السبت، أكتوبر 04، 2008

رحله صيد

رحلة صيد

=======

حسوبكم بقى صياد سمك قرارى باصطاد من زمان جدا ودى الهوايه الوحيده اللى كملت فيها لحد دلوقتى ،ايوه لازم تعرفوا انى صياد بجد مش باروح اصطاد سمكه ولا اتنين وارجع لالالالالالالالالا انا لما اروح اصطاد السمك بيستعد بيطلعلى كده من الميه لوحده

واحنا شله كبيره بنطلع نصطاد فى رحلات، وفى شهر 5 اللى فات كان فى كام يوم اجازه فقلت للشله يالا ننطلق اجمعوا كلهم على انهم مش ناويين يطلعوا اليومين دول طب ايه العمل يا اخوانا ،اجيبهم يمين وشمال مش راضيين المهم قلتلهم انا لا ممكن ابدا افوت الاجازه دى انا لازم اطلع اصطاد خصوصا اليومين دول ده انا سفرت المدام والاولاد عند اهلها مخصوص عشان اروح اصطاد ولكنهم رفضوا قلتلهم انا كده ولا كده هاطلع وقد اعذر من انذر ،وهنا رد شاب من الشله اسمه عبوده وقالى :انا جاى معاك يا استاذ

انا:ايوه كده يا عبوده انت واد جدع واوعدك يا عبوده هانصطاد سمك كتير بأذن الله

عبوده : بس بشرط يا استاذ

انا مندهشا : خير قول

عبوده: انا عارف وصفه لمكان هايل مليان سمك ولسه عم على الجن جاى من هناك امبارح

انا: مين عم على الجن ده ياد

عبوده : ده شيخ مشايخ طرق الصيادين ده اللى عارف كل المخابئ بيجيب السمكه من التحتوس الجوانى

انا: وفين يابنى التحتوس الجوانى ده

عبوده بثقه وغرور وكبرياء منقطع النظير: انا معايا خريطه يا باشا وهو هايكون معانا على التليفون

انا مغمض نص عينى وفاتح التانيه : ماشى يا ريس عبوده معاك... وجب يا معلم

بس هانروح ازاى؟ مواصلات ولا نأجر عربيه؟

عبوده : لا يا استاذ هاناخد الفسبا بتاعتى

انا : فسبا؟؟؟؟؟؟ هانروح اربعين كيلو بالفسبا ياد ماتتعدل انت عاوزنا نروح بكره ونوصل بعد بكره ومانجيش السنه دى؟؟؟

عبوده اصل الميه اللى هانصطاد فيها يا استاذ العربيه ماتعرفش تروحها لازم نكون خفاف

انا : خلاص فسبا فسبا العمر واحد والرب واحد هى موته ولا اكتر توكلنا على الله انا يالا قوم نشترى الجمبرى( اصل احنا بنصطاد بجمبرى - ماتخافوش جمبرى صغير ب2 جنيه الكيلو)

واحد من الشله: واحنا هانتابعكوا عشان نعرف الاخبار بالموبايل

وطلعنا انا وعبوده وياريتنا ما طلعنا

صلينا الفجر وركبنا انا شايل الشنطه بتاعتى على ضهرى والكولمان فى ايدى( الكولمان ده بنحط فيه تلج عشان لما نصطاد سمك نحطه فيه)وانطلقنا

واول ماطلعنا على الطريق لقينا الشبوره نازله سواد

مش شايف قفا عبوده وابتديت ارتعش من البرد اللى نازل

فقلت لعبوده: واد يا عبوده انت شايف حاجه

عبوده بثقه وهو بيمسك بنزين اكتر: ماتخافش يا استاذ انت راكب مع سواق مش اى حد

انا بحضن عبوده بايدى الفاضيه: طب هدى شويه يا بنى انت احسن الطريق بيلف كتير لانلاقى نفسنا نازلين فى ترعه ولا فى غيط دره

عبوده ضاحكا : خليها على الله يا باشا سلم نفسك

انا يائسا: لا اله الا الله محمد رسول الله

شويه وحسيت بجبهتى منمله قلتله اقف لحظه يا عبوده

عبوده وهو بيقف: خير يا باشا

حسست على دماغى لقيتها زى التلج

اتارى الندى اللى نازل فى الشبوره مع الهوا والسرعه بيتجمد على الراس بيخليك كانك طالع م الفريزر

بصيت على دماغ عبوده لقيته رابط شال على راسه بس خدوده حمراااااااا بقوله مش حاسس بحاجه فى وشك

