الجمعة، ديسمبر 17، 2010

وعلى رأى المثل

عبده الرايق :- ما تروحى يا بت يا حنين تستلفى لنا من جارتنا ام شوشو دكر بط نعمل بيه الموسم

حنين:- لا يا بابا مش رايحة (دى مفيش حاجة تيجى من الغرب تسر القلب)

وبعدين ما تفك عن كيسك يا بابا وتنزل تجيب لنا فرخة بيضة ولا حتى لحمة من بتاعة القوات المسلحة دول بيقولوا الكيلو فيها ب35 جنية بس

عبده الرايق:- كل ده علشان جبت لكم ربع كيلو بسبوسة الشهر اللى فات صحيح (المال السايب يعلم السرقة)
واد يا خالد يا خالد تعالى انت يا ضنايا روح لخالتك ام شوشو استلف لنا منها دكر البط وانا هجيب لك شبشب بصابع هدية فى عيد رأس السنة القمرية

خالد:- لا يا عم السنة اللى فاتت قلت لى هتجيب لى كرة بنج بونج علشان اعملها سندوتش مجبتش لا يا عم( يا نحلة لا تقرصينى ولا عاوز عسل منك)

يعنى اعمل ايه ابعت امكم ولا ابعت مين

شوف صبرنى نايمة جوه بقالها 3 ايام وابنك التانى مش عارف مش باين فى الشقة قال يعنى الشقة كبيرة اوى شوفه مرمى فى اى جحر
الرايق :- صحيح ما هو (ما ضيق الزريبة إلا على الحمارة الغريبة)

فرنسا من بعيد :- اعااااااا اعااااااا بنقول على مين حمارة يا رجل انت دا انت وولادك ينفات لكم بلاد
يا ستى انا لا شتمت ولا يحزنون صحيح (ياما فى الحبس مظاليم)
وبعدين هو محدش راضى يروح يستلف ليه من الجيران دكر البط

فرنسا :- عيال حسيسة عندهم دم مش زى ناس (واللى يعمل يا خويا ضهرة صندرة يستحمل بقى الدوس) والله خايفة ولادك تتشرب منك وتبقى (فولة واتقسمت نصين) هو انتم بيحوء فيكم حاجة صحيح (جوه وبرة فرشت لك وانت يا مايل و مين يعدلك)

الرايق :- هتفضلى تردحى لى كثير كدة بدل ما تشمللى وتروحى تجيبى دكر البط صحيح قلة الاصل متوفرة (خد الاصيلة لو على حصيرة)

فرنسا : شوفوا الراجل العايب اقوله ايه يقول لى ايه يعنى هو احنا لما مش عاوزين نشحت من حد يبقى كدة اجرمنا
(غلبت احايل فيك والطبع فيك غالب وديل الكلب عمرة ما يتعدل لو علقوا فية قالب)

الرايق :- انتوا فاكرين انى بشحت علشان مش معايا نو نيفر بت انا بعتبرة فن الشحاتة فن ومحتاج دراسة وقدرة على الاقناع وهتشوفوا هنجيب الدكر ده ولا لا واللى فى طبع صعب يبطله (يموت الزمار يا فرنسا و سنانة بتلعب قصدى صوابعة بتلعب)

الطائر :- ايه الدوشة دى صوتكم جايب لفوق سطوح الجيران
فرنسا :- ابوك عاوز يستلف من الجيران بط
الطائر : اللى اعرفة من ايام زمان اللى بيستلف حاجة بيرجعها وانت هترجع بقى دكر البط ايه عظم فى قفة (على اد لحافك مد رجليك يا والدى)

الرايق :- نقطنا بسكاتك يا خويا انت ايه اللى نزلك من السطوح ولا اقول لك روحى صحى لى اختك صبرنى (الطائر بصوت واطى مقدرش على الحمار هيتشطر على البردعة)
الطائر :- صبرنى صبرنى قومى قومى ابوكى عاوزك
صبرنى :- هو الواحد ميعرفش يرتاح فى البيت ده شوية دا انتم عيلة (ينفات لكم بلاد) ايوة يا بابى
الرايق:- تعالى يا حبيبتى انتى اللى بجيب لك كل حاجة وانت اللى هتسمعى كلامى
صبرنى:- انت بتقول الكلام ده ليا انا انت بتجيب لى انا (صبرنى فى سرها افتكر لك ايه يا بصلة غير كل قطمة بدمعة)
الرايق :- شوفى يا صبرنى لو استلفتى لنا دكر البط من عند الجيران هجيب لك الصندل اللى بيزمر اللى كان نفسك فيه لما اخذتى الابتدائية من 15 سنة (صبرنى فى صوت مسموع شوية عشمنى بالحلق خرمت انا ودانى)

صبرنى:- قالت طيب انا هروح بس علشان تعرفوا انى مش بخاف من حد
سابت الباب مفتوح وراها وخبطت على طنطها ام شوشو وقالت لها
بكل ادب واحترام وذوق ممكن يا طنط دكر بط سلف لحد ما بابا يقبض مكافاة خروجة على المعاش
ام شوشو وبنتها بيضحكوا ضحكة خبيثة وقالوا ومالوا يا حبيبتى وكمان معاها الحلة اللى هتسوه فيها

ورجعت صبرنى بكل ظفر و انتصار فستحظى بصندل هيزمر بعد صبر 15 سنة وقالت فى زهو المنتصر (ما يجيبها الا رجالها)

