الجمعة، نوفمبر 28، 2008

جغرافيا زمان ... فى برطمان

هااااااا ى ايفرى بدى
اخوكم العلامه الكبير الدكاتره عبده الرايق وقع فى مطب ... نجانى منه ربنا سبحانه وتعالى
طبعا الفتره اللى فاتت كنت بعانى من العصب السابع فى الناحيه اليمين من الوجه ..ووقفت حركات الحاجب اليمين والعين اليمين والودن اليمين وفرده المناخير اليمين والخد اليمين ... يعنى كل الصواميل بتاعه الناحيه اليمين كانت مفوته
وطبعا كان خروجى قليل
وانا من صغرى وانا مش بحب بتاتا الدروس الخصوصيه ..وبذاكر لاولادى ومش بياخدوا دروس نهائى
مره كنت بذاكر للمدعو محمد الرايق ابنى .وهو دلوقتى فى اولى اعدادى وكنت بذاكر له درس الجغرافيا بتاع الكواكب
وفوجئت انهم عملوا تقلص لعدد الكوكب بقوا 8 كواكب بدلا من تسعه
طبعا انا كنت فاكر النقص ده علشان الغلاء والضرايب .وكده وحركات
طلع ان المقروص فى مصارينه وفى نواضره بلوتو قمر ... المضروب ده كان بيستغفلنا طول المده دى وهو قمر مش كوكب ..صحيح يا ناس كواكب ناقصه تربيه ...
المهم يا ساده الموقف اللى حصل بعد كده
بعد ما ضربت الغداء ومليت بطنى كويس رغم انف دكتور السكر ودكتور الاعصاب . لبست المريله وجهزت القلم الرصاص والاستيكه وناديت على الاولاد .. وكان دور محمد فى المذاكره ... قلت له وانا كلى براءه .. ها يا محمد هنذاكر ايه انهارده ؟؟؟
قالى انا اخدت درس الفصول الاربعه فى الدراسات ومش فاهمه ... وراح الولد الله يستره جايب الكتاب وجه .. وكان فاتحه على الدرس بتاع الفصول اربعه
انا طبعا بكل غرور وكبرياء وتعالى قفلت الكتاب وانجعصت كده ولا اكنى احمد زويل عالم الفلك الكبير ذات نفسه .. وبدءت اشرح
شوف يابنى احنا قبل كده قلنا ان الكواكب تدور حول الشمس فى مدارات بيضاويه .. وده بيخلى ناحيه تبقى قريبه من الشمس وتخلى الجو صيف لان الشكل البيضاوى فيه ناحيتين قريبين من الشمس وناحيتين بعيد عن الشمس يعنى لما الارض بتقرب يبقى صيف ولما بتبعد يبقى شتاء
بصيت للواد الشرير الشقى محمد باشا الرايق لقيته سرحان وبيبص لحواجبى وانا بتكلم . لان فى حاجب بيتحرك والتانى فى بيات شتوى بفعل العصب السابع نجاكم الله
قلت للولد . خليك معايا يا محمد ما تسرحشى ... الولد بص لى وقال . يبقى يا بابا كده هيبقى عندنا اتنين صيف واتنين شتاء ومفيش ربيع ولا خريف
طبعا انا بصراحه اتكتمت وسكت , وخصوصا لما الولد قال الكلام ده وفتح الكتاب على الصفحه بتاعه الدرس .. وبصراحه لقيت الولد عنده حق
هنا بقى اشتغلت العبقريه الدكاتوريه الرايقاويه .وقلت للولد طيب روح شوف ماما بتنادى عليك وبعدين نكمل الدرس
