الجمعة، أغسطس 22، 2008

شلووووووووووووت سعادتى



البطالة هي عنواني ومطرحي ...
وقلة فلوسي هي الشعار الرسمي لمرحلتي الراهنة يعني جيبي مطلع لسانه من الجلابية وبيشم هوا علي طول ...أتاري جيبي عامل حالة عصيان مُسلح وكل ماأقوله أتلم ياجيبي وأدخل مكانك أحسن بالمقص راح أقص لسانك..يقوللي لأة أتلمي أنتي وأمليني شوية فلوس تغزي بيهم عين العدو...ياسيدي أدخل وبلاش فضايح .. يرد ببرود أنا وراكي والفضيحة هاتبقي بجلاجل
وكنت طول عمرى أقعد جنب الحيطه و اسمع الزيطه ...قلت لأ انا لازم أدخل فى وسط الزيطه وأعمل شوية هوليلة .... فقد نويت نية صادقة إني أترشح لعضوية مجلس الأمة سابقاً .. مجلس الشوعب الهوائية حالياً ...مش عشاني عشان مصر ...مانتم عارفين ..وحافظين ان مصر هى أمى ونيلها بيجري جوه دمى
بصراحه الكدب خيبة عشاني الأول وعشانكم بعدين وعشان مصر في الآخر خااااااااااالص ... وماتقولش أيه أدينا لمصر قول مصر هاتدينا أيه الأول يافالح... أنا أحب أبقي واضحة وصريحة من أولها حد شاف عضوة بالوضوح ده ؟
همتكم معايا بقي عشان اترشح بقلب جامد, هاتسند عليكم , أوعوا أطلع بأتسند علي حيطة مايلة أحسن أظبطلكم قرار إزالة يزيلكم... ولما يسئلوني انتي تبع مين هاقول لهم أنا تبع الناس إللي قاعدة علي الترعة بتتهوي وتمصمص في زعازيع القصب وطول ماانتم قاعدين مستربعين علي الترعة تبقوا أهلي وناسي... ده أنا بنت الترعة .. وعشان انتم حبايبي ومني وعليا هاأقولكم عن سبب ترشيحي للمجلس الموقر بس حسك عينك منك له تفتنوا عليا وتبوظوا عليا الشغلانة أروح فيكم في ستميت ألف داهية ... مش داهية واحدة بس ... وأهو نتفسح سوي هناك
أرجع معايا ياابني انت وهو في الزمن لوري بس حاسب تخبط في الحيط ... بالظبط لما كنت بنوتة بضفيرة ومصاصة ...أصلي طوووووووووول عمري من وأنا صغيرة وانا امر علي المجلس في التليفزيون مرور الكرام ... لا أغنية تفرفشك ولا رقاصه تبسطك ..ولا نكته تزغزغك ... وعمر ماشدّني غير النوم الهادي فى الركن البعيد الهادى ..اقلب المحطه من هنا واقعد أتاوب من هنا .. أومال ايه مش إخوانى ولازم اشاركهم الجهاد فى سبيل النوم ...
سمعت أوشاعة بتقول أن الركن ده مرشوش بماده نام يا نونا نام وادبحلك جوزين حمام ..والماده دى بتسيب المفاصل وتخلي السبع مش قادر يواصل, أو حتي يحط منطق فبينام من غير ماينطق
سمعت كمان ان اخونا هرقليز ابو دراع حديد ..وحديد على حديد يفعل الله مايريد ... مش عارفينه ولا ايه ؟؟؟؟ .. أيوة هو ده إللي واكلها والعة من غير مالسانه يطلع فقافيق وبقابيق... البيه الكبير بيأكل أعضاء الحزب الوطواطى أكل من اللي قلبك يحبه ... مقابل انهم يقولوا موافقون ويبصموا علي كلامه من غير لت وعجن ولا كاني وماني عند دكان الزلباني... نظام أكلني وأنا أمنجهك

