الخميس، يونيو 05، 2008

الافتتاح

اصتبحنا واصتبح الملك لله
ياساتر على بخلك يا فرنسا هانم عامله مدونه جديده مشتركه معايا وجايبه قفل صغير بتاع لعب الاطفال ...اللهم انى لا اسألك رد القضاء ولكن اسألك اللطف فيه ...انا كان ايه اللى طسنى فى نافوخى واتشارك مع الست دى ؟؟؟.......يلا حصل خير ...واحسن حاجه انى جيت هنا قبلها علشان افتتح انا المدونه واقعد على الكرسى بتاع رئيس مجلس الاداره ..وفرنسا تمسك سلاح المقشات ....علشان تغنى والله يازمن ما بايدينا زرعنا الشوك ولا روينا يا زمن
وكويس انى جبت معايا القصافه علشان اقص الشريط
انا مش عارف فرنسا اتأخرت كده ليه ؟؟؟ الساعه دلوقتى سابعه ونص واحنا ميعادنا الساعه 8 يعنى فرنسا اتأخرت نص ساعه ...وبما انى جيت قبلها وبما انى اصبحت رئيس مجلس الاداره ...فانا هارفدها وارميها فى الشارع
طاااااااخ طااااااااااخ طاااااااااااخ
الباب بيخبط اكيد فرنسا ...طيب بتخبط ليه ممعهاش مفتاح ولا ايه ؟؟؟؟.....وبعدين القفل لو نفخت فيه هيفتح لوحده ...اروح افتح
عامل :- السلام عليكم
الرايق :- وعليكم السلام ورحمه الله وبركاته...حضرتك جاى تحضر الافتتاح ؟؟؟؟
عامل :- افتتاح ايه يابا هو انا فاضى للعب العيال ده ....انا جاى اعلق اليافطه واركب كام برواز وامشى
الرايق :- وزعلان ليه يا مستر ؟؟؟؟ عنك اليافطه اهى ركبها....بس قولى ايه رأيك فى الاسم بتاع المدونه
عامل :- يا عمنا اطلع من نافوخى بقى ...مدونه ايه وزفت ايه ....هو انا ناقص ....ورينى يا عم اليافطه علشان انيلها مكانها واغور من هنا على الصبح
الرايق :- فى ايه يا عم الحاج انت زعلان ليه ؟؟؟؟.....خد اليافطه اهى ركبها واتكل على الله
عامل :- اسمها ايه ؟؟....فرنسا والرايق ....طيب فرنسا وعرفناها ام اللمبى فى الفيلم ....طيب من الرايق ده كمان اكيد عيل فرفور من العيال بتوع بابا وماما ..ناس فاضيه صحيح ...هو فى حد رايق فى الزمن ده ؟؟؟؟؟.....بذمتك يا محترم ....وانا راضى ضميرك عاجبك انت الننوس اللى كاتب على نافسه رايق فى الزمن ده ؟؟؟؟
الرايق :- اممممممممممممممممممم ........هو يعنى اصل يعنى ....هو يعنى
عامل :- اوعى يا عم انت هتيعيعنى فيها ....ناولنى اليافطه
الرايق :- بقولك يا اسطى ...انا متهيئالى ان اليافطه مايله شويه
عامل :- سلامه نظرك يا سيدنا اليافطه لسه فى ايدى معلقتهاش
*********************
ايه ده هو الرايق وصل ..وايه اللى كاتبه ده ؟؟؟؟
هههههههههههههه
هتشغلنى فى سلاح المقشات يا رايق...طيب بص فى المرايا قبل ما تطلع من بيتكم....وعايز تبقى رئيس مجلس الاداره...ياخى اتنيل على عينك
شوف يا رايق
عايز نبتدى صح يبقى لازم نتفق
اولا :- لازم وشرط اساسى انك تتعلم القرايه والكتابه من جديد....يعنى من بكره تيجى ومعاك كتاب معلم القراءه ومعلم الكتابه ومعلم الحساب كمان وانا هاتفق مع استاذ يجى يعلمك كل يوم
ثانيا :- ممنوع منعا باتا السلف من اى حد فى المدونه دى ...عايز تستلف روح مدونتك وبراحتك خالص
ثالثا :- مفيش حاجه اسمها رئيس مجلس الاداره ولا غيره
واعمل حسابك اى كوبايه هتوسخها واى طبق هتاكل فيه تغسله
رابعا :- بلاش تتكلم عن السياسه ولا عن الجغرافيا ولا عن التاريخ ولا عن العلوم و ........ اقولك انت تنزل تدوينتك بالمشاوره احسن
************************
نهارك ملبد بالغيوم يا فرنسا
انا لسه هاتعلم القرايه والكتابه .......انا الشعب يا ماما
انا التاريخ انا الحضاره انا التقدم
انا جعان يا فرنسا
قومى اعملى لقمه ناكلها
*************************************
ما بلاش انت يا رايق
كل واحد مسئول عن نفسه
ولا اقولك انا عندى فكره
مفروض رئيس مجلس الاداره يشتغل فى المدونه
تحب ابقى انا الريسه واشتغل فى المدونه
اكنس واطبخ وامسح واعمل شاى للزباين وانفض الكراسى واصلح بوابير الجااااااااااااااااز
*********************
نو
نو
نو
انا رئيس مجلس الاداره
وانا هاقوم بكل اعمال المدونه
والله يا زمن ما بايدينا زرعنا السوك ولا روينا يا زمن
وانت يا زمن قاسى علينا يا زمن
***************
طيب يلا روح اعملنا كوبيتين نسكافيه بسرعه يا ولد يا رئيس مجلس الاداره
ههههههههههههه
متضحكوش على الرايق
جرى يعمل نسكافيه وهو فرحان وفاكر نفسه رئيس مجلس الاداره بجد
اخوانى المدونين اخواتى المدونات
احنا يسعدنا ان نقدم لكم اولى تدوينات مدونه فرنسا والرايق
والحوار تم بينى وبين الرايق عن طريق الاميل
اما بعد صدور المدونه سيكون الحوار عن طريق المسوده او المحفوظات فى المدونه
واحب اعرفكم ان المدونه ستكون عباره عن قصص ومواقف كوميديه
اشكركم جدا والسلام عليكم
*************

