انتخبوا الرايق لرئاسه الجمهوريه

فرنسا هانم :- خير اللهم اجعله خير جمعتنا ليه انهارده يا رايق ؟

الرايق :- فى عندى خبر فيرى فيرى فيرى جديد

الطائر الحزين :- معلشى بقى يا رايق اصل النضاره بتاعتى ضاعت ومش هعرف اسمعك كويس

همس الاحباب :- روووقه انا عندى مشوار مهم لادغال افريقيا اشوف وشوكم امس

صبرنى يارب :- يووووووووه .. سورى ياروقه ده انا ميعاد نومى فات تصبحوا على خير

حنين القلب :- معلشى ياروقه الواد عمر صحى من النوم اروح اشوفه بااااااااااااى

الرايق :- شط ااب يوور ماوس منك ليه ليه ليها ليها دونت حد يتنفس . انا راجل ديمتراطى واى بيبول فيكم ذكر كان او انثى هيتحرك من مكانه هفرفره بماى بمسدس

فرنسا هانم :- فى ايه يا رايق ؟ حرام عليك احنا مش ناقصينك

الرايق :- خبر بمريارات الدوررات يا بشر دونت سبييك واسمعونى  .. انا العبد لله الدكاتره عبده باشا الرايق حامى حمى اللجان الشعبيه . بعد دراسه كامله لكل الناس فى جميع محافظات ايجيبت ال23 محافظه وبعد دراسه متانيه فى كل مصر مدينه مدينه .. شارع شارع .. دار دار .. زنجه زنجه .. قررت انى اترشح رئيس جمهوريه مصر العربييييييييييييييييه

الطائر الحزين :- ههههههه ..انا برضه كنت عارف ان الموضوع مضروب زى كل مواضيعك يا رايق

همس الاحباب :- ياعم فكك منى انا بالذات .. والنبى اترشح براحتك رئيس بوليس عريس اى حاجه وانا داخل انام

حنين القلب :- واااااو بابا رئيس الجمهوريه ييييييييييس انا معاك يا روووقه

الرايق :- بص بقى انت وهى ..انا عملت اجتماع موسع فى الصحراء مع العلامه الكبير حسن باشا الفراش طيب الله مقامه وشرح لى كل حاجه عن الدستطور المصرى وكتبلى برنامج الانتخاب بتاعى

الطائر الحزين :- واشمعنا بقى الصحراء اللى عملتوا فيها الاجتماع ؟

الرايق :- مش اجتماع موسع يا فالح ؟ طول عمرى بشك فى قدراتك يا ولد .. بصوا بقى مش عاوز اى بيبول فيكم يتكلم نيفر نيفر نيفر ... البرنامج الانتخابى بتاعى اهو انا هشجى سماعكم بيه ولازم تقولوا رأيكم فيه

صبرنى يارب :- خلص بقى يا عمنا عاوزه انام

الرايق :- بسم الله الرحمن الرحيم ... السويس فى الخميس 10 مارس 2011 ..

البرنامج الانتخابى للريس الجديد الدكاتره عبده الرايق ..

اخوانى الثوره ..واخواتى الثورات السلام عليكم ورحمه الله وبركاته .

من اجل مصر حاره مستكله .. ومن اجل غد افضل ابوس ايديكم ترشحوا العبد لله الدكاتره عبده باشا الرايق .. فانا الشعب وانا مع الشعب وانا ريسكم الجديد الدكاتره الرايق

برنامجى الانتخابى هو ....

قبل اى شى سوف اسقط الدسطور الحالى واقوم بعمل دسطور جديد ينص على ان رئيس الجمهوريه بعد ال 8 سنين بتوعى ميحكمشى البلد اكتر من اسبوع واحد بس .. يعنى يحلف اليمين ويفلسع .. وده علشان كل الشعب ياخد فرصته ..كما احب ان اقول لماى شعب الحبيب انى عملت برنامج انتخابى بمساعده اخى وصديقى ومعلمى حسن باشا الفراش والبرنامج عباره عن 879 الف و211 بند والان مع البرنامج

اولا -- الغاء قانون الطوارئ .. يشمل هذا الالغاء ثلاثه اقسام ..

