الأحد، أبريل 05، 2009

عيله تجنن .. وصيه الرايق

فقره اعلانيه
*********
اخى المواطن اختى المواطنه
مصلحه الضرايب تحييكم ويسرها ان تعلن ان اخر موعد لتقديم الاقرار الضريبى طوال العام
وانتم عارفين ضريبى من فعل ض ر ب .. والنبى يا شاب والنبى يا شابه ابوس ايديكم تقدموا الاقرار بتاعكم ..حسنه قليله تمنع بلاوى كتيره .. وهنيه لك يا فاعل الخير والثواب .. ومن قدم اقرار بيداه التقاه .. قدم اقرارك يا مؤمن تكسب معانا جوايز كتيره ..قدم اقرارك يا مؤمن تكسب معانا دعاوى كتيره .. اخوانكم جعانين ..اخوانكم مفلسين ..ساعدنا ربنا يساعدك ويعلى مراتبك ويخليلك عيالك والست بتاعتك
وخلى بالك
خلى بالك
ضرايب من فعل ضرب.... وقد اعذر من انذر
****************

والان موعدنا مع الحلقات الكوميديه عيله تجنن ..وحلقه اليوم بعنوان.. وصيه الرايق..بطوله عبده الرايق وهمس الاحباب

يعود عبده الرايق الى المنزل فى المساء وراسه تقطر دما ..فيراه ابنه همس الاحباب ويفزع من منظر الدم ويصيح قائلا
همس الاحباب :- ابا الحاج ايه ده ..راسك بتخر دم فى ايه ؟؟؟
يدخل الرايق الى الشقه ويرتمى على الكنبه ( مفيش انتريه ) ويقول لابنه همس الاحباب فى صوت خفيض
الرايق :- خلاص يا خالد يابنى خلاص انا بموت ... الوداع يا خااااااااااااالد
همس الاحباب :- لا وداع ايه ؟؟ احنا لسه فى نص الشهر ..خليك معانا لغايه القبض يابابا ..بصراحه ده مش وقت موت خالص
الرايق :- هو حد بيختار ميعاد موته يا ولد ؟؟ ..هات ايدك يا خالد

همس الاحباب :- ادى ايدى اهى ..انت ناوى تعملها بجد يا رايق ؟؟؟
الرايق :- بلاش الايد الشمال هات اليمين ولا اقولك خليها الشمال ولا هات احسن اليمين
همس الاحباب :- ياعم انت هتفاصل ..ادى اليمين اهى
الرايق :- ولا اقولك هات الاتنين .. بص يا خالد يابنى انا قبل ما اموت لازم اعمل حاجتين
همس الاحباب :- خير يا حاج وقعت قلبى
الرايق :- اول حاجه لازم اديلك حكمتى وخبرتى .. وتانى حاجه لازم اقولك على مكان وصيتى والميراث بتاعى
همس الاحباب :- بلاش يابابا حكمتك وخبرتك ..خليهم يمكن ينفعوك هناك ولا حاجه ..انا بس عايز الميراث
الرايق :- يابنى انا ببيع جمله مش قطاعى ..الحكمه والميراث يابلاش انا مش لاعب
همس الاحباب :- خلاص يابابا قول وانا سامع حكمتك

الرايق :- امسح دموعك يا خالد وبلاش تبكى يا ولدى
همس الاحباب :- لا الساعه دلوقتى 9 بالليل وانا مش متعود ابكى فى الوقت ده ..وبعدين مفيش دموع علشان امسحها
الرايق :- اااااااه ياندل .. طيب اعمل نفسك بتعيط عليا حتى ولو كده وكده
همس الاحباب :- حاضر يا حاج انا هعيط بس يلا بسرعه خلصنى وقول على مكان الميراث قبل ما امى واخواتى ييجوا

الرايق :- الاول حكمتى وخبرتى فى الحياه .. اوصيك يا خالد يابنى تمشى فى الشارع دايما ومعاك المثلث وشنطه الاسعافات وتربط الحزام
همس الاحباب :- بس انا معنديش عربيه يا حاج
الرايق :- وماله يابنى ولاد الحلال مخلوش لولاد الحرام حاجه .. برضه لازم تعمل حسابك محدش ضامن الظروف يابنى
همس الاحباب :- هى دى خبرتك وحكمتك فى الحياه يا رايق .. ماشى يا عم ..ناقص بقى الميراث
الرايق :- عارفك يا ولد مستعجل تورثنى ..لكن غصب عنى هى دى سنه الحياه ..وبرضه اموت وانا مرتاح
همس الاحباب :- ولا يهمك يا بابا قولى بس مكان الميراث فين وفلسع انت براحتك واحنا لغايه اول الشهر لينا رب اسمه الكريم

