الخميس، أكتوبر 23، 2008

جامعة الزكازيخ..فرع زيورخ











جاء يوم الفرحة المنشودة

ونجح أخي الصغييييير في الثانوية العامة...وهاتك يا زغاريد من الست الحاجة والجارات قابلها العريس بمزيج من الشكر والتأفف بعد أن زادت عن حدها...

وفي المساء...وبعد العشاء...والتورتات والجاتوهات والهدايا والبالونات ..اجتمعت الأسرة الكريمة لتقرر مستقبل آخر العنقود

وقبل ما أكمل لابد أن أوضح لكم ان المحروس كبر وترعرع عندما بدأت أسرتنا تشهد عصر الانفتاح الاقتصادي...فتعود أن كل لبسه "مارقات" يعني ماركات وانه لازم يخرج في الويك إند ويسافر يتفسح بره في الأجازات -طبعا مش باحقد عليه ولا حاجة مانا لحقتلي سنتين تلاتة برضه- وأيضا هو الوحيد من ضمننا اللي دخل مدارس لغات وكل صحابه عاليين أوي وبيعملوا أعياد ميلادهم في الفور سيزونز وحاجات كده -معلش أصل أنا محدش أعرفه أصلا يعرف يعني ايه عيد ميلاد-

المهم وبالنظر لمجموع أخي المجتهد المشرف توصلنا إلى أنه ممكن يحالفه الحظ ويدخل كلية سباكة السودان ، ولو حول صرف صحي أسوان بعدها بسنة يبقى تمام...

طبعا محدش استجرى يقول كده وش حرصا على مشاعره الغضة ، فاستدرك أبي الموقف وقال له: مجموعك كده يا دوب يجيبك تجارة أسيوط ولا حاجة ، بس انتا كده هتبعد أوي..خلينا ننام ونبقى نشوف الدنيا فيها ايه

ومنذ الصباح التالي وحتى أسبوعين تاليين وأخي الجميل الرقيق كعب داير -يا حرام- على الجامعات الخاصة المصرية والأجنبية ، يسحب ملف بـ 300 جنيه هنا ، ويملى استمارة بـ 500 جنيه هنا ، ويعمل انترفيو لمدة ساعتين هنا ، واختبار ذكاء بالفرنساوي كده مالوش لازمه -هما هياخدوه هياخدوه بس لو طلع غبي هيدفعوه أكتر-

لحد ما قلبه اتنحر من المشوره واللف والدوران هو والسائق والسكرتير بالسيارة المكيفة ، لكن هنعمل ايه...لازم يشقى علشان مستقبله...مش هو اللي خاب ومجابش مجموع؟..يبقى يستحمل بأه اللي بيحصله..

وبعد الكثير من الأحداث وسؤال الناس.. استقر الرأي على إحدى الجامعات العبيطة.. الغير عريقة.. لكنها أجنبية.. وفي مصاريفها معدية.. وكلها ناس مش جايبه حتى ستين الميه ، وأصر أخي أن يبتعد عن كلية التجارة و أن يدرس مانجمينت Management فاحترمنا جميعا رغبته وباركنا رؤيته

