الخميس، يونيو 12، 2008

حذاء الطنبورى


خوانى الاعزاء
زى ما قولتلكم قبل قده ان المدونه دى هتكون كوميديه وانا مازلت منتظره ابداعتكم او قصصكم الكوميديه
واسمحوا لى اليوم ان اقدم لكم قصه قرأتها من فتره واعجبتنى جدا
وسارويها لكم مختصره بطريقتى

وهى بعنوان

حذاء الطنبورى

كان يا ما كان ..كان فيه زمان راجل بخيل موله ..والبخل ماليه من ساسه لراسه .كان اسمه الطنبورى ..عمنا الطنبورى باشا كان عنده حذاء متقطع ومتبهدل وطالع عنين اللى خلفوه وكان معاه بقاله سبع سنين ..كل ما الحذاء يعلن العصيان على الطنبورى ويحاول الملص منه ويتقطع الطنبورى ياخده عند الاسكافى ويعلمه الادب ويرجعه للخدمه تانى
لغايه لما كل الناس فى بغداد عرفوا الحذاء بتاع الطنبورى وبقى اشهر من نار على علم
فى يوم الطنبورى ماشى فى سوق بغداد لقى واحد جاى من بلد تانى يبيع ازايز من الازاز المدهب والراجل مستعجل وعايز يروح عمنا الطنبورى قعد يسحلبه ويدحلبه ويضحك عليه ويقوله ان بضاعته كاسده فى السوق ومحدش هايشتريها ..لغايه لما التاجر باعها له بنص تمنها
وهو راجع حود على سوق العطاره واشترى ميه ورد ..وزى ماعمل فى التاجر برضه اشترى ميه الورد بنص تمنها
رجع الطنبورى للبيت وهو فرحان ومزقطط وعبا ميه الورد فى الازايز وحطها فى رف عالى ..وكانت صفقه فيها معظم ثروه الطنبورى
المهم
فى يوم قال الطنبورى لنفسه انا اروح الحمام العمومى استحمى واروق الانانى علشان بكره انزل السوق وابيع البضاعه واتروشن ...نزل الطنبورى الحمام ..وهو فى الحمام قابل واحد صاحبه وقعد يرغى معاه ..صاحبه قاله ..ماتفك الحزام بقى يا طنبورى واتكسف على دمك واشترى ليك جزمه بدل الجزمه اللى لابسها وانت عيل صغير دى ..حرام عليك فضحتنا فى كل مكان...الطنبورى قاله بكره هاشترى جزمه جديده
وبعد ما خلص الطنبورى حمامه وخرج بص على جزمته ملقهاش ولقى مكانها جزمه جديده نوفى بتلمع
الطنبورى قال لنفسه ...ياااااااااااه دا صاحبى دع طلع واد مجدع اشترى لى جزمه جديده بدل جزمتى القديمه ..ولبس الجزمه وروح على بيتهم
ولاجل حظ الطنبورى الدكر
الجزمه طلعت بتاعه قاضى بغداد
القاضى نادى للعسكر وقالهم عايز اعرف مين اتجرأ وسرق جزمتى
العسكر امروا الناس يخرجوا من الحمام وكل واحد خرج لبس جزمته الا ..حذاء واحد بس فضل وكان تحت باقى الاحذيه وهو حذاء الطنبورى
على طول ومن غير كلام العسكر والناس عرفوه ..قاموا جريوا على بيت الطنبورى وهجموا عليه ومسكوه وهو متلبس والحذاء بتاع القاضى فى بيته
وودوه للقاضى
الطنبورى يحلف ويتقطع انه كانم يفتكر صاحبه جايبهوله هديه ..لكن التهمه كانت ثابته عليه ..فأمر القاضى بحبسه وجلده وتغريمه
