مذكرات زوج

معلشى تحديث تالت مره

**************

اسره مدونه الضاحكون ترحب بانضمام النجم الكوميدى الجديد

الطائر الحزين

على فكره يا طائر

انا قريت البوستين بتوع شهريار 2008

علشان كده بقول النجم الكوميدى

لانهم عجبونى بجد

تحديث تانى

**********

اسره مدونه الضاحكون ترحب بانضمام صاحبه احلى الوان

وصاحبه الضحكه الجميله

اختنا العزيزه

قوس قزح

وبهذه المناسبه يسعدنا تقديم كونو مجانا لكل زائر

تحديث

*******

اسره مدونه الضاحكون ترحب بانضمام

الاخت العزيزه appy الى اسره المدونه

وتطلق الاعيره الناريه احتفالا بانضمامها

متخافشى وتجرى يا رايق

ضرب النار فى الهواء مش فى المليان

نحن فى انتظار بوست appy

*******************************
مقتطفات من الحياه الزوجيه

فتره الخطوبه

************
هو :- الو ..صباح الفل والياسمين والنرجس يا حياتى ..انا قلت اصبح قبل ما اروح الشغل
هى :- صباح النور يا حبيبى
هو :- ايه رأيك يا حبيبتى نخرج النهارده بالليل
هى :- هنروح فين ؟؟؟
هو :- اى حته ..حتى لو هنتمشى شويه على الكورنيش المهم نخرج نشم شويه هواء مع بعض
هى :- امممممممممممم ....مش عارفه سيبنى افكر
هو :- اوك ..فكرى براحتك وانا هعدى عليكى بالليل

فى المساء

******
هو :- انتى لسه نايمه يا حبيبتى ايه مش هنخرج ولا ايه ؟؟
هى :- معلشى كان عندى شغل كتير فى البيت ..خلينا انهارده قاعدين فى البيت مع اخواتى
هو :- هههههههه ..انهارده بس ؟؟؟...ماحنا كل يوم قاعدين فى البيت مع اخواتك ولازقين فى البلاكونه بنشم غسيل
هى :-انت زعلت يا حبيبى ؟؟؟؟؟
هو :- لا ابدا انا بس اتشليت ..
هى :- هههههههههه ....من اولها دا احنا لسه على البر
هو :- انا كل ما اعزمك على حاجه يا حبيبتى مش بتوافقى انتى بتوفريلى ولا ايه ؟؟؟
هى :- لا يا حبيبى ..المسئله مش توفير ..انا كفايه عليا حبك الغالى ليا
هو :- البنت دى بنت حلال وشكلها هتسعدنى قوى

الاشهر الاولى ...من الزواج

************
هو :- صباح الخير يا حبيبتى
هى ( قايمه بتهرش فى شعرها ..وعامله زى وحيد القرن) :- صباخ الخير ...انت قمت وغيرت هدومك ؟؟؟
هو :- ايوه يا حبيبتى انا صاحى من بدرى وقلت قبل ما اخرج اعدل لك رقبتك اصل شخيرك عالى قوى
هى :- طيب استنى اجهز لك لقمه تفطر قبل ما تنزل
هو :- لا مش مهم يا روحى انا مش عايز اتعبك معايا ...وبعدين انا متأخر وعايز انزل