الولد راح يشوف امه .. وانا مسكت الكتاب احاول افهم حاجه ..للاسف نو نو نو ... مفهمتش اى حاجه
خصوصا ان اخر عهدى بالجغرافيا ايام ابن الحراميه المقروص بلوتو رحمه الله عليه لما كنت فى اولى ثانوى وبعدين دخلت علمى علوم ونسيت اى متعلقات خاصه بالجغرافيا وحتى نسيت ان الارض كرويتون تلف حول نفسوها
المهم
الولد رجع بسرعه وقالى ماما مش بتنادى عليا
طبعا انا يكفيكم ربنا من شر الزنقه خصوصا لما تبقى مزنوق مع ابنك او بنتك .. كنت مستعد ادفع اى جند واخرج من المطب ده
رحت عامل حركه قرعه وقلت للولد روح خد 5 ازايز بيريل وغيرهم من السوبر ماركت
الولد برضه بص لى وهو متابع حواجبى وقال . طيب السوبر ماركت ليه يا بابا ما انزل السبت للبقال واجيب من الدكان اللى تحت البيت
قلت نو نو نو اصلى انا عايز ب 5 جند بيض بلدى وهات معاك زيتون وتمن جبنه وتمن حلاوه
الولد راح ناحيه الباب وقابلته امه مسز رايق الله يمسيها بالخير واتكلمت معاه .. وجات ناحييتى وقالت . هو انت مدى الواد 100 جنيه ليه ممعكشى فكه ؟؟؟؟؟
قلت لها لا مش مشكله انا عازمكم على العشاء انهارده على حسابى
راحت نادت على الولد من على السلم ووقفت اتكلمت معاه
انا طبعا خمنت كده بذكائى الفذ منقطع النظير انها ادت للولد فلوس علشان يجيب الاكل . وقالت له هات من فلوس بابا البيريل بس .. لانها بتاخد مصروف شهرى ..شامل كل حاجه الا البيريل
المهم قريت الدرس كويس والحمد لله فهمته بعد عذاب اليم . وعرفت ان الارض لا تدور راسيا ولكن تدور على محور بزاويه 23 درجه ونص وبيكون محورها ثابت فى اثناء الدوران وده بيخلى نص الكره قريب من الشمش والنص التانى بعيد عن الشمس ولما الارض بتلف بيتغير النصفين ولما بتكون الشمس على خط الاستواء بيكون نص الكره ربيع والنص خريف لان الشمس بتتوزع بالتساوى على النصفيين . عليا النعمه الكلام بتاع المحور ده عمرى ما سمعت عنه ابدا ....فى ايامنا . ماكنشى فى محور الارض ولا حتى روتانا الارض ولا دريم الارض
ربنا يرحمك ويسامحك يا بلوتو يا ابن خالتى ام بلوتو ويبشبش النيزك اللى تحت دماغك
طبعا انا لما فهمت جريت على البلاكونه الحق الولد قبل ما يشترى البيض والزيتون ويدمر 15 جند على الاقل
لكن تاتى الرياح بما لاتشتهى المراكب ولا حتى اللنشات
لقيت الولد داخل العماره
واول ما دخل لقيته بيدينى 12 جند من ال 100 جند
قلت له ايه ده ياض ؟ فين الباقى ؟
قالى ماما ناديت عليا وقالتلى خليهم نص جبنه براميلى ونص جبنه رومى ونص حلاوه و3 كياس عيش ونص لانشون و ب 10 جنيه بيض و5 بيريل وكيلو لبن وخمس علب زبادى و2 بيفى وطقم كونو للترفيه بعد وليمه العشاء