وبعد ما قضى الطنبورى المده اللى حكم بيها القاضى خرج وهو بيلعن ابو حذائه ..واول ما وصل للنهر مسك الحذاء بكل قوته ورماه فى النهر وفضل يشتم فيه لغايه لما الحذاء غرق فى النهر
روح الطنبورى بيتهم واطمئن على الثروه بتاعته اللى فى الازايز على الرف ونام وارتاح
وهو نايم ..واحد صياد بيصطاد فى النهر طلع الحذاء بتاع الطنبورى فى شبكته ..اول ما شافه ..عرفه على طول ...طبعا الحذاء اشهر من النار على علم
الصياد الامين صعب عليه الطنبورى وقال يا عينى الطنبورى وقع حذائه فى النهر ومعرفشى يجيبه ..اروح اوديه لبيته واكسب فيه صواب
الوقت كان ليل والصياد محبش ينادى ويقلق الطنبورى قام حادف الحذاء من الشباك ..ولاجل حظ الطنبورى النحس الحذاء جه فى الرف ..قام موقع كل الازايز اللى فيها ميه الورد وكسرها كلها
وفزع الطنبورى من النوم فوجد الثروه كلها قد راحت فى ابو بلاش ولقى الحذاء بتاعه فى وسطها ..فنظر الطنبورى للحذاء وقاله ..انت مش ناوى تفارقنى ؟؟طيب انا هادفنك
وفعلا جاب الطنبورى فاس وقعد يفحت فى الارض علشان يدفن الحذاء
الجيران سمعوا ضرب الفاس فى الارض بالليل قاموا مبلغين العسكر ..وخدوا الطنبورى على القاضى لانهم ظنوا ان الطنبورى كان ناوى يأذييهم
فامر القاضى بحبسه وجلده وتغريمه
وبعد ما طلع عمنا الطنبورى
خد الحذاء وطلع بيه على فندق بغداد ورماه فى عين الحمام
بعد فتره الحمامات بتاعه الفندق اتسدت وبدءوا يكسروها ويشوفوا السده منين ..لقيوا حذاء الطنبورى ..علطول عرفوه ..قاموا مبلغين القاضى ..
وامر بحبس الطنبورى وتغريمه كل الاموال اللى دفعها صاحب الفندق للتصليح
الطنبورى حس ان الحذاء مش ناوى يسيبه فى حاله
قام واخده وطلع فوق السطح ورماه ...وكفى خيره شره
لكن كلب الجيران طلع فوق السطح واخد الحذاء فى بقه وحاول ينط بيه تانى على سطحهم لكن الحذاء وقع من بق الكلب فى الشارع وفى اللحظه دى كان واحد معدى تحت البيت ..وقع الحذاء على نافوخه بطحه لانه كان حذاء تقيل وكانت تعويره جامده ...الناس اول ما شافوا الحذاء عرفوه وراحوا للقاضى
فأمر القاضى بغريم الطنبورى مبلغ كبير للجريح ومبلغ اخر على تكرار الشكوى منه ومن حذاءه
وفى النهايه
زهق الطنبورى من حذائه وراح اشتكاه للقاضى وحكى له كل الحكايه من البدايه للنهايه
وفى اخر كلامهبص للحذاء و قال
يا مصدر الاحزان والبلاء
وجالب المحنه والشقاء
وسالب الراحه والهناء
قبحت - النعال- من حذاء
فحن عليه القاضى وامر الناس بالدعاء له
وتبادل الناس روايه الحكايه حتى وصلت الى الخليفه فامر باحضار الطنبورى ولما سمع قصته ضحك وامر له بعشر امثال ثروته