فتره الحمل

********
هو :- صباح الخير يا حبيبتى
هى :- صباح
هو :- ايه مالك مش قادره حتى تكملى الكلمه ...وبعدين قايمه عامله زى امنا الغوله ونكشه شعرك كده ليه ؟؟؟
هى :- نعم نعم نعم غوله ؟؟؟....لأ اقعد عوج واتكلم عدل ...قال غوله قال ..الله يرحم ايام زمان ..لما كنت بتبوس الايادى علشان اوافق عليك
هو :- ههههههههه غلطه وندمان عليها ..وبعدين يا حياتى انتى ناسيه ايدك كان القشف مغطيها ازاى ؟؟؟؟...انا لو قاضى احكم على نفسى بالشنق عشر مرات انى اتجوزتك
هى :- ليه يا عمر ..ناقصه ايد ولا رجل ؟؟؟ولا اكونشى ست بشنب ودقن ؟؟؟
هو :- لا يا روحى ده انتى قمر ....بس بعد ما اكتشفوه على حقيقته
هى ( وهى بتاكل فى ضوافيرها وبتزمجر زى الاسد ) :- يعنى ايه لما اكتشفوه على حقيقته هو انا وحشه ولا ايه ؟؟؟؟
هو :- ياروحى هو فى زيك زى ..الا فى جبلايه القرود...انتى روحى وعقلى ....يلا بقى جهزيلى الفطار علشان اروح الشغل
هى :-اه بطنى ..ابنك طول الليل مانيمنيش عماله يرفص فى بطنى ..اه جنبى ..اه ..اه ...معلشى قوم انت جهز لنفسك الفطار
هو :- ماهو انا مجهز لنفسى العشاء ومجهز لنفسى الغداء و........
هى :- وفيها ايه لما تتعود على كده ...اه ...بص ابنك بيرفصنى ..اه يا ودنى
هو :- ودنك ؟؟؟؟؟وايه طلع رجل الواد لودنك ؟؟؟ ...انتى هتتدلعى
هى :- انت هتمسكلى على الغلطه ....قصدى اه يا بطنى
هو :- انا نازل مش عايزه اجبلك حاجه معايا
هى :- لا عايزه بس اللبن والجبنه والزبادى والبيض البلدى واللحمه والفراخ والسمك والفاكهه
هو :- ليه كل ده هو احنا عازمين المحافظ ولا ايه ؟؟؟؟؟هو احنا فى مجاعه ولا اتفجعتى يا مفقوعه ...ولايمكن غاويه تفرسينى يا مفروسه
هى :- محافظ ايه يا حبيبى ..هو المحافظ احسن منى ولا ايه ..انتى ناسى انى حامل ولا زم اتغذى ..وبعدين انا باكل لاتنين انا والبيبى ..ولا انت عايز تاخدنى لحم وترمينى عضم ؟؟
هو :- لحم ؟؟؟؟؟؟؟؟ ....من امتى كان فيكى لحم ؟؟؟انت ناسيه يا حبيبتى لما كنا بنخرج قبل الجواز وكنا بنلعب فى الجنينه كنتى بتستخبى وراء عامود النور ...وناسيه الحقن اللى كنتى بتاخديها علشان تتخنك ؟؟؟.....
هى :- هههههههه .....ظريف ...ضحكتنى ....ابقى هات معاك عصير وشويه بقاله كمان
هو :- كل حاجه هات هات مفيش مره تقوليلى خد ؟؟
هى :- اه صحيح ...ابن حلالالالالالالالالال ...خد كيس الزباله ارميه علشان الزبال انهارده اجازه ...اه فكرتنى بالاجازه عايزه اخرج اشم شويه هواء
هو :-مش انتى تعبانه والواد بيرفصك ..بصى انا هاتصل باخواتك ونقعد مع بعضينا كلنا زى زمان
هى :- انت بتهزر ولا ايه ؟؟؟..( بتشم بمناخيرها ) ايه ده ؟؟؟ انا شامه ريحه خوخ...عايزه صابون كامى بطعم الخوخ
هو :- ربنا يستر وميطلعشى فى عين الواد صابونه ولا خوخايه
هى :- بكره عيد الحب ناوى تجيبلى ايه هديه ؟؟؟؟
هو :- عيد ايه ؟؟؟احنا لسه مكملناش سنه متجوزين واحتفلنا بعيد الحب ده 4 مرات وفى كل مره اكع هديه ..انتى ايه اتفجعتى هدايا ؟؟
هى :- انا ماليش دعوه ..ام حلموس جارتنا لابسه سلسله دهب جديده ..وهى مش احسن منى ..انا عايزه سلسله زيها
هو :- اه ...فين القناعه بتاعه الخطوبه ؟؟؟..مش ملاحظه انك انتى بقيتى ماديه قوى ؟؟؟

هى :- انا ماديه ولا انتى اللى بقيت بخيل
هو :انا بقيت بخيل ولا انتى اللى طالعه واكله نازله واكله زى المنشار الالمانى .....خلينا فى المهم . بقولك ايه هى الدكتورة قالتلك ايه فى المتابعة ؟؟؟.
هى : قالتلى اتجيبى بنوته زى العسل انسميها ايه ؟
هو : ما بلاش انا اختارى انتى .
هى : لا البنت ابوها يسميها انا بفهم فى الاصول .
هو : ايه رايك فى اسم حسنات .
هى : حسنات ايه يا خويا ده اكيد على اسم البنت اللى كنت ماشى معاها .
هو : ههههه ماشى معاها ايه حرام عليكى حسنات علشان ربنا يكفربيها سيئات الشهور اللى فاتت .

بعد الهنا بسنة

هو : مساء الخير يا تفيدة
هى : انت جيت يا سبع البورمبه .
هو : اه جيت ومال الاوضة ريحتها بصل وتوم هو انتى نقلتى المطبخ فى الدولا ب ولا ايه .
هى : لا يا خفيف كنت بطبخ وهدومى ريحتها طبيخ لو عايز تاكل الاكل فى التلاجة سخن وكل ولا اقولك نام خفيف الاكل ايتعبك .
هو : بغيظ ما تقومى انتى تحطى وانا كل يوم احط لنفسى .
هى : ايه مش عاجبك .
هو : لا مش عاجبنى طبعا .
هى : انت حر وعلى فكرة البلد فيها قانون ومش سايبة .
هو : البلد فيها قانون من امتى بلدنا فيها قانون .
هى : انا كنت بتفرج على فيلم محامى خلع وعرفت ان الست من حقها تخلع جوزها زى ما تخلع الشعرة من العجين .
هو : خلع يا نهار مش فايت وابنى ولا ابنتى ينادوا عليهم فى الشارع ويقولولهم يا ابن المخلوع.
هى : اه وقد اعذر من انذر .
هو : امممممممم بلاها اكل بلاها خلع ونجرب اخلع عينيكى وروحك كده .

على مقهى الحياة

**************
هو وصديقه على المقهى ليلا :-
هو : ايه اخبارك وعامل ايه .
صديقه : الحمدلله ماشى الحال وانت .
هو : انا الحمد لله .
صديقه : مش ملاحظ حاجة غريبة فى الشارع
هو : غريبة ازاى الشارع زى ما هو .
صديقه : مش ملاحظ ان الستات اللى ماشية كلها حلوة ومال فين الستات الوحشة .
هو : انت متعرفش مش احنا اتجوزناهم .

خالد

همس الاحباب