الزمار ورعايه ال 100 فار

تحديث

********

انا الدكاتره عبده الرايق واسف لانى مسحت البوست بتاع فرنسا اللى فات بالتعليقات لان عدد التعليقات الخارجه كانت 350 تعليق يعنى عايز عشر سنين عبقال لما امسحهم وانا بكسل امسح عينى اصلا

رحت ماسح البوست ونزلته من جديد

يعنى فى ناس علقت على البوست ده قبل كده .. انا اسف لهم

غلطه مطبعيه

*********************************************

اخواتى المدونات واخوانى المدونين

سلام الله عليكم

انهارده هاكمل لكم حكايه الزمار والملك

بس ارجو اللى مقراش الجزاء الاول يقراه من اللينك ده

يموت الزمار وصوابعه بتلعب

**************

ندخل بقى فى المفيد

الزمار بيكلم الملك والوزير وبيقولهم ..... الميت بعد ماوقع منى فى البير ... فكرت بسرعه وناديت على ابن الميت وقولتله :- خلى النسوان تزغرد واعمل فرح كبير .. ابوك اتحول لحمامه وطار للجنه .. ووصانى قبل ما يطير اقولك تعمل فرح كبير وتردم البير دى بسرعه .. والراجل صدقنى وخلى النسوان تزغرد وبسرعه جابوا طوب وحجاره وردموا البير .. وانا قاعد اتفرج عليهم وكل واحد يسلم عليا ويبوسنى ويدينى فلوس ... من ده جنيه ومن ده اتنين ومن ده نص جنيه ومن دى بريزه ومن دى شلن ومن ده 5 جنيه .... لغايه لما قمت مليان فلوس .. رحت اشتريت اكل وحشيش يكفينى شهر بحاله .. وانا راجع لقيت معايا فلوس بالعبيطه .. رحت موزعها على الغلابه اللى قابلتهم ..

الملك طبعا اتغاظ وكان هيفرقع وقال فى سره :- حظك حظ عوالم .. حتى الميت كسبت منه

وخرج الملك من عند الزمار وهو بيضرب كف على كف وبيقول وحياه امك لاجيب مناخيرك الارض وفى تانى يوم بعت الملك مندوب من عنده للزمار قاله الملك عايزك ضرورى فى القصر ... وراح الزمار وقابل الملك وطبعا معرفش انه الراجل اللى بيجيله ويحشش معاه .. وعرض عليه الملك .. انه يشتغل عنده سياف .. ويجوزه اميره من الاميرات ... وطبعا الملك فهمه انه لو رفض هتتقطع رقابته ... عمنا الزمار وافق وهو متضايق .

طبعا الملك كانت عنده خطه متخرش الميه .ولا الكهرباء كمان .... كانت خطه الملك انه يحمل على الزمار هو والوزير ويروحوا يسهروا معاه يوماتى علشان يخلصوا التموين بتاعه من الحشيش والاكل وطبعا مش هيقدر يشتغل اى شغلانه طالما هو شغال عند الملك سياف

المهم

خلصوا الاكل والحشيش من عند الزمار فى خلال 15 يوم .. وكان باقى على القبض بتاعه 15 يوم ... الملك عرض على الزمار انه يجيب معاه اكل وحشيش لكن الزمار رفض . وقاله :-انتم ضيوفى ولا يمكن تدفعوا مليم احمر

المهم

تانى يوم جه الملك والوزير ولقيوا الزمار عنده اكل وحشيش بالهبولى استغرب الملك والوزير وقالوا للزمار جبت منين كل ده ؟؟؟؟ الزمار قالهم :- ابدا اتصرفت ... بعت سيف الملك .. ورحت عند النجار وعملى سيف اخوه الخالق الناطق من الخشب الملك قاله :- طيب افرض الملك قالك تقطع رقبه حد هتعمل ايه ... رد الزمار وقاله :- ياعم قول يا باسط تلاقيها هاصت .. انا من يوم ما اشتغلت الشغلانه دى وانا بهش دبان .. ولا شغله ولا مشغله

خرج الملك من عند الزمار وهو فرحان وملعلع .. وقال للوزير:- بكره تجيبلى واحد مذنب محكوم عليه بالاعدام ... وفعلا جمع الملك الامراء والوزراء .. وكبار رجال الاحتكار .. وكبار الحاشيه . وولاد الحراميه .. ونادى على الزمار وقاله :- يا سياف .. اقطع رقبه المذنب ده

الزمار وقف مذهول محتار وقال فى نفسه :- ايه الحظ التعبان موله ده .. 15 يوم من غير اى شغلانه ويوم ما ابيع السيف يجيبولى مصلحه.... ده ايه النحس الدكر ده !!!!!!!!