وروشني وأنا أنعنشك

وانا ياعمو هرقليز باشا بصمجية من الدرجة الأولي وعمري ماهافتح بقي بكلمة
وبأحب الكفتة والممبار وياريت لو تدوقني الكافيار ... ماتخافش حتة كوفتاية تشتري صوتي وصوت إللي خلفوني كماااااان ... غير بقي الفلوس اللي ممكن توصل لمليون جنيه مرتبات علي حوافزعلي كله ... يعني أنام نومة هنية وأكل أكلة شهية وأرفع أيدي وأقول موافقون وآخد الفلوس والحوافز وماتنسوش بدالات السفر وبدالات العلاج
ياحلولي ياحلولي وده أيه ده اللي بيحصلي
والله وباضيتلك في الزريبة يامفقوعة
وكمان هاأطلع في التلافزيون ... وأعمل باي باي لماما وأطلع لساني للواد حُكشة الميكانيكي
إللي مبوظلي العربية الكارو اللي كنت بأسوقها قبل ماادخل علي المجلس
ياحلاوة ياولاد دي شغلانة هايلة,هايلة أوي
بصوا بقي لو خدمتوني ورشحتوني هاأسلق لكم قوانين علي مقاسكم, تفصيل يابويا تفصيل ... يعني اللي عاوزله واسطة عشان يشتغل في شركة بترول ويعوم علي وش الفتة ... أمضة صغننة من صوابعيني إللي شبه صوابع المرحومة زينب وهايتحقق لكم المراد وأبقوا أفتكرونا في البسبوسة, واللي عاوزله إمضة عشان يسافر يتعالج برة .. أو يستجم من نفسه انا ممكن اخدمه برموش عينيا بس هو يقشر وأنا عليا التنفيذ واللي عاوز حتة أرض يسقعها ويعمل عليها شوربة وتنغنغه بعد خمس سنين مافيش مشاكل دي حاجة بسيطة خالص .. أبسط من محشي البتنجان اما بقي اللي عاوز ابنه ينجح في ثانوية القطة العامية ويجيب مجموع يدخله اجدعها كلية فماعنديش مانع ادخله لجنة الامتحانات المحظوظة اللي ورقها متظبط للمحظوظين

وهازرع لكم جنب المجلس فدان كوسة بحاله عشان الحبايب وأهل الترعة اللي جارنا
ساعدوني وأنا هاأساعدكم
وساعتها بس هاأقدر أقول بنِفس إن شالووووووووت سيادتي دفعة للأمام
واللي عاوز شلوت ينقله النقلة التمام ماعنديش أي مانع ياعمنا الهُمام
وهأدعيلكم في المجلس قيل النوم وبعده ...وقبل الأكل وبعده, أن ربنا ينفخ في صورتكم وتييجوا تتجمبزوا جنبي في المجلس

أنتخبوني أنتخبوني ودقني أهيه لو من تاني راح تشوفوني
لووووووووووووووولي لوووووووووووووووووولي
عقبال عندك ياأم جُعلص
وأحلي سلام لسيد قشطة والبت هنومة النعسانة

بقلم


المفقوعه مرارتها

هناك 38 تعليقًا:

احمد اشرف يقول...

هههههههههههههههههههههههههههه
بوست هاااااايل انا معاكى هرشحك لمجلس الشوعب الهوائيه بس متنسنيش انا عاوز الحلاوه بتاعتى كام عود اصب امصمص فيهم على الترعه

حنين القلب يقول...

مفقوعه انا هرشحك بس عايزة وسطه والنبى اشتغل شغلانه اقبض فيها 100000جند فى الشهر الواحد
ومش هتضحكى عليه وتقوليلى انتخبينى الاول وبعدين نشوف الشغلانه
نو
نو
نو
دنا بنت الرايق
الاول العقد بتاعه الشغلانه واقبض اول شهرين وبعدين انتخبك براحتى وهدعى ليكى ليل ونهار يثبت قدمك فى المجلس والمجالس المجاورة

بوست جميل اوى يا مفقوعه
تسلم الايادى
سلاموزة يا موزة

حسن حنفى يقول...

هههههههههه

موافق انا هنتخبك

بس انا في 3 ثانوي

تخدميني في المجموع بقي

:d

المـــفـــــــقــــــــوعـــــة مــرارتـهــا يقول...

