يا سعااااااااد .... أنا ركبت ميكروباظ يا سعااااد !!

تحديث

*********

اسره الضاحكون ترحب بالاخ الكريم ابراهيم د \ هيما

صاحب مدونه المرحوم فى التلاجه

هااااااااااااااااام جدا جدا

على جميع افراد فريق العمل التوجه فورا الى الدرافت

اقتراحات وشكاوى

*********************************************

سعااااااااااد........ انا ركبت ميكروباااااظ يا سعاااااد

طبعا بتقولوا فى عقل بالكم وايه يعنى انتى هاتعملي فيها بقى ما بتركبيش ميكرو باظات . لا كلا البت لكن هى الحكايه ان الحادثه الشنعاء دي ما حصلتليش من يجى عشر سنين كده ( ايام ما كنت سنه 2 ابتدائي) اه انا يادوب عندي 18 سنه انتم عارفين .

اقولكم الاول حكايتي مع الميكروباظات : أنا كنت باركبها زمان عشان كنت باخاف اركب تاكسي لوحدي وبعدين لما عزلنا ما لقيتش بد بقى ما كانش فيه خط ميكروباظ هنا فبدأت اركب تاكسيات .
قووووووم هووووووب نقلوا فى شارعنا الهادي الجميل الجديد موقف ارياف . نص الدقهليه بتعدي علينا وهما رايحين اشغالهم ومدارسهم الصبح .
التاكسيات شحت بقى وبقيت اضطر لما يكون عندي محاضره بدري انى انزل من البيت الساعه سبع الا ربع واركب ميكروباظ . ما الفلاحين الله يسترهم بيصحوا من الفجر ويجوا يحتلوا الشارع هنا .

بس انا بقى كنت باركب ميكروباظات بكل الاطه . اه ما انا شربت يااااااااما زمان وناس كتير كلت على قفاها مني . فكنت باركب قدام وادفع نفرين. لحد بقى ما السواقين والتباعين حفظوني ومنهم الى كان بيحترمني اوووووي .
ومنهم الى كان بيبصلي بقرف واشمقناط ويقولي: اشمعن يعنى ؟؟؟ على راسك ريشه ياابله !!!!
ومنهم الى فكرنى كنت بادفع اثنين عشان استفرد بجمال امه ( احم احم ماماته اقصد).
قاموس البلطجه بيطلع على الوش معايا معلش .

بس بعد كده بقى وانا فى سنه 3 قررت انى اروح الكليه فى الحاجات المهمه بس (اشراف على راي بابا ) وكنت بانزل كده في مواعد مش زحمه اروح احضر سكشن ولا اثنين وارجع دوغري وتاكسيات بقى على طول .

المهم بقى توهتووووووووني : قوم ايه انا من اسبوع كده كنت نازله مشوار وما لقيتش حد يوصلني قلت لجوزي خليك يا ابو رياض انا هاروح انا بس انت تيجى تاخدني عشان الحته هناك ساكته . قالي مافيش معايا الا العربيه ا لنص نقل .قلتله اوووووك عادي انا اصلا وش ذلك .

المهم وانا رايحه ركبت تاكسي ورحت . وكان ربنا الى عالم بيا ومعيطه لما قايله بس كنت رايحه ازور اصلا سلفتي الى ابنها فى المستشفى ده (حكيت لكم عليه هناك عندي ) وكان مركب ناس ورا قلت مااااااااشي . المهم الاخ عشان المشوار طويل قوم ايه عمل التاكسي بالنفر وفضل يركب وينزل وانا فضلت فى الطريق اكتر من نص ساعه وهو دوغري اقل من ربع ساعه . وبعدين قعد يرغي لما صدعنى وعايزنى ارد عليه بقى .

وكل ما اقطم الكلام واسكت يقولي : كملي كلام يا ابله انتي كلامك مرتب اوي وانا مستمخ منه . انتى مدرسة تاريخ ياابله ؟؟؟!!!!

انا باستغراب وانا رافعه حاجب ونص : لا ليه ؟؟

قالي: اصلك شكلك كده . يبقى انتى غاويه قرايه بقى ؟.

قلتله: حاجه زي كده .(ملحوظه عبارة حاجه زي كده دي من عبارات قطم الحديث ).

