الثلاثاء، ديسمبر 16، 2008

الزمار ورعايه ال 100 فار

تحديث
********
انا الدكاتره عبده الرايق واسف لانى مسحت البوست بتاع فرنسا اللى فات بالتعليقات لان عدد التعليقات الخارجه كانت 350 تعليق يعنى عايز عشر سنين عبقال لما امسحهم وانا بكسل امسح عينى اصلا
رحت ماسح البوست ونزلته من جديد
يعنى فى ناس علقت على البوست ده قبل كده .. انا اسف لهم
غلطه مطبعيه
*********************************************
اخواتى المدونات واخوانى المدونين
سلام الله عليكم
انهارده هاكمل لكم حكايه الزمار والملك
بس ارجو اللى مقراش الجزاء الاول يقراه من اللينك ده
**************
ندخل بقى فى المفيد
الزمار بيكلم الملك والوزير وبيقولهم ..... الميت بعد ماوقع منى فى البير ... فكرت بسرعه وناديت على ابن الميت وقولتله :- خلى النسوان تزغرد واعمل فرح كبير .. ابوك اتحول لحمامه وطار للجنه .. ووصانى قبل ما يطير اقولك تعمل فرح كبير وتردم البير دى بسرعه .. والراجل صدقنى وخلى النسوان تزغرد وبسرعه جابوا طوب وحجاره وردموا البير .. وانا قاعد اتفرج عليهم وكل واحد يسلم عليا ويبوسنى ويدينى فلوس ... من ده جنيه ومن ده اتنين ومن ده نص جنيه ومن دى بريزه ومن دى شلن ومن ده 5 جنيه .... لغايه لما قمت مليان فلوس .. رحت اشتريت اكل وحشيش يكفينى شهر بحاله .. وانا راجع لقيت معايا فلوس بالعبيطه .. رحت موزعها على الغلابه اللى قابلتهم ..
الملك طبعا اتغاظ وكان هيفرقع وقال فى سره :- حظك حظ عوالم .. حتى الميت كسبت منه
وخرج الملك من عند الزمار وهو بيضرب كف على كف وبيقول وحياه امك لاجيب مناخيرك الارض وفى تانى يوم بعت الملك مندوب من عنده للزمار قاله الملك عايزك ضرورى فى القصر ... وراح الزمار وقابل الملك وطبعا معرفش انه الراجل اللى بيجيله ويحشش معاه .. وعرض عليه الملك .. انه يشتغل عنده سياف .. ويجوزه اميره من الاميرات ... وطبعا الملك فهمه انه لو رفض هتتقطع رقابته ... عمنا الزمار وافق وهو متضايق .
طبعا الملك كانت عنده خطه متخرش الميه .ولا الكهرباء كمان .... كانت خطه الملك انه يحمل على الزمار هو والوزير ويروحوا يسهروا معاه يوماتى علشان يخلصوا التموين بتاعه من الحشيش والاكل وطبعا مش هيقدر يشتغل اى شغلانه طالما هو شغال عند الملك سياف
المهم
خلصوا الاكل والحشيش من عند الزمار فى خلال 15 يوم .. وكان باقى على القبض بتاعه 15 يوم ... الملك عرض على الزمار انه يجيب معاه اكل وحشيش لكن الزمار رفض . وقاله :-انتم ضيوفى ولا يمكن تدفعوا مليم احمر
المهم
تانى يوم جه الملك والوزير ولقيوا الزمار عنده اكل وحشيش بالهبولى استغرب الملك والوزير وقالوا للزمار جبت منين كل ده ؟؟؟؟ الزمار قالهم :- ابدا اتصرفت ... بعت سيف الملك .. ورحت عند النجار وعملى سيف اخوه الخالق الناطق من الخشب الملك قاله :- طيب افرض الملك قالك تقطع رقبه حد هتعمل ايه ... رد الزمار وقاله :- ياعم قول يا باسط تلاقيها هاصت .. انا من يوم ما اشتغلت الشغلانه دى وانا بهش دبان .. ولا شغله ولا مشغله
خرج الملك من عند الزمار وهو فرحان وملعلع .. وقال للوزير:- بكره تجيبلى واحد مذنب محكوم عليه بالاعدام ... وفعلا جمع الملك الامراء والوزراء .. وكبار رجال الاحتكار .. وكبار الحاشيه . وولاد الحراميه .. ونادى على الزمار وقاله :- يا سياف .. اقطع رقبه المذنب ده
