الاثنين، نوفمبر 10، 2008

يموت الزمار ... وصوابعه بتلعب

اخواتى العزيزات واخوانى الاعزاء



انهارده هاحكى لكم حكايه سمعتها وعجبتنى واتمنى ان تعجبكم
*********************

زمااااااااان قوى ايام الدنيا ما كانت شده حيلها وكانت دنيا بنت ناس .. ورخيصه ... كان فى بلد حاكمها ملك اسمه سنديب .. ووزيره اسمه غنديب . فى ليله من الليالى الملك جاله حاله ارق ومش عارف ينام .. قال للوزير .. يا وزير :- انا مش جايلى نوم وعايز املص من القصر وابص على الرعيه واشوفهم عايشين ازاى


الوزير قاله وماله يا ملك ..تعالى يابا نتمشى ونشوف الرعيه بس لازم نتخفى علشان محدش يشوفنا ... الملك قاله :- نتخفى ازاى ياض يا وزير ؟


الوزير قاله :- نلبس ملابس عاديه من سوق الجمعه ونبقى زى الرعيه تمام


الفكره عجبت الملك اصله كان بيحب المغامرات وبيحب يلعب بالناس .. لبس الملك والوزير هدوم من الرخيصه ام تلات ابيض ونزلوا يتفسحوا فى المدينه ... وهما ماشيين شافوا عشه بعيده قوى خارج المدينه وفيها لمبه زيت منوره .. الملك قال للوزير :- عشه مين دى يا غنديب ؟؟ .. رد الوزير وقال :- ورحمه امى ما اعرف يا ملك الملوك .. الملك قاله :- امال انت وزير ازاى ؟؟ تعالى نشوف العشه دى بتاعه مين


راح الملك والوزير للعشه ودخلوا لاقيوا راجل قاعد بيشرب حشيش وهيمان مع نفسه بيناجى سقف العشه وبيتكلم مع اللمبه


المنظر عجب الملك قوى وقال للراجل :- انت قاعد هنا لوحدك ليه يا عمنا ؟


الراجل بص عليه وقاله :- وانت تطلع مين ؟؟؟ الوزير رد وقال :- احنا تايهين فى الصحراء ولقينا عشتك قلنا نسهر معاك وتدلنا على طريقنا


الراجل قال :- يا 100 الف مرحب بالضيوف انا هاجيب لكم العشاء .. رد الملك وقال :- لا احنا هنشرب معاك نفسين حشيش ونمشى بس عايزين نعرف ايه حكايتك وقاعد هنا ليه لوحدك ؟؟


الراجل قال :- بص يا شيخ العرب انت وهو .. كلام فى سركم انا كل يوم اقوم الصبح امسك الغربال واحط فيه شويه رمله واغربلهم الاقى بريزه اطلع بيها على السوق اجيب عيش واكل وحشيش وزيت للمبه ويفضل معايا قرشين اديهم لاى حد غلبان اقابله فى طريقى


الملك قاله :- طيب ما تخليهم معاك لبكره .. رد الراجل وقال بكره اغربل رمل جديد والاقى بريزه جديده


المهم شرب الملك والوزير مع الراجل واتبسطوا وقال الملك للراجل :- انت اسمك ايه ؟


رد الراجل وقال :- انا اسمى زمار


الملك قاله :- طيب يا زمار بكره تروح لقصر الملك وهناك هتلاقى شغل والملك هيحسن اليك قوى قوى


رد زمار وقال :- ملك ايه ؟ الملك لله ؟ انا مش بحب الملك ده راجل اهبل وعبيط وعنده وزير حمار


الملك اتغاظ منه وقاله :- طيب ممكن بكره تحتاجه


رد زمار وقال :- انا احتاج للعبيط الاهبل ابو رياله ده ؟؟؟ دا يبقى اخر يوم فى حياتى


