عيله تجنن ...مطلوب عريس

بعد صلاه الجمعه ..وكان يوم الاتنين ..كانت عيلة الرايق قاعدين فى الصاله .. الخمس نجوم .. والرايق زى عوايده ماسك عود قصب عمال يمص فيه ويرمى القصب الممصوص على فرنسا ... وخالد همس الاحباب قاعد ياخد الزباله وعامل نبله وشغال ضرب فى الناس اللى فى الشارع .. وتطلع حنين القلب وهى ماسكه ورق فى ايدها كتير ولابسه جلابيه مقطعه وحاطه ورا ودنها اليمين قلم وورا ودنها الشمال سيجارة

راح الرايق ماسكها من قفا الجلابيه وقال :- ايه السيجارة دى يا بت ؟؟؟

حنين القلب :- يا بابتى مش تفهمنى غلط دى بتاعت الواد خالد قفشتها فى الجزمه بتاعته وقولت افتن عليه واقولك

همس الاحباب :- بت انتى ابعدى عنى انتى هتجبيلى تهمة ولا اعرفها يا روقة ده اكيد بتاعتها انا مدمن عرقسوس وانت عارف

حنين القلب :انا بشرب شيشه ... وانا بولع الحجر لبابتى بشرب نصه يبقى هشرب سجاير ليه ؟؟؟ وربنا يا بابتى مش انا

الرايق :- شط اب يور ماوس منك ليها ورينى السيجارة دى يا بت ده سيجارة مصرى مش مستورد اخس عليكم عيال خيبة .

فرنسا هانم :- يوكسك يا موكوس هو كل اللى يهمك السيجارة مستوردة ولا مصرى

الرايق :- طبعا يا متخلفه انتى السيجاره الاجنبى ولا تأثر فى الصدر بتيتا .. وبتدى قوه ولا عسل النحل الطبيعى

الطائر الحزين :- انت بتقول ايه يابابا ؟؟ الكلام ده مش مظبوط نهائى .. انت اكيد بتهزر

الرايق :- نو نو نو ده كلام صاحبى وصديق عمرى العلامه الكبير حسن باشا الفراش اعزه الله

حنين القلب :- بابتى سيبك من الواد ده انا عايزاكم فى موضوع مهم جدااااا

همس الاحباب : - وبعدين ايه الورق ده انتى ناوية توزعى منشورات ولا هتبيعى ترمس على الكورنيش

حنين وهى عماله تفرق الورق على ابوها وامها واخواتها :- اسكت انت يا خالد ممكن ولا نو ممكن .. شوفوا بقى جميعا يا عائله الرايق المحترمه من اسوان شمالا الى الاسكندريه جنوبا ..مرورا بنزله كعب ونزله السمان ونزله برد ..قررت الفتاه المثاليه حنين القلب المفتريه .. قرار جمهوريا راييقيا رقم واحد

اولا .. مطلوب عريس كامل الاوصاف عريض المنكعين يمتاز بالذكاء والفاطمه .. الطول لا يقل عن 80 سنتيمتر ولا يزيد عن 230 سنيمتر .. تيسيرا لاشتراك اكبر عدد من المتقدمين

ثانيا .. المؤهل .. لايشترط

ثالثا .. العمر ... لايشترط

رابعا ..اللون .. لايشترط

خامسا .. ان يكون المتقدم حى يرزق

وده الورق وال سى فى بتاعى وكل حاجه تخصنى وهنيه لك يا فاعل الخير والثواب ..والسلام عليكم ورحمه الله وبركاته

الطائر الحزين :- ايه البنت المجنونه دى ؟؟ انا طبعا مش موافق

همس الاحباب :- بعد اذنك يا رايق نو نو نو انا معترض انا غير موافق انا كمان ..عريس ايه يا مفعوصة ؟؟؟ وانتى مين هيرضى بيكى من اساسه يا حفيدة ريا وسكينة

حنين القلب :- بص يا بابتى .. سيبك من الواد الملحوس ده ..خليك معايا .. ده الcv بتاعى وفيه كل حاجه عنى من ساعه ما اتولدت لحد الساعه دى وفيه كمان كل طلباتى فى فارس احلامى وفيه كمان العاهات المستديمه وكل حاجه

همس الاحباب:- وبعدين انا سمعت عن طلب وظيفة طلب شقة اما طلب عريس ومنشورات دى نكتة الموسم والمواسم القادمة هو العريس هيتجوز محل كشرى ولا عربية كبده .

حنين القلب :- يييييييييييييييييييييي بابتى سكته بقى وربنا هعضك اخرس ياااااااااااض .. انت اصلا راكب ميكروباص التخلف .. اما انا راكبه طياره التقدم .. ايش فهمك انت يا بتاع النمل ؟؟ ابعد عنى لحسن سنانى بتاكلنى وعايزه ادوق اللحمه

همس الاحباب :- مجنونة وتعمليها ما انتى ليكى 15 سنة ما دوقتيش اللحمة

حنين القلب :- ماااااااااااااااشى خاف على نفسك بقى ...بصوا يا قوم .. انا قررت انى اتجوز انا بقالى 13سنه عايشه وعمرى ما جالى عريس ..انا قربت اصدى يا ناس ...اشمعنى صبرنى يجيلها عرسان واشمعنى خالد يحب ام زغلول هما مش احسن منى انا كمان عايزة احب واتجوز ..عايزه اتجوز .. عايزه اتجوز ..عايزه اتجوز

واختصارا لكل ده وفرت عليكم التعب بص يا بابتى انت معاك 50 نسخه تفرقهم على اصحابك فى الشغل وانتى يا مامتى معاكى زيهم تفرقيهم على جيرانك وانت يا منيل يا همس الاحباب فرقهم على اصحابك على القهوة وانت يا طائر تفرق على اصحابك .. اهم حاجه تجيبوا نتيجه

همس الاحباب :- هههههههه بطلوا ده واسمعوا ده ولسه يا ما نشوف يا وقعة هباب وزفت وقطران سوبر 90 على وشك لا يمكن اشارك فى هذه المهزلة سمعتى برستيجى بين تجار النمل على مستوى العالم

الطائر الحزين :- وانا لايمكن اشترك فى المهزله دى نهائى

الرايق :- خلاص يابنتى انا هكلم العلامه الكبير صاحبى حسن باشا الفراش يشوف لنا عريس حتى لو نص عمر او مستعمل ..

حنين القلب :- نص عمر ربع عمر .. بصوا من الاخر كده .. فيه انذار ان لو عدى الشهر ده من غير ما يتقدم ليه عريس هفجر نفسى فى وسط الحارة وقد اعزر من انذر مااااااااااااااااشى

همس الاحباب :- كلا البطة والوزة كمان لا يمكن ابدا يا شماته ام زغلول فيا

حنين القلب :- بقولك ايه ياض لو خايف على عمرك اسمع الكلام من سكات ماااااااااشى

همس الاحباب :- ايه البنت دى اللى جاية من المدبح على حمار اعرج

الرايق: نونونو بنتى حبيبتى بتشحت عريس مالك يا بت ده انت لسه صغيره شوفى تربيتك يا فرنسا هانم

فرنسا هانم : يخيبك بت من دون البنات جواز ايه يا منيله ده انتى لسه عيله وكنتى بتلعبى فى الشارع مع العيال السنه اللى فاتت

حنين القلب : بصوا بقى جايه من المدبح بلعب مع العيال خلالالالالالالالالالاص انا قررت انى هتجوز الشهر ده وخلاص انا نفسى اتجوز واحلف على جوزى بالطلاق

الطائر الحزين :- للاسف الشديد يا بابا مع غلاء المعيشه ومع ضيق ذات اليد .. هتبقى هى دى فعلا حياه الشباب فى المستقبل شباب وفتيات ..لذلك .. قررت انا الطائر الحزين ان اقوم باعداد سى دى خاص بيا .. وياريت يجيب نتيجه

همس الاحباب :- ايه الجنان ده ؟؟ وانا كمان شوفوا لى سى دى

الرايق :- نو نو نو ... طيب المتنيلين المتجوزين زى حالاتى مالهمشى اعاده قيد ولا حتى ملاحق

عيله تجنن .. الميراث

دق دق دق طاااااخ طااااخ طييخ طوووخ

فرنسا هانم :- يا ساتر يارب ..قومى يابت يا حنين شوفى مين اللى بيخبط على الباب بالشكل ده

حنين القلب :- حاضر حاضر حاضر ماهو مفيش فى البيت الا حنين كل حاجه حنين حنين حنين

تفتح حنين الباب فيدخل الرايق مندفعا وهو يغنى ويقول

الرايق :- الورد جميل جميل الورد .... شيكولاته شيكولاته شيكولاته يو ..اى لاف يو ..... مصريتنا وطنيتنا حماها الله ..الله الله الله

الطائر الحزين :- ايه يا بابا خير فى ايه ؟

همس الاحباب :- لالالالالالالا متبصليش انا بالذات ... انا ماليش دعوه بيك نهائى يا رايق

الرايق :- خدوا يابشر ...خدوا شوفوا التلغراف ده

الطائر الحزين :- تلغراف ايه يا رايق ؟؟ ربنا يستر ورينا كده

الرايق :- هقابله بكره وبعد بكره وبعد بعده واقوله بكره هاقابله هاقابله بكره وبعد بكره ... كان -يو- سى .. البيبسى سى