الزمار وقف مذهول محتار وقال فى نفسه :- ايه الحظ التعبان موله ده .. 15 يوم من غير اى شغلانه ويوم ما ابيع السيف يجيبولى مصلحه.... ده ايه النحس الدكر ده !!!!!!!!
المهم .... الزمار فكر بسرعه وبص للمتهم وقال للملك :- معلشى يا مولانا انا لايمكن اقطع رقبه الراجل ده ابدا ... الملك بص له وقاله :- نعم نعم يا روح طنط ...انت شغال عند ام ترتر ولا عند ام اللالى ؟؟؟؟ انت عبيط ياض ... اقطع رقبته دلوقتى حالا ... ولا ورحمه امى الملكه الكبيره رشا ..اقطع انا رقبه اللى خلفوك .... الزمار قاله :- يا مولانا الملك .. انا بصيت فى عين الراجل ده لقيته مظلوم ...... الملك قاله :- ولد انت يا روح امك انت هتهزر ؟ .. ولا هنهرج بقى سوا ؟ .. هى مش طلباك وحياه والدك دلوقتى ....القاضى قال الراجل ده يتشنق وانت تقولى مظلوم ؟؟... يلا ياض اقطع رقبته بسرعه... ولا مش ناوى تيجبها البر انهارده...... الزمار قال :- يا امراء يا وزراء يا كبار الحراميه .. انا برىء من دم الراجل المظلوم ده .. يا رب لو الراجل ده برىء اجى اطلع السيف يبقى خشب ... ورفع السيف لفوق وبص وقال :- الله الله .... الحمد لله ... السيف اتحول لخشب ... الراجل برىء .. الراجل برىء
طبعا الملك مقدرشى يتنفس ولا يقول حاجه ... لكن بسرعه بص للزمار وقاله :- تعالى يا راجل يا بركه فى حضنى .. انا ناويت اجوزك بنتى لانك راجل مبروك ... بس بشرط ... مهر بنتى يكون غالى قوى .. وانا عارفك مفلس وممعكشى اللضى .. علشان كده انا هديلك 100 فار مختومين بختم الملك .. تاخدهم عندك وترعاهم لمده شهر ... 30 يوم .. كل يوم تخرجهم يتفسحوا من الفجر للمغرب فى الصحراء وترجعهم يناموا .. وبعد 30 يوم تجيبهم هنا قدام الوزراء والامراء .. ولو نقص فار هاقطع راسك .. ولو جبت ال 100 فار هجوزك بنتى
عمنا الزمار مشى مع الحراس وهما ماسكين الاقفاص اللى فيها الفيران وهو بيندب حظه ... ويقول فى نفسه .. انا ايه اللى رمانى الراميه السوداء دى .. الله يخرب بيت ابو الملك على بنته على الوزراء على المحتكرين على العز والوز على الفيران فى يوم واحد.... المهم وصل الزمار البيت ومشى الحراس .. وقعد الزمار يبص للفيران وهو مش عارف يعمل ايه ؟؟؟ وراح فاتح قفص وخرجت الفيران فى العشه بعد ما قفلها كويس .. وقعد يبص للفيران وهى بتجرى يمين وشمال وهو بيقول لنفسه :- والله نهيايتك هتكون على رجلين الفيران العبيطه الهبله ام بدوى دى يا زمار يابن ام زمار..
وطلع المزمار بتاعه وقعد يزمر بيه ويسلى نفسه ويودع الدنيا الفانيه ... وفجاءه اداها نغمه شديده من مزماره ... لقى الفيران كلها جريت ودخلت القفص ... راح مخرجهم تانى .. واداها نفس النغمه لقى الفيران برضه جريت ودخلت القفص ... راح مجرب القفص التانى .. برضه نفس النظام ... راح طالق كل الفيران .. واداها النغمه الفيران كلها دخلت الاقفاص .. راح طالقهم فى الصحراء .. وكل فار مشى على راسه .. وهو يزمر الفيران تيجى بسرعه وتدخل القفص
المهم...
الحال ده استمر 27 يوم .. وكل يوم يجى الحراس يطمنوا على الفيران بالليل يلاقوهم 100 فار .. لغايه لما زوجه الملك قالت للملك :- انت لازم تتصرف خلاص ال 30 يوم هيخلصوا ..وانا لايمكن اجوز بنتى للزمار الشحات الحشاش ده .. لو ده حصل انا هكهرب نفسى .. او اولع فى نفسى .. او اتفرج على القمر الاوروبى وابقى منحرفه و افضحكم