مع تحيات اخيكم


فقيد ال 100 جند

الدكاتره الكبير ...عبده الرايق

هناك 54 تعليقًا:

عبده الرايق يقول...

هاااااااى ايفرى بدى
بكره السبت اول ايام شهر ذى الحجه
ويوم الاثنين اول ايام عيد الاضحى المبارك
كل عام وانتم بخير
الى فرنسا هانم
استخبى اليومين دول يا فرنسا
نصيحه منى
محدش ضامن الظروف
اللهم انى قد بلغت

حنين القلب يقول...

ليه كده
انا كنت هبقى اول تعليق مرة من نفسى
ماااااااااااااشى يا روقه
مخصماك

حنين القلب يقول...

انا عايزة افهم حاجه
انت تذاكر للعيال ليه
ده انت لخبطت فى دماغنا حبه التاريخ والجغرافيا اللى كنا نعرفهم
هما العيال ناقصين
لا حول ولا قوة الا بالله
الله يكون فى عونك يا محمد يا رايق
ابعد عن الرايق وانت تفلح

حنين القلب يقول...

عارف يا رايق
اكتر حاجه فرحتنى فى الموضوع ده
ان ال 100 جند اتصرفت
تلاقيتك يا عينى حواجبك وعنيك ورموشك وقفوا تانى

مسز رايق استغلت الفرصه وجابت اللى نفسها فيه كله
ههههههههههههههههههههههه
شاطرة يا مسز رايق

حنين القلب يقول...

اخر تعليق علشان اخد ال75 قرش
كل سنه وانت طيب يا اجدع روقه فى عالم التدوين
ويا رب السنه الجايه تكون اسعد من السنه دى وتكون بتحج بيت الله

تسلم ايدك بوست زى العسل

رندا يقول...

روقة ليك اكبر وحشة والله حمدالله على سلامتك يارب يبعد عنك اى شر ان شالله الشيطان يارب الى كانت كل حاجة وقفت فية ههههههههه

رندا يقول...

اما بخصوص عمك نبتون الى نزل علية التخفيض ونزل على الكرة الارضية كلها يبقى بكرة هيلغوا الجغرفيا خالص ويريحوا الناس منها ومن الزنقة السودة الى حصلت ههههه

ومسسز رايق استغلت الموقف دى مش بعتت ابنك دى بعتتك انت حضرتك هههههههه

بالهنا عليكوا تعيش وتاخد غيرها

امال لو قلته يروح للحاتى كانت عملت اية كويس جت سليمة هههههه

رندا يقول...

كل سنة وانت طيب ياروقة عيد سعيد عليك وعلى اسرتك كلها وعلى اسرة الضاحكون كلها

يارب يديم علينا كلنا الخير والحب والسعادة

لو تعرف انا سعيدة قداية بعودتك كنت دبحت خروف على باب الضاحكون وانت داخل ههههههه

فشكووول يقول...

والله انا تهت معاك فى المحاور بتاعة الارض وبلوتو والحاجات اللى تلخبط دى .. وعلى فكره انا بييجى لى ارتكاريا من كلمة المحاور دى واما يطلع حد فى التليفزيون ويقول الموضوع ينقسم الى محاور منعدده منها المحور الاول ويقعد يمحور فى المحاور ولا احنا شايفين محاور ولا نيله وآهو كلام وخلاص .. وعموما تستاهل تخسر الـ 100 جند وام العيال كان عندها حق واللى يفندر يفندر من ديبه .. تحياتى

فرنسا هانم يقول...

ههههههههه
والله شكلك كده جالك العصب السابع ده من فقدان ال 100 جنيه
ههههههههههه
ههههههههههه
انا فرحانه فيك يا رايق
وتعيش وتاخد غيرها
هههههههههههه
هههههههههه

فرنسا هانم يقول...

وبعدين يا رايق بلاش تخبط فى الحلل
لالالالالالالالالا
انا فرنسا وانت عارف
ممكن اعمل فيك ايه يا رووووقه
بلاش يابنى
بلااااااااااااااااااش
عيش حياتك احسن وربى ولادك
انا برضه اللى هستخبى فى العيد يابو فروه

همس الاحباب يقول...

ههههههههه
ههههههههه
جغرافيا يا رايق
خليك فى التاريخ اسهل يا جدع
اهو التاريخ كله مزيف
الله يرحم بلوتو هو طلع قمر
يخرب بيت ده تعليم يا جدع
ومال كانوا بيضحكوا علينا طول السنين اللى فاتت
يلا عقبال باقى الكواكب ما تختفى
ومايبقاش فيه جغرافيا

همس الاحباب يقول...

وبعدين بتضحك على محمد الرايق
وبتبعته
اهو طلع اروق منك هو مسز رايق وبعتوك البعتة اللى هى
وحلال عليك 12 جند
وتعيش وتاخد غيرها
نصيحة بلاش تذاكر جغرافيا وتاريخ
خلى العيال يفلحوا
خليك فى الرياضة
حلوة الرياضة حتى لو غلطت يا جدع
تقول الالة الحاسبة مش بتعرف تحسب

همس الاحباب يقول...

ههههههه
ههههههه
انا حاسس ان فرنسا بتتكلم صح
هو العصب السابع جه بعد ال100 جم
بس بقى العصب السبعماوى
بس بصراحة الواد عنده حق يسرح يا جدع
شايف مستر رايق بيشرح وحاجبه واقف
وانت شغال تقوله محور وبتلف وبتروح وتيجى
وانت حواجبينك ثابتة
ههههههه

مهندس مصري بيحب مصر يقول...