هناك 55 تعليقًا:

قوس قزح يقول...

ده مش بس بخيل ده كمان منحوس
ههههههههههههههههههههه

قصة جميلة اوى

دعاء مواجهات يقول...

احجز التعليق التانى الاول

محدش ضامن نفسة

بيس مؤقت

nigro يقول...

ده إيه النحس ده؟
ده الشوز ده كان مستنصده بقى

صحيح على رأي خالتي نجفة " المنحوس منحوس و لو علقوا على راسه فانوس" .

ألا قوليلي يا فرنسا هانم
هو يعني إيه " علّقوا على راسه " .
تيجي إزاي يعني؟

يلا سلام

Mafrousa يقول...

هههههههههههههههههههههههههههه
حلوه جدا يا فرنستي
هههههههههههههههه
ياعيني عليه و على اللي نابه من بخله هههههههههههههههه
شششششششششششش بس كلام فى سرك و وحياة الطنبورى ما تقولى اللى حقولهولك
مش عارف ليه و انا بستقرا الحكايه ..كأني خير اللهم اجعله خير كده كأني شايفة الرايق ياختي
هههههههههههه
يكونش هوه و غير اسمه فى عصرنا
هههههههههههههههههههه
بعد ما اتحكمله ب10 اضعاف ثروته بقى رايق مش طنبوري
هههههههههههههههههه

Asmaa mahaba يقول...

هههههههه
يا سلام دا انا حاطالب من اليوم بحذاء الطنبورى مادام الخليفه عظم الله اجره حيدينى اربع اضعاف ثروتى هههههههه وبكدا حيبقى معايا فى عين الحسود 250 قرش بالتمام والكمال ....خالتو فرنسا خلى رايق ياب بالخمسه وستين قرش عشان اكمل التلاته جنيه وخمستاشر قرش عاوزه اجهز نفسى عشان انا على وش جواز
يا ناس حرام عليكم
تحياتى ليكى يا خالتو انتى ورايق
سومه_87

maiosha يقول...

هههههههههههههههههههههه
هههههههههههههههههههههههه

أنا مش قادرة امسك نفسى من الضحك .. المهم إن أحسن حاجة فى القصة دى كلها ضحكتنى موت إن كل البلد ككككككككككل البلد عارفة حذاء الطنبورى .. والقاضى بتاع البلد ده فاتح المحكمة بتاعته بس على حس الطبنورى وحذاء الطبنورى

ههههههههههههههههههه

لأ بجد بجد قصة تحفة .. كل واحذ يخلى باله من جذمته لحسن تعمل حركة كده ولا كده ونروح كلنا فى أبو نكلة

رندا يقول...

يااااطنبورى

هههههههههههه

قصة حلوة جدا دة كفايا الاسم اعتقد ان النحس فى الاسم ممكن يغيرة ههههه

تسلم الايادى

رندا

همس الاحباب يقول...

ههههههه
حلوة قوى انا سمعتها قبل كده بس اسلوبك فى السرد جميل
طب اقولك على فكرة يا خالتو
ما نجيب الحذاء لاخويا الرايق
اهو اينفعه برده
لا ما تفهمنيش غلط ومش زى المفروسة ما بتقول
انا قصدى يعنى الملك يعطيه مكافاة ضعف ثروته اهو يعوضه عن الكادر
هى ثروتك كام يا عبده بجد فى الخباثة يعنى هههه
على فكرة انا بحذر انه حد يتعرض للرايق سامعين
تحياتى

حنين القلب يقول...

ده ايه البخل ده
بس احسن علشان يتعلم ان البخل اساس كل المصايب
الا فين الرايق يا فرنسا راح فين والله خايفه يكون هو الطبنورى التانى.
رايق اطلع من المطبخ بقى واقعد معانا شويه
سلام

funckydoctor يقول...

ههههههههه
صباح النحس المدهون بانجان
قصة حلوةقوى

kochia يقول...

طيب مهو حذاء اصيل اهو ومش هاين عليه العشرة
هو اللي غلطان
بدل ما كان يرميه كان يغلفه ويعينه في مكان امين
تحت عينه
بدل ما يعمل حركة وشغب من وراه

حلوة
تحياتي

فرنسا هانم يقول...

اخوانى الاعزاء انا متابعه معاكم
لكن رضيت على زوار مدونتى فرنسا هانم
وانتم عارفين ان جلوسى على الكمبيوتر بسيط
لذلك سارد عليكم لاحقا بأذن الله

اهو ده عيبه يقول...

هههههه
ايه النجس ده
بس يستاهل كله من بخله
اهو دفع اللى وراه واللى قدامه بسبب الحذاء ده
بجد قصه ممتعه واسلوبك كمان فى حكايتها لذيذ

الا صحيح اللى يحب يكلم مصر قصدى يبعتلكم موضوع يبعته ازاى واوعى حد يقولى 140 دليل

تحياتى لكى يا فرنسا انتى والرايق افندى

شفـقــة و إحســــان يقول...

ايه البخل ده يا فرنسا.....لا بس بوست مميز وطريف ربنا يحميكى لنا

دعاء مواجهات يقول...

