السلطانيه ... تاج مدير الانتاج

حنين القلب وعبده الرايق .... الان موعدنا مع حلقه جديده من عيله تجنن ..بعنوان ..السلطانيه ...تاج مدير الانتاج

صبرنى يارب :- الحق يا بابا الحق يا خالد الحق يا طائر الحقى يا ماما

الرايق :- ايه يا وش السعد انتى ؟؟؟؟ واات هابن ؟؟؟

صبرنى يارب :- مش وقت لغات يا رايق .. الحقوا فى ناس كتير داخله العماره ونسوان ماسكين اختى حنين القلب ومكتفينها ووراهم رجاله كتير وعيال

الرايق :- حنييييين القلب ...حنييييييين القلب ... حنيييين القلب ... انا معرفهاش ... مش فاكر سمعت فين الاسم ده قبل كده .. دى ممثله امريكيه من هللليوود ؟؟؟؟

همس الاحباب :- ممثله مين يا رايق ؟؟؟ دى بنتك حنين القلب .. اروح افتح الباب اشوف ايه المصيبه دى كمان

ويفتح همس الاحباب الباب فيتدافع النسوه الى الدخول ممسكين بتلاتيب المسكينه حنين القلب وهى تصرخ وتقول

حنين القلب :- اوعوا .. سييييييييبونى .. على الطلاق بالتلاته ماهسيبه ... سيبوووووووووونى على الطلاق لشرحه ...محدش ليه دعوه بيه ..انا مش عايزه حاجه من الدنيا .. انا هشرحه انا هقطعه ..عليا الطلاق ماهسيبه

شخص ما :- بنتكم دى يا حاج ؟؟؟؟

الرايق :- مش عارف يابنى .. المنظر ده شفته قبل كده لكن فييييييييييييين ؟؟؟؟؟؟؟؟

الطائر الحزين :- ايوه بنتنا ..فى ايه ؟؟ لو سمحتى يا ست انتى وهى سيبوها

سيده ما :- اهى عندك بس خلوا بالكم منها ... دى مسلحه

الرايق :- مسلحه ؟؟؟؟؟؟ نو نو نو ...دلوقتى يجى عمنا البردعى ويفتش البيت طوبه طوبه

فرنسا هانم :- متشكرين يا جماعه .. محدش يروحلكم فى حاجه وحشه .. مع الف سلامه

الرايق :- اقفلى الباب ده يا بت يا صبرنى يارب ..وانتى يا مقصوفه الرقبه تعالى هنا وقوليلى فى ايه

همس الاحباب :- فى ايه يا حنين وايه حكايه مسلحه دى ؟؟

حنين القلب :-محدش له دعوه بيا .. انا هاخد حقى بايدى .. عليا الطلاق بالتلاته لشرحه

همس الاحباب :- طلاق من مين يا حسره

حنين القلب :- بافتراض ما سيكون يا فالح ... انت فاكر انى هقعد كده على طول ؟؟؟

الطائر الحزين :- وايه حكايه السلاح ده ؟؟

حنين القلب :- لا ولايكون عندك اى قلق ... دى فرده بازوكا .. ودى سنجه ..ودى مطواه قرن غزال ..ودى بشله ..ودى ...

الرايق :- انا برضه كنت حاسس ان انتى حنين القلب بنت الهواره

فرنسا هانم :- ايه الحكايه ؟؟ ومين اللى هتشرحييه ده ؟؟

حنين القلب :- مدير الانتاج .. ايوه الاستاذ باشا مدير الانتاج فاكر ان انا وزمايلى لقمه طريه .. زى العيش الفينو .. تتصوروا يا ساده يا كرام فى كل انحاء الشقه ... ان مدير الانتاج عايز يدينا ارباح سنويه 400 جنيه

الرايق :- نو نو نو .. انا سامع ان الاشركه بتاعتكم حققت ارباح السنه دى بمبلغ 115 مليون جند ..وكل جند ينطح جند

حنين القلب :- ماهى دى المشكله يا رايق ... الشركه بتاعتنا باعت ملابس جاهزه وكسبت اكتر من 115 مليون جنيه ومفروض احنا ارباحنا تكون 2300 جنيه على الاقل لكل واحد ..لكن السيد باشا مدير الانتاج بيدى كل واحد فينا 400 وهما كل بندوم فيهم هبر فى كرشه 40 الف جنيه لوحده .. ده ظلم ولا مش ظلم .. انطق يا رايق ده ظلم ولا مش ظلم