خرج الملك من عند زمار وقرر انه يجيبوه زاحف على ايده ورجله ... وقال للوزير :- ابعت ناس يسرقوا الغربال بتاع الزمار وخلينا نشوف هيجيب منين البريزه


وفعلا سرق جنود الملك غربال الزمار


وتانى يوم راح الملك للعشه هو والوزير ولبسوا لبس تانى خالص وغيروا شكلهم .. وراحوا للعشه لاقيوا العشه منوره بلمبتين زيت .. راحوا داخلين العشه لاقيوا زمار بيشرب حشيش وعماله بيكلم سقف العشه وضاربها صارمه


الملك قاله :- سلام عليكم


رد زمار وقال :- وعليكم السلام اتفضلوا ... هو انتوا كمان تايهين ؟؟


الوزير قاله ايوه عرفت منين ؟؟؟


قاله اصل فى اتنين امبارح جم هنا وقالوا احنا تايهين وسرقوا منى الغربال اللى كنت بلاقى فيه البريزه .. رحت نازل السوق ومشيت ابص للاكل وانا جعان لمحنى صاحب مطعم وقالى تعالى ساعدنى وانا ااكلك .. وفعلا ساعدته وفى اخر اليوم ادانى ريال واكل كتير .. رحت اشتريت لمبه زيت كمان وجبت ببريزه كامله حشيش ..واديت الباقى لاول غلبان قابلته


راح الملك قاله :- طيب ماتروح الصبح للملك يمكن تلاقى عنده شغل احسن من البهدله دى


رد زمار وقال :- ملك ايه الحمار الاهبل ده .. انا اموت من الجوع ولا انى اروح للملك


خرج الملك من عند زمار وقال للوزير :- بكره الفجر تطلع منادى ينادى اى واحد هيفتح المطعم بتاعه هيتشنق


وتالت يوم راح الملك للعشه هو والوزير ولابسوا لبس تانى .. لاقيوا العشه منوره بتلات لمبات زيت ونورها ساطع من بعيد


دخلوا على الزمار وسلموا عليه وعرفوا قصته


قالهم الزمار :- انا مش عارف مين بيلعب معايا الدنيئه .. انهارده رحت المطعم لقيته قافل سئلت على صاحبه الناس قالت المنادى خرج وقال اى صاحب مطعم هيفتح انهارده هيتشنق .. رحت انا قاعد قدام المطعم ومش عارف اعمل ايه .. وبصيت لقيت الجزار بيدبح جمل وعماله يفلفص منه .. رحت ماسك معاه .. لغايه لما دبح وسلخ وقطع .. راح مدينى لحمه ونص جنيه .. رحت مشترى لمبه جديده وبريال حشيش واشتريت اكل كتير واديت اول غلبان قابلته الباقى كله اللى معايا


الملك قاله :- طيب ماتروح للملك يمكن ينقذك من الهيلمان ده


رد الزمار وقال :- والله انا بشك فى الملك ده . . من يوم ما جات سيرته وانا متعكنن من اللى خلفوه .. انا اموت ولا انى اروح للاهبل ابو رياله ده


خرج الملك متغاظ وقال للوزير :- بكره الفجر تطلع منادى ينادى اى محل جزار هيفتح هيتشنق


رابع يوم راح الملك العشه لاقى نور ساطع من بعيد .. دخل هو والوزير العشه لاقيوا كذا لمبه زيت ومعاهم كلوب والزمار قاعد ومتسلطن وبيكلم سقف العشه ..سألوه عن حكايته قالهم


انا حاسس ان الملك الاهبل وراء كل اللى بيحصل لى ده .. انهارده خرج منادى ينادى اى جزار هيفتح المحل بتاعه هيتشنق .. ر حت لقيت الجزار قافل .. وربنا كرمنى بشغلانه الملك ولا اللى خلفوه مش هيقدر يمنعها .. ولو طلع نص جيشه ينادى


