الأحد، يوليو 20، 2008

يوم من عمرى

زى اى واحدة مخطوبة حلمت ان انا و خطيبى نجرى على رمل البحر وقت المغرب و نرش بعض بالميه زى الافلام - اصل اختكم عندها احلام يقظة كتير - و اعيش بقى يوم من ايام العمر اللى متتنسيش و مكدبتش خبر و اقترحت علي خطيبى نسافر يوم اسكندرية ..
اتبسط و قال ياريت
كان اول حاجة لازم نعملها نقنعهم فى البيت عندى
طبعا اخد كلمتين فى جنابه الاول بعدها وافقوا بشرط ناخد معنا ناطورجى و اخدنا مجبرين اختى الصغيرة
لما وصلنا اسكندرية كان فى اول الصيف كان البحر مقلوب و عالى على حظنا ..نوة غير متوقعة ..المهم لفينا شوية بالعربية فى اسكندرية و قلنا نروح ابو قير نتغدى هناك على البحر الميت يعنى لا نوة ولا موج .. وقفنا نختار السمك اللى هيتعمل لنا و بعدها سالت على الحمام و ياريتنى ما سالت و كنت فضلت بكرامتى احسن
الرجل شاور على عشة كده و قالى اهو يا هانم ..فين .. اهو العشة دى .. دى فيها حمام ..اه فيها حمام و افرنجى كمان
و دخلت برجلى محدش غصبنى و كأنى دخلت بلاعة و مش اى بلاعة لا بلاعة بسكانها اشى صراصير رايحة شغلها و نمل سهران طول الليل مروح بيته و العناكب بتلقط رزقها هنا و هناك
طبعا نفسى اسدت و لا دخلت الحمام و لا اكلت و لا رضيت اقعد حتى فى المكان وقعدت فى العربية لحد ما هم خلصوا اكل
بعد ما اتحركنا لاقيت اختى بتصرخ و بتقولى بطنى وجعانى
جرينا على المستشفى طلع مغص كلوى و الدكتور ادها مسكن مهدىء
هنا قلت لا نرجع القاهرة لحسن تتعب اكتر و تبقى مشكلة مشنا على الكورنيش بالعربية و انا ببص على البحر و بفتكر اغنية فيروز شط اسكندرية يا شط الهوا روحنا اسكندرية و قلبنا الهوا و يا دوب طلعنا على الصحراوى و مفيش نص ساعة و راحت العربية جات لها سكتة قلبية - اصلها كانت عربية نص عمر - وبقت ماشيه على سرعة 10 كم
قلت له فى ايه ..
رد بمنتهى الهدوء مش عارف يظهر الموتور فوت .. قلت فى سرى الله هو هيعمل زى الافلام و يقولى تعالى نبات فى اى اوتيل للصبح .. و الشيطان بقى اخد و ادى مع احلام اليقظة عندى و فؤت على لااااااااا مش هنبات .. قالى نبات فين .. قلت له هنا فى اى اوتيل ..قالى و مين قالك انى هسيب العربية ( قال يعنى ال بى ام )
الدنيا بدات تضلم و احنا ركنين على جنب الطريق قال ايه مستنى الفرج اقصد مستنى اى عربية دورية راكبة و فجاة لمحت خيال حد بيبص عليا من الشباك.. صرخت و الخيال كمان زعق و طلع بندقية فى وشى ..
كان غفير كأنه هربان من مسلسل حدائق الشيطان و خطيبى - اللى هو جوزى دلوقتى - بيكلمه بكل هدوء و يقوله انت مين و عايز ايه .. قاله انتم اللى مين و واجفين هنا ليه
.
و مين اللى ورا دى ،
.
حكينا الحكاية ان العربية عطلانة و ان اللى ورا دى اختى و تعبانة .. صمم يزقنا و خطيبى يقنع فيه انها مش قصة زق و هو مفيش فايدة .. و فضل يزق لحد ما بقينا بعيد عن المنطقة اللى مسئول عنها
فضل خطيبى سايق العربية على سرعة 10 دى يمكن حوالى 10 متر كمان - عمل مجهود و الله
و فجاة شاف عربية الاتارى على الجانب التانى من الطريق وراح واقف و قالى هنستناهم لما يلفوا و يرجعوا و فييين بعد ساعة - و انا طبعا مفيش فى بالى طول الوقت ده غير اشكال الزعيق و الخناق اللى هشوفها فى البيت لما اروح - وصلت الدورية الراكبة و ركنت قدامنا زى الافلاام الاجنبية و نزل منها الظابط و جيه لنا و سال خطيبى فى ايه فحكى له الحكاية و انه عايز نص نقل يشده للقاهرة بص الظابط فى العربية و قالى انتى مين قلت له خطيبته ..قال
.
و مين اللى ورا دى
.
و عيونه كلها شك فيا و فيها قلت له اختى تعبانة ونايمة .. مالها .. قلت مغص كلوى و واخدة مسكن .. يعنى مش واخدة حاجة تانية .. حاجة تانية ازاى يعنى ؟؟ .. راح باصص لخطيبى و قاله تعالى ورا و اداله حبل من العربية ربطه فى عربيته و شده لحد مكان كده زى الكافتيريا و فيها نقطة مرور صغيرة و نزلت انا و خطيبى شاف البطايق و عمل محضر و طلب ونش علشان يشد العربية و استنينا الونش فى العربية و كل ظابط او عسكر او اى حد معدى ميسألناش غير سؤالين انتم اتمسكتوا ليه
.
و مين اللى ورا دى !!
.
لحد ما وصل الونش و نزل منه رجل عريض المنكبين شالولح قاله هاخد منك 200 جنيه و وقتهاالمبلغ ده مش معنا بعد الغدا و الفسح و المستشفى قال خلاص اشدك للقاهرة بس هاخد البطاقة بتاعتك و الرخصة و نتحاسب هناك و لما شافنى فى العربية قرب و قاله مين دى رديت انا و قلت له انا خطيبته و اللى ورا دى اختى تعبانة
المهم شدنا لحد البوابات و بعدها بحوالى 100 متر ركن و نزل و جالنا و قال بصوت مفيهوش نقاش تعال انت جنبى و هى تسوق علشان تورينى الطريق للبيت انا قلت معرفش اسوق هسوق ازاى و خطيبى ولا كأنى اتكلمت و مشى مع الرجل كأنه منوم و هو بيقولى امسكى بس الديركسيون كويس
قاعدة مكان السواق و مشى الونش و فضلت ماسكة الديركسيون جااامد لدرجة انى صوابعى ابيضت فوق منه و بردو بيتحرك تحت ايدى
من على بعد شوفت كوبرى و الونش هيطلع عليه قعدت اعمل كلاكس علشان انا اصلا بخاف من الكبارى و انا مش سايقة ما بالكم بقى و انا روا عجلة القيادة كل القران اللى حفظاه وقتها قلته و انا مغمضة عينيا و بين كل أية و أية اصرخ فى اختى علشان تصحى تشاركنى الفزعة دى و هى فى عاشر نومة و نزلنا مع على الكوبرى و دخلنا شارع ضيق يعدى عربية بالعافية و العربيات راكنة فيه يمين و شمال و كنت هاخد كل عربيات الشارع بالحضن بس ربنا ستر
ركن الونش وانا طبعا ركنت وراه لازق و الرجل نزل فك الحبل و طلع خطيبى لبيته جاب الفلوس و مفتاح عربية باباه ونزل ادى الفلوس للرجل و ادنا البطاقة و الرخصة و مشى
و وصلنا تحت البيت عندنا الساعة اربعة الفجر و طبعا وقتها خلاص بطلت افكر فى رد فعل اهلى ..
ركن العربية فقلت له احنا لازم نسيب بعض
بمنتهى الهدوء : ليه
لسببين الاول انا قطعت الخلف خلاص بعد اليوم ده و التانى اهلى هيقطعونى و يقتلوك
بردو بمنتهى الهدوء : طيب
و نزلت و بعد كام متر لاقيته بينده عليا تانى ( فرحت و قلت هيرجع فى كلامه و يقولى مش هقدر على بعدك و هتستحمل اى حاجة علشانك )


