الثلاثاء، نوفمبر 04، 2008

شــاعر .. وربــة منـزل



فى يوم مشرق جميل .. جلس الشاعر يتأمل زوجته .. يتذكر أنها حبه الأول وأنها كانت أقصى أمانيه ..


ملهمته التى تعلم الشعر من أجلها .. وألهب قلوب الكثيرين بقصائده الحارة إليها ..


تأملها كثيراً وهى جالسة أمامه .. عاوده الحنين للشعر بعد عشر سنوات زواج ..


قال: هذا قلمٌ ملأته بمداد رحيق الحب .. وهذه ورقة بيضاء فى صفاء عيونك ..


قالت: هو انا هرجع المدرسة تانى ولا ايه؟


قال: انثرى حروفك .. أكتبُى


قالت: ماشى .. طب ملينى .. أكتب ايه؟


قال: أكتبُبى عنى .. عن شوقى ووجدى


قالت: شوقى مين؟ ومين وجدى ده كمان؟


قال: أكتبى اننى ما ارتويت من حبك ابدا .. واننى لا زلت ظمآن


قالت: فهمت .. هاقوم احضر الأكل اهو


قال: أنظرى الى عيناى كما كنتِ تفعلين .. واحتضنى اهدابى


قالت: تصدق؟ عنيك حمرا .. قوم نام شوية قبل الولاد ما يرجعوا


قال: لم أقصد .. اقتربى من قلبى.. انصتى .. أتسمعين هذه الدقات؟


قالت: آه .. ده باين الولاد جم من المدرسة .. الباب بيخبط


قال: ايه الست دى؟ طب قومى ياختى افتحى الباب وحضرى الغدا


قالت: تأمرنى .. فيهتز القلب .. وأسير بأمر الهوى .. مكبلة بقيود العشق



تحياتى


كاميليا

هناك 42 تعليقًا:

فرنسا هانم يقول...

مشكلتى انى مبعرفش اجدول التدوينات زى ماكان الرايق بيعمل فاضطريت انزل البوست قبل ميعاده بساعه ونص
الله يشيفيك يا رايق
وترجع لنا بالسلامه
احنا بجد محتاجينك

فرنسا هانم يقول...

هههههههههه
حلوه يا كاميليا
انا كنت فاكراها محيح خالص متعرفشى تتكلم عربى
اتعدل لسانها وقالت الشعر بعد ما هو غلب حماره منها
لا وايه
قالت كلمتين فى الجون
قالت: تأمرنى .. فيهتز القلب .. وأسير بأمر الهوى .. مكبلة بقيود العشق

انال بس كانت مخبيه كل الكلام ده ليه عن الراجل
تحياتى ليكى يا زهره الكاميليا

Unknown يقول...

هههههه
جميله اوي يا كامليا
جميله بجد
عجبتني القفله بتاعتها قوي
والف مبروك يا جميله ولو انها متاخره

Unknown يقول...

ههههههههههههههه

يعني طلعت فاهمه اهي بس بتستعبط

بس الاستعباط أحيانا بيكون لذيذ

Mony يقول...

هههههههههههههههه



حلوة اوي

تأمرنى .. فيهتز القلب .. وأسير بأمر الهوى .. مكبلة بقيود العشق


ملعوبة



تسلم ايدك

كاميليا بهاء الدين يقول...

شفاك الله وعفاك يا رايق يا رب

وترجع لنا بألف سلامة وصحة

كاميليا بهاء الدين يقول...

فرنسا هانم

.....
انا كنت فاكراها محيح خالص متعرفشى تتكلم عربى
اتعدل لسانها وقالت الشعر بعد ما هو غلب حماره منها
لا وايه
قالت كلمتين فى الجون
....

تقريبا الدنيا كانت حر .. ووقت غدا .. والاولاد راجعين من المدرسة
وطبعا الهام الشعر هربان

تحياتى وحبى
لاجمل هانم فى المدونات

كاميليا بهاء الدين يقول...

