الاثنين، أكتوبر 20، 2008

صبرني القديمه ماتت



ايه ما تقلقووووووش لسه فى صبرني جديده
شوفوا يا جماعه انا خلاص قررت اتغير من النهارده وبافكر اروح اخد دروس عند الرايق
أنا اكتشفت انى باشتغل ليلا نهارا عامله زي البالفلوف الى معلقينا فى الساقيه وكل ده بدون مقابل مادي لقيتنى على فيض الكريم يا بوي.
اي حد فيكم يقولي زي ما قالي جوزي : ايه النظره الماديه دي هاعوره اووووووك
أقولكم بقى بدأت ازاي الثوره دي :
فى الاول انا من غيظي من جوزي انه عاد بيطنش يودي هدومه للمكوجي واستريح على مكوتي بحجه انه مش فاضي يروح او ان
هدومه بقت قليله هايروح على طقمين ولا بتاع ( لانى شحت هدومه عشان بقت يرثي لها ومكسل ينزل يشتري )
المهم انا بقى اتغاااااظت منه اوي
وقلتله :بص يا عمنا اخرك معايا اسبوع من الان لو ما وفقتش اوضاعك وروحت اشتريت هدوم
وتودي هدومك للمكوجي زي الاول انا ما عدتش هاكويييييييييلك انسى يا عمر قصدي يا رضا
المهم قالي :ماشي
وبعدين بعد ما فات الاسبوع قوووووم صعب عليا ولقيته يا حبة عينى بيخرج بنفس الطقم بقاله 3 ايام ومش عايز
يغيره كسلان يكوي .
وقفت اكوي وانا متغاااااظه واول ما جه
قلتله وأنا باجز على سناااااااني: انا كوييييييتلك بس ايه رايك بقى انا من هنا ورايح هاخد ثمن المكوي
قالي: ياااااااااه بس كده من عنيه.
وحياتك عندي يا بيه هو اول كام يوم بس وبعد كده بقى خد عندك .
رضا :على فكره انتى اسعارك غاليه اوي
صبرني : هو احنا اسعارنا كده الى مش عاجبه يكوي بره ده القميص بجنيه والبنطلون 2 جنيه عااااااااااااادي يعنى
تاني مره
رضا : المكوى خلصت يا هاااااانم وانتى ما كوتيش
صبرني : ما فضيتش من امبارح اصلا ما انت شايف . وبعدين انت مش لسه لابس الطقم ده الصبح ؟؟؟
تأمير علني يا والدي .
بعد بقى ما التحويشه كبرت وبقوا اربعين جنيه حوشتهم فى شهر قوووووووم يطمع فيهم بقى
وكل شويه يقولي: مش داااااافع انتى مش نسيتى المفتاح اول امبارح جوه الشقه وكسرت الكالون وجبت واحد تاني ب15جنيه
ارد عليه : وانا ماااااااالي انت هاتحاسب المكوجي على الكالون بتاع باب شقتك وبعدين اساسا هو كان بايظ وانت كنت عايز تغيره نسييييييت ؟؟؟.
رجع فى كلاااااااااامه ومش عايز يدفع بس انا مش هاسيب حقي بقى كبرت فى دماغي
بعدين يوما فى ساعة رضا : قالي صبصب هاتعملي ايه بالفلوس دي يا صبصب .
انا وانا باستهبل : فلوس ايه يا ابو رياض .
رضا وهو فى عنيه براءة الاطفال : فلوس المكوى . انتى اكيد بتحوشيهم عشان تعمليلى بيهم مفجأه .
أنا مكشره عن انيابي : انسسسسسسسسسسسى ما تحسبش انت للفلوس دي خاااالص انساااااااهم هشششش غروش غروش .
رضا : لا بجد هاتعملي بيهم ايه ؟؟؟
أنا : هاعمل بيهم مشروع ياعم .
رضا : ماااااااشي هاتيهم اشغلهوملك معايا .
أنا : قدييييييييمه العب غيرها يا شاطر شربت من ده كتييييييير . ده انا بعون الله هابلغ عنك قريب انك زي شركات توظيف الاموال كده بس لما تروح لندن ابقى خدني معاك ياابو الروض
رضا : امال هاتعملي ايييييييه ؟؟؟ قولي بقى
صبرني : هاعمل بيهم زبادي وجبن وابعهم لك انت وولادك هههههههههههههههههههههههههه
ده بابا قالي ان علبة الزبادي فيها 4 معالق بالعدد بقت ب جنيه ونص ياعم وانا مغرقاكم زبادي وجبنه طازه
طب حتى ادفعولي الفرق بينه وبين الجاهز ايه الناس دي
رضا : لاااااااااااااااااا انا لازم اعرف بقى مين الى لاعب فى دماغك مييييييييييين انتى بقيتى ماديه اوي
أنا : انت لسه شوفت حاجه يا ضينايا لسسسسسه لازم اخد مرتب مش هانفضل طول عمرنا نشتغل ببلاش
يعنى بزمتك انا مش باشتغل اكتر من الناس الى انت مشغلهم فى المحل
مش بتديهم مرتب اشمعن انا بقىىىىىىى هاتيجى عليا انا وتوجع .
رضا : انتى جرالك ايه يا ست انتي ؟؟؟؟؟؟؟؟
أه بس عرررررررفت اكيد انت من يوم ما غيرتي لون شعرك والحكايه مأثره معاكيييييييي
ايه ده هو الصوت الى أنا سمعته وانا نايم ده لما كانت البنت بتعملك شعرك كان صوت شنيور بتخرملك مخك ؟؟؟؟
وأنا الى كنت فاكره سشوااااااااار .
أنا من الاول قلتلك بلاش تغييييييييييير لو الشعر ده بيبقى شكلك عامله زي الى مولعه فى شعرها
أنا وانا عنيه بطق شراااااار : مولعه فى شعرهاااااااااااااا . انا الحق عليااااااااااا باعمل نيو لوووووووك عشانك .
رضا : نيو لوووووووك اه بكام يا حلوه النيو لوك ده ابقى ادفعيه انتى بقى يا مااااااااديه
أنا : أأأأأأأاه طيب بقى انا هاوريلك الماديه على اصولها بقى والمخ المخروم الى بصحيح يا ابو الروض .
ومش عايزه اقولكم على عدد الضحايا بقى كانوا كام فى العاركه دي .
علشااااااااااااان كده باعلنها صريييييييييييحه
صبرني القديمه ماااااااااااتت من النهارده فى صبرني جديده

