الأربعاء، يونيو 25، 2008

فلسفة الزرار

اخوانى الاعزاء
اسره الضاحكون ترحب بانضمام الاخ الكريم
ابن حجر العسقلانى الى اسره المدونه
*****************
هى وهو


بدأت بهى علشان نبدأ بالسلام
وبما ان هناك حمله شعواء على المدونين الغلابة اللى يتحطوا على الجرح يولع
طبعا ما هو لازم يولع علشان يخف مش كانوا زمان اللى عنده حاجه متعورة يحرقواهاله

المهم هاقول حوار بين هو وهى يووووووووووه لسانى مش مطاوعنى يقول هى وهو

هو : ممكن تجيبى لى القميص من الدولاب ؟
هى : المكوى ولا المغسول ولا اللى لسه فى الغسيل ؟

هو : هو انتى بتحطى كله مع بعضة فى الدولاب المكوى مع الوسخ مع المغسول
هى : لا هو انا عبيطة انا بحط المكوى على الشماعات والوسخ فى ارضية الدورلاب والمغسول فى الرف اللى فوق

هو : طيب انا دلوقتى رايح الشغل تفتكرى ايه اللى ينفع معايا؟
هى: ما انا كنت هجيب لك القميص المكوى بس انت ساعات بتحب تلبس حاجة كنت لابسها قبل كدة

هو: البسها ازاى بس بعد ما اتكعورت مع الغسيل وحطيتهم فى البؤجه بتاعة ملاية السرير دى
هى: طيب خلاص عاوز القميص انهون؟

هو: القميص اللبنى
هى: اتفضل يا سيدى مكوى و ميه ميه اهوه
هو: ربنا يخلى لينا المكوجى

هو بيلبس القميص : لقى الياقه بتاعته مهرية مش انا قلت لك من ميت الف مرة متدويش القميص ده عند المكوجى
هى : ليه بس
هو : هو احنا هنعيده تانى امسكى شوفى
هى: بتبص ما كل زرايره سليمه اهوه
هو: لا مش ده اللى زرايره مقطعه بصى على الياقة
هى : اه صحيح معلهش انت قلتى قبل كدة معلهش نسيت يبقى انت قصدك على القميص اللبنى التانى
هو:ايوة بسرعه بس علشان الوقت
هى: طيب حاضر اتفضل يا سيدى القميص يا سيدى على النظافة شايف بيشف ويرف ازاى
هو :تسلمى يا ستى ربنا يخليكى ويخلى الغسالة . وقام لابس القميص وهو بيزرر الزراير لقى زرار مقطوع
نادى يا ست مش انا قلت لك قبل كدة تخيطى زرار القميص مخيطهوش ليه؟
هى : معلهش يا خويا نسيت ثوانى هخيطهولك حالا عقبال ما تلبس الشراب وقامت جايبة الابرة والخيط وفى ثوانى كانت مخيطة الزرار وقالت له خد القميص
هو : بيلبس القميص وجه على الزرار وبيزرره لقاه متخيط بلون ابيض مع انه كل زراير القميص متخيطة باللون الازرق
يعنى مكنش فيه لون غامق تخيطى بيه القميص؟؟؟
هى : مش انت اللى مستعجل
هو يعنى علشان مستعجل تخلى الناس تنتقضنى وتنتقضك انتى كمان وبعدين مستعجل ايه ومستبغل ايه
هى : تنتقضك انت وعرفناها تنتقضنى انا ليه ان شاء الله هم يعرفونى ولا اعرفهم
هو : يا ست مش كدة
يعنى انا اهون عليه كنت انزل بالقميص من غير زرار على انى البس قميص فيه زرار متخيط بلون تانى غير بقية الزراير
هى:وايه الحكمة يعنى ؟؟؟؟؟؟
هو : الحكمة يا ستى ان ممكن الزرار يكون اتقطع منى فى اى حته وباى طريقه اما الزرار اللى اتخيط ده يعنى فيه حد خيطه واللى المفروض انتى الحد ده اقل ما فيها هيقولوا مراتك نظرها ضعيف ولا ايه ولو انا كمان كنت لبسته كدة هيقولوا انا كمان عديم النظر
هى: ينشك فى لسانه اللى يقول علينا حاجة بطاله
هو: بطالة ايه بس هو حد كان قال حاجة انا بفترض بس
هى:طيب اقلع القميص لما اخيطهولك تانى
هو:لا لا ملوش لزوم انا مش رايح الشغل
هى: ليه بس كدة كل ده علشان حتة زرار
هو : لا اصل الشراب لقيت صباعى الكبير طالع منه وقلت ادارية فى الجزمة وخلاص وكمان انا نسيت اقولك النهادرة الجمعه اجازة
هى: مادام النهادرة الجمعه عامل غلبه ليه
هو: جااااااااااااااااااااااااااى يا ست انا بقول كدة علشان اهون الامر
هى: تهون الامر ليه ما تكبرة ولا انت عاوز تعملك بالو وخلاص
هو : انا اسف هاخذ اجازة النهاردة مش هروح الشغل
هى: يعنى هتقعد فى البيت بقى وطول البيت هيبقى طلبات وهاتى وخدى وروحى اصلى انا عارفة قاعدة الراجل فى البيت دى بتبقى خراب
هو: طيب اروح فين لا نافع اروح الشغل ولا نافع اترزع فى البيت اعمل ايه؟
هى : انا هكويلك الجلابية ورح صلى الجمعه احسن
هو: انا بقول كدة برضة وهو نازل على السلم
دى صدقت ان النهاردة الجمعه وانا كمان صدقت طيب لما اروح يمكن يكون الامام بتاع المسجد هو كمان زرار القفطان بتاعه كان مقطوع وهيجى يخطب الجمعه

بقلم

الطائر الحزين

هناك 138 تعليقًا:

ابن حـجـر الـعـسـقـلانـى يقول...

الله ينور عليك يا طائر يا حزين


أنا مت من الضحك على يوم الجمعة دة

بجد حكاية جامدة جامدة جدا

ضحكتنى و أنا مروح من الشغل .. ربنا يكرمك

Miss. Sosa يقول...

هههههه
هو مش كان في بوست هنا من دقايق
نزلتوه بليل وشيلتوه الصبح
هو طلع بوست مخل بالاداب ولا انتم ماكنتوش قريتوه قبل ماتنزلوه
ولا كان عندكم عجز بوستات ولما ربنا فرجها عليكم حذفتوه

ماعلينا ربنا يزيدكم فكاهة وتصرفات افكهه ههههههههه

ســــــلام

همس الاحباب يقول...

هههههههه
تصدق نفس اللى بيحصل معايا
يا جدع
هى الستات كلها كده
بس حلوة فكرة يوم الجمعة دى
ونزلت بالجلابية تروح تصلى
الله ينور عليك
بس البوست دمه خفيف

رئـــــيسـة حزب الأحلام يقول...

هههههههههههههههه
فلسفه الزرار مرة واحدة
حتى الزرار خلو له فلسفة وفيها ايه تمشى مكرمش ومن غير زرار دة موضه فى الايامم الجميلة اللى عايشنها
المدام بتمشيك على الموضه المفروض تشكرها
تحياتى للجميع

بطوط حبوب يقول...

ههههههههههههههه

جامده مووووووووووت حكايه يوم الجمعه دى
والله اريح حاجه

اسلام الحضرى يقول...

ايه ده هو الحب الديجتال اتفيرس ولا ايه انا قولت ان العلاقه دى شكلها نسخه sp2 وتقع على طول


بس حلو برده الزار تسلم كيبوردك يا باشا

صبرني يارب يقول...

حرام عليك يا طائر

طب تصدق بالله ؟؟؟
حوار المكوى ده بيحصل بس عكسي .

يعنى الفت رجلي الاقي مزود القمصان الى انا طلعتها على المعاش .
وتيجى بقى مع المكوى والاقي لابسها واقوله يا ابويا القميص معاش من زمان ده بقاله فى الخدمه 8 سنين يقولي وايه يعنى ماله ما شغال .
يا حاج شغال ايه ده الاكتاف بقت لون مختلف عن باقي القميص الشمس كلتها باين .
لحد لما اضطر اسرب الهدوم دي فى غيابه اديهم لاي حد غلبان ولو افتكر بقى وقالي هى القمصان بتاعتي قلت ليه ؟؟؟!!!