المهم .... الزمار فكر بسرعه وبص للمتهم وقال للملك :- معلشى يا مولانا انا لايمكن اقطع رقبه الراجل ده ابدا ... الملك بص له وقاله :- نعم نعم يا روح طنط ...انت شغال عند ام ترتر ولا عند ام اللالى ؟؟؟؟ انت عبيط ياض ... اقطع رقبته دلوقتى حالا ... ولا ورحمه امى الملكه الكبيره رشا ..اقطع انا رقبه اللى خلفوك .... الزمار قاله :- يا مولانا الملك .. انا بصيت فى عين الراجل ده لقيته مظلوم ...... الملك قاله :- ولد انت يا روح امك انت هتهزر ؟ .. ولا هنهرج بقى سوا ؟ .. هى مش طلباك وحياه والدك دلوقتى ....القاضى قال الراجل ده يتشنق وانت تقولى مظلوم ؟؟... يلا ياض اقطع رقبته بسرعه... ولا مش ناوى تيجبها البر انهارده...... الزمار قال :- يا امراء يا وزراء يا كبار الحراميه .. انا برىء من دم الراجل المظلوم ده .. يا رب لو الراجل ده برىء اجى اطلع السيف يبقى خشب ... ورفع السيف لفوق وبص وقال :- الله الله .... الحمد لله ... السيف اتحول لخشب ... الراجل برىء .. الراجل برىء

طبعا الملك مقدرشى يتنفس ولا يقول حاجه ... لكن بسرعه بص للزمار وقاله :- تعالى يا راجل يا بركه فى حضنى .. انا ناويت اجوزك بنتى لانك راجل مبروك ... بس بشرط ... مهر بنتى يكون غالى قوى .. وانا عارفك مفلس وممعكشى اللضى .. علشان كده انا هديلك 100 فار مختومين بختم الملك .. تاخدهم عندك وترعاهم لمده شهر ... 30 يوم .. كل يوم تخرجهم يتفسحوا من الفجر للمغرب فى الصحراء وترجعهم يناموا .. وبعد 30 يوم تجيبهم هنا قدام الوزراء والامراء .. ولو نقص فار هاقطع راسك .. ولو جبت ال 100 فار هجوزك بنتى

عمنا الزمار مشى مع الحراس وهما ماسكين الاقفاص اللى فيها الفيران وهو بيندب حظه ... ويقول فى نفسه .. انا ايه اللى رمانى الراميه السوداء دى .. الله يخرب بيت ابو الملك على بنته على الوزراء على المحتكرين على العز والوز على الفيران فى يوم واحد.... المهم وصل الزمار البيت ومشى الحراس .. وقعد الزمار يبص للفيران وهو مش عارف يعمل ايه ؟؟؟ وراح فاتح قفص وخرجت الفيران فى العشه بعد ما قفلها كويس .. وقعد يبص للفيران وهى بتجرى يمين وشمال وهو بيقول لنفسه :- والله نهيايتك هتكون على رجلين الفيران العبيطه الهبله ام بدوى دى يا زمار يابن ام زمار..

وطلع المزمار بتاعه وقعد يزمر بيه ويسلى نفسه ويودع الدنيا الفانيه ... وفجاءه اداها نغمه شديده من مزماره ... لقى الفيران كلها جريت ودخلت القفص ... راح مخرجهم تانى .. واداها نفس النغمه لقى الفيران برضه جريت ودخلت القفص ... راح مجرب القفص التانى .. برضه نفس النظام ... راح طالق كل الفيران .. واداها النغمه الفيران كلها دخلت الاقفاص .. راح طالقهم فى الصحراء .. وكل فار مشى على راسه .. وهو يزمر الفيران تيجى بسرعه وتدخل القفص

المهم...