ووقع علي الاختيار لأصحبه يوم دفع الفيس fees أو الpayments وذهبنا سويا إلى "حرم" هذه الجامعة...
طبعا حرم ايه؟ دا الكباريه يتكسف منه.. أول ما دخلنا داعبت أنفي روائح متنوعة مختلطة من أغلى العطور وأثمنها وانا اللي كنت فاكره اني متعوده على البارفانات..جت لي كرشة نفس جامدة جدا ومبقتش عارفة أتنفس...
اللي فوقني عربية كده فظيعة وقفت أدام "الحرم" ونزلت منها واحدة...واحدة بجد شكلها مغنية مثلا أو ممثلة المهم راحت على شلة ولاد وبنات وسلمت عليهم وباستهم واحد واحد وواحدة واحدة.. وانا طبعا متنحة..كرشة نفس ايه..دانا هيجيلي سكته قلبية...لحد آخر واحد سلمت عليه وجت تبوسه زقها كده..قلت والله مجدع...لسا فيكي رجالة يا بلدي...
لقيته بيقولها: معلش يا "توفي" أصلي داخل لي برد!!!
نعم يا .....إلهي يدخلوك في تربتك بدري...وبعدين مين "توفي" دي؟ أكيد ده دلع تفيده...الله يرحم
بصيت الناحية التانية لقيت ولد مرصص اتنين بنات وعمالين يكتبوله على الجينز بتاعه!!!!! وهاتك يا ضحك وهزار وكلام بالفرنساوي والبنجالي
اكتشفت ان أخويا وصل المبنى وأنا لسا متنحه عند الباب
جريت علشان أحصله لقيت واحد وقف قدامي كده بسم الله ما شاء الله حيطه طول بعرض وبيبتسم ابتسامة عريضة...طبعا مفهمتش الموضوع وحاولت أعديه لقيته "بيرقص" بوضع شدة على القاف يعني زي لعيبة الكورة ومش عايز يعديني ،
قمت أنا تخنت صوتي وعليته كده و قلتله: انت هتهزر ولا ايه؟
قالي: اسمحيلي احنا أسرة love & live وبنرحب بيكي كطالبة جديدة معانا ولو تحبي تاخدي Tour في الكلية هاكون سعيد جدا باصطحابك...
بصراحة ذوقه أحرجني بعد ما "بعبعت" فيه وفرجت الناس عليه فاعتذرت بأدب وقلتله لأ ده أنا جايه مع أخويا...وجريت تاني بسرعة قبل ما تان تان يجي تاني
وصلنا الشباك
هو مش شباك...هو ريسبشن أنضف من أي ريسبشن بنك شفته بصراحة
اخويا قالي: نقعد لحد ما الدنيا تفضى
قلتله: لأ لازم نحجز مكان في الطابور ...فظل جالسا وطنشني وأنا رحت وقفت في الطابور كان قدامي اتنين بس
قعدت السكرتيرة تقولهم بالانجليزي هتدفعوا كاش ولا فيزا ولا شيك ، المهم أول ما مشيوا وجيت أقف لقيت بنت وقفت قدامي ..طبعا أنا -الغجرية- قلتلها : ايه؟ ما تقفي في الطابور...ضحكت أوي وقالتلي: دا دوري...قلتلها لأ أنا وقفت الأول
وتربست أنا بأه لحد ما لقيت أخويا النذل ...قصدي الشهم جاي بيشدني من دراعي وبيقولي يا بنتي الدور بالأرقام وأنا حاجز رقم بالتليفون من قبل ما نيجي !!

طبعا كان شكلي عار على الآخر ومن نظرات أخويا كانت واضحة جدا انو ندم وغلط انو جه معايا ومش هيكررها تاني...
قعدت جنبه وبعدين لقيت واحده جايه تسأله وتتكلم معاه على ورق التقديم وهاتك يارغي ، فبعد ما خلص بقوله: البنت دي مش محترمة عماله تكلمك وتضحك معاك ده بتاع ايه؟
قالي: يا بنتي Peace أنا معرفهاش أصلا بس كده يعني عيشي اللحظة...
قررت اني مش هتكلم تاني طول مانا في المكان ده حرصا على مرارتي من الفقعة

دفعنا دم قلبنا-المصاريف- الحمد لله ومشينا في طريقنا للباب وانا حاسة ان حاجة كابسه على نفسي..وعيني بدأت ترف ورجلي شنكلت وحاجات كده...قلت الله يكون في عون اللي بييجوا هنا كل يوم !!!
واحنا في العربية أخويا جالو تليفون من حد صاحبه فبيقول :الواد مؤمن عارفه ده الدحاح قبلوه في هندسة ..جامعة القاهرة...بيئة أوي...ايه القرف ده
أنا طبعا مسمعتش بقية المكالمة
بعدما قفل -وكأنه حس بأحاسيسي- لقيته بيبصلي وبيقولي: هوا انت صحيح متخرجة من جامعة ايه؟
قلتله: نفس الجامعة البيئة اللي صاحبك داخلها
احمر وجهه قليلا وقاللي : معلش بأه الزمن غير الزمن
ساعتها حسيت ان عندي 60 سنة
بقلم

ست البنات


http://kaidakonna.blogspot.com/


هناك 38 تعليقًا:

فرنسا هانم يقول...

