محطه الضاحكون الفدائيه

الرايق :- هاااااااى ايفرى بادى .... انا فيرى فيرى.. اند فيرى سعيد

فرنسا هانم :- ايه يا رووقه مالك داخل المدونه كده وبترقص وفرحان ؟

الطائر الحزين :- ايه يا بابا فى ايه ؟؟ اوعى تقولى عينوك رئيس للوزراء

الرايق :- نو نو نو ... رئيس مين ووزراء مين ؟؟؟ انا جايب لكم خبر يستاهل 15 جند حته واحده

همس الاحباب :- استنى بس يا بابا لما اجيب كرسى اقعد عليه قبل ما اسمع اخبارك .. احسن يغمى عليا من الخبر

حنين القلب :- فى ايه يا قوم مالكم ومال بابا ... انا سمعاك يا بابتى وكلى ودان صاغيه .. جولى ولا تخبيش يا زين .. لقيت لنا شقه ولا اتنين ؟

الرايق :- نو نو نو ... شقه مين وفول مين وطعميه مين ؟؟؟ انا استلفت قناه فدائيه على النايت سات .. وهسميها محطه الضاحكون الفدائيه

حنين القلب :- لاياعم انا ماليش دعوه بيكم بتيتا .. انا مش عايزه ابقى فدائيه .. انا عايزه استنى رمضان الجاى واتفرج على عمى عباس الديميرى

الطائر الحزين :- ايه حكايه فدائيه دى كمان يا با الحاج ؟؟

الرايق :- ولد يا طائر .. يا فلفسوف عصرك واوانك مش عارف يعنى ايه فدائيه ؟؟ استلمى بقى خلفتك البيضاء يا فرنسيس

فرنسا هانم:- استلم ايه ؟؟ هو انا اصلا فاهمه يعنى ايه محطه فدائيه

همس الاحباب :- ولا يهمك يا بابا انا فاهم وعارف ... انت ناوى تلبس قميص متفجرات وتروح تحارب الهكسوس ... اتكل على الله يا بابتى .. وربنا ينصرك .. وتحيى جمهوريه مصر العربيه .... اييييييييييييه دنييييييييييييييييييا

الرايق :- انا عارفك انت يا خالد يا سوسه .. عايز تتخلص منى علشان محدش يقلب جيوبك وانت نايم .. لكن بعينك .. انا قاعد على قلبكم

همس الاحباب :- طيب ايه بقى حكايه المحطه الفدائيه دى ؟

الرايق :- طبعا دى من مساوئ التعليم فى مصر .. نو نو نو .. دى مش مصر لوحدها دى كل قاره اسيا كمان ... اسمع يا فالح منك له لها لها ... القمر الصناعى ده مش بيطير فى الفداء ؟؟؟ يبفى القنوات بتاعته قنوات فدائيه ... صح يا عباقره ولا مش صح ؟؟؟

الطائر الحزين :- بس فهمت .. قصدك قناه الضاحكون الفضائيه

الرايق :- فضائيه !!!!!!!!.. ياعم روح نام اسمها الفدائيه مش الفضائيه .. عموما انا مش هدخل معاكوا فى جدل لغواتى .. فدائيه ولا فضائيه احنا مش هنتجوزها

فرنسا هانم :- طيب جبت منين القناه دى يا روووقه ؟؟؟

حنين القلب :- بابا .. ماليش دعوه ..انا عايزه قناه كروهات وقناه بمبى ليا لوحدى

الرايق :- خلاص يا روح بابا هاجبلك قناه لوحدك بتغنى العنب العنب العنب ... الحكايه يا قوم ... بلييييس ويت منت .... ولد يا همس .. هات التيبول دى علشان اقف عليها واعرف اشوفكم كلكم

همس الاحباب :- ماشى يا عم الحاج .. ادى التيبول .. قصدى الترابيزه اهى

الرايق :- بصوا بقى .. ذاتس ذا استورى ..القصه هى ان خال حسن باشا الفراش ... خرج من السجن اول امبارح وعلشان هو كان خارج حسن سير واسلاك ادوله 6 محطات فدائيه هديه على النايت سات ... وانا رحت ابارك له وخدت معايا عشر سجاير فرط .. ونص كيلو خيار .. وربطتين شبت وبقدونس .. قام الراجل الله يستره ادانى محطه فدائيه هديه ..وحلف برحمه سته ماهى راجعه

الطائر الحزين :- شبت وبقدونس يا حاج !!!!! طيب وهنعمل بيها ايه المحطه دى ؟؟

همس الاحباب :- ودى عايزه سؤال .. اكيد هنفرش بيها فى السوق ونبيع حرنكش

حنين القلب :- حرنكش ..... هييييييييييييييييييييه ... فكره جميله .. عايزه حرنكش عايزه حرنكش عايزه حرنكش

فرنسا هانم :- كلام الطائر مظبوط هنعمل بيها ايه ؟؟؟؟

الرايق :- احنا هنقدم فقرات متعضضه فى المحطه الفدائيه ... وانا الدكاتره الكبير والعلامه المشهور والحاصل على 46 ونص دكتوراه هقدم الفقره العلميه

حنين القلب :- ابا الحاااااااااااااااااج .... بلاش دى والنبى .. ابوس ايدك ابعد عن التاريخ والجغرافيا والعلم عموما ..خليك فى فن لعب البلى والكازوز احسن

فرنسا هانم :- طيب مش الاول تخلص كتاب معلم القراءه والكتابه علشان تعرف تقراء يا رايق

الطائر الحزين :- بجد انا تعبت كل يوم .. اقعد احل معاك الكلمات المتقاطعه .. وانا اللى اقراء وانا اللى احل وانا اللى اكتب .. وانت فى الاخر تقولى شفت ذكاء ابوك الرايق يا طائر

همس الاحباب :- وانا بصراحه زهقت من المعلومات الفالصو بتاعتك دى يا حاج ...وبعدين قولى مين اول رئيس جمهوريه لمصر

الرايق :- ههههههه ده سؤال يا ولد ؟؟؟ طبعا يا جاهل اول رئيس جمهوريه لمصر هو الامير قطز .. لما الراجل بتاع الفرنجه جاله وقاله .. طيب اكلم مين انا لما احب اكلم شعب مصر ..فى فيلم جهااااااااااااااد انتى فين يا جهااااااااااد
سلاااااااااامه انا هنا يا سلاااااااااامه

الطائر الحزين :- ههههههه لا اصبت واحسنت ...بارك الله فيك وصبرنا على ما نحن فيه ...بس كنا عايزين نعرف منك ..ايه هى عاصمه مصر ؟؟؟ اظن ده سؤال سهل جدا واى عيل فى ابتدائى يعرفه

الرايق :- هههههه كلام جميل كلام معقول مقدرشى اقول حاجه عنه ... شوف يا فلفسوف عصرك واوانك ...تعاقبت على مصر عده عواصم من العصر القديم والعصر الحديث منذ اكثر من 150 سنه ...وكانت هناك عده عواصم منها ... مساكن عين شمس .. والسبتيه .. وبولاق ابو العلا .. وبولاق الدكرور .. وعزبه النخل

فرنسا هانم :- هههههه ونسيت برج القاهره وبرج الجدى وبرج العذراء ...... يلا يا ولاد الاكل جاهز بلاش وجع دماغ ... تعالى كل يا رايق وبطل فضايح

الرايق :- طبعا هناكل .. وبعدين نفتح القناه انا جايب معايا طفاشه صينى معتبره
********************
********************

الى اللقاء مع اولى حلقات محطتنا الفدائيه

مع تحيات فريق العمل

بمدونه الضاحكون

الرايق ... وانتخابات مجلس الشعب

سقراطه :- ايه ده فين الانتريه بتاعكوا ؟؟

مسز رايق :- ااااااااه يا نعمه ياختى سيبينى فى همى وغلبى

سقراطه :- هم وغلب !!!!!! .. فى ايه ياختى كفا الله الشر

مسز رايق :- المحروس بسلامته عبد باشا الرايق باع الانتريه والتلاجه وانبوبه البوتاجاز

سقراطه :- ايه الكلام ده ؟؟ ده شغل مجانين ولا عاقلين ؟؟ وباعهم ليه المتعوس ده ؟؟؟

مسز رايق :- والله مكسوفه اقول ايه ولا ايه

سقراطه :- قولى ياختى انتى هتتكسفى منى ؟

مسز رايق :- بسلامته ضربت فى نافوخه يترشح فى انتخابات مجلس الشعب

سقراطه :- نعم نعم نعم فين احنا وفين انتخابات مجلس الشعب ؟؟؟ ايه الكلام ده ؟؟ وانتى ازاى تسكتى على جنانه ده ؟؟؟

مسز رايق :- بس بس احسن باين على المحروس بيفتح الباب وداخل

الرايق :- واحده هاااااااااى لمسز رايق ... وربع هااااااااى لسقراطه هانم كعب الغزال

سقراطه :- غزال لما يلهفك .. ايه الجنان بتاعك ده ؟؟ ازاى تبيع الانتريه والتلاجه وانبوبه البوتاجاز ؟؟

الرايق :- وات ايز زيس ؟؟؟ ايه ده يا سقاريطو ؟؟ هو انا اتجوزت عند مأذون احول بدل ما يكتب كتابى عليكى كتب كتابى على اختك