الملك قالها :- لا طبعا انا لايمكن اوافق على كده ابدا .. اوربى مين وزفت مين..هو احنا قادرين على فضايح النايل سات ؟.. بكره هابعت الوزير يتصرف باى شكل ويجيب من الزمار فار .. علشان العدد ينقص واطير رقبته
وفعلا بعت الملك الوزير وقاله عايزك تجيبلى فار باى تمن من الاتمان . وفكر الوزير .. وطبعا الناس دى مكاره زى ما احنا عارفينهم .. الوزير عمل نفسه راجل كبير فى السن وغير شكله وراح للزمار وقاله وهو بيعيط :- انا مراتى هتموت .. وانا راجل عجوز واعمى البصر وعندى 10 اولاد كلهم عميان .. ومراتى هى الوحيده اللى بتشوف بعنيها وبتخدمنا كلنا .. ولو ماتت كلنا هنموت وراها. والحكيم واصف لها كبده فار من بتوع الملك تاكلها على يومين ساعه اذان الفجر... الزمار قاله :- بس دى فيها حياتى انا لو اديتك فار هيقطعوا رقبتى .. الوزير قاله :- انا مستعد اديلك 100 الف جنيه فى الفار الواحد ... راح الزمار قاله :- لا يا عم لا 100 الف جنيه ولا حاجه انا هبيعلك الفار ب 10 الاف جنيه بس ... وعندى شرط واحد .. انى اختم دراعك بختم العبيد ... الوزير بص له وقاله :- ختم العبيد ؟؟؟ انت هتهرج ؟؟؟ لا انا لايمكن اختم دراعى ابدا بختم العبيد .... الزمار قاله :- خلاص براحتك .. ولا تزعل بلاش .. دراعك معاك وفيرانى معايا ..والغاوى ينقط بطاقيته ...سمعنى بقى احلى سلام عليكم ...
المهم الوزير وافق .... ودفع الفلوس واتختم بختم العبيد واخذ الفار وفلسع ... وبعد ما مشى بالفار زمر الزمار بزمارته نط الفار من ايد الوزير ورجع جرى على القفص تانى ... راح الوزير للملك ايد وراء وايد قدام .. وتانى يوم راحت الملكه للزمار متنكره وحاولت تاخد فار من الفيران .. وبرضه باع لها الزمار الفار ب 10 الاف جنيه وختمها بختم العبيد .. واخر يوم راح الملك للزمار واتكرر معاه نفس الحواروبعد ما تموا ال 30 يوم اجتمع الوزراء والامراء والساده اعضاء مجلسى كوكاكولا وسفن اب وجابوا الزمار والفيران ووجدوا الفيران تمام التمام ... وطبعا الملك عمره ما هيطلع عيل قدام البلطجيه بتوعه اعضاء حزب اسم النبى حارسه .. راح قايل للزمار :- خلاص انا هجوزك بنتى لكن اخر شرط هشرطه عليك انك تجيب شوال وتملاه كلام ... الزمار قاله :- انت مستقصدنى يا عمنا ولا ايه ؟؟؟ ازاى هملىء الشوال كلام ؟؟؟ .... الملك قاله :- هو ده شرطى واخر شرط هشرطه ...
الزمار قاله :- وانا موافق بس لازم يشهد عليا الوزير والملكه والملك .... الملك فرح وقال هو ده عز الطلب .. الزمار قال :- نبدء بالوزير .. تعالى يا سياده الوزير علشان اتكلم فى الشوال وانت بس اللى تحكم الشوال اتملىء ولا لا ... الوزير جه جنب الزمار ووقف ومد بوزه جوه الشوال مع الزمار ... راح الزمار همس فى ودن الوزير وقاله :- اول كلامى الوزير جه يشترى منى فار وهو متنكر وفاكر انى مش هاعرفه .. لكن انا كشفته وبعت له الفار ب 10 الاف جنيه وختمته بختم العبيد .. تحب افضحك قدام الناس ؟؟؟ ... ولا تقول الشوال اتملىء ؟؟؟ ...الوزير صاح باعلى صوته وقال :-الشواااااااااااااااااال اتملىء كلام يا خلق
جه الدور على الملكه ...
واتكرر معاها ومع الملك نفس الحوار .. والاتنين صاحوا باعلى صوتهم ..
الشوااااااال اتملىء كلام .. الشوال اتملىء كلام
واتجوز الزمار بنت الملك
وهنا ادرك ام حسين الصباح .. فنزلت تجيب المفتاح
مولااااااااااااااااااااااااااااااى
نيااااااااااااااااااااااااااااو
********************
مقتبسه من حكايه قديمه
روتها لكم
خالتكم
فرنسا هانم

