الاثنين، يناير 26، 2009

صنية البرارص

كان ياما كان فى سالف العصر والاوان ايام ما كان فى الشتا يجى رمضان


ولا يحلى الكلام الى بذكر النبي عليه الصلاة والسلام


مره من ذات المرارير لما كان الشاطر ابو رياض والاميره صبرني فى الامارات


كانت صبرني يا رجال حامل فى مريم اول خلفتها وفى كانت فى شهرها التامن وهووووب وهى ماشيه فى محل ملابس طاااااخ اتكعبلت فى شماعه لئيمه واتكبت وكانت فضيحه مدويه


المشكله بقى انها تعبت وراحت للدكتوره الى طلعت دونكي كبيره واتخذت اجراءات على انه احتمال تكون ولاده واتسببت فى مشكله زياده

المهم يعنى استقر الامر على انى انام اسبوع ما اتحركش تقريبا الا فى اضيق الحدود


كان تاني يوم الخميس وكانت الاجازه هناك الخميس والجمعه فابورياض بقى تطوع


وقالي انا الى هاطبخ النهارده


أنا :ليه كده طيب مافيش مشكله انا ممكن اقوم اجهز اي حاجه سريعه


أبو رياض متأثرا بالافلام العربي : لا ممكن ابداااااا انتى خليكى مرتاحه وانا هاطبخ


أنا : طب ما نطلب اكل من بره وخلاص


أبو رياض : لا لا انا فى اجازه النهارده خلي الاكل من بره في يوم انا فى الشغل


أنا متوجسه خيفه : طب هاتعرف ؟؟


أبو رياض : بتهرجييييييي . ده انا ياما طبخت يا بنتى ياما شباب زي الورد كلوا من اديا فى السعوديه ده انا كنت مهنيهم .


وبعد وصله من الكلام عن احلى باميا والاختراع الى بيعمله فيها والطز باللبن الى كان مغرقهم فيه ولا الرز الا بالكابوريا يا لهوييييييي


المهم قلتله: طب هاتطبخ ايه ؟؟


قالي : اعمل صنية برارص باللحمه (بطاطس يعنى ) .دى اسهل حاجه بقى .طب ده انا كان عليا صنية برارص ما لهاش حل يا سلام عليك يا واد يا ابو رياض يا كايهدهم .


وبعد وصله من شرح اماكن الحاجات

قام ابو رياض وشمر عن ساعديه وراح يطبخ


قلتله : ما تعملش كتير يا رضا ثلاث او اربع بطاطسات كده عشان ما نرميش الاكل


قالي : اوك


بعد شويه اسمع طااااااااخ


انا: فى حاجه ياااااااارضاااااا


رضا: لا لا مافيش حاجه ما تشغليش بالك انتى


انا بعد شويه تانين : طب اجي ابص عليييييييك يا ابن الحلال


رضا : اياك تقومي من مكانك .


ومرت الساعات وانا كل شويه اسأل عليه وهو كل شويه يجي


يقولي هاتموووووووتي يا سوسو لما تاكلي صنية البرارس


المهم جاب الاكل ابو رياض وجه الله يصلح حاله مهنينى طول عمره


اولا الاقيلك حضرتك اكبر صنيه فيك يا مطبخ والصنيه مليانه على اخرها تأكل بتاع ست سبع افراد كده


أنا : ايه ده انت عامل كتير كده ليه يا عمنا .


رضا: ده كتير ؟؟ ماهو يادوب اهو .


أنا وكاتمه الضحك :طيب ماشي اقعد يا حبيبى يلا ناكل .


وبدأنا اكل وانا بقى كاتمه الضحك مش قادره يا جدعان هاموت كده ههههههههههههههه ايه البصل الى على وش الصنيه ده كله .


ابو رياض : ايه رايك بقىىىىىىىى اظن ما لهاش حل


أنا : اه طبعا جميله تسلم اديك هو فى كده ؟؟؟!!!


