا رايق التنسيق الله يلعنه .. انا بصراحه كانت احلامى ادخل كليه الهندسه وابقى محامى كبير لكن الظروف بقى
الرايق :- طيب قول اى حاجه عن اللقائين بتوع بكره دول ..قولى حاجه ..اى حاجه قول بحبك قول كرهتك ..قول قول وميهماكش حاجه
ابو صباع :- يا راجل طنش ..سيبك انت من كره القدم ... انا هاحكى لك حكايه غريبه جدا احسن من ام كره القدم .. امبارح وانا فى السوق بشترى طماطم .......
الرايق :- طيب دلوقتى عندنا اتصال تليفونى من احد المشاهدين ..اسمه عادل ام الخير
ابو الخير :- لا ياسيدى انا اسمى عادل ابو الخير ... وبعدين ايه البرنامج الاهبل ده ..ازاى الماتش بكره وانتم عرفتم النتيجه وعرفتم حتى مين هيجيب الجوان ..انتوا بتشتغلونا ولا ايه ؟؟ انتم بتشموا على ضهر ايديكم ولا ايه ؟؟ ..وايه كمان الضيف اللى مش فاهم حاجه ده ؟؟ لا لا لا انا لازم اقدم شكوى فى البرنامج ده ..وفى الضيف العبيط ده
الرايق :- تحب ترد انت يا استاذ ابو صباع ولا ارد انا ؟ .. عموما علشان الاحراج وعلشان متتعصبشى ..انا هارد على المشاهد بكل ادب واحترام ...شوف يابو الخير .. وحياه ابوك ..ياصايع ياضايع .. لو سمعت صوتك هنا مره تانيه لامسح بكرامتك ارض الاستديو التحليلى ..وعلى العموم يا معفن احنا سجلنا رقمك ..وهنتصل بيك فى نص الليل وهنعاكسك ابقى ورينا بقى هتنام ازاى يا اهبل ...وانت كمان يا ابو صباع اتفضل روح السوق بتاعك جاك كسر صباعك انت كمان
ابو صباع :- ماشى يا عم متزقش ..بس صح انت عرفت ازاى نتيجه المباراه ؟؟؟
الرايق :- ده ماتش متسجل يا اهبل انت كمان
***************
سنعود بعد قليل
***********
ودعا للقلق والنوم غير المريح على المكاتب فى العمل
شركه الضاحكون تلى شووب بتقدم ليكم طقم المكتب الفظييع ..عدد واحد مكتب مع اربعه سرير ..واحد للنوم والتانى للراحه والتالت للاستجمام والرابع للاحلام ..خلاص مع الضاحكين مفيش قلق وهيقدر كل الموظفيين يناموا براحتهم
فقط اتصل على 03000333
عدنا
*******
صبرنى يارب سيداتي آنساتي وسادتي برضه زي بعضه هاهاهاها
موعدكم الان مع برنامج الطبخ العالمي كل بس ما تحفش تقديم صبرني يارب
صباح الخير يا حلوين . النهارده هانقدملكم اكله جديده فى برنامج كل بس ما تحفش .والحقيقه انا جالي اميل غريب جدا بيقولي ليه مسميه البرنامج بتاعك كده ؟؟ مع ان الاسم واضح جدا . انتم عارفين انا باهتم بالرشاقه وباقدم اكلات تنفع للدايت والناس الى بتعمل رجيم . وعشان كده قلنا نخلي البرنامج اسمه كل بس ما تحفش . هاهاهاها .ودلوقتي هانبدا نعمل اكلتنا الجديده وهى صنية الجلاش بالبتنجان والمشروم .
المقادير : نص كيلو جلاش بس يكون مطبوخ قبل كده وده بيبقى موجود فى اي سوبر ماركت عاتي .
نص كيلو بتنجان وممكن نجيبه معلب زي ده ونريح نفسنا .
بصلتين مفرومين وبضتين و مشروم برضه علب عشان نأنتخ دايما .
ودي كلها حاجات متوفره ومش غاليه .
وعودين قصب ...
الطريقه : احنا نجيب الجلاش ونحطه فى صنيه وفوقه البتنجان وفوقيهم المشروم ونحط بؤ ووووووتر كده عليهم عشان نطري المسائل بس ما نحمرش البصل عشان ما نضطرش نحطله سمنه وده كله بيزود الفات فى الاكل .وبعدين نضرب البيض مع البصل فى الخلات ونحط عليهم شويه حبركوش مبركش وسمندرين بتدي طعم رااااائع رااااائع للاكل .ونديف العك الى عملناه فى الخلات ده للصنيه الى فوق ونحتها فى الفرن الكهربا ده لمدة خمس ساعات ونص ونطلعها تكون جاهزه للرمـ .... ايه للاكل طبعا وما ننساش الدوكوريشن بتاع الاكل ممكن نحط عليها من فوق سم اوف فجل مع سلايز قوطه على رشه حبركوش مبركش برضه اد ايه شكلها جميل احنا عارفين ان العين بتاكل قبل البؤ تبعااااااا.
وممكن نقدم مع الاكله دي كلحوم كيلوا كباب وكفته من عند فرحات وجايز حمامتين مشويين تبقى حاجه لتيفه برده
وكسنف حلو بقى مفجأه القصصصصصصصب .
القصب ده يا ستى تاخديه وتقعدي فى التراس بعد الاكله دي تمصيه وترمي التفل من البلكونه عشان ما توسخيش الحته عندك .وده هايساعدكم على هضم الاكله الفزيييييعه دي والف هنا لكم وما تنسوش دايما كككككل وما تحفش الراعي الرسمي للبرنامج
سبازمو اميريز مهضم ومضاد للانتفخات والتقلصات
*************