قالى : و اللى ورا دى !!!
.
بقلم
.
قوس قزح

هناك 89 تعليقًا:

عبده الرايق يقول...

هيييييييييييييييه
فعلتها
الاول
مبروووووووووووووووك للاهلى
الرجاء اى حد يعلق
يلبس الفانله الحمراء

عبده الرايق يقول...

جدعه يا قوس قزح انك رفضتى تباتى معاه فى اوتيل
غريبه والله
الراجل دماغه فى الورطه اللى موروط فيها
وانتى دماغك فى انه ممكن يطلع ذئب بشرى
بس طلع ابن حلال وحتى مطلبشى اى حاجه
يومك كان عسل نحل
بس عملتوا ايه صح فى اللى وارء دى ؟؟

حسن حنفى يقول...

والله كلام جميييييييييل
ومدونه رائعه

فاتيما يقول...

يا خرابى يا دوللى
على اللى ورا دى و واكلة دماغ الناس كلها كدا ...
بصى أنا شفت خطيبك - اللى بقى جوزك - و متخيلة دلوقتى المنظر كله بقى شكله إيه و رد الفعل على وشك و وشه
مكنتش فسحة دى يا بنتى ...
أتمنى تكونى حققتى أحلام اليقظة بتاعتك فى مكان تانى و رشيتوا مية البحر على بعض فى مشهد سينمائى كلاسيكى ...
بس من غير صراصير
و مغص
و عربية عطلانة
ربنا يسعد أيامك كلها
و تحياتى لجوزك و للعيال الحلوين زى أمهم

ابن حـجـر الـعـسـقـلانـى يقول...

أنا مت من الضحك ... بس انت عارفة .. المصايب و الكوارث اللى من النوع دة هى اللى بتخلى الرحلة جميلة و ليها ذكريات حلوة
و الف حمد الله على سلامة الوصول و ألف سلامى على أختك

ألا صحيح .. هو انتم كنتم واقفين فى الطريق الصحراوى ليه ؟؟ و هى كانت مين اللى نايمة ورا دى ؟؟؟

maiosha يقول...