الرايق :-الحقنى بسرعه ياخالد وهات كل البطاطين اللى جوه بسرعه
همس الاحباب :- هاروح اجيبهم بس اوعى تعملها قبل مارجع
ويجرى همس الاحباب الى غرف النوم ويحضر ثلاث بطاطين وياتى مسرعا لكى يغطى الرايق ولكن الرايق يرمى البطاطين ويقول له
الرايق :- لا انا مش عايز اتغطى يا خالد يابنى
همس الاحباب :- امال خليتنى اجيب البطاطين ليه ؟؟؟
الرايق :- اصل الدنيا حر ..وانا مش طايق هدومى
همس الاحباب :- الله ماطولك ياروح ... ماشى يا عم اتدلع براحتك ..فين بقى مكان الكنز ؟؟؟
الرايق :- بص يا خالد يابنى ..انت هتروح الحى اللى انا بشتغل فيه الساعه 9 الصبح .. وتدى ضهرك لباب الحى ..وتعد خمس خطوات ..هتلاقى نفسك على الرصيف ..تستنى نص ساعه هتلاقى الموظفين بدءوا يجوا الحى الساعه 9 ونص ..لان ميعادهم الساعه 8 الصبح ..المهم يابنى هتستنى ربع ساعه هتلاقى نفس الموظفين خارجين لبيوتهم ..وهتلاقى واحد ماسك مقشه وبيكنس الحى اسمه ..حسن الفراش ..تنادى عليه وتقوله ..انا خالد ابن الرايق الله يرحمه ويحسن اليه ..وتدوس على يحسن اليه دى ..يعنى ممكن تقولها سبع او تمن مرات ..وتقوله كلمه السر..الفول الحيراتى غالى يا حماتى ..هيديلك الوصيه والتركه
همس الاحباب :- ماشى يا حاج اتفضل انت بقى فلسع براحتك مع السلامه ..ايه انت لسه مفتح عينيك ؟؟ يلا بقى ياعم علشان اغطيك زى الافلام ...ايه يا حاج انت مش قلت الحكمه والخبره والوصيه ..يلا بقى خلص علشان محدش يجى ويسمع منك ان فى ميراث
الرايق :- الصبر جميل يا ولد ..انت ايه هتمسك لى الساعه وتعملى فيها حكم وتحسب عليا الوقت الضايع
همس الاحباب :- لا ابدا بس كنا عايزين نخلص فى الدور .. يعنى قطم الخياره ولا نحتها ..بس قولى بقى الميراث ده يطلع كام ؟؟؟
الرايق :- حوالى 75 الف جند غير الفكه
همس الاحباب :- خلاص يا بابا انا دموعى هتنزل خلاص والنبى خلاص
الرايق :- انت مش قلت انك مش بتعيط فى الوقت ده ؟؟
همس الاحباب :- عديها بقى يا حاج .. اهو برضه الناس تقدرك وتقول عليك اننا بنحبك
الرايق :- بس اسمع انت ناوى تاخد الميراث كله لوحدك ؟؟؟؟

همس الاحباب :- ياعم متشغلشى نفسك انت بالحاجات الرفيعه دى يلا مع السلامه بقى انتى ..وانا هتصرف
الرايق :- خلاص بس اوعدنى انك هتدى كل واحد مكتوب اسمه فى الورقه فلوسه ..هما حوالى 75 الف جند الديون بتاعتى بس

همس الاحباب :- نعم نعم نعم ... هو الميراث ديون ؟؟؟
الرايق :- ايوه طبعا ..هو انت فاكر ايه ؟؟ هو انا حيلتى اللضى
همس الاحباب :- لالالالالالالا خليك لما اخواتى وامى ييجوا ..اوعى تعملها ..بس انا سامع صوتهم ..باين عليهم جم
وتدخل فرنسا وصبرنى يارب ويسئلون الرايق عن الدماء التى على راسه ومصدرها فيقول
الرايق :- ابدا الجرح اللى كان فى راسى من اسبوع هرشت فيه وانا داخل راح خر دم
همس الاحباب :- هرشت ؟؟؟؟؟؟؟؟؟؟؟؟ الحمد لله ..نشفت دمى ياشيخ ..قوم بقى انت سدد ديونك ...صحيح عيله تجنن

هناك 34 تعليقًا:

همس الاحباب يقول...