اقوله افرح افرح خدت ثواااااااب اتصدقت بييييييييهم ههههههههههههههه

ولعلمك الخاص هو بقاله دلوقتي كام شهر عامل نفسه مش واخد باله وما عادش بيودي للمكوجي اصله مش فااااااضي يروح يودي ويجيب والمكوجي الى جنبها احول ومكوته وحشه .

ومحسوبتك الى بتكوي . وربنا بارجعه من على الباب اقوله غييييييييييير هدووووووومك .

مفتري يا طائر على الستاااااااااااات .

بس عجبتنى حكاية يوم الجمعه دي هههههههههههههههههههههه


بس فين البوست بتاع سوسه يا رجاله

فرنسا تعالى شوفي الرايق عمال يلعب فى المدونه بوظ الدنيا .

كاميليا بهاء الدين يقول...

ههههههههههه

قمة ، حكاية جامدة جدا

مش عارفه اكتب من كتر الضحك

ههههههههههه

تحياتى



عندى سؤال لمستر رايق

فى التعليقات قبل كده مستر رايق قال انه اخد قصب وقعد على الشط - تجاوزا يعنى - وده معناه انه راجل رومانسى وشاعرى واكيد كان بيستعيد ذكرياته

ياترى يقدر يحكى لنا عن عالم رومانسيته؟؟



حاجة اخيرة
حوارات الضاحكون فى التعليقات قمة فى الابداع


اسعد الله قلوبكم جميعا


تحياتى واحترامى

خالد كامل يقول...

فعلاً يا اخى الواحدة من دول ممكن ساعات تولع الدنيا عشان حاجات هايفة
بس مش كلهم بأمانة
عامة البوست حلو قوى
ربنا يوفقك
سلام

Empress appy يقول...

وجنت على نفسها مراكش انت محرمتش لازم ارجع لحكايات ابى ززززاد تاني ولا فاكر الطفح اللى عندي هيستمر لاااااااا كلا البته سيت امبووول ميه انا على قلبكوا وهوريكوا جميها يا معشر زعابيب
يا انا يا انتو يا ولاعات حياتنا هههههههههه

maiosha يقول...

إيه يا عم الطائر الحزين .. إيه الإفترا ده يا سيدى؟؟

مراتك منظمة على الأخر ومنظمالك القمصان النضيف فوق واللى مش نضيف تحت .. والله كتر خيرها

وبعدين حكاية الزرار ده لما حد يسألك قوله نيو لوك.. وبكرة تبقى موضة .. أنا لو منك كمان أسوق فيها وأتريق على أى حد كل زرايره لون واحد

أيوة طبعا خليك ماشى على شعار (مراتى صح دايما) وبدل قالتلك النهاردة الجمعة يبقى الجمعة وتنزل تصلى على طول

ههههههههههههههههههههه

بس بجد بوست رهيب

فاتيما يقول...

يا خراااااابى
على الرجالة و سنينها
نعملكو إيه بس
نخيط الزرار مش نافع
نسيبه زى ما كان مقطوع مش نافع
مترسلكو على بر
نسيبه و لا نخيطه ؟؟
إيه بتقول إيه؟؟
لون الخيط
أهو دا بقى الدلع المرىء اللى ملوش لازمة
يعنى خارج شغلك مستعجل ع الصبح
وقته بقى التفاصيل الدكيكة دى
يعنى زملائك فى الشغل نظرهم 6/6 يا خى
و بعدين أدى آخرة الكلام الكتير اللى ملوش لزمة
أهو اليوم قلب على الجمعة و خدت أجازة
عشان متبقاش تعملها تانى
تحياتى يا طائرى الحزين
أنت طلعت حكاااااية

Asmaa mahaba يقول...

ههههههههه
افترا من وسع على السيدات
منغير تحيات سومه_87

المـــفـــــــقــــــــوعـــــة مــرارتـهــا يقول...

لا بقي انا كدة جوزي طلع أطيب منك بقاله يومين بيروح الشغل بقميص من غير زراير وبيخبيه بالجرافته ومابينطقش

بس انت كدة راجل متطلب علي الآخر
انا انادي كل فرد من أفراد الوطن وخصوصا ً الرجالة انهم يتعلموا الخياطة
عشان مايقعوش في أيد اللي مابترحمش

Mafrousa يقول...

بسم الله الرحمن الرحيم...المدونه ديه فيها عفاااريت
الصبح الواحد يدخل يقرا حاجه بالليل يقرا حاجه تانيه
الصبح المدونه تبقى بشكل بليل بشكل
يالهوووووووووي ما انا كنت كويسه فى مدونتي قاعدة بلعب فى البانيو ...و باسمع فيروز.....و باكل بطيخ.....و بدهن الببان
هوه انا كان ناقصني جنان...
ربنا يجعل كلامنا خفيف عليهم


هوه مافيش حد لييييييه؟؟؟؟؟
يالله
الواحد يقعد براحته و يقلع الشبشب


ايه بقى ياعم الطائر ايه التناكه اللى الراجل بتاعك عاملها ديه؟؟؟!!!!
الست مش عارفه تعمله إيه و لا إيه
الصراحه يا رجااله انتو...عاملين زي القطط

و زراير و قمصان..و مكوي ..و شماعااات
ده ايه البوست المعمول عند المكوجي ده

وبعدين لا تنكر ان الستات بيصدقوا كل كلمه الرجاله بتقولها؟؟؟!!!
الراجل قالها النهارده الجمعه...صدقت
فيه ستات كده؟؟؟!!!!!

انا بأه هو هووو هوووووه
تعالى شوف لماجوزي يوم الحد يقوم الصبح علشان يروح الشغل و انا افضل ساعه اقنعه انه يوم السبت مش الحد
يالله ربنا معانا

المـــفـــــــقــــــــوعـــــة مــرارتـهــا يقول...

دي حتي مراته ست منظمة آخر نظام ياختي
الست مش عاوزة تتعبه وحاطة كل حاجة في نفس الدولاب النضيف علي اللي مش نضيف ... المتبقع علي المترقع
كتر ألف خيرها دي واحدة مفروض تاخد نيشان في عينيها
رجالة مابيطمرش فيها

Asmaa mahaba يقول...

معاكى حق يا اختى يا مفروسه هى قعلا فيها عفاريت
انما ايه حكايه كل واحد يخبى فلوسه دى هههههههه كل دا من الرايق
ان شاء الله الواحد ربنا يلهمه ببوست يفترى فيه على الرجاله زى ما بيقولوا علينا
وبعدين البوست دا ان دل على شىء يدل على اننا غلابه بنحاول نراضيهم وهم روسهم ناشفه صوان
تحياتى لليديز بس
سومه_87

Asmaa mahaba يقول...

انا نفسى اعرف ما يمسكوها بدبابيس ايه وجع الراس دى

Mafrousa يقول...

ههههههههههههه الحق يا رااااااايق
كامليا ملكة الشعر و الرومانسيه
بتقول عليك رومانسي
ههههههه
قلبك ابيض م اللبن الحليب يا اميرة الشعر و الرومانسيه
اخوكي الرااايق باشا
اينعم كان بيمص فى القصب..و كان قاعد على الشط ..و سارح...بس انتى مش عارفه سارح فى ايييييه؟؟


شششش
ده بيني و بينك
العيال اللي فى الشارع بيلعب معاهم كل يوم و بيغلبوه و قشطوه على الاخر....



عسقول عندنا يا مرحبا يا مرحيا

إلا الطائر فين ؟؟؟؟؟مش بيقدم التحيه ليه؟؟؟


ميس سوسة..النبي ياختي انا حاسة فى يوم وانا واقفة فى المدونه ديه حختقى انا كمااان
اللى خلا التعليقات تنزل من السابع للأول و تطلع لوحدها!!!!!
انا متهيألى ان هيما اتوالف مع الرايق و بيحضروا عغاريت..ما هو هيما مش ممكن و لا ممكن يدخل من غير عفاريته
ماحدش يعرفه يا ماما.....


صبرني يارب على قرفهم هانم ..انتي جميله...و ربنا يصبرك بجد...علينا و على جوزك و عيالك...
اقولك تعالى جنب الرايق الرو هههههه مانسي

انا بكلم نفسسي فى بيت الاشباح ده
ولا ايه...فين خرفااااانك يا آبى؟؟؟؟

Asmaa mahaba يقول...

منور يا عسقلان

الباحث عن الحقيقة يقول...