لعلمك بقى انا عارف كلام محور الارض المايل ده من تانية اعدادي
يعني من 16 سنة
:)
لكن حذف بلوتو من المجموعة الشمسية ده اكتشاف حديث من سنتين بس
هما لحقوا يدخلوها في المناهج
ده ايه التطور الرهيب ده ؟

صبرني يارب يقول...

هههههههههههههههههههههههههههه
رايق ازيك والله العظيم لك واحشه

معلش انا اتأخرت عليكم انا عارفه بس بجد ضحكتني وانا مش شايفه قدامي الله يصلح حالك انت ومحمد ويتم شفاك يارب

بس ازاي ما تعرفش موضوع المحور ده يا دكاتره

بجد بجد نورت البلوج

أحــوال الهـوي يقول...

العلم لا يكيل الا بالجند
يعني غرامه علي الفاضي كنت ادي الواد درس احسن تبقي و فرت تعبك و زنقتك و رقبة السمسمة بدل الفلوس رايحه رايحه
و كمان ان دل علي شئ دل ان النسوان مفتريه
و سلامة العصب السابع والادوار الاخري من كل شر

تحياتي

maiosha يقول...

هههههههههههههههه

سبحان الله .. هو أنا غبية فعلا ولا الكلام اللى انت قولته ده اللى بجد ميتفهمش.. محور إيه ونيلة إيه؟

ده أنا على ما عرفت إن الأرض قروية قعدت 10سنين .. امال على ما أفهم البقين دول عايزالى كام سنة

على فكرة يا رايق .. نصيحة منى .. لو كل درس من دول هيكلفك ميت جنيه .. إدى أولادك دروس خصوصى أوفر

هههههههههه

كل سنة وإنت طيب

عبده الرايق يقول...

اصتبحنا واصتبح الملك لله
نزل يابنى واحد بيريل ومعسله قص
عبقال ما نرد على الزوار
وهات معاك واحد شاى وواحد قهوه وحلبه حصى واتنين جنزبيل للاصتباحه
يجعل نهارنا نادى بالصلاه على النبى

عبده الرايق يقول...

حنين القلب
الغاليه زعلانه منى
نو
نو
نو
انا اتلسوع بالنار ولا انى ازعلك ابدا ابدا بتاتا
طبعا اول تعليق ليكى انتى
تعليق صاحب التدوينه لا يحسب
زى الصفر على الشمال كده
يعنى ممكن تقولى كماله للبوست
او استدراك
يعنى ايه استدراك ؟؟؟؟؟؟؟؟؟؟
هههههههههه
ابوكى بيتكلم لغه عربيه فسحه

عبده الرايق يقول...

حنين القلب
يا بنتى انا بصحح التاريخ
وبفتح صفحات جديده ناصعه البياض والخضار والحمار والرمادى والبنى والليمونى لكل حبايبى الكويسين
يعنى الناس فاهمه التاريخ غلط
والجغرافيا كمان
بس على مين
انا لها انا لها
سوف انير الطريق لكل افراد الجيل الحالى والسابق والتالى
متشغليش بالك
طالما ابوكى الرايق موجود
اذن
سوف يظهر التاريخ على حقيقته
وكل هيبقى رااااااااااااااايق

عبده الرايق يقول...

حنين القلب
فرحتى ان ال 100 جند اتصرفت ؟؟؟
نو
نو
نو
انتى عارفه 100 جند يعنى ايه ؟؟؟
يعنى 10 ورقات حمر من ابو عشره جند
يعنى 5 ورقات خضر من ابو حنطور
يعنى ورقتان من ال 50 القويه والمفتريه
ال 100 جند دى كانت جلستى فى وحدتى
ال 100 جند دى كانت بتمسح عنى دموعى
ال 100 جند دى كانت السلوى فى ايام الغلاء
ال 100 جند دى كانت كل احلامى
ال 100 جند دى امى ونيلها جوه دمى وشمسها فى سمارى
وداعا لل 100 جند
عااااااااااااااااااااااا

عبده الرايق يقول...

