يوم جديد مع الضاحكون

همس الاحباب ...اعزائى مشاهدى قناة الضاحكون الفدائية يسعد مساكم بكل خير

صرح مسئول وانا مش مسئول.. انه نظرا للازمة الطاحنة التى تمر بها البلاد بخصوص رغيف العيش وازمة الانابيب ..بيب بيب .. ان السيد كعبول الحدق قام بتشكيل ائتلاف وزارى جديد يتولى مهام الوزارة

والى حضراتكم التشكيل الوزارى الجديد

الدكتور / احمد دقيق...... رئيسا لمجلس الوزراء ورغيف العيش

الدكتور / على اللتات .... وزيرا للصحة ورغيف العيش

السيد/ مصطفى العجان ... وزيرا للتجارة ورغيف العيش

السيد /اسماعيل فينو . .. .وزيرا للبترول ورغيف العيش

الدكتور / هانى ردة .... وزيرا للعدل ورغيف العيش

السيدة / فتكات فرنة...... وزيرة الخادمات ورغيف العيش ( القوى العاملة سابقا

السيد / يوسف وابور الجاز.... وزيرا للتضامن ورغيف العيش

السيد / على سبرتو.... وزيرا للدفاع ورغيف العيش

الدكتور / سيد انبوبة..... وزيرا للداخلية ورغيف العيش
وفى اول تصريح للسيد / احمد دقيق رئيس الحكومة لقناة الضاحكون الفدائية

اعلن سيادته انه سيقضى على طوابير العيش وازمة رغيف الخبز فى غضون 3 اسابيع وذلك باغلاق جميع المخابز وتشميعها بالشمع الاصفر ومن موقعى هذا اعد كل مواطن بانه من حقه ان يصله كيلو باتون ساليه دليفرى بدلا من رغيف العيش الغير صالح للاستخدام الحيوانى وذلك نظرا لشكوى الحيوانات المستمرة من رغيف العيش كعلف من جانب وكذلك توفير المسامير المحشوة بداخل الرغيف

وفى تصريح للدكتور/ سيد انبوبة وعد سيادته بالقضاء على ازمة الانابيب والغاز طبيعى وذلك بالرجوع الى استخدام وابورالجاز ومنع استخدام الانابيب وذلك حتى يتسنى لنا تصدير الغاز بابخس الاسعار للشرشوحة المجاورة ونموت نموت وتحيا الشرشوحة

كان معكم من فوق انبوبة البوتجاز من امام فرنة ام قويق

محدثكم خالد همس الاحباب
**************
مشاهدى القناة الاعزاء ظلوا معنا فانت معنا لن تستطيع تغيير مؤشر القناة
فى نبأ هاااام صرح السيد / زعبوط العفريت المسئول عن ادارة البورصة المصرية على كل مواطن سرعة التوجه لاستلام نصيبه من الاسهم والدروع الواقية لاننا ناويين نبيع البلد ونشردكم وعلى كل مواطن ان يحمل معه شهادة معاملة الاطفال سارية المفعول ومن جانب اخر على كل مواطن ان يسارع بتجهيز جركن فارغ و2 طشت الومونيا لاخذ نصيبه من ماء النيل قبل ما نخصخصوه وكذلك الاحتفاظ بنصيبه من الاهرامات وابو الهول وبكده يبقى كل واحد اخد حقه تالت ومتلت والان بعد هذا التصريح سيعقد مؤتمر صحفى لتلقى الاسئلة والاجابة عليها
سؤال صحفى .. يا ترى سيادتك الاسهم دى انعمل بيها ؟؟
المسئول ..بس يا بنى ده سؤال جميل ممكن تعمل بيها نبلة تصطاد بيها عصافير وممكن تعمل منها مراكب ورق واحسن طريقة تبلها وتشرب ميتها 3 مرات على الريق هتحميك من الضغط والسكر وكرشة النفس
وفى نهاية مؤتمرنا الصحفى الديمقراطى الشفاف شفافية زيت الكريستال
نتقدم لكم بالشكر على حسن متابعتكم لنا كان معكم
مراسلكم لقناة الضاحكون الفدائية
خالد همس الاحباب
******************

سنعود بعد قليل

*********

عطشان تعالى اشرب .. اللع اللع

خد منى كوبايه .... اللع اللع

والقدره ويايا .... اللع اللع

عرقسوس ابو دبوس ... احلى عرقسوس ... واطعم عرقسوس
اتصل على 03000333 واحنا هنوصل الطلبات لغايه عندك

كل ماهو عليك تتصل فقط على 03000333 واحنا والعرقسوس والقدره هنوصل لغايه بيتك

سعر الدقيقه 30 جنيه فقط لاغير ....... والنبى يابلاش

*******

عدنا

*******

فرنسا هانم :- اعزائى المشاهدين والمشاهدات ... ازيكم والله سلامات

موعدنا الان مع برنامجكم الطريق المعاكس .. ويسعدنا ان تستضيف فى حلقه اليوم
الاستاذ .. نازل محمد ابو نزيله عضو الامانه العامه للهيئه القوميه للاتجاهات التنازليه