اوعى تنزل الستاره يا عم الحاج
ايه ياست هانم
هو المدونه سايبه ولا ايه؟؟؟؟؟؟؟؟
هو انا مش رئيس مجلس الاداره ولا ايه ؟؟؟؟؟
اوعى كده من وش الكاميرا خلى الصوره تطلع منوره
مع تحيات اخوكم عبده الرايق
رئيس مجلس الاداره

هناك 90 تعليقًا:

nigro يقول...

أنا جاي أبارك أقول
أنا ألأول
أنا الأول
أنا الأواااااااااااال

nigro يقول...

لا لا لا لا
إيه الداخلة الجامدة
أنا بجد متخيل شكل المدونة إزاي
تحفة
تحفة
تحفة

و كمان تحفة من عندي يبقوا أربع تحف
فرنسا و الرايق يا جرعان

بالتوفيق إن شاء الله
و مستنيين الجااااااااااااي

يلا سلام

الطائر الحزين يقول...

مبروك الافتتاح

اقترح ان تحدد الاقامة فى المدونة وكل واحد يبقى له لحدودة اللى عارفها وكمان ممكن نخلى بينكم قوات حفظ سلام


يعنى متلقوش الا يوم النكسة تفتحوا فيه المدونة الله يحظك منك ليها

تحياتى

واحدة مفروسة يقول...

لووووووولييييييييييييي
ألف نهار أبيض ألف نهار مبروك
و سع ياض فين البهوات اللى هنا أحنا جايين نبارك و نهنى..على افتتاح المدونه

فين الست فرنسا و الاستاذ عبده

أموه أموه ..الف نهار مبروك يا فرنسا ياختى ..تغير العتب حلو برضه ياختى فى الزمن الاغبر ده .....عقبال ما تمليها يا لبوستات و التعليقات


العامل:مالها التعليقات يامودام

محسوبتك مفروسه ياخويا ...واتنيل انت خليك فى التعليقه المايله بتاعتك ديه



امال يختى انا مش شايفه الرايق......
إنشالله يكون بخير كده و صحنه معدن
بيعمل نسكافيه هههههههههههههه

يا راااااااااااااااااايق والنبى ياخويا معاك واحد لمفروسه من غير سكر
اصلى عامله روجيم


مبروك

فرنسا هانم يقول...

nigro
عزيزى واخى الغائب بعد طول غياب نجرو
انا يشرفنى ان يكون اول تعليق من نصيبك
لان اول تعليق فى اى مدونه جديده يصبح علامه فى المدونه

فرنسا هانم يقول...

الطائر الحزين
هى طبعا صدفه حكايه يوم النكسه
وبرضه اليوم العالمى للبيئه
اما عن اقتراحك باحضار قوات حفظ سلام
فانا هاعمل للرايف فتره اختبار
لسه ماخدشى الباسورد بتاع المدونه
لو كح
او عطس
هارميه للقطط

حنين القلب يقول...

هيييييييييييييه سادس تعليق
برافو يا فرنسا خليه هو رئيس مجلس الادارة وهو اللى يشتغل وكويس اوى انك قولتليه ولا يتكلم عن حساب ولا تاريخ وجغرافيا اه والنبى يا فرنسا لحسن ده نسنا التاريخ والجغرافيا
وانت يا رايق شيل فرنسا فوق راسك وراس المدونه ماااااااااااشى
وخد بالك انها قالت ليك مش تستلف من حد ورجع ليه الفلوس بقى
سؤال صغنن
مين فيكو اللى هيرد على التعليقان ؟ولا انتوا الاتنين؟
سلام يا فرنستى
سلام يا رايق
رجاء المدونه المشتركه مش تأثر على المدونات الخاصه بتاعتكو .