يخرب عقلك يا راااجل
والله شئ فظييييع
ايه الجمال ده
جميل جميل جميل والله
بجد انت هايل
والله ما عارف اقول ايه
بجد استمتعت جدا

*********

ملحوظة قوية
انا بتهمك بخطف ابن حجر العسقلاني
وهصعد الامر للامم المتحده ومجلس الامن
وهجيب امريكا تفتش هنا
وقد اعذر من انذر

عوووود يا عسقووول

مدونات الكاشفة تعلن الحرب على فرنسا والضاحكووون
اعيدوا عسقووول

طب لما نشوفك يا فالح اياك تكسفنا ياا عسقول وانا اخرم عينك

ابن حـجـر الـعـسـقـلانـى يقول...

يا جدعان المدونة منورة بأهلها .. هو صحيح أنا جيت زودتها نور على نورها بس دة مش بسبب قدرى العالى .. لا أبدا .. دة بسبب الفولت العالى لإن أنا محطوط على التونجر أبو عشرين أمبير فلازم طبعا أنور

و الف شكر على التحية يا مفروسة و كمان يا سومة


و خلاص يا جماعة .. عسقول جالكم .. خبوا عيالكم .. مش عشان حاجة .. أنا خايف بس عليهم لا يتكهربوا


و باينها هاتولع .. باينها هاتولع

يا باحث أنا جاى أهدى النفوس و أقول لك يا باحث إنك حتى لو روحت لـ"بان كى مون" شخصيا سكرتير عام الأمم المتحدة مش هايقدر يعمل لك حاجة

ثم انت مش واثق فيا و لا إيه ... عيب يا راجل ... دة أنا تربيتك

سلام بقى عشان رايح أعمل شوية قنابل مولوتوف قبل ما أنام لزوم الحرب

و بجد يا جماعة ... أنا سعيد جدا بالصحبة الجميلة دى

الشريف / جمال طة يقول...

الله يروق بالكم
ويطول لسانكم كمان وكمان وتقولوا اللى الناس كلها نفسها تقولوا سدوا نفسنا وشيلونا الهم الله يخرب بيوتم كلهم قولوا معايا آمين أمين

اسلام الحضرى يقول...

انا جيت تانى

انا بس حبيت اشرك فى الحلقات التدوينه الفكاهيه ولانى مش بكتب فحبيت اشارك بحاجه صغيره

http://img204.imageshack.us/img204/7701/22ya9.gif

غير معرف يقول...

السلام عليكم

سؤال رفيع

هو فين الموضوع بتاع حب ديجتال

هو اتفيرس ولا الادمن معجبوش الموضوع

( حتى المدونات كمان فيها كوسه )

صحيح على راي الشاعر

لو كان النيل صلصة ما كان كفاه كوسة البلد

يلا دمتم في امان الله

غير معرف يقول...

موضوع جامد جدا يا طائر

ههههههههههههههههه

بصراحة الستات دوووول يجننوا الواحد

Empress appy يقول...

الانونيمس
**********
معلش اسمحوا لى بالرد عليه
الموضوع اتشال لانهاتنشر قبل كده فى شهر فبراير فى مدونة واحده اسمها zone4me
ودى كان لها تلات مدونات مش واحده والبنت دى قفلت مدونتها بس بكل بساطه ولا كوسه ولا بتنجان
ولما تستفسر تستفسر بالراحه
هنفترض ان اللى كتبت البوست هى نفسها صاحبه التلات مدونات وقفلتهم
هنا مينفعش حد يعيد نشر بوست اتنشر من زمان لو مش مصدق حضرتك
اعمل سيرش على كلمه حب ديجيتال فى جوجل هيطلع لك المدونة القديمه بس مغلقه اضغط على كلمه نسخه مخبأة هتلاقى البوست بالتعليقات
وشكرا ليك او ليكى

nigro يقول...

أشاساً أصلاً الست عندها حق
يعني إيه قميص بني زرايره متخيطة بخيط أزرق؟
ده تمويه يعني ولا إيه؟
هي شافت الأشيك يبقى الخيط أبيض
و أهو كل لما زرار يقع تخيطه بخيط أبيض
ما هو أصل ماينفعش تفك الزراير كلها و تخيطها من أول و جديد
ده يبقى افترا ولا مؤاخذة
شفت الست عندها حق ازاي
آه هو الواحد مننا من حقه طبعاً و من غير جدال إن يفتري على الست بتاعته
و دي حق من حقوق الراجل اللي نص عليها الميثاق العام للقلل المتحدة بس مش للدرجة دي
نفتري بالعقلللل
___________________________

فرنسا و الرايق و عسقول و آبي و الطائر الحزين و مفقوعة و مفروسة و داليا قوس قزح و خالد همس الأحباب و صبرني يارب و المواطن النايم و د هيما و سومة المجنونة

يا نهار أبيض يا جدعان
على رايك يا أبو العساقيل
دي باينها هاتولع

الواحد يمشي دلوقت رافع راسه وسط الخلايق
زرغطي يا أمااااا
يووووووه نسيت
ما بتعرفش تزرغط


يلا سلام

Empress appy يقول...

هو الطائر الحزين
عرف اخرته فين وهرب ايه يا عمنا ما تطلع رد ولا هتفضل مستخبى اطلع متخافش هنديلك الامان
اطلع

فرنسا هانم يقول...

يا صباح الخناقات والخلافات
عمنا احمد الباحث عن الحقيقه جاى هنا وبيهددنا بمجلس الامن
ههههههههههه
انت متعرفشى اننا مسندوين ولا ايه ؟؟؟
احنا لايهمنا مجلس امن ولا مجلس اداره محل الجيلاتى
احنا شغلنا على ميه بيضا يابا
ابن حجر العسقلانى مضى معانا العقد وخلاص وبعدين احنا معانا العلامه الكبير الدكاتره عبده الرايق
هتقولى دكاتره فى ايه اقولك معرفشى لكن انا اعرف انه واصل قوووووووووى
ده حتى بيقول ان مجلس الامن تبعه وبأشاره من صابعه الصغير هيجيب كل الطيارات والدبابات والصواريخ الورق بتاعته ويعلن الحرب العالميه التالته
بقولك ايه يا احمد
كل عيش احسن لك
وبلاش تلعب بالنار
وجهز اوارقك انت كمان احسن هتتخطف هتتخطف
واشترك معانا من سكات
واكسب نفسك انت لسه على وش جواز
وقد اعذر من انذر

فرنسا هانم يقول...

ابن حـجـر الـعـسـقـلانـى
جدع يا طائر
احنا مش بنخاف ولا بنتهدد
وخلى الباحث يعمل اللى يريحه
بس قوله نصيحه اخيره
لانه برضه اخونا وميصحش نسيمه على عماه
قوله
ان احنا معانا طوب شديد الحدف يعنى ممكن ندك قلعته فى ثوانى
وقوله كمان
ان احنا معانا نبله 36 طلقه
ومعانا بازوكا بعشرين صاروخ
غير بقى 20 نخله فيها بلح بالعبيطه
وانت عارف كل نخله فيها كام زباطه
وكل زباطه فيها كام بلحه وكل بلحه فيها كام نوايه يعنى النووى عندنا بالهبولى
انصح صاحبك يا ابن حجر قبل ما يفوت الاوان

ابن حـجـر الـعـسـقـلانـى يقول...

أنا بقول إننا نأجل السلاح النووى بتاعنا دة دلوقتى و نوفر نوى البلح.. و نشغل المساعى الديبلوماسية ... و نشوف هاتنجح و لا هاتفشل ... و وقتها بقى نبقى نحدد يا إما الحرب أو السلام

فرنسا هانم يقول...

اسلام الحضرى
احنا يشرفنا يا اسلام انك تشترك معانا
لكن احنا يسعدنا ان ننشر الجديد
بمعنى
اننا حسب السياسه المتبعه فى المدونه لا ننشر بوست تم نشره من قبل
لكن ممكن لو قصه ظريفه وضاحكه مثلا عجبتك فى كتاب او مجله واعدت كتابتها
يسعدنا ان ننشرها مع التنويه انها قصه من كتاب
مثل قصه حذاء الطنبورى مثلا
عندما كتبتها كتبت بخط مخالف لخط القصه انها قصه قرأتها من قبل
وهكذا تسير الامور
وذلك حتى يكون لدينا الجديد دائما
ونحن فى انتظار اعمالك الجديده
او اى قصه جميله ضاحكه تكون جديده
ونحن فى انتظارك
على اميلى
faransahanm@yahoo.com
او على اميل الرايق
aabbddoo666@yahoo.com
او على اميل اعضاء فريق العمل
فكل من الاعضاء مالك شخصى للمدونه
كما يسعدنا ان نتلقى اميلك لارسال دعوه خاصه لك للمشاركه فى المدونه
لان بصراحه مجهود الصوره الموجوده فى رأس الصفحه اعجبنى جدا

فرنسا هانم يقول...