ههههههههههههههههههههههههههه

انا جيت معلش اتاخرت شوية

المواصلات بقى وكدة انتى عارفة طبعا

القصة دى حلوة اوى

وكعادتك قمر ضاحك يضحكنا

تحيااتى لقلمك ولكيبورك ياقمر
...................................
باركيلنا فتحنا مدونة جديدة

اسمها على حريتنا
منتظرينك

http://3la7orytna.blogspot.com/

انا وعبدالله (واحد انسان)

ومعانا نااس تانية كتيييييييير

وانتى كمان اكيد ولا فية مواانع؟؟

منتظراكى وكل الناس العسولين دوول

بيس

غير معرف يقول...

لذيذة .. من سلسلة مركوب أبو القاسم

الاستاذة فرنسا .. الاستاذ رايق

هذا هو النداء الثالث والاخير لدعوتكما الى زيارتى .. وذلك قبل اقلاعى بالطائرة الى حيث لااستطيع العودة مرة أخرى لحيائى من الالحاح ..

دعوتى هى لزيارة البوست قبل الاثنين الاخيرين ( يبدأ بصورة بنت تعزف الكمان)

ياريت فى كلمة أعرف رأيكم .. واهلا بيكم مقدما

كانت فرنسا معذورة ربنا يطمنا عليها دايما وتكون بخير ..

الآن .. يمكنكم تشريفى

تحياتى

ايام العمر يقول...

يا عينى من كتر بخلة بقى منحوس ومش نحس عادى دة نحس دكر
بس قصة لذيذة
انا اول مرة ازور المدونة وانشاء الله اتابع معاكم
دومتم بسعادة

Empress appy يقول...

ههههههههههههههههه
ايه ده يا عينى صعب عليا خالص خالص خالص

بجد حلوة قوى

غير معرف يقول...

هههههههههههه
لا فظيع
يخربيت نحسه

بس قصه حلوة اوى
دى بجد دى ولا ايه
ههههههههههه

سلامى يا فرنستى
:))

عًٍمًرٌٍوٍ آلنْوٍبٌَِى يقول...

ههههههههههههههههههههههه
ههههههههههههههههههههههه
ههههههههههههههههههههههه
وربنا قصة جميلة جدا جدا
بس تفتكرى لو حد حصلت معاه حاجه زى كده ووصلت قصتو للخليفة الى هو الرئيس يعنى دلوقى ال خليفة ال هيعمل زى ما عمل الخليفة الى فى القصة وهيأمر بأعطائة عشر امثال ثروتو ولا اية النظام
ههههههههههههههههههههههههههههههههههه

بجد قصة تحفة

صحفية روشة يقول...

بخيل ونحس
:)
__________________________________
ميفوتكش البوست الجديد (فال الله ولا فالك)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

عبده الرايق يقول...

قصدك مين بالطنبورى يا فرنسا ؟؟؟؟؟
انتى كده بتخبطى فى الحلل
انتى متعرفيش الرايق ولا ايه ؟؟؟؟؟؟

عبده الرايق يقول...

فرنسا ممكن توصفيلى مكان الخليفه ده
احسن فى حاجات كتير ضاعت منى
اروح له يمكن الراجل يدهانى

خالد يقول...

أولا
يسعدني أن أترك تعليق في مدونتكم المرحة
ثانيا
رأيي أن الطنبوري ليس بخيلا ولم يظهر من القصة أي دلالة على بخله فهو لم يبخل على حذاءه وأصلحه على مدار سبع سنوات دون أن يتململ منه
وأرى أيضا حذاءه قد رد الجميل ولم يتخل عنه وكان سببا في الثروة التي هبطت عليه في نهاية القصة الممتعة
ثالثا
كلنا طنبوري وياما غيرنا الجزمة بعد ما توسلت لنا بالدموع أن نتركها لحال سبيلها ونشتري جزمة جديدة
في انتظار الجديد
بالمناسبة الصحة أخباها اي
أتمنى لك تمام الشفاء

كاميليا بهاء الدين يقول...