فرنسا هانم يقول...

واحدة مفروسة
مفروسه يا حبيبتى
لو حبيتى تكتبى حاجه مخصوصه للمدونه انا فى انتظارها على الاميل بتاعى
faransahanm@yahoo.com
ولو حبيتى تشتركى معانا انا تخت امرك

فرنسا هانم يقول...

حنين حبيبتى واختى وحياتى
من ناحيه الرد على التعليقات
دى مدونه كوميديه
اى حد فينا يرد
يعنى بالبلدى الموجود يسد
اما عن السلف
فانا حذرت الرايق وفلوسك هاخدها من عينيه
بحبك قووووووووووووووووووى

عبده الرايق يقول...

والله العظيم حكم
ايه يا ست فرنسا هانم كعب الغزال اللى بيحصل ده
هو انتى مشاركه فرده شراب
المدونه ظهرت
ونزلتى بوست فيها وعملتى تحديث فى مدونتك عليها
وانا باشرب باميه فى حله كمان
الظاهر انى غلطت انى شاركت واحده زيك
انا باعلن انسحابى من المدونه وهاولع فيها
وممنوع الاقتراب والتعليق فى المدونه

عبده الرايق يقول...

ولا اقولك
الطيب احسن
انتى مريضه
ومحتاجه شفقه
وانا مش هادوس عليكى اكتر من كده
بس اعملى حسابك الرايق مش فرده شراب
وادينى قولتها وياريت تروحى لبتاع الكاوتش يركبلك الودن السليمه وتديله الودن البايظه ينفخها
بس بتاع كاوتش ايه ؟؟؟؟
ده انتى يا فرنسا محتاجه تروحى المدينه الصناعيه يعملولك عمره من جديد

عبده الرايق يقول...

nigro
طبعا يا نجرو بتكلمنى انا
ميصحش تكسفنى قدام البيبول
ايوه بتكلمنى انا
انا مبسوط انك اول تعليق

فرنسا هانم يقول...

انت جيت يا رايق
اعوذ بالله
اذا جاءت الشياطين ذهبت الملائكه
اروح انا اريح شويه يا رايق

عبده الرايق يقول...

مع السلامه يا فرنسا
ارتاحى خالص
اشوفك السنه الجايه

عبده الرايق يقول...

الطائر الحزين
تصدق يا طائر يا خويا فرنسا دى باين عليها فعلا ملحوسه
ازاى تعمل المدونه انهارده
مش بقولك
هات ودنك
كلام فى سيرك
العمليه الظاهر لحست نافوخها
وبعدين انا مش محتاج قوات حفظ سلام
فرنسا من نفخه واحد تطير

عبده الرايق يقول...

وعندك واحد نسكافيه للمفروسه من غير سكر وصلحه
ومعاه كوبايه مايه ساقعه من الميه المعدنيه
من الميه الغاليه
خلى بالك يا مفروسه اسمعى تانى
من الميه الغاليه
من الميه الغاليه
ارزقنا يا رب

عبده الرايق يقول...

حنين القلب
اشيل فرنسا فوق رااااااااااسى ؟؟؟؟
ليه اتجننت ؟؟؟
مش يمكن تطلع تخينه تفطسنى
لا يا ستى انا هاجيب لها قالبين طوب تقعد عليهم مش ناقصين وجع قلب

Sally يقول...

ههههههههههههههه
مبروك يا جماعة
مش مبروك عليكم
مبروك علينا احنا
هههههههههههههههه
مدونة جميلة وبشائرها تنبئ بالخير والضحك المتواصل

تحياتى للجميلة فرنسا
ولرئيس مجلس الإدارة عبده الرايق
ممكن كوباية ميه لو سمحت
ههههههههههههه

kochia يقول...

مبروك
وانا متشوقة جدا ليها

تحياتي

mayada يقول...

بس يافرنستي
انا مش جايه ابارك ولا جايه اقولك
الف مبروك ولا بالتوفيق ولا جميله خالص
ولا كدهون
انا جايه اتخانق
الرايق واقف علي باب المدونه وبيقطع تذاكر التذكره بعشره جند اقول له يارايق مش معايا غير خمسين جنيه
يقول ليه هكتب لك الباقي علي دهر التذكره لما تيجي تاني
يرضيكي كده
الف مبروك يارايق الف مبروك يافرنسا

shayma يقول...

هههههههههههههههههه
لا جامده جدا
الف الف الف مبروك على المدونه الجديده

بجد تحفه وانشاءالله هتبقى مدونه مالهاش زى

يا مستر رايق يا رئيس مجلس الادارة
كوبايه نسكافيه معاك لو سمحت

هههههه

سلامى لاجمل واخف دم
فرنسا فى عينيك يا رايق اوعى تغلبها
:)))))))))))

عبده الرايق يقول...