سقراطه :- وانت تطول يابو رياله ؟؟ دى غلطه عمرنا اننا نسبناك .. انا بندم على جوازك من اختى طول عمرى

الرايق :- بس يا متخلفه انتى .. شط ااب يور ماوس .. وماوس يعنى فار والمعنى فى بطن الشاعر .. ههههههه

سقراطه :- بالذمه مش مكسوف من نفسك ؟؟؟

الرايق :- انا يا متخلفه انتى واختك بعمل مستقبل مشرق لحزب الرايق الجديد مستقبل مصر والسويس وقاره اسيا كلها .. انا بلا فخر هاعمل اجدع حزب ديدوقراطى تقدمى عدم انحيازى .. واحب ابشرك انه هيكون الحزب الاول والاعظم مش فى السويس بس ... نو نو نو .. ده هيكون الحزب الاول فى مصر كلها بل فى قاره اسيا كلها

سقراطه :- اسيا ؟؟؟ واحنا مالنا ومال اسيا يا دكاتره يا متعلم ؟؟؟

الرايق :- مالنا ازاى يا جاهله ؟؟؟ احنا مش فى قاره اسيا ؟؟؟ هه ردى .. احنا فى اسيا ولا مش فى اسيا

سقراطه :- لا فى اسيا معلش اصلى جاهله متاخدشى عليا .. ايه بقى حكايه الانتخابات دى ؟؟ وبعدين احنا فين والانتخابات فين ؟

الرايق :- بصى يا كومه تخلف .. النائب الجد يحب الجد .. والنائب الشاطر يعمل لنفسه دعايه من بدرى مش نستنى ليوم الانتخابات ونعمل الدعايه .. انا انا هترشح مرسيدس ولازم اكون مجهز نفسى كويس

سقراطه :- مرسيدس هو فى ترشيح مرسيدس ؟؟؟

الرايق :- ههههههه طبعا يا متخلفه .. مش فى مرشح فيات ومرشح مستكل يبقى الدكاتره عبده باشا الرايق لازم يكون مرسيدس .. بصى يا سقاريطو انا خلاص جهزت كل حاجه .. والواد حسن باشا الفراش هيبقى مدير الحمله الانتخابيه بتاعتى لكن انا محتاج معونه ومحتاج دعم

سقراطه :- انت مش بعت عفش بيتك ومعاك فلوس

الرايق :- فلوس ايه وعفش ايه .. انا صرفت كل الفلوس على 3 ندوات فى اطار برنامجى الانتخابى .. الندوه الاولى كانت فى الكيلو 112 طريق مصر السويس وعملتها فى الصحراء علشان الاعداد الغفيره اللى كانت هتحضر الندوه لكن للاسف انا راحت عليا نومه ونسيت اروح الندوه .. والواد حسن الفراش قالى ان الندوه حضرها 96 مليون ناخب كلهم من السويس .. اما الندوه التانيه فعملتها على الراديو مباشره وعملت 100 يافطه كبيره وكتبت عليهم اسم حزب الرايق الجديد علشان الناس فى الراديو يشوفونى ويعرفوا برنامج حزبى .. والندوه التالته بقى عملتها فى بيت مدير حملتى الانتخابيه العلامه حسن باشا الفراش وده كان اقتراح العلامه ابو على قالى بدل ما نتعب نفسنا ونتعب الناس نشترى عشرين كيلو لحمه وفاكهه وساقع ونعمل الندوه فى البيت وللاسف محدش جه خالص لكن العلامه حسن باشا قالى انا هاحكى لكل الناس على طعم اللحمه اللى يجنن

السلطانيه

كان يكره الحمقى والمغفلين .. وكان يدعو الله دائما ويقول : يا رب أتجوز واحدة طيبة وبنت حلال ما تكونش زى هناء الهبلة بنت أم وطنية جارتنا ..
وذات يوم أيقظته أمه من نومه .. قوم يا وله لقيتلك العروسة ..

بجد والنبي يا امه .. هي مين ؟

بت زي القمر وهادية وساكته وعايزة تعيش وكفاءة ..

عز الطلب يا امه أنا عايزها هادية وساكتة انأ ما بحبش اللت والعجن .. وشافها وأعجبته واتفقوا على المهر والشبكة والذي منه .. وتم الزواج .. ولكن لم يكن هدوء وسكوت ستوتة ( دا اسمها ) إلا نذير لشيء كان يخشاه صاحبنا ولا يتمناه .. ولكن اللي يخاف من العفريت يطلع له .. وبدأت تظهر ملامح العته على ستوتة وفي يوم قالت لصاحبنا : لو جت عاشورا مع رمضان نصوم يوم عاشورا بعد العيد ؟ قالها : يا ستوتة رمضان ما يجيش ابدا مع عاشورا !!! قالتله : أنا مش ستوتة .. أنا غيرت اسمي .. أنا اسمي رشا واللي يقولي يا ستوتة مش ها أعبره .. قالها: ليه بس دا ستوتة اسم كله دلع !! وفي يوم عاد من عمله وطرق الباب .. افتحي يا ستوتة .. قالت من خلف الباب : هو الراجل أتجنن ولا إيه .. خلي ستوتة تعبرك بقى .. يا ستوتة افتحي .. والنبي لما تدن .. وخرج صاحبنا هاربا لينفد بجلده من االمغفلة .. وسافر لبلاد الله وخلق الله واستقر في قرية من القرى .. وقرر الزواج وأعجب بإحدى البنات وخطبها ويوم الخطوبة وفجأة تحولت ابتسامة البنت إلى ذهول وسرحان وقالت : يعني ها أتجوز واخلف والواد مقصوف الرقبة يكبر ويخرج يلعب في الشارع ويطلع النخلة اللي قدام البيت ويقع ويموت .. يا لهو بالي .. يا خرابي .. ياروح قلب امك يا حبيبي....... وتلطم ويشتد لطمها .. وتسايرها امها تلطم وتشلشل وتندب قائلة : يا خرابي يا خويا .. يا حبيب ستك يا ضنايا .. ما كانش يومك يا كبدي .. واذا بأبوها يقول مش قلتلك خلي بالك من الواد وما تسيبيهوش يلعب في الشارع .. وهنا أدرك صاحبنا انه وقع في بيت من المغفلين فغافلهم وفر بجلده ..
وبلاد تشيله وبلاد تهبده .. وقادته قدماه لقرية أخرى .. وإذا بمجموعة من البنات يغسلن أقدامهن في ماء الترعة ويصرخن ويقولن ياعم الحقنا والنبي .. فيه ايه يا بت انتي وهي ؟ رجولنا اتلخفنت مع بعض في الميه وكل واحدة مش عارفة رجليها .. شوفلنا حل والنبي ياعم .. فأمسك بعصا وأخذ يضربهن .. فخرجن مسرعات من المياه يشكرنه .. فندب حظه يارب انا بتكعبل في البنات الهبلة ليه بس .. أهرب من واحدة هابلة أقع في بلد كل بناتها هبل .. انا ماليش عيش في البلد دي كمان ..
والمرة دي اتهبد في بلد ترفع الزينات والزغاريد تجلجل والنقرزان يضرب .. قال بشرة خير .. وسأل أول من قابله فقال له : ابن العمدة ها يتجوز النهاردة .. ولكن العمدة لم يكن مسرورا وتؤرقه مشكلة ما .. وتعرف إلى العمدة وقال له : إيه المشكلة يا عمدة يمكن اقدر أحلها .. قال العمدة : سلو بلدنا يا بني إن الولاد ما بيلبسوش سراويل داخلية أبدا إلا يوم جوازهم .. قال : وإيه المشكلة ما يلبس سروال .. قال العمدة : ما بيعرفش .. قال : أي حد تاني يلبسهوله .. قال العمدة : ما حدش بيعرف في البلد الا طريقة واحدة .. انه الواد يطلع على السطح وينط في السروال اللي ماسكه اربع رجالة واقفين تحت .. وانا خايف يقع تتكسر رقبته زي اللي قبله واللي مات منهم كتير .. قال : ولا يهمك يا عمدة انا ها البسهوله من غير ما يجراله حاجة .. قال العمدة : بجد والله لو عملتها ليك عندي مكافأة كبيرة قوي .. قال : هاتوا السروال والعريس .. تعال يا ابني دخل رجلك اليمين .. يلا ورجلك الشمال .. وارفع السروال لفوق .. وارتدى العريس السروال .. وهاجت القرية وماجت .. زغاريد وصفافير وتصفيق شديد .. فقد اكتشفوا طريقة حديثة للبس السراويل .. وهنا قال العمدة لصاحبنا : دلوقتي اقدر اخلع عليك .. وهنا تذكر صاحبنا مرزوق العتقي والسلطانية .. فشهق وقال :ايه ؟ قال العمدة: اخلع عليك عبايتي وأجوزك بنتي ..

********************

مع خالص شكرى للجميع

.