القسم الاول-- الغاء كافه اقسام الطوارئ فى جميع المستشفيات العامه والخاصه

القسم الثانى -- القاء القبض على اى شخص اسمه طارق واعدامه فى ميدان التحرير لنتخلص جميعا من كل الطوارئ

القسم الثالث -- منع اى موظف فى الحكومه او القطاع العام والخاص  من الاجازات العارضه لمنع اى شخص يتحدث عن اى ظرف طارئ

واوعدكم انى سوف اقوم بالعمل جاهدا على الغاء هذا القانون فى خلال ال7 سنوات الاولى من فتره رئاستى

ثانيا -- البقاء على كل المعاهدات الدوليه مع دول المنطقه واذا كان لابد لنا من الحرب والجهاد فسوف اعمل جاهدا وبكل جد واجتهاد على البحث عن دوله غلبانه كحيانه وضعيفه وساقوم بشن حرب شعواء عليها واوعدكم انى سوف انتصر عليها وافضحها فضيحه الخواجه ينى

ثالثا -- حكم الشعب نفسه بنفسه . ولكن ليس على طريقه القذافى ..نو نو نو . حكم الشعب نفسه بنفسه بمعنى اننا سوف نوفر لكل مواطن زنزانه مستقله ليسجن فيها نفسه اذا ارتكب اى خطأ ويكون معه مفتاحها ومعه  ايضا شنطه اسعافات شرطيه .. والشنطه بها كلبشات حتى يكلبش بها المواطن نفسه اذا شعر انه قد ارتكب خطأ . وبها ايضا صاعق كهرباء لكى يصعق المواطن نفسه اذا اراد الهرب من نفسه . وبها ايضا مسدس لكى يجبر المواطن نفسه على عدم استعمال العنف مع نفسه . وبها ايضا ورق ابيض ممضى من المواطن حتى يكتب المواطن المحضر بتاعه بنفسه . وبها ايضا عدد 2 جهاز لاسلكى واحد مع المواطن والاخر معه ايضا حتى يبلغ نفسه عن اى خطأ يرتكبه . وبها ايضا سلك كهرباء ومنفاخ ودبابيس وعقاب سجاير وده شئ لزوم الشئ

رابعا -- الانتظار حتى نرى ما يحدث فى ليبيا فلو فضل القذافى فى الحكم يبقى حاجه من اتنين لاحنا ناخد بلدنا ونبعد عنه وعن جنانه يا هو ياخد بلده وويبعد عنا ويريحنا

خامسا :- العمل على الحد من استهلاك الطاقه وذلك بالعوده الى فوانيس رمضان

سادسا -- العمل على عدم اختطلاط الرجال بالنساء وذلك بتقسيم الشوارع واحد حريمى وواحد رجالى او تقسيمها الى ثلاثه اقسام شارع حريمى وشارع رجالى وشارع اطفالى

سابعا -- التمييز بين الرجل والمرأه حتى نعرف الرجل من المرأه وذلك بارتداء الرجال طاقيه زرقاء والنساء طاقيه خضراء

ثامنا -- ........... ايه ده يا بشر ؟؟ انتم فين ؟؟ ويير ار يو جوو ؟ هو انا بكلم نفسى ولا ايه ؟؟؟ فرنسااااا ..طائر ..همس ..حنين ..صبرنى انتم رحتوا فين ؟؟؟

ماااااااااااااااشى ولا يهمنى برضه انا هكمل الحمله الانتخابيه بتاعتى بنفسى وهغير كل الدسطور من اوله لاخره وهبقى الرئيس الدكاتره عبده باشا الرايق غصبا عنكم ياعيله الرايق وغصب عن شعب مصر كله