Sally
طبعا بما ان انتى قولتى رئيس مجلس الاداره يبقى كوبايه ميه معدنيه ومن النوع الغالى كمان
وعندك واحد ميه على ميه بيضاء وصلحه

احسن حاجه ان فرنسا زمانها نايمه فى العسل
يلا نوم الظالم عباده

عبده الرايق يقول...

kochia
ياريت تعجبك
احنا نتمنى انها تحوز اعجابكم
ولو فرنسا زعلتك فى حاجه قوليلى
هى بتخاف منى

عبده الرايق يقول...

mayada
برضه كده جايه تشتكينى
لكن هتشتكينى لمين ؟؟؟؟
انا رئيس مجلس الاداره
وممكن اسيح وافضح الدنيا لكن بقول خلى الطابق مستور
ايه ؟
سمعينى بتقولى ايه ؟؟
اسيح ؟؟؟
ماشى
على فكره يا فرنسا
الخمسين جنيه طلعت مزوره

عبده الرايق يقول...

shayma
وعندك واحد نسكافيه من الغالى
شيماء ايديها فرطه وبقشيشها عالى
وكوبايه ميه ساقعه وصلحه
ادى ياستى النسكافيه بالهناء والشفاء
مترح مايسرى يمرى
ايه امشى ؟؟؟
مفيش حاجه طالعه منك ؟؟
ولا حتى 400 جند بقشيش ؟؟؟

الباحث عن الحقيقة يقول...

مبروك يا خاله فرنسا
مبروك يا عم رايق
امي بتسلم عليكم وبتقولكم ألعبوا من غير خناق

هاااا
قلنا ايه
من غير خناق
فرنسا بلاش تعضي الواد
واد يا رايق اي حركة نداله شاورلها بس بقشرة موز وهي هتفهم

واحدة مفروسة يقول...

أنا جيت أشوف النسكافيه بتاعى باينه برد

جرا إيه يارايق انت مستنفرد بالزوار لوحدك و ستك فرنسا نايمه

و بعدين قعدت تتك على الميه الغاليه...و جايبلى الميه الغاليه..لأ يا سيدى أنا بقولك اهه انا ماقبلش الغالي غير من جوزي ...اه علشان نبقى على نور من اولها .....بس طبعا لومصمم أنا ممكن اخد تمنها ..اصل جوزى معذور اليومين دول

عبده الرايق يقول...

الباحث عن الحقيقة
اخونا الباحث عن الحقيقه
فعلا يابو حميد انا هارودها بقشره الموز
وتحيا ام دبوه العربيه

عبده الرايق يقول...

واحدة مفروسة
يابنتى انتى فهمتينى غلط
هو انا اللى هدفع فلوس كمان
انا بقول ميه من الغاليه علشان تسمعى الكلمه وتعرفى تطلعى بقشيش محترم
انتى بطلتى تقعدى على القهوه ولا ايه
لما القهوجى يلاقى زبون محترم وممكن يجى منه فى البقشيش يقف جنبه وينادى
وعندك واحد شااااااااااااااى وصايه وصلحه
على طول الزبون يدفع

إيمان العزب يقول...

الف مبروك افتتاح القهوة
قصدى المدونة الجديدة
واضح ان الضحك هنا للركب
بس يافرنسا واضح انك هتخدى بحق مسز رايق الغلبانة
ده انت غلبتى سقراطة
بس انا نفسى اعرف هو الرايق كان بيبص على ايه فى الصورة ؟
انا خايفة النور يقطع فجأة فى المدونة
الخضة مش كويسة عليك انت ضهرك واجعك لسة مش هتعرفى تجرى
متدخليش موز المدونة
خدى بالك فيه مؤامرة ضدك .

قوس قزح يقول...

مبروووووووووووك

دى المدونة دى هتبقى حكاااااية
و لا التعليقات فيها بينكم تتعمل مدونات لوحدها

يارب تكون مدونة خير عليكم و تقدر يا عبده يا رايق تعمل منها مليون جند

مبروك يا فرنسا هانم
مبروك يا عبده بيه سيادة رئيس مجلس الادارة :)

wa7ed 2ensan wnsan يقول...

يا صباح الخير

يا فرنسا هانم وميا عبده باشا الرايق

سوري يعني لو كانت فرنسا هانم في الاول انت عارف بقى

ladies and gentelmen

لا مش دي اه سوري القاموس دخل في بعضه

ladies first

وبما ان فرنسا هانم ست el ladies كلهن فاكيد هيا الاول

مبروك عليكم المدونه شكلها هتضيع هموم الامتحانات بس بعد الامتحانات بقى ان شاء الله

للاسف مش هعرف ادخلها الا بعد الامتحانات


سلام عليكم وربنا يديم الاخوه بينكم

nonoymm يقول...

السلام عليكم
عساسيييييييييييييل بجد
مقدمة وافتتاحية سكر
المدونة ملزقة اهي حتى
بجد جميل اوي وضحكنا انا وابو يوسف من قلبنا
ساتابع بانتظام
وفي انتظار المزيد
تحياتي

واحدة مفروسة يقول...