حنين القلب
اكرمنى الله واياكى والمسلمين اجمعين بزياره بيته الحرام
وكل عام وانت بصحه وسعاده
واتمنى من الله عز وجل ان يهبك ما تريدين بحق الايام المفترجه
اللهم امين
اللهم امين
اللهم امين

عبده الرايق يقول...

راندا
راندا بنت عمى عندنا
يا مرحبا يا مرحبا
وعندك واحد قهوه مظبوط وصلحه
فنجان نضيف من بتاع الضيوف ياض بسرعه
وكبايه ميه من التلاجه
بلاش شغل الحنفيه ده
ايه ؟؟؟؟
امشى ياض هات الطلبات وبلاش احراج مع الضيوف
مسيرك فى يوم من الايام هتاخد حسابك
هو انا هطير ؟؟؟؟؟؟؟

عبده الرايق يقول...

راندا
تعرفى يا راندا
الرايق حريص قوى على الشلن
وبيطلع من الجنيه بطلوع الروح
لكن قدام الزنقه اللى كنت فيها
وخصوصا قدام الولد
كنت مستعد اضحى باغلى حاجه عندى
مستعد اضحى ب ال 100 جند
وانتى عارفه بقى ال 100 جند عند اخوكى الرايق يعنى ايه ؟؟؟؟؟؟؟؟
هى الامل والمنى والدنيا والافراااااااح

عبده الرايق يقول...

راندا
طبعا ميغلاش عليكى دبح الخروف
وانتى قدها وقدود
وعيد سعيد عليكى وعلى خالد وساره
وعلى المسلمين اجمعين
ولو تعرفى انا فرحان بالعيد ده قد ايه
جبت صفقه فل ووزعتها على حبايبى واصحابى
وبقى كل الناس بتشم الورد
وبيغنوا
الدنيا برد الدنيا برد
وابله سعاد بتشم الورد

عبده الرايق يقول...

fashkool
انا عارف انى استاهل كل اللى يجرالى
وعموما
استنى اطلبلك واحد قهوه ونقعد نتكلم على رواقه
بص يا سيدى
هو الموضوع اصلا متمحور الاطراف
ولا اخفى عنك شىء اننى ارتكزت على محورين اساسيين فى فهم المحور الاساسى لمحور الحوار الاول ومحور الحوار الثانى لذلك تمحورت دماغى وفقدت تركيزى وخرجت عن وعيى وشعورى واخرجت ال 100 جند
زى الشعره من العجين يا جدع
وااااااااا جنداااااااااااه

عبده الرايق يقول...

فرنسا هانم
مش جديد عليكى الفرح فى خلق الله يا فرنسا
مش جديد عليكى تفرحى فى الرايق
طبعا انا عارفك وعارف ضميرك الاسود معايا
بصى يا فرنسا
ان كانت ال 100 جند قد ضاعت
فان الرايق باقى
وساستعيد توازنى
وساستعيد ال 100 جند
واوعدك يا فرنسا
ان مش هتمر عشر سنين الا وهاكون مرجع ال 100 جند تانى

عبده الرايق يقول...

فرنسا هانم
انا جالى العصب السابع من الحكايه دى ؟
نو
نو
نو
انا ميهمنيش ال 100 جند
انا بمشى اتكعبل بالفلوس فى الارض
وبعدين ايه حكايه ابو فروه دى ؟؟
هى مفيش ابدا حاجه بتستخبى فى البلد دى؟
فرنساااااااااااا
انا يا بنتى مش محتاج اواجهك
نو
نو
نو
انتى عارفه قدرات الرايق
انا ممكن اهشك بصابعى بس
وعموما انا مش عايز أأزيكى علشان تجيبى فلوس حلوه على العيد
مش عايزين نبيع بخساره

عبده الرايق يقول...

همس الاحباب
شفت بقى يا خالد
بلوتو طلع قمر
انا خايف يا جدع حبل عتاقه اللى عندنا فى السخنه يطلع فى الاخر نهر
ويكون بيضحك علينا هو كمان
ونلاقى المراكب بتمشى تتمختر على قمته
والخليج بتاع السويس يطلع محيط وبيستهبل فيها
وقناه السويس تطلع مغاره على بابا
وقاره افريقيا كلها حوت كبير عايم على وش الميه

عبده الرايق يقول...