هههههههههههه
مشوار حلو قوى ياست البنات الله يكون فى عونك
وبعدين حكايه ان جامعه القاهره دى بقيت بيئه
يبقى احنا نش علينا الدبااااااااااااااااااااااااااااان
من بدرى

فرنسا هانم يقول...

هو انا كنت اول تعليق ؟
الله يمسيك بالخير يا روقه
كان حاجزه لنفسه طوالى
ربنا يشفيك يا رايق
وترجع تناكف فينا ونناكف فيك
ولو ان انا من رأيى بعد ما تخف ان شاء الله تاخد اجازه 70 او 80 سنه نقاهه

مهندس مصري بيحب مصر يقول...

معلش يا ست البنات و بدون زعل إسمحي لي
الولد اخوكي اخلاقه يعني
يعني هو يرضى لأخته اللي هي حضرتك اللي بيحصل في الكلية الخاصة الغريبة دي
ما أعتقدش طبعاً

الاخلاق مش بتتجزأ

البوست ده ما يضحكش قد ما يزعل الواحد على الحالة اللي وصل لها بعض شباب البلد

صبرني يارب يقول...

معلش يا بنتى

انا ساعات كتير باقول ان ماما وبابا الى ربوني مش هما نفسهم الى ربوا اخواتي الصغيرين

بس بصراحه الاخ بتاع دور البرد ده محترم اوي

ولا بتاع التور بقى

وبعدين بتتخرجي من جامعه حكومه يابيئه
طلعنا كلنا بيئه ولله الحمد ياحلاوه يا ولاد
طب تصدقى بايه ؟
بما وصفتيه عنهم هما الى بيئه وبيئه ملوثه ولو وكل حاجه
مع احترامي لاخوكي يعنى بس هى كده فعلا

باقولك ايه ما تخلي ابوكى يتبناني
مش عشان الجامعه
عشان السواق والعربيه والسكرتيره
اصل انا ما باحبش اسوق
ههههههههههههه

تحياتي ليكىيا جميل

همس الاحباب يقول...

بيس يا مان
تعرفى كنت بسمعها زمااان ومش عارف معانها
بس والله كنتى خدتى التور لففك تور فى الجامعة
وجامعة القاهرة بقت بيئة
بلاش نتكلم عن باقى الجامعات احسن مش انلاقى مصطلحات فى القاموس
والله زمااااااااان يا بلد
فين احمد عرابى
وسعد زغلول
وزكريا المفش
دنيا

همس الاحباب يقول...

خالتو فرنسا
مبروك عليكى اول تعليق
بس الرايق مش هيسيب مكانه كتير
انتى عارفة ما بيصدق يشبط فى حاجة
ربنا يتم شفائه ويرجعلنا بالف سلامة
وينور المدونة من جديد
بس برده يا فرنسا الراجل طالع من فترة نقاهة
يعنى خلى ايدك خفيفة شوية عليه
هههههههه
70 سنة نقاهة يا دوب و50 سنة عليهم من عندى

همس الاحباب يقول...

مهندس مصرى
منور يا باش مهندس محمد
بس ده حال معظم الجامعات الخاصة
بل الجامعات العامة والحكومية اصبحت اشد وباء
والله يرحم الاخلاق والمبادىء والقيم
مع الاسف اصبح من يتمسك بهم جاهل ورجعى ومن العصر الحجرى
يا جدع ده انا كنت فى جامعة اسيوط
بنحس اننا فى مدرسة مشتركة
البنات لوحدهم والصبيان لوحدهم
كانت ايام وراحت
سعدنا بتشريفك

همس الاحباب يقول...

عامة تدوينة دمها خفيف
تسلم ايديكى يا ست البنات
ممكن اروح ازور اخوكى مرةفى الجامعة
واحتمال اخد الرايق معايا يفك عن نفسه شويه
يمكن ربنا يكرمه ويلاقى حد يقوله بيس يا مااان
ههههههههه

فرنسا هانم يقول...

همس الاحباب
خلالص يا خالد نمشيها 120 سنه
يعنى يكون لسه الرايق يادوب وصل مرحله المراهقه

مصعب رجب يقول...

