السبت، أغسطس 16، 2008

شبكه الهنا

التدوينه بقلم :إيما ..أم البنين

مدونة: يوميات أم البنين

omelbanen-ema.blogspot.com

شبكة الهــنــا

ساميه وسامي زوجين مكافحين ..جمع الحب بين قلبهم ..أصلهم كانوا جيران ..يعني نظام ساكن قصادي وبحبه ..بدؤوا حياتهم في شقه صغيره لكنها كانت جميله ...إتنازلت ساميه عن شوية حاجات مقابل إنها تعيش مع سامي في عش الزوجيه الصغير..مع الإنسان إللي بتحبه ..

وفي يوم وبعد العشاء المتين ..وكباية الشاي التمام قعدوا قعدة صفا أمام التلفزيون مع شوية لب وسوداني وكانت قعده عال العال لحد ما طلع المذيع إياه أبو دم خفيف بتاع تسعين دقيقه ..وقال خبر جميل ..الخبر بيقول:

إن في قرية مصريه من الصعيد قرر أهل الرأي والمشورة فيها إن الشبكه هتتلغي من القرية يعني كل عروسه هتتجوز مش هيجيلها شبكه وده تعاونا من الاهالي مع العرسان الغلابه إللي بيطلع عينهم في عمل شقة وتجهيزها من كله ..ما البنات دلوقت عايزين يتجوزوا بكل الكماليات..وكمان شبكه.. دي حوسة إيه دي يا ربي...

لحد هنا والقعده كانت جميله... لكن الست ساميه إتسرعت وإتشكت في لسانها إللي عرفت بعد كده إنه كان عايز قطعه..وقالت ..

والله برافو عليهم ..قرار سليم ..أما ناس عاقلين بصحيح ..يعني هما البنات هيعملوا إيه بالشبكه لما يتجوزوا وبيتهم ناقص غساله ولا تلفزيون..أو ما يتجوزوش من أصله ..

وهنا كانت الكارثه ..إنتهزها سامي فرصه جات له على طبق من فضه ورد زي الصاروخ ..

ولما ده رأيك.. ليه بقى إتشمللت وإشتريتي شبكه ..ما طلعتيش عاقله ليه وقلت نوفر تمنها ونجيب بيه حاجه في البيت ليه ..أهو كنت رحمتيني ..

ردت ساميه وهي مذهوله من رده إللي أسرع من سرعة الضوء..

وهو إنت كمان ما كنتش عايزني أجيب شبكه ..ليه هو أنا كنت طلبت منك حاجه ..ولا أهلي فتحوا بقهم وطلبوا منك شبكه بكذا ألف جنيه زي باقي الأهالي الناصحين ما بيعملوا ..

بس برضوا إشتريتي شبكه ..

يعني إيه كنت عايز تتجوزني ببلاش كده من غير شبكه..

خلاص يبقى ما تقوليش ..والله برافو عليهم ..والبنات هتعمل إيه بالشبكه ..والكلام إياه ده ..بلاش الشعارات دي وحيات أبوك..

طبعا ساميه سمعت سيرة أبوها إتحمقت وقالت:

ما لك ومال أبويا دلوقت ..الحق عليه إتساهل معاك كتير ..قال ده شاب لسه متخرج ..وبيبني نفسه بنفسه ..هنكون إحنا والزمن عليه ..ورضي بكل إللي قلته ..

بس برضو جبت شبكه..يعني مقصرتش..

وأنا كمان إخترت شبكه تمنها معقول علشان مكلفكش

وليه ما إخترتيش حاجه أرخص من كده..!!!

وهاختار أرخص من كده إيه

ما هو إنت طلعت ناصح ومرضتش تنزل معايا ننقي الشبكه ولمحتلي من بعيد بالمبلغ إللي في حدوده أشتري الشبكه ..

ونزلت أنا مع عمتي ننقي الشبكه ..وفضلت يا ولداه واخد الصاغه رايحه جايه لحد ما جالي كساح علشان ألاقي شبكه تمنها على قد فلوسك..وعمتي الأروبه تختار حاجات تحفه وأنا أقولها لأ مش عاجباني أصلها بلدي ..وهي طبعا في منتهى الجمال..كل ده ومش عاجبك..كنت أعمل إيه أكثر من كده..!!!