ابن حـجـر الـعـسـقـلانـى
برضه لازم يعرف اننا مش بنخاف بالعين الحمراء
ولازم يعرف اننا مجهزين تماما
لأ وايه نوى بلح ملوكى كمان
يعنى
الباحث رايح رايح

فرنسا هانم يقول...

ابن حـجـر الـعـسـقـلانـى
اما ان كان على المساعى الدبلوماسيه
احنا موافقين
هابعت له الرايق
للتفاوض معاه
ولا اقولك بلاش الرايق لحسن يبعنا كلنا ب 50 جنيه
انا هابعت الطائر الحزين
او البت مفروسه
دول الجناح التفاوضى الخاص بينا
لكن ساعه اللزوم مقاتلين من احدث طراز

فرنسا هانم يقول...

الطائر الحزين
انت سايب مكان خدمتك ورحت فين ؟؟
من امبارح وانت مرديتشى على التعليقات
بس موضوع يوم الجمعه ده يجنن
على فكره
ناس كتير لو سمعت الحكايه دى هتقطع زراير القميص بتاعها علنى ويخلوا كل ايامهم جمعه
اكل وصنعه وقله مرعى

فرنسا هانم يقول...

كاميليا
ههههههههههههه
ضحكتينى يا كاميليا
الرايق رومانسى ؟؟؟؟؟؟؟؟؟؟؟
نو نو نو
انا مش متخيله حاجه زى دى ابدا
انا متهيئلى انه لو قال لمسز رايق كلمه حلوه بياخد عليها فلوس
ياعينى عليكى يا مسز رايق مظلومه
تحياتى لكى يا كاميليا وتحيه خاصه من فريق العمل

فرنسا هانم يقول...

Miss. Sosa
ربنا يزيد الجميع فكاهه
احنا شرفنا تواجدك معانا
مع تحيات فرنسا هانم
اما بخصوص البوست فقد ارسلت لكى بالامس اميل ارجو تفحصه
شكرا لكى

فرنسا هانم يقول...

همس الاحباب
صباح الخير يا خالد
اوعى تفكر انت كمان تعملها جمعه
والا الاسبوع هيبقى فيه 7 جمعات

فرنسا هانم يقول...

رئـــــيسـة حزب الأحلام
هههههههههههه
ومن الموضه ما قتل
تحياتى لكى

فرنسا هانم يقول...

بطوط حبوب
بطوط ازيك دايما منور المدونه بتعليقاتك البسيطه الجامده
اللى فى ال 3 خشبات

فرنسا هانم يقول...

اسلام الحضرى
لا ابدا مشكله بسيطه وجارى حلها
منور يا اسلام

فرنسا هانم يقول...

نداء من الاداره
الى الطائر الحزين
الو يا طائر
الو يا طائر
انا هاستريح شويه
وياريت ارجع القاك رديت على الباقى



حول

Empress appy يقول...

ابن حجر
هو انت قاعد لنا ولا ايه انت احتليت المدونة لااااااا دا انا الم عليك شهرزادددات المدونات ونقتلك هنا

Soooo يقول...

حلوه قوي الفلسفه دي

بس الاحلى بجد .. قفلت الموقف نفسه

اوعو يكون النهارده الجمعه ياجدعان وانا مش واخد بالي؟؟؟؟



سلامووووووووووز

غير معرف يقول...

السلام عليكم ورحمة الله وبركاته

يعنى هو كله ضرب ضرب مفيش شتيمه

ايه يا جدعان كلكم يعنى مع الزوج ومتعاطفين معاه قوى

طيب هى الزوحه دى مش بنت ناس برده ولا بنت البطه السودا يعنى

وبعدين ايه الزرار متخيط بخيط غير اللون هو مش من الممكن انه كان يشترى القميص وهو برده متخيط بلون غير باقى الزراير وحصلت فعلا

اما بقى عن المكواه مش يمكن تكون المكواه بتاعهم بايظه ومش عاوزه تقله ليزعل على الفلوس الى هتتدفع فى تصليحها

وبعدين كده يا حريم المدونه فين التضامن الحريمى مع الزوجه ولا يعنى الرجاله خلاص بقو مظليم واحنا يا ستات بقينا كلنا فوزيه المفتريه
عموما المفترى منه لابو خيمه رزقه
واالراجل ده منه للى كلت دراع جوزها


وعموما لنا رب اسمه الكريم شاهد ومنطلع

غير معرف يقول...

بجد مدونه فوق الرائعة وهادفه جدا

احيى جميع القائمين على العمل بها لحسن اختيارهم المواضيع وصياغتهم لها

وجعلها الله فى ميزان حسناتكم لما تنفعون به الغير وتدخلون الفرح والسرورفى نفوس زائريها

دمتم بكل الخير والسعاده

اسلام الحضرى يقول...

ميرسى كتير يا فرنسا هانم

وانا مبسوط ان البنر عجبك وان شاء الله فى المزيد اما بخصوص القصص فانا احب اتفرج واستمتع واعيش دور المشاهد اما انى اكون داخل الاحداث ...

انا فى خدمة المدونه

ESLAMELHDARY@HOTMAIL.COM

عبده الرايق يقول...

ههههههههههه
حلوه حكايه الزرار دى
ولو الترزيه كلهم قفلوا هنقضيها جمعه
بس تصدق ياطائر
لو كل الايام جمعه هنقبض من غير مانروح الشغل بتاتا
يا حلولى انا كنت اشتغل عشرين شغلانه
واقبض منهم بالدورر
وانت عارف بقى الدورر دلوقتى بكام
ده سمعت انه عدى الجنيه المصرى
بس بقولك ايه
هو الدورر ده فلوس برضه ورق زى اللى عندنا ولا ايه ؟؟؟؟؟؟؟

عبده الرايق يقول...

ابن حـجـر الـعـسـقـلانـى
هيييييييييييييييييه
ابن حجر العسقلانى موجود عندنا
يا مرحبا يا مرحبا
بقولك ايه يابن حجر
انا عارف انك جاى مخصوص علشانى
وجاى تاخد بتارك منى
علشان انا كهربتك
ونورت بيك كل الجمهوريه ب محافظتها ال 15 محافظه
بس انا مكانشى قصدى
واحب اقولك صاااااافى يالبن ؟؟
ولا ناوى تاخد تارك ؟؟؟؟؟
هههههههههههههههه
ههههههههههههههه
انا بضحك على شكلك لما كنت بتنور
ههههههههههههههههه
كان شكله جميل قوى
حتى انا كنت بفكر اعملك فيلم وثاقى
عن اختراع الكشاف الادمى
بجد بجد من غير تهزور
ايه من غير تهزور
لا من غير هزار
منوووووووووووووووووووووور
هههههههههههههه
منوووووووووووووووووور
قوى قوى قوى

عبده الرايق يقول...

الباحث عن الحقيقة
الله ينتقم منك يا فرنسا
بتصدرينى مع الباحث
وبتقولى انى اعرف ناس مهمين قوى ؟؟؟
وبأشاره من صابعى الصغير مش عارف ايه
اعمل ايه انا بقى دلوقتى ؟؟؟
والواد الباحث ده باين عليه شرانى
لكن انا هتصرف
بص بقى يا باحث
انا كان على الخناق والفتونه
انا معاك كاراتيه ماشى
مصارعه ماشى
كونت فول ماشى
مصرعه يابانى ماشى
ملاكمه ماشى
اى حاجه ماشى انا موافق على اى حاجه تختارها
لكن انا بقول نتصارع فى لعبه البلى احسن
انت تشترى بجنيه بلى وانا اشترى بجنيه
واللى يكسب يدى لاخوه اللى مكسبشى
ايه رأيك ؟؟؟؟؟
لكن بقى لو مش موافق
ومصمم على الخناق بالايد
استنى عليا 4 او 5 سنين علشان اتمرن

عبده الرايق يقول...

