جغرافيا زمان ... فى برطمان

هااااااا ى ايفرى بدى
اخوكم العلامه الكبير الدكاتره عبده الرايق وقع فى مطب ... نجانى منه ربنا سبحانه وتعالى
طبعا الفتره اللى فاتت كنت بعانى من العصب السابع فى الناحيه اليمين من الوجه ..ووقفت حركات الحاجب اليمين والعين اليمين والودن اليمين وفرده المناخير اليمين والخد اليمين ... يعنى كل الصواميل بتاعه الناحيه اليمين كانت مفوته
وطبعا كان خروجى قليل
وانا من صغرى وانا مش بحب بتاتا الدروس الخصوصيه ..وبذاكر لاولادى ومش بياخدوا دروس نهائى
مره كنت بذاكر للمدعو محمد الرايق ابنى .وهو دلوقتى فى اولى اعدادى وكنت بذاكر له درس الجغرافيا بتاع الكواكب
وفوجئت انهم عملوا تقلص لعدد الكوكب بقوا 8 كواكب بدلا من تسعه
طبعا انا كنت فاكر النقص ده علشان الغلاء والضرايب .وكده وحركات
طلع ان المقروص فى مصارينه وفى نواضره بلوتو قمر ... المضروب ده كان بيستغفلنا طول المده دى وهو قمر مش كوكب ..صحيح يا ناس كواكب ناقصه تربيه ...
المهم يا ساده الموقف اللى حصل بعد كده
بعد ما ضربت الغداء ومليت بطنى كويس رغم انف دكتور السكر ودكتور الاعصاب . لبست المريله وجهزت القلم الرصاص والاستيكه وناديت على الاولاد .. وكان دور محمد فى المذاكره ... قلت له وانا كلى براءه .. ها يا محمد هنذاكر ايه انهارده ؟؟؟
قالى انا اخدت درس الفصول الاربعه فى الدراسات ومش فاهمه ... وراح الولد الله يستره جايب الكتاب وجه .. وكان فاتحه على الدرس بتاع الفصول اربعه
انا طبعا بكل غرور وكبرياء وتعالى قفلت الكتاب وانجعصت كده ولا اكنى احمد زويل عالم الفلك الكبير ذات نفسه .. وبدءت اشرح
شوف يابنى احنا قبل كده قلنا ان الكواكب تدور حول الشمس فى مدارات بيضاويه .. وده بيخلى ناحيه تبقى قريبه من الشمس وتخلى الجو صيف لان الشكل البيضاوى فيه ناحيتين قريبين من الشمس وناحيتين بعيد عن الشمس يعنى لما الارض بتقرب يبقى صيف ولما بتبعد يبقى شتاء
بصيت للواد الشرير الشقى محمد باشا الرايق لقيته سرحان وبيبص لحواجبى وانا بتكلم . لان فى حاجب بيتحرك والتانى فى بيات شتوى بفعل العصب السابع نجاكم الله
قلت للولد . خليك معايا يا محمد ما تسرحشى ... الولد بص لى وقال . يبقى يا بابا كده هيبقى عندنا اتنين صيف واتنين شتاء ومفيش ربيع ولا خريف
طبعا انا بصراحه اتكتمت وسكت , وخصوصا لما الولد قال الكلام ده وفتح الكتاب على الصفحه بتاعه الدرس .. وبصراحه لقيت الولد عنده حق
هنا بقى اشتغلت العبقريه الدكاتوريه الرايقاويه .وقلت للولد طيب روح شوف ماما بتنادى عليك وبعدين نكمل الدرس
الولد راح يشوف امه .. وانا مسكت الكتاب احاول افهم حاجه ..للاسف نو نو نو ... مفهمتش اى حاجه
خصوصا ان اخر عهدى بالجغرافيا ايام ابن الحراميه المقروص بلوتو رحمه الله عليه لما كنت فى اولى ثانوى وبعدين دخلت علمى علوم ونسيت اى متعلقات خاصه بالجغرافيا وحتى نسيت ان الارض كرويتون تلف حول نفسوها
المهم
الولد رجع بسرعه وقالى ماما مش بتنادى عليا
طبعا انا يكفيكم ربنا من شر الزنقه خصوصا لما تبقى مزنوق مع ابنك او بنتك .. كنت مستعد ادفع اى جند واخرج من المطب ده
رحت عامل حركه قرعه وقلت للولد روح خد 5 ازايز بيريل وغيرهم من السوبر ماركت
الولد برضه بص لى وهو متابع حواجبى وقال . طيب السوبر ماركت ليه يا بابا ما انزل السبت للبقال واجيب من الدكان اللى تحت البيت
قلت نو نو نو اصلى انا عايز ب 5 جند بيض بلدى وهات معاك زيتون وتمن جبنه وتمن حلاوه
الولد راح ناحيه الباب وقابلته امه مسز رايق الله يمسيها بالخير واتكلمت معاه .. وجات ناحييتى وقالت . هو انت مدى الواد 100 جنيه ليه ممعكشى فكه ؟؟؟؟؟
قلت لها لا مش مشكله انا عازمكم على العشاء انهارده على حسابى
راحت نادت على الولد من على السلم ووقفت اتكلمت معاه
انا طبعا خمنت كده بذكائى الفذ منقطع النظير انها ادت للولد فلوس علشان يجيب الاكل . وقالت له هات من فلوس بابا البيريل بس .. لانها بتاخد مصروف شهرى ..شامل كل حاجه الا البيريل
المهم قريت الدرس كويس والحمد لله فهمته بعد عذاب اليم . وعرفت ان الارض لا تدور راسيا ولكن تدور على محور بزاويه 23 درجه ونص وبيكون محورها ثابت فى اثناء الدوران وده بيخلى نص الكره قريب من الشمش والنص التانى بعيد عن الشمس ولما الارض بتلف بيتغير النصفين ولما بتكون الشمس على خط الاستواء بيكون نص الكره ربيع والنص خريف لان الشمس بتتوزع بالتساوى على النصفيين . عليا النعمه الكلام بتاع المحور ده عمرى ما سمعت عنه ابدا ....فى ايامنا . ماكنشى فى محور الارض ولا حتى روتانا الارض ولا دريم الارض
ربنا يرحمك ويسامحك يا بلوتو يا ابن خالتى ام بلوتو ويبشبش النيزك اللى تحت دماغك
طبعا انا لما فهمت جريت على البلاكونه الحق الولد قبل ما يشترى البيض والزيتون ويدمر 15 جند على الاقل
لكن تاتى الرياح بما لاتشتهى المراكب ولا حتى اللنشات
لقيت الولد داخل العماره
واول ما دخل لقيته بيدينى 12 جند من ال 100 جند
قلت له ايه ده ياض ؟ فين الباقى ؟
قالى ماما ناديت عليا وقالتلى خليهم نص جبنه براميلى ونص جبنه رومى ونص حلاوه و3 كياس عيش ونص لانشون و ب 10 جنيه بيض و5 بيريل وكيلو لبن وخمس علب زبادى و2 بيفى وطقم كونو للترفيه بعد وليمه العشاء

مع تحيات اخيكم


فقيد ال 100 جند

الدكاتره الكبير ...عبده الرايق