المهم روحت لقيت الست الى انا رايحلها بتستعد انها رايحه عند والدتها والجو مكهرب اساسا زي ما قلتلكم سلمت عليهم وما استنيتش ابو رياض بقى والعربيه النص نقل . واستأذنت منهم ومشيت .

خرجت بقى استنى تاكسي ما لقيتش ابدا والحكايه طولت والشارع سكت بقى . قوم ايه لقيت الميكروباصات اقصد الميكروباظات كلها فاضيه وتيجى تقف قدامي خلقتي تماما والواد يزعق فى وشي ويقولي درااااااااسات يا ابله دراااااااااااااسات .

فى الاخر قلت طب لما انقى واحد نضيف ما لقيتش . قوم ركبت اول واحد جه بقى بعد الملل وغمضت عينى عشان مااشوفش شكله وركبت بقى قدام ودفعت اثنين .

اولا العربيه مكسره ومدغدغه من كل حته فى سخونيه عجييييييييبه طالعه من تحت الكرسي والجو حر اصلا .
ثانيا التباع صوته محشرج وعمال يزعق وينادي حتى والميكروباظ مليان .
ثالثا : السواق شكله والله اعلم ما استحماش ولا حلق ولا قص ضوافره ولا غير هدومه من سنه على الاقل .

رابعا : فى مرايات فى كل حته على الازاز القداماني . مرايت مدوره ومربعه كده وصغيره وابص فيها مش جايبه الشارع خاااااالص .
وايه ده المرايه دي هنا بتعمل ايه ؟؟!! ايه ده دي جايبه التطريز الى فى العبايه بتاعتي الى تحت خالص !!!!!

قلت هو يمكن بيحب يشوف نفسه كتير ؟؟؟ طب مش كان يستحمى طيب ؟؟!!! (كل ده وانا رافعه حاجب ونص برضه )

( البت اختي بقى لما حكيتلها هى سوابق مع سواقين التاكسي الحديثه ولسه بقى بتخرج كل يوم انا باخرج كل شهر دلوقتي . قالتلى لاااااااااااااا دي مش عشان يشوف الشارع . دي عشان يشوف البنات الى بيركبوا ورا وجنبه وكل المناطق يعنى ). قلت طب نقبه على شونه زمانه قعد يتفرج على تطريز العبايه طول ا لطريق .

قوم ايه بقى اول ما انا حطيت رجلي فى العربيه يادوب جاي يطلع كان هايشيل ولد بعجله يا عينى لانه كان باصص الناحيه التانيه مش عارفه ليه .
قلت استر يارب . وبعدين بقى بعد ما مشينا شويه لاحظ ان الواد ما بيجيبش حد جنبي .
قام بقى ابتسم وطلع سنانه الصفرا من السجاير وقالي بكل ود وفاتح بؤه على الاخر : هو حضرتك دافعه اثنين يا ابله ؟؟؟

قلتله :ايوه (وانا وشي الناحيه التانيه عشان اعصابي ).

وبعدين قام فجأه كده طلع كبشة فلوس وقالي: ممكن تعديلى دول يا ابله ؟؟؟؟
خدتهم وانا ساكته وقعدت اعد في الفلوس والفلوس شبه السواق بالظبط ما بتستحماش برضه .
وكبشه بقى قعدت اعد فيهم وارتبهم
وهو يفغر فاه ضاحكا ويقولي (حلاوتك فى الفصحى يا صبرني ) : معلش بقى ياابله شاغلينك معاااانا .

قلته : لا ابدااا أي خدمه .

وكل شويه الاقي راس كده طالعه من العربيه من بره دي راس التباع يبصلي ببلاهه من الشباك ويضحك .

وانا قاعده اقولي يا ساااااااااعه بالوقت اجري . واخيرا وصلت : هنا يا باشمهندس .
قالي: استنى يا ابله انزلت تحت قدام عربيات ميت علي .
قلتله: لا اخينا شكرا انا مش راحه ميت علي .

وانا نازله بقى وعلى وشك رزع الباب . امال حضرتك ساكنه هنا يا ابلللللله . وكان الباب اترزع خلاص .

ونزلت وانا باقووووووول: ااااااووووووووووووووووف جت فى وش الواد التباع دوغري .

وطلعت بقى اقول لاخواتي انا ركبت ميكروباظ يا سعاااااااااااااد .

واقول ما انتى لو كنتى فالحه يا صبرني كان زمانك بتسوقي لكن انتى مش فالحه يا صبرني .

بقلم

صبرنى يارب