يعني لو كنت قلت لك بلاش شبكه ..كنت ها توافقي ..؟

تستعد ساميه للرد ..ولكن سامي لا يعطيها الفرصه للرد ..ويقول :

لو قلت آه تبقي كدابه ..دا كان شيء لازم حتى لو كنت إنت مش مقتنعه ..ولو إنك أكيد كنت مقتنعه وبالثلث كمان..

تشعر ساميه إنها مش عايزه تقول رأيها ..لأنه تسرع وقال رأيها بالنيابه عنها ..ولكن تسيبه لأ طبعاً وإلا ما تبقاش ساميه بنت أم ساميه ..

يعني كنت عايز زفه وفرح ومعازيم ..وقاعه قد الدنيا ..

ونيجي نفرج الناس على علبة الشبكه تطلع فاضيه وفيها دبلتين وواحده منهم فضه كمان ..دي تبقى كاسفة إيه دي ..دي كانت طنط كوكي ولا طنط سوسو أكلوا وشي وعملوها فضيحه في العيله لمدة عشر سنين قُدام.

شفت يعني الموضوع موضوع ناس ومظاهر وبس ..يبقى بلاش كلام الشعارات ده ..ملوش لازمه..

أنا مش بقول شعارات..

وبكل خبث..يرد سامي ..

خلاص لو كلامك ده مش شعارات بيعي الشبكه إللي مش محتاجاها دي وهاتي بتمنها الغسالة الفل أوتوماتيك إللي عماله تزني عليها كل شويه ..

وبدون أن تشعر ساميه بالخيَه إللي بيرسمها لها سامي ..ترد بكل عزم وتصميم ..

وماله ..إنزل إنت إحجز الغساله وأنا ها خد الشبكه أبيعها عند الصايغ إللي في أول الشارع ..

تدخل ساميه غرفة النوم علشان تجيب العلبه أم قفل إللي قفلاها على الشبكه ..

ولكنها فجأه تتذكر حاجه مهمه جداً ..راحت عن بالها ..دي باعت الشبكه من سنتين لما حبوا يدخلوا التليفون ومكنش معاهم فلوس وقتها ..يعني مفيش شبكه

تخرج ساميه مندفعة من غرفتها علشان تنتقم من سامي وتثبت له إنها مش بتقول كلام شعارات ..

سامي... سامي ...

مفيش سامي ..ما كانش موجود في الشقه ..واضح كده إنه راح يحجز الغساله ..

هناك 58 تعليقًا:

حنين القلب يقول...

هييييييييييييييه اول تعليق

لاول مرة فى الضاحكون
اول تعليق
اروح اقرى وارجع

حسن حنفى يقول...

هههههههههههههههه

بوست جميييييييييييييل

ربنا يبارك في حضرتك

حنين القلب يقول...

الشبكه طبعا فى الايام دى انقرضت
لان الدهب بقى غالى جدا
وانا اعرف ناس كتير اتخطبوا بدبلتين
بس الصراحه انا لما اتخطبت جبت شبكه وشبكه محترمه كمان
هو صحيح اخدها قبل الفرح علشان يكمل الشقه بس برضه الاسم انه جاب شبكه
والصراحه يا ستى
اى ست اصيله لو كان جايب ليها دهب الدنيا واحتاجه ياخده
دى اصلا حاجته ازاى تفكر لحظه انها تمنعها عنه
بس المهم دلوقتى سامى نزل يحجز الغساله هتجيب ساميه فلوس الغساله منين ؟؟
بوست زى السكر
تسلم ايديكى

قوس قزح يقول...

فكرتنى بعادل امام و التليفون اللى خاف انهم يشيلوا العدة هههههههههههههههههههه

و الله الزهايمر مش سايب حد فعلا يا ايما :)

عبده الرايق يقول...

برضه كده ياسامى
فى الاخر برضه حجزت غصب عنك الغساله
ابقى افتر ياعم اللى صرفته
بوست جميل يا ام البنين
تسلم ايديكى
انا قلت اعلق وبعدين اتعشى
اتفضلوا معانا
لا ده هاكل عيش حاف
علشان بس محدش ينق

إيما ( أم البنين) يقول...