كان الله في العون يا أختشي

عيال معندهاش دم صحيح

أنا بشوفهم كل يوم من شباب الأكاديمية

هما في الجامعة البريطانية واحنا في أكاديمية الشروق وبيقولوا علينا بيئة مش تقوليلي جامعة القاهرة :)

ست البنات يقول...

السلام عليكم ورحمة الله

قبل ما أكتب يا جماعة أحب أقول أني لاأعتقد أن كل ما ينشر في الدونة هنا تدوينات واقعية ولكنها ساخرة من واقع
يعني مش لازم نسقط القصة بتفاصيلها على قصة حياتي :) لذا لزم التنويه

فرنسا هانم
شكرا على التعليق وحظي أنو أول واحد ..
حلوة الدبان دي هههه
تحياتي لمدونتكم الجميلة

مهندس مصري
هو فعلا حال الكليات دي يبكي ويحزن لكن أكيد زي أي حته فيها الكويس وفيها الوحش
وأتمنى أن كل اللي نعرفهم يكونوا من الكويسين وياريت حضرتك تقرأ التنويه في بداية ردي

صبرني يارب
خلاص الحمد لله كلنا أنا واخواتي اتخرجنا :) مفيش مجال للرجوع
لكن فعلا الجيل غير الجيل
ربنا يستر على ولادنا
شكرا للتعليق

همس الأحباب
واضح ان حكاية بيئة دي أثرت فيكم كتير أوي :)
معلش بجد بس يمكن بقى زي زمان المدارس الحكومة كانت أحسن من الخاصة
ربنا يهدي
تحياتي للمرور

أبو أسامة
هههه
كده مفيش مجال لجامعة القاهرة خالص
مستوى تاني عندكو
تحياتي

همس الاحباب يقول...

ست البنات
هههههههههه
لا اطلاقا ما تقلقيش من كده
احنا اتعودنا وجتتنا نحست من الكلام ده
المهم انتى خليكى كووووووول يا ستنا
احنا فى مدونة الضاحكون
مفيش مجال للزعل اطلاقا
كلنا مجموعة واحدة واخوة
تحياتى

همس الاحباب يقول...

فرنسا هانم
هههههههه
هههههههه
120 سنة يبقى وصل سنة المراهقة
انا افتكرت يكون له داخل kg1
ويقولهم انه الدكاترة عبده الرايق
من يجى 200 سنة قبل الميلاد

فرنسا هانم يقول...

ست البنات
طبعا احنا عارفين ان التدوينات اللى بتتنشر مش لازم تكون مقصوره على شخص معين او واقعه معينه
وان الاسلوب الساخر من الاوضاع لا يشترط ان يكون ذا تجربه شخصيه
علشان كده انا بقولك يا ست البنات احنا بنرد على اسلوب البوست وعلى البطله بتاعه الحوار اللى هى انتى
وعارفين ان ده ممكن يكون واقع وممكن يكون نسيج درامى من الخيال
تحياتنا كلنا ليكى
وتحيا جامعه القاهره

فرنسا هانم يقول...

الرايق من 200 سنه قبل الميلاد ؟؟؟؟؟
انا برضه كنت شاكه فى كده يا خالد
لان حواراته وكلامه كله حفريات
بس التاريخ مش قال ان فى الاسر القديمه اسره شحاته

حنين القلب يقول...

هههههههههههههههههههههه

دمك عسل يا ست البنات
بس من الموقف ده يعلمك انك مش تروحى اماكن زى دى تااااااااااانى
دى مش جامعه دى ديسكو

تسلم ايديك

حنين القلب يقول...

فرنسا هانم
ازيك يا مامتى يا حبيبتى
طبعا انتى استوليتى على المدونه والتعليق الاول بس يا مامتى روقه زمانه جاى ده زى القطط بسبع ارواح
تصدقى يا مامتى فعلا روقه من قبل الميلاد


روقه
بابتى والله وحشتنى اووووووووى
ربنا يرجعك لينا بمليون سلامه بجد المدونه من غيرك ناقصها كتير
يا رب ترجع وتنورها وان شاء الله تاخد فلوسنا كلنا
احنلا موافقين
بيس يا مان

حنين القلب يقول...