بت يا مفرووووووووووووووسه
انتى يابت
انتى سايبه المدونه ورحتى فين ؟؟؟؟
انا جايب عزومه لاخوانى اعضاء الفريق
يلا انشاله ماحد حوش
نزلى يابت منى
اخوكم الرايق
بكل فخر
يدعوا كل افراد فريق العمل الى وليمه عظمى
لأ مش الشنطه دى
الشنطه دى فيها غسيل
العزومه اهه فى جيبى
كيس لب بنص جند
عايز اسمع احلى هتاف للرايق
يعيش الرايق
ي
يعيش
ى
يعيش
يعيش يعيش يعيش
اخوانى لاداعى للهتافات
دعونا نعمل فى صمت
انا مش بحب الافتخار
ولما احسن على الغلابه اللى زيكم يبقى لازم الحسنه تكون فى السر
انا هاحسن عليكم واديكم كل واحد لبايه
ولا اقولكم
خلى الحسنه تبقى حلوه
هادى لكل واحد لبيتين
بس مش عايز هرجله
كله هياخد
اقفوا صف
وكل واحد يطلع بطاقته ويجيب معاه اتنين شهود انه فلان الفلانى
وشهاده من المحافظه بتاعته ممضيه من المحافظ ومختومه بختم الهدهد قصدى النسر
ان المدون ده مأخدشى لب من لب المحافظه قبل كده
مش عايز نفس
مش عايز كلمه
لو حد رمش بعنيه هاخد اللب وامشى
سامع كحه
مش عايز حد يكح
ايه فى ايه ؟؟؟
هو الواحد ميعرفشى يحسن اليكم ولا ايه؟

غير معرف يقول...

هههههههههههههههه
لا جامده
قويه جدا
الا لما هو يعنى الجمعه بتعملها بالو لييييييييييييييييه

هههههههههههههه
لا جامده

اسلام الحضرى يقول...

واللب الحسنه ده يا عبده لفريق العمل بس ولا للزوار كمان

اسلام الحضرى يقول...
أزال المؤلف هذا التعليق.
عبده الرايق يقول...

كاميليا
الرومانسيه ؟؟؟؟؟؟؟؟؟؟؟؟؟؟؟
ياااااااااااااااااااااه
انتى جيتى على الجرح
انا الرومانسيه
ان قلبى يخفق اذا ماراى الحبيب مقبل
وان عينى تعشق اذا ظهر الحبيب واقبل
وان روحى تغرق اذا ما غاب الحبيب وتمهل
وان جيبى يتذوق طعم الاوراق الدبل
فيا ليتنى اسرق من البنوك مالا يتخيل

عبده الرايق يقول...

اسلام الحضرى
الحسنه لفريق العمل فقط لاغير
لانهم مثيرو الشفقه
اذ رايتهم بكيت على حالهم
واشفقت عليهم وعلى نحيبهم
واخرجت من جيبك لبا لبا
واعطيتهم الحسنه بدون سببا

عبده الرايق يقول...

اسلام الحضرى
اما ان كان عليك انت
فانا مبسوط منك
علشان البانر اللى انت عملته
انا سمعتك بتتكلم عن البانر مع فرنسا
وضحكت قوى على جهلك
وعلى جهل فرنسا
قال بانر قال
اسمه ممبار
ودى اكله ممتازه بتتخبز فى الفرن زى الفطير
وعلشان كده
وعلشان انت عملت ممبار للمدونه
ولو انى كنت مسافر ومأكلتش منه
الا انى ارحب بيك وبالممبار
وياريت تعملنا حله تانى
وانا هاديلك حسنه لله
يلا
روح اقف فى الصف
ومش عايز اسمع نفسك
ولو عقربه ولا تعبان مشى على وشك متتحركش
مش عايز صوت
وهاديلك زيك زى باقى الفريق
لباتين
ابسط بقى ياعم

المـــفـــــــقــــــــوعـــــة مــرارتـهــا يقول...

عبدو هنا
يامرحبا يامرحبا
نوركم بيقطع في الكهربا

عبده الرايق يقول...

ايه ياعم الطائر
هو انهارده الجمعه فى الرد على التعليقات ولا ايه ؟؟؟؟؟؟؟
انا شايف الناس معلقه ومفيش رد منك
ولا حتى مشاوره
وسامع فرنسا بتنادى عليك
هو انت رحت فين ؟؟؟؟؟؟؟

عبده الرايق يقول...

مفقوعه انا نورى بيقطع الكهربا يا مفقوعه
بقولك ايه
انا عامل وليمه ملوكى لاعضاء الفريق
تعالى قسمى معايا علشان كل واحد ياخد حقه

المـــفـــــــقــــــــوعـــــة مــرارتـهــا يقول...

لب يامفتري هاتوزع لب
انت بتبعزق من ميزانية المدون
انت اتجننت
لا انا انادي بسحب اللب من ايدك
وهاخده انا لوحدي وهااوزعه بمزاجي

Mafrousa يقول...

أ،ا مفروسة على سن و رمح تعزمها على لب
لب يا رااايق
و ده إن شاء الله لب اسود و لا ابيض و لا سوري ؟؟؟؟
ولا تلاقيه لب بطيخ ...ده انت ماتدفعش مليم..و تشتري حلجه

انا اللي يحب يعزمني...يعزمني على فستق...كاجو...لوزمحمص
مش لب و اقف فى الصف......

عبده الرايق يقول...

ايه ايه ايه ايه ؟؟؟؟
هتاخدى اللب ؟؟؟؟
لاياماما
ده بنص جند
يعنى 50 قرش بحالها
وجايبها من مصروفى
عايزه تضحكى عليا وتاخديهم
نو
نو
نو
انا الدكاتره عبده الرايق
محدش يقدر يضحك عليا ابدا

المـــفـــــــقــــــــوعـــــة مــرارتـهــا يقول...

بص بقي البت مفروسة تاخد لباية واحدة عشان الطقم
فرنسا تاخد نص لباية عشان سنانها القدمانية واقعة ومش هاتعرف تقشره والواد الطائر ياخد تحذير شديد اللهجة عشان اتأخر
والواد النايم ياخدله لحاف يتغطي بيه
وآبي تاخد بوكس في وشها عشان يتفرد
بدال مانوديه للمكوجي
واخينا همس ياخد دش مية ساقع عشان يصحي النوم

المـــفـــــــقــــــــوعـــــة مــرارتـهــا يقول...

وانت وزع بقيت التركة علي الباقي بس ماتظلمش حد ياروقة احسن ادخلك في اوضة الفيران بدالي

عبده الرايق يقول...

فستق...كاجو...لوزمحمص ؟؟؟؟؟؟
يادين النبى
الحقوا يا جدعان
البت مفروسه بتتكلم عنجليزى
ايه الفستق ده ؟؟؟
وكاجو
ههههههههههههههههههههه
يا عبيطه
اسمه كاجول
وكان زمان اسمه جدول
2×2 = 4
ايش فهمكك انتى اصلا

المـــفـــــــقــــــــوعـــــة مــرارتـهــا يقول...

البت مفروسة مناكفة وهاتتعبنا احنا نديها حبوب مهدئة تخليها أليفة

انتي هنا يامفروستي
منورة ياختي
اتاري الدبان اتلم
انتي واكلة ايه النهاردة
مش عيب يابنتي اللي ياكل شكولاتة مايلحوس نفسه بيها كدة اتعلموا الكتاكوت بقي فضحتونا قدام الأجانب

عبده الرايق يقول...

فيران ايه يا بنتى ؟؟؟؟؟؟؟؟؟
دول دلوقتى خلاص
رااااحوا
الواد حسن الفراش ضحك عليا وقالى
هاتلهم بسبوسه علشان يبقوا ارانب
وقعدت اجيب البسبوسه واديله نصها وارمى للفيران نصها
وفى الاخر
هش
ماتت الفيران
واللى غايظنى انهم متحولوش لارانب

عبده الرايق يقول...

هههههههههههههههههه
ههههههههههههههههه
ههههههههههههههه
وبقولى فستق وكاجول
وهى بتلحوس نفسها بالشيكولاته
هههههههههههههههه
اظهرى وبانى يا مفروسه
وتعالى اقعدى جنب عمك الرايق هنا
وكلى ام الخلول

المـــفـــــــقــــــــوعـــــة مــرارتـهــا يقول...

سيبك منها دي اصلها ماتعرفش فوايد اللب
ده بيعلي الضغط ويخليه يوصل للسحاب
وبيربرب العضم ويخليه مفلطح مشلطح منبعج الأطراف
حتي القشر بيبقاله فوايد كتيرة منها انك ممكن تتفه علي قفا اللي يضايقك
انتقاماً

عبده الرايق يقول...