الملك قاله :- شغلانه ايه دى ؟


الزمار قال :- انهارده اشتغلت حانوتى .. ( خلى الملك الاهبل بقى يطلع منادى ينادى اى حد هيموت انهارده هيتشنق ) كنت قاعد مستنى الجزار يفتح لقيت واحد بيجرى وهو بيعيط ويقول اااااااااه يابويا ... سئلته مالك .. قالى ابويا مات وانا رايح اجيب الحانوتى ... انا قلت للراجل انا حانوتى ممكن اجى معاك اغسله واكفنه .. رحت رايح معاه .. وقلت محدش يقف معايا وانا بغسل الميت .. خرج كل الناس وسابونى اغسله لوحدى جنب البير بتاع الميه .. لكن وانا بغسله بالصابون اتزحلق ووقع منى فى البير .........


**********


معلشى علشان الحكايه طويله هكملها فى تدوينه تانيه


على فكره الحكايه دى انا سمعتها


يعنى مش تاليفى


**********


مع تحيات فرنسا هانم

هناك 60 تعليقًا:

فرنسا هانم يقول...

ماشى يا خالد
اتكلت عليك تجدول البوست وطنشتنى
انا زعلانه منك
وهوصل الموضوع لمستويات عليا
وهشتكيك لمنظمه اليونيسكو
وحقوق الانسان
ومنظمه الدول النملاويه

Mony يقول...

ههههههههه

الميت وقع في البير






اسجل حضور


ماتتأخريش علينا في الباقي
اصلك شوقتيني مووووت

Unknown يقول...

هههههههههه
مين اللى وقع في البير صحيح

الميت ولا الصابونه

بس عجبتني قوي
معلش يا خالتي اصلي بستغبى ساعات كده

هو الزمار مماتش ولا حاجه
وايه حكايه صوابعه دي
اصلي فكرتك هتحكي حكايه المثل

ههههههه

ما علينا معلش اكتر من 48 ساعه من غير نوم متاخديش في بالك
عجبتني القصه قوي
بس هو على ايام الملك كان فيه حشيش برضه
:))

Mafrousa يقول...

ياخراااااااااااااااابي منك يا فرنسا
كملى الحكاية يا حاجة
ولا النصيبة حتعملى زي الرايق
اللى عاوز يسمع بقية الحكاية يدفع جند
ههههههههههههههههههههه
يالهوي على التشويق
طيب حتنشري الباقى فى المدونة ديه
و لا بتاعتك
وعلى انهو حبل غسيل علشان نروح نكملها
ههههههههههههههههههههههه
فرستيييييييييييييييني

أحــوال الهـوي يقول...

ياه ع المسلسلات المصري اللي تتابعها شهر و تنتهي في ثانيه
اراهن انك زهقت من الكتابه رحت م أجلها لمرة تانيه
بكرة تقول الملك شنق نفسه او شرب حشيش

تحياتي عل خفة دمك الشربات

Doba يقول...

وحشتينا يا فرنسا ووحشتنا كتاباتك
بالفعل هو أثبت أنه ملك حمار وعبيط وابو ريالة

عمال بيلاحق الراجل وكل لما يقول ان حد ساعده يقفلهاله ف وشه

مهو الزمار بالفعل معاه حق
والتانى بدل متطمن رايح يقف قدامه ويحطله عراقيل فى طريقه
===============
فى إنتظار معرفة ايه اللى حصل فى البير

تحياتى وسلامى لكل اعضاء الفريق
وخاصة روووووووقة

هبة

بنت الغربة يقول...

ظريفه قوى بس مين الى وقع فى البير؟؟الصابونه ولا الميت - هنستناها الحلقه الجايه - متتاخريش علينا- تحيياتى ليك-

zahra يقول...

مستنيين التكملة يا فرنسا هانم

فرنسا هانم يقول...

mony
ازيك يا حبيبتى اه الميت وقع فى البير
لكن صاحبنا الزمار كسب من الوقعه دى
وهاقولك ازاى فى المره الجايه

فرنسا هانم يقول...