والى اللقاء مع يوم جديد

مع الضاحكون




هناك 40 تعليقًا:

همس الاحباب يقول...

ايه اللى بيحصل ده
كده كله تمام
فينك يا روقة

همس الاحباب يقول...

هههههههههه
منبر الضاحكون
وكامل الاوصاف
يا سلام على البرامج الجامدة طحن ايه التحليل الرائع ده
والله يا ستو انا شايف انك تاخديها منقصيرها وتشتغلى صبى حلاق
وتسيبك من البرامج
اما الاخ كامل الاوصاف
مكانه موجود قدام السيدة
وحسنة قلبلة تمنع بلاوى كتيرة
ههههههههه

همس الاحباب يقول...

عبده الرايق
ههههههه
الكابتن ابو صباع
جاب جووووون فى الوقت البدل الضايع
وخد كارت احمر
ههههههه
الواضح ان الكروت الحمرا هتبقى ظاهرة فى المدونة دى
انا شايف فرنسا واقفة على دايرة السنتر وبتحط ايدها وبتطلع كارت احمر للرايق
هههههه
بقولك ايه يا ابو الصباع ممكن تقولنا مباراة مصر وزامبيا هتنتهى كام
بالمرة

همس الاحباب يقول...

صبرنى يارب
هههههه
ايه ده انا قدام شيف اعالى الحلل ولا ايه يا جدعان
هههههههه
جامدة قوى الصينية
خسارتها فى الرمى
وفى الاخر تيك اواى برده
هههههه
تسلم الايادى

همس الاحباب يقول...

بصراحة تسلم الايادى
البوست جامد بصراحة
ولا الاعلانات مش ليها حل
يلا بقى اسيب مكان للزوار

حنين القلب يقول...

انا قولت اجى احجز من العشرة الاوائل وارجع اقرى


فاصل ونعود

همس الاحباب يقول...

حنين القلب
تحجزى من ايه
هههههههههههه
هى نتبجة الثانوية العامة
دى قناة الضاحكون يا شاطرة

حنين القلب يقول...

همس الاحباب

هو مش فيه غيرك قاعد على باب المدونه تاخد اول تعليق

انا هاكلم الرايق مخصوص يغير ميعاد البوست يخليه مفاجأه علشان مش اتصبح بتعليقك كل مرة

المهم

لما انا اشتغل صبى حلاق اومال انت هتشتغل ايه ؟؟؟
انا عارفه انك مع باولو ومش بحب اقطع عيش حد
بص يا خالود
تصدق انا لقيت ليك شغلانه روعه
طالبين فى القسم مخبريين قصيرين لا يتعد طولهم 50سم علشان مش حد يشوفهم وهما بيراقبوا
روح قدم اكيد هيقبلوك
وربنا يوفقك

حنين القلب يقول...

عبده الرايق

سيبك انت اكتر حاجه عجبتنى طريقه ردك على الضيف بجد روعه
ايه الهدوء ده والرد الدبلوماسى ده


مذيع اباً عن جد يا روقه
روقه طالبه منك طلب
احذف اول 5 تعليقات انا مش شايفه ليهم لازمه وبعدين الصراحه كده انا بتشائم لما يكون خالد اول تعليق

ربنا يكرمك اتصرف بدل ما اولعلكم فيه

حنين القلب يقول...

صبرنى يا رب

ايه الاكله الفذيعه دى
هههههههههههههه
والنبى يا اختى ايه الحبركوش المحبرك ده
وبيتجاب منين
وتفتكرى لو اكلت الاكله الحلوة دى ونمت هقوم تانى ولا دى نومه بلا قومه
ههههههههههههههه
الرجاء الاجابه على سؤالى

تسلم ايدك يا صبرنى
عسسسسسسسسسسسل با ام مريم

همس الاحباب يقول...

