الأحد، يونيو 21، 2009

رايقالدو بطل العالم

عبده الرايق ... يدق جرس الباب بمنزل الدكاتره الكبير عبده الرايق ..فتسرع بواب العيله وكتكوتتها حنين القلب لفتح الباب ..فتجد رجل يحمل اكثر من عشرين بالونه منفوخه ولا يظهر من
خلف البلونات ..فتقول له
حنين القلب :- انت ايه اللى مطلعك هنا ... مش عاوزين نشترى نفافيخ ..معندناش عيال صغيره
الرايق :- اوعى من طريقى يا مقصوفه الرقبه .. جو جو جو ...اوعى من على الدور (الباب )
فرنسا هانم :- ايوه كده اظهر وبان وعليك الامان ... انا برضه كنت بقول كده .. الناس كلها بتكبر وتعقل ..وانت ياحسره بتكبر وتصغر
الرايق :- شط ااب يور ماوس ... كلوز يور بق يا متخلفه انتى .. انا الحق عليا انى اتجوزتك يا متخلفه .. انا كان قدامى بوسى ونورا وشريهان ومارين مونرو وزينات صدقى ونجاه الصغيره والكبيره كمان وكانوا مستعدين يقسموا نفسهم مجموعتين كل مجموعه باربعه واتجوزهم واكون الحاج متولى الرايق
فرنسا هانم :- ههههههههه ... انا برضه كنت حاسه انى اتجوزت عيل .. كده بقى انا اتأكدت
همس الاحباب :- ماما .... عيب كده ..الرايق برضه والدنا العزيز ..مهما كان ومهما عمل ... يالا بقى يا رايق خش اوضتك وانا هاروح اجيبلك مصاصه وحب العزيز وكاراتيه واجى
الطائر الحزين :- ايه يا جماعه فى ايه ؟؟؟ ليه المعامله دى للرايق ؟؟؟ لالالالالالالا انا طبعا ارفض المعامله دى .. ولا يهمك يا رووقه روح اغسل رجلك علشان تشرب اللبن وتنام
صبرنى يارب :- تعالى هنا يا بابا ... الناس دول كوخه ...ووحشيين ..تعالى ورينا ايدك ..ادى البيضه ..وادى اللى سلقها ..وادى اللى قشرها ..وادى اللى اكلها همهمهمهمهمهم
الرايق :- بيضه ايه يا ملحوسه انتى وهو وهو وهى وهى ..انا الدكاتره الكبير عبده باشا الرايق ..سليل اسره الملك الكبير محمد باشا فوزى على سن ورمح .. انا التاريخ والجغرافيا يا بشر .. انا الدراسات كلها بملف الانجاز والخرايط كمان
حنين القلب :- هدى نفسك يا بابا ... سيبك منهم ..دول غيرانين منك ..كبه كده منك ليها ليه .. موتوا بغيظكم .. تعالى يا بابا نلعب سوا .. انت تحدفلى وانا احدفلك
الرايق :- انتم اصلا كلكم وش فقر .. انا على وش ملايين يا بشر
فرنسا هانم :- يووووووووووووووه ... انت تاااااااااااااااانى يا رايق ... اقوم اشوف اللى ورايا فى المطبخ احسن من وجع المصارين ده
الرايق :- يلا اتسحبوا واحد وراء التانى ... ماهو انت وش فقر ومش متعودين على النعمه
همس الاحباب :- ماهو يا رايق انت بصراحه خليتها خل خالص ... يا راجل انا جانى الزهايمر وانا فى عز شبابى بسببك
الطائر الحزين :- استنى يا خالد لما نشوف ايه الحكايه .. تعالى يا فرنسا واقعدى لما نعرف القصه ... ها يا رايق ايه بقى الحكايه ؟؟
الرايق :- طيب صلوا على النبى
الجميع فى صوت واحد عليه افضل الصلاه والسلام
الرايق :- من غير لا ضحك ولا تريقه .. انا لما اتعصب مش هاعرف نفسى
همس الاحباب :- قول يا بابا محدش هيتريق
الرايق :- القصه يا ولاد انى خلاص ...على وش الملايين ..ومش جند مصرى ...نو نو نو .. ده استرينى ودورر ويورو كمان .. انا خلاص هادخل المجد من اوسع ابوابه
فرنسا هانم :- ياما جاب الغراب لامه
الرايق :- سكتوا الحيزبونه دى ... سكتوا حفيده شجره الدر ..وسلاله ام اربعه واربعين
الطائر الحزين :- من فضلك استنى يا ماما ... قول يا رايق
الرايق :- انهارده الواد الجهبز ..العلامه الكبير حسن باشا الفراش وهو بيكنس الارض فى الحى ..كان فيه علبه كانز فاضيه .. وانا كنت قاعد على السلم مكانى ..وفجأه لقيت العلبه دى جايه تتدحرج على السلم ..رحت شايطها بكعب رجلى ......
همس الاحباب :- ها وبعدين ...سكت ليه يا رايق
الرايق :- لا بعدين ولا قبلين .. الواد الجهبز حسن باشا الفراش الله يستره .. بصلى وقالى ... ايه الحلاوه دى يا رايقالدو .. رحت انا قلت له انت اللى 60 الدو ..راح قالى .يا رايق انت موهوب بجد ...انت احسن من رورالدو بتاع البرازيل واحسن من ابو تريكه بتاع الزمالك واجدع من كاكا وبليه ..انت موهوب يا رايق ..انت احرف من محمود شحاته وحسن الخطيب ذات نفسه ... وبعدين قالى انت لازم من الاسبوع الجاى نبيعك لاسبانيا تروح لبرشلونه او ريار مدريد او بلد الوليد الصغير... انا قلت له ..طيب اعمل ايه يا حسن باشا ؟ ...قالى هات 20 نفيخه واقعد اتدرب بيهم فى البيت وانا هاكون وكيل اعمالك وهابيعك ب 95 مليون جند استرينى
حنين القلب :- وهتجيبلى عريس يا بابا ؟؟؟
الرايق :- ايوه طبعا يا حبيبتى ..هاجيبلك عشر عرسان ليهم ايدين ورجلين وعنين ومنخاير زينا مش العرسان الكسر اللى كانوا بيجولك
حنين القلب :- لا يا بابا عشره كتير ... هات تسعه بس وانا انقى براحتى
الرايق :- بنت يا حنين .. فين الناس ؟؟ فين فرنسا والطائر وهمس وصبرنى
حنين القلب :- والنبى ما اكلتهم يا بابا ..حتى بص بقى
الرايق :- هى دى عادتهم .. اكلمهم كلام لمصلحتهم وهما يسيبونى ويمشوا .. عموما ولا يهمنى كاس القارات شغال ويمكن اتدرب والحق الفاينال
**********
مع تحيات فريق العمل بمدونه
الضاحكون