لماضة
لا الميت هو اللى وقع فى البير
وزمان كان فى حشيش
بس اللى مش عارفاه هو زمان كان فى صابون ولا لا
ههههههههههه
تحياتى ليكى يا دكتوره
وربنا معاكى
كلنا فى بدايه حياتنا تعبنا جدا
وتذكرى انه بقدر تعبك وسهرك بقدر راحتك وحصادك فى المستقبل

فرنسا هانم يقول...

واحدة مفروسة
مفروستى يا حبيبتى
برضه بنتى الغاليه مفروسه
انا بعت ليمى اميل ومستنيه ردك
وياريت تقوليلى لما تردى علشان افتح الميل
وباقى الحكايه هنشرها هنا مش فى مدونتى
مع خالص تحياتى لابنتى العزيزه اللى مقصره فيا قوى

فرنسا هانم يقول...

أحــوال الهـوي
انت بتكلمنى على انى راجل
لا فتح يابنى فتح شوف مين بيكلمك
فرنسا هانم
يعنى انثى
من فعل مؤنث
فعل ماضى مرفوع بالضمه لانه جمع مذكر سالم
بس ماشى يا سيدى نمشيها مسلسلات مصرى
ماهو احنا برضه من مصر

kochia يقول...

عاوزة اعرف باقي الحكاية بسرعة
عجبتني اوي

فرنسا هانم يقول...

Doba
اموااااااااااااااااااااه
يا هبه يا حبيبتى
وحشانى جدا
وبجد متشكره على حضورك لينا ومؤزارتك للمدونه
اما عن الرايق
فانشاء الله هيرجع قريب
مع خالص تحياتى ليكى يا غاليه

فرنسا هانم يقول...

بنت الغربة
لا الميت هو اللى وقع فى البير
مش الصابونه
وده فتح لصاحبنا باب رزق
عموما انا مش هتأخر عليكم ان شاء الله

فرنسا هانم يقول...

زهرة الياسمين
حاضر يا زهره
انا هاكتب الباقى وهنشره قريب ان شاء الله

فرنسا هانم يقول...

kochia
حاضر يا كوشيا
انا هاكتب البقيه وهانشرها كويس
تحياتى لبنت السويس

الطائر الحزين يقول...

دنيااااااااا

TAFATEFO يقول...

ياباااااااااااااااااي

متكملي الحدوته يا أبله

:D:D:D

في حد يفصل في النص كده من غير احم ولا دستور؟

Empress appy يقول...

بهرش فى دماغي ومستنيه عاوزه اعرف بقى الاخر علشان اعمل فكره شيطانيه هههههه

حنين القلب يقول...

لا بقى عايزة اعرف الاخر
بس باين عليها قصه جامده

تسلمى يا فرنستى
انا من قبل ما اعرف مين اللى كاتب البوست حسيت اسلوبك وطريقتك الشيقه
تسلم ايدك

حنين القلب يقول...

فرنسا هانم
انتى اتكلتى على خالد
يبقى عليه العوض ومنه العوض
انا لو منك اقيم عليه الحد ونخلص منه

حنين القلب يقول...

همس الاحباب

يا بنى يا حبيبى

حد مش يسمع كلام فرنسا
اهه هتسيح ليك وهتقول خالد ده حيطه ميله وهتقول انك فاشل وكمان وحش ومش بتسمع كلام ماما فرنسا

انا جايه اهدى النفوس بس
هههههههههههههههههههههههههه

حنين القلب يقول...

عبده الرايق


وحشتنااااااااااااااااااااا

والله بجد وحشتنا والمدونه من غيرك ناقصها كتير
صحيح الام قايمه بواجبها صح
انما برضه الاب عمود البيت وضهره

ربنا يتم شفاك على خير يا روقه وترجع لينا بالف سلامه

Mafrousa يقول...