حنين القلب
معظم ستات مصر الطيبات باعوا شبكتهم..أكيد ليهم الجنه
وواضح إن سامي إدبس في ثمن الغساله
شكرا على مرورك

إيما ( أم البنين) يقول...

حسن حنفي
شرفني مرورك

(احمد سكر ) يقول...

ههههههههههههههه

هههههههههههههههههه

طيب يستى سبيه يروح يحجز الغساله

وهو اللى هيتدبس فيها

ههههههههههههه

ماشاء الله بوست جميل والله

مع ابتساامه جميله ع المساء

ربنا يحفظلك اولادك ياام البنين

وترجعلينا مصر فى القريب ان شاء الله

اخيكى

احمد

إيما ( أم البنين) يقول...
أزال المؤلف هذا التعليق.
إيما ( أم البنين) يقول...

قوس قزح
ده مش الزهايمر ده عبط من ساميه
نورتيني ياجميل

إيما ( أم البنين) يقول...

عبده الرايق
ده جزاء دهاؤه...مش الشبكه إتباعت
وبالهنا والشفا

إيما ( أم البنين) يقول...

أحمد سكر
شرفتني زيارتك
والحمد لله على الإبتسامه التي رسمتها على وجوهكم
ويوميات ام البنين في مصر على مدونتي

رندا يقول...

ايما
قصة هادئة جدا فيها كلمات واقعية والله

بس المشكلة بيكون تعود انها لما تبيع الشبكة كمان تبيع الدهب الى متجوزة بية وجايباة من بيت اهلها

عارفة ياايما الراجل الصح يرفض بيع اى شئ لمراتة وهى كمان مش تطالبة بالكتير برضة
يعنى هو يحمى لها بكرة والاشياء دى بتنفعها محدش يعرف الزمن
وهى مش تطالبة بالكتير تكون حنينة علية
تسلم ايدك ياايما

كل سنة وانتى طيبة ياايما
ربنا يتقبل منك الصيام والدعاء وقيام الليل

رمضان كريم

رندا

رندا يقول...

خالتى فرنسا وحشتينى اوى

الدكتور عبد الرايق يااجمل ضاحك


سؤال مهم

هو البوست بيتغير كل خميس ولا كل قد اية علشان اعرف اتابع ؟؟؟

رمضان كريم

رندا

وجهة نظري يقول...

أصل الناس في مصر مش قادرين يفهموا إنها شركه واحده لو حتغرق حيبقي بالكل. كل واحد من الزوجين شايف أنها "عيلتي" و "عيلتك" و "كلام الناس" و "لازم أدخل بالشبكه" .... وغالبا بتخرج بهدومها ومن غير الشبكه كمان.

زوج مخنوق يقول...

بوست جميل كالمعتاد
معظم ستات مصر فعلا بيبيعوا الشبكة قبل الجواز علشان تكملة الشقة
مصر أصيلة بجدعنة بناتها و ولادها كمان
تحياتي

سومه...مجنونه فى بلد عاقل يقول...

انا بقترح بدل الشبكه ما تبقى دهب نقلبها حديد بقى يغلى اسرع من الدهب

سومه...مجنونه فى بلد عاقل يقول...

يا بنتى هم الرجاله كدا لا يعجبهم لعجب ولا الصيام فى رجب لا وكمان بيستخسروا فينا

الدفاع يقول...

اعتقد ان سامى هافتكر انهم باعو الشبكه وهو رايح يحجز الغساله
اكيد مش هايتدبس فى تمنها
ولو مافتكرش اكيد هايرجع يبيع حاجه تانيه من الشقه
وتبقى مشكله بقى
بوست رائع يا ام البنبن

سومه...مجنونه فى بلد عاقل يقول...

والله يا بنتى نا كمان امى باعت شبكتها زمان عشان التليفون والتليفزيون
ودا اللى معظم الستات بيعملوه فى مصر
ولو ازوج كويس الست ممكن تبيع هدمها عشانه بس تجيبى رجاله بتفهم منين فى الزمن دا

maiosha يقول...