مدونه جنى

فلسفة الخناق

دخل الراجل الشارع اللى ساكن فيه وسمع ولاد الحلال حواليه بتغمزوا ويتلمزو

فلف لهم وقال فيه ايه يا جدع انت وهو

قالوا لا مفيش بس احنا شفنا الست بتاعتك كانت طالعة بتعيط من شوية

قلنا لها مالك ؟فى ايه؟ مردتش علينا

هو يا نهار ملوش الوان وجرى على البيت خبط خبطات سريعه فى ايه ايه اللى حصل بتعيطى ليه

هى بمسكنة ابدا مفيش

هو بقول لك ايه متعصبنيش اكثر ما انا فى ايه بتعيطى ليه

هى اصل فيه راجل فى الشارع اللى ورانا عاكسنى وقل ادبة عليا

هو مين ده نهار ابوه ......وسحب سنجة وجرى على الشارع التانى

ووقف فى نص الشارع انت يا شارع ياللى مفيش فيه راجل ومحدش يرد عليه

مفيش حد عاوز ينزل يكملنى يا حارة قطط

ما هو لو فيه راجل راضع من صدر امه صحيح كان نزل وبرضة محدش بيرد

وما يسمعش الا صدى صوتة
مفيش حد راضع من صدر امة ينزل يكلمنى صحيح كله دلوقتى شغال على الصناعى هى شركة ريرى اتغنت من شوية

ولسه هيزعق تانى ويقولى انت يا شارع ياللى مفيش فيه وهٌب قام لسانه دخل جوه زورة ومعرفش يكمل

اذ ربما كان بيحلم ان شاف ادامة راجل 3 متر * 3 متروقال له عاوز ايه ؟

من الواضح ان الرجل ده راضع من صدر أمة صحيح مش بس كدة ده اكيد رضع من كل الامهات
اللى كانوا فى الشارع فى الوقت ده ولمدة سبع سنين متواصلة علشان يبقى كدة ومسك صاحبنا من ياقة الجلبية قاله عاوز ايه الراجل يعنى مستحملش اغمى عليه على الفور
فعلشان كدة لازم يبقى فيه فلسفة للخناق لازم تعرف الاول قدرات خصمك علشان تستعد له حتى ولو
كان الاستعداد انك ترجع ترضع تانى من صدر امك

صنية البرارص

كان ياما كان فى سالف العصر والاوان ايام ما كان فى الشتا يجى رمضان

ولا يحلى الكلام الى بذكر النبي عليه الصلاة والسلام

مره من ذات المرارير لما كان الشاطر ابو رياض والاميره صبرني فى الامارات

كانت صبرني يا رجال حامل فى مريم اول خلفتها وفى كانت فى شهرها التامن وهووووب وهى ماشيه فى محل ملابس طاااااخ اتكعبلت فى شماعه لئيمه واتكبت وكانت فضيحه مدويه

المشكله بقى انها تعبت وراحت للدكتوره الى طلعت دونكي كبيره واتخذت اجراءات على انه احتمال تكون ولاده واتسببت فى مشكله زياده

المهم يعنى استقر الامر على انى انام اسبوع ما اتحركش تقريبا الا فى اضيق الحدود

كان تاني يوم الخميس وكانت الاجازه هناك الخميس والجمعه فابورياض بقى تطوع

وقالي انا الى هاطبخ النهارده

أنا :ليه كده طيب مافيش مشكله انا ممكن اقوم اجهز اي حاجه سريعه

أبو رياض متأثرا بالافلام العربي : لا ممكن ابداااااا انتى خليكى مرتاحه وانا هاطبخ

أنا : طب ما نطلب اكل من بره وخلاص

أبو رياض : لا لا انا فى اجازه النهارده خلي الاكل من بره في يوم انا فى الشغل

أنا متوجسه خيفه : طب هاتعرف ؟؟

أبو رياض : بتهرجييييييي . ده انا ياما طبخت يا بنتى ياما شباب زي الورد كلوا من اديا فى السعوديه ده انا كنت مهنيهم .

وبعد وصله من الكلام عن احلى باميا والاختراع الى بيعمله فيها والطز باللبن الى كان مغرقهم فيه ولا الرز الا بالكابوريا يا لهوييييييي

المهم قلتله: طب هاتطبخ ايه ؟؟

قالي : اعمل صنية برارص باللحمه (بطاطس يعنى ) .دى اسهل حاجه بقى .طب ده انا كان عليا صنية برارص ما لهاش حل يا سلام عليك يا واد يا ابو رياض يا كايهدهم .

وبعد وصله من شرح اماكن الحاجات

قام ابو رياض وشمر عن ساعديه وراح يطبخ

قلتله : ما تعملش كتير يا رضا ثلاث او اربع بطاطسات كده عشان ما نرميش الاكل

قالي : اوك

بعد شويه اسمع طااااااااخ

انا: فى حاجه ياااااااارضاااااا

رضا: لا لا مافيش حاجه ما تشغليش بالك انتى

انا بعد شويه تانين : طب اجي ابص عليييييييك يا ابن الحلال

رضا : اياك تقومي من مكانك .

ومرت الساعات وانا كل شويه اسأل عليه وهو كل شويه يجي

يقولي هاتموووووووتي يا سوسو لما تاكلي صنية البرارس

المهم جاب الاكل ابو رياض وجه الله يصلح حاله مهنينى طول عمره

اولا الاقيلك حضرتك اكبر صنيه فيك يا مطبخ والصنيه مليانه على اخرها تأكل بتاع ست سبع افراد كده

أنا : ايه ده انت عامل كتير كده ليه يا عمنا .

رضا: ده كتير ؟؟ ماهو يادوب اهو .

أنا وكاتمه الضحك :طيب ماشي اقعد يا حبيبى يلا ناكل .

وبدأنا اكل وانا بقى كاتمه الضحك مش قادره يا جدعان هاموت كده ههههههههههههههه ايه البصل الى على وش الصنيه ده كله .

ابو رياض : ايه رايك بقىىىىىىىى اظن ما لهاش حل

أنا : اه طبعا جميله تسلم اديك هو فى كده ؟؟؟!!!

ابو رياض : هو البصل بيقرقش شويه ؟؟؟

أنا : اه شويه ده ليه ده يا ابو رياض ؟؟

أبو رياض : مش عارف اصل انا ما دعكتوش بملح وفلفل عشان ريحتة البصل ما تمسكش فىايدى بقى

أنا : طب ليه حطيته على الوش هايستوى ازاي طيب

أبو رياض : هو المفروض بيتحط فين يعنى تحت ؟؟

أنا وانا فطسانه من الضحك : هو المفروض بيتحط فى الصنيه يعنى ما تشتغلش بالك .

وكلنا ولله الحمد ههههههههههههههههههههههه

وتاني يوم عبده باشا البواب (اه كان باشا كبير اوي ) فاز باجمل صنية برارص فى التاريخ

وطبعا فى اليوم ده رضا قعد ينضف اثاره من المطبخ بتاع ساعتين ثلاثه وما رضيش يخلينى اشوف المطبخ بعد ما خلص متخيلين انتم طبعا جراله ايه المطبخ

وتوته توته خلصت ا لحدوته ودى كانت حدوتة الاميره صبرني والشاطر ابو رياض مع صنية البرارص فى الامارات

حلوه ولا ملتوته

الرايق ومزرعه السمك

الرايق :- هااااااااى ايفرى بدى .. اووووووه ... نو نو نو ... مسز سقراطه عندنا .. يا مرحبا يا مرحبا .. احنا ..اوور هاوس فيرى فيرى نور انهارده .. ايه النور ده ؟؟ ايه الجمال ده ؟؟ ازيك يا سقراطه


سقراطه :- نعم ؟؟؟؟؟؟؟؟؟؟؟؟؟؟؟؟


الرايق :- فى ايه يا اخت الرايق العزيزه ... طبعا اخت مراتى تبقى زى اختى بالظبط


سقراطه :- نعم ؟؟؟؟؟؟؟؟؟؟؟؟؟؟؟؟

الرايق :- انا مبسوط انا فرحان انا فيرى فيرى هابى تو سى يوو مسز سقراطه

مسز رايق :- نعم ؟؟؟؟؟؟؟؟؟؟؟؟؟


الرايق :- قومى مسز رايق حضرى اجدع غداء عندك لاختى وحبيبتى العزيزه الغاليه سقراطه هانم

سقراطه :- نعم ؟؟؟؟؟؟؟؟؟؟؟؟؟؟؟؟؟

الرايق :- ايه يا جماعه ؟؟ فى ايه ؟؟؟ مفيش على لسانكم غير كلمه .. نعم .. ايه ؟؟ الحروف الابجديه 23 حرف .. نسيتوها كلها ولا ايه ؟؟

سقراطه :- لا ابدا بس مش عوايدك يا رايق ... قولنا انت فى ايه ؟؟؟ .. وبعدين الحروف الابجديه 28 حرف يا شاطر

الرايق :- نو نو نو ... ناثينج .. مفيش اى حاجه .. انا بس فرحت لما شوفتك ...