مفروسه
انتى مشيتى ولا ايه ؟؟؟؟؟؟؟؟
هتقفى فى الصف يعنى هتقفى
ولو سمعت صوتك هاصور الشارع انهارده
قصدى هاصور قتيل
ايوه
انا معايا كاميرا
وهادور على قتيل واصوره

المـــفـــــــقــــــــوعـــــة مــرارتـهــا يقول...

أتفوووووووووووووووووه
أتفوووووووووووووووووووه
ده مش حاجة وحشة
ده لب سوبر مابيأذيش العصفور
ماتزعليش يامفروسة خدي المنديل ابعدي اللب من علي قفاكي

عبده الرايق يقول...

على رأيك
البت مفروسه مش عارفه فوايد اللب
بقولك ايه يا مفقوعه
ماتيجى نلعب الدنيئه مع الفريق
وناكل اللب كله انا وانتى
انتى تاخدى 4 لبيات وانا اخد الباقى

Mafrousa يقول...

يااااااي انا أكل ام خلول؟؟؟؟!!!
و دول خللوها ليه يا راايق...خايفين عليها تحمض

و بعدين انا مش حقعد جنبك..انا مخصماك ...عزمتهم كلهم على حاجات حلوه و انا لأ
انا عاوزه فستق و كلجو..و لوز محمص
بليييز

شكلاته ايه يا مفقوعه اللى انتي بتتكلمي عليه ديه؟؟؟ده مارون جلاسيه يا جاهله

والدبان اصلا اصلا فى المدونه...انتي مش سامعه الرايق بيكولك الفيران ماتت
كان بيحليلها بؤها قبل ما يموتها

عبده الرايق يقول...

ههههههههههه
البنات هيمسكوا فى خناق بعض
اروح اجيب لهم بنزين على تولع
ولعها ولع ولعها
شعللها شعلل شعللها

المـــفـــــــقــــــــوعـــــة مــرارتـهــا يقول...

اربع لبات بس طب بحبحها شوية
خد انت اربع لبات
وانا اقزقز الباقي

Mafrousa يقول...

ااااااااااه
رااااايق انت عارف انا عاوزه ايه؟؟؟؟
السوداني بتاع القرود
ايوون ايه مش عارفه
اللى لابس هدوم تقيله ده
الكبير الحلو اللى كل واحده عندها 2 سودايتين توينز

عبده الرايق يقول...

انتى باين عليكى هتموتينى ناقص عمر يا مفروسه
ايه الاسماء اللى بتقولى عليها دى
انتى ناسيه انتى بتكلمى مين ؟؟؟
انا الرايق يا بت
ايه رولان جلاسيه ده ؟؟؟
انا مش قلت كلمونى عربى

الطائر الحزين يقول...

انا لسه داخل من الشغل حالا وعرقى مرقى
لقيت فيه ناس كثير وخير اللهم اجعله خير حد بينده عليا
فقلت يا واد يا طائر انت فين يكنش تهت وولا ايه فقمت رايح جايب عربية وعلقت عليها ميكروفون وعمال ادور فى الشارع عليا اول ما لاقينى هرد على التعليقات على طول

المـــفـــــــقــــــــوعـــــة مــرارتـهــا يقول...

بت يامفروسة
احنا مش بنايت ذي بعضينا ماتيجي نعمل رابطة علي عبدو ونديه الدنيئة اللي بيقول عليها
في الإتحاد قوة
ومفقوعة ومفروسة لو اجتمعوا يتفات لهم بلاد

عبده الرايق يقول...

مفقوعه
لا ناصحه
خلاص بلاش القسمه دى
نقسمها بالعدل
انتى النص وانا النص
بس البت مفروسه جات
ودى عزيزه عليا ولازم تاخد حقها زينا

Mafrousa يقول...

ايه يا طائر ؟؟؟!!! خطوة عزيزه يا عمنا
مش تيجي تقوم بالواجب مع الناس اللي جايه من السفر تعلق ديه
و لا يعني تشغلنا كلنا؟؟!!!!
المهم جاي محمل و لا ايدك فاضيه؟؟؟!!!
كل اللي بيرجع من الشغل بيبقى يا شايل جرنال يا بطيخه يا كيس فاكهه
داخل بإيه؟؟؟؟؟؟

عبده الرايق يقول...

ههههههههههههههههههه
سوداااااااااااااانى قرووووود ؟؟؟
انت كنت حاسس بكده
انا كنت شاكك فيكى
سودانى قرود ؟؟؟؟
وانا بقول شفتك فين شفتك فين ؟؟؟
كده عرفت

غير معرف يقول...

(رائع)
كلهن مثل هذه المراه
اعتقد ان منهن المثقفات تقافه عينيه
فى انتظار القادم
ان شاء الله

Mafrousa يقول...

او نو
نو
نو
انتي حتي مش عارفه قشر اللب بيعمل ايه؟؟؟!!!!
أقول بيعمل إيه يا رااايق؟؟؟!!!!!
اقول بيعمل إييييه يا مفقوعة؟؟؟!!!!
انا مفروسة منكم انتو الاتنين وممكن اقول

وشكلى حيلعب الدنيئه معاكم انتو الاتنين

عبده الرايق يقول...

حمد لله على الشلامه يابو الطيور
ربنا معاك وتلاقيك
روح يابنى ربنا يكرمك وتلاقيك علشان ترد
معاك فلوس للميكرفون ولا تاخد ؟
اخوك سداد

عبده الرايق يقول...

بقى ناويه تلعبى معايا الدنيئه انى ومفروسه
نو
نو
نو
انا جدع
انا مبخافشى من الضلمه
انا مبخافشى من العو
انا عايز اروح
عااااااااااااااااااااااااا

Mafrousa يقول...

غلب حماركو
بيعمل واوا...فيييين
فى بؤ الاطفال الصغيرين علشان بياكلوه بقشرة

عبده الرايق يقول...

مفروسه
انا عازمك على 2 سودانى قرود
بس
اهم حاجه تسمعى الكلام
فاهمه
يلا
عجين الفلاحه

Mafrousa يقول...

هييييه
هييييييييييه
هييييييييه
و خوفت الرااايق....
و عاوز يروح

عبده الرايق يقول...

هههههههههههه
لأ غلط
تخسرى
اجابه غير صحيحه
هارد لك

عبده الرايق يقول...

زحمه يا ولداه كم عيل تاااااااااااااه

Mafrousa يقول...

الطائر راح يجيبلي البطيخه

كل اللي داخلين من الشغل بيبقوا شايلين بطيخه

ولا يمكن بيتغدا
روح يا طاير هات الاكل بتاعك و تعالي
هوه يني اكلته ايه؟؟؟!!
دول شويه فلارس و دمتم

عبده الرايق يقول...

انتى تخوفينى يا مفروسه
لا ياماما
انا بس خايف الواد المكوجى يسأل على البدله
اصلى لازم اقعد قدام الجهاز بالبدله والكرافته
الايجار
ولو اتأخرت الواد المكوجى يجى يتادى عليا

عبده الرايق يقول...

انتى عازمه ينى كمان يا مفروسه ؟؟؟

Mafrousa يقول...

هههههههههههههههه
بتقعد قدام الجهاز بالبدله و الكرافته ههههه ليييه؟؟؟؟!!!!
ده اسمه جهااااز كمبيوتر
ذكر
ذكر
مش جهازه كمبيوتورايه....

عبده الرايق يقول...

يقال والعهده على الراوى
انا الطائر الحزين كان عائد من الشغل
فى السرب المعتاد
وبعدما جلس على الكيبورد شاهد النسر الكبير محلقا فى السماء
فاختباء حتى تهداء الامور

عبده الرايق يقول...

ليه يا فالحه
مش اسمها شاشه ؟؟؟؟؟؟؟؟؟

Mafrousa يقول...

هو الطائر رااااح فين بجد؟؟؟!!!!
انا بقولوكوا ايه احنا لازم نغير عتبه
المدونه ديه فيها عفاريت

اهه الطائر دخل و اختفى

و انا خايفه ادخل اختفي انا كمااان

و انا و رايا راجل عاااوزني بشدة دلوقتي عمال ينده عليا

كل ده علشان اقطعله البطيخه

عبده الرايق يقول...

وفى كمان كيسه
وفاره
ومازر بورد
ده احنا حتى فى زنقه الستات
كل الكمبيوتر مؤنث

عبده الرايق يقول...

روجى يا مفروسه قطعى البطيخه
وانت يامفقوعه شوفى اللى وراكى
وانا سى السيد هاروح اغسل المواعين

Mafrousa يقول...