ههههههههههههه
بقى بعد كل الحوار ده طلعت الشبكة متباعة اصلا
طيب يا رب يكون راح يحجز الغسالة فعلا علشان يتغرز فى تمنها بحق وحقيقى

وعلى العموم يا ستى بشبكة ولا من غير شبكة .. بس هو يجى وخلاص
هو حد لاقى يتجوز الأيام دى

سومه...مجنونه فى بلد عاقل يقول...

عندك خالتى فرنسا لسه بايعه ار محبس فى ايدها عشان الرايق يخرج من قضيه جلد حنفيات العباره اه امال ايه اسلينى انا

appy يقول...

هههههههههههههه طيب هى اتسحبت من لسانها
وهو اتسحبت منهال>اكره الرجاله دول زى القطط يبيعوا وينكروا
واحنا غلابه صح
ههههههههههههههههه

انتى عارفه ان فكرةالشبكه دى والله عجبانى جدا وبعدين اصلا تنفع فى ظل الظروف الهباب دى اللى الشباب مش عارف يتجوز يعنى ايه المشكله لما تبقى هديه رمزيه بسيطه
اوى
يالا ربنا يسعد الناس جميعا

(احمد سكر ) يقول...

يسلام ياست سومه

طب ومين بيتفرج ع التلفزيون اكتر

ومين بيرغى ف التليفون اكتر

ردى

ههههههههههه

وزى ماقلتى اغلب الستات بتبيع الدهب

علشان التلفزيون والتليفون

رغى

وطول اليوم قدام التلفزيون


اااااه يا مظلووومين يااحنا

دهب

وشقه

وشغل

مممممم

اااااااه ياااانى

appy يقول...

احمد سكر
=======
انت جاي تتجني علينا ولا ايه طيب اترزعوا فى البيت وبعدين اتكلموا مش بتسيبونا وتروجوا تعطوا رجال عاوزه قطم سكاكيرهاهههههههههههه

Dr- Hema يقول...

ههههههههههههه


جبتوا تلاجة

مبرووووووووووك


ههههههههههههههههه

الغسالة وعقبال التلاجة

د/هيما

واحدة مفروسة يقول...

هييييييييييييه
د\هيما جه
الحقوووووووووووووووووا
اجرووووووووووووووووووووووو
استخبوووووووووووووووووووو
حتدخلوا التلاجه
ازيك يا دكتور
أخبار التلاجه اللى عندك ايه؟؟؟؟؟؟؟؟؟؟؟
لسه 18 قدم...ولا بقت 22

والله ليك وحشه
انا قلت جيت تدخل حد التلاجه اتحشرت انت كمان جوه مش عرفت تطلع
هههههههههههههههههه
ام البنين
شبكة؟؟؟!!!
مممممممممممممممممم


رمضان كريم يا شوباب
صوم مقبول ان شاء الله

كلبوزة لكن سمباتيك يقول...

هههههههه حيبيعها الشبكة مرتين
ده قادر قوي


اه من الرجالة دول بوريييييه

تحياتي

إيما ( أم البنين) يقول...

رندا
ساعات يارندا الظروف بتحتم على الناس حاجات هما مش عايزين يعملوها ..ربنا يقينا شر الحاجه ..ويرزقنا الرضا بالحال
سعدت بيك جدا

إيما ( أم البنين) يقول...

وجهة نظري
وجهة نظرك صحيحه جدا ..وده سبب مشاكل كتير

إيما ( أم البنين) يقول...

زوج مخنوق
واضح إن حضرتك مش زوج مخنوق خالص
شرفتنا

إيما ( أم البنين) يقول...

سومه
متهيألي شبكه حديد صعب شويه..
والرجاله والله ممكن يعجبهم العجب بس شوية تفاهم وحبة توفيق من الله

إيما ( أم البنين) يقول...

الدفاع
ربنا يستر وميبعش حاجه ويفك الكيس لساميه شويه
شكرا على مرورك

إيما ( أم البنين) يقول...

maiosha
ربنا يرزقك بالشبكه والعريس في ليله واحده

إيما ( أم البنين) يقول...

Appy
إزيك يا حبيبتي واحشاني يا جميله
المشكله في المجتمع إللي بيفرض على الشباب عادات ملهاش لازمه

إيما ( أم البنين) يقول...