أدفع؟؟؟؟؟؟
أدفع ده إيه يارااايق؟؟؟؟؟
إلحقي يا خااااااالتي
عبده قالب المدونه قهوه بالليل و بياخد حق المشااااريب...

مدحت محمد يقول...

هههههههههههههه
الف الف الف مبروك المدونة الجديدة

اخف دم مدون واخف دم مدونة اجتمعو مع بعض يبقى اكيد ان شاء الله هتكون خرافة
والجواب باين من عنوانه

ان شاء الله هتكون من اقوى المدونات الساخرة الكوميدية

وكويس مش هنسى معاد افتتاحها لانه فعلا يوم ميتنسيش هههههههههههه
ووو
الف مبرووووووووووووووووووووك

ابن حـجـر الـعـسـقـلانـى يقول...

الف الف مبروك على المدونة الرائعة

بس الله يخليكى يا فرنسا بلاش كهربة فى المدونة الله يخليكم .. عشان آخر احتكاك بينى و بين الرايق أنا أخدت منه شحنة كهربا طلعت من نافوخى

يعنى بلاش تنوروا المدونة بالكهربا .. عشان المدونة منورة بأهلها :-) .. و أى خدمة

و بالتوفيق إن شاء الله و مستنيين الموضوعات الجميلة

همس الاحباب يقول...

هههههههه
الف مليون مبروك
المدونة الجديدة بجد انا سعيد جدا جدا
اقولكم ايه طب انا هقفل المدونة بتاعتى واجى اقعد هنا اتفرج ممكن
بقولك ايه يا رايق خلى بالك من نفسك
يعنى فرنسا مش اتسيبك براحتك انا شايفك داخل على طمع وعايز تبقى رئيس مجلس ادارة
وفى الاخر تقوم تعمل نسكافيه ينفع كده
انا جاى اهدى النفوس مش اكتر
بس ما يمنعش انك تكنس المدونة وترش ميه خالنى فرنسا تستاهل كل خير
ههههههه
تحياتى وتقديرى

همس الاحباب يقول...

على فكرة انا بعد كده اعلق2 تعليق واحد ليك وواحد لفرنسا
علشان شايفك واخد فى وشك وبترد على كل التعليقات ومنفض لفرنسا ولا علشان هى تعبانة شوية
خلى بالك دى خالتى وانا عارفها ايدها تقيلة خلى بالك من نفسك
بس بجد انا مبسوط قوى بالمدونة
والف مليون مبروك يا فرنسا

عبده الرايق يقول...

فى ايه يا ست فرنسا هو انا هامسك الشغل كله لوحدى ولا ايه ؟؟؟؟؟
رئيس مجلس الاداره
والنضافه
والبوفيه
وارد على الزباين
وانتى نايمه فى العسل
لا يا ماما قومى شوفى شغلك
ولا اقولك
خليكى نايمه
واحلمى بابو رجل مسلوخه
وامنا الغوله
وانا هاخدم على الزباين

عبده الرايق يقول...

إيمان العزب
برضه فى مؤامره ضد فرنسا ؟؟؟؟؟
ده انا بكتب على الكيبورد وبعد صوابعى بعد ماكتب لفرنسا
متخفيش على فرنسا يا ست ايمان
دى بتاكل اللب بقشره

عبده الرايق يقول...

قوس قزح
ورحمه جدى انتى عسل العسل
عبده رئيس مجلس الاداره
انا احييكى من كل اعماقى واعماق اعماقى
وليكى عندى اتنين نسكافيه و3 فيروز و4 شاى فتله
وكل ما تقولى رئيس مجلس الاداره هازوذ المشاريب
وممكن تكون هناك لحمه وفراخ لو قلتى الشغاله فرنسا
او الخدامه فرنسا
ساعتها هاعملك ابونيه لبوفيه مفتوح لمده شهر كامل

عبده الرايق يقول...

wa7ed 2ensan wnsan
ليدس فيرست
هو فين الليدس ؟؟؟؟؟؟؟؟
فرنسا ليدى ؟؟؟؟؟؟؟؟؟؟؟
امال شاكيرا ونانسى عجرم يبقوا ايه ؟

عبده الرايق يقول...

nonoymm
انا نفسى تضحكوا من قلوبكم دايما
وياريت اقدر اكون اسعدتكم
عارف بتكلم بصيغه المفرد مش الجمع
لان فرنسا من امبارح مدخلتشى المدونه
واكيد اكيد فى بقها ب نص جنيه لبان وحالفه ماتدخل المدونه الا لما تخلصه
خليها براحتها
بس على مين انا بعد ما اخلص الرد على التعليقات هاصدر قرار عقابى للست دى

عبده الرايق يقول...

واحدة مفروسة
بلاغ من واحده مفروسه ضد الرايق
خلاص
انتى جبتيه لنفسك
اسمعى القرار بعد ما ارد على التعلقين اللى عندى

عبده الرايق يقول...