سقراطه :- من الاخر كده يا رووقه .. عايز كام ؟؟؟

الرايق :- نو نو نو ...... فلوس نو .. مانى نو .. انا معايا فلوس كتير والحمد لله .. حتى اسألى اختك مسز رايق

مسز رايق :- ههههههههه .. فلوس كتير؟؟ .. اما اقوم ادور على حاجه ناكلها احسن من الكلام اللى مش جايب تمنه ده

سقراطه :- استنى ياختى ادخل معاكى المطبخ لحسن الشمس هنا سخنه قوى .. والظاهر كده فى ناس اخدت ضربه شمس فى نافوخها

الرايق :- بصى يا سقراطه .. من الاخر كده وعلى بلاطه .. انا عندى ليكى مشروع هيكسب الطاق طاقين .. يعنى لو دفعتى 10 الاف جند هتاخديهم بعد شهر واحد 30 الف جند .. يعنى هتكسبى 20 الف جند انتى النص وانا النص

سقراطه :- مشروووووووع ؟؟؟؟ ومعاك انت يا رايق ؟؟؟ هههههههههه اهه ده اللى مش ممكن ابدا .. وان كنت ناسى افكرك

الرايق :- بصى يا سقراطه .. بلاش نتكلم فى الماضى .. خلينا ولاد انهارده .. وانا اوعدك لو دفعتى واحد جند هتاخديه 3 جند

سقراطه :- طيب خلينا وراء الكداب لغايه باب الدار .. مشروع ايه بقى ده ؟؟؟؟؟؟؟

الرايق :- مزرعه سمك .. اللحمه دلوقتى ب 25 جند الكيلو والناس دلوقتى كلها سابت اللحمه وبتاكل سمك

سقراطه :- ههههههه اللحمه ب 25 جنيه ؟؟؟؟؟ ... صحيح مانت معذور .. مبتشتريهاش .. وبعدين انت بتفهم فى السمك ؟؟؟

الرايق :- اوبسلولتلى .. بالتاكيد بفهم فى السمك .. احنا عيلتنا كلها بتفهم فى السمك من ايام الفراعنه ... انتى شفتى لوحه نمرر ؟؟؟

سقراطه :- لوحه مين يا خويا ؟؟؟؟

الرايق :- لوحه نمرر يا متخلفه .. الملك مينا .. موحد القطرين ولابس التاجين

سقراطه :- شفتها فى الكتب .. مشفتهاش فى الحقيقه

الرايق :- طيب كويس .. الحمد لله .. شوفى بقى يا سقراطه .. فى لوحه نمرر .. على الجنب كده .. مكتوب ان عيله الرايق اول ناس زرعوا السمك فى مصر القديمه اول ما نزل المصرى القديم على النيل طوالى .. والملك شبلليون اللى فك رموز حجر رشيد قال .ان زراعه السمك فى مصر اذدهرت ايام تولى عيله الرايق لحكم مصر سنه 9866 ق م

سقراطه :- الملك شبلليون ؟؟؟ ههههههه .. اسمه شمبليون .. وده كان عالم فرنساوى مش ملك ؟؟؟

الرايق :- ياستى عالم ولا عالمه ؟؟؟ ملك ولا كتابه ؟؟..هو احنا هنتجوزه ؟؟؟ المهم قولتى ايه فى المشروع ؟؟؟

سقراطه :- طيب وفين المزرعه دى ؟؟؟

الرايق :- هو ده الكلام ... بسبس اذ بسبس .. بصى يا ستى .. ابن عمى سعيد الرايق عنده ارض زراعيه فى الصعيد .. هاعرض عليه المشروع .. وبدل ما يزرع قطن وقمح والكلام الفاضى ده .. اخليه يزرع سمك

سقراطه :- نعم ؟؟؟؟؟؟؟؟؟

الرايق :- انت رجعتى تانى لنعم ؟؟؟

سقراطه :- ارض ايه وزرع ايه انت فاكر السمك بيتزرع فى الارض ؟؟؟

الرايق :- طبعا يا متخلفه ... امال بيتزرع فى الهوا .. طبعا بيتزرع فى الارض .. وانا سألت الواد العلامه الكبير حسن باشا الفراش قالى ..السمك يا دكاتره عبده باشا بيتزرع فى الارض الطينه مش فى الارض الرمليه والبذور بتاعته شوك السمك .. كل شوكه نزرعها تطلع لنا شجره كبيييييييييره وتطرح سمك بالهبل... ايه ؟؟ سقراطه ؟؟ مسز رايق ؟؟؟ انتم قمتوا ليه ؟؟ رايحين فين ؟؟ سيبتونى لوحدى ليه ؟؟؟ .... فى ايه ؟؟؟ فى ايه يا بشر ؟؟؟؟
ايه الناس الفالصو دول ..هو انا قلت حاجه غلط ؟؟؟؟

بيت الاشباح

النهارده فرحى يا جدعان عايزه كله يبقى تمام

ايوه اخيراً

وبعد وجع قلب وجمعيات وسلفيات .ونوادر وحكايات

الشقه جهزت وطبعا علشان انا بنت حلال مصفيه ..وبحب اللوبيا والملوخيه ..لقينا شقه فى رشدى قريبه جدا من البحر... والراجل صاحب البيت الله يعمر بيته متساهل معانا جدا تخيلوا شقه فى رشدى 4 غرف وريسبشن ومطبخ و2 حمام لا وكمان سوبر لوكس بكاااام 5000 جنيه....طبعا مش مصدقيينى .. لكن هو ده اللى حصل ..وقال لينا كمان ان اول ايجار شهرين هديه منه لينا... بمناسبه جوازنا المبارك .... وكنا شويه وهنبوس ايده وامى تزغرد.. وانا ارقص وخطيبى يبوس فى الراجل زى ما يكون لسه راجع من العراق

لكن ...وما اداراك ما لكن ......

الجمعه اللى قبل الفرح حصلت حاجه غريبه اوى.....( الاطفال الصغيريين يبتعدوا ) .... بعد ما طلعنا العفش وفرشنا وروحنا خلاص ...تانى يوم لقيت الجيران اللى فى العمارة اللى فى وشنا بيتصلوا بيه وبيقولوا ليه الحقى العفش بتاعك كله فى الشارع...انا قولت ازاى ومين اللى نزله دحنا فى الخامس طيب ولو حرميه مش سرقوا العفش ليه؟؟؟؟؟.... قالت ليه مش عارفه تعالى وخلاص وطبعا لان العمارة اللى انا فيها مش فيها ولا بواب ولا جيران غيرى روحت وطلعت العفش تانى وفرشنا العفش من جديد ....وخلاص

وجه اليوم الموعود

والفرح خلص وجوزى عمال يغنى اسبقنى يا قلبى اسبقنى ع الجنه الحلوة اسبقنى ....وانا اغنى على عش الحب وطير ياحمام ....والمعازيم يغنوا الجوز الخيال والعربيه على راسى يا هانم وعنييا ... ووصلنا الشقه واحنا الاتنين بنغنى وابتدى وابتدى المشوار واه يا خوفو واه يا خفرع من اخر المشوار ... وفتحنا الشقه ولقيت النور كله مولع والتليفزيون والغساله والتسجيل والمرواح حتى الكشاف الاحتياطى ...كله كان شغال

بعلى العزيز بص لى وقالى : مين عمل كده ؟؟؟؟ قولتله وانا مزبهله : ولا اعرف انا كنت هنا امبارح وطفيت كل حاجه قبل ما امشى.... قالى وهو بيحاول يتماسك : يمكن تكونى نسيتيهم ....قولت: يمكن..... بس انا بقول فى سرى انا متاكده انى طافيه كل حاجه بس يلا خلى الليله تعدى.... قالى : قومى جهزى العشا ....دخلت اجهز العشا ومش لقيت عشا .. طبعا انا قلبى سقط فى رجلى ازاى ماما تنسى العشا ...اتصلت بماما . قالتلى : انا مجهزه العشا كله عندك فى المطبخ ...قولت ليها وانا فى حيره : خلاص يا ماما يمكن تكون قطه اكلته ....ماما سكتت ....راح جوزى سالنى فين العشا ؟؟؟؟ قولتله : مش لاقياه باين قطه اكلته... قالى: نعم نعم نعم ..هو من اولها هنصيع على بعض ولا ايه ؟؟؟ قطه هتاكل ديك رومى محشى حمام ...والحمام محشى فريك... وبرامين رز وصنيه بطاطس؟؟؟ ... قولتله : ممكن بتحصل فى احسن عائلات القطط ... قالى: لا يا حدوقه ..لا ياماما ..ده اهلك استخسروا الديك اللى مربينه ..عايزه تفهمينى ان القطه اكلت الديك بالعضم بتاعه ... وغمزت بالبطاطس .. وحدقت بالمخلل ؟؟؟ .. قولتله وانا بصراحه محتاره : ربنا يسامحك انا هتخمد من غير اكل.... قالى : خلاص يا روحى ولا يهمك ناكل اى حاجه خفيفه من التلاجه

قولت: ماشى.... ولسه بجيب الاكل لقيت النور قطع راح جوزى قالى هاتى شمعه قولت ليه مش عندى نسيت اجيبه قالى ماشى هنزل اجيب مهو يوم باين من اوله.. وفضل جوزى يبرطم وهو نازل على السلم وانا مش عارفه بيقول ايه ...

هو نزل وانا قولت ادخل ادام المرايا افك شعرى واسرحه وفتحت الكشاف اللى فى الموبيل وابص فى المريا والقى ورايا واحد مشنوق وعينه حمرا وبيبص ليه ويضحك

طبعاً صرخت وجريت على باب الشقه افتحه مش بيفتح وكان فاضل ثوانى وارمى نفسى من البلكونه ولقيت جوزى بيقولى : فيه ايه؟؟؟

قولتله : فيه حد مشنوق فى السقف فى اوضه النوم .... طبعا دى ليله الدخله جوزى عمل فيها عنتره بن شداد وقالى :ازاى استنى كده ادخل اشوف ...دخل وانا حاسه انه داخل على اعصابه وخرج يقولى: مفيش اى حاجه قولتله : ازاااااااى ؟؟؟؟؟ دنا شوفته بعينى؟؟؟ .. قالى : والله ما فيه حاجه معلش يا حبيبتى يمكن يكون علشان مش نمتى كويس من امبارح قولت يمكن يلا ننام وبكرة يحلها ربنا قالى يلا يا ام عيالى طبعا انا فى سرى بقول عيالك ابقى قابلنى لو شوفت منى صرصار بعد الخضه دى ..