هههههههه
فرق توقيت يا جدعان
البوست بقى بنزل 5 بدل الساعة 6
بس على ميييين

همس الاحباب يقول...

ونعمة الوصية يا رايق
بصراحة
وزبن مااخترت علشان تقوله الوصية
اهو الدموع نزلت لوحدها يار ايق
بس من كتر الضحك مش حزنا عليك لاسمح الله
ههههههه

همس الاحباب يقول...

بقولك ايه يا رايق
ممكن تبعت 5 كيلو كبدة
و5 فلفل
و5 خيار
علشان انت نشفت دمى
ومحتاج لشوية غذاء كده
وبعدين اشمعنى المسلسل ده اللى ما فيهوش اعلان
ولا اصحاب الاعلانات فلسعوا هما كماااااان

حنين القلب يقول...

انا جييييييييييييييييييت

هروح اتفرج على المسلسل وراجعه

حنين القلب يقول...

عبده الرايق

سلالالالالالالالامتك يا بابتى
انشاء الله خالد وانت لا

نو
نو
نو
ديوووون
الحمد لله انى مش كنت موجوده

بابتى والنبى بلاش تهرش تانى احنا عايزينك
انا لسه هتخطب وعايزة جهازى
مييييييين اللى هيجوزنى من غير جهاز
اخوايا وبخيل ويموت على القرش
ربنا يخليك ليه يا بابتى

حنين القلب يقول...

همس الاحباب

ههههههههههههه
ايوووووووووه يا جدعان
لما لاقى الورث ديون مسك فى ابوه بأيده وسنانه
وقبلها بثوانى كان بيقوله اتكل على الله وانا هورثك
طووول عمرك واعى يا خالود
بس الحمد لله طلعت ديون وانت الكبير يعنى نصيبك اكبر

تسلم الايادى ياخالد

همس الاحباب يقول...

بدانا النكد الاسرى
وانتى ايش جابك يا مسحوبة من لسانك
وبعدين مسلس ايه اللى هتتفرجى عليه
هى شاشة سينما

همس الاحباب يقول...

حنين القلب
موجودة مش موجودة نصيبك موجود يا اختى
متخافيش انا ما اقدرش اكل حقك
وعلشان كده هديكى نصيبك ونصيبى فى الديون
شوفت الكرم الاخوى ده

حنين القلب يقول...

همس الاحباب
اعلالالالالالانات

مين المجنون ده اللى ينزل اعلان فى حلقه انت فيها
اكيد هيكون عارف ان المنتج بتاعه هيخسر
كفااااااااايه انك فيها

وبعدين ولا تزعل
اعلالالالالان
النهارده مفاجاه مذهله
لكى ولك
الفرجه بلاش
اللى هياخد اخويا خالود هديله فوقيه سم فيران هديه وكمان مج مليان فنيك وربع معلقه بودة عفريت وده ياجماعه يا اللى هتشتروا علشان لو حبييتوا تخلصوا منه فى اى وقت
لو حبيتوا تشتروا اتصلوا على رقمنا
ومن غير مصاريف شحن
يلالالالالالالالالالالالالالالالالالا
ااااااااى خدمه يا سيدى اعلان اهه

همس الاحباب يقول...

حنين القلب
جهاز ايه
اللى انتى بتتكلمى عليه
متخافيش على ايدى انا مش هتبقى جوازة هتبقى حاجة تانية
وبعدين ده بابتى حبيبى
اسيبه يفلسع وهو عليه ديون
ده حتى حرام وهبتعذب كماااان بديونه
بس اموووت واعرف الديون دى عملت بيها ايه يا رايق

همس الاحباب يقول...

حنين القلب
ههههههه
هههههه
يلا اتصلوا وكل ما تتصل اكتر فرصتك فى الفوز هتكبر
ومع المنتج فردة شراب هدية

حنين القلب يقول...

همس الاحباب
اولا انا مش مسحوبه من لسانى
دنا غلبااااانه
المهم
انا مش ليه فى الديون لانى اخر العنقود
وعيله ومش هسدد حاجه ماشى

وبعدين مش هتجهز ليه
هو انا مش هتجوز ولا ايه ؟؟
عااااااااااااااااااااا

لا والنبى انا عايزة اتجوز
مااااااااامتى الحقى خالد هيخلينى اعنس

خالود
بص انا شاكه ان بابتى اخدت الفلوس دى واشترى بيهم اسهم فى البورصه
ابقى شوق لينا الموضوع ده يمكن نطلع بجوز جنيهات
مااااااااااااااشى

همس الاحباب يقول...