مدحت محمد
يوم افتتاحها ؟؟؟؟
دى مشكله الشريك المخالف فرنسا
تتصور والله افتتحتها من غير ما تاخد رأيى
مشكله ياخى الستات دول

عبده الرايق يقول...

ابن حـجـر الـعـسـقـلانـى
ابن حجر العسقلانى بنوره كله عندنا يا مرحبا
طفى النور يا مستر سعد
مفيش بعد بن حجر حد

عبده الرايق يقول...

همس الاحباب
حبيب قلبى ابو همس باشا
انت بالذات براحتك خالص
تكتب تعليق او اتنين او عشره او الف
او حتى ربع تعليق ولا يهمك
ولو اى حد فى المدونه اتعرضلك وهى طبعا عارفه انا بقصد مين
قولى
وانا اخلى الجزار يغير اللحمه المعروضه عنده

عبده الرايق يقول...

قرار
قرر السيد رئيس مجلس الاداره
الخديو عبده باشا الرايق قرار تدوينى رقم واحد
خصم شهر من مرتب المدعوه فرنسا هانم بسبب تأخيرها عن المدونه من الامس
وجلدها 25 مليون جلده

قرار رقم 2

منع المشروبات الساخنه والمثلجه عن المدعوه واحده مفروسه والاكتفاء بتقديم الشيشه لها

قرار رقم 3

ينشر القرارين السابقين فى الجرائد القوميه وجرائد المعارضه وعلى كل لعب الاطفال ويذاع على قناه القائد العظيم ( حنبعل )التونسيه

واحدة مفروسة يقول...

هههههههههههههههه
حنبعل التونيسيه....ديه ليبيه يابا بتاعة القذافى...هههههههه
و بعدين مش مهم انا بحب الشيشه التفاحه ...أشمها مش أشربها
هههههههه
و ان كان على الساقع لسه د\هيما اللى مخبى المدونين فى التلاجه قال علشان الحر بلاش ساقع ميه و بس
ماشي يا رايق ده انا كان عندي جتة دين فكره حتخليك تعيينى نايبة رئيس المجلس
هههههههههههههههههه

خديجة عبدالله يقول...

روعة بجد يا خالتو فرنسا والرايق برضه كويس ينفع يعنى :)

افتتاحية مباركة وربنا يوفقكما وحمدا لله على سلامتك يا غالية جت متأخرة معلشى آسفة جدا والله

متعرفيش أنا زعلانة من نفسى ازاى علشان أنا عرفت إنك تعبانة قمت قفلت وعيطت ومش كتبتلك أى تعليق بس دعيتلك يا حبيبتى والله ربنا يديم عليكى الصحة والعافية :)

انتى قلبك طيب وعارفة انك مسامحانى اكيد بحبك وفى انتظار المدونة الجديدة

صوت من مصر يقول...

مبروك
مبروك
مبروك

صفا يقول...

مبروك على المدونة الجديدة واضح انها هتكون مدونة جامده الف مبروك

فرنسا هانم يقول...

ههههههههههههههه
قرارات يا رايق ؟؟؟؟
ههههههههههههههههه
من اولها هتدى قرارت
وخصم شهر و25 جلده ؟؟
ههههههههههه
اللهم انت الشافى المعافى يا رب العالمين
وعايز تمنع المشاريب عن واحده مفروسه وتديها شيشه
تعالى يا رايق
تعالى اقولك كلمه فى ودنك
وحياه السلم اللى لميتك من عليه لو متعدلتش معايا وسيبت الضيوف وبطلت تتحنجل على فلوس ولو مبطلتش تقول عليهم زباين وتطلع قرارات لاكون مرجعاك تانى للقفص
اهمد احسن لك

عبده الرايق يقول...

قاعد لك هنا يا فرنسا
مش عاجبك قرارتى وبتهددينى كمان
نو
نو
نو
انا لايمكن اتهدد ابدا
ولكن ممكن اعديهالك وعارف ان انتى بتهزرى مش بتهددى

فرنسا هانم يقول...

اخوانى الاعزاء
يظهر الرايق قام بالواجب وخلص الردود على التعليقات كلها
لكن انا بحييكم جدا وبشكركم على المشاركه فى المدونه
وانا كنت عارفه من الاول ان الرايق ممكن يعملى مشاكل لكن ده عقله على قده
وغلبان

عبده الرايق يقول...

انتى على الهواء ياست الكل ؟؟؟؟

فرنسا هانم يقول...

انت جيت يا رايق ؟؟؟
اهمد بقى دلوقتى خلينى اعرف ارد على الناس

عبده الرايق يقول...

ماشى ياستى براحتك خالص
ردى لكن اياكى والرايق

فرنسا هانم يقول...

واحدة مفروسة
انتى يا حبيبتى تشربى اللى انتى عايزاه وبراحتك خالص
واوعى تدفعى للرايق اى فلوس
انا بجيب كل حاجه على حسابى

فرنسا هانم يقول...