هناك 47 تعليقًا:

Empress appy يقول...

هههههههههه
الف مبروك يا اوختى رجاله مستبده صحيح
الا ايه هو البالفولوف ده اللى فى الساقيه هههههههههههههههههههه

Asmaa mahaba يقول...

ههههههههه دى اخره اللى يسمع كلام الرايق
انا حجرى قبل ما الوبا يطولنى

Mony يقول...

ايوية كده يا صبرني زمن الاستبداد ولي و مضي

هو ده المفيد ولا بلاش

Unknown يقول...

هههههههههههه

ألف مبروووووووووك علي الشغل الجديد

فرنسا هانم يقول...

صبرنى يا رب
فكرتينا يا حبيبتى بالحاضر الغائب عبده الرايق
ياريت يا جماعه اللى يعرف اخبار يطمنى
ارجوكم

فرنسا هانم يقول...

علبه الزبادى ام 4 معالق دى كبيره قوى
لا احنا عندنا يدوب معلقتين من الكبار بس
والله ما عارفه اخرتها ايه
بس برضه
تحيا صبرنى الجديده

انا حره يقول...

التسييح والتشرييد دا بمناسبه الاحتفال بالذكرى السنويه التاسعه لجوازكم ولا ايه

فاتيما يقول...

و الله لو دا حصل بجد يبقى كويس قوى
أصل ليلى أكتر أسباب شقاءها فى الحياة هو السكوت على حقوقها لحد ما اللى قدامها بيعتبر دا واجب عليها و لا مقابل قصاده و هيا تبقى بنت أصول و تكسف تطلب لروحها حاجة يقوم سى السيد ناسيها خالص و مبيحسش بمرور الوقت إنها بتتعب و محتاجة حتى الكلمة الكويسة مش لازم حتى هدية و لا مصروف ...
القصد
البقاء لله فى صبرنى القديمة
و طولة العمر للجديدة

صبرني يارب يقول...

آبي

ههههههههههههه اه والله يا بنتى

بافلوف يعنى جموسه بس باقولها بالانجليزى تقييفه يعنى

ههههههههههههههههههه

صبرني يارب يقول...