هناك 22 تعليقًا:

همس الاحباب يقول...

ههههههههههه
فعلا تنفع يا روقة
بس والنبى تخلى بالك من النفافيخ
احسن احنا جايبنهم سلف
وانا بقول المنتخب مستواه ارتفع كده ليه

همس الاحباب يقول...

بوابة العيلة
مش ميت مرة قولتلك بلاش تفتحى الباب للرايق خليه على السلم
الراجل ده جابلى العصبى
وعايزة تسعة عرسان تختارى واحد
ولا هتلعبى بيهم حادى بادى كرنب زبادى

همس الاحباب يقول...

الرايق
ههههههههه
الحاج متولى الرايق ومجموعات كماان
ايه يا عم انت هتتجوز كاس القارات
سيبك انت علامة ودكاترة حتى فى الجواز

حنين القلب يقول...

لالالالالالالالالالالا بقى
ده ظلم وربنا
هو علشان انت اللى عارف مواعيد نزول البوست علطول تاخد اول تعليق
انا هعترض
وهقدم شكوى لبابتى


اروح اقرى بقى
ربنا يوقف نموك يا خالد
بس هيوقفه اكتر من كده ايه؟؟
نص متر وتقفل قناه السويس رايح جاى

وش بيطلع لسانه

حنين القلب يقول...

عبده الرايق

وربنا انت خسارة فى العيله دى
شوفت انا بس اللى قعدت وسمعتك
علشان تعرف ان مش ليك غير بنتك اخر العنقود

بابتى انا مبسوطه اوى لانك هتبقى مشهور وهتجيب لينا الكاس والدورى
وكمان هتلعب مع جوزيه فى نادى السويس
انا بسمع الاسم ده كتير بس مش عارفاه
بابتى
والنبى ابقى هات جوزيه ده يمكن اعجبه ويتجوزنى
ونبقى جوزيه وجوزته
ههههههههههههههههههههههههههههه

تسلم ايدك يا بابتى
طول عمرك مبدع وربنا

حنين القلب يقول...

همس الاحباب

يا ابنى انت مالك ومالى
مش ينفع بابا يكون على الباب ومش افتحله

واااااااااااااه بابا هيجيب ليه 9عرسان
ويمكن كمان يجمعهملى زى ما انا بحلم

مش ليك دعوة يا حقود انت
ان شاء الله هلاقى عريس جميل جمال مش ليه مثال
وش بيغيظك

Kiara يقول...

هههههههههههههههههههههههههههههههههههههههههههههههههههههههههههه

يالهوي ياني ومستغرب انهم قاموا

ربنا يكون في عوووووووونهم


وعاوز تلحق القاينال

ضمنا الكاس ::)

Kiara يقول...

هههههههههههههههههههههههههههههه

فرحانه ياحنونه بالتسعه

يالهوي

هههههههههههههههههه

طيب يعني سؤال رخم

ايه الفرق بين العشره والتسعه

لما تنقي من 10 ولا 9 هتفرق ايه9

الواحد دا كان خانقكك في ايه ههههههههههههههههه


صبررررررررررني يارب

عاشقه الرومانسيه يقول...