هههههههههههههه
يا عينى على الفسحة اللى باظت
بس كله كوم وأختك كوم
والله أنا لو منها كنت صحيت وقعدت أعيط وكنت قلت للظابط أنا معرفشى الناس دول .. دول خاطفينى
ههههههههههههههههههههه

عقل إجرامى
الحمد لله إنها جت على قد كده وعرفت تروحوا بيتكم

مبروك للأهلى يا عبده

maiosha يقول...

أه صحيح نسيت

هى مين اللى ورا دى؟؟

نعكشة يقول...

ههههههههههههههههههههههه

يخربيت المسخرة

ادي جزاء اللي يخرج مع خطيبة و يروح اسكندرية


هههههههههههه

لأ بجد سكرة

بس سؤال بس

هيا مين اللي ورا دية؟؟؟

دمتي سالمة

سلامٌ عليكي

kochia يقول...

اممممم
مهي اسكندرية بعيد برده
كنت رحتي كورنيش المعادي في محافظة حلوان
كان ادي الغرض

والبت دي اللي راحت تراقب
الناس كلها راقبتها
هههههههه

المهم رجعتي بالسلامة واتجوزتي خطيبك وكله تمام
عليكي بقي وعلي الكورنيش المذكور فوق
لما تحب تروشي ولا اي كلام من ده

وتحياتي للبنت اللي كانت ورا

Mahmoud البطراوى يقول...

تدوينه جميله اوى انا فطست من الضحك

موقف لا تحسدى عليه بجد
هههههههههههههههههه

break يقول...

÷ههههههههههههههههههههه
مسخرة بجد


اللى ييش ويسافر ياما يشوف
المهم اختك عاملة ايه دلوقتى؟

اكيد استمتعت باليوم ده

Mony يقول...

اهم هاجة ان "الناطورجي" اللي واخدينه معاكم كان نايم طول الوقت تقريبا



هههههههههههههه

بس دمك زي السكر


انا بطلت اعشم نفسي و احلم بأحلام يقظة علشان ماترزعش علي ارض الواقع


حاولي تروحي اي شط و ترشي ماية البحر علي اي حد لحسن الموضوع ده ممكن يعملك عقدة

الطائر الحزين يقول...

يا عينى على الراجل اللى دايخ فى وسطكم يخلى باله منك ولا من بتوع المرور ولا الغفر اللى بيطلع له من الطريق

ولا من اللى نايمة ورا دى

ربنا يكون فى عونة اليوم ده

(يا ستى الفسح لها ناسها)
كاتنا نيله فى حظنا الهباب

Doba يقول...

ههههههههههههههه
ههههههههههه
هههههههههه

والله عسل
خطيبك ولا جوزك سكر
رحلة فى منتهى السعادة والسرور

بس كان لازم تكملى وتقولى اتعلقى من رجلك فى البيت كام يوم واتفرج عنك بكفالة أد ايه

يلا سلام
وسلميلى عالبت اللى ورا دى
===========
يا رايق

بيب بيب
زمااااااااالك

=========
انا بس بغيظك زى مكنت بغيظ جوزى امبارح لانه تابع للفنلة الحمراء زيك

=====
بحبكم جدا
متبعاكم يوميا
بالتعليقات كاملة
امنياتى بمزيد من التألق
=====
هبة

Empress appy يقول...

يا عينى يا دوللى ده اخرة الخنطوبات يا بنتى
ايه الروقان اللى هو فيه ده معلش
معلش يا حبيبتى
بس والله موتينى من الضحك وربنا يكون فى عون المخطوبين بالشكل ده
واختك اللى عملت ازمه طول الرحله

يالا كل رحله وانتى طيبه

إيثار يقول...

هههههههههههههه

شكرا على
ذاك البوست
الذي كهكهني

حنين القلب يقول...

يا ربنا يا داليا
ده مش يوم من عمرى لالالا
ده يوم بعمرى
ورايحه تقوليله نسيب بعض وراجعه 4 الفجر كان مين هيتجوزك بعده
كنتى هتعنسى يا حبيبتى
الحمد لله انه مش حصل
بس بجد عايزة اعرف اهلك قابلوكى ازاى
يا ترى الموضوع وصل لفين
علقه؟؟
كلمتين فى العضم ؟
ولا ايييييييييه
ارجو التوضيح
ملحوظه صغننه
داليا سامحينى انا غلطت غلطه صغننه فى البوست بتاعى قولت ان عيد ميلادك الشهر ده وهو عيد ميلاد عاشقه النقاب
سورى والله بجد
وعلى العموم كل سنه ويوم ولحظه وانتى طيبه يا حبيبتى
بحبك يا داليا والله
سلاموزة يا موزة

غير معرف يقول...