حنين القلب
ما هو فيش حاجة تنسحبى منها غير لسانك
وبعدين مين قال انه ما فبش جهاز
ده انا هعملك جنازة حارة والميت قطة
متخافيش
وبعدين الميراث ما فيهوش اخر العنقود واول العنقود
العنقود كله راح فى الضياع
لا يا اختى
ده اخدهم وعمل بيهم مزرعة السمك
ولا يكون عمل موسوعة الرايق للمعلومات الفشنك

maiosha يقول...

ههههههههههههههههههههه

ونعم العيلة والله
هههههههههههههههههههههههه
بس والله يا رايق عرفت تربى بجد ونعم التربية
ابنك اول ما شافك وانت تعبان وهو نفسه يعيط .. هيموت ويعيط .. بس انت اللى غلطان اتعورت فى وقت غلط .. وهو مش بيعرف يعيط فى الوقت ده

هههههههههههههههههههه

بقى كل ده علشان هرشت .. حرام عليك يا رايق .. الله يكون فى عون عيلتك والله ليهم حق يعملوا فيك اكتر من كده

ههههههههههههههههههه

عاشقه الرومانسيه يقول...

ايه العيله دى ؟؟؟؟؟؟؟؟
يعنى حتى التعليقات واخدينها لحسابهم؟

بصراحه يارايق انت اسم على مسمى
وخالد عنده حق
فى اب بالشكل ده؟

حلو ياخالد انك تكون منظم والعياط يكون بوقت
هههههههههههههههههه

همس الاحباب يقول...

ميوشا
بس علشان تعرفى اننا عيلة متربية على ايد الرايق
وبعدين المفروض يتعور فى وقت مناسب للعياط مش كده
الحمد لله انه طلع غلطان هو مش انا

نورتينا يا ميوشا
تحياتى

همس الاحباب يقول...

عاشقة الرومانسية

هههه
عيلة مستغلة مش كده
وبتشجع الاحتكار فى التعليقات
الحمد لله يعنى انا ابن بار جدا
ومش بتاع مصلحته خالص
وبعدين النظام ثم النظام
هى فوضى ولا ايه ولا الدموع دى ببلاش
منورة يا دودو الضاحكون دائما
تحياتى

فرنسا هانم يقول...

منك لله يا رووقه نشفت دمنا
قصدى فرحتنا
كنا نفتكرك هتودع بصحيح قلنا خلاص هنخلص منك
لكن تاتى الرياح بما لا تشتهى المراكب

فرنسا هانم يقول...

ولد يا خالد
ابقى وصى ابوك الرايق يستحمى بدل ما يقعد يهرش ويوقع قلبنا
بوست جميل يا خالد انت وروقه
تسلم ايديكم

الطائر الحزين يقول...

تمام كدة اللى كان عاوز يورثك يروح بقى يتشطر ويسدد الديون

صمت المشاعر يقول...

ههههههههههههه ياخبر ابيض


دمك خفيف اوووووي

واسلوبك في الكتابه لذيذ

منتظرين منك المزيد

همس الاحباب يقول...

فرنسا هانم
هههههههه
دم ايه يا ستنا
انتى صدقتى انه كان بيخر دم
ده كيس دم خرفان مستورد
ولا زجاجة ميكروكروم كانت معاه
هنعمل ايه للمراكب هى الماشية عكس الريح

همس الاحباب يقول...

فرنسا هانم
علم وههينفذ يا فندم
بس العيد لسه قدامه كتير
ممكن يستحمى فى عيد العمال
ما هو عيد برده
ربنا يكرمك يا فرنسا هانم
بس انتى مختفية ليه
والرايق مش ظاهر على فكرة
عندى احساس انك بعتيه يعثة لكوالامبور

همس الاحباب يقول...

الطائر الحزين
هههههههه
بورث ميين يا عم
انا متنازل عن الميراث
وبعدين انتى رحت فييين يا فيلسوف عصرك واوانك.
ما اتفنقاش على كده

همس الاحباب يقول...

صمت المشاعر
ربنا يكرمك يا ست الكل
وسعدا بتشريفك الدائم
وتحت امرك خليكى معنا
وكل اسبوع فيه جديد باذن الله
تحياتى

عبده الرايق يقول...