فروا للطائر ...يمكن عجبته عصفورة معديه طاااار وراها

خلصونا ولاقوه نقوله كلمتين
حطلق النهارده

جوزي عاوز ياكل بطيخ ...حاولت اقنعه انه ياكل لب مش راضى

Mafrousa يقول...

انا جيت....
لسه الطائر مفقود..؟؟؟!!!..
اكيد يامفقوعه كلامك اللطيف طيره
ولا شياكة الرايق و آيافته...طيرته

ولا لما دخل و لقاني طااااار
طيب حتي قولولو قولولو الحقيقه
انا لا بهش ولا بنش....
انا غلباااانه على الآخر
بتفرس و بس....

مواطن مصرى نايم يقول...

ههههههههههههههه
طب يعنى اقوم انا اتوضى عشان الحق الصلى والا ايه ؟
ههههههههه
بوست مكوى بصراحة
تحياتى
eslam

Mafrousa يقول...

مفقوعه....
ده المواطن الناايم راح يتوضى علشان يلحق صلاااة الجمعه

ده بقى بجد النهاردة الجمعه!!!!
الله امال جوزى راح الشغل لييييه؟؟؟؟!!!

maiosha يقول...

كده يا مفروسة

عمالين توزعوا لب وبطيخ ومتعزميش عليا .. عاااااااااااا.. إنتى عارفانى بمووووت فى البطيخ .. كله إلا البطيخ

مليش دعوة أنا عايزة بطييييييييخ

بيكيا للبيع يقول...

ايه يا ست الكوتكووته يا مفقوع مرارنها مالها ابى هتشمتي فينا عبدو ولا ايه ماله وشى ده لسه عامله ماسك وسكيرب قبله
وطمي مغربي من اللى بخمستاشر جنيه

وبعدين يا عم الرايق معاك انت هتجيب لب وبعدها نتخن ونديكوا فرصه تتجمبوزوا علينا مش كفايه بتاع يوم الجمعه اللى صدق نفسه ده هههههههههههههههه

بيكيا للبيع يقول...

يووووووووا

انا appy
معلش بقى دخلت لكوا بلينك مدونه بيكيا معلهش العتب على زرار البلوزه اللى جريت وراه ووقع تحت الترابيزه

هههههههههههههههههههه



انا سمعت ان الطائر الحزين واحد حطه جنب الجامع وكل ما يسالوه يقولهم اصله فاكر ايام الاسبوع كلها الجمعه ومستنى الخطيب ههههههههه
بيزوغ من الشغل يعنى هههههه

الطائر الحزين يقول...

ابن حجر الله ينور عليك يا باشا ويكرمك ويطعمك ما يحرمك ولا يقطع لك زرار يارب

============
مس سوسة ربنا يهدى الاحوال
============
همس يا خويا حازى فى الصف حازى
==============
رئيسة حزب الاحلام ايام زمان كان اللى بيسيب الزرار الفوقانى مفتوح بيقول عليه شمحتجى امال اللى بيبقى مقطوع هيقولوا عليه ايه؟؟
انتظرى فلسفة التخديعه
============
تسلم يا بطوط
============
صبرنى يا رب
الراجل من اللى هو فيه مش بياخد باله حتى من اللبس يا جبابرة
=============
كاميليا
كملى ضحك على اقل من ضحكك قصدى من مهلك وعلقى
============
اسلام يسلم مايكك يا باشا
================
طبعا بأمانة مش كلهم ولا حتى نصهم ولا ربعهم احنا اللى مفتريين
=============
جنت على نفسها مين سمعينى كدة تانى
اااااااااااه
براقش
ودى كلبة كانت عندد قومت اكلت من أكل قوم تانيين فراخ وحاجات كدة قبل انفلونزا الطيور فؤوووووم جه القوم التانيين راحوا اشتكوا القوم الاولنيين فحكم عليهم القاضى بتعويض فسابوا القوم البلد وهربوا وقامت المعركة
وجنت على نفسها براقش

الطائر الحزين يقول...

مايوشا
ما احنا ماشيين لما نشوف اخرتها المرة دى جت فى قميص المرة الجاية مش عارفين هتيجى في ايه
===========
فاتيما
دى تفاصيل ضقيقه وملائى فى الشغل هو احنا عندنا الا نظر كلنا نظر
==================
ده افترا يا سوسا وانا اللى كنت فاكرك حيادية طلعتى ستاتية بحته
============
ايتها المفقوعه مرارتها
انتى لازم تعملى تمثال لزوجك اولا لانه لابس نفس القميص يومين ورا بعض ثانيا انه مستحمل الكرافت فى الحر ده ثالثا بيعرف يدارى امورة وبيقول انه بيروح الشغل
================
مفروسة طبعا أخر حلاوة الستات اللى بتصدق دى مفيش كدة خالص مفيش كدة ابدا منتهى المفيش كدة
================
الباحث عن الحقيقة مسااااااااااء الخيييييير
مين اللى اتسرق؟؟؟ ابن حجر ده يسرق بلد بزيها لو معاه فلوس تبقى عارف تسأل مين اما لو معهوش يبقى اسال الحريم
الله يكرمك يا أخى
مليش دعوة بامم متحدة ولا اى امم خالص انا عاوز اخيط الزرار
=================
منور يا بن حجر
================
جمال طه
كله تمام الا يطول لسانا دى لا يعم
امين
===============
نيجرو
ارجو مراجعة التدوينة بعد سماع الصفارة قصدى بعد لبس النضارة
لبنى مش بنى
=====================
شكرا لكل من رد غيبة الطائر الحزين مردوده لكم فى الافراح والغيابات
===============

حنين القلب يقول...

هههههههههههههههههههههههههههههههههههه
بجد بوست دمه عسل
دى الست غاويه مشاكل والراجل امير وطيب على فكرة انا ساعات بعمل كده وهو يحاول يعدى الحكايه وانا ابدا لازم النكد اومال هنعيش من غير فلفل وشطه
بس احلى حاجه انه نزل يصلى الجمعه .
ههههههههههههههههههههه
تسلم ايدك يا طائر يا الحزين
سلام

nigro يقول...

إيه يا عمنا الطائر؟
بني من لبني مافرقتش
أهو كلها ألوان
و بعدين إيه يا عم؟ انت حسستني بالعجز خالص
أنا اصلاً نظري ضعيف و لابس نضارة
تقوم تقولي ألبس نضارة تاني؟
لا يا عم كده أنا مأموص منك خالص
و مش لاعب
هه
):
):
):
_____________________________
إلى فرنسا هانم
حول
وصل لحضرتك ايميل مني
أرجو مراجعته
حول
_____________________________


يلا سلام

صبرني يارب يقول...

بن حجر حته واحده يا جدعان ؟؟؟


نووووووووووورت ياابن حجر عايزين انتاج سريع بقى


منورين يا جماعه كلكم

وحصل خير واتمنى نكون عقولنا اكبر من الموقف ده ويعدى ويمر بسلام ونكمل ضحك وبلاش حد يبوز فى المدونه عشان ده بيعطل المرور .

بت يا مفروسه انتى ومفقوعه قوموا اكووا هدوم اجوازكم وانتم فاضيين وفارسينى كده .
عااااااااااااااااا ماليش دعوه

انت تسال والكمبيوتر يجيب يقول...

ايها المواطنون ناسف لقطع البرامج لأذاعة آخر ما وصل الينا من اخبار:
فى نبا عاجل لوكالة الأنباءالسويسيه ان سر احتفاء السيد عبده عبده عبده الشهير بعبده الرايق هو انكبابه على المذاكره والمراجعه....لأ مش للرايقين الصغيرين ...ليه هو شخصيا ويقول مراسلنا ان السيد الرايق مصمم على الفوز بالجائزه الأولى ومقدارها ربع مليون يورو لمن يجيب عن سؤال جديد مطروح فى مدونتنا ...وجدير بالذكر ان السؤال من المقرر وفى مستوى جميع الدخول ...الفقير قبل الغنى
وعلم مراسلنا ان السيد الرايق سيظهر قريبا ولكن بنيو لوك ...والآن نعود لمواصلة برامجنا المعتاده
http://netonradio.blogspot.com

اسلام الحضرى يقول...