وصممت منا نايمه فى اوضه النوم ونمت على كنبه الانتريه ..ولسه هغمض عينى لقيت النور جه وحاجات فى المطبخ عماله تتكسر الحلل بتطير والمغرفه بترقص وانا وقفت اتفرج على الحفله الغنائيه فى المطبخ ومحمد فؤاد بيغنى كامننا وجريت اصرخ وانادى على جوزى... جوزى قالى : فيه حاجه غلط انا مش فاهمها ...قولتله : فعلا باين الجوازة دى عليها لعنه الفراعنه ولا ايه ؟

قالى ننام وبكرة ربنا يحلها وعلشان اضمن انى اتخمد اخدت قرص منوم وجوزى كمان اخد ونمنا ولسه بفتح عينى ولقيت نفسى نايمه فى ميداااااااااااااااان

العفش كله فى الشارع واحنا نايمين فى الشارع والناس ملمومه حوالينا.. واللى يقول محدش قالهم ليه يا جماعه ؟؟ واللى يقول منه لله 5000جنيه فى يوم وانا قومت جرى على الشقه اللى عرفنا فى الاخر انها مسكونه فعلا بالجن والعفاريت .........

وسبنا الشقه وحاليا بندور على عشه ايجار جديد كانت معكم حنين المعفرته من امام احدى بيوت الاشباح

الزمار ورعايه ال 100 فار

تحديث

********

انا الدكاتره عبده الرايق واسف لانى مسحت البوست بتاع فرنسا اللى فات بالتعليقات لان عدد التعليقات الخارجه كانت 350 تعليق يعنى عايز عشر سنين عبقال لما امسحهم وانا بكسل امسح عينى اصلا

رحت ماسح البوست ونزلته من جديد

يعنى فى ناس علقت على البوست ده قبل كده .. انا اسف لهم

غلطه مطبعيه

*********************************************

اخواتى المدونات واخوانى المدونين

سلام الله عليكم

انهارده هاكمل لكم حكايه الزمار والملك

بس ارجو اللى مقراش الجزاء الاول يقراه من اللينك ده

يموت الزمار وصوابعه بتلعب

**************

ندخل بقى فى المفيد

الزمار بيكلم الملك والوزير وبيقولهم ..... الميت بعد ماوقع منى فى البير ... فكرت بسرعه وناديت على ابن الميت وقولتله :- خلى النسوان تزغرد واعمل فرح كبير .. ابوك اتحول لحمامه وطار للجنه .. ووصانى قبل ما يطير اقولك تعمل فرح كبير وتردم البير دى بسرعه .. والراجل صدقنى وخلى النسوان تزغرد وبسرعه جابوا طوب وحجاره وردموا البير .. وانا قاعد اتفرج عليهم وكل واحد يسلم عليا ويبوسنى ويدينى فلوس ... من ده جنيه ومن ده اتنين ومن ده نص جنيه ومن دى بريزه ومن دى شلن ومن ده 5 جنيه .... لغايه لما قمت مليان فلوس .. رحت اشتريت اكل وحشيش يكفينى شهر بحاله .. وانا راجع لقيت معايا فلوس بالعبيطه .. رحت موزعها على الغلابه اللى قابلتهم ..

الملك طبعا اتغاظ وكان هيفرقع وقال فى سره :- حظك حظ عوالم .. حتى الميت كسبت منه

وخرج الملك من عند الزمار وهو بيضرب كف على كف وبيقول وحياه امك لاجيب مناخيرك الارض وفى تانى يوم بعت الملك مندوب من عنده للزمار قاله الملك عايزك ضرورى فى القصر ... وراح الزمار وقابل الملك وطبعا معرفش انه الراجل اللى بيجيله ويحشش معاه .. وعرض عليه الملك .. انه يشتغل عنده سياف .. ويجوزه اميره من الاميرات ... وطبعا الملك فهمه انه لو رفض هتتقطع رقابته ... عمنا الزمار وافق وهو متضايق .

طبعا الملك كانت عنده خطه متخرش الميه .ولا الكهرباء كمان .... كانت خطه الملك انه يحمل على الزمار هو والوزير ويروحوا يسهروا معاه يوماتى علشان يخلصوا التموين بتاعه من الحشيش والاكل وطبعا مش هيقدر يشتغل اى شغلانه طالما هو شغال عند الملك سياف

المهم

خلصوا الاكل والحشيش من عند الزمار فى خلال 15 يوم .. وكان باقى على القبض بتاعه 15 يوم ... الملك عرض على الزمار انه يجيب معاه اكل وحشيش لكن الزمار رفض . وقاله :-انتم ضيوفى ولا يمكن تدفعوا مليم احمر

المهم

تانى يوم جه الملك والوزير ولقيوا الزمار عنده اكل وحشيش بالهبولى استغرب الملك والوزير وقالوا للزمار جبت منين كل ده ؟؟؟؟ الزمار قالهم :- ابدا اتصرفت ... بعت سيف الملك .. ورحت عند النجار وعملى سيف اخوه الخالق الناطق من الخشب الملك قاله :- طيب افرض الملك قالك تقطع رقبه حد هتعمل ايه ... رد الزمار وقاله :- ياعم قول يا باسط تلاقيها هاصت .. انا من يوم ما اشتغلت الشغلانه دى وانا بهش دبان .. ولا شغله ولا مشغله

خرج الملك من عند الزمار وهو فرحان وملعلع .. وقال للوزير:- بكره تجيبلى واحد مذنب محكوم عليه بالاعدام ... وفعلا جمع الملك الامراء والوزراء .. وكبار رجال الاحتكار .. وكبار الحاشيه . وولاد الحراميه .. ونادى على الزمار وقاله :- يا سياف .. اقطع رقبه المذنب ده

الزمار وقف مذهول محتار وقال فى نفسه :- ايه الحظ التعبان موله ده .. 15 يوم من غير اى شغلانه ويوم ما ابيع السيف يجيبولى مصلحه.... ده ايه النحس الدكر ده !!!!!!!!

المهم .... الزمار فكر بسرعه وبص للمتهم وقال للملك :- معلشى يا مولانا انا لايمكن اقطع رقبه الراجل ده ابدا ... الملك بص له وقاله :- نعم نعم يا روح طنط ...انت شغال عند ام ترتر ولا عند ام اللالى ؟؟؟؟ انت عبيط ياض ... اقطع رقبته دلوقتى حالا ... ولا ورحمه امى الملكه الكبيره رشا ..اقطع انا رقبه اللى خلفوك .... الزمار قاله :- يا مولانا الملك .. انا بصيت فى عين الراجل ده لقيته مظلوم ...... الملك قاله :- ولد انت يا روح امك انت هتهزر ؟ .. ولا هنهرج بقى سوا ؟ .. هى مش طلباك وحياه والدك دلوقتى ....القاضى قال الراجل ده يتشنق وانت تقولى مظلوم ؟؟... يلا ياض اقطع رقبته بسرعه... ولا مش ناوى تيجبها البر انهارده...... الزمار قال :- يا امراء يا وزراء يا كبار الحراميه .. انا برىء من دم الراجل المظلوم ده .. يا رب لو الراجل ده برىء اجى اطلع السيف يبقى خشب ... ورفع السيف لفوق وبص وقال :- الله الله .... الحمد لله ... السيف اتحول لخشب ... الراجل برىء .. الراجل برىء

طبعا الملك مقدرشى يتنفس ولا يقول حاجه ... لكن بسرعه بص للزمار وقاله :- تعالى يا راجل يا بركه فى حضنى .. انا ناويت اجوزك بنتى لانك راجل مبروك ... بس بشرط ... مهر بنتى يكون غالى قوى .. وانا عارفك مفلس وممعكشى اللضى .. علشان كده انا هديلك 100 فار مختومين بختم الملك .. تاخدهم عندك وترعاهم لمده شهر ... 30 يوم .. كل يوم تخرجهم يتفسحوا من الفجر للمغرب فى الصحراء وترجعهم يناموا .. وبعد 30 يوم تجيبهم هنا قدام الوزراء والامراء .. ولو نقص فار هاقطع راسك .. ولو جبت ال 100 فار هجوزك بنتى

عمنا الزمار مشى مع الحراس وهما ماسكين الاقفاص اللى فيها الفيران وهو بيندب حظه ... ويقول فى نفسه .. انا ايه اللى رمانى الراميه السوداء دى .. الله يخرب بيت ابو الملك على بنته على الوزراء على المحتكرين على العز والوز على الفيران فى يوم واحد.... المهم وصل الزمار البيت ومشى الحراس .. وقعد الزمار يبص للفيران وهو مش عارف يعمل ايه ؟؟؟ وراح فاتح قفص وخرجت الفيران فى العشه بعد ما قفلها كويس .. وقعد يبص للفيران وهى بتجرى يمين وشمال وهو بيقول لنفسه :- والله نهيايتك هتكون على رجلين الفيران العبيطه الهبله ام بدوى دى يا زمار يابن ام زمار..