هناك 29 تعليقًا:

غير معرف يقول...

ماما فرنسا
حمد لله على سلامه بيتنا
حمدلله على سلامه مدونتنا
حمدلله على سلامتك انتى وروقه
وعبقال ما بابا يفتح مدونته هو كمان
ارجع اقرىء تانى
****
وش بيطلع لسانه للرايق
على اول تعليق

صبرني يارب يقول...

حمد على سلامتكم يا قوم

عارف يا رايق
ربنا بيحبك عشان انا ما عترتش فيك قبل ما تنزل المدونه وبعد ما انا هديت شويه

لانى كنت فاكره انك حذفت المدونه بتاعتنا

واتعصبت على ا لاااااااخر

وروحت لداليا قالتلي معايا تليفونه ينفع ؟؟

بس انا مش باخد تليفونات حد للاسف

قلت استنى اخد راي المجلس الاعلى وبعدين اشوف

ياعينى كنت هاتقع فى ايدى يا رايق وانت ما تعرفنيش شرانيه خالص

حنين القلب يقول...

لولللللللللللللللللى
اخيرا
بيت العز يا بيتنا
على بابك عنبتنا
لها خضرة وضليله بضلل على العيله

ابعد يا شيطان
ابعد يا شيطان
والحمد لله بيتنا اتفتح تانى
انا رايحه ادبح خروف على باب المدونه

Empress appy يقول...

اولا ده الصح اللى انتم عملتوه بجد
ثاني بقى انا سمعه البت مقصوفه الرقبه حنين بتقول تدبح خروف عاوزهاقوها انا لو شفك هدبحك وخلى بالك انا مش برجع فى كلامي يا بنت انت

بجد انا مبسوطه انكم رجعتوها تاني علشان بس الناس تعرف ان محدش يقدر على الناس النظيفه

فرنسا هانم يقول...

ماشى يا عم الرايق
تمسح البوست
تنزل البوست
المره دى سماح
بس اعمل حسابك المره الجايه لايمكن تكون سماح ابدا

فرنسا هانم يقول...

حنين القلب
نونا حبيبتى ازيك ياقمر
احلى كلمه سمعتها ماما فرنسا
ربنا يخليكى ليا ويجعلنى دايما فى مكانه ام مثاليه ليكى
انا مش هاقول حاجه بعد الكلمه الحلوه دى

اما بقى الوش اللى بيطلع لسانه للرايق
احسن يستاهل

فرنسا هانم يقول...

عارفه يا حنين ايه اللى محيرنى
ومخلينى مشتته ومش قادره اركز
هو
ازاى الرايق قدر يفلت من الجزارين فى العيد الكبير ؟؟؟؟؟؟

فرنسا هانم يقول...

صبرني يارب
وانا والله يا صبرنى يا حبيبتى اتعصبت لحد البكاء
من التعليقات
ومن انفراد الرايق بالحذف
لكن قريت اميله وعرفت انه اتسرع فى الحذف علشان انا مشوفشى التعليقات القذره
لكن كان قد سبق السيف العزل
عموما
انا تفهمت قصده
ومبروك عودتنا مره تانيه الى منزلنا

فرنسا هانم يقول...

حنين القلب
احلى زغروده لبنتى العزيزه
بحبك مووووووووووووووووووووت
بس بلاش كلمه ابعد يا شيطان دى
احسن منلقيش الرايق
فهمانى ؟؟؟؟؟؟؟؟؟؟

جنّي يقول...

السلام عليكم

اهو دا الكلام مش تقولولي قفلناها بالضبة والمفتاح .. عجايب امال ها نضحك على مين ( اقصد كلام المدونة )

تصدق وتؤمن بالله انا ضحكت من فشتي مع اني ما بضحكش للرغيف السخن ..

بقولك ايه يا عم عبده يارايق لو عندي حاجة دمها داعيلها قصدي خفيف وربنا يجعل كلامنا خفيف عليكو ازاي ابعتها وامتى وفين ؟؟؟؟

سلام

فرنسا هانم يقول...