حنبن القلب
ههههههه
تصدقى التعليق عجبنى قوى
وعرفت قد ايه انك غلبانة ونظرك ضعيف
ومحتاجة المواساة يا حرام
اولا انا مش بحجز سرير
انا بحجز سويت فى العباسية علشان الغلابة اللى زيك
وبعدين ان 32 سم وهبقى مخبر مش ظابط
وانتى عارفة مين اللى بيضرب على على القفا المخبر ولا الظابط لو عرفتى ابقى اتصلى على 0900
بجد اول مرة اعرف يا قطة
حاضر من عيونى
ويا ترى القط الاسود لسه عايش ولا الله يرحمه
نورتينا الشوية دول
بقولك ايه مامتك بتنادى عليكى
وبتقول عيلة تايهة يا ولاد الحلال

عبده الرايق يقول...

ايه ده
همس الاحباب وحنين القلب
انتوا وريثتوا التعليقات ولا ايه ؟؟
عموما
انا ليا معاكم تعليق بعد الماتش
انا لسه صاحى من النوم
اتفرج على الماتش وارجع لكم

Ahmed يقول...

حنين القلب
عليه الصلاة والسلام
دم خفييييييييييييييييييييف جدا
واحنا بخير وزي الفل غيرش بس الحسد
ههههههههههههه

عبده الرايق
ايه العظمه ديه؟
بتحللوا متش مسجل مع شخص التنسيق عينه هنا؟
لأ لا
ده انجاز لازم بدرس في الكتب


صبرني يارب
ااااااااه

قولي كده بأه
انتم واخدين توكيل من الصيدليه اياها
ههههههههههههههه
دمك تحفه تحفه تحفه وعثل

عبده الرايق يقول...

عدنا
بعد تعادل الفريق القومى مع زامبيا
اتقسمت الثلاث نقاط كالتالى
نقطه لمنتخب زامبيا
ونقطه لمنخبنا الوطنى
ونقطه لجمهور مصر
بجد جابولنا نقطه
يلا باين كل الفريق اكل من اكله صبرنى يارب
ههههههه
تحياتى للجميع

عاشقه الرومانسيه يقول...

حنين القلب
وحياه طنط ظاظا تبعتى لى نظاره زى اللى لبسها الاستاذ كامل الاوصاف فتنى
محتجاها والله يمكن اشوف الدنيا بمبى بمبى بمبىىىىىىى



عبده يارايق
هو ده التطور
ماتش متسجل
ياراجل احنا لسه هنستنى النتيجه؟
لازم نكون سابقين بخطوه دايما




صبرنى هانم يارب
يعنى بعد الاكله الهايله دى استعمل
سبازمو اميريز مهضم ومضاد للانتفخات والتقلصات
ولا هاحتاج غسيل معده؟

صيدلانيه طالعه نازله يقول...

حلوه حكايه السبازمو اميريز ده بس انتى كده بتاخدى اختصاصاتى و بتلعبى فى ملعبى
بصى انا حسيب نمره الصيدليه و العنوان و اللى يتعب من الاكل نبعتله الدوا دليفرى و لا ايه رأيك
استاد عبد باشا الرايق كان بعد ماتش مصر و زامبيا و لا قبله يعنى مش لو كان قبله كان جاب لنا نتيجه الماتش و رحمنا من حرقه الدم بس اعتقد العيب كان ان الحضرى حلق الكنافه اللى كانت فى راسه و عمل نيو لوك و طبعا اثر على تفكيره و خلا مخه استهوى

حنين القلب يقول...

عبده الرايق

خلالالالالالالالالالالالالالاص
انا خاصمته يا بابتى ومش هاكلمه تانى
بس ابعده هو عنى
والنعمه لو جه جانبى تانى او غلس عليه مش هيلاقى الا نينى عينه فى ايده
ماااااااااااشى

خالود
تعالى انا عملت ليك ساندوتش لحمه من وراه بابا وماما
اخويا برضه يا جدعان ومش يهون عليه

حنين القلب يقول...

احمد ابو العلا

عليه الصلاه والسلام
ربنا يكرمك
دم حضرتك اخف
والله احنا عارفين ان العين سوده وهى دى السبب فى اللى بيحصل
خلاص نجيب حد يبخرهم وخلاص

نورتنا

حنين القلب يقول...

عاشقه الرومانسيه

عيونى يا سكرة
هى تغلى عليكى حتة نضارة
بس تفتكرى هتشوفيها بمبى ؟؟
بس لو لقتيها كحلى مش ذنبى
ههههههههههههه

وحشتينى يا عسوله

فرنسا هانم يقول...

