افتتاح محطه الضاحكون

الرايق :- استعنا على الشقا بالله يلا يا جماعه نبتدى ..بس ياريت الله يكرمكوا تحاولوا تداروا القرعه دى بلاش فضايح الاضاءه يابنى انت وهو ... فين مهندس الاضاءه ؟؟

المخرج :- معلش يا رايق ملقناش مهندس اضاءه ... جبنا معانا شمعه

الرايق :- ميهمش ... بلاها مهندس اضاءه .. بلاها شمع ....انا عامل حسابى وجايب معايا كشاف

المخرج :- يلا يا رايق اجهز احنا كل برامجنا على الهوا اول ما اقول ثرى ..تو .. وان .. تبتدى على طول وتقراء كلمه الافتتاح

الرايق :- قصر فى الدور ياعم الحاج واتكل على الله ..انت بتكلم الدكاتره عبده الرايق على سن ورمح

المخرج :- خلاص يا دكاتره ..جاهز ؟؟؟ ثرى تو وان .... احنا على الهواء

الرايق :- وشكرا على حسن استماعكم... والسلام عليكم ورحمه الله وبركاته

المخرج :- حرام عليك هتجيب درافها قبل ما نبتدى ؟؟ اقلب الورقه يا رايق وامسكها معدوله

الرايق :- اوووه ..نووو ..سورى ..انا قلتلكم اكتبوها بالمانى ولا بالفرنساوى ولا باى انجلش ..انا ضعيف فى العربى

المخرج :- ابوس ايدك احنا على الهوا بلاش فضايح

الرايق :- خلاص خلاص شط اب يور ماوس ..

الاخوه الكرام سلام الله عليكم نحييكم ونفتتح معكم اليوم قناتنا الفدائيه مع الضاحكون ..تليفون القناه 03000333 زيرو تلتميه زيرو تلات تلتات اتصلوا بينا من اى محمول او اى مكواه بالبخار او اى فانوس وهتلاقونا دايما معاكم

والان نفتتح القناه باسم الله الرحمن الرحيم

وشكرا على حسن استماعكم والسلام عليكم ورحمه الله وبركاته

*********

سنعود بعد قليل
**********
فقره اعلانيه ...

جزر حسونه بعروشه .. تاكل منه ماتحوشه

احلى جزر .. حسونه.. يقوى النظر .. جزر حسونه

اتصل على رقم 03000333 سعر الكيلو 299 جنيه زائد مصاريف الشحن

************

عدنا

*********

فرنسا هانم :- واليكم الان نشره اخبار الضاحكون

فى نباء عاجل لوكاله الضاحكون الاخباريه .. قمه عربيه طارئه فى العاصمه الصينيه بكين

علم مندوبنا فى بكين ان قمه عربيه عاجله تقام الان فى الصين لمناقشه احوال حبل الغسيل فى الوطن العربى .. وقد وافانا مدوبنا بالتقرير التالى

سلام الله عليكم تقام اليوم هنا فى بكين القمه العربيه رقم 25 مليون لمناقشه اوضاع حبل الغسيل حيث اثبتت دراسه علميه ان سؤ حاله المواطن العربى وتراجع قدراته ينتج من اصرار المواطنات العربيات على نشر الغسيل الابيض بره والغسيل الالوان جوه .. وقد اثبتت الدراسه ان الغسيل الملون يزهزه العين وينمى المخ والاعصاب ويساعد على النمو لذلك اتجهت معظم الشعوب الى نشر الغسيل الملون بدلا من الغسيل الابيض وقد علمنا ان هناك جذب وشد ولطم وربما وصل الامر الى تطليع اللسان وتلعيب الحواجب بين القاده العرب وانقسم القاده الى 22 جبهه مستقله كل جبهه تحاول ان تنشر الغسيل براحتها ..