انا جاية اقولك كل سنة و انتى طيبة
صحيح متأخرة 10 ايام
بس معلش انا عرفه ان قلبك كبير
كل سنة و انتى طيبه اعتبري المعايدة جت فى وقتها 2-11

انت تسال والكمبيوتر يجيب يقول...

الأخوه والأخوات الأعزاءبمدنة الضاحكون
سوم السبت 15-11 نختتم برنامجنابالدعاء بالشفاء العاجل ان شاء الله للصديق عبده الرايق مع تمنياتنا له بالعوده الينا سالما هعافا ليرسم معكم البسمه على شفاهنا
البرنامج يذاع التاسعه وعشر دقائق صباحا على موجات الأذاعه الرئيبسيه لمصر اى أذاعة البرنامج العامموجه اف ام 107 واربعه من عشره او المتوسطه 819 او على القمر الصناعى نايلسات قسم الراديو البرنامج رقم 1 وكذلك يوجد رابط فى موقعنا تحت الساعه الى اليسار اضغط عليه وانتظر لتسمعنا
الموقع
http://dear.to/cairo
ومدونتنا
http://netonradio.blogspot.com
مع تمنياتنا للجميع بالصحة والسعاده

أحــوال الهـوي يقول...

يا ست ىالهوانم
اسف لعدم و ضوح الرؤيه معلهش الحشيش اللي في القصة خلاني مش عارف الشمس من القمر

و تحيا مصر يا عبلة

همس الاحباب يقول...

فرنسا هانم
اسف جدا
بس فعلا انا ما شفتش التعليق بتاع حضرتك غير النهاردة
وفى ظروف ما منعتنى من دخول المدونة من اكثر من 3 ايام من قبل تعليق حضرتك بيوم
اسف مرة اخرى على الخطا الغير مقصود
وياستى انا من دلوقتى اجدول البوست القادم انتى اعلنى عن البوستات وانا انسقها واجدولها فورا
وسماح يا اهل السماح
وبلاش والنبى الدول النملاوية ده اكل عيش برده
وربنا ما يجعلك فى كل ركن سرب نمل

همس الاحباب يقول...

هههههههه
ههههههه
بجد حلوة بس محتاجين باقى القصة
بس والله زمار دماغه عالية قوى قوى
والحشيش شكله كده مش مغشوش
وهيروح فى ستين داهية الملك الاهبل
تحياتى

همس الاحباب يقول...

حنين القلب
فرنسا هانم
انتى اتكلتى على خالد
يبقى عليه العوض ومنه العوض
انا لو منك اقيم عليه الحد ونخلص منه.
===
بصى يا بنتى
يا ريت تحطى لسانك جوه بقك
وتبطلى شغل البوتجاز ابو 5 عين ده
انتى ما صدقتى يا ساتر يا رب

همس الاحباب يقول...

حنين القلب
حيطه مايلة
يا نص عمود اسمنت مغشوش
اطلعى منها انتى بس وهى اتبقى فلة
ما تسمعيش كلامها يا فرنسا
البنت دى اخر العنقود بس سوسة
وبتوقع بينا
وبصراحة ناوى اخطفها وابيعها لبتاع الروبابيكيا
واجيب مكانها وابور جاز
هههههه
ابقى هدى النفوس يا ست حنين

صابر وراضى يقول...

وعليكم السلاااااااام
يعنى لازم نستنى الحلقه التانيه؟
ياخى كنت خليتها فاصل اعلانى زى روتانا

maiosha يقول...

فرنسااااااااا

حرام عليك إسلوب التشويق والإثارة ده
هههههههههههه
بس بجد القصة دى رهيبة
سيبك إنتى سمعتيها ولا تأليفك .. الرك على الإسلوب يا جميل

هههههههههههه
بس كل كوم والزمار اللى بيكلم سقف الاوضة ده كوم

والله ده راجل عسل
هههههههههههههه

متتأخريش بالباقى بقى الله يخليكى

سلام يا جميل

حنين القلب يقول...