لماضة

الله يبارك فيكى يا جميلة
اقول عقبالك ولا خلاص؟

كل الحب

كاميليا بهاء الدين يقول...

esraa

...
يعني طلعت فاهمه اهي بس بتستعبط
...

تعرفى؟
لو كانت مش فاهمة او مش بتحس الشعر بتاعه
كانت تبقي مشكلة .. بس هي فاهمة كويس اوي
بس حركات زوجات
D:

كل الود

كاميليا بهاء الدين يقول...

mony

يسلم قلبك الجميل
واختيارك

كل الحب

الطائر الحزين يقول...

ايوة خالف تعرف دق الباب ودق الهون ودق القلب ما هو كله دق يا معلم

افتحى عينيك افتحى الشباك افتحى المندل اهو كل فتح ياريس

==========
جميلة

===============

الف سلامة يا رايق ترجع بالسلامة

Empress appy يقول...

ههههههههههههههههه
طبعا عجبتنى موت
الا هو ده بقى حال الست المصريه ولا ايه ههههههههه
لاااااااا فيه جنسيات اخرى
تسلمى يا كامى

همس الاحباب يقول...

ههههههه
هههههههه
عشر سنوات
والله راجل طيب ولسه بيقول شعر
اكيد جااااى من كوكب تانى
ههههههههه
بس بجد طلعت ست جامدة قوى قوى
تأمرنى .. فيهتز القلب .. وأسير بأمر الهوى .. مكبلة بقيود العشق
طب ما كان منى الاول قومى يا اختى افتحى الباب وجهزى الغدا
ولا هى كانت مبسوطة انها داخلة مملكتها المطبخ .
تسلم ايديكى يا اجمل عروسة فى 2008
تحياتى

همس الاحباب يقول...

فرنسا هانم
متشغليش بالك بموضوع الجدولة
انتى اعلنى عن ميعاد البوست
وانا اظبطه واجدوله ليكى
لحين عودة الحاضر الغائب الرايق
ربنا يشفيه ويرجعه بالسلامة

Unknown يقول...

اية الجمال دة ياكامي
هههههههههه

حلوة قوي


تصدقي الحياةكدا احلي

لما الاتين يبقو تفكرهم واحد بتبقي الحياة
روتينية والاطفال
يطلعو معقدين

بس عاجبني الاسلوب الجديد
المدونة هطلع المواهب

عسل عسل عسل
امواااااا

سلام

Unknown يقول...

اية الجمال دة ياكامي
هههههههههه

حلوة قوي


تصدقي الحياةكدا احلي

لما الاتين يبقو تفكرهم واحد بتبقي الحياة
روتينية والاطفال
يطلعو معقدين

بس عاجبني الاسلوب الجديد
المدونة هطلع المواهب

عسل عسل عسل
امواااااا

سلام

زهرة الجنة يقول...

حلوة جدا يا كاميليا
ده زوجة تجيب ضغط دمي عالي جدا
وكويس انها قامت تفتح الباب
قبل ما يضربها (:

تحياتي ليكي
والف سلامة علي الرايق

maiosha يقول...

ههههههههههههه
إيه الست العسل دى

بجد تسلم إيديك يا كاميليا

القفلة بتاعها جامدة جدا

zahra يقول...

ههههههههههههههههههههههههههه
و الله دماغها عالية قوى

بنت الغربة يقول...

حلوة قوى بس معدش فى راجل بيقول الكلام الجميل ده-ده اصلا مابيتكلموش خالص ياحبيبتى-غير عايز اكل وعايز انام-بس فهى المفروض تحمد ربنا انه بعد 10 سنين جواز لسه بيتكلم - اصلهم بيفقدوا النطق قبل كده بكتير-علشان كده المثل بيقول ظل راجل ولا ظل حيطه والتشبيه ده استعارة مكنيه معناها انهم كثير الشبه بالحيطه لابتتكلم ولا بتسمع ولابتشوف-تحياتى ليك

ojg يقول...