كان معكم محمود رابسو من امام محل الكشرى بالعاصمه الصينيه بكين

فرنسا هانم :- فى نباء عاجل لوكلات الاخبار العالميه تم اختطاف 75 سفينه قباله السواحل الصوماليه .. وقد اتصل الضاحكون بمراسلنا فى الصومال

سعيد .. انت ياض يا سعيد .. انت يا وله .. سامعنى

سعيد :- ايوه يا فرنسا هانم اسمعك بوضوح .. حول

فرنسا هانم :- حول ايه ونيله ايه ياهبل هو احنا بنتكلم فى لاسلكى ..الا قولى ايه حكايه ال 75 سفينه اللى اتخطفوا دول يا سعيد ؟؟؟؟

سعيد :- والله يا فرنسا هانم انا معرفشى عنهم اى حاجه انا مالى ومال الكلام ده انا راجل قاعد على القهوه فى حالى بلعب عشره طاوله مع واحد صومالى وكل صوماويل مخى مركزه فى اللعب ومش عارف بصراحه انتى بتتكلمى عن ايه

فرنسا هانم :- سعيد ... انت اتجننت يا اهبل .. مش انت مراسلنا فى الصومال ؟؟ قوم يلا فز شوف ايه الحكايه

سعيد :-بالراحه بس يا فرنسا متزقييش.. خلاص فرجت فى واحد جاى ومعاه رشاش اهو ... سلام عليكم .. احنا نحب نعرف منك ايه حكايه ال 75 سفينه اللى اتخطفوا هنا فى الصومال

مواطن صومالى :- سفن مين وخطف مين انت باين عليك عايز تموت دلوقتى

سعيد :- لا والنبى يا عم دى الوليه الحشريه اللى اسمها فرنسا هانم هى اللى بتقدم النشره وهى اللى قالت لى اسئل .. انا كنت نايم من اسبوعين ولسه صاحى دلوقتى وهى عايزه تعرف كل حاجه .. عموما انا اسف ..

كان معكم مراسلكم

سعيد ابو رفاص من امام قهوه السعاده فى الصومال

*******************

سنعود بعد قليل

*************

فقره اعلانيه

ايدك يا عسل والريموت ... اللى يحول عن محطتنا يموت

شركه الضاحكون تلى شوب تقدم لكم قنبله الموسم .. اخيرا وبعد طول انتظار ... مجموعه رباط الجزمه القيمه .. احنا بنقدم لكم احلى منتجاتنا من اجود اربطه الجزمه .. رباط تلاته عقده اسبشيل .. ورباط خمسه عقده .. مخصص لرجال الاعمال

مش بس كده

لا شركه الضاحكون تلى شوب بتقدم هديه علبتين ورنيش واحده بغطاء والتانيه من غير غطاء

برضه لسه عرضنا منتهاش ..

بنقدم كمان علبه استانلس هديه مع المجموعه كل ده بكام ؟؟؟
سعرنا مغرى للغايه فقط 999 جنيه زائد مصاريف الشحن
اتصل على رقم 03000333 زيرو تلتميه زيرو تلات تلاتات

*******************

عدنا

***********

حنين القلب :- اعزائى المشاهدين اهلا ومرحبا بكم فى برنامجنا الفكاهى .. مقلب الضاحكون تذكروا جيد كل برامجنا على الهواء مباشره

برنامجنا هو برنامج المقالب يعنى الكاميرا الخفيه .. انهارده بيسعدنا ان نستضيف النجم الكبير الفنان محمود شويغر ونجمنا الكبير غنى عن التعريف فقد حصل على 15 اوسكار عن افلامه المتميزه .... ولعلنا لاننسى الفيلم العظيم ابره البابور مكسوره .. ويسعدنا ان نحييى الضيف الكريم ...

اهلا استاذ محمود

شويغر :- اهلا وسهلا بيكى يا حنين القلب

حنين القلب :- تسمح لنا نعمل فيك بقى مقلب الضاحكون

شويغر :- طبعا اسمح هو انا جاى ليه امال ؟؟ انا مستنى يلا نبتدى البرنامج

حنين القلب :- نبتدى مين احنا على الهواء دلوقتى ... ياريت بقى تمسك اعصابك .. وتعمل نفسك مش واخد بالك من المقلب خالص .. والساده المشاهدين برضه يعملوا نفسهم مش واخدين بالهم ...