ابو رياض : هو البصل بيقرقش شويه ؟؟؟


أنا : اه شويه ده ليه ده يا ابو رياض ؟؟


أبو رياض : مش عارف اصل انا ما دعكتوش بملح وفلفل عشان ريحتة البصل ما تمسكش فىايدى بقى


أنا : طب ليه حطيته على الوش هايستوى ازاي طيب


أبو رياض : هو المفروض بيتحط فين يعنى تحت ؟؟


أنا وانا فطسانه من الضحك : هو المفروض بيتحط فى الصنيه يعنى ما تشتغلش بالك .


وكلنا ولله الحمد ههههههههههههههههههههههه


وتاني يوم عبده باشا البواب (اه كان باشا كبير اوي ) فاز باجمل صنية برارص فى التاريخ


وطبعا فى اليوم ده رضا قعد ينضف اثاره من المطبخ بتاع ساعتين ثلاثه وما رضيش يخلينى اشوف المطبخ بعد ما خلص متخيلين انتم طبعا جراله ايه المطبخ


وتوته توته خلصت ا لحدوته ودى كانت حدوتة الاميره صبرني والشاطر ابو رياض مع صنية البرارص فى الامارات


حلوه ولا ملتوته

هناك 30 تعليقًا:

عاشقه الرومانسيه يقول...

يلا كل مره وانتى طيبه

تعيشى وتاكلى غيرها
ههههههههههه

تحيــــــــاتـى

Empress appy يقول...

كتر خيره الراجل ستات رخمه صحيح
ما تحمدى ربنا يا بنتى
بس قولى بصراحه هو البصل بس اللى كان بيقرقش ولا فيه حاجات تانيه

Che يقول...

على فكرة انا على اد مابعرف اطبخ بس مابعرفش اعمل صينيه البرارص دى ابدا لازم تتحرق و تتلسوع منى
و بعدين صحيح خير تعمل شر تلقى .. ده اخرة تعب الراجل و وقفته فى المطبخ .. و يقولك الرجاله هما اللى مفتريين .. يجوا يقروا البوست بتاعك
اهم حاجه انك طلعتى سليمه من الاكله دى

الطائر الحزين يقول...

هو اكل وبحلقة

فرنسا هانم يقول...

هههههههههه
لا حلوه يا صبرنى ياربه
ومين بقى عبده باشا البواب ده ؟
اوعى يكون اللى فى باللى ؟
يخيبك يا رايق طلعت فى الاخر بواب

فرنسا هانم يقول...

الاخ اسلام ديو
الرجاء الدخول الى الدرافت للاهميه

حلوة الدنيا يقول...

فكرتيني بايام الجامعة كان فيه واحد صاحبي من المنصورة كان واخد شقة في القاهرة بجانب الجامعة كنت بروح اقعد معاه ايام الأمتحانات كان عليه صينيه بطاطس وصينيه كوسه تاكلي صوابعك وراها كانت اجمل من الي بيعملوها عندنا في البيت وكان اليوم الي يطبخ فيه نلاقي العمارة كلها عندنا في الشقة حاكم العمارة كلها كانت طلبة مغتربيين وكل واحد جاي بحجة خايبه الي عايز اله حاسبة والي بيدور علي حاجة وقعت منه في مدخل العمارة بس جاي يدور عليها عندنا في الشقة علشان فيه نور والمدخل مفيهوش وطبعا كله جاي علشان الأكل :)

صبرني يارب يقول...

عاشقه

وحياتك اول واخر مره خلاص يطبخ ده كان زمان ايام الدلع بس

صبرني يارب يقول...

آبي

والله يا اختي حمدينه وشاكرينه احنا فتحنا بؤنا ولا اتكلمنا ههههههههههههههههه

بس هو البصل بس والله اه وما كانش فيها فلفل اسمر عشان الحموضه والبطاطس الى فوق ما كانتش متسويه اوي يعنى حاجات ثانويه كلها ههههههههههههههههههههههههه

صبرني يارب يقول...

che

اه يا اخي افترى تقول ايه بقى
ههههههههههههه

ابقى تعالى لابو رياض خد درس

صبرني يارب يقول...