Dr-hema
الله يبارك فيك وعقبال عندكم

إيما ( أم البنين) يقول...

واحده مفروسه
نورررررررررررررتي

إيما ( أم البنين) يقول...

كلبوزه
فعلا بوريييييه منهم

سومه...مجنونه فى بلد عاقل يقول...

احمد سكر
لا والله ما انتوا مقضينها تليفزيون فى القهوه وشيشه مستخسرين الست تتفرج كمان فى البيت ثم تعالى هنا مين بيسمع نشرات الاخبار ومقتل فلان ومصرع فلان
مين بيلعب بديله من ورا مراته وبيستخدم التليفون نظام عبد الموجود موجود سته كيلو سمك وجمبرى
مستخسر الست تسال على اهلها بتليفون لا والله فعلا قطط تاكل وتنكر لم تعابينك يا سكر لاجيبلك جيش النمل بتاعى يخلص عليك

انسان بلا عنوان يقول...

حتى اسمها رخم ...شبكه !
كأنها كلبشات بس مش للبنت بعتبار انها هى اللى بتلبسها ..لالالالالالالالا
للراجل اللى غرم ودفع تمنها فبتشبك ال وميقدرش يسيبها
بس يا بعدهم .....اى حد متاخد منه شبكه غصب يجيلى وانا ارفع له قضية رد شبكه!

.........................

الناس بجد بقت بتصعب الامور على بعضها
وانا كتبت بوست عن الموضوع ده
بس دى خلاص بقت ثقافة مجتمع
يارب تتغير

تحياتى على البوست الهادف ايما

عالم حبيب يقول...

ههههههههه ضحكة من القلب

جزاكِ الله كل خير أم البنين

ليا واحد صاحبي دايما كان يقولي : الجواز ده من رابع المستحيلات يابني اليومين دول .. يمكن الخبر ده يفرحه شوية :)

مسكين سامي :) اتدبس في الغسالة :)

ربي ييسر زواج شباب المسلمين يارب

أخوكم : حبيب

واحدة مفروسة يقول...

ههههههههههههههههههههههه
ام البنين
البوست فظيع...
يعني الاخت لازم تنسحب من لسانها ههههههههههه
همه الستات كده بتدور على جر الشكل و حياتك
و الراجل من دول يدخل فى المناقشه بقلب جامد
و فى الآخر تطلع العلبه فاضيه
هههههههههههههههههههه
ياعيني عليهم
و الله تلاقي فيه ناس كتيره بالمنظر ده
انا مرةة كنت بسمع برنامج برضه كده عن موضوع تكيف و اضراره
و انا يقالى زمن عاوزه تكييف فى الرسيبشن و جوزي على كلمه واحده حاضر
المهم البرنامج بيقول التكييف ممكن يعمل امراض ايه و يؤثر ازاي على الصحه
قوم انا برضه اتسحبت من لسانى و قلت التكيف ده حاجه و حشه
و بس يا امي مسك على الكلمه
و ادينا بقالنا كااااام سنة
انا ازن
وهو يقولى انتى فاكره البرنامج اللى قولتى فيه ان التكييف حاجه و حشه
هههههههههههههههههههههههههههههه

mony يقول...

انا مش عارفة ايه الرجالة اللي بيجبيوا الشبكة للعروسة و حاطين عينهم عليها من قبل ما يتجوزا كمان


و بعدين الشبكة ديه الرسول وصي عليها
و قال حتي لو خاتم من حديد


مش المهم انه نمنع الشبكة لكن علشان الرسوا امر بيها يبقي نقلل من قيمتها
يعني مثلا يلاش ب5 الاف جنيه خليها ب3 و لا 2 الف بس

بس مافيش شبكة صعب



اهه تخطيط سامي طلع علي فشوش لانه اخدها منها قبل كده

بصراحة احسن
يستاهل

المهاجر الى الله يقول...

تعبيرات متقنة وكلمات منتقاه واسلوب تتحسدى عليه وعرض شيق .
تحياتى لكى كتير.
و ادعوكى لزيارة مدونة عيون على هذا الرابط
ww.eyuon.blogspot.com
وشكرا.

(احمد سكر ) يقول...