صبرنى يارب :- فى ايه يا بابا ؟؟؟ هتفرج علينا العماره

الطائر الحزين :- اسمعوا كده يا جماعه ... ابن عمى العزيز عبده الرايق الرجاء الحضور حالا للبلد لاستلام نصيبك فى ميراث جدنا الرايق

فرنسا هانم :- ميراث مين ؟؟؟؟؟؟؟؟؟؟ هو جدك كان حيلته حاجه اصلا يا رايق ؟؟؟ وبعدين انا بصراحه اول مره اعرف ان انت ليك جد اصلا

الرايق :- شط اب يور ماوس .... دونت سبييك .. هههههههه ... زغزغينى يا فانله .. ضحكتينى يا فرنسا .. انا اصلا مولود شيطانى من غير جد ...لا يا ماما ... انا جدى الكبير كان مستولى على محافظه اسيوط كلها .. مركز ابوتيج وام تيج والبدارى والمانيا ومنفلوط وحتى مركز اسيوط ذات نفسها .. انا حاسس ان الميراث بتاعى هيطلع فى المدينه ... وهاورث محطه السكه الحديد والقسم ومحطه الاتوبيس

همس الاحباب :- مابلاش انت يا رايق انا لسه مقروص منك من يوم الوصيه ... اوعى تكون بتتكلم جد وهنبقى مشهورين وهنبقى اغنياء

الطائر الحزين :- اوعى تكون انت اللى باعت التلغراف ده يا رايق

الرايق :- ولد ... لايسلم الشرف الرفيع من الاذى حتى يراق على جوانبه الدم ... ويراق من فعل رايق ... وانا لها .. انا لها .. انى لمنتقم ..انى لمنتقم

حنين القلب :- هدى اعصابك بس يا بابا ... وانت اسكت يا طائر انت وهمس الاحباب ..بلاش تنرفذوا بابا .. حراااااااااااااام عليكم

همس الاحباب :- ااااااااااااااه منك انتى يا سهونه .. يا مين يلايمنى على زماره رقبتك

الرايق :- بتبرطم بتقول ايه يا ولد يا همس ؟؟؟؟؟

همس الاحباب :- لا ابدا يا بابا مفيش

الرايق :- مش عاوز اسمع صوت مخلوق فيكم ... انا من انهارده من كبار رجال الدوله .. ومن كبار الملاك ... واى بندوم ابن بندومه عاوز يقابلنى لازم يا خد ميعاد قبلها بسنه .. وحتى لو كان ابنى .. اييييييييييه هى سايبه ولا ايه ؟؟؟

ويدق جرس التليفون

فرنسا هانم :- ردى على التليفون يا حنين

حنين القلب :- ايوه يا ست ماما .. انا خلاااااااااااااص هاسيب شغلى واتعين عندكم بوابه وسنترال كمان ... الو مين معايا ؟؟؟؟

صوت :- ازيك يا بنيتى .. لا هو انتى بنت الرايج ؟؟؟

حنين القلب :- ايوه .. انى حنين الجلب .. ابنيت الرايج

صوت :- جولى لابوكى .. بيجولك عطيه ولد عمتك .. احنا جسمنا النخلات بتوع جدنا الرايج الكبير .. وطلع نصيبكم ربع نخله يعنى زباطه ونص بلح .. خلى ابوكى يجى ياخدوهم

هم المم ياروحى ..جيبالك مم

همس الاحباب اعزائى مشاهدى قناة الضاحكون الفدائية

جه للبرنامج اكتر من 27 مليون الف اميل بيطلبوا حلقه جديده من حلقات الهم المم .. وعلشان احنا عارفين ان برضه كلكم همكوا على بطنكوا ..يسعدنا ان نقدم لكم برنامجكم المفضل فى جميع القنوات الفدائية المشفرة وغير المشفرة والمشفرة طبعا غير الشفرة بتاعت.. بولو الحلاق .. انتم الان مع البرنامج الذى طال انتظاره لكل السيدات فى بر اسيا الشرقية والغربية والدقهليه والشجنوبيه انتم الان مع برنامج برنامج برنامج ..نهار ملون انا باين عليا نسيت .. هو البرنامج اسمه ايه يا رايق ؟؟؟

رايق اصحى ياعم الحاج احنا على الهواء البرنامج اسمه ايه ؟؟؟؟؟

ااااه افتكرت طبقك المفضل سيداتى انساتى يسعدنا ان نستضيف فى حلقتنا اليوم الشيف القبطان اعالى الحلل والطباق الشيف حوكشه ما تاكلش.. وفى بداية حلقتنا نرحب بالشيف حوكشه ونقوله ناوى تطفحنا ايه النهاردة ؟؟؟

حوكشة : اهلا وسهلا بالاخوات المشاهدات ..وياريت كل واحدة فيكم تجيب قلم وكراسة وتكتب ورايا واللى مش بتعرف تكتب خليها فاتحة بقها والكلام هيدخل لوحده ..النهاردة هقولكم على اكلة ممكن تاكلوا صوابع رجليكم وراها ومش هقولكم هى ايه لانى بصراحة مش عارف اسمها ودلوقتى نبدا بالمقادير 5 كيلو بصل اخضر و5 كيلو بصل ناشف – 5 كيلو قش رز – 5 كيلو سبانخ – 5 كيلو قلقاس وقول شايب وقول كومى – 5 كيلو بامية متقمعة – 5 كيلو نشارة خشب – 5 جرام لحمة بتلو
وطبعا واحدة تسالنى وتقولى يا شيف حوكشة ليه 5 كيلو ؟؟؟ ..اقولها خمسة وخميسة فى عينك وعين الحسود فيها شوكه يا حلاوه ..واحدة رزلة تانية تسالنى قش رز نعمل بيه ايه ؟؟

اقولها يا خايبة بدل ما الفلاحين يحرقوه ويعملوا سحابة سوداء احنا نفرشه فى الطبق ونحط عليه الاكل بدل الجرجير والخس...تيجى واحدة عبيطة تالتة تسال وايه لزوم نشارة الخشب ؟؟؟ ..اقولها ده يا ستى علشان نرشه على وش الطبق بدل البقدونس اللى مش بيتغسل فى محلات الكباب والكفته ...واى سؤال من واحدة خايبة هسيب البرنامج وامشى وتيجى هى تورينى شطارتها وبعد ما نجهز المقادير نجيب صينية كبيرة ونقطع القلقاس والسبانخ والبامية والبصل واهم حاجة البصل يظل بقشره علشان ما تنزليش دموع ونضطر نقولك امسحى دموعك يا امال نحط الخليط السابق فى الخلاط وتعالى قابلينى لو الخلاط اشتغل من اساسه نفرغ المحتويات فى الصينية ونحطها فى الفرن فى درجة حرراة 240 فهرنهيت ولو ماعندكيش فهرنهيت خليها 240سليزونية اتركى الصينية لمدة 3 ساعات فى الفرن واحتمال انها تتحرق وممكن البوتجاز ينفجر ولا يهمك اثبتى على موقفك وخليكى قدام التليفزيون وتابعى برامجنا على محطة الضاحكون الفدائية ،،كلها نص ساعة والمحروس جوزك يشرف وعصافير بطنه بتنهق قابليه بابتسامة عريضة المنكبين وقوليله ثوانى يا حبيبى هاكلك اكلة ما تحلمش بيها ولا عمرك هتنسى طعمها بس الاول اغسل صوابع رجليك كويس ربما تحتاج تحلى بيهم بعد الاكلة وبسرعة هاتى الصينية من الفرن وقوليله تفضل يا روحى بالهنا والشفا وفى هذه اللحظة الرومانسية جوزك هيعمل حاجة من الحاجات دى

( اختيار من متعدد )

ثارابعا : هيبقى قليل الذوق وعديم الاحترام وهيقفل محطة الضاحكون ويكسر التليفزيون على دماغى وفى الحالة دى مضطر اضحى بالمخرج الدكاترة عبده الرايق وانفد بجلدى

***********

سنعود بعد قليل

********

شركه الضاحكون تلى شوووب تعلن عن حاجتها للوظائف التاليه

1- سائق عجله رالى .. حاصل على ليسانس هندسه او بكاليريوس حقوق او شهاده نحو الاميه

2 - عسكرى مرور لتنظيم وتسهيل التنقل بين المراسلين ... خبره لا تقل عن 90 عاما فى مجال المرور

3 - عدد كبير من المراسلين عبر العالم .. بشرط الا يقل السن عن 33 عام وخمسه اشهر و10 ايام و 6 ساعات والا يزيد السن عن 33 عام وخمسه اشهر و10 ايام و7 ساعات

تقدم الطلبات الى اى قهوجى او شفهيا على تليفون الضاحكون 03000333

عدنا

**************

فرنسا هانم .. اهلا بكم اعزائنا المشاهدين مع نشره الضاحكون الجويه

سجلت درجات الحراره اليوم اقل من معدلاتها فى نفس الفتره من كل عام حيث بلغت درجات الحراره 785 لسعه على شارع الجيش من ناصيه ميدان الترعه .. و 788 لسعه على شارع الجيش من ناصيه ابو الحسن ..و781 لسعه على شارع الجيش من ناصيه المثلث بمدينه السويس .. هذا وقد هطلت امطار غزيره مصحوبه بكميات هائله من الثلوج على امتداد شارع الجيش من ناصيه الغريب