ههههههههه
لا لا جامده
ادى اخره احلام اليقظه
بس دى سفريه لوووووووووز
هههههههههههه

بجد بوست يهلك من الضحك
تسلم ايدك

بس الا هيا مين الى ورا دى؟؟؟؟؟؟؟؟

هههههههههه

سلامى
:))

قوس قزح يقول...

انا اااااسفة على التاخير فى التواجد يا جماعة بس كنت مسافرة والله و لسه راجعة حالا

كده يا عبده يا رايق تنزل البوست من غير ما تقولى ؟؟ تلاقيك عملت كده علشان تاخد اول تعليق لك

قوس قزح يقول...

عبده الرايق
ما هو كل الذئاب بيكونوا حمل وديع الاول .. اضمن منين انا بقى

مش عايزة اقولك يا رايق اننا بمجرد ما رجعنا البيت لاقيتها فائت و بقت كويسة جداااااا
و طبعا الكل يقولى فين اختك تعبانة دى !!!

قوس قزح يقول...

حسن حنفى

الحمدلله انها عجبتك
و ياريت تشرفنا بالزيارة دايما

قوس قزح يقول...

فاتيما
صح يا فاتيما انتى اكتر واحدة ممكن تكونى متخيلة الموقف :))

لا هو انا مجنونة افكر فى رش الميه تانى
صدق المثل اللى قال رش الميه عداوة

نورتنى بزيارتك يا جميل

قوس قزح يقول...

ابن حجر العسقلانى
ههههههههههههه و النبى ارحمنى من السؤال ده

و دى ذكريات جميلة !!
ده انا حرمت اسافر بالليل و بردو حرمت اخد اختى معايا :))

قوس قزح يقول...

maiosha

لا هى لو كانت صحيت مكنتش هتعيط و تتبلى علينا
دى كانت هتعيط من الرعب
و انا بحكى لها كانت مش مصدقة و بقت تقول الحمدلله انى كنت نايمة

قوس قزح يقول...

maiosha

هو فى حد ورا !!
ولا اعرفها

قوس قزح يقول...

نعكشة

انتى اللى سكرة بأسمك و صورتك دول :)

الحمدلله اننا اختارنا اسكندرية مش مارينا والا كان هيبقى الطريق انيل

اصل سمعت ان طريق مارينا عليه عفاريت
و بصراحة اليوم ده مكنش ناقص عفاريت كمان


اللى ورا دى لاقينها نايمة على الطريق قلنا حرام نوصلها :)

عبده الرايق يقول...

قوس قزح
انا عامل تنويه لميعاد نزول البوست من اربع ايام
ومكنتش عارف انكى مسافره
عموما حمدلله على السلامه
ومبروك الكباب والكفته
واحنا هنا بنكح تراب

قوس قزح يقول...

kochia

المعادى ايه بس .. طيب و الرملة ؟؟
و الشمس لما تنزل تطش فى الميه ؟؟

و الله الاحلام دى جيبانى لورا

البت دى كان شُبه لنا ولا كأننا خطفناها

الله يسلمك بس تفتكر الكورنيش ده مسموح يقعد عليه المتجوزين ؟؟
شكله للحبيبة بس :)

قوس قزح يقول...

kochia

المعادى ايه بس .. طيب و الرملة ؟؟
و الشمس لما تنزل تطش فى الميه ؟؟

و الله الاحلام دى جيبانى لورا

البت دى كان شُبه لنا ولا كأننا خطفناها

الله يسلمك بس تفتكر الكورنيش ده مسموح يقعد عليه المتجوزين ؟؟
شكله للحبيبة بس :)

همس الاحباب يقول...

ههههههههههههه
بجد بجد تحفة
الراجل مسافر يشوف الوان قوس قزح
شاف يوم اسود من قرن الخروب
وقال ايه احنا مننفعش لبعض
انا قطعت الخلف واهلى هيقطعونى
هههههههههههههه
والله انتى فقر
وهو رايق واخر روقان فى الدنيا

همس الاحباب يقول...

ايه يا رايق
عايز ايه
ما احنا تحايلنا عليك
تيجى ولا عينى فيه واقول اخيه
وعامة قوس قزح ولا شافت حاجة
يعنى انسى يا عمرو
وكح اسمنت براحتك
انا شمتان فيك بصراحة

قوس قزح يقول...

بطوط حبوب

و الله يعنى هو الناس لو تعرف مش هتحسد لا على الخطوبة ولا على الجواز كمان

و مفروض احنا اللى نحسدكم على العزوبية :)

قوس قزح يقول...

break

و اللى يتجوز يشوف اكتر :)

اختى بصراحة اكتر واحدة استمتعت باليوم ده و كان نفسها تطلع يوم تانى كمان

قوس قزح يقول...

يا رايق ما انت عينك فى الخروجة
لا شوفت كباب ولا كفتة

و بعدين ما انت عارف خالد
ده قال لى انها على فول و طعمية

و الله كان نفسى تيجى اوى يا رايق

يس شكلك بخيل و مش بتيجى غير لما يكون فى جند

Mafrousa يقول...