ايه يا قمر ده
شوفي انا كان في دماغي محاورة شبه كده بين اتنين
ولسه الموضوع مش كمل في دماغي
تقومي انتي تعملي حاجه شبهه
بتقلديني يا انتي؟؟
:))
قطعا القفلة تحفة
الراجل هاري نفسه وهي في الآخر قالتله كلام بكلامه كله
عسل والله

بدعي للرايق ان شاء الله يخف وينور تاني
بس هو عنده ايه بس؟؟
الف الف سلامه عليه

وفرنسا هانم حبيبتي
وحشتيني
:)

رئـــــيسـة حزب الأحلام يقول...

ههههههههههههههههههههههه
ملعوبة ياكاميليا
بس بجد دة الى بيحصل بعد الجواز
وربنا يسهل

صابر وراضى يقول...

وعليكم السلاااااااااام

مقوله فى ستات لسه بالرومنسيه دى؟
دا الزوج لو بيكلم الكنبه كانت نطقت

المـــفـــــــقــــــــوعـــــة مــرارتـهــا يقول...

عسسسسسسسسسسسسسسسسل ياكيمو
بجد مسخرة
بس انا شايفة ان الستات هي اللي لسة عندها رومانسية لكن الرجالة بيشطبوا رومانسية بدري
عموما برضه عجبتني وعجبني طريقتك في الكتابة
تحياتي ياعروسة والف سلامة للرايق
ربنا يرجعه بالسلامة

son's egypt يقول...

السلام عليكم
جميلة جدا
بعد كده لما تحب تكلمهما وتخليها تكتب شعر
ابقي كلمها بالبلدي علشان تقول فيك شعر

مهرة سالم يقول...

ههههههههههه
الحب يختلف بعد الزواج...
لا يعود كما كان في الشاعريه قبل الزواج...

mohamed يقول...

لا لجلد الطبيب المصرى بالسعوديه 1500جلده

أحــوال الهـوي يقول...

و الله عندك حق
كنت اقرض الشعر و اناطح الشعراء و حينما خطبت و جدت ملاذي و صرت اكتب لخطيبتي خلاجات نفسي و انفس لها اشواقي و الله كنت اقراء لها اشعاري و اضع بعدها الترجمة و الشرح و كانت تقول بخجل حاجة جميلة
و لما تزوجنا و كنت ذات مرة اقراء قصيدة تتغزل فيها و انا انتظر رضاها و فرحها فاجأتني بقولها انا مش عارفه فايدة الشعر ايه ياخوي لو بتحبني كده بصراحة انا ما بيأثرش فيه غير الاصفر الملعلع (الذهب) و من وقتها ذهب الشعر و الحب مع الصدمة و بقت تتمتع بقصائد اللؤلؤ و السلاسل و الخواتم

تحياتي

Mafrousa يقول...

هههههههههههههههههههههه
ايه يا كيمو ده
ايه الافتكاسات الشعريه
للست ربة المنزل هذة
ههههههههههههههه
جميله يلا كاميليا دايما

Mafrousa يقول...

ازيك يا فرنسا
اخبارك ايه
و اخبار صحتك ايه؟
ان شالله بخير
انا بكتبلك هنا لانك مش بتردي على الميلات اللى بعتهالك
منورة المدونة
و ربنا يشفى الرايق و يرجعه بالسلامه
سلام

Mafrousa يقول...

انا رجعت تاني
هههههههههههه
على فكرة البتاع اللى انتو حاطينه على جنب ده اللى فيه الاعلام خربان
اه و الله خربان
مبين الناس كلها من القاهرة و الدول العربية

مافيش اقاليم ولا دول اوروبيه
بيلقط واحد و يسيب الباقى
ابقوا ظبطوه
ههههههههههههههههههههه

قوس قزح يقول...