ومن المنتظر خلال ال 24 ساعه القادمه ان تزداد درجات الحراره على كل انحاء الجمهوريه

حيث تكون كالتالى

القاهره ... 985 لسعه

الاسكندريه ... 934 لسعه

اسوان ... 1044 لسعه

الجيزه .. 988 لسعه

السويس .. 922 لسعه

وبالنظر الى الخريطه الجويه لجمهوريه مصر العربيه

نلاحظ هبوب رياح شرقيه شماليه جنوبيه على مصر الوسطى والصعيد مع احتمال سقوط امطار الساعه الواحده و45 دقيقه صباحا

لذلك ننصح اعزائنا اصحاب برج الجوزاء والجدى والسرطان بعدم الخروج من المنزل نهارا

اما اصحاب برج الدلو والحمل فننصحهم بعدم الخروج من المنزل طوال الشهر القادم

كما ننصح اصحاب كل الابراج بدفع فواتير التليفونات قبل الثانيه عشر ظهرا والا سيتعرض الجميع للمد على الارجل

سنعود بعد قليل

**********

يسر موسسه الضاحكون تلى شووب ان تقدم لكم بكل فخر باكووره منتجاتنا فى مجال التليفون المحمول

تليفون محمول 16 بوصه للاستخدام العائلى نغمات مجسمه لاغنيه زوقينى يا لمونه - مع تليفون الضاحكون ممكن تتكلم مع اى شخص حتى لو كان فى محافظه غير محافظتك - ممكن كمان تدى رنات وتبعت احلى رسائل - تليفون الضاحكون فيه امكانيات كتييييييييييييييييييييير - فى اوقات البرد ممكن يتحول لدفايه وفى الحر احلى كولدير - تليفون الضاحكون ممكن يتحول لاجمل غساله فوول اتوماتيك وممكن كمان يبقى مكواه رجل -فقط اتصل على 03330300

*********

عدنا

**********

عبده الرايق :- هااااااااااى ايفرى بدى ... الجنرال الدكاتره عبده باشا الرايق يحييكم ويقدم لكم البرنامج القرنى ( احلى مستشفيات)

وكلمه قرنى تعنى فى اللغه العربيه قرن من الزمن اما فى اللغه الانجليزيه فتعنى قرن من الزمن وبلغه اهل الصين تعنى قرن من الزمن .. والان مع الدكتور الكبير سعدون ابو عبدون رئيس قسم الاعصاب والجراحه والباطنى والحاصل على اليوبيل الفضى فى المسالك البوليه والمسالك المناخيريه والحاصل على زماله مستشفى دقق بولايه فوس انجلوس اهلا وسهلا يا دكتور سعدون

سعدون :- مسا التماسى يا استاذ رايق مسا التماسى يا ورد قاعد على الكراسى

الرايق :- قولى يا دكتور فى شكوه من المواطنيين بتقول ان العلاج الموزع على المرضى فى المستشفيات العامه كله نوع واحد يعنى المرضى يكشفوا والكل خارج ماسك فى ايده نفس العلاج ... هو لا مؤاخذه احنا كلنا عندنا نفس المرض

سعدون :- شوف يا رايق احنا يابنى بنشتغل بالحصه .. بمعنى اننا بناخد من الوزاره حصه معينه من العلاج وكل واحد بقى وحظه

الرايق :- يعنى مفروض يكون فى علاج متنوع يا دكتور فى المستشفيات وكل مريض ياخد علاجه

سعدون :- ههههههههههه لا بجد ههههههههه والنبى صح هههههههه ضحكتنى يا رايق انت فاكر المستشفيات العامه سوبر ماركت هتشكل فى العلاج يابابا ..... لا يا حبيبى احنا عندنا مساواه والمساواه فى العلاج عدل

الرايق :- يا دكتور فى واحد صاحبى ابنى كانت عينيه وجعاه وراح يكشف فى المستشفى العام الدكتور كتب له على لبوس ودواء كحه

سعدون :- يابنى افهم ... اعوذ بالله من الشيطان الرجيم ... افهمك ازاى يا رايق ... يابنى حظه كده جه فى الحصه بتاعه اللبوس ودواء الكحه .... نعمله ايه احنا بقى ؟؟؟

الرايق :- مع انى مش مقتنع بكلامك الا اننى مضطر اقفل الحلقه دى وفى النهايه حضرتك تنصح الناس بايه

سعدون :- انا انصح الناس كلها اللى بتروح المستشفى العام تسأل الاول عن الحصه الموجوده فى المستشفى يعنى لو حصه دواء كحه لازم الناس تكح ولو حصه مكركروم لازم الناس تعور بعض ولو حصه دواء اسهال لازم الناس تسهل يعنى لازم الناس تطور بلاش جهل

الرايق :- شكر يا دكتور .. وانا من موقعى هذا اقول لو حصه تاريخ لازم الناس تلبس ملابس عنتره ابن شداد وتحارب المغول فى بيت المقدس ولو حصه جغرافيا يبقى تقعدوا بالعافيه

****************

مع تحيات فريق العمل

بمدونه الضاحكون

عيله تجنن .... خناقه اخويه

فقره اعلانيه

**********

الضاحكون تلى شووب تقدم لكم اجمل منتجاتنا

مسحوق غسيل...تريه بلانش ...

عزيزتى ست كل بيت .... بيضى غسيلك من غير مشكلة .. مسحوق تريه بلانش له قدرة فائقة على التبيض للملابس البيضاء والالوان على حد سواء ... مسحوقنا مش بيفرق بين ملابس قماش ولا جلد مسحوقنا مش بيفرق بين قماش ولا بشرة مسحوقنا بعون الله يبيض كل حاجة مسحوق تريه بلانش على طول بارخص الاسعار

طريقة الاستعمال:عدد 15 كوز ماء مبلوله يوضع فى اناء واسع موجود بها عصاية للتقليب ولازم تكون من الخشب وبلاخص خشب الليمون يوضع اى شىء مراد تبيضة من جماد او حيوان او انسان و مع التقليب المستمر لمده تتراوح بين ربع قرن او 40 عام تخرج ابيض ناصع البياض

خلاص خلاص وداعا لاغنيه اسمر ملك روحى

دلوقتى مع مسحوق تريه بلانش .. ابيض ملك روحى

اتصل على 03000333

سعر المنتج فقط 299 جنيه زائد مصاريف الشحن

لا استنوا شويه لسه عرضنا منتهاش ... مع مسحوق تريه بلانش ..ليفه هديه .... تخلى البياض مضمون ..مضمون ...مضمون

************

الطائر الحزين ...والان اعزائى المشاهدين مع حلقه جديده من مسلسل عيله تجنن .. بطوله فريق العمل بمدونه الضاحكون

وحلقه اليوم بعنوان... خناقه اخويه ...

الطائر الحزين وهمس الاحباب بالاشتراك مع فرنسا والرايق

الطائر : يا همس انت يا عم فين البنطلون بتاعى اللى كنت كاوية امبارح ؟؟؟

همس : ايوة هتلاقيه مرمى عندك فى الغسالة

الطائر : مستعجبا ومستنكرا غسالة ايه بقول لك كنت كاوية امبارح

همس : ايوة انا لبستة امبارح بعد ما انت كاويتة وخرجت بيه واتزحلقت وقعت فى الطين

الطائر : يا دى نهارك اللى مش فايت اكيد البنطلون اتروب واتبهدل ...ثم تعالى هنا انت اصلا ازاى تلبس بنطلونى انت مقاسك مش مقاسى اصلا

همس : يا سيدى مش هتفرق اللى لقيته ادامى لبستة اصلى كنت مستعجل

الطائر : يا مثبت العقل والدين يارب طيب لما نشوف اما يجى ابوك هيتصرف ازاى لما نقوله ... بس اهو ابوك وصل اهوه يا رايق انت يا حاج ما ترد عليا يا عم

الرايق : هاى ايفرى بدى ايه وجع الدماغ ده منك ليه فى ايه ..واات هابنت ؟؟؟؟؟

الطائر : ابنك همس بعد ما كويت البنطلون لبسه و طينة فى الطين

الرايق : طيب ومالة مش هو اخوك ايه المشكلة لما تلبسوا مع بعض يو كان دوو إت بكل بساطة ..هههههه ..ذاتس فيرى ايزى

الطائر : انت يا عم مينفعش اصلا ده مش مقاسه خالص وبعدين لو فرضنا كدة اللى عاوز يلبس حاجة ميكويها هو

الرايق : اه فكرتنى يا بنى بالذى مضى وتنهد تنهيده عميقة تعرفوا يا ولاد الشيرز اللى انا لابسة وقصير عليا ده وضيق ومصمم انى مقلعوش بتاع عمكم كنت بتسحب اخد منه الهدوم زى الواد همس كدة يا سلام فعلا اللى خلف ماماتش

الطائر : طيب كل واحد يخلى باله من حاجتة وقد اعذر من انذر يعنى مينفعش حد هنا يكون له ملكية خاصة