همس الاحباب
بص يا خالد
انا مش بعترف بالاله الحاسبه نهائى
انا فى شغلى وكله حسابات زى مانت عارف
بحسب بايدى
مش بستعمل الاله ابدا الا علشان اشوف الناتج
وطبعا كل مره
بيطلع حسابى غلط والاله الحاسبه صح
تصدق يا جدع مره واحده انتصرت على الاله الحاسبه
وطلع حسابى انا اليدوى صح
وطلعت الاله غلط
وفرحت جدا جدا لانى انتصرت على العلم والتكنولوجيا
لكن اتضح ياراجل انى كنت بكتب بدل الاتنين خمسه
طول عمرى مش بعرف افرق بين ال 2 وال 5
فى العنجليزى

عبده الرايق يقول...

همس الاحباب
خالد انا متشكر جدا جدا
على الواجب بتاع المدينه الجامعيه
وان شاء الله لما تيجى السويس هرد جميلك

عبده الرايق يقول...

مهندس مصرى
مراحب مراحب بيك يا هندسه
ياقلبك يا باشمهندس
عارف كلام المحور من 16 سنه ؟؟؟
انا كنت فى تانيه اعدادى من 29 سنه ومسمعتش اى كلام عن المحور
بس انا برجح ان الجيل بتاعنا مكنش بيتكلم على محور حد
وكل واحد بيخاف على محوره
اما بالنسبه للتطور التعليم
اضحكك
ابنى محمد فى اولى اعدادى بيدرس ان الكواكب 8 كواكب بعد استبعاد بلوتو
واخوه احمد فى سنه خامسه ابتدائى بيدرس الكواكب 9 كواكب منهم بلوتو
ههههههههههه
يعنى اصدق مين واكذب مين ؟؟؟؟؟

عبده الرايق يقول...

صبرني يارب
نورتى بيتك ومكانك يا بنتى العزيزه صبرنى يا رب
انا بجد والله ماكنتش اعرف حكايه المحور دى
وان الارض بتدور مايله بزاويه
ههههههههه
مع انى واخد 15 دكتوراه فى الجغرافيا
يلا بقى معلشى
ابيعهم لبتاع البطاطا
واهى نسترزق بكام جند نعوض بيهم ال 100 جند اللى راحوا

عبده الرايق يقول...

احوال الهوا
انا اتعلمت من التجربه
ومسز رايق ربتنى بصحيح
ومخلى معايا فلوس فكه علشان لما اتزنق اطلع الفكه
مع انى حاسس انى مع الحكايه السوداء بتاعه المحاور دى ممكن اتزنق تانى
وشكرا على سؤالك عنى
والحمد لله
العصب السابع وباقى الادوار تم تركيب اسانسير علشان نطلع بالدور العاشر
علشان الحديد رخص

عبده الرايق يقول...

maiosha
لا طبعا انتى مش غبيه ولا حاجه
انا الدكاتره عبده الرايق ذات نفسى فهمت الموضوع ده بطلوع الروح
وانا دكاتره كبير وحاصل على زماله قهوه كمونه
والزماله الفخريه لقهوه المشرابيه
والزماله الاستوائيه لقهوه سطوحى
والشهاده الفخريه فى نحو الاميه
شفتى بقى شهادات قد ايه وبرضه مفهمتش الا بعد عذاب وضياع ال 100 جند

بنت الغربة يقول...

والله انت شخصيه ظريفه جدا- انت زعلان قوى انك مش فاهم الجغرافيا-جرب بقى تشرح الجغرافيا والتاريخ والعلوم والحساب والتربيه الوطنيه باللغة الانجيليزيه ده بالأضافه الى 3 كتب انجليزى وده للصف السادس والرابع والتانى-مع عدم وجود اى مساعده من الزوج _ مع انه مدارس لغات -وانا لأ-ده بالأضافه ان كل المدرسين مابيتكلموش عربى اصلا-شفت الهنا الى انا فيه - تحياتى ليك وربنا يكون فى عونك وعونى - داليا-

همس الاحباب يقول...

عبده الرايق
انت بتسيحلى يا رايق على الدش
ينفع الكلام ده يا جدع
عيب احنا اخوات
وبعدين ممكن افكر اجى السويس
بس بعد حضرتك ما تنسى تاثير ال100 جند
والا اتخلص منى القديم والجديد بسببها
هههههههه
تعيش وتاخد غيرها يا جدع

عبده الرايق يقول...