احمد اشرف
=================



قصب أيه بس ياراجل وهو دخول المجلس ده حاجة بسيطة قول جوزين حمام
أطلب أطلب ولا يهمك
كلها وعود من إياها اللي لا تودي ولا تأخر
وهو انا هااجيبلك حاجة من جيبي كله من جيب الشعب

maha zein يقول...

هههههههههههههههههههه
يا جامد يا جامد
طب مجلش الشوري ولع وصراحة انا خيفة انتخبك في مجلس الشعب فيولع راخر
عشان كده مش هنتخبك
بوست رائع
ودمك كالعادة خفيف وشربات
تحياتي

المـــفـــــــقــــــــوعـــــة مــرارتـهــا يقول...

حنين القلب
____________
بس كدة من عينيا البوست ده معمول عشان نعلرف طلباتكم وننفذها في المشمش
هو أنا عندي أغلي منك

المـــفـــــــقــــــــوعـــــة مــرارتـهــا يقول...

حسن حنفي
________________
ياسلام
عاوز تجيب مجموع يدخلك طب ولا هندسة كله ماشي
بس عندك بطاقة إنتخابية الأول ؟
ولا هاتضحك عليا وتديني الزونبة التومام

المـــفـــــــقــــــــوعـــــة مــرارتـهــا يقول...

مها زين
_____________
البوست نازل في وقته تمام
اهو مجلس الشوري اتحرق قبل مالبوست ينزل والبوست أستني لحد مالمجلس اتفحم ونزل
حسدت الأعضاء باين عليا
المصيبة بقي اننا نحن الشعب اللي بنملي ميزانية الدولة العظيمة اللي هاندفع من جيبنا تمن تقصير المجلس في تأمين مبني مجلس الشوري
واحنا اساشاً بنشحت
بس تعرفي بلدنا بلد مليونيرة بتتكلم بالملايين وكأنها ملاليم

عبده الرايق يقول...

حماتى المختفيه
مش عارف بفعل فاعل ولا غصب عنك
عموما
بلاش عتاب دلوقتى
شلووووووووووووت سعادتك ممكن يكون جامد وتطرحينا ارضا
مفيش بوووووووووووووونيه سعادتك احسن
بوست جميل يا حماتى مع تحيات الرايق

المـــفـــــــقــــــــوعـــــة مــرارتـهــا يقول...

تصدق يارايق وانا قاعدة قدام التلافزيون متنحة إذ فجأتاً طق في نافوخي ان النهاردة البوست بتاعي هاينزل ومع اني كان عندي حالة ملل وزهق من التدوين وواخدة أجازة كام يوم علي كام أسبوع
بس قلت لأ أبداً
لا ينكن
مايحصلش وأن حصل مايكملش
المُرشح اللي عاوز يترشح لازم يبقي موجود وهو بيترشح
ماترشحوني بقي
رشحني وخدلك زعبوط
وأوعي تنسي أني ممكن أديك بالنبوت

المـــفـــــــقــــــــوعـــــة مــرارتـهــا يقول...

عبده الرايق
==================
البوست ده قعد في الدرافت قد أيه مستني الدور
وأتوعد بالدور لما مجلس الشوري أتحرق وانت ضيفت عليه وانا كل كام يوم ادخل اضيفلي كلمة
وفي الآخر أتنشر باين علينا فولنا علي المجلس والمجالس المجاورة

المـــفـــــــقــــــــوعـــــة مــرارتـهــا يقول...

تعالي هنا ياروقة بما إنك جوز بنتي حبيبتي فأنا ممكن أفيدك وأشغلك وزير التهليب والبحث عن الكوسة والقرع لايقة عليك الوزارة الجديدة وهاتاكل من جيبك حتة

maiosha يقول...

المفقوعة هتدخل المجلس يا رجالة
ولا وهيبقالنا ظهر فى المجلس
لووووووووووووووولى

أنا معاكى طبعا يا مفقوعة يا حبيبتى .. بس أمانة عليكى بقى تشوفيلى واحد كده امور ابن نايم ..قصجى نايب من النواب تجوزهولى بقى

ربنا يخليكى ليا يارب

أه على فكرة.. إبقى خدى معاكى طفاية حريق .. محدش ضامن الظروف

سلام

المـــفـــــــقــــــــوعـــــة مــرارتـهــا يقول...

maiosha
=================
عندك حق ياختي
الطفاية دلوقتي بقت مهمة ذيها ذي المحفظة اللي فيها الفلوس
عاوزة نايم ابن نايم
من عينيا الاتنين دول كلهم هايبقوا اصحابي وانا اللي هااجوزهم

الطائر الحزين يقول...