عبوده بغلاسه: طبعا وشى واجعنى جدا وسنانى كمان

انا :هو فاضل كتير يا عبوده

عبوده بشماته كده : ياااااااااااه هو احانا لسه مشينا

ماطولش عليكوا بعد عناء وتعب وصلنا بعد 3 ساعات من الجليد وفجاه طلعت الشمس حاميه جدا وسيحت الجليد ودخلتنا فيما يشبه الفرن ( مشهى دى عملية البستره؟ التبريد ثم التسخين الفجائى؟)

وصلنا لمكان كده مقطوع وفيه ساقيه خضرا على غيط وبينهم ممر عرضه متر ونص وطبعا ترابى

عبوده قالى استنى بقى هنا عم على الجن قالى اتصل بيه

انا : اتصل ياعم بعم على الجن ده وقله نروح تانى ازاى؟ انا بطلت صيد اساسا

عبوده فى منتهى الحكمه؟ اتك ع الصبر يا باشا

انا : اتك عليه ازاى يا عبوده

عبوده : استنى ايوه يا عم على انا عند الساقيه الخضر اهوه

عبوده يستمع ثم يقول: اه فى ممر ضيق .... ادخل منه؟؟؟؟ كلاب ايه ؟؟ هى فيها كلاب

اه ماشى طول مانا ماشى براحه الكلاب مش هاتجرى ورايا؟؟؟

لحد لما اوصل لساقيه حمرا جنبها بيت اصفر واكلمك؟

طيب بعد اد ايه؟

اوك نص ساعه ماشى يا عم على اوعى تنام وتقفل التليفون

عبوده وهو واثق من نفسه وبيركب الفسبا كالفارس: يالا يا استاذ

انا : كلاب ايه يا عبوده

عبوده: ماتخافش ده بيقولى فى شوية كلاب كده بيقعدوا يهوهوا على الرايح واللى جاى مالهمش لازمه يا استاذ يعنى

مش انت معاك سلاحك؟

انا : تقريبا متلقح فى الشنطه مش فاكر اذا كنت جبته ولا لا

استنى هامسك العود فى ايدى ( السناره يعنى)

وانطلقنا

الممر ضيق على اليمين فى مرتفعات من التراب والطين تكاد تحجب الرؤيه وعلى الشمال فى ترعه ذات جرف عالى جدا يادوب تشوف الترعه وانت فوق

ومشينا بالراحه فى الاول وابتدى عبوده يسوق بسرعه

واذ فجأتن وبدون سابق انذار

لقينا مجموعه من الكلاب هجمت وبمنتهى الافتراس

اتنين من قدامنا ودول مفيش منهم خطوره هاندوسهم بالفسبا عادى

وشويه حلوين كده ييجى خمسه من الجنب من عند رجلى انا وعبوده من على اليمين

ودول اخطر مايكون لانهم هايكلونا من رجلينا ومش هانلحق نعملهم حاجه

زقيت عبوده فى ضهره قلتله اجرى اسرع

ولكن عبوده عمال بيهدى والفسبا بتروح يمين وشمال

وابتدت تميل ناحيه الجرف

وانا عمال اهش فى الكلاب بالعود

والكلاب تزداد هجوما وافتراسا

قررت انط من الفسبا لورا فى نفس اللحظه اللى الفسبا وقعت فيها وقعدت تدور حوالين نفسها

وانا عينى على الكلاب

وماسك العود عمال اهشهم بيه

وفجأه الكلاب هربت لان الفسبا اللى بتلف قربت منهم

وجايه عليا انا فتمنيت الكلاب ترجع احسن من الفسبا اللى هاتموتنى دى المهم طلعت اجرى بضهرى والفسبا ورايا

وفجاه بطلت لوحدها

اخدت نفسى وارتحت وقعدت على الارض

وافتكرت ..........الواد عبوده فين؟؟؟؟؟؟

اتاكل؟؟؟؟؟ اقول لاهله ايه

الكلاب كلته؟

ولا يا عبووووووووووووووده

جالى صوت ضعيف انا هنا يا استاذ الحقنى

انا مذعورا: انت فين

انا تحت فى الجرف بتاع الترعه

انا مندهشا : وده وقته يا عبوده بتعمل ايه تحت

عبوده وصوته بيتقطع: الحقنىىىىىىىىىىىى

بصيت عليه لقيته نايم على بطنه ودماغه ناحية الترعه ورجليه لفوق وغارز ايده فى الطين اللى على شط الترعه وخلاص هاينزل زرع بصل فى الميه