همس الاحباب
انا بوتجاز وب 5 عيون كمان
ونص عمود اسمنت ومغشوش كمان
وسوسه وبوقع بينكم وناوى تخطفنى وتبعنى لبتاع الروبابيكه

طيب بص انا هطلع اكرم منك يا خالود
ومش هرد عليك
وبما انى اخر العنقود وانت البكرى وانت عارف طبعا البكري بيبقى اييييييييه؟؟
بس عايزة اقول لفرنسا نصيحه
احترسى ممن اقترب من الارض

فهمانى يا فرنستى
سلام يا عم النخله

Raghda Rashad رغده رشاد يقول...

لاء انا متغاظة بصراحة

مع انى اتبسطت

بس حسيت ان حد فجاة طفّى النور

ليه كدا بس

ابقوا اكتبوها بقى كلها

و هاجى اشوفها ...اتفقنا؟!!

فرنسا هانم يقول...

الطائر الحزين
وكما قال عمنا الكبير يوسف بيه وهبى
وما الدنيا الا مسرح كبييييييييييير

فرنسا هانم يقول...

TAFATEFO
معلشى اصلها حكايه كبيره ولو كملتها مره واحده هيكون البوست كبير جدا
هاكملها المره الجايه

فرنسا هانم يقول...

~*§¦§ Appy §¦§*~
الباقى جاى يا ابى
بس الفكره الشيطانيه هى اللى جات بدرى بدرى
مع خالص تحياتى لكى

فرنسا هانم يقول...

حنين القلب
تسلمى لمامتك يا اخر العنقود يا غاليه
وان شاء الله هكمل الحكايه

فرنسا هانم يقول...

حنين القلب
هتقيمى الحد على خالد !!!!!!!
لا خلاص سماح المره دى
اصله بعت اميل وشرح لى ظروفه وانا عفيت عنه
وحلاص عفا الله عما سلف

فرنسا هانم يقول...

واحدة مفروسة
انا بعتلك اميل يا مفروسه ومجاليش رد منك
ايه انتى بتخلصى ولا ايه ؟

فرنسا هانم يقول...

انت تسال والكمبيوتر يجيب
شكرا لكم على تلك اللافته الكريمه
وندعو جميعا بعوده الرايق الى بيته سالما غانما باذن الله

فرنسا هانم يقول...

احوال الهوى
معلشى بقى العتب على النظر اصل ده حكم السن
يعنى يبقى عندك 150 سنه وهيبقى نظرك 6 على 6
خلاص انا عذرتك يا جد جدو

فرنسا هانم يقول...

همس الاحباب
خلاص يا خالد
عفونا عنك
وان العفو من شيم الكرام
واعمل حسابك البوست القادم للطائر الحزين
وورينا الهمه بقى فى الجدوله
يا اما تبعت لى اميل وتورينى ازاى اجدول

فرنسا هانم يقول...

همس الاحباب
وصلنى اميلك وقمت باللازم
وبعت لك الرد
وشكرا لك على المتابعه والاهتمام

فرنسا هانم يقول...

همس الاحباب
لا طبعا يا خالد الحشيش مكانشى مغشوش
كانوا فى زمان لسه ميعرفوش الغش
اما دلوقتى بقى احنا بقينا من اصحاب اختراعات الغش

فرنسا هانم يقول...

صابر وراضى
فكره برضه والله
بس فاصل الاعلانات ده بيجيب فلوس
ولو كان اخونا الرايق هنا وسمعك كان عمل المدونه كلها فاصل اعلانى

فرنسا هانم يقول...

maiosha
بجد والله ميرسى
انا مش عارفه اقولك ايه
اسلوبى مستمد من ثقتكم بى
شكرا جزيلا ليكى
وانتظرى الباقى

فرنسا هانم يقول...