الرايق : ملكية خاصة ..نو نو نو ... ايه انت متعرفش ان قرار التامين لغى كل ده ؟؟؟

همس : اسمه تأميم يا بابا

الرايق : بس يا جاهل ... شط اب يور ماووس ... ايش فهمك انت .. احنا نعرف تأمين اجتماعى وتأمين صحى عمرك سمعت على تأميم اجتماعى ولا تأميم صحى... شوف يا ابنى .. التأميم معنها اللغوى هو قلب النون الى ميم عندما تأتى فى أخر الكلمة تأمين بقت تأميم وفيه رأى أخر معتبر هو رأى العلامة الكبير الجهبز عبده الفراش حيث قال فى احدى ندواته : ان التأميم هو جعل أم لكل من ليس له أم بمعنى هأممك يعنى هكون أمك ...وفيه رأى كمان خاص بلغة جنوب القاهرة وضواحيها بداية من الجيزة لأسوان وذلك فى حديثهم مع السياح لما السايح من دول عاوز يقول تعميم يقول تأميم فهنا نقدر نقول هو قلب العين الى ميم .. افهمومها بقى يا بنى مزار

طائر : بس بقى انت وهو متضيعوش الموضوع انا دلوقتى فى البنطلون نص البنطلون بقى طين اللى عاوز افهمه ازاى الباشا ده لبسه؟

همس : وهى دى مشكلة يعنى بعد ما بلبس البنطلون اقفل السوستة والبس عليه الحزام وبعدين اتني رجله خمس تانيات علشان اضبط الطول

الطائر : طيب والروبة دى جات له منين يا فالح ؟؟

همس : ايه يا عم كل ما امشى شوية تانية تتفك ولجل الحظ الدكر اتفك 3 تانيات مع بعض وانا كنت بعدى الشارع اللى كان مليان ماية فقام البنطلون اتروب الروبة دى

الطائر : لما نشوف رأى أمك لما تيجى من السوق

تدخل فرنسا والطين مغطى طرف الجلابية من تحت وعماله تجرجر فيها وتسأل

فرنسا هانم :- مالكم صوتكم جايب لأخر الشارع

الطائر : تعالى شوفى الباشا ابنك واخد بنطلونى اللى لسه كاوية امباح وطينة فى الروبة مش بيلبس حاجتة ليه؟؟؟؟؟؟؟؟؟!!!!!!!!!! يا عالم جننتونى

فرنسا هانم : طيب استنى يا بنى اروح اودى الجلابية لخالتك وارجع ارد عليك

************

انتهى   

صبرني وحنين وعريس الغفله

صبرني يارب: بت ياحنين قومي يلا ساعدينى عشان نروق الشقه دي ونوضبها

حنين : ليه خير احنا جاى لينا ضيوف ولا ايه ؟؟؟

صبرني يارب: اه يا اختي انتى ما تعرفييييييييش... مش انا جاااااااايلي عريس

حنين : اييييييييه مين فين ازاى شافك فين ؟؟؟؟ وعرفك ازاى؟؟؟؟؟ قرى واعترفى يا سوسه

صبرني يارب: سوسه ؟!! يا ريتنى يا ختي كنت سوسه كان زماني اتجوزت من زمان وارتحت من خلقكوا دي
ده من طرف طنط فيفي قريبة ماما

حنين : مالها خلاقنا مش احسن من خلقة اللى هتتنيلى تتجوزيه ده وبعدين مجايب طنط فيفى دى كلها منيله ممكن يطلع معتوه او عنده بري بري وعايزه تتدبسك فيه

صبرني يارب: لييييييه يا اختي رميه انا ؟؟؟ عموما هانشوف اهو شويه وجاي يا اختي وبعدين انتى مالك ...انتى خنيقه ليه ؟؟

حنين : تصدقى انا غلطانه مااااشى انا قايمه اروق معاكى وانا مالى ؟؟؟

صبرني يارب: عشان خاطري يا حنووووووووووو يا جميله خلاص بقى قومي خليكى جدعه
ده انتى اختي حبيبتى امال مين هايسلفني البلوزه الجديده بتاعتها ألبسها النهارده

حنين : حاضر اتفضلى روحى انتى استحمى وصنفرى نفسك واتذوقى وانا ياختى هقوم بالواجب وخدى البلوزة والجيبه كمان

صبرني يارب : بجدددددددددد ما انحرمش منك ابداااااااا يا حنو يا حيااااااااتي ويارب اعملك لما يجيلك عريس برضه
صبرني يارب فى سرها وهى راحه الحمام : (قريب ونخلص منكككككك يا خنيقه )

حنين : بس مش يكون من مجايب فيفى دى انا هنقى بنفسى ياختى

صبرني يارب: تنقي بنفسك ؟؟ شايفه يعنى العرسان بالكوم على الباب
اتوكسي البلد كلها معنسه

حنين : ااااااااااااااااااااه دنا حلوة وصغيره لا طويله ولا قصيره

صبرني يارب: حلوووووووه..ههههههههه .... فين ده ؟؟؟؟؟؟؟

حنين : يا رب يكون اقرع واحول وبدل ما يتقدم ليكى يتقدم لماما يا سوسه

صبرني يارب: اقرع واحول ليه يا اختي انتى شايفاني عامشه ولا ايه ؟؟؟.. يا بت ده انتى مفعصه واوزعه

حنين :مش هرد عليكى ربنا هيخلصلى تارى يا طويله (مش عارفه طلعه لمين دى بابا واقصر مننا ممكن لماما ما علينا )
بت انتى خلصى بسرعه الساعه بقت 4 والعريس جاى الساعه 6

صبرني يارب: حنيييييييييييييييييييييييين فين البلوووووووزه مش لاقياها

حنين : هتلاقيها اما تحت المرتبه واما ماما اخدتها تمسح بيها البوتجاز مهى علطول بتعمل كده لو لقتيها اغسليها وخيطى القطعه اللى فيها

صبرني يارب: نعمممممممممممممممممممممممممم انا عايزه البلوزه الجديده ؟؟؟؟؟؟

حنين: نعمممممممممممممممممممم دنا مش لابستها الا 17 مرة بس
انتى بتهرجى انشاله عنك ما اتجوزتى
ولا اقولك خلينى انا الطيبه هتلاقيها مخبياها فى درج الكمودينو

صبرني يارب: يا رخممممممممه مش فاضيه لرخاااااااامتك

حنين : روحى يلا انا كمان هعمل ليكى تورته تجنن لو اقرع هيزرع وهو قاعد من طعامتها

صبرني يارب: يا سلااااااام يا سلااااااام ايه الرضا ده كله (وفي بالها مش مطمنالك يازءرده انتى )

الساعه بقت 6 وصبرنى بقت عروسه بجد وحنين قاعده تفكر يا ترى شكله ايه وهتعجبه ويعجبها ولا لاء؟؟؟ الباب بيخبط صبرنى زى ما تكون مسكت سلك كهرباء 500 وات وتصوت حد يفتح قبل ما يمشى

صبرني يارب: عااااااااااااااااااااااااااا مامااااااااااااااا الباب يا مامااااااااااااا
ما خلصتش لسسسسسسسسسسه
الايشارب الشراب لا لا لا الجيبه الاول
يوووووووووووه بقى

حنين : اصبرى انا هفتح واجى ابشرك

صبرني يارب: ايوه ايوه يلا بسرعه يا حنين
يااااااااااااااااااااارب اتجوز بقى

حنين : حاااااااااااضر ايوة جاااااااااااى عريس اختى جه انا جايه اهه

يا لهوووووووووووووووووووووى انت مين يا عم ؟؟؟؟؟مين ده يا طنط فيفى

فيفى: وانتى مالك يا مقروصه فى قلبك يا مسحوبه من لسانك روحى اندهى حد كبير

(حنين وهى ماشيه وربنا الجوازة دى ما هتم )

صبرني يارب بوشوشه : بت يا حنين تعالي هنا قوليلى شكله ايه ؟

حنين : قمرررررررررررررر امك داعيه عليكى مش ليله القدر لالالا ده فضلت طول شهر رمضان تدعى عليكى ده شبه فرانكشتين لالالالا حرام شبه دراكولا لالالالا بصى هو مش ليه مثيل هتشوفى بنفسك

صبرني يارب: يا لهووووووووي .. شكلك بتقولي كده عشان تبوظيها ما انا عارفاكي زي المليم وتسدي نفق شبرا

حنين : طيب يا اختى اتفضلي انا حضرتلك الشربات يلا ادخلى برجلك اليمين وانا لو منك ولا ادخل بيمين ولا بشمال ادخل بقفايا
صبرني يارب: الهي تنشكي فى لسانك ياحنين .. يا بت اسكتي بقى اتوكسي لما نبقى نشوفك وكستك انتى ..