هههههههههههههههههه

الطنبورى ومعركة الحذاء من اجل البقاء

ده حظه وحش اوى

ههههههه

ربنا يسعد قلبك يااخى عبده

ويشفى فرنستنا ويرجعها بالف سلامة


كل الود والاحترام

حاجات جوايا يقول...

هههههههههههههه
ده ايه الحذاء النحس ده ياربى
هههههههههههه
بس الحمد لله طلع له فايده فى الآخر وبقى صاحب ثروة بسببه
" وعسى أن تكرهوا شيئا وهو خيرٌ لكم "


جميلة اوى الحكاية دى
دمتى بخير حبيبتى

سالى

Unknown يقول...

هههههههههههههههههههههههههه
ايه ده بقى الرايق وفرنسا هانم فىمدونه واحده مستحيل دا انتوا هتولعوا فيها شكلها كومييديا جامده اوى
ربنا يوفقكم

WAMA Global Store يقول...

Slamo 3lekom

المـــفـــــــقــــــــوعـــــة مــرارتـهــا يقول...

قوس قزح
================
من كتر بخله أتنحس
آدي أخرة البخل
يستاهل إللي يجراله

المـــفـــــــقــــــــوعـــــة مــرارتـهــا يقول...

دعاء مواجهات
===============
فيه عربون حجز
أدفعيه عند عبدو الرايق
وماتنسيش تاخدي وصل
ماحدش يضمن الرايق

المـــفـــــــقــــــــوعـــــة مــرارتـهــا يقول...

nigro
=================
وهي فرنسا كانت جابت فانوس وعلقته علي راسها قبل كدة ؟!
أبقي علقي انتي الفانوس وقوليلنا تيجي إزاي أنتي

المـــفـــــــقــــــــوعـــــة مــرارتـهــا يقول...

سومه...مجنونه فى بلد عاقل
============================
الرايق ياخد وبس
أنتي فاكرة الدنيا سايبة
بطلي أحلام بقي وأنزلي لأرض الواقع
قال الرايق يديكي فلووووس فال

المـــفـــــــقــــــــوعـــــة مــرارتـهــا يقول...

maiosha
=====================
عد غناماتك ياجحا قال واحدة قايمة وواحدة نايمة
لكن دلوقتي هانعرف منين جزم السبعين مليون نفر

المـــفـــــــقــــــــوعـــــة مــرارتـهــا يقول...

رندا
===================
منورة المطرح يارورو
انت ياولد يارايق واحد ساقع هنا وصلحه

المـــفـــــــقــــــــوعـــــة مــرارتـهــا يقول...

همس الاحباب
====================
ماهو لو عملنا كدة واديناه للرايق مش هاينوبه منه غير النحس بتاعه

مادريتش مش الخليفة مات وشبع موت
نجيبله منين خليفة يعوضه

المـــفـــــــقــــــــوعـــــة مــرارتـهــا يقول...

حنين القلب
=================
شكله كدة اخد الكادر وشرخ

المـــفـــــــقــــــــوعـــــة مــرارتـهــا يقول...

funckydoctor
====================
صباحك مسكر مدهون بالعسل الأبيض
وماتنساش الفطير المشلتت

المـــفـــــــقــــــــوعـــــة مــرارتـهــا يقول...

kochia
==================
الحذاء طلع ابن جزم محترمين وماهانش عليه يسيب صاحبه حافي
بس الطنبوري ماطمرش فيه العشرة

المـــفـــــــقــــــــوعـــــة مــرارتـهــا يقول...

فرنسا هانم
===================
عنك ياخالتي
ماتضغطيش علي نفسك وراكي رجالة
ماعلش بقي انا قلت أساعدك وأرد معاكي

المـــفـــــــقــــــــوعـــــة مــرارتـهــا يقول...

اهو ده عيبه
==================
أبعتيه علي أيميل فرنسا او ايميل الرايق او ايميل مفروسة او ايميلي
مستنييين مشاركتك

المـــفـــــــقــــــــوعـــــة مــرارتـهــا يقول...

شفقة هانم واحسان بك
======================
فرنسا هانم بنت روسيا باشا دماغها متكلفة

المـــفـــــــقــــــــوعـــــة مــرارتـهــا يقول...

