الاثنين، فبراير 09، 2009

السلطانيه

كان يكره الحمقى والمغفلين .. وكان يدعو الله دائما ويقول : يا رب أتجوز واحدة طيبة وبنت حلال ما تكونش زى هناء الهبلة بنت أم وطنية جارتنا ..
وذات يوم أيقظته أمه من نومه .. قوم يا وله لقيتلك العروسة ..
بجد والنبي يا امه .. هي مين ؟
بت زي القمر وهادية وساكته وعايزة تعيش وكفاءة ..
عز الطلب يا امه أنا عايزها هادية وساكتة انأ ما بحبش اللت والعجن .. وشافها وأعجبته واتفقوا على المهر والشبكة والذي منه .. وتم الزواج .. ولكن لم يكن هدوء وسكوت ستوتة ( دا اسمها ) إلا نذير لشيء كان يخشاه صاحبنا ولا يتمناه .. ولكن اللي يخاف من العفريت يطلع له .. وبدأت تظهر ملامح العته على ستوتة وفي يوم قالت لصاحبنا : لو جت عاشورا مع رمضان نصوم يوم عاشورا بعد العيد ؟ قالها : يا ستوتة رمضان ما يجيش ابدا مع عاشورا !!! قالتله : أنا مش ستوتة .. أنا غيرت اسمي .. أنا اسمي رشا واللي يقولي يا ستوتة مش ها أعبره .. قالها: ليه بس دا ستوتة اسم كله دلع !! وفي يوم عاد من عمله وطرق الباب .. افتحي يا ستوتة .. قالت من خلف الباب : هو الراجل أتجنن ولا إيه .. خلي ستوتة تعبرك بقى .. يا ستوتة افتحي .. والنبي لما تدن .. وخرج صاحبنا هاربا لينفد بجلده من االمغفلة .. وسافر لبلاد الله وخلق الله واستقر في قرية من القرى .. وقرر الزواج وأعجب بإحدى البنات وخطبها ويوم الخطوبة وفجأة تحولت ابتسامة البنت إلى ذهول وسرحان وقالت : يعني ها أتجوز واخلف والواد مقصوف الرقبة يكبر ويخرج يلعب في الشارع ويطلع النخلة اللي قدام البيت ويقع ويموت .. يا لهو بالي .. يا خرابي .. ياروح قلب امك يا حبيبي....... وتلطم ويشتد لطمها .. وتسايرها امها تلطم وتشلشل وتندب قائلة : يا خرابي يا خويا .. يا حبيب ستك يا ضنايا .. ما كانش يومك يا كبدي .. واذا بأبوها يقول مش قلتلك خلي بالك من الواد وما تسيبيهوش يلعب في الشارع .. وهنا أدرك صاحبنا انه وقع في بيت من المغفلين فغافلهم وفر بجلده ..
وبلاد تشيله وبلاد تهبده .. وقادته قدماه لقرية أخرى .. وإذا بمجموعة من البنات يغسلن أقدامهن في ماء الترعة ويصرخن ويقولن ياعم الحقنا والنبي .. فيه ايه يا بت انتي وهي ؟ رجولنا اتلخفنت مع بعض في الميه وكل واحدة مش عارفة رجليها .. شوفلنا حل والنبي ياعم .. فأمسك بعصا وأخذ يضربهن .. فخرجن مسرعات من المياه يشكرنه .. فندب حظه يارب انا بتكعبل في البنات الهبلة ليه بس .. أهرب من واحدة هابلة أقع في بلد كل بناتها هبل .. انا ماليش عيش في البلد دي كمان ..
والمرة دي اتهبد في بلد ترفع الزينات والزغاريد تجلجل والنقرزان يضرب .. قال بشرة خير .. وسأل أول من قابله فقال له : ابن العمدة ها يتجوز النهاردة .. ولكن العمدة لم يكن مسرورا وتؤرقه مشكلة ما .. وتعرف إلى العمدة وقال له : إيه المشكلة يا عمدة يمكن اقدر أحلها .. قال العمدة : سلو بلدنا يا بني إن الولاد ما بيلبسوش سراويل داخلية أبدا إلا يوم جوازهم .. قال : وإيه المشكلة ما يلبس سروال .. قال العمدة : ما بيعرفش .. قال : أي حد تاني يلبسهوله .. قال العمدة : ما حدش بيعرف في البلد الا طريقة واحدة .. انه الواد يطلع على السطح وينط في السروال اللي ماسكه اربع رجالة واقفين تحت .. وانا خايف يقع تتكسر رقبته زي اللي قبله واللي مات منهم كتير .. قال : ولا يهمك يا عمدة انا ها البسهوله من غير ما يجراله حاجة .. قال العمدة : بجد والله لو عملتها ليك عندي مكافأة كبيرة قوي .. قال : هاتوا السروال والعريس .. تعال يا ابني دخل رجلك اليمين .. يلا ورجلك الشمال .. وارفع السروال لفوق .. وارتدى العريس السروال .. وهاجت القرية وماجت .. زغاريد وصفافير وتصفيق شديد .. فقد اكتشفوا طريقة حديثة للبس السراويل .. وهنا قال العمدة لصاحبنا : دلوقتي اقدر اخلع عليك .. وهنا تذكر صاحبنا مرزوق العتقي والسلطانية .. فشهق وقال :ايه ؟ قال العمدة: اخلع عليك عبايتي وأجوزك بنتي ..
********************
مع خالص شكرى للجميع
.
مدونه جنى