انا مفكراااااااا: طب اعمل ايه؟؟؟؟؟؟

عبوده سكت خالص ولا نفس

انا : ماتشقلب نفسك يابنى انت عاجبك المنظر اللى انت فيه ده؟

عبوده مابيردش خالص

انا : الا مفيش سريخ ابن يومن فى الحته المقطوعه دى؟

هاضطر انزل بقى وامرى لله

وبدات انزل على الجرف واحده واحده واعرز رجلى فى التراب واحاول امسك فى جذوع الشجر لحد لما وصلت لرجله

قلتله ولا يا عبوده انت مش بتنطق ليه قالى بصوت مخنوق: انت مش شامم الريحه؟؟؟

انا بزهق منه : ريحة ايه انت فايق؟

صرخ فيه: ده مصرف مش ترعه يا استاااااااااااااذ

انا فى منتهى الياس: كملت يعنى ماينفعش تقع فى الترعه وانا اللى كنت ناوى اخليك تنزل فى الميه ونطلعك تانى بعد ما اعدلك

عبوده: شدنى من رجلى يا استاذ وانا هامشى بايدى لورا

انا : حاضر وبدات اشده لحد لما طلعنا بعد شويه كتير كده مش عارف اد ايه

واترمينا ع الارض م التعب

وهدومنا شكلها المصرف انضف منها شويه

وفجاه سمعنا صوت هوهوه جاى من بعيد فقمنا جرينا

ورحنا على الفسبا رفعناها هى والشنط و ركبنا عليها ودورناها فى حركه واحده

ووصلنا للساقيه الحمرا

اتصل بقى ياسى عبوده بعمك على الجن ربنا يصرفه عننا النهارده

عبوده : الو يا عم على احنا عند الساقيه الحمرا ......اه يا سيدى فى بيت اصفر اهوه

عبوده ساكت

طيب سلام يا عم على

انا: قالك ايه يا عبوده؟؟؟

عبوده: قاللى ادى ضهرك للساقيه ومشى كده ييجى 100 متر هاتلاقى الميه

اقعد اصطاد هناك بقى

انا : يا مسهل الحال عارف ياد يا عبوده انا حاسس اننا هانرجع بسمك اييييييييييه وشك

عبوده: انا حاسس ان احنا مش هانرجع يا استاذ

انا والميه بدات تظهر : بلاش يأس خليك متفاءل

عبوده: اخيراااااااا

طلع الجمبرى بقى

وفردت العود: واد ياعبوده بص ياد السمك فى الميه اد ايه

لا ده عمك على ده واضح انه جن بجد

ونزلت السناره فى الميه وانا باقول لعبوده اعمل لنا بقى شوية شاى عشان دماغى فيها شنيور

وهوب السناره غمزت وبشد لقيت سمكة مبروكه حوالى نص كيلو

بصيتلها باستغراب

وقلت لعبوده واد يا عبوده ايه اللى جاب المبروكه فى الميه دى ده مش مكانها

لسه مخلصتش الكلمه ولقيت جمع غفير من الناس جايين جرى والدنيا معفره قدامهم

وعبوده جاى ورايا وهو بيرتعش: نعمل ايه ايه يا استاذ نجرى دول شكلهم جايين لنا

انا فى ثقه نجرى ليه يابنى احنا بنسرق؟؟؟؟

ناولنى الشنطه اجيب السلاح منها

يالا بسرعه

عبوده خد:

انا : مش لاقى السلاح الظاهر انى نسيته

طيب بص ياعبوده لما يجوا اوعى تشتم حد فيهم

ماتجيبلناش مصيبه

وهوب ووصل الناسوواحد خد السكه اللى فى السناره ورماها فى الميه تانى ولقيتلكوا طرف بندقيه من مخلفات الحرب العالميه التانيه محطوطه فى مناخيرى

وصوت صاحبها كانه طالع من الترب لسه حالا: انتوا بتعملوا ايه هنا

انا وانا باوسع ماسورة البندقيه فى كبريااااااااء وشموخ: وسع بس البتاعه دى انتوا مين