والاستاذ .. صاعد محمد ابو صعيده عضو الامانه العامه للهيئه القوميه للاتجاهات التصاعديه

اهلا استاذ نازل واهلا استاذ صاعد ... يلا بقى شدو حيلكم عايزين نتفرج على شرشحه وردح محصلشى وياريت كل واحد فيكم يفرش الملايه اللى جايبها معاه علشان نسخن المواضيع

نبدء حلقه اليوم مع الاستاذ نازل .. استاذ نازل اهلا بيك انا سمعت عنك كلام خطير قوى ومنيل بنيله من الاستاذ صاعد وانا مش فتانه لكن احب اقولك انه شتمك وسبك وقال عليك اهبل وعبيط وبرياله وانه هيمسح بكرامتك الارض فى حلقه انهارده

نازل :- ياستى الله ياسامحه .. الشتيمه بتلف تلف وترجع لصاحبها ... كبرى الجمجمه
فرنسا هانم :- لا ياروح طنط احنا على الهواء لازم تاخد حقك منه ومن حبابى عنيه قال اكبر الجمجمه قال .. انت هتخاف منه ولا ايه ؟؟

نازل :- ياستى فرنسا هانم انا مش بخاف الا من اللى خلقنى .. لكن هو شتمنى فى غيابى ومقدرشى يشتمنى فى حضورى يبقى انا مسامحه

فرنسا هانم :- مساااااااامحه !!!!!!! نعم نعم نعم ... لا بص بقى اقعد عوج واتكلم عدل انا قصدى خير لكن الراجل الاهبل ده قال عليك انك برياله وعبيط والهيئه بتاعتكم كلها حراميه .. حصل منك الكلام ده يا صاعد ولا محصلشى

صاعد :- انا متكلمتش معاكى ابدا الا دلوقتى يا فرنسا ... ونازل صاحبى واخويا واحنا اصدقاء

فرنسا هانم :- ودلوقتى مع فاصل اعلانى ونعود بعد قليل ... ايه يا روح طنط انت وهو ... انا مكلفه نفسى وجايبه لكم اتنين كونو ومطفحاكم اتنين حلبه بحليب واتنين نسكافيه علشان تحبوا بعض هنا ولا ايه ؟؟؟ ما نقلبها بقى كازينو ولا حلقه رومانسيه ونحب فى بعض .. لالالالالالالالا انا ابشلكم انتوا الاتنين انا ست صايعه وبلاط الحجز واكل من جسمى رقااات .. اتعدل ياض منك له احسن مش هيحصلكوا طيب

يلا يا مخرج ابتدى الحلقه الزفت دى لما نشوف اخرتها مع العالم الجربانه دول

رجعنا تانى ليكم اعزائى المشاهدين وسؤالنا للاستاذ صاعد

انت بتخاف من الشخص اللى قاعد قدامك ده على فكره هو بيقول عليك هايف واهبل

صاعد :- اخاف مين ونيله مين .. عليا الطلاق بالتلاته كل ماتحل تحرم اروح فيه فى داهيه واكسر دماغه ودماغ اللى جابوه

فرنسا هانم :- هههههه ايوه كده عسسسسسسسسسل اشتغل يا اونكل شوشو

نازل :- اتكلم بس على قدك تروح فى مين انت يا صرصار ؟؟؟؟ انا افعصك بجزمتى انت واللى يتشددلك
فرنسا هانم :- اشطه بالهبل كده الشغل ولابلاش ... حد يقلب شبشب يا جماعه ولا جزمه المواضيع هتسخن
صاعد :- انت بتتكلم عنى يا ابن التابلبيفيغفيقسفقسفغيغفيفءفيقغئفقس5ثبءفقس
نازل :- ايوه بتكلم عنك وانت اللى نملاخهعلالبؤءفبغلالؤغقيخعغبابءفهعلاب

صاعد :- نملابءعغلمنىالؤهغفبهعانتالعغ

نازل :- رلبيبانهمكخهغببءفهعاكخمتن:/،ت

صاعد :- اااااااااااااااااه اااااااااااااه

نازل :- ااااااااااااااه ااااااااااااااااااه

فرنسا هانم :- ااااااااااااااااااه ... شيداتى انشاتى شادتى يشعدنا ..ااااااااااه ..ان تكونوا اشعدتم بحيقه انهايده ...اااااااااه .. وايى اليقاء فى حيقه قادمه ..اااااااااااااااااااااااه

************

سنعود بعد قليل

**************

الضاحكون تلى شوب ترحب بكم ..انهارده بنقدم لكم مفاجأه المفاجأت .. هنخلصكم من الحشرات المنزليه من غير مبيدات

عزيزى المشاهدين ..كلنا عارفين ان المبيدات الحشريه بتسبب الضرر لاطفالنا الصغيرين ..علشان كده احنا جيبنا ليكم مفاجأتنا

مجموعه الضاحكون للتخلص من الحشرات المنزليه ..مجموعتنا عباره عن ..3 فرد شبشب حمام الوان معتبره ومقاسات مختلفه ..الشبشب الصغير ده للصراصير الصغيره ..والشبشب الوسط للصراصير الوسط ..والشبشب الكبير لامهات الصراصير ..مش بس كده