الرايق :- بس ابعدى عنى السلاح ده ... لحسن السلاح يطول .. وبعدين ده ظلم يا فندم.. ايه الرعب ده ؟؟ فى ايه يا بنت ؟؟؟

الطائر الحزين :- للاسف فى فجوه كبيره بين حقوق العمال والمستثمرين فى الشركات الخاصه وللاسف مفيش قانون قادر يظبط الحكايه دى

حنين القلب :- لالالالالالالالالا ..قانون مين انا خدت حقى بايدى وبدراعى

فرنسا هانم :- ازاى ؟؟؟

حنين القلب :- دخلت على المدير وبكل شجاعه زمجرت زى النمر وزائرت زى الاسد ..وبصين له زى التعلب وقلت له .. انا بنت مبتاكلش على قفايا ...لالالالالالالا .. انا عايزه حقى ..انا مش هسيب حقى ..انا ليا ارباح ب 2300 جنيه انا هشتكيكم ..انا مش لقمه طريه

الرايق :- جدعه يا بت يا حنين طالعه لابوكى وجدك الرايق الكبير ... ها وبعدين اخدتى ال 2300 جند

جنين القلب :- بلاش نتكلم فى الموضوع ده دلوقتى يا رايق

الطائر الحزين :- ايه يا حنين خدتى حقك انتى وزمايلكم ولا لا ؟؟؟

حنين القلب :- بصراحه انا لوحدى اللى خدت

همس الاحباب :- ها خدتى ال 2300 جنيه

حنين القلب :- لا يابو وش حلو .. خدت يومين خصم من مرتبى .. ونزلوا الارباح بتاعتى ل 250 جنيه بس

***************

مع تحيات اسره فريق العمل

بمدونه الضاحكون

رايقالدو بطل العالم

عبده الرايق ... يدق جرس الباب بمنزل الدكاتره الكبير عبده الرايق ..فتسرع بواب العيله وكتكوتتها حنين القلب لفتح الباب ..فتجد رجل يحمل اكثر من عشرين بالونه منفوخه ولا يظهر من
خلف البلونات ..فتقول له

حنين القلب :- انت ايه اللى مطلعك هنا ... مش عاوزين نشترى نفافيخ ..معندناش عيال صغيره

الرايق :- اوعى من طريقى يا مقصوفه الرقبه .. جو جو جو ...اوعى من على الدور (الباب )

فرنسا هانم :- ايوه كده اظهر وبان وعليك الامان ... انا برضه كنت بقول كده .. الناس كلها بتكبر وتعقل ..وانت ياحسره بتكبر وتصغر

الرايق :- شط ااب يور ماوس ... كلوز يور بق يا متخلفه انتى .. انا الحق عليا انى اتجوزتك يا متخلفه .. انا كان قدامى بوسى ونورا وشريهان ومارين مونرو وزينات صدقى ونجاه الصغيره والكبيره كمان وكانوا مستعدين يقسموا نفسهم مجموعتين كل مجموعه باربعه واتجوزهم واكون الحاج متولى الرايق

فرنسا هانم :- ههههههههه ... انا برضه كنت حاسه انى اتجوزت عيل .. كده بقى انا اتأكدت

همس الاحباب :- ماما .... عيب كده ..الرايق برضه والدنا العزيز ..مهما كان ومهما عمل ... يالا بقى يا رايق خش اوضتك وانا هاروح اجيبلك مصاصه وحب العزيز وكاراتيه واجى

الطائر الحزين :- ايه يا جماعه فى ايه ؟؟؟ ليه المعامله دى للرايق ؟؟؟ لالالالالالالا انا طبعا ارفض المعامله دى .. ولا يهمك يا رووقه روح اغسل رجلك علشان تشرب اللبن وتنام

صبرنى يارب :- تعالى هنا يا بابا ... الناس دول كوخه ...ووحشيين ..تعالى ورينا ايدك ..ادى البيضه ..وادى اللى سلقها ..وادى اللى قشرها ..وادى اللى اكلها همهمهمهمهمهم

الرايق :- بيضه ايه يا ملحوسه انتى وهو وهو وهى وهى ..انا الدكاتره الكبير عبده باشا الرايق ..سليل اسره الملك الكبير محمد باشا فوزى على سن ورمح .. انا التاريخ والجغرافيا يا بشر .. انا الدراسات كلها بملف الانجاز والخرايط كمان

حنين القلب :- هدى نفسك يا بابا ... سيبك منهم ..دول غيرانين منك ..كبه كده منك ليها ليه .. موتوا بغيظكم .. تعالى يا بابا نلعب سوا .. انت تحدفلى وانا احدفلك