همس الاحباب
انت يا بنى ارحمنى
انت قاعد ترد كمان على الناس
هو بيتك لوحدك
اقعد على جنب بقى
ويكون احسن لو تروح تجهز ليه الفطار والا والله اروح اجهزه انا واولع فى المدونه دى انا لسه عيله وهقعد العب بالنار
وانتم احرار بقى

همس الاحباب يقول...

فرنسا هانم
هههههههه
نو
نو
نو
مش شحاته يا مامتى
دول اسرة عايشة عل السلف والاقتراض
هما اللى لغوا نظام المقايضة
وخلوها شحاته
راجعى التاريخ للعلامة الدكاترة الرايق وانتى تعرفى

همس الاحباب يقول...

حنين القلب
اجهزلك ايه يا ماما
افطار شوية شويةاخدك افسحك فى جنينة الحيوانات
علشان يشتبهوا فيكى ويحجزوكى فى جبلاية القرود
وتلعبى بالنار ليه
ثوانى اجيب البنزين واولع فيكى
بس كله يهرب من المدونة
اجرى يا فرنسا

همس الاحباب يقول...

رجعنا للزن يا فرنسا تانى
شوفى بنتك
حطيها فى الحضانة
ولا اقفلى عليها التلاجة
طول عمرها كده طفسة
جايىة تفطر الساعة 7 بالليل
والنبى يا مامتى
ابقى اديها الببرونة
حرام برده لسه عيلة
وبلاش نخليها تعيط

Empress appy يقول...

هههههههههههه
يا عينى يا بنتى ده التطور الطبيعي للتعليم فى مصر انتى اللى متأخره بس معلش خدي عشرين كوري او اقولك روحي الجامعه دي ولقيها سبع مرات هتبقى كويسه

Empress appy يقول...

راليه لبابتى روقه

وحشتني يا حج انت خدت على الدلع ولا ايه ارجع بقى اصل العيال عينهم على الخرفان بتاعتي

حنين القلب يقول...

همس الاحباب

علشان يشتبهوا فيكى ويحجزوكى فى جبلاية القرود

لييييييييه فاكرنى شبهك
فاكر يا خالود لما روحت جنينه الحيونات والراجل صمم يحطك جوا القفص مع الاسود علشان يقول لابنه لو مش سمعت الكلام هعمل فيك زى عموووووو
وتلعبى بالنار ليه
ثوانى اجيب البنزين واولع فيكى
تولع فى ميييين يا عم انت
ده انا اولع فيك وفى باولو بتاعك يا اقرع
فرنسا اجرى بجد علشان هنسف باولو ده

فرنسا هانم يقول...

حنين القلب
ايوه صحيح يا حنين ده الرايق فعلا زى القطط بسبع ترواح
اتاريه كان عماله ينونو من ساعه ما دخل التدوين واحنا مش فاهمين له
طول عمره عماله يقول
نو
نو
نو
كده بقى اتحل اللغز بتاع حجر رشيد
قصدى حجر الرايق

فرنسا هانم يقول...

همس الاحباب
التاريخ للعلامه الدكاتره عبده الرايق
وده بيتباع فى انهو سجن
ابوزعبل
ولا ام زعبل
ولا زعبل ذات نفسه
اصل كتب الرايق لاتوجد الا داخل السجون علشان تعيد علينا تاريخ ريا وسكينه
والنصب
لا النصب العادى مش النصب التذكارى

فرنسا هانم يقول...

~*§¦§ Appy §¦§*~
الظاهر ان الحج الرايق اخد فعلا على الراحه
تلاقيه دلوقتى غرقان فى الساقع والعصير
يعنى هيحلف انه لابد على السرير حتى اشعار اخر

رمانسيه يقول...

شفاك الله وعفاك يا استاذ عبده الرايق
اسال الله العظيم رب العرش العظيم ان يشفيك
اسال الله العظيم رب العرش العظيم ان يشفيك
اسال الله العظيم رب العرش العظيم ان يشفيك
اسال الله العظيم رب العرش العظيم ان يشفيك
اسال الله العظيم رب العرش العظيم ان يشفيك
اسال الله العظيم رب العرش العظيم ان يشفيك
اسال الله العظيم رب العرش العظيم ان يشفيك
(اية)

Doba يقول...