دعاء مواجهات
==================
ماشي جايين هانأجر عربية حنطور وعلي مدونتك عدل كلنا بربطة المعلم
مش كدة يافرنسا ؟

المـــفـــــــقــــــــوعـــــة مــرارتـهــا يقول...

Sherif
===================
هما هايروحوا فين هاييجوا هاييجوا
بس فرنسا مابيغيبهاش الا الشديد القوي
لكن عبدو الرايق هراب
مش عارفة بيختفي فين الراجل ده ياخويا

المـــفـــــــقــــــــوعـــــة مــرارتـهــا يقول...

ايام العمر
==================
ابقي تعالي وعبدو الرايق ناوي يوزع علي الأعضاء والزوار أرباع جنيه مخرومة
عبدو بحبوح وإللي في جيبه مش ملكه

المـــفـــــــقــــــــوعـــــة مــرارتـهــا يقول...

appy
=================
مايصعبش عليكي غالي ياختي
ومادام صعب عليكي بقي
احنا بنلمله تبرعات انا والرايق ياريت تشاركي معانا

المـــفـــــــقــــــــوعـــــة مــرارتـهــا يقول...

shayma
=================
مش قالت فيها خليفة .. تبقي اكيد بجد وحق حقيقي
مش كدة ولا أيه يافرنستي

المـــفـــــــقــــــــوعـــــة مــرارتـهــا يقول...

عًٍمًرٌٍوٍ آلنْوٍبٌَِى
=====================
ولا هايحصل حاجة
أولاً لانه مافيش قانون ياخد بحق أي حد
ثانياً لأن مافيش حد بيرجع حاجة لاقاها لصحابها
ثالثاً وده الأهم لأن مافيش حد يعرف جزمة حد في الزمن ده

المـــفـــــــقــــــــوعـــــة مــرارتـهــا يقول...

صحفية روشة
===============
ربنا يديمها عليه نعمة
فمع انه بخيل ونحس ومنحوس ... فهو لقي خليفة يعوضه عن خسارته

المـــفـــــــقــــــــوعـــــة مــرارتـهــا يقول...

عبده الرايق
==================
بعد اذنك ياخالتي انا ادله علي العنوان
انت تروح عند مقابر الغفير وتبات ليلتين في المقابر من غير ماتنور النور احسن الخليفة يخاف ويختفي وبعدين هايطلعلك واحد هايقولك شوبيك لبيك
خليفتك وبين ايديك
اطلب منه اللي انت عاوزه وهو هايلبيلك طلبك وابقي طمني عليك بعدها
وقوللي الخليفة عمل فيك ايه ؟

المـــفـــــــقــــــــوعـــــة مــرارتـهــا يقول...

خالد
==============
فيه عشرة بتتوجد بين الجزمة وصاحبها
واكيد حذاء الطنبوري حذاء عشري وأبن حلال وعنده أخلاص وضمير

المـــفـــــــقــــــــوعـــــة مــرارتـهــا يقول...

كاميليا
===================
فرنسا اللي كتبت البوست الجميل ده
عبدو كان بياكل ساعتها

المـــفـــــــقــــــــوعـــــة مــرارتـهــا يقول...

حاجات جوايا
==================
تخيلي بقي معايا لو ده حصل مع حذاء الرايق اللي بيقلعه في الشغل وممكن يتسرق علي باب المصلحة
كان زماننا بنلم من بعضنا عشان نستر رجليه

المـــفـــــــقــــــــوعـــــة مــرارتـهــا يقول...

sasatifa
==================
هما يولعوا وانا ومفروسة هانجيب خرطوم ونطفي فيها

المـــفـــــــقــــــــوعـــــة مــرارتـهــا يقول...

ahmed a.aziz
=====================
وعليكم السلام
اتفضل قهوة
اتفضل شاي
عندنا طبق مسقعة بايت من أمبارح تحب أسخنهولك

أم أحمد المصرية يقول...

حبيبتي فرنسا
سامحني اتأخرت في الزيارة بس و الله ظروف
لكن كالعادة يا حبيبتي تجدين انتزاع البسمة من الافواه و القلوب
اتم الله شفائك
و خلصنا من كل الطنابير الموجودين عندنا