هناك 41 تعليقًا:

Ahmed يقول...

ههههههههههههههه
صحيح قليل البخت يلاقي الهبله مطرح مايروح

فرنسا هانم يقول...

ههههههههه
مع انى قريتها فى اميلك ليا يا سعيد
وقريتها كذا مره فى الدرافت
الا انى برضه فطست على نفسى من الضحك على صاحبنا اللى اخترع اختراع الجيل ولا كل جيل
النط جوه البنطالون
هههههههههههههه
تسلم ايدك يا جنى

جنّي يقول...

السلام عليكم

الحمد لله انها نالت اعجابكم واتمنى ان تعجب باقي القراء .. لعلنا نرسم بسمة على الشفاه في وقت تاهت فيه البسمات ..

أخوكم سعيد

الفراغ يقول...

والله تاهت الضحكات
جزاك الله خيرا عنا
تسلم ايدك جنى

غير معرف يقول...

ههههههههههههههههههه
يخرب بيت الفقر
أنا معرفتش أمسك نفسى
كله إلا حكاية السروال دى
هههههههههههههههههههههه
تسلم يا جنى

maiosha يقول...

هههههههههههههههه
الله ايه البلد الجميلة دى؟؟ ده الواحد يروح هناك يبقى أينشتاين
هههههههههههههههههه

بس فعلا دى طلعت ألعن من السلطانية

بجد تسلم إيديك .. بوست جميل جدا

الطائر الحزين يقول...

ناهيك عن البسمة فى القصة لكن لها معنى خفى خلف الصورة (معظم الناس يهمها القشور و يبعدوا عن الجوهر)
جميل يا باشا

عبده الرايق يقول...

الله الله يا سعيد
هههههههههه
عارفها البلد دى
الدكاتره الكبير عبده باشا الرايق عارف البلد دى عز المعرفه
هى فى قاره من قارات العالم ال 19
وكان بيحكمها حاكم ملعون اسمه بوش
صح كلامى ولا مش صح ؟؟؟
على فكره يا سعيد احييك على حسك وروحك الكوميديه
والقصه ممتازه
وزى ما قال الطائر الحزين
ليها بين السطور معانى كتيره

عبده الرايق يقول...

حنين القلب
الف مليون مليار بليون خمسمائه سلامه ليكى

جنّي يقول...

اهلا اهلا بحبايبي الحلوين ..
والله انا في منتهى السعادة ان البوست اضحككم واشكركم جميعا على تعليقاتكم الرقيقة الجميلة ..

°°°°°°°°°°°°°°°°°°°°°°°

Eng. Ahmed Abo El-Ella
اشكر ك وانا سامع من هنا ضحكتك اللي بتجلجل ..


°°°°°°°°°°°°°°°°°°°°°°
فرنسا هانم ...

بالطبع انا عاجز عن الشكر للمساتك الرقيقة التي اضفت على البوست جمالا ..
ربنا يبارك فيكي ويسعدك دايما

°°°°°°°°°°°°°°°°°°°°

الفراغ

وتسلم ايدك يا فندم
وانا سعيد انك سعيد


°°°°°°°°°°°°°°°°°°
انا ودماغي ....

ويخرب بيت اليهود كمان
ربنا يضحكك كمان وكمان


°°°°°°°°°°°°°°°°°°°°
maiosha ...