لا الضاحكون تلى شوب بتقدم .. مسدس خرز للحشرات الطائره وعليه 6 اكياس خرز هديه

استنوا لسه مجموعتنا منتهتش .. بنقدم كمان مصيده استانلس للفيران

كل ده بسعر محصلشى فقط 2499 جنيه زائد مصاريف الحشن

فقط اتصل على 03000333 زيرو تلتميه زيرو تلات تلاتات

*********

عدنا
********************

الطائر الحزين .. يسر برنامج خمسة تفافة ان يستضيف اليوم الاستاذ الجامعى الكبير صبحى الملط ..ليحدثنا عن ظاهرة التحرش اللى بقت لبانة فى بق الناس واللى محدش عاوز يتفها ويعرفنا تداعيتها واسبابها

الطائر الحزين :- استاذ صبحى الملط ما رأى حضرتك فى ظاهرة التحرش؟

الملط :- شوف بقى كدة ومن غير لف ودوران المشكلة الاساسية تبنع من محورين اساسين اول محور فيهم لسه بيجهز فى المشاروات بتاع المجلس القومى للمرأة لأن الطريق لسه بيسفلت هناك وكلنا عارفين ان المجارى هناك ضاربة من ساعة أول مؤتمر قومى للسكان والمحور التانى زى ما هو معروف للجميع يتوه لا فيه اشارات ولا يافتات متعلقة علشان الواحد يعرف يوصلة

مداخلة : هو الراجل الملط ده بيقول ايه ؟؟ ده باين عليه اسم على مسمى ..اسمه ملط ونافوخه ملط اللملط كمان ...انت يا عم ما تفوق انت مش عارف السؤال ولا ايه؟

الملط : ارجو من الأخ المواطن لا يحكم الا بعد أخر الجلسة قصدى أخر البرنامج ..معلشى ابقوا ادونى رقمه الولد ده

الطائر الحزين : ايه يا استاذ ادخل فى الموضوع احنا برنامجنا خمس دقايق بس ومش عاوزين ننضرب فى السوء ما انت عارف القناه لسه بتحبى ...انا مش عارف بس ايه اللى خلانى انطس فى نظرى واجيبك انت ؟؟؟

قول قول ربنا ينفخ فى صورتك وانا هساعدك

تفتكر يا استاذ ملط مين عليه العبء الاكبر فى مشكلة التحرش البنت ولا الولد ولا الاثنين معا ؟

الملط : الامر متعلق بمحورين

الطائر الحزين :- ياعم ابوس رجل اللى خلفوك من غير محاور ولا مأور ولا محشى حتى .....اتكلم دوغرى

طبعا كلنا عارفين ان البنت زى الولد مش كمالة عدد يبقى الولد والبنت هما السبب وكمان اللى رباهم وانا وانت والمجتمع والناس

سنعود بعد قليل

********

فقره اعلانيه

بدى كارينا محزق واستريتش ملزق الاثنين معا ب4جنيه ونصف لمحاربة الغلاء اتصل بنا يصلك منتجنا لحد باب البيت سعر المواصلة 750جنية لو كان عندك مطار فوق سطح البيت أما لو مكنش عندك مطار يبقى تروح تشرب من البحر هو احنا هنقطع نفسنا خليك بعبلك كدة و اوعى تتصل بينا

برضه تليفونا 03000333

**********

عدنا

*********

الطائر الحزين : اذا استاذ ملط القضية مشتركة بين قلة أدب البنت وسوء تربية الولد؟؟؟

الملط :- اى نعم هو كدة بالضبط ولازم الحكومة تضع قوانين رادعة وتضع طريق يمشى فيه النساء وطريق للرجال ويبقى أخرهم يشاورا لبعض من بعيد لبعيد ويبقى كدة قضينا على المشكلة

الطائر : طيب والمواصلات نعمل فيها ايه؟

الملط: وهى دى مشكلة كل حاجة تبقى بدورين مترو بدورين-اتوبيس بدورين - توك توك بدورين وكل واحد يأخذ دور ويأجرة بعد كدة لو حب ايجار جديد ويستفيد ويبقى قضينا على الازمة السكانية والتحرش فى آن واحد

الطائر: شكرا جدا للاستاذ الملط ونوعدك بدراسة مقترحاتك ونوعدك وعد اكيد ان دى اخر مرة هتعتب باب القناة ونقول له تحب تسمع ايه ؟

الملط : الاغنية الشعبية وادحرج واجرى يا رمان

الطائر الحزين :- بهذا نكون قد وصلنا الى نهاية حلقتنا ويتضح منها العلاقة بين حبل الغسيل العربى المنشور والذى تم مناقشتة قى القمة العربية المنعقدة فى العاصمة الصينية بكين وبين موضوع التحرش وطبعا زى ما انتم عارفين الصين دخلت كل بيت عربى وبذلك بقت واحدة مننا فمحدش يستغرب

***************

والى اللقاء فى يوم جديد وسعيد
مع تحيات فريق العمل
بمدونه الضاحكون