الراجل: احنا غفر المزرعه

انا : مزرعة ايه

الغفير: مزرعة السمك اللى انتوا قاعدين بتصطادوا عليها دى

انا فى استعباط: هى دى مزرعه؟ ماكنتش اعرف

البندقيه طلعت تانى: ايوه مزرعة مبروكه

والصوت زاد موتا :و يالا من هنا احسن اطخوكوا ومالكوش عندنا ديه

انا : ياعم وسع البتاعه دى انت ماتعرفش انا مين

انا الرائد حسام من مباحث المريوطيه تسمع عنها

الغفير: لا يا بيه

انا فى عنف : نزل البتاعه دى يا نفر انت

الغفير : لامؤاخذه يا بيه انا بانفذ اوامر المستشار صاحب المزرعه

انا : طيب اتفضل

احنا هانمشى

عبوده فى دهشه بعد مامشيوا

الراجل ده صدق انك ظابط ازاى وانتى مربى دقنك كده

انا : مش عارف،بس انا نفسى ناسى حكاية انى مربى دقنى

المهم ده فصل يعمله فينا عمك على يوصف لنا طريق مزرعه؟

عبوده استنى هاتصل بيه

الووووووو ايه يا عم على دى طلعت مزرعه

هاتوصفلنا ميه تانيه فين؟

رحت واخد الموبايل من ايد عبوده: الوووووو ايوه يا عم على نام انت واحنا لما نيجى هانعدى عليك

وقفلت السكه

وبصيت لعبوده وقلتله عارف طريق السكه اللى تروحنا يا عبوده ؟؟؟؟؟؟

عبوده رد قالى ايوه

قلتله من سكات كده تلف وترجع بينا

عبوده: طيب والشله ومنظرنا دول زمانهم مستنين لما نرجع يشوفوا السمك

انا : هانشترى يا عبوده 10 او 20 كيلوا من اقرب سوق

وعاوك تخرس خالص انت وعم على الجن بتاعك ده ولما نروح انا ليا صرفه معاك

وعليه رجعنا بعد ما اشترينا سمك وقراميط ووزعناهم على الشله على اننا اصطدناهم بنفسنا

وادى اخرة اللى يسمع كلام عم على الجن

كان معكم

الدفاع

من مزرعة المبروكه فى برارى الحامول

-كفر الشييخ

للمدونة الضاحكيييين

هناك 28 تعليقًا:

maiosha يقول...

أول تعليق
هيه هيه هيه

حجز بس وراجعة على طول

عبده الرايق يقول...

تااااااااااااااااانى تعليق
انا سمعت ان التانى بياخد الجايزه بتاعه الاول
معلش بقى يا ميوشه
الجايزه ليا انا بحكم المحكمه الاداريه تحت رقم 765438 ملاكى جنوب استراليا

انا لسه هاقراء يا اسامه مش تستعجل
راااااااااااااااااااجع

صبرني يارب يقول...

ايه ده
ههههههههههههههههههههههههههه
على فكره البوست بتاعك جاي فى معاده بالحتتتتتتته

انا جوزي طالع يصطاد يوم الجمعه
وعلى عينى يا اخويا
وللاسف مش هايعرف يوزعني عند ماما عشان انا ساكنه مع ماما فى البيت

وبيطلع مع شله زي نظامكم ده برضه

اخر مره بصراحه كان طالع على حبابي عنيه .ما كنت مسامحه
العربيه عطلت بيهم اول ما طلعوا من المنصوره وباتوا فى الشارع لحد لما النهار طلع دوروا على ميكانيكى صلح العربيه ورجعوا وكان معاه بابا وربنا

اعمااااااااال .

على فكره انا بجد بقى الى باحب اصطاد جدا بس مش صيد نيل

انا باحب اصطاد بحر باموت فى صيد البحر وبالخيط مش بالصناره هيييييييييه كانت ايام .

تحياتي لك وهاخلي جوزي يقرا البوست بالليل يمكن يرجع فى كلامه .

حنين القلب يقول...

انا قولت اعلق الاول وبعدين اقرا
بس باين عليه بوست جامد يا اسامه

عبده الرايق
تسلم ايدك
بجد انت اخونا الكبير
ربنا يطمنا على بابا ابو خالد
انا من 3 ايام وانا عماله اتصل بيه وتليفونه غير متاح ربنا يطمنا عليه ويرجعه لينا بالسلامه

عبده الرايق يقول...

اشطات يا باشا
يعنى فى النهايه اشتريتوا سمك
ههههههههههههه
عارف بقى
انا هاخد الفيسبا بتاعتى واطلع اصطاد
من غير عبود ولا الجن
بس هو كان الجن الاحمر ولا العفريت الازرق

حنين القلب يقول...