ربنا يعزك وتسلم ايدك ..

ولو عايزين تروحوا البلد دي القطر بكرة هايطلع سبعة الا خمسة ..

°°°°°°°°°°°°°°°°°°°

الطائر الحزين ...

يا استاذنا من بعض ما عندكم ..
وانت الاجمل اخونا الكريم ..
بس ممكن تقولي المعنى اللي خلف الصورة ومش ها اقول لحد .. اصلي فضلت ابص خلف الصورة علشان الاقي حاجة وما لقيتش .. وبعدين اتضحلي ان مافيش صورة .. الظاهر اني اتعديت من بنات الحكاية .. ما تاخدش في بالك داني بضحك معاك ..

جنّي يقول...

م الحسيني اللزومي ...

شكرا على دعوتكم تم الاطلاع وربنا يستر على اهالينا في غزة العملاء بقم كتير قوي ..

°°°°°°°°°°°°°°°°°°

عبده الرايق ..

اهلا بعمنا الكبير ..
بالله عليك عرفهالي نفسي اروحها ..
وبعدين انا اقدر اكسر كلامك دا صح ونص كمان ..

اشكرك يا سيدي وشهادتك شرف لي .. وبعدين ها نيجي فين جنب العمالقة ..

°°°°°°°°°°°°°°°°°°

عبده الرايق تاني مرة ...

وانا معاك بقول لحنين سلامتك الف سلامة ..

وشفاكي الله وعافاكي

نبض الحياة يقول...

جميلة جدا ماشاء الله . ربنا يبارك فيك

عالم حبيب يقول...

ههههههه ايه الحكم دي

غير معرف يقول...

جزاكم الله عنا خير
مدونتكم ممتازه جدا
ربنا يبارك فيكم

رابطة هويتي اسلامية يقول...

الحجاب حقيقة ثابتة أم مجال للتفكير

من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
ومن هنا تبنت الرابطة أن تكون هي حجة علي من يدور بينهم النقاش علي صفحاتها.
نفجر الجديد دائما حوارنا اليوم
الحجاب حقيقة ثابتة أم مجال للتفكير
وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
ندعوكم للمشاركة في هذا الحوار المفيد
تقبلوا دعوتنا ننتظركم لنستفاد منكم
رابطة هويتي إسلامية

مصطفي زهران يقول...

جامده جداااااااااااااااااااالمدونه هي اول زياره سمحوني

همس الاحباب يقول...

هههههههههه
ههههههه

ايه ده يا عمونا
هو الراجل ده حظه مهبب كده ليه
وفى الاخر هيتجوز بنت العمدة
علشان لبس اخوها السروال
فعلا بلد هبلة بصحيح
ههههههههه
تسلم ايديك استاذ سعيد
القصة ظريفة وليها معنى
تحياتى

همس الاحباب يقول...

الى عائلة الرايق
اسف جدا لانشغالى الفترة الماضية عن المدونة بس ظروف العمل اولا
والحالة النفسية ثانيا
وبعدين انا جيت ومش شايف زغاريد ولا اى حاجة ايه يا فرنسا مفيش حمدلله على السلامة
الرايق ما فيش خروف ولا حتى جوز حمام على باب المدونة
ولا اقولك ايه رايك ادبح البنت حنين اهو نستريح من زنها شويتين
حسسونى انه فى احتفال برجوعى ولا حاجة

همس الاحباب يقول...

فرنسا هانم
ههههههه
الف حمد لله على سلامة حنين
انتى متعرفيش انها تكسرت وفكت الجبس كمااااان بس لسانها لسه طويل

Jana يقول...

ههههههههههههههههههههه
مالها رشا ...مش كانت ارحم من كريمة آل سروال

حقيقة يا استاذ سعيد تتميز فى كل الوان الكتابة
فتعرف كيف تبكينا وكيف تضحكنا
أدام الله عليك حكمتك وخفة ظلك
خالص تحياتى

اسمحلى انقل سلامى وتحياتى الى فرنسا الجميلة واستاذ الرايق

جنّي يقول...