حنين : طيييييييييييييب وربنا لوريكم كلكم وادى الشربات

وتضع حنين القلب رمله فى الشربات

وتمشى صبرنى يارب فى اتجاه الصالون
صبرني يارب: سلا... سلا ... سلا...
ده اول ما شافت العريس السلام وقف فى زورها
فيفى : اهلا يا عروستنا اتفضلي
اتفضل اشرب يا استاذ مرسي

صبرني فى بالها: اشرب اشرب اشرب الهي يكون اخر شربك انت وفيفى

مرسى شرب وسمع حاجه بتقرقش فى بقه راح مطلع طقم الاسنان وبص فيه وصرخ قائلا : ايد ده رمله ؟؟؟

حنين من بره الله ينتقم منك يا فيفى وكمان اهتم

صبرني يارب: يخربيتك يا حنين انتى حاطه ايه فى الشربات

يخربيييييييييييييتك يا فيفى انتى كمان جايبالي واحد بقطع غيار استعمال خارج
؟؟؟؟؟؟؟؟؟

حنين : وربنا لطفشه ولا انتى عايزاه يا مايله ؟؟؟

صبرني يارب: هو صحيح العرسان شاحه الايام دي بس لا مش للدرجه دي
حبسك عليه يا بت يا حنين

عبده الرايق وفرنسا بتوصيه علشان يقابل العريس

فرنسا هانم: والنبى يا اخويا البت قربت تعنس وافق وخلى الحاجات التقيله علينا والحاجات الخفيفه عليه وبلاش النونوه بتاعتك دى لحسن العريس يفتكر ان عضتك قطه

عبده الرايق : ماشى يا ستى احنا كمان اتخنقنا منها ومن اكلها واختراعتها اللى وجعت بطننا يلا خلينا نشوفه ونخلص

حنين : صبرنى الحقى ابوكى ناوى يوافق هتعمل ايه يا ستى؟؟؟

صبرني يارب: يواااافق الراجل ده عايز يخلص مني ولا ايه ؟؟؟؟..طيب بسرعه هاتيلى التورته الى انتى عاملاها..وهاتيلى من جوه دهن العفريت الى انتى بتعملي به مقالب يا حنين
وبرطمان الشطه ما تنسيش

حنين : حاضر طبعا وهزود عليه عين العفريت وودن الغراب

وقعدت حنين تحط شطه على التورته وتزوقها بعين العفريت وودن الغراب
وصبرني تدهن اديها ووشها وهدومها بدهن العفريت الي ريحته فشر ريحة كلب ميت
وخدت صبرني التورته ودخلت للصالون وهى بتضحك ضحكه كلها شماته

مرسي وهو بيبص لصبرني ويلعب حواجبه من تحت النظاره الكعب كوبايه : والله يا عمي احنا يعنى ما لناش بركه الى صبصب هاصرف عليها من جنيه لميه فى الشهر انا راجل فييس يعنى

صبرني فى سرها : اه واضح انه فييس اوووي وعمو مين ده انت الى جدو يا ضنا امك .. صبرك عليا يا مرسي انت وفيفي
حنين : السلام عليكم طبعا يا جماعه بما انى اصغركم سنا فيسعدنى انى احضر معاكم الخطوبه المايله دى

الرايق بيبص ليها وكانها مش قالت اى حاجه طيب يا ابنى انت عندك شقه ؟؟؟

مرسى : لا والله يا عمى بس عندى اوضه وحمام شرك لو عجبتها هغير القاعده والسيفون كمان

الرايق :وماله يا ابنى ربنا بكرة يوسع عليكم طيب والعفش

مرسى : والله يا عمى انا عامل جمعيه ب 50 جنيه هقبضها 250 جنيه وانزل سوق الجمعه اشترى سرير متر ونص فى متر ولو هى حبت تنام عليه براحتها رغم ان الارض بتقوى العضم

الرايق : وماله يا ابنى دى حتى صبرنى بتحب الوسع تبقى تنام هى يوم عليه وانت يوم ولو على الدولاب مش ليه لازمه ابقوا اعملوا بؤجه حطوا فيها الهدوم

صبرني فى سرها : الهي تتوكس وكسه بني يا ابن الهبله

الرايق: وماله يابنى انا موافق يلا شيل ...نقرى الفاتحه بقى....

فرنسا من جوا ( الحمد لله اخيرا ) وفيفى تزغرد وصبرني تبص لحنين وهي مبرقه

مرسى : من فضلك يا عمى ممكن نكتب الكتاب علطول

صبرنى يارب :اييييييييييه يا حنين مش هياكلوا التورته الاوووووووووووول

حنين : ماشى اكلى خطيبك يا سكرة

صبرني وهى بتغمز : ماشي هاتي يا حنو يا حياتي

صبرني يارب: اتفضل يا مووووغسي التورته دي انا عاملاها باديا

مرسى : عمى من فضلك اجرة المأذون عليك لانى الصراحه مش معايا غير فلوس المواصلات وانا راجع وبياكل اول قطمه
اااااااااااااااااااااااااااااااه
ايه ده التورته دي مولعه نااااااار

والرايق لسه بيقول نو نو نو ...والعريس يصوت ويقوم على رجله نسيت اقولك حاجه انا عندى بواسير
اااااااااااااااااااااااه ناااااااااااار

الرايق: تورتة ايه اللى حاميه يا ولد

مرسي: فيه تورته يتحط عليها شطه باين عليكم عليه لاسعه

الرايق: معقوله ده ده صبرني بنتى احسن واحده تعمل تورتات

مرسي : وايه الريحه دي المقرفه الى هلت علينا دي

صبرني تمد ايدها فى وش مرسي وتقربها من مناخيره :نعم نعم نعم
ريحه ايه دي مسك وعنبررررررررررررررر

حنين من بره :اووووووووووووووف الله يقرفك دى مسك
دنا مش استحملت اقعد لما دخلتى

فرنسا: اهدى بس واقعد يا سي مرسي ما تعملش فى نفسك كده جرى ايه يا فيفى ما تشوفي قريبك ده

فيفى : ما تشوفى العدله بتك فيه تورته حاميه بلا نيله خلوها جنبكم تعنس يلا يا مرسى

مرسى وهو طالع من الصالون حنين تشنكله يروح مقلوب شبه شوال الدقيق وتقع منه الباروكه والينسس

صبرني يارب: كمان شعر عيره
انا قلت من الاول يا طنط فيفى
انك جايبالي عريس بقطع غيار استعمال خارج
خليهولك يا حلوه
جوزيه للمعدوله بنتك الى شبه كوز البطاطا
يلا يلا يا موكوسه خدي الموكوس ده وامشي من هنا هوينا

فيفى ماشيه وساحبه مرسى فى ايدها انا غلطانه عيله لاسعه

حنين وصبرنى بيضربوا على كف بعض وبيحضنوا بعض ربنا يخليكى يا حنون ويرزقك باحلى منه يا صبرنى

فرنسا : منكم لله يا بلااااااااااااوي عملتوا ايه يا ولاد الراااااايق وتبص للرايق ما تشوف ولادك دووووووول هايجنوني
الرايق وهو كاتم الضحك : نو نو نو عييييييييب يا ولااااااد .

تم بحمد الله

مع تحيات اسره الضاحكون

عيله تجنن ..قال من همه بيحب واحده قد امه ..

تدخل حنين القلب اوضة اخوها همس الاحباب بعد ما ايدها اتهرت من الخبط على الباب .. وتبص تلاقيه عمال يقربع ( يشرب ) عرق سوس ويرمى الكوبايه على الارض زى ما يكون بيسكر وعمال يغنى ويقول هات الازازه واقعد لاعبنى .. تسمى حنين باسم الله وتدخل عليه وهى حاطه ايدها على مناخيرها من ريحه الاوضه

حنين القلب:- مالك يا اخويا يا حبيبى قافل على نفسك بقالك اسبوعين لحد ما ريحتك طلعت

همس الاحباب:- بت انتى اطلعى من دماغى انا مش طايق نفسى ولا طايق اشوف سحنتك

حنين القلب:- ليه بس احكيلى دنا اختك الصغننه وستر وغطا ولحاف عليك طمنى عليك لحسن انا حاسه انك عامل مصيبه ومخبيها علينا

همس الاحباب:- اقولك ايه.. ولا ايه !!! ام زغلول رفضتنى يا اختى ااىء اىء

حنين القلب:- بس يا خويا سد وبطل عياط وقولى رفضتك ازاى يعنى ؟؟هو انت كنت عايز تتجوز بنتها الهبله ام ضب ؟؟

همس الاحباب:- بنتها مين يا عبيطه .. انا كنت عايز اتجوز ام زغلول نفسها يا هبلة

حنين القلب:- يا لهوووووووووى ام زغلول دى اكبر من ماما ويمكن كانت مع تيتا فى كى جى وان

همس الاحباب :- والله ما انتى فاهمه حاجه يا بنتى الدهن فى العتاقى

حنين القلب:- عتاقى ايه يا اهبل دى متخزنه من سنه 19 وزمانها اتحنطت فى المتحف كمان .. يابنى ده تاريخ صلاحيتها انتهى من 30 سنه

همس الاحباب:- انا قولت من الاول انك مش هتفهمينى ما انتى لابسة الجزمة فى مخك مش فى رجلك

حنين القلب:- طيب احكيلى من الاول يا سى روميو وانا هحاول اقلع الشوز

همس الاحباب:- بصى يا ستى انا بعد ما مات جوزها من 16 سنه وانا براقب اخلاقها عمرها ما بصت لحد ولا ادلعت على حد ولا حد قدر يتحرش بيها !!

حنين القلب:- انت كنت بتراقبها وانت فى الاعداديه ؟؟ واخلاق ايه يا منيل دى مين اصلا اللى يبصلها ؟؟؟.. دى تعلم العفه

همس الاحباب:- هتتخرسى ولا اسكت؟؟؟ وبعدين انتى اش فاهمك فى الحب والغرام من اول نظرة .