بنت الغربة
والله عندك حق
والله يكون فى عونك
احنا بنحارب وبندفع 100 جند علشان نفهم الدروس بالعربى
امال لو بالانجليزى كنت هادفع كاااااام
شرفتى المدونه
وشكرا على تواجدك

عبده الرايق يقول...

همس الاحباب
تشرف السويس يا خلووووووووود
بس انت اعملها كده وشوف انا هاعمل معاك ايه
عندى جبنه قديمه بالمش من ايام جدى الكبير احمس بانى الاهرام التلاته
هاعزمك على مش محصلشى
بس ابقى هات معاك العيش والساقع والشاى والسكر

همس الاحباب يقول...

عبده الرايق
هههههههه
بقولك ايه بلاها العزومة دى
يا عم هات العيلة وتعالى انت
وانا هعزمك عزومة ما حصلتش
هيتحكى عنها فى تاريخ احمس وتحتمس
وشجرة الدر كماااان
الا قولى هما سموها شجرة الدر ليه
بصفتك علامة كبير ودكاترة كبير فى البرديات وتواريخ الميلاد

همس الاحباب يقول...

رايق
هى فرنسا فين
اوعى تقولى قاعدة تاكل فى الخروف
مش هصدق ان عيلة الرايق هتدبح خروف على العيد
كلا البتة
اه بالمناسبة الخروف والعيد
كل سنة وانتم طيبين
كل سنة وانتم بصحة وسعادة
كل سنة واحنا مجمعين على الخير
كل سنة وانتم بخير

حنين القلب يقول...

كل سنه وانتم كلكم طيبين يا احسن عيله فى الدنيا
كل سنه وانتى طيبه يا مامتى واطلعى من المطبخ محنا عارفين انه فاضى بتعمل ايه كل ده جوا
وانت كمان طيب يا بابتى ويا رب تصدق المرة دى وتجيب لينا خروف بجد وبلاش اللعبه اللى بتجيبه كل سنه ده
كل سنه وانت طيب يا اجدع واطيب اخ فى الدنيا ويا رب يحفظك انت وهمس وام همس وتحقق كل ما بتتمنى وبطل رخامه عليه احسنلك
كل سنه وكلكم طيبين

حنين القلب يقول...

عبده الرايق
الا قولى يا روقه هو مش احنا لازم نضحى بحاجه باربع رجلين وخلاص
طيب محنا ممكن نضحى بارنب او قطه او فرخه ماشيه على عكاز
يلا ادينى اديتك اختيارات
اختار انت وهات بقى
بس بلاش القطه والنبى انت مش ناقص نونوه

kochia يقول...

والله منور يا اخ عبده باشا الرايق
وسلامة العصب السابع والخامس والاول وال13 كمان
اصلهم حساسين شوية

المهم انا اول مرة اعرف ان بلوتو طلع قمر
صحيح الكلام ده ولا بتطلع اشاعات ؟؟؟
انا عارفة فيه خصومة قديمة بينك وبين بلوتو ده
عارفاها بصفتي كنت في المنطقة بتاعتكم زمان
يعني متحاولش تنكر
بس الظاهر ربنا اظهر الحق وانت اللي كنت غلطان
والا مكنتش طارت ال 100 جنيه
معلش تعيش وتاخد غيرها
قصدي ربنا يعوض عليك

تحياتي

جنّي يقول...

السلام عليكم ورحمة الله وبركاته

هي الارض بتلف يا خوجة ؟
يعني لو بيتكم في باب اللوق بكره تلاقوه في باب الخلق ..

وبعدين كل الحاجات اللي قولتها دي ب88 جند بس ؟ هي الاسعار رخصت قوي عندكم ولا ايه ؟

وكل عام وانتم بخير بحلول عيد الأضحى المبارك

كل عام وانتم على صعيد عرفات
كل عام وانتم من الحجيج
كل عام وانتم من الملبين
كل عام وانتم من المكبرين
كل عام وانتم من المهللين
كل عام وانتم مغفور لكم
كل عام وأنتي حرة يا أمتي

أخوكم سعيد

عبده الرايق يقول...