ههههههههههههههههههه
هههههههههههههههههه
يا داليا انا قريت البوست اولاني و مش عرفت ارد لأسباب نتيه
و دلوقتي قريته تاني ...و برضه مسخسخة على روحي
اولا..بسبب اليوم الجميل اللي قضيتيه مع خطيبك سابقا..و جوزك حاليا
هوه مش برضه انتي اتجوزتيه؟؟؟؟؟ههههههههههههههه
و لا غيرتيه...بعد رد الفعل ..الهادي اللى فرسني ده
هههههههههههههههههه
بس يا حلوه انتي لازمن و لابد تكملى بارت 2
اهلكك عملو فيكي ايه انتي و هوه
هههههههههههههههههههههه
الصراحة ..ديه عين و صابت الخروجه
هههههههههههههههه
واختك قضت وقت جميييييييييييييييل


جوزك لسه هادي؟؟؟ههههههههههه

موقف لا تحسدي عليه

Mafrousa يقول...

إزيكم يا جماعه انا رجعت
إزيق يا ابو الروقان....واحشني معاكستك
ههههههههههههههه
إزيك يا فرنسا..اخبارك ايه؟؟؟
آبي بتنجاني وحشتيني ووحشني خروفك البمبي
ازيكم يا اخوتي الذكور كلكم
و اخواتي البنانيت كلكم
وحشتوني


إيه؟؟؟!!!!!إيه بقى!!!!!
ماحدش عزمني على حاجه ساقعه يعني
إيه الرايق قفل البوفيه المحمول(الجردل)
فين الببس بتاعتي يا رايق؟؟؟؟ ولا الاهلى يغلب و مافيش ببس..ولا ساندوتش...ولا أي حاجه كده؟؟
يالله ده انتو عيله جلده صحيح
اروح ادورلي على عيله تانيه بتشرب ببس و فانتا

قوس قزح يقول...

mony
الناطورجى نايم ؟؟
ياريته ما ناااام او مجاش من اساسه

دى عاملة زى اللى دخل السينما نام من اول الفيلم لاخره و مش بس كده لا كمان شخيره عمل دوشة للناس

يعنى قلتها كانت احسن

اما عن العقدة يعنى هى جات على دى ما الحبل مليان عقد :)

كاميليا بهاء الدين يقول...

ههههههههههه

اما يوم رومانسى بشكل

على انغام الونش الكلاسيكية

اه صحيح
واللي ورا دى؟؟

بوست خفيف وجميل اوى

دام قلمك يا جميلة

تحياتى وحبى

قوس قزح يقول...

الطائر الحزين

تصدق انا كمان صغب عليا مع انه ولا بان عليه اى حاجة ابدااااااا
لكن بعد الجواز قلت افهم منه بقى ايه البرود ده
قالى يعنى لو كنت قلت لك انى خايف كنتى تفتكرى وقتها حالك هيبقى احسن

يعنى هو كمان كان بيلعن اليوم النحس ده بس مش قادر ينطق :)

قوس قزح يقول...

doba

لا انا كنت هتعلق فى القسم لانهم كانوا خلاص هيبلغوا البوليس و المستشفيات

مش خوف عليا لا دول كانوا بس بيحجزوا اماكن لى انا و خطيبى هههههههههههه

قوس قزح يقول...

معلش اعذرونى يا جماعة هكمل بكرة الرد على التعليقات

تصبحوا على خير

maha zein يقول...

حكاية بجد روعة
جميلة اوي بكل الى جري فيها
بسمكهاوونشها واختك وخطيبك وكل حاجة
بجد كنت مستمتعة اوي
بيكي
وبقصتك

تحياتي يا قوس يا قزح
انتي وخطيبك والى كانت ورا

فرنسا هانم يقول...

هههههههههههه
يعيش الناضورجى النايم
يا
يعيش
يا
يعيش يعيش يعيش

فرنسا هانم يقول...

روووووووووووقه
انت جاى تعملنا فتنه بين الاهلى والزمالك
نو
نو
نو
مفيش داعى للهتافات الكرويه هنا يا رووووقه
بيب بيب اهلى
بيب بيب اهلى
الاهلى يا يعيش يا يعيش يعيش يعيش

فرنسا هانم يقول...

الطائر الحزين
انا قريت فكرتك فى الدارفت
وبعت اميل للرايق وجارى التنفيذ
ربنا يبارك لنا فى افكارك
بجد انت مكسب كبير للضاحكون

فرنسا هانم يقول...

Doba
تحياااااااااااااااااتى لكى
ولتشجيعك للمدونه
بحبك قووووووووووووووووووووووووى

فرنسا هانم يقول...

حنين القلب
انا مبسوطه باندماجك مع عائله المدونين عامه
والضاحكون خاصه
بحبك ياحنين

فرنسا هانم يقول...

shayma
وحشنى كلامك يا شيماء جدا
سعدت بتواجدك

فرنسا هانم يقول...

appy
سمعت خير اللهم اجعله خير انكم اكلت كباب
الف هنا وشفاء
وسلامى لاخى الكبير ابو خالد

فرنسا هانم يقول...