~*§¦§ Appy §¦§*~
توأمى العزيزه ابى
انا سعيده جدا جدا بتواجدك واهتمامك بالضاحكون
وده مش غريب على صاحبه القلم النارى ابى
بس اللى محيرنى بجد لو هتستمر الموجه دى فى عالم التدوين يبقى كده بنقتل احلى حاجه فى العالم الافتراضى
تحياتى لكى جدا جدا

فرنسا هانم يقول...

جنّي
بص يا جنى
اولا انا فرنسا اللى بترد عليك
احنا متشكرين جدا على حسن ظنك بالضاحكون وندعو من الله ان نستمر هكذا
ثانيا لو عندك بوست جديد وعايز تنشره فى الضاحكون احنا بيشرفنا ده ومنتظرين البوست على اميلى
faransahanm@yahoo.com
او على اميل الرايق
aabbddoo666@yahoo.com

Mafrousa يقول...

السلام عليكم
كل سنة و انتم طيبين
و بجد احسن حاجه عملتوها انكم فتحتوا تاني

برافوا عليكم
المهم القصه هاااادفه جدااااا

المهم نورتو بيتكم تاني و الله
ربنا يجعله عامر باصحابه
كل سنة و انتم طيبين

جنّي يقول...

فرنسا هانم

اشكر حضرتك على الرد والشرف لي ان انشر في الضاحكون وطبعا انا متابع المدونة وعارف الشروط ..

شكرا يا افندم وتحيتي لفريقكم الرائع ..

سلام

حاجات جوايا يقول...

هههههههههههههه
قصة جميلة بجد


أولا حمدا لله على سلامتكم جميعا
نورتوا بيتكم ومدونتكم والمدونات المجاورة
هههههههههه

البوست لذيذ جدا على فكرة انا كنت متابعاه من الجزء الاول بس ما شوفتش الجزء التانى اللى نزل قبل كده

الحمد لله ان ليا نصيب اشوفه واشوفكوا من تانى

دمتم فى حفظ الله
سالى

الفقيرة إلى الله أم البنات يقول...

عبده الرايق
فرنسا
حمد الله على السلامه
اوعوا تخلوا أى مختل عقليا" يمنعكم من انكم تضحكونا

بس إيه حكاية الجاز ده يافرنسا؟

الطائر الحزين يقول...

حمدا لله على السلامة

Doba يقول...

عودة وإطلاقة قوية
على فكرة انا موضوع الزمار والملك كان ف بالى وكنت بالفعل منتظرة انك تكمليه - وحقيقي برافو عليكى - كالعادة بتثيرى قضية مميزة بتنط ما بين السطور

طريقتك دايما مميزة فرنسا هانم ونرجو ان لا تكونى تأثرى بالحجرات التى تقف فى طريق هدفنا المحترم من عالم التدوين

اللى بيحب ينسب لنفسه لقب غير محترم فهو غير محترم لنفسه ولشخصه - اوعو ف يوم حد ياخدكم للخلف - مش بعد طريق ومتابعة وجهد واجتهاد تمسحو المدونة او تاخدو قرار بالعبد

كل فرد من افراد العائلة وخاصة الام والاب لهم مكانة ورونق من نوع خاص وان تناسيتم مجهوداتكم الكبيرة للسهر والمتابعة والتأليف والرد ومحاولة إيصال فكرة ساخرة او مناقشه موضوع هام بشكل ناقد جميل - اتمنى من كل منكم ان يحافظ على وليده من الاشرار - فكل منكم تعب كثيرا كثيرا فى ان يحافظ على كينونة هذه الأسرة

لا ألومك يا أب الأسرة على إتخاذ قرارك بمسح المدونة لفترة حتى لا تتأذى الأم بكلمات سخيفة ولكننى أعتب عليك إغلاق مدونتك ونافذتك الخاصة لعاللمنا الجميل

أمنياتى لكم بدوام التوفيق والتميز والشهرة التى يتأذى منها ضعاف الخلق والأخلاق

من تألق لتألق أسرتى الغالية
أفتقدتكم كثيراً طوال الفترة الماضية - لأننى دائما أبدأ يومى بكلماتكم وتعليقاتكم الجميلة

لكم كل كل الحب والأمل بغد مشرق
تحياتى
هبة

همس الاحباب يقول...

