لقاء قمة بين سيدات العُمارة

الست زكية اسم علي مُسمي ست واعية وشاطرة ولهلوبة بس السنة دي غير كل سنة... شكلها كدة هاتتنازل عن اللقب وتديه لواحدة عايشة في المريخ ... لأن الحاجات أسعارها جالها سُعار وبقت نار يا عفيفي نااااااااااااااار

وهي وجوزها بقوا علي الحديدة أصلهم لسة خارجين من دفع قسط مدارس الولاد اللي زادتا لسنة دي عشان المدارس تقدر تسدد الضرايب اللي فرضتها الحكومة...ربنا يعمر بيتك ياحكومة

وبعدين نزلت أشترت لبس المدارس ده شيء ضرورة مش هزار يعني تودي العيال مدارسهم بالبيجامات! هايعملوا أيه في تحكمات الحكومة برضه اللي رفضت تزحزح السنة الدراسية كام يوم عشان الناس تعرف تمشي أمورها وتأكل في رمضان
ربنا يخليكي ياحكومة بصراحة مبسطاها علينا خاااااااااااااااااالص واللي يقول غير كدة كدااااااااااااااب
الست زكية وقعت في حيص بيص تعملي أيه يازكية تعملي أيه ياذكذوكة؟
الست ذكية سلمت الراية وراحت تفكر مع الست عنايات الأروبة جارتها ومعاهم الست نعيمة اللهلوبة لقاء قمة بين ستات العمارة لاقيتهم الاتنين قاعدين محتارين في نفس حوستها ... يجيبوها يمين يجيبوها شمال مافيش فايدة اللي رايح اكتر من اللي جاي
وفي لقاء القمة المُنتظر قالت ذكية :أحنا نعمل جمعية ..
ردت عنايات : وهي الجمعية الأولي كانت خلصت عشان نعمل جمعية تانية
فقالت نعيمة : يااااااااادي النيلة هو احنا بنلحق نشم نَفَسنا ياخلق هوووووووووه...طول السنة جمعيات
قالت ذكية اللي هاتروح في داهية : واللي ذاد وغطي ان برضه حكومة كولالامبور فرضت علينا حاجات هاتقطم وسطنا كمان وكمان الكهربة غليت وفاتورة التليفونات دخنت ... حتي غرامات المرور ولعت
عنايات برقت لما الوحي جالها وياريته ماجالها وقالت: طيب ماتيجوا نهاجر ونطفشلنا علي حتة رخيصة ...
كسرت بنفسها الست ذكية وجابت بوزها للأرض : وهي الهجرة دي بسيطة دي حاجة محتاجالها ييجي سنة بالميت، ورمضان خلاص علي الأبواب وبعدين مش هانعرف نهاجر مش عشان شربنا من نيلها لا سمح الله ده عشان لسة ماسددناش ديونها والحمد لله وممنوع علينا السفر
قالت عنايات والدمعة هاتفر من عينيها : طيب نعمل أيه نخرج العيال من المدارس السنة دي ونضيع عليهم كام سنة كدة لحد ماتبقي جيوبنا عمرانة ونقدر نعلمهم علام نضيف وهو يعني اللي خلصوا بدري عملوا ايه دي حتي القهاوي بقت أزحم حتة في كولالامبور .
ردت ذكية بنت حكومتها الذكية : ماينفعش ياهبلة .. بيقولولك العلم كالماء والهواء وبعدين العيال مخهم بيصدي في الأجازة نقوم أحنا نطول لهم في الأجازة كمان وكمان
مافيش قدامنا غير حل واحد قالتها الست نعيمة الجارة المحتارة وقعدت تُهرش وتُهرش لحد ماعورت وشها
فالست ذكية جالها حالة فزع وقالت... حاسبي وشك يادلعدي وشك بقي كله دم
قالت نعيمة وملامح الأفتكاسة مالية وشها ... وهو ده المطلوب يالا بينا نشتغل شحاتين علي بوابة الحكومة الالكترونية يبقي الحكومة تلم مننا الضرايب من هنا واحنا بشوية شحتفة علي مسكنة علي جرب نشحت من الوزرا والناس الكبار واهو كله من فضلة خيرنا
وربنا يجعل كلامنا خفيف علي حكومة كولالامبوراسم الله عليها اللي شايفة شغلها ومقشطة شعبها ومخلياهم بايعين الحديدة وقاعدين علي الهوا

وطاااااااااااار في الهوا شاشي وأنت ماتدراشي

ياولااااااااااااااااااااااااااا

مع تحيات
المفقوعه مرارتها