نبض الحياة

شكرا لتعليقكم وثنائكم على البوست

وبارك الله فيكم واعزكم

ــــــــــــــــــ

عالم حبيب

شكرا يا عم حبيب لزيارتك وتعليقك

ربنا يخليك يارب

_________________


غير معرف

اهلا بيك يا افندم

وجزاكم الخير كله

وربنا يبارك فيك ويعزك


______________________

رابطة هويتي اسلامية

شكرا لحضورك ودعوتك

_________________________

مصطفى زهران

اهلا يا درش شرفتنا يا صفصف

_________________________

همس الاحباب

اهلا يا خلود كويس اني شفتك هنا واطمنت عليك .. وازي همس سلامنا ليها ..
اهو هنا زي عندي في جني المهم نشوفك ..

وشكرا على تعليقك الجميل المهم انك خرجت من الحالة النفسية والحمد لله ..

وبعدين يا عم خالد محدش منهم سائل سايبين الضيافة علي وانا ها اتدبس بس ولا يهمك خلي الدبح علي .. بس بلاش حنين انا قلبي رهيف وما اقدرش ..

وعندك واحد كابتشينو بوسطة وصلح المطلوب ..

___________________________

Jana

اهلا اختنا الكريمة ام جنى

على قولك من شاف بنت العمدة هانت عليه رشا ..

شكرا يا افندم دا من زوقك والله

وسلامك وصل بالفعل لفرنسا والرايق

الرابطة وبناء الأمة يقول...

السلام عليكم ورحمة الله وبركاته
دعوة
أخي يا من رفضت سياسة مبارك عليك أن تكمل معنا الطريق حتي لا تكون دعواك دعوة إفتراء دون إثبات
دعوي مرفوعة ضد مبارك بنص ".........................."
أول جلسة
نتمني منك أخي المدون الحضور للجلسة
مع تحياتنا لك بالتوفيق
الكتيبة السياسية

فرنسا هانم يقول...

همس الاحباب
اهلا واسهلا بابنى العزيز خالد
تصدق والله واحشنى جدا
وانا بعت سلام ليك مع البوسطجى بتاعنى الدكاتره الفالصو طبعا عارفه
انا سعيده جدا برجوعك ومعاوده نشاطك
وعلى فكره
فى حاجات جديده فى الدرافت ياريت تطلع عليها وتشارك فيها
الف بوسه لهمس حبيبتى

فرنسا هانم يقول...

جنى
لا يا سعيد احنا مش سايبينك لوحدك
لا البوست ممتاز
وانت عريس الليله
وانت صاحب المدونه
وزى المثل البلدى ما بيقول
الليله ليلتك يا معلم
وده اسلوب المدونه .. يقوم صاحب البوست بالرد على الجميع حتى اعضاء فريق العمل لان كل التعليقات توجه له هو
واحنا معاك يا جنى
ومش سايبينك
وبلاش يا خالد توقع بينا احسن اعلقك على باب زويله
تحياتى للجميع
ومبروك على البوست يا سعيد وفى انتظار الجديد دائما منك

غير معرف يقول...

انا شيماء
البوست ده يجنن
هههههههههههه
ههههههههههههه
ولا العروسه اللى بتحلم بمشاكل ابنها قبل ما تتجوز
ههههههههههه
شكرا جنى
شكرا الضاحكون

فرنسا هانم يقول...

Jana
حبيبتى الغاليه
الف سلامه والف بوسه ليكى من فرنسا هانم
انا بجد فرحت جدا بسلامك
ولو ان كلمه فرنسا الجميله هتغيظ ناس كتيييييير
موت بغيظك يا رايق

جنّي يقول...

الرابطة وبناء الأمة

اهلا بيك بالزمة دا كلام لازم تفكرنا باللي اسمه يعكنن علينا ..

تعالى في جنّي احسن علشان اعرف ارد عليك واجلجل براحتي دا انا مرارتي مفقوعة منه ..

______________________


فرنسا هانم

انا عارف والله يا ست فرنسا بس أني كنت بضحك مع خالد ..

ما توقعنيش في الغلط انا ما اقدرش على زعلك والله

وعارف انكم معايا بتراقبوني علشان دا اول بوست لي في المدونة زي الام ما بتراقب ابنها عندما يبدأ اول خطوات المشي ..
والحمد لله ان البوست عاجبكم وربنا يبارك فيكي .. دا بفضل الله ثم جهودكم ..

وان شاء الله هناك الجديد بس سامحيني لاني مسافر لقضاء اجازة نصف العام مع اولادي وراجع ان شاء الله خلال اسبوعين وقد ارسل البوست الجديد خلال الاجازة ..