سومه

لا لا الرايق بريء من هذا الموال انا لسه هابدأاخد دروس
وما تجريش مسييييييييييرك تيجى تتحايلى عليا اديلك درس

صبرني يارب يقول...

موني

مش كده برضه احنا لازم ناخد حقنا يا اختي

صبرني يارب يقول...

اسراء

الله يبارك فيكى

ههههههههههههه

لا عارفه امبارح خلاص قدمت استقالتي

اصل يا بنتى الزبون بيتنطط عليا اويييي ومش عايز يدفع

قلتله يلا يا شاطر على المكوجي بقى بلاش خوته
هههههههههههههههههه

صبرني يارب يقول...

فرنسا

والله يا فرنسا ما اعرفش عنه اي حاجه ما عنديش حتى اميله

يارب يكون خير وربنا يجيبه بالسلامه

هو احنا نجيب يختفي هو

اثبتوا بقى

صبرني يارب يقول...

اه يا فرنسا ما هو علبة الزبادي ام اربعه معالق دي الكبيره ام جنيه ونص
فى واحده تانيه معلقتين صغيرين حتى ب 65 قرش
وحياتك الحاجات دي ما تاكل معانا

انا لازم ادب صنية الزبادي جد اكده والا ما يحسوش انهم كلوا زبادي

والكوبايه اد كوباية الشاي كده حاجه تملاا لعين والبطن

احلى زبديايه بوش لفرنسا من الانتاج الجديد

صبرني يارب يقول...

أنا حره
هههههههههههههههههههههههههههههههه
ايوه تصوري ما خدتش بالي

ما كنتش واخده بالي ان البوست ده هانزل النهارده

ده انا رضا هايموتني ابقوا دوروا عليا لو اتأخرت
تحياتي لك

صبرني يارب يقول...

فاتيما

والله العظيم ده حقيقى

تعرفي ان انا توقفت مع نفسي فى لحظه كده وقلت ايه ده هو الواحد هايبطل يبقى مؤدب ولا ايه

انا صحيح عمري ما طلبت منه حاجه وقالي لا
بس ماهو فى الحقيقه انا ما باطلبش اصلاااااااا

عشان كده انا اوشكت على انى اطلب فعلا

لكن خايفه عشان لو طلبت بصحيح وقالي لا هازعل اوي اوي اوي

تحياتي لك يا فاتميا وليلى

الطائر الحزين يقول...

وماله انت اولى برضة من المكوجى وعلى رأى المثل من دقنه وافتله

صبرني يارب يقول...

اوباااااا

عميل عميل عميل

جمعية المراه المتوحشه على راي كريم هجوووووم على طائر بليز

ايه من دقنه وافتله دي ؟؟؟

لا يا ضنايا ده مش من دقنه ده من دمي وتعبي وعرقي
اه احنا مش بناخد فلوس اوانطه حضرتك
هههههههههههههه

نورت يا طائر

حنين القلب يقول...

هههههههههههههههههههههههههههههه الف مليون مبروك يا صبرنى
والنبى ياختشى عندك حق دحنا شغالين ليل ونهار وبيت ومواعيين ومكوه والاخر ولا بناخد مليم طيب تصدقى انا كمان بدفع فى البيت لانى بشتغل اصلا شوفتى خيبه اكتر من كده
يعنى مش باخد لا وبدفع كمااااااااان
بس انا لو حاولت اموت حنين القديمه خايفه حنين الجديده تكون اخيب منها

تسلم ايدك يا روحى البوست زى العسل

حنين القلب يقول...

عبده الرايق

ربنا يشفيك
ويحفظك ويكرمك يا رب

بنتك حنين

دعاء مواجهات يقول...

ايوا كدة إديلوو كمااااااان

هما مبيجووش غير كدة

هههههههههههههههههههههه

بيس ياقمر

صبرني يارب يقول...

حنين القلب

طيب يا حنين بجد بجد انتى لازم يبقى ليكى فلوس خاصه من شغلك على الاقل

يعنى لو كان ينفع ما تصرفيش كل الفلوس

لان بصراحه شايفه ان فى استهبال من الرجاله فىالمنطقه دي بالنسبه للست الى بتشتغل

يعنى انتى مثلا هاتصرفي فلوسك كلها
وهو حضرته لما يحوش اثنين مليم احمر يقولك فلوس واناحر فيها
وطبعا كل مدخرات ووممتلكات الاسره باسمه

وانتى تطلعي من المولد بلا حمص

حقيقى ده ظلم
اه احنا واحد وكل حاجه بس الحق حبيب الله
لما يبقى كل واحد عارفه الى له والى عليه يبقى فل جدا
تحياتي ليكى وما تقوليش لجوزك انك تعرفينى
هههههههههههههههههه

صبرني يارب يقول...