حنين القلب
ههههههههههههه
ههههههههههههه
العبوا سوا يا ولاد
انا فهمت يا حنين
بس خلى بالك بقى من ايد الواد ده اصل ايده طرشه وانا خايفه عليكى يا حبيبتى

فرنسا هانم يقول...

رغده رشاد
معلشى يا غاده اصلى لو كتبتها مره واحده هتكون كبيره والناس هتمل
وانا برده همل من الكتابه
انا هكتب الباقى ومنتظراكى تيجى تشرفينا

حنين القلب يقول...

فرنسا هانم

مع احترامى للى قال حكايه البلد وانه شاكك ان انتى مش من السويس والكلام ده كله
عايزة افهم حاجه واحده بس هو هيفرق معاه ايه يعنى لو عرف مثلا انك من بور سعيد ولا اسكندريه دى هتفرق فى ايه ولا البلد بتفرض علينا اننا نحب ولا نكره الانسان اللى منها
اللى بيربطنا ببعض حب واحساس صادق مفيش داعى نشوهه بكلام مش ليه لازمه
مع انى ولا عارفه مين اللى قال كده
ولا عارفه اصلا فكر كده ليه
بس احب اقوله كبر دماغك

فرنسا هانم يقول...

حنين القلب
الكلام ده كلام فاضى وتافه يا حنين ومتشغليش بالك
بس انا حبيت اقول لناس معينه اللى عايز يسأل على حاجه تخص فرنسا يسألنى انا وبلاش شغل حورينى يا طيطا وشغل التلات ورقات والنميمه والكلام فى الضهر
ياريت بس الرساله تكون وصلت لانى مش بحب ادخل مع حد فى مهاترات

ايام العمر يقول...

قصة جميلةوعجبتنى اوى

ومستنى تكملتها بفارغ الصبر

بس هو ممكن الميت يكون نزل فى البير

وهو نزل عشان يطلعة لقى كنز

صح

سلااااااااااااام

همس الاحباب يقول...

فرنسا هانم
تم جدولة البوست القادم وتنسيقه فى الدرافت
تحياتى

همس الاحباب يقول...

حنين القلب
ههههههههه
ههههههه
انا عارف البكرى بيبقى ايه
بس مع الاسف فى عيلة الرايق
اخر العنقود هو اللى كده
وثانيا يا ست زرافة هانم
احيانا القصر بيبقى نعمة برده
هههههه
وبعدين مامتك قالتلك عفونا عنه
يعنى كبسة كبيرة
اهدى بقى

همس الاحباب يقول...

فرنسا هانم
والله انتى دايما رافعة روحى المعدنية
الوحيدة اللى حاسة بقيمتى فى العيلة النكد دى
وعلشان كده انا اخلى صاحبى دكتور الاسنان
يخلعك من الرايق ومش هندفع كتير هما 300 جند وممكن ياخد 100 ويلخلخه
ويبقى كده عملت معاكى احلى دور واجب
خلعتى من الرايق ومن عيلته
عدى الجمايل يا فرنسا

فرنسا هانم يقول...

ايام العمر
مع انك سبقتى الاحداث انما مفيش كنز ولا حاجه
عموما انا ان شاء الله هكمل الحكايه البوست القادم
وشكرا جزيلا

فرنسا هانم يقول...

همس الاحباب
شكرا يا خالد على الجدوله
وده عشمى فيك برضه
والبوست القادم بتاع لهمس الاحباب

فرنسا هانم يقول...

همس الاحباب
بلاش خلع ولا لخلخه اليومين دول يا خالد
احسن الناس يقولوا الرايق تعب ولخلخناه وهو تعبان
استنى لما يرجع ونفكر نخلعه

فرنسا هانم يقول...

الرايق
ياريت تدخل الاميل بتاعك لو تقدر فى اميل بعته ليك ضرورى الان