بنتى الغاليه
حنين القلب
يبدو ان تلك النظاره باهظه الثمن جدا
لذلك لا يرتديها الا ملوك ورؤساء الدول العربيه فقط
اما الشعوب
فلا ترتديها مطلقا لذلك ترى الحقيقه اما اعينها
بوست جميل جدا يا حنين
وخفه دمك محصليتش احييكى جدا

فرنسا هانم يقول...

الرايق
كده برضه ميحصلشى
دول 3 لاعبين جابوا الاجوان يا رايق ؟
ولا 3 مقدمين للاستديو التحليلى اتعدموا
هههههههههه
ردك على المداخله كان ديمقراطى جدا يا رووقه

فرنسا هانم يقول...

صبرنى يارب
هههههههههههه
هههههههههههه
تحيه لشركه كل وماتحفش
وانا بدعوا كل الناس انها فعلا تاكل القصب فى التراس وترمى على الشارع علشان يحللوا فلوس النظافه اللى عمالين يلهفوها مننا بدون داعى
عسسسسسسسسسسسل يا صبرنى يارب

صبرني يارب يقول...

همس الاحباب

رمي ؟؟ واي رمي امل انت هاتتغدى ايه النهارده

ههههههههههههههههه

صبرني يارب يقول...

حنين :

نو نو نو على راي بابا الرايق

نومه بلا قومه لييييه ان شاء الله
بس ممكن تقومي بعد ثلاث مائة سنين وازدادو تسعا

اي خدمه يعنى
هههههههههههههههههههه

صبرني يارب يقول...

أحمد ابو العلا

تسلم يارب ربنا يكرمك

صبرني يارب يقول...

عبده الرايق

ينفع كده يا بابايا بتشنع على اكلي

وتلزق فيا خيبتنا الناقعه

حتى الكوره والهجص مش نافعين فيه

صبرني يارب يقول...

عاشقة الرومانسيه


غسيل معده ؟؟؟

اه تصدقي فكره ؟؟؟ اهو اكل عيش برضه

صبرني يارب يقول...

صيدلانيه طالعه نازله

وربنا فكرررررررره

اوعدك الحلقه الجايه بقى

صبرني يارب يقول...

فرنسيتى

يا ست الكل انا ماليش بركه الا هما يعنى امال يقعدوا يعملوا ايه ينضفوا الشارع

انتى الى عسل والله

صبرني يارب يقول...

همس الاحباب وحنين والرايق

بجد تسلم ايديكم انا ضحكت بجد من قلبي وانا باقرا البوست امبارح رغم انى قريته قبل كده فى الدرافت

ربنا يكرمكم يارب

حنين القلب يقول...

فرنسا هانم

مامتى حبيبتى
والله الظاهر كده يا مامتى
بس عارفه لو رخصوها وكلنا لبسناها هنرتاح برضه وهما كمان هيرتاحوا من الصداع بتاعنا

وخفه دمى دى وراثه منك يا مامتى

حنين القلب يقول...

صبرنى يا رب

على اساس اننا من اهل الكهف

الحمد لله انى مش اكت منه ياختى
العمر واااااااااااااحد

عسوله يا صبصب

قمر 14 يقول...

ههههههههههههه
ههههههههههههه
تحففففففففففففففففففه
ربنا يكرمكوا يارب
حنين القلب قمه فى خفه الدم
الرايق استاذ بلا منازع
صبرنى يارب الابتسامه كلها

kochia يقول...

حلوة ودمها خفيف
متميزين

تحياتي

عبده الرايق يقول...

قمر 14
والله مشرفانا دايما بوجودك
شكرا لكى جدا جدا جدا

عبده الرايق يقول...

kochia
بنت السويس الباسله
وحشانا جدا
عامله ايه ؟
انا عارف انى مقصر من ناحيتك
تحياتى لكى

حنين القلب يقول...

قمر 14

انتى يا حبيبتى اللى دمك عسل وسكر كمان

نورتينا

حنين القلب يقول...

كوشيا

وانتى سكرة
منورنا ووحشانى والله

بـِصَمتـِـ أميرة ــــى يقول...

سبازمو بيرالجين افضل على فكرة
هههههههه
سكرررر بجد
برنامج يتيحلى التنحى عن منصبى وترك كرسى الاذاعه لسيادتك فورا
هههههههه
تقبل مرورى وتحياتى
ملكة بحجابى

الطائر الحزين يقول...

ايه يا بو همس انت وحنين مستولين على البرامج طيب حد يرد عليا لما بتصل بيكم فى الحلقات

روقة خدونى معاكم فىا لحلقة الجاية حتى ولو صنية كنافة