وطلع المزمار بتاعه وقعد يزمر بيه ويسلى نفسه ويودع الدنيا الفانيه ... وفجاءه اداها نغمه شديده من مزماره ... لقى الفيران كلها جريت ودخلت القفص ... راح مخرجهم تانى .. واداها نفس النغمه لقى الفيران برضه جريت ودخلت القفص ... راح مجرب القفص التانى .. برضه نفس النظام ... راح طالق كل الفيران .. واداها النغمه الفيران كلها دخلت الاقفاص .. راح طالقهم فى الصحراء .. وكل فار مشى على راسه .. وهو يزمر الفيران تيجى بسرعه وتدخل القفص

المهم...

الحال ده استمر 27 يوم .. وكل يوم يجى الحراس يطمنوا على الفيران بالليل يلاقوهم 100 فار .. لغايه لما زوجه الملك قالت للملك :- انت لازم تتصرف خلاص ال 30 يوم هيخلصوا ..وانا لايمكن اجوز بنتى للزمار الشحات الحشاش ده .. لو ده حصل انا هكهرب نفسى .. او اولع فى نفسى .. او اتفرج على القمر الاوروبى وابقى منحرفه و افضحكم

الملك قالها :- لا طبعا انا لايمكن اوافق على كده ابدا .. اوربى مين وزفت مين..هو احنا قادرين على فضايح النايل سات ؟.. بكره هابعت الوزير يتصرف باى شكل ويجيب من الزمار فار .. علشان العدد ينقص واطير رقبته

وفعلا بعت الملك الوزير وقاله عايزك تجيبلى فار باى تمن من الاتمان . وفكر الوزير .. وطبعا الناس دى مكاره زى ما احنا عارفينهم .. الوزير عمل نفسه راجل كبير فى السن وغير شكله وراح للزمار وقاله وهو بيعيط :- انا مراتى هتموت .. وانا راجل عجوز واعمى البصر وعندى 10 اولاد كلهم عميان .. ومراتى هى الوحيده اللى بتشوف بعنيها وبتخدمنا كلنا .. ولو ماتت كلنا هنموت وراها. والحكيم واصف لها كبده فار من بتوع الملك تاكلها على يومين ساعه اذان الفجر... الزمار قاله :- بس دى فيها حياتى انا لو اديتك فار هيقطعوا رقبتى .. الوزير قاله :- انا مستعد اديلك 100 الف جنيه فى الفار الواحد ... راح الزمار قاله :- لا يا عم لا 100 الف جنيه ولا حاجه انا هبيعلك الفار ب 10 الاف جنيه بس ... وعندى شرط واحد .. انى اختم دراعك بختم العبيد ... الوزير بص له وقاله :- ختم العبيد ؟؟؟ انت هتهرج ؟؟؟ لا انا لايمكن اختم دراعى ابدا بختم العبيد .... الزمار قاله :- خلاص براحتك .. ولا تزعل بلاش .. دراعك معاك وفيرانى معايا ..والغاوى ينقط بطاقيته ...سمعنى بقى احلى سلام عليكم ...

المهم الوزير وافق .... ودفع الفلوس واتختم بختم العبيد واخذ الفار وفلسع ... وبعد ما مشى بالفار زمر الزمار بزمارته نط الفار من ايد الوزير ورجع جرى على القفص تانى ... راح الوزير للملك ايد وراء وايد قدام .. وتانى يوم راحت الملكه للزمار متنكره وحاولت تاخد فار من الفيران .. وبرضه باع لها الزمار الفار ب 10 الاف جنيه وختمها بختم العبيد .. واخر يوم راح الملك للزمار واتكرر معاه نفس الحواروبعد ما تموا ال 30 يوم اجتمع الوزراء والامراء والساده اعضاء مجلسى كوكاكولا وسفن اب وجابوا الزمار والفيران ووجدوا الفيران تمام التمام ... وطبعا الملك عمره ما هيطلع عيل قدام البلطجيه بتوعه اعضاء حزب اسم النبى حارسه .. راح قايل للزمار :- خلاص انا هجوزك بنتى لكن اخر شرط هشرطه عليك انك تجيب شوال وتملاه كلام ... الزمار قاله :- انت مستقصدنى يا عمنا ولا ايه ؟؟؟ ازاى هملىء الشوال كلام ؟؟؟ .... الملك قاله :- هو ده شرطى واخر شرط هشرطه ...

الزمار قاله :- وانا موافق بس لازم يشهد عليا الوزير والملكه والملك .... الملك فرح وقال هو ده عز الطلب .. الزمار قال :- نبدء بالوزير .. تعالى يا سياده الوزير علشان اتكلم فى الشوال وانت بس اللى تحكم الشوال اتملىء ولا لا ... الوزير جه جنب الزمار ووقف ومد بوزه جوه الشوال مع الزمار ... راح الزمار همس فى ودن الوزير وقاله :- اول كلامى الوزير جه يشترى منى فار وهو متنكر وفاكر انى مش هاعرفه .. لكن انا كشفته وبعت له الفار ب 10 الاف جنيه وختمته بختم العبيد .. تحب افضحك قدام الناس ؟؟؟ ... ولا تقول الشوال اتملىء ؟؟؟ ...الوزير صاح باعلى صوته وقال :-الشواااااااااااااااااال اتملىء كلام يا خلق

جه الدور على الملكه ...

واتكرر معاها ومع الملك نفس الحوار .. والاتنين صاحوا باعلى صوتهم ..