حمدلله على السلامة يا قوم
والله انا قلت انكم اكلتم لحمة العيد
وانتختوا فيها ومش ناويين اتصحوا من النوم
عامةكل سنة وانتم بخير
وتسلم ايديكى يا فرنسا هانم
والزمار ده حظه حظ عوالم زى واحد صاحبنا

همس الاحباب يقول...

حنين القلب
اتدبحى ايه يا ستى
خروف على باب المدونة
بلاش انتى يا بتاعت اللحمة بالقسط
يا بنتى انتى ليكى 30 سنة بتتفرجى على اللحمة عند الجزار
وتقوليله عمو ممكن اتصور جنب الفخدة

همس الاحباب يقول...

فرنسا هانم
انتى عارفة الرايق هرب من الجزارين ليه
لان شروط الاضحية لا تنطبق عليه اولا
وثانيا لانه كان عامل بيات شتوى من 13 سنة و3 ايام
اوعدك انه لو قفل المدونة تانى
هنضحى بيه قريب
وممكن نكمل ببنته حنين هانم
والخروف بتاعها اللى هتدبحه على باب المدونة

الضاحكون يقول...

نشكركم جدا باسم مدونه الضاحكون على تلك التعليقات التى ترفع من شأن المدونه دائما

غير معرف يقول...

ههههههههههههه

ايوه كده حمدلله عالسلامه يا عالم

احلى مدونه باحلى عيله واحلى بوستات
:))))))))

مبسوطه اوى وعجبانى القصه اوى
:))))))))

سلامى يا خالتى يا حبيبتى ولعمنا الرايق ولكل اهل المدونه

حنين القلب يقول...

فرنسا هانم
حبيبه قلبى والله انتى ليه مش ام لالا احسن اخت فى الدنيا

ربنا يخليكى ليه ويحفظك يا رب
بحبك والله العظيم

اما بالنسبه للرايق
الجزارين هيشفوه فين؟
مهو مستخبى تحت السرير من ساعه اخر مرة ضربتيه فيها لحد دلوقتى
روقه اطلع العيد خلص

kochia يقول...

طيب كنت اديتني الباس ورد كنت اتسليت انا علي الحكاية دي دانا بستمتع بكدة
المرة الجاية بقي

المهم يا فرنسا الموضوع جميل وانا مش فاكرة قلت ايه المرة اللي فاتت لكن حبيت امسي

حنين القلب يقول...

همس الاحباب
هنضحى بيه هو كمان
وممكن نكمل ببنته حنين هانم
والخروف بتاعها اللى هتدبحه على باب المدونة

تتضحى بمين يا سى خالد يا ابنى اقعد على جنب بدل وربنا هخلى الدكتور مش يعرف يخيط فيك غرزتين
وانا بجيب خروف بالقسط وبقول للجزار والنبى يا عمو عايزة اتصور جنب الفخده؟؟
يا ابنى ده انت اعترفت بنفسك ان الخروف من كتر ما كنت بتجرى وراه كان بينطحك
خالد
اتقى شرى لقد اعزر من انذر

حنين القلب يقول...

يا دى العيله يا ربى
طيب انا ومشغوله بفرح اختى
وانتوا فيييييييين
فينك يا بابتى ؟؟
فينك يا مامتى؟؟
فينك يا رخم قصدى ياخالد؟؟
يا جماعه انا بخاف اقعد لوحدى
طيب وربنا لاقلب البيت مراجيح
يلا بقى هىء

Empress appy يقول...

فرنسا الغاليه

يا حبيبتى الصح عمره ما بيتقتل ولو حتى استمر مسيرهم هما يزهقوا مش احنا
افهمك اكتر لو انتى ماشيه فى الشارع وفيه مطر كتير هتجرى تستخبى من المطر ده والرعد بس هل تفتكرى هو هيبطل لما يلاقيكى استخبيتى اكيد لا
يبقى انتى لازم تمشى وتكملى مشوارك ومتوقفيش خاصه اذا كان عندك هدف نبيل توصليه للناس وتساعديهم فى حاجات كتير حتى اضعف الايمان تساعدى نفسك فى حياتك
يبقى نكمل ونمشى ونسيب المطر ومسيره هيقف فهمتى طبعا

غير معرف يقول...

هههههههههههههههههههه

وكمان هههههههههههههههه

بجد القصة جميلة جدااااااااا يا فرنسا