حنين القلب:- اتخرسنا اتفضل كمل يا ترافولتا

همس الاحباب:- اول مرة كانت واقفه فى فرن العيش بصتلى وضحكت قولت بس الدنيا ضحكت فى عنيه لقيتها بتقولى ممكن تجبلى معاك بجنيه ونص عيش قولت ليها عنيه ومن يوميها وكل يوم اروح الفرن اجيب ليها العيش واتخانق واتضرب مطوة... مرة فى وشى والتانيه فى جنبى والتالته فى رجلى بس كله يهون علشان عيون ام زغلول.

حنين القلب:- وربنا انت عبيط دى بتضحك عليك مش ليك علشان تجيب ليها عيش وانا اقول الواد ليه كل يوم يروح الفرن ويتخانق ويتضرب مطوة لحد ما بقيت مفتح من كل حته شبه شنطه السكاكين.

همس الاحباب:- وكمان كنت باخد عيالها التمانيه افسحهم وهى اللى علمتنى اعتمد على نفسى واشتغل علشان اقدر اصرف عليها وعلى عيالها .

حنين القلب:- يا ابنى بدل ما تشوف بنت من سنك تبتدى معاها حياتك وتعملوا اسرة رايح تاخد اسره جاهزة وكمان ب 8 عيال وطبعا كانت بتضحك عليك وتاخد فلوسك؟؟

همس الاحباب:- عمرها ما طلبت منى مليم انا اللى كنت بحس انها مزنوقه كنت بساعدها وعادى ما هى بكرة هتبقى مراتى ومسئول عنها وما فيش بين الخيرين حساب

يفتح الباب عبده الرايق ووراه فرنسا هانم حكم الرايق بيشم بريحة الفلوس على بعد اميال

عبده الرايق:- فلوس !!!! انا سامع كلمه فلوس .. بتصرف فلوسك على ام سحلول واحنا مش لاقين ناكل؟؟ يو ار بوى عايز تتربى من اول وجديد ..ده انا افتكر جدى من زمان كان بيعاكسها يا عبيط

حنين القلب:- لا وكمان بيجيب ليها العيش من الفرن ويسيب ماما واقفه فى الفرن لحد ما تقع من طولها وتيجى الستات شايلنها من التعب

فرنسا هانم:- يا خسارة تربيتى فيك هو انت زى القرع دنا حملتك 3 سنين و15 يوم

عبده الرايق:- ماله بس القرع ..ليه كده يا فرنسا راعى ظروفى ..وبعدين 3 سنين ازاى يا ستى هما مش 9 شهور ولا هو كان حمل جملى وبعدين ايه 15 يوم دى كماااان .

فرنسا هانم:- ماهو كان ضعيف ومكسح ومشى متاخرمش شايف شكله عامل ازاى عضمه فوق لحمه زى اللى عنده جفاف وبعدين جاتله الحصبة قعدت بيه 15 يوم يا خايب

حنين القلب:- خلاص يا بابا خلاص ياماما انا هتكلم مع خالد واحاول اعقله

عبده الرايق :- ماشى يا رب يضربك ما هو ليل ونهار عمال يلطش فيكى وانتى زى القط بتحبى خناقك.

فرنسا هانم :- سيبك منهم يا سى رايق دول عيال ناقصين ربايه يلا بينا بلا هم قال الموكوس بيحب .

حنين القلب:- المهم دلوقتى ايه مشكلتك ؟؟اروح اكلمهالك؟؟

همس الاحباب :- لا..لا.. انا كرامتى فوق اى شىء بس انا بحبها وفى قلبى ساكن حبها بحبك يا ام زغلول .

حنين القلب :- على اساس ان قلبك مساكن شعبية لام زغلول وعيالها

همس الاحباب :- لا عشة فراخ يا خفيفة المهم انا عايز انساها دى خلتنى اعد النجوم فى عزالضهر وطيرت النوم من عينى وخلتنى مدمن عرقسوس

حنين القلب :- سهله خالص بص يا سيدى انا شوفت فى فيلم بيكهربوا الواحد لما يكونوا عايزين ينسوه حاجه استنى....

وتقوم حنين القلب تقطع سلك السخان وتجيب لاصق وتحط طرف على اخر حاجب همس الاحباب اليمين والطرف التانى عند اخر حاجبه الشمال .

حنين القلب:- مستعد يا سيدى ؟؟؟

همس الاحباب وهو مرعوب :- انتى متاكده من الطريقه دى يا حفيدة ريا وسكينة ؟؟

حنين القلب:- اطمئن بكرة هتدعيلى استعد 1 2 3

همس الاحباب :- اه اه اه ااااااههههههههههههههههه.. الحقونى

عيد ميلاد ابو الفصاد

اعلن الرئيس مبارك اليوم القرار الجمهورى

 رقم 356  لسنة 2009

باعلان اليوم السبت 11-4

عيدا قوميا لمصر المحروسة

بمناسبة

عيد ميلاد قمرالتدوين

عيد ميلاد عبده باشا الرايق

كل سنة وانت طيب

وعقبال مليون سنة

تورتة بمناسبة عيد الميلاد

تورتة مخصوص علشان ابو الفصاد

تورتة علشان المدونين والمدونات

وطبعا انا اخدت نصيبى مقدما

عيد سعيد عليكم كلكم

وكل سنة وانتم بخير

ودايما مجمعين فى الخير

طبعا نحن نقبل الهدايا النقدية والعينية

يعنى كل اللى داخل

يسيب 1000 جند هدية للرايق

و9000 جند علشان توصيل الهدايا

عيله تجنن .. وصيه الرايق

فقره اعلانيه
*********
اخى المواطن اختى المواطنه
مصلحه الضرايب تحييكم ويسرها ان تعلن ان اخر موعد لتقديم الاقرار الضريبى طوال العام
وانتم عارفين ضريبى من فعل ض ر ب .. والنبى يا شاب والنبى يا شابه ابوس ايديكم تقدموا الاقرار بتاعكم ..حسنه قليله تمنع بلاوى كتيره .. وهنيه لك يا فاعل الخير والثواب .. ومن قدم اقرار بيداه التقاه .. قدم اقرارك يا مؤمن تكسب معانا جوايز كتيره ..قدم اقرارك يا مؤمن تكسب معانا دعاوى كتيره .. اخوانكم جعانين ..اخوانكم مفلسين ..ساعدنا ربنا يساعدك ويعلى مراتبك ويخليلك عيالك والست بتاعتك
وخلى بالك
خلى بالك
ضرايب من فعل ضرب.... وقد اعذر من انذر
****************

والان موعدنا مع الحلقات الكوميديه عيله تجنن ..وحلقه اليوم بعنوان.. وصيه الرايق..بطوله عبده الرايق وهمس الاحباب