دعاء مواجهات

لسه يا بنتى ما عملناش فيه حاجه بس هانعمل
ههههههههههههههههههه
بيس ياجميل

صبرني يارب يقول...

يا رااااااااااايق تعالى بقى

ايه الحكايه انتم بتتسرسبوا كده تروحوا فين

همس الاحباب يقول...

هههههههه
هههههه
والله شكلى انا دخلت المدونة دى غلط
مكوى وفلوس وحاجات كده فيها فلوس
على الصبح
والله فكرتينى المكوى
ليها يومين عند المكوجى
بس المدام عندى شاطر قوى
تاخد المكواة للمكوجى وتحاسبنى الحساب دوبل
وانا بقول الستات اتهفت فى مخها كده ليه
ده عصر المادية النسائية
ولتسقط الستات المادية

همس الاحباب يقول...

فرنسا هانم
الرايق بخير والحمد لله
بس ممنوع من النت والتلبفزيون
وهيرجع قريب علشان يعلمنا كورسات فى المادية وطرق علاجها
خلى صبرنى يا رب تستريح

صبرني يارب يقول...

همس الاحباب

يا سلااااام اتهفت فى نفوخها

طب ممكن تليفون المدام بس نتعرف عاااااادي مش هاقولها حاجه انا باحب اهدي النفوس

وبعدين مش تحمد ربنا انها بتوديلك المكوى وتجيبها
ما بتوديهاش انت ليه

هههههههههههههههه
نورت

الرايق ربنا يجيبه بالسلامه يارب عشان يدينى الكورسات

همس الاحباب يقول...

ههههههههه
الحمد لله
المدام ضيعت التليفون
ومش بتدخل نت
كانت بقت مادية اكتر ما هى مادية
هى بتودى المكوى اه
والمكوجى يبعتها
وبتاخد بدل انتقال اكتر من تمن المكوى كمااااان
ويا سلام لو ربنا اكرمها وجابت هدية
تاخد تمنها مضاعف
من الاخر الستات استغلاليه واحنا مسالمين
معانا ربنا
هههههههههه

همس الاحباب يقول...

فينك يا روقة
شكلى كده اتخرط واتقطع وهيرمونى للوز كمااان
انا قلت من الاول انى دخلت المدونة غلط

فرنسا هانم يقول...

همس الاحباب
شكرا لك يا خالد على ارسال الاميل
وعلى توضيح حاله الرايق
بجد والله ده اول اميل يجى لى يبين حاله الرايق
انا اشكرك جدا وادعو للرايق بالشفاء العاجل

صبرني يارب يقول...

همس الاحباب

يا سلااااام غلابه فعلاااااا

طيب هى بتجيب هديه وانت بتجيب ايه ؟؟؟

وبعدين ماهى لازم تاخد ثمنها امال يعنى تجيب منين
سيب رقبتها انت وعيالك وهى تقدر تجيب فلوس
هههههههههههههههههههههه

مش هاتخلص مني على فكره

همس الاحباب يقول...

فرنسا هانم
اى خدمة يا خالتو
وربنا يتم شفائه على خير
ويرجع بالف سلامة وينور المدونة يارب

همس الاحباب يقول...

صبرنى يا رب
ههههه
هههههه
بس هى تسيب رقبتى هى وعيالها
ومتخافيش انتى كله ايبقى تومام
على فكرة خلتها شافت البوست والتعليق
ودى كانت غلطة عمرى
لقيتها جايبة المكوى
وبتقولى هات الفلوس
بقولها كام قالتلى 6 جم قلت حاضر
طلعت الفلوس قالتى لا مش 6 بس هما 10 جم
ليه يا ستى قالتلى انا جبت حاجات تانية
ماشى طلعت 10 جم لقيتها واخدة 6 جم فكة و5 جم بقى الحساب 11 جم
بقدرة قادر افتكرتك وقعدت اضحك قلت لا صبرنى طلعت اهون منك يا شيخة
وعجبتها فكرة الزبادى قوى عايزة تعملها انا اجيب كل حاجة وهى تبيعلى العلبة ب3 جم قلتلها شكرا بطلنا
وادى اللى ناخده منكم
استغلال استغلال
وسمعنى اغنية بودعك

العراف يقول...