ابجنى تجدنى
واقل من 15 جنية فى صوتى مش هقبل
شفتى الفقر

كاميليا بهاء الدين يقول...

هههههههههه

حلو اوى البرنامج الانتخابى ده

يشجع فعلا على التصويت

التصويييييت

انا عندى سؤال
بما انك مرشحة لعضوية مجلس الشعب الهوائية

ازاى أحمد عز وصل لموقع الحريق بعد اندلاعه بعشر دقايق؟؟
كان فين؟ وراجع منين؟

وش حيران

تحياتى

الدفاع يقول...

مفقوعه الحمله دى على حسابى
خليكى فاكره على حسابى
ويابخت من نفع واستنفع
وهنايلك يافاعل الخير والثواب وكده
ونبقى نقعد نتحاسب بقى بعد نجاحك فى الانتخابات

همس الاحباب يقول...

تعيش مفقوعة حرة مستقلة
تعيش تعيش
اى خدعة يا مفقوعة يا مصياتنا فى مجلس الشوعب
انا على نفسى اديلك اصوات قرايبى المتوفيين كلهم بلا استثناء
وصوتى انا اوعدك بعد ما اموت اتاخديه برده
وكل ده ليه مش عاشان منصب ولا جاه
اوعى تفهمينى غلط
ده انا حتى قنوع وراضى بقليلى
انا مش طمعان غير فى 600 الف فدان لزوم التسقيع قبل الشتاء على 15 توكيل على 2 مصنع حديد خردة
اووووه كتير مش كده
طب بصى يا ستى انا مواف ارشحك بس بشرط تجيبلى كيس لب من بتوع عمو احمد نظيف اللى بيقززه فى المجلس
ممكن ولا مو ممكن
هههههههه
جامدة يا مفقوعة بوست جميل

غروب يقول...

هههههههههه انا اول المرشحين والمؤيدين لكى ولحكومتك وان شاء الله مكنش من المعاااااااااااارضين ....لانك بافكارك دى ان شاء الله تخدمى كل ولاد الششششششششششششششششششششششششششششعب وشدتين تلاته على حرف الشين ....

واهو انتى احسن من غيرك على الاقل جايبه من الاخر

سلام يا قمر

Asmaa mahaba يقول...

ادينى شلوتى بسرعه اصلى محتاجه الجرعه

Asmaa mahaba يقول...

اسمعى يا مفقوعه يا اختى النساء قادمون اه امال ايه وكفايه كدا على الرجاله قوى انا حرشحك رئيسه جمهوريه

زيزو الشقى يقول...

بسم الله الرحمن الرحيم

مدونتكم حلوة قوى

وكل عام وانتم بخير

وكل سنة وانتم طيبين

بمناسبة شهر رمضان

شهر الصوم

تحياتى

وكل احتراماتى

اتمنالكم التوفيق

واتمنالكم النجاح

مدونتى تنور لو زورتوها


شكرا



عز الدين



سلااااااام

Mafrousa يقول...

ههههههههههههههههههههههههههه
عوداااا حميداااا يا تيته
اهم سمعوا انك حترشحي نفسك قاموا ولعوا فى المجالس كلها
سرك باتع.......
و الشالوت همه اللى ادهولك...بس كان على بره مش على جوه
ههههههههههههههه
انبى يا تيته تبقى تجيبيلي تصريح ادخل المجالس و اسرح بالجردل
هههههههههههههههههههه

غير معرف يقول...