يعود عبده الرايق الى المنزل فى المساء وراسه تقطر دما ..فيراه ابنه همس الاحباب ويفزع من منظر الدم ويصيح قائلا
همس الاحباب :- ابا الحاج ايه ده ..راسك بتخر دم فى ايه ؟؟؟
يدخل الرايق الى الشقه ويرتمى على الكنبه ( مفيش انتريه ) ويقول لابنه همس الاحباب فى صوت خفيض
الرايق :- خلاص يا خالد يابنى خلاص انا بموت ... الوداع يا خااااااااااااالد
همس الاحباب :- لا وداع ايه ؟؟ احنا لسه فى نص الشهر ..خليك معانا لغايه القبض يابابا ..بصراحه ده مش وقت موت خالص
الرايق :- هو حد بيختار ميعاد موته يا ولد ؟؟ ..هات ايدك يا خالد
همس الاحباب :- ادى ايدى اهى ..انت ناوى تعملها بجد يا رايق ؟؟؟
الرايق :- بلاش الايد الشمال هات اليمين ولا اقولك خليها الشمال ولا هات احسن اليمين
همس الاحباب :- ياعم انت هتفاصل ..ادى اليمين اهى
الرايق :- ولا اقولك هات الاتنين .. بص يا خالد يابنى انا قبل ما اموت لازم اعمل حاجتين
همس الاحباب :- خير يا حاج وقعت قلبى
الرايق :- اول حاجه لازم اديلك حكمتى وخبرتى .. وتانى حاجه لازم اقولك على مكان وصيتى والميراث بتاعى
همس الاحباب :- بلاش يابابا حكمتك وخبرتك ..خليهم يمكن ينفعوك هناك ولا حاجه ..انا بس عايز الميراث
الرايق :- يابنى انا ببيع جمله مش قطاعى ..الحكمه والميراث يابلاش انا مش لاعب
همس الاحباب :- خلاص يابابا قول وانا سامع حكمتك
الرايق :- امسح دموعك يا خالد وبلاش تبكى يا ولدى
همس الاحباب :- لا الساعه دلوقتى 9 بالليل وانا مش متعود ابكى فى الوقت ده ..وبعدين مفيش دموع علشان امسحها
الرايق :- اااااااه ياندل .. طيب اعمل نفسك بتعيط عليا حتى ولو كده وكده
همس الاحباب :- حاضر يا حاج انا هعيط بس يلا بسرعه خلصنى وقول على مكان الميراث قبل ما امى واخواتى ييجوا
الرايق :- الاول حكمتى وخبرتى فى الحياه .. اوصيك يا خالد يابنى تمشى فى الشارع دايما ومعاك المثلث وشنطه الاسعافات وتربط الحزام
همس الاحباب :- بس انا معنديش عربيه يا حاج
الرايق :- وماله يابنى ولاد الحلال مخلوش لولاد الحرام حاجه .. برضه لازم تعمل حسابك محدش ضامن الظروف يابنى
همس الاحباب :- هى دى خبرتك وحكمتك فى الحياه يا رايق .. ماشى يا عم ..ناقص بقى الميراث
الرايق :- عارفك يا ولد مستعجل تورثنى ..لكن غصب عنى هى دى سنه الحياه ..وبرضه اموت وانا مرتاح
همس الاحباب :- ولا يهمك يا بابا قولى بس مكان الميراث فين وفلسع انت براحتك واحنا لغايه اول الشهر لينا رب اسمه الكريم
الرايق :-الحقنى بسرعه ياخالد وهات كل البطاطين اللى جوه بسرعه
همس الاحباب :- هاروح اجيبهم بس اوعى تعملها قبل مارجع
ويجرى همس الاحباب الى غرف النوم ويحضر ثلاث بطاطين وياتى مسرعا لكى يغطى الرايق ولكن الرايق يرمى البطاطين ويقول له
الرايق :- لا انا مش عايز اتغطى يا خالد يابنى
همس الاحباب :- امال خليتنى اجيب البطاطين ليه ؟؟؟
الرايق :- اصل الدنيا حر ..وانا مش طايق هدومى
همس الاحباب :- الله ماطولك ياروح ... ماشى يا عم اتدلع براحتك ..فين بقى مكان الكنز ؟؟؟
الرايق :- بص يا خالد يابنى ..انت هتروح الحى اللى انا بشتغل فيه الساعه 9 الصبح .. وتدى ضهرك لباب الحى ..وتعد خمس خطوات ..هتلاقى نفسك على الرصيف ..تستنى نص ساعه هتلاقى الموظفين بدءوا يجوا الحى الساعه 9 ونص ..لان ميعادهم الساعه 8 الصبح ..المهم يابنى هتستنى ربع ساعه هتلاقى نفس الموظفين خارجين لبيوتهم ..وهتلاقى واحد ماسك مقشه وبيكنس الحى اسمه ..حسن الفراش ..تنادى عليه وتقوله ..انا خالد ابن الرايق الله يرحمه ويحسن اليه ..وتدوس على يحسن اليه دى ..يعنى ممكن تقولها سبع او تمن مرات ..وتقوله كلمه السر..الفول الحيراتى غالى يا حماتى ..هيديلك الوصيه والتركه
همس الاحباب :- ماشى يا حاج اتفضل انت بقى فلسع براحتك مع السلامه ..ايه انت لسه مفتح عينيك ؟؟ يلا بقى ياعم علشان اغطيك زى الافلام ...ايه يا حاج انت مش قلت الحكمه والخبره والوصيه ..يلا بقى خلص علشان محدش يجى ويسمع منك ان فى ميراث
الرايق :- الصبر جميل يا ولد ..انت ايه هتمسك لى الساعه وتعملى فيها حكم وتحسب عليا الوقت الضايع
همس الاحباب :- لا ابدا بس كنا عايزين نخلص فى الدور .. يعنى قطم الخياره ولا نحتها ..بس قولى بقى الميراث ده يطلع كام ؟؟؟
الرايق :- حوالى 75 الف جند غير الفكه
همس الاحباب :- خلاص يا بابا انا دموعى هتنزل خلاص والنبى خلاص
الرايق :- انت مش قلت انك مش بتعيط فى الوقت ده ؟؟
همس الاحباب :- عديها بقى يا حاج .. اهو برضه الناس تقدرك وتقول عليك اننا بنحبك
الرايق :- بس اسمع انت ناوى تاخد الميراث كله لوحدك ؟؟؟؟
همس الاحباب :- ياعم متشغلشى نفسك انت بالحاجات الرفيعه دى يلا مع السلامه بقى انتى ..وانا هتصرف
الرايق :- خلاص بس اوعدنى انك هتدى كل واحد مكتوب اسمه فى الورقه فلوسه ..هما حوالى 75 الف جند الديون بتاعتى بس
همس الاحباب :- نعم نعم نعم ... هو الميراث ديون ؟؟؟
الرايق :- ايوه طبعا ..هو انت فاكر ايه ؟؟ هو انا حيلتى اللضى
همس الاحباب :- لالالالالالالا خليك لما اخواتى وامى ييجوا ..اوعى تعملها ..بس انا سامع صوتهم ..باين عليهم جم
وتدخل فرنسا وصبرنى يارب ويسئلون الرايق عن الدماء التى على راسه ومصدرها فيقول
الرايق :- ابدا الجرح اللى كان فى راسى من اسبوع هرشت فيه وانا داخل راح خر دم
همس الاحباب :- هرشت ؟؟؟؟؟؟؟؟؟؟؟؟ الحمد لله ..نشفت دمى ياشيخ ..قوم بقى انت سدد ديونك ...صحيح عيله تجنن