الشوااااااال اتملىء كلام .. الشوال اتملىء كلام

واتجوز الزمار بنت الملك

وهنا ادرك ام حسين الصباح .. فنزلت تجيب المفتاح

مولااااااااااااااااااااااااااااااى

نيااااااااااااااااااااااااااااو

********************

مقتبسه من حكايه قديمه

روتها لكم

خالتكم

فرنسا هانم

جغرافيا زمان ... فى برطمان

هااااااا ى ايفرى بدى
اخوكم العلامه الكبير الدكاتره عبده الرايق وقع فى مطب ... نجانى منه ربنا سبحانه وتعالى
طبعا الفتره اللى فاتت كنت بعانى من العصب السابع فى الناحيه اليمين من الوجه ..ووقفت حركات الحاجب اليمين والعين اليمين والودن اليمين وفرده المناخير اليمين والخد اليمين ... يعنى كل الصواميل بتاعه الناحيه اليمين كانت مفوته
وطبعا كان خروجى قليل
وانا من صغرى وانا مش بحب بتاتا الدروس الخصوصيه ..وبذاكر لاولادى ومش بياخدوا دروس نهائى
مره كنت بذاكر للمدعو محمد الرايق ابنى .وهو دلوقتى فى اولى اعدادى وكنت بذاكر له درس الجغرافيا بتاع الكواكب
وفوجئت انهم عملوا تقلص لعدد الكوكب بقوا 8 كواكب بدلا من تسعه
طبعا انا كنت فاكر النقص ده علشان الغلاء والضرايب .وكده وحركات
طلع ان المقروص فى مصارينه وفى نواضره بلوتو قمر ... المضروب ده كان بيستغفلنا طول المده دى وهو قمر مش كوكب ..صحيح يا ناس كواكب ناقصه تربيه ...
المهم يا ساده الموقف اللى حصل بعد كده
بعد ما ضربت الغداء ومليت بطنى كويس رغم انف دكتور السكر ودكتور الاعصاب . لبست المريله وجهزت القلم الرصاص والاستيكه وناديت على الاولاد .. وكان دور محمد فى المذاكره ... قلت له وانا كلى براءه .. ها يا محمد هنذاكر ايه انهارده ؟؟؟
قالى انا اخدت درس الفصول الاربعه فى الدراسات ومش فاهمه ... وراح الولد الله يستره جايب الكتاب وجه .. وكان فاتحه على الدرس بتاع الفصول اربعه
انا طبعا بكل غرور وكبرياء وتعالى قفلت الكتاب وانجعصت كده ولا اكنى احمد زويل عالم الفلك الكبير ذات نفسه .. وبدءت اشرح
شوف يابنى احنا قبل كده قلنا ان الكواكب تدور حول الشمس فى مدارات بيضاويه .. وده بيخلى ناحيه تبقى قريبه من الشمس وتخلى الجو صيف لان الشكل البيضاوى فيه ناحيتين قريبين من الشمس وناحيتين بعيد عن الشمس يعنى لما الارض بتقرب يبقى صيف ولما بتبعد يبقى شتاء
بصيت للواد الشرير الشقى محمد باشا الرايق لقيته سرحان وبيبص لحواجبى وانا بتكلم . لان فى حاجب بيتحرك والتانى فى بيات شتوى بفعل العصب السابع نجاكم الله
قلت للولد . خليك معايا يا محمد ما تسرحشى ... الولد بص لى وقال . يبقى يا بابا كده هيبقى عندنا اتنين صيف واتنين شتاء ومفيش ربيع ولا خريف
طبعا انا بصراحه اتكتمت وسكت , وخصوصا لما الولد قال الكلام ده وفتح الكتاب على الصفحه بتاعه الدرس .. وبصراحه لقيت الولد عنده حق
هنا بقى اشتغلت العبقريه الدكاتوريه الرايقاويه .وقلت للولد طيب روح شوف ماما بتنادى عليك وبعدين نكمل الدرس
الولد راح يشوف امه .. وانا مسكت الكتاب احاول افهم حاجه ..للاسف نو نو نو ... مفهمتش اى حاجه
خصوصا ان اخر عهدى بالجغرافيا ايام ابن الحراميه المقروص بلوتو رحمه الله عليه لما كنت فى اولى ثانوى وبعدين دخلت علمى علوم ونسيت اى متعلقات خاصه بالجغرافيا وحتى نسيت ان الارض كرويتون تلف حول نفسوها
المهم
الولد رجع بسرعه وقالى ماما مش بتنادى عليا
طبعا انا يكفيكم ربنا من شر الزنقه خصوصا لما تبقى مزنوق مع ابنك او بنتك .. كنت مستعد ادفع اى جند واخرج من المطب ده
رحت عامل حركه قرعه وقلت للولد روح خد 5 ازايز بيريل وغيرهم من السوبر ماركت
الولد برضه بص لى وهو متابع حواجبى وقال . طيب السوبر ماركت ليه يا بابا ما انزل السبت للبقال واجيب من الدكان اللى تحت البيت
قلت نو نو نو اصلى انا عايز ب 5 جند بيض بلدى وهات معاك زيتون وتمن جبنه وتمن حلاوه
الولد راح ناحيه الباب وقابلته امه مسز رايق الله يمسيها بالخير واتكلمت معاه .. وجات ناحييتى وقالت . هو انت مدى الواد 100 جنيه ليه ممعكشى فكه ؟؟؟؟؟
قلت لها لا مش مشكله انا عازمكم على العشاء انهارده على حسابى
راحت نادت على الولد من على السلم ووقفت اتكلمت معاه
انا طبعا خمنت كده بذكائى الفذ منقطع النظير انها ادت للولد فلوس علشان يجيب الاكل . وقالت له هات من فلوس بابا البيريل بس .. لانها بتاخد مصروف شهرى ..شامل كل حاجه الا البيريل
المهم قريت الدرس كويس والحمد لله فهمته بعد عذاب اليم . وعرفت ان الارض لا تدور راسيا ولكن تدور على محور بزاويه 23 درجه ونص وبيكون محورها ثابت فى اثناء الدوران وده بيخلى نص الكره قريب من الشمش والنص التانى بعيد عن الشمس ولما الارض بتلف بيتغير النصفين ولما بتكون الشمس على خط الاستواء بيكون نص الكره ربيع والنص خريف لان الشمس بتتوزع بالتساوى على النصفيين . عليا النعمه الكلام بتاع المحور ده عمرى ما سمعت عنه ابدا ....فى ايامنا . ماكنشى فى محور الارض ولا حتى روتانا الارض ولا دريم الارض
ربنا يرحمك ويسامحك يا بلوتو يا ابن خالتى ام بلوتو ويبشبش النيزك اللى تحت دماغك
طبعا انا لما فهمت جريت على البلاكونه الحق الولد قبل ما يشترى البيض والزيتون ويدمر 15 جند على الاقل
لكن تاتى الرياح بما لاتشتهى المراكب ولا حتى اللنشات
لقيت الولد داخل العماره
واول ما دخل لقيته بيدينى 12 جند من ال 100 جند
قلت له ايه ده ياض ؟ فين الباقى ؟
قالى ماما ناديت عليا وقالتلى خليهم نص جبنه براميلى ونص جبنه رومى ونص حلاوه و3 كياس عيش ونص لانشون و ب 10 جنيه بيض و5 بيريل وكيلو لبن وخمس علب زبادى و2 بيفى وطقم كونو للترفيه بعد وليمه العشاء

مع تحيات اخيكم


فقيد ال 100 جند

الدكاتره الكبير ...عبده الرايق

الزواج على الطريقة المحاسبية

الاخ ميزان بيحب الاخت ميزانية وعايز يتجوزها وراح بيتهم يطلب ايدها من والدها دار الحوار الاتى :

ميزان : عمى يسعدنى ويشرفنى انى اقترض ايد بنتكم ذات الاصول الثابتة الانسة ميزانية

ابو ميزانية : ما عندناش بنات للاقتراض يا ابنى واصولنا كلها غير متداولة

ميزان : ليه كده يا عمى ده انا عاملك دراسة جدوى ومقدملك كشف حساب ما يخرش الميه

ابو ميزانية : يا ابنى انا خايف تبقى زى اصحاب القروض وتهرب بره البلد

ميزان : مش ممكن ابدا يا عمى ده ميزانية بورصة حياتى وكل اسهمى وام اولادى متمم حسابى وفائض افندى

ابو ميزانية : علشان كده البورصة انهارت والاسهم خسرت يا ميزان افندى.

ميزان : لا يا عمى دى ازمة مالية عالمية اما ميزانية اسهمها ضد الانهيار

يا عمى انا ياما سجلت اشعارى واشواقى فى دفتر اليومية فى ميزانية دى ميزانية هى ارباح حياتى وخسارتها .

ميزانية : وانا يا حبيبى ياما عملت موازين مراجعة حبا فيك مع انه كل ارصدتها وهمية

ميزان : اكيد يا روحى حساب الاستاذ بتاعك كان فيه خطا فى الترحيل .

ميزانية : لا يا حياتى بس انت كنت بالنسبة لى ديون معدومة ومن غير مخصص كماااااان

ميزان : وانتى يا حياتى خزنتى السرية وكل ارصدتى المشكوك فى تحصيلها

ابو ميزانية : خلاص يا ولاد نعمل برنت اوت بكل الارصدة والحسابات ونجهز ميزانية

ميزان : وانا يا عمى عليا الاشهار ومصاريف التاسيس وكتابة العقد

ابو ميزانية : اشهار ايه وتاسيس ايه انت اتتجوز محل ولا دكانة

ميزان : لا يا عمى قصدى مصاريف الفرح والتجهيز والبركة فيك تسحبلنا على المكشوف قد 2 مليون جنيه نجهز نفسنا بيهم .

ابو ميزانية : سحب على المكشوف انا كل ارصدتى فى البنوك متجمدة رهن مقابل القروض المسحوبة

ميزان : قروض ورهن هو حضرتك حوت القروض المعروف اللى سرقت البنوك

ميزانية : بابا حوت قروض يا مفلس يالى ايحجزوا عليك ويعملوك تفليسه

ميزان : انا ايحجزوا عليا يا بورصة منهارة يا ديون معدومة..

فعلا طلعتى ميزانية متفبركة وارصدتك وهمية .

ميزانية : لا حووش حووش قال انت اللى طلعت ميزان مراجعة ارصدته مظبوطة

ميزان : على الاقل احسن منك ياللى شبه دفتر الشطب .

ميزانية : انا دفتر شطب يا مخزن الخردة يا مستودع الكهنة .

ابو ميزانية : خلاااااااص يا ولاد الف مبروك وربنا يتمم بخير

انا كده اتاكدت من الارصدة الافتتاحية والحساب الختامى .

خالد

همس الاحباب

فلسفة اللى عاوز يعدد

هو : عارفة الست المريضة اللى جوزها موظف بسيط بتقول جوزها عاوز يعدد؟

هى: يعدد هو فيه راجل بيعدد؟

هو: ايوة امال مين اللى بيعدد؟؟

هى : سلامة نافوخك انت شربت حاجة النهاردة من برا يا خويا؟

هو : لا ولا من جوه وحياتك

هى : طبعا الست هى اللى بتعدد؟

هو : انت عاوزة تجننينى ولا ايه انا مش ناقصك على المسا

هى : انت اللى مش عارفة مالك هو انا غلطت فى ايه؟

هو : وفجأة نطت فى رأسة فكرة وقال ااااااااااااه فهمتك

انا مش قصدى الرجل بيعدد يعنى بيلهوى وبيخرابى وبيدهوتى قصدى بيعدد يعنى عاوز يتجوز على مراته

هى : اه انا قصدت ان الست هى اللى بتعدد وبتقولى يا حوستى ويا لهوتى لما بسلامته يتكل

هو : اه ما انا اخيرا فهمت كدة لهوى براحتك وخرابى براحتك

هى : بس الرجل هيسيب مراته ويعدد !!!!!!!!!!!!!!!