اعتقد ان الضاحكون اصبحوا يكررون انفسهم والأفكار الجديده الطازه قليله حتى فى التعليقات التى تتسم احيانا بمسجة خشونه ....الأضحاك ليس سهلا خاصة فى بلد الناس فيها مبتبطلش تريقه وضحك ...والمعاد المكرر يصبح مثل النكته المعاده ...ارى حاجه ماسه للخروج من النطاق الضيق اللى حابسين نفسكم فيه ...الى مناطق من حياتنا بكر...وما اكثرها ....وحتى لا يكون الكلام نظرى البطم هذا المثال
المحفظه لا تزال فى جيبى
من أوليمبياد أمستردام (1928) حتي أوليمبياد بكين (2008) مرت ثمانون عاماً قضاها "الضاني" في إنتظار

أتوبيس العتبة حتي نبهه أحد المارة أن الأتوبيس توفي فمشي ليأخذه من أول الصوان.. الأتوبيس مزدحم فيه أربع

ركاب وأربعين نشال.. قال له الكمساري (خلي بالك من محفظتك) قال الضاني (ما تخافش شايلها في الجاكيت وقافل

عليها زرار) قال الكمساري بصوت مرتفع (الأخ اللي طالع محفظتة في الجاكت وقافل عليها زرار) قال له عجوز

بجواره (دي علامات الساعة إن الكمساري يساعد النشالين) قال الضاني (لأ يا حاج بلاش جهل علامات الساعة ما

فيهاش كمساري فيها الربع والنص والعقرب الكبير) قال العجوز (ما هو أنا قصدي العقرب الكبير، إنت برج إيه؟)

قال الضاني (أنا مش في برج أنا باني بيت صغير بس مش قادر أدخله) سأله العجوز (لازم فيه نزاع؟) قال الضاني

(لأ مفيش فيه نزاع فيه دورين بس وعفشة ميه مشتركة، هوه لازم يا حاج إركب له نزاع؟) قال العجوز (آمال مش

قادر تدخله ليه؟) رد الضاني (أصل الباب طلع ضيق قلت أسيبه لأخويا الصغير يروح بيه المدرسة.. قوللي يا حاج،

إنت في الاتوبيس بقالك كام سنة؟) سأله العحوز (هوه الأتوبيس رايح فين؟) قال الضاني (آسف جداً ممنوع أقول

أي حاجة لوسائل الإعلام إنت من حقك بس أقولك إسمي ورتبتي ورقمي العسكري غير كده مالكش عندي حاجة

وح أفرج عليك الأتوبيس) سأله العجوز (إنت طلعت لي منين؟) قال الضاني (من باب الأتوبيس وقوم وريني نفسك

تحت.. وقف يا أسطي الأتوبيس) خلع العجوز النظارة وقال (أنا جوز خالتك يا ضاني) صرخ الضاني مندهشاً (جوز

خالتي!! أنا ما عرفتكش علشان قاعد علي كرسي جلد) وأحتضنه فبكي الركاب وشغل السائق شريط قرآن وقال أحد

النشالين وهو يسحب محفظة الضاني (سبحان الله العظيم قد يجمع الله الشتيتين محفظته ومحفظة جوز خالته).. قال

أبي (مبروك يا ضاني عرفت إنهم رجعوا سنة سادسة للمرحلة الأبتدائية وحنصرفها مع معاش رمضان) قال

الضاني (هوه رمضان ده مش جه قبل كده؟) قال أبي (أيوه وح ييجي تاني) سأله الضاني ببلاهة (هوه فاضي ده

ولا إيه، هوه جاي عندكم إمتي؟) قال أبي (ماحدش يعرف أصل النيابة حظرت نشر أخباره) قال الضاني (بس مادام

البلح ظهر يبقي الكنافة في السكة) ثم قال الضاني للرجل الواقف بجواره (من فضلك هات المحفظة بتاعتي علشان

نازل وخلي محفظة جوز خالتي).

عبده الرايق يقول...

محمود شكوكو
من حقك ان تقول رايك بحريه كامله
ولكن
يجب ان تعرف اننا نبذل قصارى جهدنا لاخراج تلك المدونه فى صوره يرضى عنها الكثيرون
نفس التعليق
نشر فى البوست السابق بنفس القصه
وقد سئلتك من مؤلف تلك القصه ولم ارى رد
على فكره
لو كانت من تأليفك
فانا اهنئك على هذا العمل
مع تحيات الضاحكون لك
بقضاء وقت ممتع معنا كما نتمناه

المـــفـــــــقــــــــوعـــــة مــرارتـهــا يقول...