هههههههه

صبرني يارب يقول...

همس الاحباب

هى دي الستااااااااات

خلي بالك انا جوزي لسه ما قراش البوست

اول ما يفضى هاخليه يقراه

ما قلتلوش انى كتبته عشان تبقى مفجأه

وبالنسبه للزبادي قولها بكرررررررره ان شاء الله تدخل مدونة طابخين ايه النهارده هاتلاقي الطريقه

واي خدمه يا استاذ خالد
ههههههههههههه

خمسة فضفضة يقول...

السلام عليكم ورحمة الله وبركاته

هههههههههه

ايوه كده يا صبصب ياختي ماتسبيش حقك

انا كمان مش باسيب حقي ابدا مش كفايه باعمله كل حاجه في البيت زبادي ورايب ومخللات ولانشون وحلويات وبيتزا واكل خمس نجوم، وحتي العيش بيتعمل في البيت وتقريبا مش بنشتري حاجه جاهزه خالص من بره يبقي حقي احوش فلوس علي جمب ولا لأ ؟؟

المهم انه بيسيبني احوش احوش ولما يبقوا مبلغ عليه القيمه يقعد يتمسكن لحد ما اسلفه ، ووحياتك بيبقي هبه لا ترد ..ههههه
يمكن عشان مش باكوي في البيت :-D

اعمل ايه في قلبي الحونين


سلام يا قمر

كـــيــــــــارا يقول...

ههههههههههههههههههههههههه


يالهوي ياصبرني

ايه الافكار دي

ده احنا بنوفر اد كده

لو كل حاجه بناخد تمنها كان زمنا بقينا اغنيه

لكن تقولي مين هما يحبو يدفعوا للي برا


ومش عاجبه النيولوك كمان

لالالالالالا انتي صبرتي اوي


متسكتييييييش

وكويس ان صبرني الجديده جت

برافو عليكي ياصبرني :)

مواطن مصرى نايم يقول...

و الله بما انى لسه راجع من مود الحنقة اللى كنت فيه زى ما البعض عارف
من ضمنهم ابى و خالد و سومة و صبرنى يا رب و مها زين
و لقيت نفسى محذوف من المدونة
احب اشكر جداااااااا عبده الرايق و فرنسا هانم
بجد عادى و الله و مش زعلان خالص
بس كنت احب ان حد فيكم يدخل البلوج عندى يشوف انى كنت قافل بجد
و كنت و ما زلت فحالة يرثى لها
عموما شكرا جدااااا
و مش زعلان خالص و الله
ــــــــــــــــــــــــــــــ

صبرنى يا رب
البوست جميل جدااااااااا
و الله بس بلاش افترى عالرجالة
دا انتوا بجد مش ليلى خالص
و احنا بقينى حنفى جدااااا
هههههههههه

تحياتى

اسلام

صبرني يارب يقول...

خمسه فضفضه

والله يا بنتى وانا كمان كده انا ما عدتش باشتري منتجات الباااان خالص

حتى السمنه والله

والحلويات والاكل واماني واغاني وكل حاجه

بس فى فكره انا بقى بجد اتخنقت من حكاية انى اطلب منه فلوس المكوى وهو يا اختي عامل زي الى بيقطعهم من جلده

رغم ان بقالي عمر يا بنتي اقوله عمري ما طلبت منه حاجه وقالي لا

بس عارفه اكتشفت ايه؟؟
ان انا مش باطلب اصلااااااا
والله ماليش اي طلبات خاصه

ولما جيت اطلب قصاد مجهودي الشخصي تقلت القروش بقى يا بنتى

بس انا خلاص اعتزلت المكوى وقلته شيل يا معلم وروح على المكوجي
طبعا كيس المكوى معاه فى العربيه من 3 ايام
عشان مكسل يرووووووح
وفى الاخر طلعه تااااني
بس انا ناويه استندل بقى اوسيبه للاخر
بس يارب ما اطلعش هبله زي ناس وقلبي يرق
تحياتي ليكى يا جميل

صبرني يارب يقول...