الرايق بخبث :- شفتم وسائل الاقناع هو ده اللى عاوزكم تتعلموا وصحيح (اللى يتكسف من بنت عمه ما يتستلفش منها ريال)

يلا خدى يا ماى وايف يا حبيبتى اعملى لنا دكر البط ده
فرنسا : هقوم اعملة مع انى عارفة (مهما عملت مش عاجب وان رضيت العين يغضب الحاجب)
وشمرت عن ساعد الجد و ضغطت على سنانها ونتعت الحلة بالبطة ودخلت على المطبخ
خرطت البصل وجهزت التوابل اللى راكناها ايوة كدة يا بت يا فرنسا وريهم نفسك فتحت الحلة وبعدين راحت رئعة ميت صوت حيانى
هرع الكل لها
هى دى البطة يا فالح انت وعيالك
دى البطة موقوذة ومتردية ونطيحة وكمان اكلها السبع تقرب وتشم دى كما ميتة ومنتنة
و انا اقول الوليه ام شوشو الناقصة دى على غير عادتها اديتكم البطة بالساهل
(ما هو لو مكنش فيه الخير مكنش رماه الطير) و (الحاجة اللى ماتهمك وصى عليها جوز أمك)

الرايق مذهوق وأسقط فى يدة
(جوعة علي جوعة بقت الصبية زعزوعة)

فرنسا : (هو كدة المنحوس منحوس ولو علقوا على رأسة فانوس)
خالد:( جت الحزينة تفرح ملقتلهاش مطرح)
صبرنى : هقوم اعمل جبنة قديمة ومش (جبنتك القديمة تغنيك عن اكل الحمير قصدى حمارتك العارجة تغنيك عن سؤال اللئيم)

الطائر : هقول لكم حاجة وقولوا ورايا
(يادي الشيلة يادي الحطة روحنا علي جمل ورجعنا علي قطة)
القوم من وراه
يادي الشيلة يادي الحطة روحنا علي جمل ورجعنا علي قطة
يادي الشيلة يادي الحطة روحنا علي جمل ورجعنا علي قطة


هناك 12 تعليقًا:

مدونه ما كفايه بقى يقول...

هههههههههههههههههههههههههههههههه

مش قادره ابطل ضحك والله العظيم
مع انى مليش نفس أضحك دلوقتى خالص طب اللى جنبى يقولوا ايه عليا دلوقتى ؟

اضحك الله سنك

حمدا على سلامتك

بقالك كتير مكتبتش جديد


يلا عودا حميدا ويا رب تكون اخر مره تغيب كده

تحات لك وأطيب الامنيات لك

غير معرف يقول...

السلام عليكمورحمة الله وبركاته


بجدضحكت من قلبى امثال تحفه لكل الباقه الرائعة المشتركه فى التدوينه دى والمدونة كلها

وفيها عبره لمن لا يعتبر

بس نفسى اقول حاجة

هو لسه فى سلف فى الايام دى

مع ارتفاع الاسعار بصورة همجيه وعدم زيادة الاجور بنفس الصورة الهمجيه

اعاننا الله على العيشه والى فيها

ومرة تانيه بوست غايه فى لروعه
طبعا مش جديد على مجموعة الضاحكون

فكلهم يتمتعون بخفة ظل ليس لها مثيل

تحياتى لهم جميعا

حاجات جوايا يقول...

ايه المفاجآت الحلوة دى
حمدا لله على سلامتكم جميعا وسلامة مدونة الضاحكون بعد غيااااااااااااب

خليكوا معانا دايما
متغيبوش تااااااااااانى

صيدلانيه طالعه نازله يقول...

هههههههههههههههههههه
شويه امثال فى الجووووووووووون
مش عارفه ابطل ضحك
كل سنه و انتوا طيبين و بخير
و تعيشوا وتاخدوا غيرها
و ياريت متغيبوش تانى بقى

سلام يا احلى ناس

Maha Shahen يقول...

هههههههههههههههه
ينفع مسلسل كوميدى والله
دمك زى السكر دايما
حسيت انى فى مسابقه للامثال الشعبيه
بس بجد موضوع هايل روعه روعه والله

abdo يقول...

السلام عليكم
ايه ياعم موسوعة الأمثال الشعبية دى كلها .
جميله جدا أضحك الله سنك

Dr Ibrahim يقول...

بـــ ألف هنا وشفا :)

همس الاحباب يقول...

على راى المثل
من طلع من داره تقل مقداره
واحنا اولنا واخرنا للضاحكون
تسلم الايادى يا ايهاب وفيك الخير انك رجعتنا تانى للضاحكون
كل سنة وانتم بخير جميعا

Magia da Inês يقول...

♫°° Amiga,

°º♫ Para você em 2011:

° • ♫ "Os sonhos realizados...
°º ♫°° ♫♫ O amor esperado...
° ·. •*• ♫ A esperança renovada..."

Bj♥s
Brasil °º♫
°º
° ·.

bastokka طهقانة يقول...

ما ضيق الزريبة إلا على الحمارة الغريبة
ههههههههههه
بتجيبه الامثال دي منين
جميلة قوي يسلم كيبوردك

مدونات من اجل التغيير يقول...

جميله جدا المدونه
الله يعطيك العافيه




يشرفنا تواجدك معنا في تجمعنا الجديد مدونات من اجل التغيير

shimaa elkholy يقول...

يا لهووووي
صندل بيزمر هههههههههههههههههههه

تسلم اديك يا فندم بجد الضاحكون وحشتنى