الطائر الحزين
ـــــــــــــــــــــــــــــــ
خمستاشر جنيه فقط لا غير ياراااااااااااااااااااجل
أنا ممكن أديك خمستاشر مليون أحنا حكومتنا حكومة غنية فوق شعب فقير
حكومة بتتكلم بالملايين وتوزع بالملايين
عاوزني انا اتكلم في الجنيهات يامُفتري
لأ أنا بقي هاتكلم بالملايين وهااعملك خطة في الموازنة العامية
وهاأصرفلك خمستاشر مليون بس انت ادعيلي

المـــفـــــــقــــــــوعـــــة مــرارتـهــا يقول...

كاميليا
ــــــــــــــــــــــــــــــــ
تفتكري أنه ليه يد في الحريقة ؟
أنت حرة أفتكري براحتك ماأنتي مش هنا وهما مش معقولة هاياخدوا طيارة عشان يجيبوكي من هناك
سألوا أحمد عز في التليفزيون ناوي تتبرع بكام عشان نرمم المجلس
قال الكلام ده سابق لأوانه
مذيع غشيم
بقي الاعضاء هايتبرعوا
مذيع بيحلم بس الريس جه كتر الف خيره في الجرايد تاني يوموقال الدولة هي اللي هاتتكفل بترميم المجلس
ماهي تركته وبيوزعها
حقه رافع راسنا

المـــفـــــــقــــــــوعـــــة مــرارتـهــا يقول...

الدفاع
============
مادامت علي حسابك يبقي خلاص مافيش لازمة أكسر الحصالة بتاعتي واصرف عليها
وانت بقي ممكن بعد ماانجح في الانتخابات اديلك حتة أرض علي الترعة وشوية زعازيع قصب يبسطوك

المـــفـــــــقــــــــوعـــــة مــرارتـهــا يقول...

همس الأحباب
ــــــــــــــــــــــــــــ
هو كفاية عليك شوية لب من بتاع نظيف
ده لب مستورد من الصين
مخصوص عشان مزاج سعادته

المـــفـــــــقــــــــوعـــــة مــرارتـهــا يقول...

saso
=============
بصي بقي احنا لازم نعمل وزارة للكوسة
مادامت الكوسة بقت هي اللي بتقش ليه مانخليش عندنا وزارة للكوسة تظبط الكل وتشغل الكل
وتطلع كروت مكتوب عليها تحت عناية الكوسة

المـــفـــــــقــــــــوعـــــة مــرارتـهــا يقول...

سومة مجنونة
ــــــــــــــــــــ
لا رئيسة جمهورية لأ انا ماليش في السوياسة
خليني جنب الحيط احسن

المـــفـــــــقــــــــوعـــــة مــرارتـهــا يقول...

زيزو الشقي
_______________
كل سنة وانت طيب ياعز الدين

المـــفـــــــقــــــــوعـــــة مــرارتـهــا يقول...

واحدة مفروسة
__________________
ده انا هااخليقي تعملي اسطول جرادل تجيبيلك كام عيلة معاكي وتبقي انتي الريسة عليهم وتسرحي في المجلس براحتك بس بشرط النص بالنص

الطائر الحزين يقول...

الهى وانت جاهى يفتحها فى وشك يا مفقوعة يا بنت مرارتها يا قادر يا كريم

شفتى القناعة حلوة ازاى

Asmaa mahaba يقول...

اه يبقى راسمه على الرياسه لحماتك يا مفقوعه قولى قولى تنت فيفى مننا وعلينا

Asmaa mahaba يقول...

والموت علينا حق يا بنتى

ابو درويش يقول...

دى اولى زياره
مدونه جميله
ودمها زى الشربات
تحايتى
احمد

داليا ..قوس قزح يقول...

ههههههههههههههههههه
ايه يا مفقوعة ده
يخرب عقلك
ده انتى بتتكلمى لغات صريحة
انا هرشحك علشان مصدقيتك و ادى شلوووت لسعادتك يدخلك المجلس


معلش اتاخرت فى الزيارة و جيت بعد الانتخابات ( وش مكسوف )