الحال ده استمر 27 يوم .. وكل يوم يجى الحراس يطمنوا على الفيران بالليل يلاقوهم 100 فار .. لغايه لما زوجه الملك قالت للملك :- انت لازم تتصرف خلاص ال 30 يوم هيخلصوا ..وانا لايمكن اجوز بنتى للزمار الشحات الحشاش ده .. لو ده حصل انا هكهرب نفسى .. او اولع فى نفسى .. او اتفرج على القمر الاوروبى وابقى منحرفه و افضحكم

الملك قالها :- لا طبعا انا لايمكن اوافق على كده ابدا .. اوربى مين وزفت مين..هو احنا قادرين على فضايح النايل سات ؟.. بكره هابعت الوزير يتصرف باى شكل ويجيب من الزمار فار .. علشان العدد ينقص واطير رقبته

وفعلا بعت الملك الوزير وقاله عايزك تجيبلى فار باى تمن من الاتمان . وفكر الوزير .. وطبعا الناس دى مكاره زى ما احنا عارفينهم .. الوزير عمل نفسه راجل كبير فى السن وغير شكله وراح للزمار وقاله وهو بيعيط :- انا مراتى هتموت .. وانا راجل عجوز واعمى البصر وعندى 10 اولاد كلهم عميان .. ومراتى هى الوحيده اللى بتشوف بعنيها وبتخدمنا كلنا .. ولو ماتت كلنا هنموت وراها. والحكيم واصف لها كبده فار من بتوع الملك تاكلها على يومين ساعه اذان الفجر... الزمار قاله :- بس دى فيها حياتى انا لو اديتك فار هيقطعوا رقبتى .. الوزير قاله :- انا مستعد اديلك 100 الف جنيه فى الفار الواحد ... راح الزمار قاله :- لا يا عم لا 100 الف جنيه ولا حاجه انا هبيعلك الفار ب 10 الاف جنيه بس ... وعندى شرط واحد .. انى اختم دراعك بختم العبيد ... الوزير بص له وقاله :- ختم العبيد ؟؟؟ انت هتهرج ؟؟؟ لا انا لايمكن اختم دراعى ابدا بختم العبيد .... الزمار قاله :- خلاص براحتك .. ولا تزعل بلاش .. دراعك معاك وفيرانى معايا ..والغاوى ينقط بطاقيته ...سمعنى بقى احلى سلام عليكم ...

المهم الوزير وافق .... ودفع الفلوس واتختم بختم العبيد واخذ الفار وفلسع ... وبعد ما مشى بالفار زمر الزمار بزمارته نط الفار من ايد الوزير ورجع جرى على القفص تانى ... راح الوزير للملك ايد وراء وايد قدام .. وتانى يوم راحت الملكه للزمار متنكره وحاولت تاخد فار من الفيران .. وبرضه باع لها الزمار الفار ب 10 الاف جنيه وختمها بختم العبيد .. واخر يوم راح الملك للزمار واتكرر معاه نفس الحواروبعد ما تموا ال 30 يوم اجتمع الوزراء والامراء والساده اعضاء مجلسى كوكاكولا وسفن اب وجابوا الزمار والفيران ووجدوا الفيران تمام التمام ... وطبعا الملك عمره ما هيطلع عيل قدام البلطجيه بتوعه اعضاء حزب اسم النبى حارسه .. راح قايل للزمار :- خلاص انا هجوزك بنتى لكن اخر شرط هشرطه عليك انك تجيب شوال وتملاه كلام ... الزمار قاله :- انت مستقصدنى يا عمنا ولا ايه ؟؟؟ ازاى هملىء الشوال كلام ؟؟؟ .... الملك قاله :- هو ده شرطى واخر شرط هشرطه ...

الزمار قاله :- وانا موافق بس لازم يشهد عليا الوزير والملكه والملك .... الملك فرح وقال هو ده عز الطلب .. الزمار قال :- نبدء بالوزير .. تعالى يا سياده الوزير علشان اتكلم فى الشوال وانت بس اللى تحكم الشوال اتملىء ولا لا ... الوزير جه جنب الزمار ووقف ومد بوزه جوه الشوال مع الزمار ... راح الزمار همس فى ودن الوزير وقاله :- اول كلامى الوزير جه يشترى منى فار وهو متنكر وفاكر انى مش هاعرفه .. لكن انا كشفته وبعت له الفار ب 10 الاف جنيه وختمته بختم العبيد .. تحب افضحك قدام الناس ؟؟؟ ... ولا تقول الشوال اتملىء ؟؟؟ ...الوزير صاح باعلى صوته وقال :-الشواااااااااااااااااال اتملىء كلام يا خلق

جه الدور على الملكه ...

واتكرر معاها ومع الملك نفس الحوار .. والاتنين صاحوا باعلى صوتهم ..

الشوااااااال اتملىء كلام .. الشوال اتملىء كلام

واتجوز الزمار بنت الملك

وهنا ادرك ام حسين الصباح .. فنزلت تجيب المفتاح

مولااااااااااااااااااااااااااااااى

نيااااااااااااااااااااااااااااو

********************

مقتبسه من حكايه قديمه

روتها لكم

خالتكم

فرنسا هانم