خامسا :- انا بعتذر جدا جدا اند جدا على عدم تواجدى فى هذه الايام

تاسعا :- برضه انا سايب ورايا رجاله

ثالثا :- انا مشغول جدا جدا لان اوباما الغلبان لسه مش بيفهم فى السياسه جامد والامريكان جم يتحايلوا عليا ويقولوا والنبى يارايق الله يخليك يارايق تيجى تورى للريس اصول الشغل
اعمل ايه بحب اخدم الناس

سابعا :- ولد يا خالد خلى بالك من المدونه فى غيابى وجدول البوست القادم

ثانيا :- سلام مؤقت ولنا عوده ان شاء الله

عبده الرايق يقول...

معلشى انا نسيت سادسا

سادسا :- انا سمعت كده انا فرنسا هانم كانت قاعده فى صالونها مع اصدقاءها وصوتها على فى الكلام وقالت انا زعيمه القاعده دى
وقد كان
تم تصنيفها انها على لائحه الارهاب وجارى البحث عنها فى كل مكان
وتم رصد مكافأه قدرها 10 مليوم دورر لمن يساهم فى القبض على زعيمه القاعده

حاجات جوايا يقول...

هههههههههههههههه
كل الفيلم ده من الهرش
ههههههههههههههه

بس ايه مشاعر البنوة الخالصة دى
هههههههههههههههههههههه

شفت ابنك خايف عليك اد ايه يا مستر رايق
تسيب الديون دى كلها وتروح فين ؟؟
لأ .. ومبلغ محترم .. ايه ده انت مديون للسويس كلها ولا ايه ؟؟؟؟؟؟؟
ههههههههههه


معلش يا ابو همس بقى تتعوض فى مرة تانية
طلعت اوت المرة دى
هههههههههههههه


خالص ودى
سالى

همس الاحباب يقول...

عبده الرايق
حمدلله على السلامة
كفارة يا جدع
ده فرنسا كانت جايبة العدس والبصارة وجاية تزورك فى كوالامبور

وبعدين مين اوباما ده
اوعى تقولى قريب حسن الفراش
ازعل بجد
ماشى يا روقة براحتك دبسنا واخلع انت

همس الاحباب يقول...

حاجات جوايا
ام دودو الغالية
شوفتى المشاعر والخوف عاملة زى
علشان تقدروا بس قيمة الابناء
انا عندى احساس انه مديون لجمهورية الصين الشعبية اللى هى فى الشمال الشرقى للسويس
هى طلعت اوت بشكل يا سالى
وانا كنت باحلم اورث المليونير الرايق
ههههههه
نورتينا يا ام دودو
تحياتى وتقديرى

الفراغ يقول...

ايه ياعم..هو انتوا تكتبوا البوست وتردوا عليه
علشان كدا طول مانت قاعد كدا فى المدونه هتسدد ديون ابوك ازاى..صحيح عيله ..بلاش احسن
والله دمك خفيف مش دم الرايق اللى يودى فى داهيه
هو فين مسز رايق واختها وحشونى اوى
يارب يجوا..يشفوا حل فى المدونه اللى تترهن دى علشان يسددوا ديون الرايق
ربنا يستر

رندا يقول...

كل سنة وانت طيب ياروقا عقبال مليون سنة يارب وانت معانا
انا عايزة تورتاية مليش دعوة

ربنا يخليك على طول متجعين على طول فرحانين على طول بسمتنا الى بندور عليها

اوعى تكون عجزت ياروقا ولا حاجة دة الامل فيك هعهعهع

رندا

Empress appy يقول...

طيب واللى بيركب عجله برضه يعلق المثلث على ضهره ولا ايه رايك البس جاكت وارسم عليه بنوته بتعاكس وتبقى دي المثلث العاكس
يا عم انت هتموت وتسيب العيال مديونين
وبعدين معاك يا روقه خف من كلامك على الضرايب بدل ما ينزلوا على الكالم ضرايب ساعتهااوعدك انك هتبيع هم الاحباب واخواته علشان تسدد ما انا عارفاك رغاي موتتتتتتت
هههههههههه

كل سنه وانت طيب يا بابا الرايق وتفضل رايق على طول يا رب

همس الاحباب يقول...

كل سنة وانت طيب يا رايق
وعقبال مليون سنة
النهاردة يا جدعان عيد ميلاد الرايق
وهنعمل حفلة للصبح

يعنى اللى يدخل يسيب 1000 جند الرايق
هدية
و9000 جند ليا علشان اوصل الهدية
وكل سنة وانت طيب يا ابو الفصاد