الطائر الحزين

ومانبحلقش ليه يعنى ما لناش عنين ولا ايه هههههههههههههههه

صبرني يارب يقول...

فرنسا هانم

لا لا حرام عليكى يا فرنستي مش هو هههههههههههههههههههه

ده كان عبده باشا البواب كان بياخد من كل شقه 50 درهم للمصريين و100 من الامارتيه ههههههههههه اسبوعيا عشان الهنود بيعملوا كده عشان قبال الفلوس الشهريه درهم دول بيخدموا الناس الساكنين فى العماره شيل وحط وغسيل عربيه وحركات من دي

بس هو ما كانش بيعمل كده ويلبس التوب الابيض ويقعد باشا على باب العماره ويقولك مش باغسل عربيات انا .

ولما الامارتيه زنقوه بقى قام راح اجر واد هندي من العماره الى ورانا كان بيغسله العربيات هههههههههههههههههههه

باشا باااااشا

صبرني يارب يقول...

جعلوني مريضا نفسيا :

بلديااتي يعنى طيب كلنا بنعمل صنية برارس بقى هههههههههههه

بس فعلا رضا كان بيطبخ هو لما كان عايش عزابي فى السعوديه

المنصوره مشرفنا بنفسهم فى كل حته يا جدعان هههههههههههههههه

عمرو جويلى يقول...

والله حلوة بس أنا نفسى تعملى صينية البرارص وتبعتها على العنوان التالى
:مدونة اللؤلؤة

تحيات اللؤلؤة

Mafrousa يقول...

ههههههههههههه
عادى يا صبرني
و بعدين كتر خير الراجل انه مش عاوز يتعبك يعنى و لا يتعب مرات البواب
هههههههههههههههههه
بس قوليلي كلام فى سرك كده
البواب
ما اتغيرتشي معاملته ليكوا من بعد صنية البرارص؟؟؟
ههههههههههههه
اكيد بيعاملكوا اسوأمعاملة
هههههههههههههههه
تحياتي

حنين القلب يقول...

ايه ده
انا علقت هنا امبارح
راح فين تعليقى
عاااااااااااااا
طيب نعلق تانى

والله يا صبرنى انتى مفتريه يعنى الراجل تعب نفسه وطبخ وبرضه مش عجبك فيها البصل بيقرقش ولا اللحمه نيه

اييييييييييوه يا جدعان افتراه

عارفه يا بت يا صبرنى
جوزى بيعمل صنيه بطاطس روعه بس كل حاجه لوحده
يعنى البصل لوحده واللحمه لوحدها والبطاطس لوحدها والصلصه لوحدها وانتى لخبطى بقى وانتى بتاكل

وبالهنا والشفا
واخر حد يخلص اخر يتصل بالاسعاف

بوست عسل يا صبرنى

غير معرف يقول...

ههههههههههههه
طب والله الراجل كتر خيره
عايزة ايه يعنى
مش تحمدو ربنا كده
بس والله تحفه يا صبرنى
:))))

عبده الرايق يقول...

يسلم ابو رياض
طبعا مش مفروض ندعك البصل بايدينا علشان ريحه البصل
يعيش ابو رياض
لكن ايه دخل البصل بصنيه البطاطس ؟
بوست جميل يا صبرنى يارب
تسلم ايدك وايد ابو رياض وايد عبده باشا البواب
***** وش بيفكر *****

عبده الرايق يقول...

بلاش ضرب فتايل يا فرنسا
هو اى حد اسمه عبده يبقى انا ؟؟؟؟
انا اعرف ان فى مصر لوحده اكتر من عشرين واحد اسمهم عبده
بلاش تلكيك
وضرب فتايل
ولا عجبك انه بواب ؟؟

hasona يقول...