خديجة عبدالله
طبعا يا حبيبتى انا عارفه ان انتى لو كنتى تعرفى من الاول كنتى سألتى
بس برضه سؤالك دلوقتى ترك فى نفسى مشاعر كتير ليكى

فرنسا هانم يقول...

صوت من مصر
3 مبروك ؟؟؟؟؟؟؟؟؟؟؟
يبقى تشرب 3 نسكافيه
بس لما يجى الفراش
طبعا عارفه
الرايق رئيس مجلس الاداره والفراش بتاع المدونه

فرنسا هانم يقول...

صفا
الله يبارك فيكى يا صفا
وشكرا على تشريفك لنا

اهو ده عيبه يقول...

مبروك مبروك
اتنين مبروك واحده لفرنسا والتانية للرايق علشان محدش يغير

وان شاء الله حاسه اننا هنضحك بجد من قلبنا على مواقفكم مع بعض وربنا يستر بقى

فى انتظار الجديد وتحياتى لكم

bo2loz يقول...

7elwa elfekra awiiiii... rbna m3ako w mabrook 3almdwna elmshtrka...mstnya a2ra 7agat 7elwa mnko dyman...take care ba2a..bye :)

واحدة مفروسة يقول...

فرنسا إنتى كويسه؟
انا بعتلك فى الميل حاجات مش عارفه حتنفع ولا لأ

إيمان العزب يقول...

صح النوم يافرنستى
الرايق بيقول انك بتاكلى الموز بقشرة
وبتاخدى صوابعة تكتبى بيها على الكيبورد
خليكى اون لاين عشان عوز يقطع النور على المدونة ويولع فى ابن حجر
خلاص سامحيه المرة دى
ده برضه الرايق مايهنش عليك
انا ياختى مبحبش النميمة والفتنة
وبحب اهدى النفوس على الاخر .

Salwa يقول...

بجد ربنا يوفقكم

إن شاء الله هتبقى مدونه خطيره

بالتوفيق دايما

المـــفـــــــقــــــــوعـــــة مــرارتـهــا يقول...

باين علي فرنسا ناوية تلعبك علي الشناكل ياروقة
أصطباحتكم ملبن ..فرنسا لعبتها صح ولبستك السلطانية أبقي خلي السلطانية تنفعك يارئيس مجلس الإدارة
واحد شاي هنا يارئيس

رئـــــيسـة حزب الأحلام يقول...

ههههههههههههههههههههههههههه
ههههههههههههههههههههههههههه
هههههههههههههههههههههههه
لا مش معقولة الخلافات دى كلها احنا نيجى نفض الاشتباكات دة احنا ممكن نلاقيكم مخلصين على بعض
ربنا يستر ويهدى الحال ولا بلاش يهدى خلية مشعلل عشان احنا نضحك الف مبروك على المدونة

maiosha يقول...

ألف ألف ألف مبروك على المدونة .. فرنسا هانم والرايق مرة واحدة دى هتبقى تحفة

لو سمحت بقى يا رايق بما إنك رئيس مجلس الإدارة يا ريت تعملى واحد قهوة مضبوط لو سمحت .. بس بقولك إيه عالله تطلع من غير وش وإلا والله هقول لفرنستى أنا نبهتك أهو

بس بجد مدونة تحفة إذا كان الإفتتاح كده أمال الباقى هيبقى إزاى..

يالا بسرعة نزلوا أول بوست .. ربنا يخليكوا متتأخروش عليناااااااااااااااااااا

Z_Diva يقول...

لاااا الكتاب باين من علوانه, و ده اتحاد الجبابرة هنا يا رجال :)))))))))

انتم بجد موتوني من الضحك, انتم اصلا كل واحد فيكم لوحده كارثة كوميدية, تعملوا ايميرج بين الشركتين, يبقى اكيد هتنتجوا اكسيد نيتروز و تضيعونا :)))))))

بالتوفيق ان شاء الله و مستنية بقى القنايل الاكسي نيتروزية

قوس قزح يقول...

و الله انت اللى عسل
يا عبده باشا :))

بس و النبى ماليكش دعوة بفرنسا
دى ست الهوانم
كفاية عليا المشاريب و بلاها الفراخ و اللحمة :)

رندا يقول...

انا قلت اجى ابارك وابخر المكان ههههه

مبروك فرنسا هانم
مبروك عبدة باشا

الف مليوم مبروك ليكوا ويارب تكبر
وتبقى من اشهر المدونات

ملحوظية صغننة

انا عايزة رد منكم انتم الاتنين ههههه
اصل عبدة مخلص على الردود كلها

بجد فرحانة بالمدونة جدا ربنا يكرمك يارب

دمتم بكل سعادة و محبوبين من الكل

رندا

خبيب يقول...

ههههههههههههههه

مبروك المدونة ..

الناس لسه مبدأتش ، وبيتخانقوا مين اللي هيعمل النسكافيه !