اااابى
يختى مااحنا بنيجى من الشغل

نلاقيكم مرزوعين قدام التلفزيون

نكلم الواحده ممنكم

تقول استنى والنبى الحته دى بس

طب كوبايه سحلب

تقلى تعالى بس شوف مهند بيساعد نور ازاى

ال مهند ونور ال

انتم كدا بتجرو ورا الرومانسيه الكدابه

وزعلانييين علشان حتة شبكه

محطوطه زينه

طب بزمتك مش التلفزيون اللى مرزوعين قدامه ليل نهار احلا

ااقله مريحينا من وجع دماغكم

ورغيكم

بلا نيله

سحلب

عبده الرايق يقول...

نداء من الرايق
الى فرنسا
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس
مش عاوزين فوانيس
عايزين فرنسيس

عبده الرايق يقول...

تحيه لكل زوارنا الكرام
وتحيه لابنائى الكرام
وتحيه لكل عائله الضاحكون

(احمد سكر ) يقول...

سووومه
مش مستخسرين ولا حاجه

بس مش تقعدو تعيطو وتقولو الشبكه وبتاع

وبعدين انتتى قلتيها اخرنا نشره واخبار

انتم بئه اشى المسلسل الفلانى

الفيلم الفلانى

برامج التدبير المنزلى

والاكلات اللى بتسرقوها وتكدبو وتقولو احنا الفناااها

بس الواحد بياكلها بمزااجه

موال جديده ال

وبعدين انتم مدينا فرصه نمسك التليفون

طول النهار رغى رغى رغى

وال ايه بطمن ع اهلى

بطمن على اهلى 66 مره ف اليوم

ماتروحو تقعدو هنااك اوفر
ال عبد الموجود موجود ال

هههههههههههه

ودا اخركم

جيش نمل

سحلب

إيما ( أم البنين) يقول...

إنسان بلا عنوان
فعلا الناس بتصعب الأمور على بعضها والأهالي بتصعب الأمور على أولادها..يارب العادات دي تتغير في يوم من الايام

إيما ( أم البنين) يقول...

عالم حبيب
لا والله الجواز مش صعب ولا حاجه بس لو لقى بنت الحلال إللي تقدر وتقف جانبه
مع تمنياتي لكل الشباب بالزوجات الصالحات

إيما ( أم البنين) يقول...

واحده مفروسه
ياحبيبتي كل الرجاله كده .زوإحنا غللي بنجيبه لنفسنا بلسانا إللي شغال على طول ...
شرفني حضورك

إيما ( أم البنين) يقول...

mony
حبيبتي إللي وصى به الرسول صلى الله عليه وسلم هو المهر مش الشبكه..
وواضح كده إن الكل مفروس من سامي ...يستاهل

إيما ( أم البنين) يقول...

المهاجر إلى الله
شكرا على الإستحسان والزياره ..وإن شاء الله أزور مدونتك قريبا

إيما ( أم البنين) يقول...

عبده الرايق
نورت المدونه

الطائر الحزين يقول...

وبما انى لسه راجع من الصعيد و كان فيه ناس بيتكلموا فى موضوع الشبكة وان اهل العروسة والعريس كل واحد فيهم بيدفع 5000 جنية يبقى الاجمالى عشر جنية وبيقولوا انهالت عليهم الاعانات وجمعوا فلوس بالهبل وبقوا بيعبوها فى زكايب وبعد الاشية بقت معدن واتبشبش الحال

ردت الزوجة للزوج
=======
مش هتجيب لى شبكة
هو انت يعنى هتتجوزنى من غير شبكة !!!!!!!

الطائر الحزين يقول...

تحية طيبة لكل الاخوه
=======
لبابا عبدة وماما وفرنسا والاخوه والاخوات رفاق الكفاح المسلح واحب ان اعرفكم ان سامى مش بتاع التدوينة دخل الجيش و الاهل كلهم بخير والسلام ختام

=========
هو سامى فين

إيما ( أم البنين) يقول...

الطائر الحزين
فكره كويسه موضوع المشاركه دي ..بس إيه لزمة الموضوع من الأساس
حضرتك شرفت التدوينه

ابو درويش يقول...

دى اول زياره
مدونه جميله
ودمامه زى الشربات
تحياتيا
احمد