التدوينة جميلة جدا بجد
يسلم ايديكى وتسلم الفكرة على إثارة حاجة بالفلع سيئة فى المجتمع وبتنتشر بسرعة فظييييييعة

ربنا يستر على أولادنا
=========
عبده الرايق

على الرغم من ان التدوينات ضاحكة الا انى لا استشعر او اتذوق مذاق الضحكات الخاص بدون وجودك بين سطور المدونة - اتمنى تمام شفاءك ورجوعك سريعا

فرنسا هانم

بلاش 120 سنة نقاهة مشيهم يومين ويرجع هو يقما انتى يقما هو - عاوزين الخناقات الاسرية ترجع من تانى

هاتى الاولاد كلهم واعملوا لقاء على الهوا وعاوزين تفانين تحفة من بتوع الأسرة

همس الأحباب

خالد من فضلك تطمنا على حالة الرايق

تحياتى لمجهودات عملك الدائمة لرسم البسمة والسخرية من مشكلات الواقع

هبة

صبرني يارب يقول...

يا ست البنات

انا كل ما ادخل المدونه بتاعتك كيدكن عظيم مش باعرف اعلق التعليقات مش شغاله عندي

مش عارفه ليه

شوفيلي ايه الموضوع

همس الاحباب يقول...

حنين القلب
هههههههههه
والله شكلك كده
اتولعى فى روحك
هبلة هانم وتعمليها يا اختى
انا على الاقل دخلت قفص الاسود
مش زى ناس قاعدة فى جبلاية القرود
بتاكل سودانى وتقشر موز

همس الاحباب يقول...

فرنسا هانم
كتب العلامة الدكاترة عبده الرايق
فى التاريخ
والمهلبيه والملوخية ام طشة
تباع لدى اكبر واعرض الارصفة فى العالم
انتى وداخلة الزقاق على ايدك الشمال
تانى عطفة على ايدك اليمين

همس الاحباب يقول...

هبة
ام يوسف
ربنا يكرمك يا رب
الرايق الحمد لله بخير
وراجع قريب ان شاء الله
بس انتى عارفة الرايق لما يدلع
مركب جلوكوز عصير جهينة بالشفاط
وبيرضع فخفخينا
والتفاح والموز كراتين كراتين
هيخلص عليهم ويرجع

حنين القلب يقول...

همس الاحباب
انا هبله يا سى خالد
ماااااااااااشى
اللى يشوفك وانت بتتكلم مش يشوفك وانت ادام الاسد وعمال تصرخ وتنط زى الفرقع لوز
وبعدين القرود ارحم بكتير من الاسود
ولا ايييييييييه

حنين القلب يقول...

فرنسا هانم
اخيرا مامتى حلت اللغز
اه والله يا مامتى عندك حق وانا اقول الرايق طول ما هو قاعد يقول
نو
نو
نو
والسمك اللى ليل ونهار عمال ياكل فيه
لحد ما طلعت ليه زعانف

يا رب يرجع بالف سلامه وانا هاجيب ليه 20 كيلو سمك ويقعد ياكل براحته

القلم السكندري يقول...

لا بعد كدة حضرتك تخليكي مستريحة وانا اروح مع اخوكي اوصله لحد باب المدرج لو يحب

عادي برده الناس لبعضيها



كان الله في العون

تحياتي

الطائر الحزين يقول...

يا قلبك يا اعصابك اللى فى ثلاجة

ومشيتى كدة من غير ما تحرقى المخروبة دى ولا حتى تولعى فى حد من اللى فيها

ولا حد ترمى اخوكى من العربية

طيبة اوى

Raghda Rashad رغده رشاد يقول...

بوست عسل جدااااااا

انا بتغاظن الناس الملزقة دى

باحسهم كدا(جيلاتينى ملبنى)

ربنا يلطف..لو كلمنى واحد منهم ممكن اعطس فيه افتفته

بس دمك خفيف و انا ادام الدم الخفيف بتنح

استنينى هابقى اجى ان شاء الله كتير