ابى الحبيب \ابو خالد
الله اعلم اذا كنت هتقراه التعليق ده ولا لاء
بس انا بعتذر للرايق ولاسامه لان تعليقى خارج عن موضوع البوست
وبعد اذنك يا رايق هاكتب تعليقى لبابا هنا يمكن يقراه ويرد علينا
أبى ابو خالد
يعلم الله واشهد الله انى اعتبرتك أبى عن حق
وانى تذوقت طعم فراق الاب منذ اشهر وحمدت الله عندما عوضنى بك
فهل تريدنى اتذوقه للمرة الثانيه وتبتعد عننا

بص بقى يا سى بابا مهما كان الل حصل فيه اب يسيب اولاده كده
وافتح تليفونك اطمن عليك لحسن وربنا اخلع اشرف وانزلك بور سعيد (اصله مش هيوافق اسافر وانا على ذمته)
يا رب ترجع لينا بالف سلامه

حنين القلب يقول...

ههههههههههههههههههههههههههه
والله العظيم انت مشكله
حد يسمع كلام حد اسمه الجن
تستااااااااااااااااهل يا اسامه
والاخر اشتريت السمك
ما كان من الاول
وعمال تقول انا صياد بريمو
ومش اعرف ايه
والاخر اشتريت
بس بجد بوست جامد
تسلم ايدك يا اسامه باشا

Asmaa mahaba يقول...

ههههههه بالهنا والشفا يا ريس
انا نيتى وحشه شويه من تجاه صاحبك ليكونش مقلب وعمله فيك؟؟
اوعى اوعى تدى الرايق مليم الرقم اللى كتبه دا رقمه فى سجن طره اسالنى انا وفرنسا ما حنا اللى دافعينله الكفاله عشان يخرج من عمليه حنفيات العباره

Asmaa mahaba يقول...

على فكره انت مخدتش بالك ان خالتك سومه جارتكم ونسيت تجيبلى من اللى صحابك اكلوا منه
انت مش عارف انى غلبانه وبجرى على بطيخ
؟؟؟

maha zein يقول...

ههههههههههههههههههه
بقه ده كله يحصل يا رائد حسام
مبروكة
يا شيخ ليه كده
وصف رائع ومتخيلاك وانت علي الفسبا والهوا بيلفحك بقه وايه
ولا الكلاب والجو الغريب ده
بجد بوست فظيع
نقلتلي الاحداث وكانى كنت معاك بالظبط
راااااااااااااااااااااااااائع
وتسلم ايديك
وادي اخرة اللى ينسي سلاحة

الا السلاح كان قطر ولا قصافة ولا ايه؟

الطائر الحزين يقول...

وسع وسع
واللى جعل النبى نبى لأفضح سرك فى العمارة و على جميع الطرق الرئيسية المؤدية الى بيتكم من جميع الطرق وهجرسك بيفط ولا لا يفط الانتخابات يا اسامة يا بن امى وابويا يكنش يا وله السمك ده اللى انت جبته وقعدت نايم بعديه ثلاث ايام فى الحمام بتنضف نفسك

الطائر الحزين يقول...

استاذنا الفاضل اعلم انه مهم لنا عودتكم الى عالم التدوين لكن الأهم أن نطمئن على حضرتك

Empress appy يقول...

يا دى النيله وعمال تقولى انا صياد وانا السندباد البحار وانا زعبوط العفريت هههههههههههههههه
وطلعت بطصطاد من المزارع يا دى الفضيحه ام حناجل
بس انا لو منك اكره الصيد ده لاخر يوم فى عمرى هههههههههههههه

الدفاع يقول...

السلام عليكم جميعا
==============
maiosha
ايه ده انتى بتحجزى كل ده؟؟؟؟؟ هو فى ناس كتير واقفين على الحجز ولا ايه

عبده بك الرايق
===============
طبعا طبعا فى ليك جايزه هابعتلك ديل سمكه من اللى انا باصطادهم
وماشى ياباشا خد الفسبا بتاعتك وروح اصطاد على كيفك ترجع لنا بالسلامه
تحب اقولك على وصفه لمكان حلو زى اللى انا روحته ده؟؟؟؟؟؟؟
يعنى انا عاوز اخدمك او بالاصح اخدم عيلة الرايق كلهم
صبرنى يارب
========
ايه ده هو جوز حضرتك زميل ياريت تبلغيه السلام من صياد قرارى زيه
وبعدين انا لاحظت ان كل ما الواحد يطلع يصطاد ومراته تكون مضايقه من طلوعه بياخد علقه على دماغه انتوا اكيد بتقعدوا على سجادة الصلاه وتدعوا علينا الهى ماتوعوا تصطادوا الهى يرجعكوا واخدين ضربة شمس الهى ترجعوا تعبانين وتناموا فى البيت يجى خمستاشر سنه
فى ايه ماتحلوا عننا شويه مستخسرين فينا نروح نصطاد ونقعد فى الشمس ونرجع ببشره سوده ومهببه
وبعدين مانتى كمان زميله اهوه وبتصطادى بالخيط مع انى اول مره اعرف ان السمك بياكل خيط بس يالا هانعديها