وارجوكم

ابوس ايديكم انتخبوا اخيكم الرايق

القذافى اهبل ولا احنا برياله

اخوانى الاعزاء واخواتى العزيزات
سؤال غريب الح على دماغى ايام اللامعقول اللى احنا عايشينها دى السؤال هو
القذافى اهبل ولا احنا برياله ؟؟؟؟؟؟
عارفه الجواب 99وتسعه دايره % هيقولوا انه اهبل
وانا مع الاجابه دى لكن
هيئه الاذاعه البريطانيه ال بى بى سى نظمت للقذافى محاضره فى 2007 لطلبه جامعه اوكسفورد البريطانيه  عبر الدائره المرئيه الفضائيه  واللى زاد الطين بله ان القاعه اتملت طلبه على اخرها وعملوا شاشه كبيره بره القاعه للطلبه الغلابه علشان يلحقوا ركب التقدم بفكر العقيد
وحتى اليابان غزاها الاخ العقيد بفكره والقى محاضره فى جامعه ميجى اليابانيه
وكمان القى محاضره عن الاسلام فى ايطاليا فى 2009 اسفرت عن اسلام 3 ايطاليات
بالذمه ده اسمه كلام ؟؟؟؟؟؟؟؟؟؟؟؟؟
واحد زى القذافى يحاااااااااااااااضر
لا وفين ؟؟ فى بريطانيا واليابان وايطاليا !!!!!!!!!!!
طبعا كل خطابات الفذافى وافعاله وحركاته بتبين انه مريض نفسى بجنون العظمه حتى انه ادى لنفسه لقب ملك ملوك افريقيا
وخصوصا الخطاب الاخير له فى البيت الخربان بتاعه كله كوم والخطاب ده كوم لوحده
انا مش هتكلم عن الخطاب
لان الرئيس اللى بيوصف شعبه بالمقملين والفيران اقل من الكلام عنه !!!!!!!!!
ولكن السؤال
ليه الدول الكبيره دى والمتقدمه دى سابته يحاضر عندها ؟؟؟؟
هل لانهم ارادوا ان يشاهدوا التطور الطبيعى للقرود حسب نظريه التطور ؟؟
ام لانهم ارادوا ان يثبتوا للطلبه انهم متحضرون ودى نوعيه لرئيس دوله عربى لاثبات تخلفنا ؟؟
ام لان القذافى دفع نظير المحاضرات دى والموضوع كله شو ؟؟
ام لانه فعلا عبقرى بشهاده الغرب واحنا اللى برياله ؟؟
ام نحن متقدمون بدليل ان الاهبل عندنا محاضر كبير عندهم ؟؟
ام هم بقى ولا مؤاخذه الصيت ولا الغنى ومن بره هلاهله ومن جوه يعلم الله ..طلعوا ميفهموش فى الباميه خالص ؟؟
ام ان الطلبه دول بيدرسوا علم نفس ودى كانت حاله بيدرسوها ؟؟
اللى يعرف الاجابه يريح اختكم المسكينه فرنسا هانم ويقولى عليها والاجر والثواب على الله

انا اسف ياريس

للاسف الشديد رفع المرتزقه شعار جديد بيقول انا اسف ياريس ومش عارف اسف على ايه لكن اصحاب الثوره المضاده والمنتفعين من النظام رفعوا هذا الشعار فكان لابد لى ان اشاركهم الاسف للريس يمكن ينول العبد لله ولو حتى عشره مريار دورار نصيبى من مسح الجوخ

.....

انا اسف ياريس *** ياريتك طلعت كويس
اسف لانى اتهنت . طول السنين وسكت
اسف لانى امنت .. بعدلك وانت خنت

انا اسف يا ريس *** ياريتك طلعت كويس
اسف ياريس لانى خلاص . عطيتلك بروحى كل الاخلاص
وعطيتنى العادلى الهجاص . ملا قلبى وصدرى رصاص

انا اسف ياريس *** ياريتك طلعت كويس
اسف لانى مقلتش جاى .. سنين طويله معرفشى ازاى
تاكل سيادتك الاكل الهاى .. وعشايى انا كبايه شاى

انا اسف ياريس *** ياريتك طلعت كويس
اسف لانى وصفتك زعيم .. ووصفتنى انت طور وبهيم
عايش انت فى هنا ونعيم .. وعايش انا على عود برسيم

انا اسف ياريس *** ياريتك طلعت كويس
اسف لان كلابك خانونى .. سرقوا مالى وكمان هانونى
وجنابك سيبتهم ياكلونى .. وفى عضمى كمان شاركونى