هو : عادى بقى ما انت كمان عاوزة تعددى فى اقرب فرصة

تصبحى على خير

يموت الزمار ... وصوابعه بتلعب

اخواتى العزيزات واخوانى الاعزاء



انهارده هاحكى لكم حكايه سمعتها وعجبتنى واتمنى ان تعجبكم
*********************

زمااااااااان قوى ايام الدنيا ما كانت شده حيلها وكانت دنيا بنت ناس .. ورخيصه ... كان فى بلد حاكمها ملك اسمه سنديب .. ووزيره اسمه غنديب . فى ليله من الليالى الملك جاله حاله ارق ومش عارف ينام .. قال للوزير .. يا وزير :- انا مش جايلى نوم وعايز املص من القصر وابص على الرعيه واشوفهم عايشين ازاى


الوزير قاله وماله يا ملك ..تعالى يابا نتمشى ونشوف الرعيه بس لازم نتخفى علشان محدش يشوفنا ... الملك قاله :- نتخفى ازاى ياض يا وزير ؟


الوزير قاله :- نلبس ملابس عاديه من سوق الجمعه ونبقى زى الرعيه تمام


الفكره عجبت الملك اصله كان بيحب المغامرات وبيحب يلعب بالناس .. لبس الملك والوزير هدوم من الرخيصه ام تلات ابيض ونزلوا يتفسحوا فى المدينه ... وهما ماشيين شافوا عشه بعيده قوى خارج المدينه وفيها لمبه زيت منوره .. الملك قال للوزير :- عشه مين دى يا غنديب ؟؟ .. رد الوزير وقال :- ورحمه امى ما اعرف يا ملك الملوك .. الملك قاله :- امال انت وزير ازاى ؟؟ تعالى نشوف العشه دى بتاعه مين


راح الملك والوزير للعشه ودخلوا لاقيوا راجل قاعد بيشرب حشيش وهيمان مع نفسه بيناجى سقف العشه وبيتكلم مع اللمبه


المنظر عجب الملك قوى وقال للراجل :- انت قاعد هنا لوحدك ليه يا عمنا ؟


الراجل بص عليه وقاله :- وانت تطلع مين ؟؟؟ الوزير رد وقال :- احنا تايهين فى الصحراء ولقينا عشتك قلنا نسهر معاك وتدلنا على طريقنا


الراجل قال :- يا 100 الف مرحب بالضيوف انا هاجيب لكم العشاء .. رد الملك وقال :- لا احنا هنشرب معاك نفسين حشيش ونمشى بس عايزين نعرف ايه حكايتك وقاعد هنا ليه لوحدك ؟؟


الراجل قال :- بص يا شيخ العرب انت وهو .. كلام فى سركم انا كل يوم اقوم الصبح امسك الغربال واحط فيه شويه رمله واغربلهم الاقى بريزه اطلع بيها على السوق اجيب عيش واكل وحشيش وزيت للمبه ويفضل معايا قرشين اديهم لاى حد غلبان اقابله فى طريقى


الملك قاله :- طيب ما تخليهم معاك لبكره .. رد الراجل وقال بكره اغربل رمل جديد والاقى بريزه جديده


المهم شرب الملك والوزير مع الراجل واتبسطوا وقال الملك للراجل :- انت اسمك ايه ؟


رد الراجل وقال :- انا اسمى زمار


الملك قاله :- طيب يا زمار بكره تروح لقصر الملك وهناك هتلاقى شغل والملك هيحسن اليك قوى قوى


رد زمار وقال :- ملك ايه ؟ الملك لله ؟ انا مش بحب الملك ده راجل اهبل وعبيط وعنده وزير حمار


الملك اتغاظ منه وقاله :- طيب ممكن بكره تحتاجه


رد زمار وقال :- انا احتاج للعبيط الاهبل ابو رياله ده ؟؟؟ دا يبقى اخر يوم فى حياتى


خرج الملك من عند زمار وقرر انه يجيبوه زاحف على ايده ورجله ... وقال للوزير :- ابعت ناس يسرقوا الغربال بتاع الزمار وخلينا نشوف هيجيب منين البريزه


وفعلا سرق جنود الملك غربال الزمار


وتانى يوم راح الملك للعشه هو والوزير ولبسوا لبس تانى خالص وغيروا شكلهم .. وراحوا للعشه لاقيوا العشه منوره بلمبتين زيت .. راحوا داخلين العشه لاقيوا زمار بيشرب حشيش وعماله بيكلم سقف العشه وضاربها صارمه


الملك قاله :- سلام عليكم


رد زمار وقال :- وعليكم السلام اتفضلوا ... هو انتوا كمان تايهين ؟؟


الوزير قاله ايوه عرفت منين ؟؟؟


قاله اصل فى اتنين امبارح جم هنا وقالوا احنا تايهين وسرقوا منى الغربال اللى كنت بلاقى فيه البريزه .. رحت نازل السوق ومشيت ابص للاكل وانا جعان لمحنى صاحب مطعم وقالى تعالى ساعدنى وانا ااكلك .. وفعلا ساعدته وفى اخر اليوم ادانى ريال واكل كتير .. رحت اشتريت لمبه زيت كمان وجبت ببريزه كامله حشيش ..واديت الباقى لاول غلبان قابلته


راح الملك قاله :- طيب ماتروح الصبح للملك يمكن تلاقى عنده شغل احسن من البهدله دى


رد زمار وقال :- ملك ايه الحمار الاهبل ده .. انا اموت من الجوع ولا انى اروح للملك


خرج الملك من عند زمار وقال للوزير :- بكره الفجر تطلع منادى ينادى اى واحد هيفتح المطعم بتاعه هيتشنق


وتالت يوم راح الملك للعشه هو والوزير ولابسوا لبس تانى .. لاقيوا العشه منوره بتلات لمبات زيت ونورها ساطع من بعيد


دخلوا على الزمار وسلموا عليه وعرفوا قصته


قالهم الزمار :- انا مش عارف مين بيلعب معايا الدنيئه .. انهارده رحت المطعم لقيته قافل سئلت على صاحبه الناس قالت المنادى خرج وقال اى صاحب مطعم هيفتح انهارده هيتشنق .. رحت انا قاعد قدام المطعم ومش عارف اعمل ايه .. وبصيت لقيت الجزار بيدبح جمل وعماله يفلفص منه .. رحت ماسك معاه .. لغايه لما دبح وسلخ وقطع .. راح مدينى لحمه ونص جنيه .. رحت مشترى لمبه جديده وبريال حشيش واشتريت اكل كتير واديت اول غلبان قابلته الباقى كله اللى معايا


الملك قاله :- طيب ماتروح للملك يمكن ينقذك من الهيلمان ده


رد الزمار وقال :- والله انا بشك فى الملك ده . . من يوم ما جات سيرته وانا متعكنن من اللى خلفوه .. انا اموت ولا انى اروح للاهبل ابو رياله ده


خرج الملك متغاظ وقال للوزير :- بكره الفجر تطلع منادى ينادى اى محل جزار هيفتح هيتشنق


رابع يوم راح الملك العشه لاقى نور ساطع من بعيد .. دخل هو والوزير العشه لاقيوا كذا لمبه زيت ومعاهم كلوب والزمار قاعد ومتسلطن وبيكلم سقف العشه ..سألوه عن حكايته قالهم


انا حاسس ان الملك الاهبل وراء كل اللى بيحصل لى ده .. انهارده خرج منادى ينادى اى جزار هيفتح المحل بتاعه هيتشنق .. ر حت لقيت الجزار قافل .. وربنا كرمنى بشغلانه الملك ولا اللى خلفوه مش هيقدر يمنعها .. ولو طلع نص جيشه ينادى


الملك قاله :- شغلانه ايه دى ؟


الزمار قال :- انهارده اشتغلت حانوتى .. ( خلى الملك الاهبل بقى يطلع منادى ينادى اى حد هيموت انهارده هيتشنق ) كنت قاعد مستنى الجزار يفتح لقيت واحد بيجرى وهو بيعيط ويقول اااااااااه يابويا ... سئلته مالك .. قالى ابويا مات وانا رايح اجيب الحانوتى ... انا قلت للراجل انا حانوتى ممكن اجى معاك اغسله واكفنه .. رحت رايح معاه .. وقلت محدش يقف معايا وانا بغسل الميت .. خرج كل الناس وسابونى اغسله لوحدى جنب البير بتاع الميه .. لكن وانا بغسله بالصابون اتزحلق ووقع منى فى البير .........


**********


معلشى علشان الحكايه طويله هكملها فى تدوينه تانيه


على فكره الحكايه دى انا سمعتها


يعنى مش تاليفى


**********


مع تحيات فرنسا هانم

شــاعر .. وربــة منـزل

فى يوم مشرق جميل .. جلس الشاعر يتأمل زوجته .. يتذكر أنها حبه الأول وأنها كانت أقصى أمانيه ..

ملهمته التى تعلم الشعر من أجلها .. وألهب قلوب الكثيرين بقصائده الحارة إليها ..

تأملها كثيراً وهى جالسة أمامه .. عاوده الحنين للشعر بعد عشر سنوات زواج ..

قال: هذا قلمٌ ملأته بمداد رحيق الحب .. وهذه ورقة بيضاء فى صفاء عيونك ..

قالت: هو انا هرجع المدرسة تانى ولا ايه؟

قال: انثرى حروفك .. أكتبُى

قالت: ماشى .. طب ملينى .. أكتب ايه؟

قال: أكتبُبى عنى .. عن شوقى ووجدى

قالت: شوقى مين؟ ومين وجدى ده كمان؟

قال: أكتبى اننى ما ارتويت من حبك ابدا .. واننى لا زلت ظمآن

قالت: فهمت .. هاقوم احضر الأكل اهو

قال: أنظرى الى عيناى كما كنتِ تفعلين .. واحتضنى اهدابى

قالت: تصدق؟ عنيك حمرا .. قوم نام شوية قبل الولاد ما يرجعوا

قال: لم أقصد .. اقتربى من قلبى.. انصتى .. أتسمعين هذه الدقات؟

قالت: آه .. ده باين الولاد جم من المدرسة .. الباب بيخبط

قال: ايه الست دى؟ طب قومى ياختى افتحى الباب وحضرى الغدا

قالت: تأمرنى .. فيهتز القلب .. وأسير بأمر الهوى .. مكبلة بقيود العشق

تحياتى

كاميليا