حنين القلب
==========
مش عايزانى اشترى سمك بعد ده كله ده انا كانت فضيحتى تبقى بجلاجل انتى ماتعرفيش شلة الصيد دول عيال متشرده
فى بق كل واحد فيهم ميكروفون لزوم التشريد والصياح وكده
وعلى فكره دى المره الوحيده اللى اشتريت سمك فيها انا لما باقول ياصيد التلاجه عندى بتتملى وما بيبقاش فيها مكان لاى حاجه
سومه
=======
انا بعتلك السمك هو ماوصلش؟؟؟؟؟؟
حاجه غريبه؟؟؟؟؟
لتكونى فكرتى الطبق فاضى اصل مقاس السمك كان صغير انتوا معندكوش ميكرسكوب ولا ايه؟؟؟؟
وصاحبى مش عاملى مقلب ولا حاجه ده هو اللى خد مقلب لما كان هايتزرع فى الترعه براسه
ماتخافيش احنا جامدين قوىىىىىى

مها زين
=======
شامم ريحة شماته كده ممزوجه بسيل من السخريه
بكره اعمل رحلة صيد واخد كل عيلة الرايق معايا وافرجكوا بقى ع السمك وابقوا عدوا السمك اللى طالع مش هاتلاحقوا
ومتساليش عن نوع السلاح ؟؟؟؟؟
هو عموما مش قطر لااااااااا ده حرب الخليج كلها ههههههههههه

اخى الطائر
==========
ياعم وليه الجرسه ده انتوا ياما كلتوا من السمك اللى باصطاده
ومتخافش المره اللى انت بتحكى عليها دى كنت صايد السمك بجد
انما المره دى انا اساسا وزعت السمك اللى اشتريته على شلة الصيد اللى استنونا على الطريق وكل واحد جايب شوال يعبى فيه نصيبه من السمك
ماتخافش على اخوك احنا صايدين قدام جداااااا من يوم ما السناره دخلت فى ايدى وانا مابطلتش اصطاد فاكر طبعااااا
appy
=======
امال بقى لو كنت حكيت كل اللى حصل ده انا اختصرت الحكايه علشان بس البوست مايبقاش طويل عليكوا
ده احنا يومها مشينا ورا الجن لحد لما روحنا اماكن مكنتش اتخيل انها موجوده
وبعدين ايه زعبوط العفريت دى؟؟؟؟
انا قلتلك انا زعبوط العفريت
اسمها نبوت الغفير
وقال اكره الصيد قال؟؟؟؟ظ
يابنتى انا لو بطلت صيد اروح فيها
دى اقل حاجه حصلتلى
وبرضه مش باحرم
تحياتى للجميع وكل سنه وانتوا طيبين

همس الاحباب يقول...

ههههه
هههههههه
يا عينى يا عينى
ونعم الصيد بصراحة
وكان ايه لزمتها البهدلة
ما كان من الاول نشترى السمك
ويا ترى السمك كان مشوى ولا مقلى
والطحينة كان طعمها ايه
مالو صيد الترع يا عماهو سمك برده
بس قولى بجد هو السمك راح فين
بقى كله مزارع .

احمد اشرف يقول...

هههههههههههههههههههههه
كل ده علشان كام كيلو سمك
صحيح الصيد بيعلم الصبررررررررر

مهرة سالم يقول...

هو في حد عاقل يلحق كلام الجن...
الحمدلله على سلامتكم وكل رحلت صيد وانتو طيبين..

صبرني يارب يقول...