___________________________

شيماء

اكيد شيماء سمير

اهلا بيكي وشكرا على تعليقك

وشكرك وصل للضاحكون ..

همس الاحباب يقول...

فرنسا هانم
الله يسلم حضرتك
والزغروطة وصلت
وبصراحة البوسطجى وصلنى السلام
شكرا لساعى البريد
ههههههه
وانا دخلت وشوفت الدرافت
وعجبنى قوى الموضوع
وانا سجلت حاجة بسيطة فى الدرافت يارب تعجبكم

همس الاحباب يقول...

عريس الليلة
عمونا سعيد
لا يا عم انا مصمم على دبح حنين
ومش بشرب كابتشينو انا مفطوم على الدم
علشان كده هدبح البنت حنين واشرب من دمها
يس المهم حد يمسك معايا احسن البنت دى مفترية وايدها طرشة

عبده الرايق يقول...

Jana
شكرا لكى على السلام
ولو ان فرنسا طمعت فى السلام كله ووصلنى ربع السلام بس
هاعمل ايه فى الطمع بتاعها
ربنا يبارك لنا فيكى وشكرا مره تانيه

عبده الرايق يقول...

فين البنت حنين يا بشر
ياولاااااااااد الحلال
بنت تايهه طول كده
فى مناخيرها الشمال فيها شمامه زى ده
انت فين ياااااااااجهاد
قصدى انتى فين يا سلامه
قصدى انتى فين ياااااحنين

عبده الرايق يقول...

جنى
ايوه يا عم اضحك علينا اضحك
اجازه نص السنه خلصت وانت لسه هتسافر
عموما لو مسافر انا مستنى الهدايا
ترجع لنا بالسلامه يا سعيد

جنّي يقول...

عبده الرايق

اهلا يا ابو الروق ..
فينك لا أسكت الله لك حسا ..

دا كلام يا عوبد انا اقدر اضحك عليكم برضه .. انا باضحك معاكم مع الضاحكون ..

انا خارج مصر والاجازة عندنا ها تبدأ نهاية الاسبوع الحالي ولاني عزبنجي ها اسافر لأقضي الاجازة مع اسرتي يعني جايلك يا مصر ومن عنيا الهدايا انت تؤمر امر وربنا يسلمك يارب انت وكل اسرة الضاحكون ..

بيانو يا مفتري !!!
طيب اشتري لام حسن كمانجة تبقى لايقة شوية !!!

سلام

غير معرف يقول...

مساء النور
ياخبر يا استاذ الواد ده قليل الحظ و الا منحوس
في كل مرة بيطيح في مطب انيل من الي ابلوا
ضحكتنا يا عم متشكر
دعوة للتواصل
مودتي

عبده الرايق يقول...

جنى
ههههههههههههه
بيانو بتاع ام حسين ؟؟
هههههههههه
انا مبسوط ان البوست بتاع ام حسين عجبك
على فكره
الضاحكون واخدانى من مدونتى جدا

عبده الرايق يقول...

جنى
معلشى نسيت حاجه
تيجى بالسلامه لبلدك الغالى مصر
والهديه لازم تكون على مستوى عالى
تليق بالدكاتره عبده الرايق
يعنى مش اقل مسدس خرز

أميرة الجنة يقول...

الف مبرووووووووووووووووووووووووووووووووك
ربنا معاه
بس بجد مدونة تحفة وروعة
تقبلوا تحياتى ايها الضاحكون

الضاحكون يقول...

اعزائنا زوار المدونه
نرجو ان نكون دائما عند حسن ظنكم بنا
ويسعدنا دائما العمل بجد على محاوله اسعادكم
فريق العمل

الضاحكون يقول...

جنى
شكرا جزيلا لك على هذا البوست الرائع
ونتمنى ان تكون دائما متواجدنا ببوستاتك الجيده معنا
مع خالص دعائنا للجميع
فريق العمل
بمدونه الضاحكون

الحرامي يقول...

فرنسسسسسسسسسسسسسسسسسسسسسسا

انا سرقت البت الخيخه
هيييييييييييييييييييييييييه

غير معرف يقول...

السلام عليكم

احبتي اسرة الضاحكون

سعت جدا لتواجدي معكم وان شاء الله يستمر التواصل واقدم شكري وتحيتي وتقديري لاختنا فرنسا وحبيبنا عبده باشا الرايق وكل اسرة الضاحكون والى كل من شرفنا تواجده وتغليقه ..