واحدة مفروسة
الف حمد لله على سلامتك يا مفروسه
مش مفروض قبل ما تسافرى تسيبى خبر
انت مش عارفه انت بتمثلى ايه بالنسبه للضاحكون ؟؟؟

فرنسا هانم يقول...

اخوانى فريق العمل بمدونه الضاحكون
فين مفقوعه
وهيما
ونيجرو
وصبرنى يارب
بقالهم كتير مش بيظهروا
ياريت تطمنونى عليهم

عاشــــــ النقاب ـقــــة"نونو" يقول...

السلام عليكم
هههههههههههههههههههه
عسل والله
ربنا يكرمكم يارب
سلمولي على فرنستي مفتقداكي والله
تحياتي للجميع

خالد حفظي يقول...

فرنسا هانم
عبده الرايق
ابن حجر
قوس قزح
مها زين
آبي
المفروسة
المفقوعة
.......
......
كل فريق المدونة الكرام اللي حاضر واللي غايب .. اللي كتبت اسمه واللي مكتبتوش
بصراحة المدونة هايلة و راقية و مضحكة جدا جدا جدا .... و الأجمل من انها مضحكة جدا انها بدون اسفاف
أنا ساعات مبقدرش امسك نفسي من خفة دم اللي بيكتب .. كلكم بدون استثناء عشان محدش يزعل
....................
الشيء الرائع جدا و باحسدكم عليه بجد بجد بجد ( خدوا بالكم انا عيني وحشة )
أنكم فريق و دا أروع ما في المدونة روح الفريق اللي واضحة وباينة على الجميع
خالص تمنياتي بالتوفيق لرسم ابتسامة صافية افتقدناها

انسان وبس ! يقول...

ايه الجمال ده

-هو الظابط عمل محضر ايه ولا مؤاخذه مش فاهم ؟

- وصراحه خطيبك عنده حق بعد خروجه بالشكل ده !

بس انا عندى سؤال

انتى لما جه فى دماغك انه هيطلب منك انك تباتى معاه فى اى اوتيل للصبح ........

مفكرتيش ازاى يعنى؟ طب

واللى ورا دى !

canary يقول...

هههههههههههههههههههه
وربنا حلوة جدا
وهو طلع جدع على الاخر
صدقينى حلوة اوى لدرجه انى معنديش تعليق
بس فيه استفسار اختك صحتها ازيها دلوقتى؟ وفيه واحدة تنزل وتسيب اختها ورا كدة؟

Empress appy يقول...

فرنسااااااا هانم قلبي

اه بابا عزمنا وكانت تورته وحلويات شرقيه تجنن بجد كان حته يووووووم تحفه وسحلت خالد وسوووو مشى واحنا راجعين موتهم من الصداع والرغي وقال يقولوا هاليا راغيه انا رغايه عاااااااا يرضيكي كده

Empress appy يقول...

وطني


استاذي العزيز
ربنا يبارك فيك وشكرا على اطرائك الجميل جدااااااااا جداااااااااااااا ونورت ويا رب نفضل دايما سبب فى سعاده حضرتك وكل الموجودين

Mafrousa يقول...

وطني
----
ربنا يبارك فيك
كويس ان المدونه حازت اعجاب اللي بيدخلها
و الحمد لله اننا بنحاول نعمل جوه اللي مش بينفع يتعمل بره
يعني مش دايما بتلاقى روح الفريق
ربنا يديمها علينا و يبعد عننا العيون الحسوده

Mafrousa يقول...

فرنسا هانم

يا حبيبتى انا قلت و كلمتكو من هناك
انتي اللي فينك
ولا بتبعتيلي و لا عبرتي الميلات بتاعتي
قلت زهقت مني
هههههههه

امال فين عبده
انا لابسه الفانله الحمرا من يومها و مستنياه يشوفنى بيها

ياخرابي ليكون نزل يعمل هيصه للاهلى و يقبضوا عليه ولا حاجه؟؟
مانا عارفاه ممكن يعمل عمل طايش

الطائر الحزين يقول...

استاذ وطنى
جزاك الله خيرا
بارك الله فيكم وأطراءكم على المدونة

قوس قزح يقول...

appy

شوفتى الخروجات بقى
مش تقولى كمين على كوبرى
ده احنا كنا لمين نقطة الشرطة علينا هههههههههههههههههه

اختى على طول عاملة ازمة :)

و انتى طيبة يا قمر و يارب ما تمر عليكى رحلة كدا ابدااااااااااااا

قوس قزح يقول...

عاشقة الحب

كهكهتك وصلت لحد هنا :))

ربنا يسعدك

قوس قزح يقول...

حنين القلب

ماهو علشان كده انا كملت الجوازة ههههههههههههههه


الموضوع يا ستى كان واصل لتبليغ الاقسام و المستشفيات
بس الحظ ان القسم قال بعد 24 ساعة :)

يا ستى شهر 7 شهر 15 مش فارقة بس المهم تكون فى تورتة ههههههه
هروح اشوف ايه الحكاية دى

انا كمان بحبك فى الله
مووووه

قوس قزح يقول...

shayma

تسالنى بقى و تقولى بطلتى يا قوس قزح الاحلام المهببة دى
اقولك كلا الباتة

مع ان حلم واحد بس اهو شوفى عمل فيا ايه
لكن مفيش فايدة
ده ادماااااااان

اللى ورا دى هدية منى لكى هههههههههههههه

قوس قزح يقول...