تعديل هام يا سيدى

بعد ما الحكومه العليا تبعنا قرى الموضوع وقرى التعليق

اعترض وقال انهم يوم ما العربيه باظت كملوا لحد زيان وقعدوا هناك واصطادوا
انا مش فاكره بصراحه.
بس هو قال كده

ثانيا ايه بقى حكاية السمك بياكل خيط دي
انا باصطاد بخيط يعنى من غير عود
انما بصنانير وتقال عشان صيد بحر مش نيل وطعم عادي جمبري برضه او حبار

الا رضا بيقولك انت منين ياعم عندكم سمك كتير نيجى عندكم يوم الجمعه

بافكر ارخم واروح معاه

Beram ElMasry يقول...

السلام عليكم ورحمة الله
يرى الاخ الكريم الدكتور/ توكل مسعود ، صاحب المدونة
http://belawa6an.blogspot.com/
انطلافا من فلب طاهر ونفس صافية واعتمادا على ثقافته الواسعة ، يرى تغير اسم مدونتى
http://elmedahwel.blogspot.com/
المدهول ، غيرة منه على اسماء اخوانه فى مقال رائع ، ارجو مشاركته فى تجربته الرائدة ، واختيار اسم جديد يتناسب وطبيعة المدونة ، كما ارجو ان تدو غيرك للمشارة
والسلام
ما المانع من معلودة الزيارة

الدفاع يقول...

همس الاحباب
========
السمك اللى اشتريناه كان طازه طلع من الميه يادوب وجاهز من كله مع الرز بتاعه وسلطاته وطحينته وبابا غنوجه وكل حاجه
اما بقى حكاية المزارع فهى كترت لانها بقت مشروع تجارى منتشر والسمك البحارى قل علشان المبيدات اللى بتموت السمك ده فى الميه العذبه وكمان فى نوعين سمك متهجنين كانوا جايبنهم علشان ياكلوا ورد النيل وخلصوا على السمك الصغير فبقى نادر انك تلاقى سمك فى الميه العذبه
احمد اشرف
========
ايه ياعم مش عاجبك الصبر ولا ايه؟؟؟؟
امال لو كنت حكيت كل اللى حصل كنت قلت ايه
ايه رايك تيجى معانا؟؟؟؟

m.k
===
مش عاجبك الجن؟؟؟؟؟ طب وطى صوتك لا يسمعك
هههههه

صبرنى يارب
========
مانا عارف صيد الخيط بس بهزر
وكده تظلمى الحكومه؟؟؟؟
وبعدين هو جاى يطلع بعد ما الموسم خلاص بيودع؟
عموما انا باصطاد غالبا على خط بلطيم وكفر الشيخ فى اماكن هناك بنصطاد بيها بالجمبرى بس مش عارف هايكون الوضع ايه اليومين دول اعتقد انها معروفه بالنسبه لزوج حضرتك بما انه صياد ومن المنصوره ولو عايز يروح دلوقتى يعمل حسابه ان ممكن ماتبقاش الرحله مفيده قوى
لان الموسم ودع خلاص
تحياتى

فرنسا هانم يقول...

ههههههههه
تدوينه حلوه يا اسامه
وعلى راى عبود اتك على الصبر
وبعدين مفيش جمبرى ب 2 جنيه للكيلو
ولا ده بتاع الميكرسكوب
تحياتى الغاليه لك يا اسامه وتسلم ايدك
وبلاش تطلع تانى مع عبووووووووووووود

فرنسا هانم يقول...

الى خالد همس الاحباب
ارجو توصيل سلامى وتحياتى للاخ الجليل ابو خالد

صبرني يارب يقول...

فرنسسسسسسسسسسااااااااااااا

نورتي يا جميل ايه ده مش تقولولي يا ولاد

صبرني يارب يقول...

الدفاع

اصل انا جوزي بيطلع عشان عايز يصطاد بس حكاية المواسم دي انا مااعرفهاش مش عارفه هو عارفها ولا لا

بس عارف حضرتك انا باحب بلطيم جدا
السنه الى فاتت انا كنت هناك ولاني باحب صيد البحر قوم يوما بقى قلت انا لاااازم انزل اصطاد وصحيت رضا عنوه الساعه 4 فجرا ونزلنا

طبعا قدام البيت عشان ما ابعدش عن العيال لو في حاجه

وطبعا ما جبناش ولا سمكه ولا حتى سمكه عدت علينا قالت لنا عواف
بعد ساعه كده بدأت الشمس تطلع وانا قعدت اصور الشروق بجميع مراحله كان حلو اوي

ولمينا الصناره وقعدنا ننام على نفسنا شويه وروحنا نجر اذيال الخيبه .
ههههههههههههههههههه
رحله سعيده صح ؟

ابقى قولي بتصطاد فين فى بلطيم والمواسم والحركات دي كلها عشان انا هاقطع الدنيا بس الصيف الجاي وعليك خير بقى لما نروح المصيف
تحياتي لك

همس الاحباب يقول...