---

في انتظار الخناقا.. آآآ.. المواضيع الجاية

دمتما بخير

shayma يقول...

400 جند مرة واحده يا رايق
ليه انشاءالله

الحقينى يا فرنسا عبده بيه عايز يقشطنى

هههههههههه
هيا فرنسا الى هتاخدلى حقى منك

مجداوية يقول...

السلام عليكم
الأخ الكريم الرايق
الأخت الكريمة الغالية فرنسا هانم
مبروك المدونة الجديدة

على رأيك اختى الكريمةلكن أنا حاغير شوية لتغير الحالة عندى

تسجيل سلام وانصراف

أراك على خير وعميق شكرى وامتنانى لتواصلك معى ودعائى لك بكل الخير
والسلام عليكم ورحمة الله

بحبك يامصر يقول...

الف مبروك على المدونه الجديده بصراحه هايله الرايق وفرنسا الاتنين دمهم زى العسل وكتاباتهم جميله اكيد هنستمتع بيكم
مبروك علينا

الطائر الحزين يقول...

فرنسا انتى سقيتى الرايق ايه

بقالوا فترة مش ظاهر

اوعى تكونى ساقتيه كندادراى ولا سيكو من اللى بيتباع على العربيات فاكراه؟

ربنا يستر

appy يقول...

للووووووووووووووووولي الف مبروك بجد طيب فرنسا يا حبى ممكن اشرب شاي لو سمحتي ههههههههه بجد انا مبسوطه انكم مع بعض كده ربتا يوفقكم

فاتيما يقول...

إيه دا؟؟؟
79 تعليق و انا معرفشى إلا دلوقتى بس إن المدونة إفتتحت
اخص عليا
طب معلشى
أبارك و أهنى و بعدين نتعاتب
ألف مبروك يا ولاد
و الله ما جمع الا و وفق و المدونة دى هتعمل عمايل محصلتشى
ألف مبروووووك

امل يقول...

مبرووووووووووووووووك
افتتاح المدونة الجميلة دي
ان شاء الله تبقى مدونة دمها خفيف
وروحها جميلة وألف حمد الله على سلامتك
يا فرنسا هانم...
وتقبلوا تحياتي

دعاء مواجهات يقول...

ههههههههههههههههههههههههههههه

اية التحفنة دى يانااس بس

مش قادرة انا

يابختك يانيجرو

انا بحقد علييك بجد

الف مليونين مبرووك يافرنسااا

وانت كمان ياراايق زى بعضة

اوماال فين الحاجة الساقعة بتاعت الافتتاح؟؟

انتوا هتكلوها علينا ولا ايية؟؟

مستنياها

باى مؤقتاً

دعاء مواجهات يقول...

ها فين ياعمنا الحاجة الساقعة

شكلكوا كدة هتقضوها نصب ولا اية

لا بقولك اية ياراايق

فووق كدة انا هنا عند فرنستى حبيبتى ومحدش ياكل عليا حاجة

وبعدين تعالى هنا

انت بترد ع التعليقات بصفتك اية؟؟

مش انت بردو البواب؟؟

ههههههههههههههههههه

هاجى تانى

وحسك عينك ياض ياراايق مالاقيش الحاجة الساقعة بتاعتى ياويلك منى ياراايق..

دعاء مواجهات يقول...

خبرك زى وشك ياوااد ياراايق انت

فين يااض الحاجة الساقعة

رد

ماترد

طب خد دى.....

لا مش على وشك

على ضهر وشك

اوعى يااض يكون عندك اعترااض

امشى من وشى ياللا مش عاوزة ساقع ولا زفت

امشى غوووووور...

gannah يقول...

مبروك يا رئيس مجلس الادارة انت وخالتى فرنسا والله فرحت لكم اوى

سومه...مجنونه فى بلد عاقل يقول...

ههههههههه يا ربنا لالالالا فككم من دى شراكه دى حتبقى كلها خناقه خالتوا انا خايفه عليكى
اسمع يا رايق لو خالتو اتمست باى سوء انا حرجعك تانى للسلم واوز عليك المقدم بطيخ
فى انتظار المزيد ومبروك
سومه_87

سومه...مجنونه فى بلد عاقل يقول...

على فكره يا خالتو فرنسا فى شكوى من الرايق انا دخلت المدونه معايا خمسه وستين قرش فى جيبى دلوقت مش لاقيه خمس قروش بالكامل انا بقدم بلاغ فى الرايق لا مؤاخذه يا عبدوا انت صديق بس فى القرش لا
انا منتظره اخد فلوسى
سومه

فليعد للدين مجده يقول...

مبروك علي فرنسا والرايق مدونتهما الصاعدة الواعدة
لكن قولا لي ما هي وجهة نظركم في اختيار يوم 5 يونيو يوم الافتتاح؟؟

واحدة مفروسة يقول...
أزال المؤلف هذا التعليق.
واحدة مفروسة يقول...
أزال المؤلف هذا التعليق.