ههههههههه
هم الستات كده
يتدلعوا يزيدوا فيها
و لما تلاقيه رمى طوبتها تدلع هى

طيب ما كان من الاول
بدل الوقت الضايع ده :)


- - -- - - -
ربنا يشفيك يا رايق و ترجع بالسلامة ان شاء الله
و خالد بيعرف يجدول يا فرنسا يعنى ممكن هو يقوم بالمهمة دى

- - - - - - -

مفروسة
البتاع مش بايظ
الناس هى اللى كلامها بايظ :(


سلاااام

انت تسال والكمبيوتر يجيب يقول...

الأخت العزيزه فرنسا هانم
السلام عليكم ورحمة الله
ارجو ان تبلغى الصديق الرايق تمنياتنا له بالشفاءالعاجل والعوده الى رسم البسمه على الشفاه كما عودنا...دعواتنا له وسوف ندعوا مستمعينا للدعاء له بالشفاء العاجل ايضا فى برنامجنا الأذاعى بناء على توجيهات الأعلامى الأستاذ صلاح حجازى ..وتقبلى اصدق التمنيات للجميع بالصحة والسعاده
اسرة برنامج انت تسال والكمبيوتر يجيب
http://netonradio.blogspot.com

فرنسا هانم يقول...

كاميليا
انتى فين يا قمر ؟؟؟
مش بتردى ليه على زوارك

فرنسا هانم يقول...

واحده مفروسه
انا فعلا مقصره فى حقك يا مفروسه بالنسبه للميل
بس ربنا يعلم انا لما رجعت بعد احتلال العائله الكريمه لبيتى فى رمضان واقامه متاريس حربيه وموانع عسكريه واسلاك شائكه على الكمبيوتر لقيت عدد كبير جدا من الاميلات وفعلا والله مش عرفت ارد عليهم
وانا بنتهز الرد ده علشان اعتذر ليكى ولكل واحد بعت ليا اميل وانا مش رديت
اما بالنسبه للرايق
فالحمد لله اخباره كويسه
مع تحياتى ليكى يا مفروسه

فرنسا هانم يقول...

ojg
وانت كمان وحشتينى جدا
والف مليون بوسه من خالتك فرنسا

فرنسا هانم يقول...

انت تسال والكمبيوتر يجيب
الاستاذ : صلاح حجازى وكل العاملين على برنامج انت تسأل والكمبيوتر يجيب
نشكركم جدا جدا باسم مدونه الضاحكون
وبالنيابه عن الاخ العزيز عبده الرايق
على زيارتكم الكريمه للمدونه والسؤال عن العزيز جدا على قلوبنا الاخ عبده الرايق

فرنسا هانم يقول...

قوس قزح
كويس يا قوس قزح طالما خالد بيعرف يجدول يبقى يجدول البوستات القادمه
لما نشوف اخره الرايق ده معانا ايه
الف سلامه ليك يا رايق

فرنسا هانم يقول...

همس الاحباب
شكرا يا خالد
البوست الجديد بتاع الزمار
هتلاقيه فى الدرافت
نتعب كده نهار فرح همس
افرق لها الشربات بايدى وازعرد كمان
ولو انى مش بعرف ازغرد

Amr Abdel Azim يقول...

البوست جميل ورائع لكنه تقليدى مش فيه ابداع اوى عامل زى الاشعار اللى بنشوفها فى الآداب العربى بالضبط مش اكتر من كده الفكرة تقليدية لكن جايه فى قالب عمى حلو ولذيذ

Raghda Rashad رغده رشاد يقول...

تروحله يمين يجيلك شمال

تجيله شمال يجرى عاليمين

عاملة زى الشريك المخالف

مفيش مشكلة...المهم المراكب سايرة مش واقفة

ابتسمت بجد

chatterbox يقول...

كلام اروع من الرائع :)