شويغر :- ههههههههه... لعبه حلوه يا ستو انا .. اتكلى على الله ... انا مش واخد بالى

حنين القلب :- استاذ محمود احنا يسعدنا اننا نستضيفك فى برنامج الضاحكون ( فلوس بالهبل ) وبرنامجنا عباره عن ثلاثه اسئله السؤال الاول ب 250 الف جنيه ولو جاوبت السؤال التانى تكسب 500 الف جنيه ولو جاوبت الثالث تكسب معانا مليون جنيه .. يابن المحظوظه

شويغر :- من اولها حسد ..قل اعوذ برب الفلق ...انا معاكى يلا اسئلى

حنين القلب :- امسك اعصابك .. السؤال الاول ... موسييييييييييقى ...انا دلوقتى وانا بكلمك واقفه ولا قاعده ؟؟؟؟

شويغر :- لا اظن قاعده على الكرسى

حنين القلب :- هييييييييييييييه تصفيق حاااااااااااااد برافو برافو تكسب معانا 250 الف جنيه .. ركز بقى للسؤال التانى .. احنا جبنا سؤال سهل اما بقى السؤال الجاى يعتمد على التخمين .......... جاهز ؟؟؟؟

شويغر :- ايوه جاهز ان شاء الله

حنين القلب :- بص يا سيدى شايف الراجل اللى هناك ده ..عايزين نعرف بقى اسمه ايه ؟؟؟

شويغر :- لا والله مش شايفه

حنين القلب :- اللى هناك ده اللى ماسك الكاميرا

شويغر :- لا والله مش واخد بالى

حنين القلب :- يابن الحوله .. يابنى اللى هناك ده ... خلاص استنى ... ارفع ايدك فوق يا صلاح ... ايوه هو اللى رفع ايده ده ... خلاص شفته ؟؟؟

شويغر :- ايوه شفته

حنين القلب :- خلاص نزل ايدك يا صلاح ... السؤال بقى تقدر تخمن الراجل ده اسمه ايه ؟؟؟؟

شويغر :- اسمه صلاح

حنين القلب :- هييييييييييييييه الله الله ايه الحلاوه دى تكسب 500 الف جنيه ... السؤال الجاى بمليون جنيه

ركز بقى معايا ...السؤال بيقول ... ماهى عاصمه جمهوريه مصر العربيه ؟؟؟؟؟

وقدامك اربع اختيارات

- كعب الغزال 2 - ام على 3 - القاهره 4 - سمك بلطى
شويغر :- طيب ممكن احذف اجابه
حنين القلب :-ولا يهمك نحذف 3 اجابات ... يبقى الاجابه المتبقيه معانا رقم ....3 - القاهره
شويغر :- مش عارف طيب ممكن اتصل بصديق
حنين القلب :- لا يا بابا صديق مين انا تليفونى رنات بس

شويغر :- طيب ممكن اخد رأى الجمهور ؟؟؟

حنين القلب :- جمهور مين ..لا يا ناصح انا منبهه على الجمهور اللى هينطق بكلمه هقطع له لسانه

شويغر :- خلاص اتوكل على الله واختار القاهره

حنين القلب :- هو فى غيرها ياهبل ..... مبروووووووووووووك كسبت المليون جنيه ...زغرووووووده

شويغر :- هاتى بقى المليون جنيه

حنين القلب :- استاذ محمود احنا بهزر

شويغر :- نعم ياروح طنط ... عليا الطلاق بالتلاته منا منقول الا بالمليون جنيه

حنين القلب :- والنبى يا عم انا مييييييييح خالص وكلنا على بعض ممعناش اكتر من 75 جنيه

شويغر :- انا قاتل يا مقتول

حنين القلب :- والنبى ياعم محمود انا مستلفه الجزمه والفستان .. حتى الموبايل مايساويش 50 جنيه والنبى معلش .. ده احنا اربعه بناكل فى طبق كشرى واحد

شويغر :- خلاص هاتى طبق الكشرى واياك تعملى مقالب تانى معايا

******************

سنعود باذن الله
مع تحيات فريق العمل بمدونه الضاحكون