يدق جرس الباب فتسرع بواب العيله حنين القلب لفتح الباب
*********************
ياااااااااااااه
للدرجه دى ياحنين
لالالالالالالالالالالالالا
العيله دى مش بقت بتحترمك خاااااااااااااالص

وعايزه 9 عرسان بس مش 10
يعنى البت قنوعه قوى
على رأى كيار
هو الواحد ده اللى تعبك يعنى؟
ده اللى مش هيخليكى تعرفى تنقى؟
ده اللى هيزحم البيت عليكى؟
ده انتى غرييييييييييبه

أحــوال الهـوي يقول...

يظهر يا رايق نزلوا من عينتك 11 يلعبوا قدام امريكا
فامريكا لعبت بيهم

السر في النفافيخ يظهر انه مسكهوا فطيرونا معاهم

تحياتي

بنت اسكندرانية يقول...

اغيب شهرين ارجع الاقيكم دخلتم كاس القارات نشت يافالحححححححححح ادينا خرجنااااااااااااا برا اوت منك ليها ليها لوة ههههههههههههه
بوست جميل كلعادة ومش حسالكم اناااااااااا ميننننننننننننن؟؟؟؟؟؟؟؟؟؟

Sweet Violet يقول...

حنين القلب :- والنبى ما اكلتهم يا بابا ..حتى بص بقى


ههههههههههههههههههههههههههههه

حتى افراد العيلة ياحنونة مش رحماهم

انا بقول ياريق سيبك من العيلة اللى مش مقدرة مواهبك و دور على عيلة تانية احسن لك

و كمان يعنى ايييييييييييه اللى يفرق تسعة من عشرة هه

ياريق بجد خد بالنصيحة ده انا هتشل و انا بره

الله يكون فى عونك

^_^

الفراغ يقول...

مبدعين كالعاده
بس بجد حسن الفراش دا هو اللى يستاهل الشكر
عرف موهبة ابوكم مش انتو اللى قاعدين عاطلين
اديسكوا عرفتوا الطريق
يلا كل واحد يسرح بالبلالين على الكورنيش
يحيا الرايق

عبده الرايق يقول...

همس الاحباب
نو
نو
نو
النفافيخ انا مشتريها من مالى الخاص
وان شاء الله هاوصل للعالميه

عبده الرايق يقول...

حنين القلب
جوزيه ده اسم جوز الهند
وده مدرب النادى الاهلى ويقال انه اشترك فى الحرب العالميه الاولى سنه 2006 وخد كاس السوبر والكليو باترا

عبده الرايق يقول...

كيارا
ههههههههههههه
كاس القارات رااااااااااااااااح
انا تركيزى الاساسى والاحتياطى دلوقتى فى الاهم كاس المدارس
وبعدين نوصل للملايين
مع خالص تحيات اسره الضاحكون

عبده الرايق يقول...

عاشقه الرومانسيه
طبعا فى فرق كبير بين ال 9 وال 10
بس الفارق فى الطمع بعيد عنك
وتبقى حنين تقابلنى لو لقيت واحد من التسعه

عبده الرايق يقول...

أحــوال الهـوي
شوف يا سيدى المحترم
انا بجد كنت فاكر كده
لكن طلع ان المنخب الامريكى بيلعب بالنووى
والدليل فوزهم على منخب اسبانيا
لكن برضه منتخبنا كان بيلعب قدام النووى بالكازوز

عبده الرايق يقول...

بنت اسكندرانية
بنت اسكندرانيه اهلا وسهلا بيكى
لكن فى لغز فى السؤال
عروووووووووووووووووووستى

عبده الرايق يقول...

Sweet Violet
نو
نو
نو
هتتشلى ليه ؟؟؟
اسم النبى حرسك وضامنك
والف سلامه ليكى
بس انا الناس والعيله دى مش فاهمنى خااااااااااااااااااااااااالص

عبده الرايق يقول...

الفراغ
هههههههههههههههههه
سيدتى الفاضله
اهلا ومرحبا بيكى
والله مشرفانا دايما بحضورك
وياريت الكل يفهمنى ويجرى بالبلالين على الكورنيش كنا نكسب ملايين الدوررات
مع خالص تحياتى لحضرتك

حاجات جوايا يقول...

واااااااو
هو ده الكلام
ذاتس ات
بس يارايق ده تواضع منك انك تفكر فى اللعب
انت تدرب على طوووووول
وبعدين 95 مليون استرلينى ده تهرررريج على امكانياتك وقدراتك الملعبية الفذة وخططك التكتيكية

اكيد ايطاليا هتخطفك خطف
خاف على نفسك بقى اليومين دول
تيك كير
انت ثروة قومية لا تقدر بثمن
هههههههههههه

متخافيش يا حنونة العرسان هيبقوا 900 مش 9 بس
هههههههههههههههههههههههه


اجمل سلام وارق تحية لاسرة الضاحكون