همس الاحباب

لو على الالوان اليوم ده كان اخر ايام الالوان
و دخلنا بعد كده فى الابيض و اسود بس ههههههههههههههه

يعنى اخدع الرجل و اقوله انى 100 100

و بعدين يعنى ماهو روقان اهو و بردو مكنش فارق معاه و كمل الجوازة :)

Asmaa mahaba يقول...

الاول معلش ع التاخير ومبروك يا طائر الف مبروك
وثانيا ضحكه رنانه على اللى حصل دا كله انتى جريئه قوى ما شاء الله
انا شخصيا لو قلت لاهلى سيبونى اقعد مع خطيبى نتحدث فقط فى اوضه الصالون تحت الحراسه المشدده
ممكن يطخونى
دا اذا جرؤت وطلبتها...دا لو انخطبت لا قدر الله يعنى
عاوزه الحق تستاهلى الاى قوليلى هى مين اللى ورا دى
تحياتى ليكى سومه_87

قوس قزح يقول...

واحدة مفروسة

ماهى حنين القلب قالتها
مين هيتجوزك بعد اليوم المنيل ده هههههههههههههه
طبعا كان لازم اكملها

لا بلاش بارت تو بقى علشان سيرة الناس الكبار هتيجى فيه ههههههههههه

اه لسه هادى طبعااااااا
هو مش باين عليا ولا ايه !!!

غير معرف يقول...

هاهاهااااااااااى
يالهوتيييييييييي
انا مش قادره ابطل ضحك
يانهاار
دا يوم نحس من اوله
عشان تبطلى تقلدى الافلام تانى
معلش يابنتى
يوم يفوت ولا حد يموت
طب واللى ورا عملتوا فيها ايه؟؟
واهلك عملوا ايه ساعتها؟

قوس قزح يقول...

كاميليا

شوفتى بقى الرومانسية
لا تقولى يوم فى الريفييرا
ولا يوم على ضفاف الراين

مفيش احلى من الصحراوى رايح جاى

نورتينى

قوس قزح يقول...

مها زين

الحمدلله انها عجبتك و قدرت ارسم بسمة على وشوشكم
دى حاجة تسعدنى بجد

و سلامك وصل :)

فرنسا هانم يقول...

وطنى
شكرا لك استاذنا الجليل وطنى على هذه الشاده التى نضعها وساما على صدورنا

صبرني يارب يقول...

قوس يخرب عقلك
هههههههههههههههههههههههههههههههه
مت من الضحك بتهرجي ولا ايه

كله كوم والموقف بتاع الضابط الى شاكك فيكم كوووووووم
هههههههههههههههههههههههههههههههههه

ولا حكاية الكوبري
هههههههههههههههههههه
فكرتينى بالحادثه بتاعتي الشهيره بتاعة الكوبري .

حلو اوي البوست يا قوووووووس


طاااااائر مبروك على اذاعة الزرار مبروووووووووووووك

قوس قزح يقول...

فرنســـــــــا

ايه يا عم الغياب ده كله
ده انا سافرت و رجعت و انتى مختفية

شكلك كده كان عندك ناضورجى الكام يوم دول :)

وحشتنى يا فرنسا بقى

قوس قزح يقول...

نونو

و عليكم السلام و رحمة الله و بركاته

نورتينا و ربنا يسعدك

و فرنسا وحشنا اوى كلنا و الله

اشكرك على زيارتك

قوس قزح يقول...

وطنى

اشكرك على كلماتك المشجعة لنا
و يارب دايما نكون عند حسن ظنكم بينا
و نقدر نرسم فى حياتكم ولو بسمة صغننة

و متخفش من الحسد علينا
مفقوعة كل يوم بتبخرنا و ترقينا قبل ما ننام من عين سومة و امثالها :)

قوس قزح يقول...

انسان بلا عنوان

الظابط معملش محضر .. لكن الناس اللى بتيجى النقطة فاكرين وجودنا هناك سببه ان فى محضر او متلبسين بحاجة

و بعدين انت يعنى شايف اللى ورا دى هيفرق معاه تكمل نوم فى اوتيل ولا فى العربية ؟
ده شكلها كان ناوى ينام اسبوع :)

قوس قزح يقول...

canary

ما انا عرفت بعد كده انه كان خايف كمان بس مش راضى يقلقنى معاه

اختى كويسة الحمدلله
و بعدين انا كنت بقوله بودعك اخر وداع تفتكرى ساعاتها هفتكر اللى ورا دى !!؟؟؟

اهى طلعت زى الجنيه البرانى اللى بيلزق فى صاحبه و قالى خديها :))

قوس قزح يقول...