فرنسا هانم
علم وجارى التنفيذ

الدفاع يقول...

فرنسا هانم
============
الاول بس موضوع ابو خالد استاذنا الفاضل
انا شخصيا معرفش عنه غير من كلامكوا عليه ولكن انا عندى اقتراح ياريت تتم الموافقه عليه لو امكن اننا نعمله وهو اننا نجهز مجموعه مننا ونتوجه لبيته ايا ما كان هو فين ونطمن عليه ونشوف الحكايه ايه ونطلب منه انه يرجع تانى
واتمنى انه يكون فى خير وربنا يطمنا جميعا عليه

نرجع بقى للجمبرى
الجمبرى مش باتنين جنيه ده بجنيه ونص وبنجيبه صاحى كمان تحبى اجيبلك؟؟؟؟؟
اه افتكرت ده مش الكيلو ده احنا بنملا كيس كبير كده وندفع جنيه ونص
وبناخده من على المركب فى البرلس فى بلطيم
ابقى تعالى معانا اشترى جمبرى وارجعى ينفع يتعمل عليه شوربه انما ايه ولا كلمه وهاتلاقيه لسه صاحى فى الشوربه
تحياتى ليكى

صبرنى يارب
========
شوفى بقى ياستى انا عادة مش بصطاد فى المالح بس ده مايمنعش انى اصدت فيه واكتر مكان اصطدت فيه فى جمصه على اللسان عند مصب الميه العذبه وبنطلع من هناك قاروس وبورى وده بيكون فى الصيف ومجربتش فى الشتا
اما فى بلطيم فاحنا بنصطاد فى بحيرة البرلس ودى متشعبه جدا وبيطلع منها ترع كتير ومختلطه مع روافد كتير منها ميه عذبه ومنها ميه مالحه من ملوحة البحيره وبنصطاد منها من اول شهر مارس او ابريل لحد شهر اغسطس او سبتمبر اما الميه العذبه اللى هناك فاحنا بنصطاد فيها بالغله ودى بتبدأ من اول شهر 6 لحد شهر 9 وفى اماكن كتير جدا ومتاهات
عارفه فيلم الكيف فاكره لما جميل راتب كان واخد المركب وماشى فيه وسط البوص؟ وبيقول انتوا مهلبين فين؟ والتانى بيقوله فى التحتوس الجوانى؟ اهى هى دى بحيرة البرلس
والصيادين بيقولوا عليها السكنى بضم السين
انما بصراحه مارحتش فى الشتا علشان لو الدنيا مطرت واحنا جوه مش هانطلع نهائيا
اما البحر فى بلطيم فانا مجربتوش فى الصيد نهائيا
وتمنياتى بصيد موفق فى الموسم ان شاء الله
اه احنا فى الشتا بنصطاد بالليل على الميه العذبه فى فروع النيل
علشان تعابين السمك بتيجى الميه العذبه فى الشتا وافضل اوقات صيدها بالليل
تحياتى

الدفاع يقول...

صبرنى يارب
========
اذيال الخيبه اللى انتوا جرتوها دى حلوه كلنا بنطلعها دى اجمل واتقل سمكه ممكن تتطليعها بس للاسف طعمها مر قوىىىىىىىىىى
ههههههههههه
تحياتى ليكى ولزميلنا فى الصيد الاستاذ رضا

صبرني يارب يقول...

حلو اوي اوي الدرس ده احفظه انا ازاي دلوقتي
ههههههههههههههههههه

لا انا باعترف ان احنا ماعندناش الخبره دي
وده لان رضا ممكن يطلع مره فى السنه بالعاااااافيه رضا ما بيفضاش خالص وكل الى يسمع انه راح يصطاد يستغرب انه لسه عنده نفس يعنى

بس هو راح النهارده ومعاه بابا وجابولنا يجي 6 كيلوا سمك بلطي بس اييييييييه كبير بشكل ما اقولكش عليه
ههههههههههههههههه
يعنى قول فيهم كده يجي 3 كيلوا سمك من الى بيعيط على امه
اه الى هو لسه ما اتفطمش ده

تحياتي لك ولما اجي اروح بلطيم السنه الجايه ناخد منك الخريطه المفصله بقى
اصل انا باموت فى بلطيم بس ما روحتهاش كتير للاسف