لبتين لا انا كده مبسوط خالص

اما بخصوص الممبار فلو كنت اعرف انك مسافر انا كنت اجلته لحد ما ترجع وانت اللى تستلمه بنفسيتك بس ملحوقه

خد الممبار الصغيور ده ليك انت لوحدك

http://img204.imageshack.us/img204/7701/22ya9.gif

اهو لو عجبك يبقى انا ليه لبايه زياده

طمع بقى

Mafrousa يقول...

الأخ إسلام الحضري
-----------------
الصورة المرسله بخصوص الحلقات جميله جداا جداا
انا منتظرة موافقة الجميع لأضافتها
انت ماشاء الله عليك....

كاميليا بهاء الدين يقول...

حبيبتى فرنسا هانم
مدير عام عموم الضاحكون

............
ههههههههههههه
ضحكتينى يا كاميليا
الرايق رومانسى ؟؟؟؟؟؟؟؟؟؟؟
نو نو نو
انا مش متخيله حاجه زى دى ابدا
انا متهيئلى انه لو قال لمسز رايق كلمه حلوه بياخد عليها فلوس
.........
ماهو لازم يكسب برضو
أهو كله اكل عيش وهايرجع برضو لمسز رايق .. رايق ومصفى

.........
تحياتى لكى يا كاميليا وتحيه خاصه من فريق العمل
........

تحياتى أنا ليكى ولفريق العمل
وارفع لكم القبعة احتراما على مجهوداتكم وخفة ظلكم
والبسمة التى تشرق على الوجوه لوجودكم
ههههه طلعت شعر .. معلش

كل الاحترام والود

Asmaa mahaba يقول...

اموت واعرف هى فين الكواليس دى وخناقات ايه لا دا انا كنت نايمه فى العسل
ياله حصل خير ان شاء الله
وصيتى ليكم العبوا مع بعض متتخانقوش
سومه_87

Doba يقول...

العيب مش عالراجل
العيب عالبونية اللى قايدة صوابعها العشرة شمع علشان ترضى الراجل وهو مش مرضى

هيه لو كانت من الأول جابتله القميص المتكعور فى ارضية الدولاب كان لبسه وحمد ربه وباس ايده شعر ودقن

لكن نقول ايه عالحريم اللى مدلعه جوازتها دول اما ستات مايصة صحيح
===============

ايه يا عم الرايق
بقالى يومين واقفة فى الطابور
والتعبان لف على وشى مرتين
والحية ام جرس جت وقالت فوووو فووو فووو وانا ولا اتهزيت ولا اتحركت

هو انا فديك الساعة لما آخد من الرايق هديته الميمونة التابعة للسودانى الفزيع ابو 2 سوداناية توينز

انا مستنية فى الحر أهو ومش عاوز أشجب وأنتحب بقى

كاميليا بهاء الدين يقول...

سيادة الفوهلر رايق

طبعا انت الرومانسية والرومانسية انت
ودى فيها كلام؟؟

حلوة الابيات بتاعك جميلة
رومانسية دبلوماسية ماسية

تمام كده


كل التحيات والاحترام

مواطن مصرى نايم يقول...

هى سومة بتيجى تضرب و تجرى كده زى بلبل ادره
كده ليه
ايه يا سومة فين الشغل
لا لا
اخرتك معايا وحشه
خلى بالك على نفسك

الباحث عن الحقيقة يقول...

نووية يا فرنسا
عايزاها حرب نووية

انا مستعد اسيبلكم عسقول بس بشرط تدفعوا الجزية

الفين لالالاي ولالي وإلا هفضحكم في جرنال ما تزوقيني يا ماما صفحة مليون وتلتمية

Asmaa mahaba يقول...

مواطن
انا اللى انت قلت عليه دا مع انى مش فاهماه لكن حسابك عسيييييير معايا
للللللللل

انت تسال والكمبيوتر يجيب يقول...

الرايق غدا الأربعاء 2-7 يعقد مؤتمرا صحفياالساعه التاسعه وعشر دقائق صباحا وهو مذاع على أذاعة مصر الرئيسيه ويعلن فى المؤتمر توصله لأختراع عجيب يقضى على مشاكل نقص المال فى ايدى الكثير من الناس نهائيا
التفاصيل وكيفية الستماع لمن هم خارج القاهره يكون من خلال رابط فى موقعنا
http://dear.to/cairo
وسيتم تسجيل المؤتمر ويذاع بعد ذك فى ارشيف مدونتنا
http://netonradio.blogspot.com

غير معرف يقول...

السلام عليكمزززانا صلاح عضو جديد بالمدونة و قمت بلضافة اللينك الخاص بيك و اتمنى انك تيجى عندى و تشرفنى يتعليقك
http://salah-online.blogspot.com

قوس قزح يقول...

مالهم التى شيرتات !!!
ماهم زى الفل اهم ولا زراير و وجع دماغ

بس عارف هو عنده حق فى حكاية اللون دى
انا ممكن اغير كل الزراير بس يكون لونهم واحد

بوست جميل
تحياتى

قوس قزح يقول...

يا مراحب يا مراحب

نورت المدونة يا ابن حجر

سمعت ان العم جوجل واخد منك وصلة و عامل فرح على باب البلوجر

maha zein يقول...

يوووووه علي الستات وكسلها
بجدليه الواحدة مش تبقه مظبتهة حاجة جوزها علي سن ورمح
انا بصراحة يا رجاله شايفة ان الست دي غلطانة والغلط راكبها من ساسها لراسها
هو في ايه
اذاي تسمح للراجل انه يعنيينزل بزرار مقطوع
لا بجد
اذاي والله
وبعدين مالك يا جدع في ايه
ما تهدي اللعب شوية
قال هي نقصة تلاكيك
الاتنين شكلهم ضاربين علي فكرة
ربنا يهنيهم بجد

Dr. Ibrahim يقول...

طيب يالا انا رايح أصلى الجمعة


د/هيما

Mafrousa يقول...

د\هيما
-------
اوااااااااااااااااام
الخطبة حتخلص
ههههههههههههههه

اهو ده عيبه يقول...

ايه التحامل على الستات ده
افرض الست مهيسة ومش شايفة الخيط الابيض من الازرق
حاجه غريبة قوى يعنى مفيش ازرار قصدى اعذار

بس بجد حكاية جامده وتضحك موت
تحياتى لك

انت تسال والكمبيوتر يجيب يقول...

المؤتمر الصحفى الذى عقده احوكم لواء دكتور محافظ امين شرطه عبده الرايق البوم صباحا فى تمام التاسعه وعشر دقائق واذيع على الهواء مباشرة على موجات اذاعة مصر الرئيسيه واعلن فيه اكتشافه الجديد للقضاء على نقص المال فى ايدى الكثيرين من ابناء الشعب ...هذا المؤتمر قد احدث ردود افعال عالميه واسعة النطاق وترجم الى كثير من لغات العالم كان آخرها لغة زيمبابوى ...ومن فاته الأستماع يمكنه الأستماع الى المؤتمر وتصريحات العلامه الدكتور لواء امين شرطه محافظ عبده الرايق فى مدونتنا او موقعنا وهما كالتالى
http://netonradio.blogspot.com
http://dear.to/cairo
والتسجيل موجود فى الأرشيف حلقة 2-7-2008

الدفاع يقول...

فرنسا هانم
السيد المبجل عبده بك الرايق
شكرا على المدونه الرائعه
الطائر الحزين
انت عندك فلسفة الزرار بس ؟؟؟؟؟؟؟؟
احمد ربنا غيرك عنده فلسفة الهدوم كلها وفلسفة الجلوس فى البيت وفلسفة النوم وفلسفة العيال وفلسفة ال......يالهوىىىىى
انصحك بحل بسيط لمشكلة الزراير والملابس
جيب اطقم زراير موحده لكل القمصان وبكرة خيط لون واحد وبالتالى تتحل المشكله
احنا ليه مصممين نتعب الهوانم اللى احنا متجوزينهم انا بادعو من هنا لتوحيد الزراير ولون الخيط وياريت كما لو نوحد القمصان يعنى يبقى القمصان كلها لون واحد
وتحيا الوحده الزراريه

الدفاع يقول...
أزال المؤلف هذا التعليق.
Foxology يقول...

هههههههههههههههههههههههههههههههه

يا خبر ابيض ايه الغيبوبة دى ؟؟ :))

بس ياترى الامام طلع زراره مقطوع هو كمان ؟؟ :))

تحياتى :)

د. إيمان مكاوي يقول...

بجد تدوينه جميله ..خليتني أضحك من قلبي
تحياتي

الشباب يقول...

http://shbabelyom.blogspot.com/