انا اسف يا ريس *** ياريتك طلعت كويس

ومش اسف لان التار .....بضرب الحديد والنار

جالى لحد باب الدار.... وخلاص مبقيتشى حمار

سجل يا تاريخ

رغم اشتراكى فى مدونه الضاحكون ورغم وجود مدونتى (عبده الرايق ) ورغم اشتراكى فى الفيس بوك الا ان علمى بيوم الثوره يوم 25 يناير شرف لا ادعيه فلم اكن لحقيقه الامر اعرف بهذا اليوم نظرا لابتعادى كثيرا عن عالم التدوين .. الا اننى علمت بالمظاهرات يوم الثلاثاء بعد الظهر وانا فى عملى ولم اتوقع ابدا ماحدث بعد ذلك ..عدت الى منزلى القريب جدا من شارع الجيش او ميدان الاربعين بعد العصر لاجد طريق شارع الجيش مغلق ولابد ان اتخذ طريق الترعه للوصول الى منزلى لم اشاهد شىء وعدت الى المنزل .. بعد اذان المغرب تلقيت عده تليفونات من اصدقائى يحذروننى من النزول الى القهوه التى اجلس عليها يوميا بالقرب من الميدان ولكن هذا التحذير دفعنى الى النزول .. تزلت مسرعا الى شارع صدقى لاجد بعض العاملين معى فى الطريق ..ذهبنا مباشره الى شارع صدقى بعد صلاه العشاء فوجدنا الطريق الى ميدان الاربعين مغلق تماما بالكثير من الجنود فغيرنا مسارنا الى شارع جانبى يؤدى الى الميدان وفعلا وجدت كل السويس هناك شباب يجرى ويصرخ فى الظلام والقنابل المسيله للدموع تنهال على الجميع ..اخذت اقترب كثيرا لاصل الى مقدمه الاحداث ...انه فعلا منظر رهيب ..اننا فى موقف مواجهه مع الشرطه .. سمعنا ان هناك شهدين سقطا فى الاحداث .. وترددت اشاعات ان الشرطه اختطفت فتاه من المتظاهرين .. وجدت نفسى موجه صغيره وسط بحر الشعب ..كان الجميع غاضب .. ظهرت حماسه مقاومه السويس للحصار فى عام 73 .. خبر استشهاد اثنين واختطاف فتاه الهب المدينه .. لم اشاهد هذه الحماسه ابدا منذ عودتى صغيرا الى السويس فى عام 75 وانا ابن 9 سنوات .. عدت مسرعا الى المنزل لاحضر تليفون ابنى لاصور الاحداث لجوده صوره ..وبعد عودتى قمت بتصور بعض المشاهد وتلقيت خبر اصابه عاملين معى ..واحدهما تم نقله الى مستشفى التأمين الصحى بحوض الدرس .انتقلت فورا الى المستشفى فمنعونا من الدخول بعد معرفتهم اننا اتينا لشاب من شباب المظاهرات ..وبعد جدال استمر طويلا تم طردنا الى الخارج الا اننا دخلنا بمعرفتنا الخاصه . وجدنا الشاب مصاب بخمس طلقات من الخرطوش فى رجله وكتفه من الخلف .. وللاسف الشديد امتنع الاطباء فى المستشفى عن عمل اى شىء له !!!!!! .. اننا نعرف انه فى الحروب يداوى الاطباء فى المعارك المصابيين من الاعداء عند اسرهم .. ونحن نعرف ان تجار المخدرات والقتله والخارجين على القانون يعالجون اذا اصيبوا اثناء اعتقالهم ..ولكن هنا ...لم يتم علاج المصاب الا فى اليوم التالى بحجه ان علاجه لا يتم الا بأمر النيابه !!!!! لا اعرف ان كان هذا هو القانون ام قانون الغاب .. وللاسف فى اليوم التالى ونظرا لتحرك الطلقات فى كتف الشاب ورجله تم اجراء جراحه استمرت 5 ساعات تم فيها تقطيع جسده للبحث عن الطلقات

فى اليوم التالى خرجنا للاخذ بالثأر ..اشتعلت السويس ..اشتعل ميدان الاربعين .. اشتعل شارع الجيش ..واشتعلت عيوننا وحلوقنا من القنابل المسيله للدموع .. ( اشهد لك ياشعب السويس البطل )