خيرا تعمل راميا تلقي
أولا بالهنا والشفا
وعلي رأي عادل أمام ( قطيعة الكباب اللي يعمل في الناس كده))ههههه
يعني الراجل اجتهد ودخل المعمل أقصد المطبخ - وهذه الصنية كانت نتيجة أبحاثه وجهده المثمر
يبقي دي التشجيع اللي بنقدمه له ودي التصريحات الخايبة اللي بتتقال عنه

نحن نطالبه بالاستمرار

يمكن المشكلة انهم زماااااااان في المدراس كانت مادة ( الطبخ والاقتصاد المنزلي ) مقتصرة علي البنات فقط والله أعلي وأعلم _ وده علي ما أفتكر يعني

الحمد لله ان ده درس علشان تاخدي بالك ومش تتكعبلي تاني - ولا حتي حصل ايه
،،،
تحياتي

صبرني يارب يقول...

اللؤلؤه

عينى استاذنا مش وصلت امبارح ولا ايه هههههههههههه

نورتنا

صبرني يارب يقول...

مفروسه

لا هو اصلا كان عبده باشا ما يهموش الحاجات الصغيره دي

ولعلمك الخاص هو خادها لانه كان لسه جاي من بلدهم وجعان بقى

انما بعد ما النعمه بانت عليه وسكن عندنا فى العماره ناس كده تبع واحد من الشيوخ كان بيجلهم اكل من القصر وينزلولوا الباقي كان بياكل وياكل معاه البوابين الهنود الى هوالينا ويشغلهم عنده ههههههههههههههههه

صبرني يارب يقول...

حننننننننين

حياتي والله ما كان فى تعليق انا بريء يا بيه تلاقي بس الدنيا هنجت معاكي ولا حاجه

ولا انا يا اختي لابخاكم ببوستاتي


اها لا انتى جوزك يا بنتى شكله باشا كبير فى المطبخ يعنى هههههههههههههه

وبتتأمري برضه خليكى عايشه يا بنتى الايام دي انتى بتتشالي هههههههههههههههههه

نورتي يا قمر

صبرني يارب يقول...

شيماء

والله يا مشمشه احنا حامدينه وشاكرينه وحاطين الباشا على راسنا

ما قلناش حاجه ابدا تسلمى يا حبيبتى ونورتي

صبرني يارب يقول...

عبده الرايق

يا لهوي والله يا استاذنا ما كان قصدي ههههههههههههههههههه

بس وربنا هو كان اسمه عبده فعلا مش فاكره عبد ايه الصراحه بس هو كنا بنقوله يا عبده

لا لا حضرتك الدكاتره عبده على راسنا من فوق

بس يا فرنسا يا جايبالي الكلام هههههههههههههههه

صبرني يارب يقول...

حسونه

اهاااا

انا فضلت اقوله تعالى اقرا البوست قبل ما انزله يقولي لا لما ينزل

ولمانزلته
قالي ايه ددددده انتى مفتريه والله انا مش فاكر حاجه
ههههههههههههههههههههههههه

هو مش فاكر وانا الى مفتريه هههههههههههههه

نورتنا

عمرو جويلى يقول...

السلام عليكم
أولا أشكرك على زيارتك لمدونتى والتعليق الجميل الساخر .
ثانيا أشكرك على صينية البرارص بس كانت سكرها زيادة إبقى خلى بالك بعد كدة
فى رعاية الله

صبرني يارب يقول...

اللؤلؤه

الله يخليك يارب ويكرمك ونورتنا

على فكره يظهر ان انت وقعت فيها سكر ومش واخد بالك

هههههههههههههههههه

نورتنا

مهندس مصري بيحب مصر يقول...

ههههههههههههههههههههه
هما كده الستات لما نخش المطبخ ما يعجبهمش العجب
و لما ما نخشش المطبخ و نقول لهم دا مملكتكم يقولوا انتوا مش حاسين بتعبنا

:)

و الله أنا عازب دلوقتي في السعودية و حاسس قوي

الله يكرمه أبو رياض و ما يحرمكيش من صوانيه

صبرني يارب يقول...

مهندس مصري

اها هو كمان علمه الطبيخ برضه العزوبيه فى السعوديه

تسلم يارب ويخليلك حبايبك كلهم ونورت