حنين القلب
وانتى طيبه وربنا يسعدك ويحقق ليكى كل اللى بتتمنييه
يا حنين يابنت فرنسا والرايق

عبده الرايق يقول...

حنين القلب
فرخه ماشيه على عكازين ؟؟؟؟؟؟
انها فكره
ياللهول
انا هدبحها
واكل الفرخه
واضحى بالعكازين

عبده الرايق يقول...

kochia
هو بجد انتى كنى ساكنه فى الاربعين ؟؟؟
عموما ياستى
موضوعى القديم مع بلوتو اتحل من سنتين
وصالحنا بعض بعد ما اتدخل الحاج نيبتون
والحاجه زهره
والموضوع اتلم
لكن بجد والله حكايه بلوتو دى
وشوفيها فى كتاب الدراسات بتاع اولى اعدادى

عبده الرايق يقول...

جنّي
كل عام وانت طيب وبخير وعيد سعيد عليك وعلى الامه الاسلاميه اجمعين
اما بالنسبه للاسعار
هى عندنا اصلا مولعه
السويس بلد سياحى يا باشا

عبده الرايق يقول...

همس الاحباب
بالنسبه للعزومه انا موافق اجى القاهره واتعزم عندكم
بس مش هادفع ولا مليم احمر
وكمان لازم نتفق من دلوقتى فلوس المواصلات رايح جاى على مين ؟
لو الرحله مجانا شامله المواصلات
يبقى الحق بقى اقول لاخواتى وقرايبى والجيران والاهل والاصحاب

عبده الرايق يقول...

فرنسا موجوده
لكن مختفيه
خايفه من الجزارين ليدبحوها فى العيد
هههههههههههههههه

عبده الرايق يقول...

همس الاحباب
بالنسبه لشجره الدر
فعلا يا ولدى اسألوا اهل العلم والمعرفه
والرايق دكاتره كبير وللصدفه البحته انا عندى 2 دكتوراه عن شجره الدر
واحده عن الشجره والتانيه عن الدر
شوف بقى ياسيدى
شجره الدر ملكه مصريه قديمه من الاسره الرابعه عشر عسر الاسرات
واسمها الفرعونى
شج راح دور
وقد حكمت الصين لمده 15 سنه وقد تزوجت من عماد حمدى
وكانت مخلفه عيل صغير اهبل وعندما اراد عماد حمدى ان يلاعبه ووضع الحصان فى فمه
الا ان الولد عيط وقال لعمده انا مليس دعوه انا عايز الحصان افتح بطنك وهات الحصان
وعندما ماتت شجره الدر ظلت الهند عشر سنوات بدون ملكه
الا ان تولت الحكم الملكه نخله الدر من عزبه النخل شمال اندونيسيا

Mafrousa يقول...

اولا حمدا لله على سلامتك
انا عارفه العصب السابع ده وحش اوي
و بيكون نتيجة لطشة هوا جامدة
خد بالك و النبي
و الحمد لله انك قمت منها بالسلامه

ههههههههه
اما بالنسبة لل100 جند

تعيش و تاخد غيرها يارايق
ههههههههههههههههههههههههههه
بقا ياراجل مش فاهم جغرافيا؟؟؟؟؟
جغرافيا يا دكترة؟؟؟!!!!
يالهوييييييييييييي
ده يا عمونا الجغرافيا مافيهاش غير هوا و مية و رمل
هههههههههههههههههههه
و لا انت كنت خابف ناخد برد من الهوا
هههههههههههههههههههههههههه


و بعدين ايه المحاور اللى انت بتتكلم عنها ديه
نو
نو
نو انت كده بوظت العلم تماماااااااااااا
يوجد محور 26 يوليو ايه 23 و نص دول
هوه تقلص ولا ايه
هههههههههههههههههههه

و بعدين الجو عندتا صيف على طول
و شهر واحد شتا
انت حتسقط الولد كده
ذنبه فى رقبتك
هههههههههههههههههه


و الله و ليك و حشة يابا
ههههههههههههههههههه
انما مسز رايق ياعيني ما صدقت بحبحت ايدك شوية
ههههههههههههههههههههه
بس كله كوم و الواد اللى سرحان فى حاجبك ده كوم
هههههههههههههههههههه
حمدا لله على سلامتك