فى يوم الخميس تكرر الحال ( وللاسف تم احراق مبنى المطافى فى هذا اليوم )

جمعه الغضب ..بعض الصور هنا نظرا لكثافه الاعداد بطول الشارع ونظرا لكثره الاحداث ساستعين معى ببعض شاهدى العيان

كانت جمعه مختلفه ..كانت جمعه النهايه للدوله عندنا فى السويس ..تجمع رجال السويس كلها ..خرجت السويس عن بكره ابيها ..خرج شبابها ورجالها ..بعد الصلاه مباشره تلاقت الامواج امام قسم الاربعين ...هدرت العاصفه واذر الاسود ..واندفعنا الى الحريه فتهاوى امامنا كل شىء تهاوت القنابل المسيله للدموع وانهارت السيارات المصفحه وانهار قسم الاربعين ..انهار الظلم والفساد ..انهار منبع الجريمه لا مانعها ..انهار جنود الامن المركزى واسرعوا يختبئون فى المبانى المجاوره للقسم وتفرقت الاحداث

شاهد عيان :- فى برج الدوشى امام القسم قام شيخ كبير بحمايه مجموعه من فلول الامن المركزى وحث الناس على عدم التعرض لهم وكان الجنود فى حاله يرثى لها فتبرع بعض الشباب الثائرين الذين كانوا يتعقونهم بأحضار طعام لهم حتى ان حرامى ممن كانوا يسرقون المحلات كان يحمل كرتونه معلبات وعندما شاهد المنظر وقف واخرج من الكرتونه بعض المعلبات واعطاها للجنود ( لعل علماء النفس يتحيرون مثلى فى هذا الموقف )

شاهد عيان :- قمنا بحمايه ضابط مباحث الاربعين محمد صابر وانتشلناه من وسط المتظاهرين بعد ان قمنا بعمل كردون حوله لمنع المتظاهرين من الفتك به بعد ان تعاملوا معه بقسوه شديده

شاهد عيان :- تم انتقاء المخبر قنديل بالاسم من قبل المتظاهرين ( نظرا لما كان يقوم به من مصائب فى حق الناس حيث لم يفرق بين كبير وصغير ووصل به الحال الى ربط الناس فى دراجته وسحلهم فى الشوارع ) وتم الهجوم عليه من قبل المتظاهرين وكاد فعلا ان يموت .. بل ان البعض ظنه مات فتركوه

شاهد عيان من قوات الامن :- (هذا الشاهد مهم لانه من معسكر الامن ) لم ننام طوال 4 ايام . كان المتظاهرين بيجوا الظهر ويفضلوا يهدوا فينا للفجر وترجع تانى يوم الكره .قعدنا 4 ايام فى الشارع .اول 3 ايام كان معايا خوذه وصداده لكن يوم الجمعه سلمونى بندقيه ألى و3 خزنات رصاص (اثنان من اخوات هذا المجند كانوا مع المتظاهرين ) بعد ان انهزمنا اختبأت مع مجموعه من زملائى فى برج المبيع الجديد وخلعنا زى الامن المركزى وهربنا بالملابس الداخليه وبعض الناس اعطونا ثياب نهرب بها .وقمت بتسليم سلاحى الى قوات الامن فى شارع شل وهربت بجلدى

شاهد عيان :- 6 من ضباط المباحث فى قسم الاربعين والسويس وفيصل كنا نخبئهم فى منزل احد الضباط فى مدينه السلام لمده 3 ايام وكانوا يستعملون نورا التليفونات خوفا من ان يقوموا باشعال المصابيح فينكشفون

شاهد عيان :- قام الاهالى بحرق جميع معارض تاجر المخدرات صديق المحافظ المدعو ابراهيم فرج سواق التاكسى الذى اصبح من اثرياء السويس بالتجاره المحرمه وصداقه المحافظ الاكثر اجراما فى تاريخ السويس ( صاحب الكاس والنساء ) بعد ان قام بقتل بعض الشباب

شاهد عيان :- اعتلى اثنان من قوات الامن سطح القسم واخذا يقذفان الحجاره الكبيره على المتظاهرين ونجحوا فى ابعادهم لفتره ولكن احد الشباب استولى على السلاح القاذف للقنابل المسيله للدموع وكقناص ماهر من امام مبنى قصر الشوق اطلق عده قنابل على الفردين فنزلا من على سطح القسم ( انقلب الحال المتظاهرين يطلقون القنابل على الشرطه )