كيارا

مافيش حاجه نافعه معاهم يااختي

طب ده انا اكتشفت فى رمضان ان كيلو السمن البلدي بقى باربعين جنيه البلدي الجموسي

قلتله ايه دددددده طب حاسبني طيب ده انا منغنغاكم
قالي انا الى باشتري اللبن
قلتله طب ابقى خلي اللبن يجبلك السمنه يا حلو .
ولعلمك الخاص اللبن بيجيلي لحد البيت بيدفع هو يعنى بس
هيييييييييييه دنيا

صبرني يارب يقول...

يا مواطن مصري نايم

انا مااعرفش اي حاجه عن الحذف ده والله
انا نفسي كنت غايبه برضه طول شهر رمضان بس كنت عاطياهم خبر

وكمان فرنسا غابت فتره كبيره
وحاليا الرايق تعبان الله يشفيه يارب

وهو كمان منقطع عن المدونه

فلما يجوا نبقى نشوف في ايه

وانت على راسنا يا مواطن بس اصحى انت بس هههههههههههه

وبعدين وحياتك احنا الى مظلومين مهما تقولوا

Asmaa mahaba يقول...

الف سلامه ماله عبدو الرايق؟؟؟ انا لسه شايفه الخبر عند خالتو فرنسا

اهالينا زهقوا يربونا يقول...

ايوووووووووووووووووه احنا نحب الناس اللى بتضحك دى


احنا جايين نعزمكوا على عيد ميلاد سمكه

التفاصيل في البوست الحالى والحفله قريب

وكله يجيب هدايا فاهمين

الدعوه عامه

تشااااااااااااااو

maiosha يقول...

يا واد يا صبصب يا جامد إنت

أيوة كده هما الرجالة مينفعشى معاهم غير العين الحمرا
شوفى الشغالة والمكوجى والسكرتيرة والطباخ والسفرجى وكل دول كانوا هياخدوا كام وخلى جوزك يدفع

وكمان دروس خصوصية .. أيوة طبعا مش بتربيله عيالة وبتسعديهم فى الواجب

ياااااااااه بجد يا بختك .. ده إنتى فى ظرف عشر سنين هتبقى مليونيرة

عقبالى يا رب لما أتجوز وأستنزف جوزى كده

نيهاهاهاهاها

صبرني يارب يقول...

اهالينا زهقوا يربونا

عنينا حاضر بس نجيب ايه لسمكه فى عيد ملادها طيب ؟؟
طيب هى سمكة بحر ولا نهر عشان نعمل حسابنا فىالاكل يعنى

تحياتي لك وعنينا هانيجى ان شاء الله

صبرني يارب يقول...

ميوشا

اه والله يا بنتى وربنا بنعمل كل ده وزياده

انا باقوله ادينى مرتب عن حاجه واحده بس منهم والباقي كادو

لا وايه خلي بالك انا ولادي فى لغات ومش بياخدوا دروس والله انا الى باذاكرلهم شووووووفي دروس اللغات بكام

والله العظيم هو الى بيستغلني مش انا

يلا اديناكي اهو البدايه عشان تعرفي تشتغلي ازاي لما تتجوزي

تحياتي لكي ونورتي

غير معرف يقول...

السلامو عليكم جميعا تسمحوى ليا بالانضمام ليكم
انا بيبرس
من القاهره
الف مبرووك على صبرني القديمه ماتت
و القديمه تحلى و لو كانت.....
بس بجد جامده الفكره
ارجو عدم نشرها بين الزوجات.....لتجنب وقوع ضحايا بين الطرفين
انتى بتخدى فلوس على المكوه
و هو وافق كده بسهوله.....بدون اى رضوض او خدشات
الكلام ده لو صحيح تبقى تأثيرك قوى جدا ولا ايه
اكيد ده كلام مدونات وتلاقيكى قطه حتى الان و كبيرك نونوا جنب السرير بليل
طيب ما احنا ممكن ننفذ الفكره دى و نحاسبكم على التوصيل للمحلات و المدارس و مشوار لماما و بابا و اركب عداد ف السياره و الكلمه الحلوه بخمسه جنيه
و الحلوة اوى ب بتمانيه .. و هكذا.....
وده نداء لكل الازواج عصر البلوشي انتهى و بدأ عصر الماديات ز.......
و يا ترى بقى الوجبه بكام عندكم......؟؟؟؟؟