تابعونا ...لا تسيبونا

حنين القلب ...اعزائى مشاهدى قناه الضاحكون الفدائيه موعدنا الان مع حلقتكم الاسبوعيه منبر الضاحكون ..منبر لا منبر له .. ونتناول فى حلقه الليله الخلافات العربيه الداخليه واثارها على الشارع العربى ويسعدنا ان نستضيف الاستاذ كامل الاوصاف المسئول الاعلامى للجامعه العربيه فى الضاحكون ..كما يسعدنا تلقى مداخلاتكم على تليفون الضاحكون 03000333 ..اهلا وسهلا استاذ كامل الاوصاف شغلنى
كامل :- اهلا وسهلا بيكى يا استاذه حنين القلب
حنين القلب :- عايزين نعرف من حضرتك اولا سبب الخلافات الداخليه العربيه وطرق حلها
كامل :- هههههههه خلافااااااات ..ههههههه ياستو انا مفيش بين العرب اى خلافات على الاطلاق دى اشاعات مغرضه اطلقها الاوروبييون والامركان وبتوع التلات ورقات ..لكن احنا سمنه على عسل وفطير على قشطه صدقينى يابنتى مفيش اى خلافات بين العرب
حنين القلب :- لا يا استاذ انا مش مع سيادتك ..فى خلافات داخليه حتى ان الرؤساء العرب انفسهم اعترفوا ان هناك خلافات بينهم
كامل :- هههههههه بصى يا حنين يا بنتى ..صدقينى انا ..مفيش اى خلافات بين العرب دى احقاد اطلقها البعض ..والرؤساء العرب تماشوا معها من اجل كسر العين ..وانتى عارفه عين الحسود فيها عود يا حلاوه عريسنا قمر وعروسته نقاوه
حنين القلب :- طيب هيحسدونا على ايه بس ؟؟؟
كامل :- ههههههههه لا اصحى يا مدام ..احنا من شعوب القمه فى العالم الحالى احنا وبكل فخر الالفه بتوع العالم كله من شرقه لشماله ومن غربه لجنوبه ..واضربلك مثل ..هاتى اصغر طفل فى الوطن العربى من اى دوله عربيه ويكون بيتكلم ..مش طفل رضيع يعنى ..وكلميه بالعربى هتلاقيه يتكلم معاكى زى اللبلب . روحى بقى فى اى جامعه اوروبيه او امريكيه وكلمى الطلبه بتوعها بالعربى ..ههههههههه ...هتلاقيهم طور الله فى برسيمه ..
حنين القلب :- طيب ما حضرتك لو عكست الايه ورحت اى بلد اوروبى مثلا فرنسا هتلاقى كل الاطفال بيتكلموا فرنساوى وهتيجى هنا هتلاقى برضه شباب جامعاتنا طور الله فى برسيمه
كامل :- ههههههههه يا مدام حنين .عمنا الكبير سيد مكاوى الله يرحمه قال الارض بتتكلم عربى ..ومش بس الارض لالالالالا ده الجبل والبحر والنخل كمان بيتكلم عربى ..صح ولا مش صح ؟؟؟ ..وبعدين انا اصر واصر واظل اصر ولغايه بكره الصبح هاظل اصر ان العرب متماسكون واننا معا رمانه الميزان ونحن بعون الله قادرون .....
حنين القلب :- طيب انا دلوقتى عندى مداخله على الهواء من الاستاذ شريف من كفر ابو سنه ..اتفضل يا استاذ شريف بس والله ياريت بسرعه علشان وقت البرنامج
شريف :- بصى يا مدام حنين انا بس عايز اقولك انى انا زميل الاستاذ كامل ..ازيك يا كامل
كامل :- اهلا يا شريف
شريف :- اقلع النظاره وانت بتتكلم يا كامل
كامل :- وانت مالك يا جدع كل واحد حر
حنين القلب :- فى ايه يا جماعه ايه حكايه النظاره دى ؟؟
شريف :- يا مدام فى حد يلبس نظاره شمس بالليل ارجوكى بس اطلبى منه يقلع النظاره وانتى تعرفى السبب
حنين القلب :- ممكن تقلع النظاره يا استاذ كامل ده لو مش فى اى تشوه فى عين حضرتك
كامل :- لا ياستى ادى النظاره اهى قلعتها
شريف :- ايه بقى يا كامل... فى خلافات عربيه ولا لا ؟؟؟؟
كامل :- طبعا فى خلافات عربيه داخليه جذريه ودى ممكن تؤثر على المواطن العربى ... للاسف يا حنين يا بنتى احنا امه مفككه ..وامه تحاول بكل قواها ان تتجه الى التخلف ..لا الى التحضر .. احنا للاسف الشديد امه ضاعت معالمها فى ظل التفكك والانهيار والاستهبلال ونحن غير قادرون على الت ....
شريف :- خلاص يا مدام عرفتى الكتالوج بتاعه ؟؟ سلام بقى
حنين القلب :- شكرا استاذ شريف على المعلومه المهمه دى.. وانت يا استاذ نضاره ..قصدى يا استاذ كامل هات النضاره بتاعتك البسها شويه ...... ايوه كده تمام ...شكرا استاذ كامل الاوصاف على المعلومات المتميزه دى ..وانا من هنا اقول ان العرب بخير ونحن امه متحده ..قويه متماسكه ...وحصوه فى عين اللى ما يصلى على النبى
والى اللقاء فى حلقه قادمه
سنعود بعد قليل
***********
الضاحكون تلى شووب تقدم لكم اجمل منتاجاتنا من الملوحه ..سردين بساريا ..كلاب البحر..قطط بحر ..فسيخ محلى ومستورد ... ده بالاضافه لربطتين بصل هديه مع كل كيلو... فقط اتصل على 03000333 والسعر مفاااااااااااااااااجأه
**********
عدنا
عبده الرايق اعزائى المشاهدين والمشاهدات ..الواقفين والجالسات
موعدنا الان مع استديو الضاحكون التحليلى ..حيث تقام غدا مباراتان فى الدور قبل النهائى لكأس العالم لكره القدم فى تمام الساعه السابعه مساء بتوقيت الضاحكون الخامسه مساء بتوقيت شينجريششت.. المباراه الاولى بين منتخب الارجنتين ومنتخب المانيا... والمباراه الثانيه بين منتخب المانيا ومنتحب الارجنتين .. وقد علمنا من مصدر موثوق منه ان المباره الاولى ستنتهى بفوز منتخب الارجنتين بثلاثه اهداف نظيفه وسيسجل الاهداف اللاعب.. كده .. فى الدقيقه العاشره واللاعب... برضه ..فى الدقيقه الخمسين من ضربه جزاء واللاعب... ميصحش ...فى الدقيقه الاولى من الوقت المحتسب بدلا من الضائع ..اما المباره الثانيه فستنتهى بالتعادل بدون اهداف ..وسيسجل الهدف الوحيد اللاعب كريست بيانو
ويسعدنا ان نلتقى فى استديو الضاحكون التحليلى بالناقد الرياضى المعروف ورئيس اللجنه العليا لكره القدم العالميه سمير ابو صباع
استاذ سمير اهلا وسهلا بيك واحنا يسعدنا ان تكون ضيفنا فى استديو الضاحكون التحليلى لتلقى لنا الضوء على اللقائين المهمين فى الدور قبل النهائى لبطوله كاس العالم
ابو صباع :- كره قدم ايه وزفت ايه .. انا بصراحه كده مخبيش عليك مش بحب كره القدم ..ومبحبش سيرتها نهائى
الرايق :- ايه يا عمونا ده ... امال حضرتك رئيس اللجنه العليا لكره القدم العالميه ازاى ؟؟؟
ابو صباع :- اعمل ايه بس يا رايق التنسيق الله يلعنه .. انا بصراحه كانت احلامى ادخل كليه الهندسه وابقى محامى كبير لكن الظروف بقى
الرايق :- طيب قول اى حاجه عن اللقائين بتوع بكره دول ..قولى حاجه ..اى حاجه قول بحبك قول كرهتك ..قول قول وميهماكش حاجه
ابو صباع :- يا راجل طنش ..سيبك انت من كره القدم ... انا هاحكى لك حكايه غريبه جدا احسن من ام كره القدم .. امبارح وانا فى السوق بشترى طماطم .......
الرايق :- طيب دلوقتى عندنا اتصال تليفونى من احد المشاهدين ..اسمه عادل ام الخير
ابو الخير :- لا ياسيدى انا اسمى عادل ابو الخير ... وبعدين ايه البرنامج الاهبل ده ..ازاى الماتش بكره وانتم عرفتم النتيجه وعرفتم حتى مين هيجيب الجوان ..انتوا بتشتغلونا ولا ايه ؟؟ انتم بتشموا على ضهر ايديكم ولا ايه ؟؟ ..وايه كمان الضيف اللى مش فاهم حاجه ده ؟؟ لا لا لا انا لازم اقدم شكوى فى البرنامج ده ..وفى الضيف العبيط ده
الرايق :- تحب ترد انت يا استاذ ابو صباع ولا ارد انا ؟ .. عموما علشان الاحراج وعلشان متتعصبشى ..انا هارد على المشاهد بكل ادب واحترام ...شوف يابو الخير .. وحياه ابوك ..ياصايع ياضايع .. لو سمعت صوتك هنا مره تانيه لامسح بكرامتك ارض الاستديو التحليلى ..وعلى العموم يا معفن احنا سجلنا رقمك ..وهنتصل بيك فى نص الليل وهنعاكسك ابقى ورينا بقى هتنام ازاى يا اهبل ...وانت كمان يا ابو صباع اتفضل روح السوق بتاعك جاك كسر صباعك انت كمان
ابو صباع :- ماشى يا عم متزقش ..بس صح انت عرفت ازاى نتيجه المباراه ؟؟؟
الرايق :- ده ماتش متسجل يا اهبل انت كمان
***************
سنعود بعد قليل
***********
ودعا للقلق والنوم غير المريح على المكاتب فى العمل
شركه الضاحكون تلى شووب بتقدم ليكم طقم المكتب الفظييع ..عدد واحد مكتب مع اربعه سرير ..واحد للنوم والتانى للراحه والتالت للاستجمام والرابع للاحلام ..خلاص مع الضاحكين مفيش قلق وهيقدر كل الموظفيين يناموا براحتهم
فقط اتصل على 03000333
عدنا
*******
صبرنى يارب سيداتي آنساتي وسادتي برضه زي بعضه هاهاهاها
موعدكم الان مع برنامج الطبخ العالمي كل بس ما تحفش تقديم صبرني يارب
صباح الخير يا حلوين . النهارده هانقدملكم اكله جديده فى برنامج كل بس ما تحفش .والحقيقه انا جالي اميل غريب جدا بيقولي ليه مسميه البرنامج بتاعك كده ؟؟ مع ان الاسم واضح جدا . انتم عارفين انا باهتم بالرشاقه وباقدم اكلات تنفع للدايت والناس الى بتعمل رجيم . وعشان كده قلنا نخلي البرنامج اسمه كل بس ما تحفش . هاهاهاها .ودلوقتي هانبدا نعمل اكلتنا الجديده وهى صنية الجلاش بالبتنجان والمشروم .
المقادير : نص كيلو جلاش بس يكون مطبوخ قبل كده وده بيبقى موجود فى اي سوبر ماركت عاتي .
نص كيلو بتنجان وممكن نجيبه معلب زي ده ونريح نفسنا .
بصلتين مفرومين وبضتين و مشروم برضه علب عشان نأنتخ دايما .
ودي كلها حاجات متوفره ومش غاليه .
وعودين قصب ...
الطريقه : احنا نجيب الجلاش ونحطه فى صنيه وفوقه البتنجان وفوقيهم المشروم ونحط بؤ ووووووتر كده عليهم عشان نطري المسائل بس ما نحمرش البصل عشان ما نضطرش نحطله سمنه وده كله بيزود الفات فى الاكل .وبعدين نضرب البيض مع البصل فى الخلات ونحط عليهم شويه حبركوش مبركش وسمندرين بتدي طعم رااااائع رااااائع للاكل .ونديف العك الى عملناه فى الخلات ده للصنيه الى فوق ونحتها فى الفرن الكهربا ده لمدة خمس ساعات ونص ونطلعها تكون جاهزه للرمـ .... ايه للاكل طبعا وما ننساش الدوكوريشن بتاع الاكل ممكن نحط عليها من فوق سم اوف فجل مع سلايز قوطه على رشه حبركوش مبركش برضه اد ايه شكلها جميل احنا عارفين ان العين بتاكل قبل البؤ تبعااااااا.
وممكن نقدم مع الاكله دي كلحوم كيلوا كباب وكفته من عند فرحات وجايز حمامتين مشويين تبقى حاجه لتيفه برده
وكسنف حلو بقى مفجأه القصصصصصصصب .
القصب ده يا ستى تاخديه وتقعدي فى التراس بعد الاكله دي تمصيه وترمي التفل من البلكونه عشان ما توسخيش الحته عندك .وده هايساعدكم على هضم الاكله الفزيييييعه دي والف هنا لكم وما تنسوش دايما كككككل وما تحفش الراعي الرسمي للبرنامج
سبازمو اميريز مهضم ومضاد للانتفخات والتقلصات
*************

والى اللقاء مع يوم جديد

مع الضاحكون