شاهد عيان :- اسرنا جنديين فاريين بجوار سينما مصر وكدنا نفتك بهم لولا بكاء احدهم وتوسله لنا ان نتركه فتركناه واوصلناه بعيدا عن المظاهرات

شاهد عيان :- رتبه كبيره فى القسم وربما يكون المأمور قام المتظاهرين باقتياده خارج القسم ونظرا لكبر سنه قال له المتظاهرون لن نضربك سنتركك ولكن بعد ان تخلع ملابسك العسكريه وبالفعل خلع البدله العسكريه فتركوه

واخيرا

واخيرا

واخيرا حرر شعب السويس المدينه من الاحتلال وهربت الشرطه

كاذب من يقول فى وسائل الاعلام من الضباط احنا كان معانا سلاح وكنا ممكن نقمع المظاهره ..كاذب والف كاذب لان شعب السويس الذى دحر اليهود بمدرعاته فى 73 كان قادرا ان يبيد هؤلاء الادعياء كلهم حتى ولو استعملوا كل اسلحتهم ولكن شعب السويس وخاصه بعض كبار السن وبعض العقلاء قاموا بمنع مجزره كامله لكل انواع الشرطه فى المدينه

تحيه وتقدير لكل اهلى فى المدينه الباسله

تحيه وتقدير لكل شعب مصر فى كل المحافظات

تحيه وتقدير لروح الشهداء

جلسه محاكمه العادلى

الحاجب :- القضيه رقم واحد المتهم حبيب ابراهيم العادلى

القاضى :- بسم الله الرحمن الرحيم فتحت الجلسه

سرور :- احمد فتحى مصطفى سرور دكتوراه فى القانون الجنائى جامعه القاهره 79سنه حاضر عن السيد الوزير

القاضى :- اسمها حاضر عن المتهم مفيش هنا وزير

سرور :- اممممممممممم حاضر عن المتهم

النيابه :- اطالب بتوقيع عقوبه الاعدام فى ميدان عام على المتهم نظير ما فعله من خيانه عظمى بحق مصر

سرور :- خيانه ايه وعظمى ايه . خلينا واقعيين وخلينا نتكلم بالعقل والقانون

القاضى :- ياريت يا استاذ تتكلم لما اسألك

سرور :- اصلا على رأى المرحوم كمال الشاذلى الله يرحمه محدش فاهم حاجه

القاضى :- اتفضل يا استاذ قول دفاعك

سرور :- بسم الله الرحمن الرحيم ( يا ايها الذين امنوا ان جاءكم فاسق بنبأ فتبينوا ان تصيبوا قوم بجهاله فتصبحوا على ما فعلتم نادمين ) صدق الله العظيم . سيدى القاضى حضرات المستشارين ان موكلى السيد حبيب العادلى اشهد له بروحى وبشرفى على ولاءه الشديد وحبه الكبير لمصرنا الحبيبه حفظها الله من كل شر واشهد على حرصه التام على كل فرد من شعب مصر العظيم .. سيدى القاضى . ان هؤلاء الشباب المفسدين فى الارض والذين عاثوا فى الارض فسادا يستحقون ان يهلكهم الله بل يستحقون اكثر من ذلك بكثير لانهم مرتدون نعم سيدى القاضى انهم مرتدون على الدين ووجب قتلهم . سيدى الرئيس ان التظاهر بدعه من بدع الغرب .. نعم ان التظاهر بدعه لم تكن موجوده ايام رسول الله صلى الله عليه وسلم كما ان ميدان التحرير لم يكن له وجود ايام رسول الله صلى الله عليه وسلم .. لذلك فانا اقول لسيادتكم ان هؤلاء الشباب المفسدين فى الارض قد قاموا ببدعه وكل بدعه ضلاله وكل ضلاله فى النار ولذلك احق عليهم حكم الرده . وبناء عليه يصبح موكلى السيد حبيب ابراهيم العادلى برىء من ذنبهم براءه الذئب من دم ابن يعقوب ... كما انه قام بمحاربه المرتدين كما حاربهم سيدنا ابو بكر الصديق رضى الله عنه لذلك اقترح من عدالتكم ان نطلق عليه لقب سادس الخلفاء الراشدين