سومة .. مجنونة فى بلد عاقل

هو انتى يعنى يا سومة شايفانى انا اللى طلبت منهم
انا دبسته هو :))
و هو عليه هدوء و ردود مقنعة تخلى اللى قدامه يوافق على طول

مش شايفانى وافقت اهو و متجوزة :)

اتخطبى انتى بس و انا ابعته يقنع اهلك تقعدوا فى الصالون ..بس يكون الباب مفتوح او تقعد معاكى اللى كانت ورا دى ههههههههه

قوس قزح يقول...

وينكى

ازاى ابطل اقلد الافلام بس
ده نص ثقافة بلدك منها يا وينكى
اومال يعنى هنتعلم منين ان مكنش من الافلام العربى و الهندى

اللى ورا بقت كويسة جدا لما تأثير المسكن راح
و اهلى بلغوا البوليس بس :)

قوس قزح يقول...

صبرنى يا رب

و الله كله كوم و اليوم ده كوم من اوله لاخره

ده انا اتعقدت من الكبارى اكتر
و من السفر بالليل
و من ابو قير
و من المغص الكلوى
و من مسلسلات الصعيد
و من نقطة الشرطة
و من ....
ولا بلاش لحسن يعمل زيارة للمدونة ولا حاجة هو و الولاد :)

قوس قزح يقول...

طائرررررررررررررر

مبرووووووووووك

و عقبال ما نشوفك كده فى القنوات الفضائية بتدرس فلسفة الزرار لكل الازواج

عايزين حاجة حلوة بقى بالمناسبة دى
عزومة كباب و كفتة
ولا عزومة على اكلة سمك و جمبرى و استاكوزا
حاجة كده الواحد يعيش على ذكرها

دى اول ضريبة الشهرة :)

الدفاع يقول...

اعتقد ان دى رحلة العمر مفيش رحلات احلى ولااجمل من كده
مين الونش بيوصلوا لحد البيت؟
بس على فكره كان المفروض الونش يوصلكوا لحد بيتكوا انتوا حتى يبقى دليل برائتك لما اهلك يشوفوكى داخله الفجر والونش بيجر العربيه يبقى محدش هايتكلم ولا كلمه صح؟ده ونش هو اى حاجه؟

انت تسال والكمبيوتر يجيب يقول...

لأخ العزيز الدكاتره عبده الرايق وكل الشباب الطموح
مهنه جديده نعرضها عليك تكسبك دهب بعد ان اجمع الناس على ان جميع شهاداتك فى علوم البحار لن تقنع اسماك القرش اذا فكرت فى العمل معها كمدروض ...ولذلك نعرض عليك منصب فى اى قناه فضائيه تختارها...ماذا ستفعل بالظبط؟؟؟؟طبعا سؤال وجيه والأجابه صوت وصوره فى مدونتنا
...مدونة اول برنامج يخرج من ماسبيرو والشرق الأوسط عن النت والمدونات
وعلى فكره الوظيفه هذه تبحث عن اى عدد من طالبى الوظائف يعنى الدعوه للجميع
زوروا مدونتنا للتفاصيل
http://netonradio.blogspot.com
ولا يشترط الخبره بل ستقوم القناه بتدريب من يقع عليهم الأختيا

Ehab يقول...

هههههههههههههههههههههههه







انتي مصيبه انتي والرايق الحقيقي اللي متجوزاه ده
ادي اخرة اللي يسمع كلامكم ويعملكم احلامكم بتيجي على دماغه في الأخر

هههههههههههههههه

بس طلعتي فقريه يا بنتي

سلااااااااااااااااااااااااام
اخوكي ايهاب

الباحث عن الحقيقة يقول...

الله
جميلة جدااااااااااا
ما شاء الله
موقف لا تحسدي عليه
بس شوفي ازاي الحمد لله تحول لذكرى جميلة
المهم طمنيني
اللى ورا دي ..صحتها عامله ايه دلوقتي
هههههههه
استمتعنا معكم وشكرا يا فندم بارك الله فيكم

قوس قزح يقول...

مدونة الدفاع

ماهو انا كنت مدبسة فى السواقة و بعدين هو بردو فكر فى نفسه و نفد بجلده

حد يعمل عملة زى دى و يروح لبيت الاسد برجله ههههههههههه

قوس قزح يقول...

كايرو كمبيوتر
اشكركم على تشجيعك للشباب الصاعدة
بس الشغلانة دى الواحد زهق منها خلاص

عايزين شغلانة تانية فيها اكشن

قوس قزح يقول...

الشنكوتى الكبير

شوفت بقى الرايق اللى بجد ؟ :)

انت اهو اخد خبرة منى ترجع بعد كده تقولى اصل غادة حلمت و انا نفذت يبقى تستاهل
دى كوابيس اليقظة

قوس قزح يقول...

الباحث عن الحقيقة

فعلا هى بقت ذكرى بس تصدق لحد دلوقتى مش قادرة اشوفها جميلة ابدا

اللى ورا نفسى ارد لها الموقف و اعمل جثة يوم فرحها :)

شرفتنا