النيابه :- انهم شباب اطهار ابرياء ضحوا بأنفسم فى سبيل الحريه فاطلق عليهم المتهم زبانيته ليقتلوهم ويحرقوهم ويفزعوا اطفالهم ونسائهم .. هذا المتهم هو المسئول الاول عن قتل زهره شباب مصر هو المسئول الاول عن دخول البلطجيه بالخيول والجمال فيما يسمى بموقعه الجمل

سرور :- سيدى القاضى . النيابه تحاول خلط الاوراق فكما هو معروف تاريخيا ان موقعه الجمل كانت ايام الخليفه الرابع على بن ابى طالب كرم الله وجهه بعد مقتل سيدنا عثمان بن عفان . وعليه لايمكن ان تنتسب موقعه الجمل الى زماننا هذا وبناء عليه اطالب بشطب القضيه وتوجيه الشكر الى الرجل العظيم حامى الدين والوطن السيد حبيب العادلى

النيابه :- سيدى الرئيس حضرات المستشارين انا لا افهم ما يقوله الشيخ سرور ولكنى افهم شىء واحدا . دماء الشهداء . واموال المصريين .. سيدى الرئيس لنقل ان مرتب العادلى مليون جنيه شهريا اى ان مرتبه 12 مليون جنيه ولنقل ان المتهم تقاضى مرتبه فور مولده اى انه تقاضى مليون جنيه شهريا منذ بدايه ولادته وبما ان عمره 73 سنه يصبح مجموع مرتبه 876 مليون جنيه وبأضافه الحوافز وبدل عمل نقول الاجمالى مليار جنيه منذ مولده الى الان .... ان ثروه المتهم الان 8 مليار جنيه من اين لك هذا ؟؟؟؟؟؟؟؟؟؟؟؟

سرور :- ياجماعه ياريت نفهم احنا بنقول ايه .. وبلاش نرمى الناس الابرياء بالتهم الجزافيه ..ان موكلى حاصل على نوط الامتياز من رئيس الجمهوريه عام 86 و97 وهذا النوط هو تجاره رابحه تدر الكثير من الربح الحلال خالصا لوجه الله لذلك ارجو ان نكون واقعيين ولا نرمى الحق بالباطل حتى لايضيع الحق بيننا

الرايق :- نو نو نو وى ار دونت يضحك علينا اجيين ايون احنا مش هينضحك علينا تانى

القاضى :- انت مين ؟؟؟؟؟ ومين اذنك تتكلم ؟؟؟؟

الرايق :- اوه ماى فرند القاضى .. انا صوت ضايع من زمااان .. يييس ورحمه ابويا يييس انا صوت ضايع من زمان .. الاستاذ سرور ده رأس الحراميه هو مطبخ القوانين هو اللى ضييع مصر هو اللى رجعنا وراء سيدى القاضى اطالب بمحاكمه فتحى سرور وصفوت الشريف وزكريا عزمى .. ماى فرند القاضى وى ار لازم نمسك رأس الحيه مبارك وجمال وعلاء وسرور والشريف وعزمى مع كبش الفداء احمد العز .. ماى فرند القاضى لازم نسابق الزمن ..ماى فرند القاضى لو كنت موجود عندنا فى السويس يوم التلات والاربع والخميس والجمعه كنت هتسمع بودانك شباب السويس وهو بيقول احنا طلعنا اليهود مش هنقدر نطلع ولاد الكلب دول .. والله العظيم سمعتها بودانى وانا فى وسط المظاهره قبل ما يرموا جنبى اكتر من قنبله من قنابلهم المسمومه اقسم بالله انى بقيت زى الغريق فى وسط البحر نااااااااااااااااااااااااااار وشطه فى وجههى وفى حلقى وفى عينى سيل من الدموع ... ماى فرند القاضى سرع ..وحياه يوور فاذر سرع .. دول بيرتبوا ازاى يهربوا بفلوسنا ويمحوا جرايمهم