الرايق :- انتم اصلا كلكم وش فقر .. انا على وش ملايين يا بشر

فرنسا هانم :- يووووووووووووووه ... انت تاااااااااااااااانى يا رايق ... اقوم اشوف اللى ورايا فى المطبخ احسن من وجع المصارين ده

الرايق :- يلا اتسحبوا واحد وراء التانى ... ماهو انت وش فقر ومش متعودين على النعمه

همس الاحباب :- ماهو يا رايق انت بصراحه خليتها خل خالص ... يا راجل انا جانى الزهايمر وانا فى عز شبابى بسببك

الطائر الحزين :- استنى يا خالد لما نشوف ايه الحكايه .. تعالى يا فرنسا واقعدى لما نعرف القصه ... ها يا رايق ايه بقى الحكايه ؟؟

الرايق :- طيب صلوا على النبى

الجميع فى صوت واحد عليه افضل الصلاه والسلام

الرايق :- من غير لا ضحك ولا تريقه .. انا لما اتعصب مش هاعرف نفسى

همس الاحباب :- قول يا بابا محدش هيتريق

الرايق :- القصه يا ولاد انى خلاص ...على وش الملايين ..ومش جند مصرى ...نو نو نو .. ده استرينى ودورر ويورو كمان .. انا خلاص هادخل المجد من اوسع ابوابه

فرنسا هانم :- ياما جاب الغراب لامه

الرايق :- سكتوا الحيزبونه دى ... سكتوا حفيده شجره الدر ..وسلاله ام اربعه واربعين

الطائر الحزين :- من فضلك استنى يا ماما ... قول يا رايق

الرايق :- انهارده الواد الجهبز ..العلامه الكبير حسن باشا الفراش وهو بيكنس الارض فى الحى ..كان فيه علبه كانز فاضيه .. وانا كنت قاعد على السلم مكانى ..وفجأه لقيت العلبه دى جايه تتدحرج على السلم ..رحت شايطها بكعب رجلى ......

همس الاحباب :- ها وبعدين ...سكت ليه يا رايق

الرايق :- لا بعدين ولا قبلين .. الواد الجهبز حسن باشا الفراش الله يستره .. بصلى وقالى ... ايه الحلاوه دى يا رايقالدو .. رحت انا قلت له انت اللى 60 الدو ..راح قالى .يا رايق انت موهوب بجد ...انت احسن من رورالدو بتاع البرازيل واحسن من ابو تريكه بتاع الزمالك واجدع من كاكا وبليه ..انت موهوب يا رايق ..انت احرف من محمود شحاته وحسن الخطيب ذات نفسه ... وبعدين قالى انت لازم من الاسبوع الجاى نبيعك لاسبانيا تروح لبرشلونه او ريار مدريد او بلد الوليد الصغير... انا قلت له ..طيب اعمل ايه يا حسن باشا ؟ ...قالى هات 20 نفيخه واقعد اتدرب بيهم فى البيت وانا هاكون وكيل اعمالك وهابيعك ب 95 مليون جند استرينى

حنين القلب :- وهتجيبلى عريس يا بابا ؟؟؟

الرايق :- ايوه طبعا يا حبيبتى ..هاجيبلك عشر عرسان ليهم ايدين ورجلين وعنين ومنخاير زينا مش العرسان الكسر اللى كانوا بيجولك

حنين القلب :- لا يا بابا عشره كتير ... هات تسعه بس وانا انقى براحتى

الرايق :- بنت يا حنين .. فين الناس ؟؟ فين فرنسا والطائر وهمس وصبرنى

حنين القلب :- والنبى ما اكلتهم يا بابا ..حتى بص بقى

الرايق :- هى دى عادتهم .. اكلمهم كلام لمصلحتهم وهما يسيبونى ويمشوا .. عموما ولا يهمنى كاس القارات شغال ويمكن اتدرب والحق الفاينال

**********

مع تحيات فريق العمل بمدونه

الضاحكون

اوباما .. عريس الهنا

همس الاحباب .. والان اعزائى المشاهدين موعدنا مع المسلسل الكوميدى عيله تجنن
*********

طاخ طيخ طووووووخ.. بوووووووووم طييييييييخ طاااااااااااااااخ

الرايق :-مين الجربان اللى بيخبط بايده ورجله ده ؟... بت يا حنين شوفى مين المجنوون اللى على الباب ..وهاتى عصايه الغليه بسرعه

حنين القلب :- هو فى غيره المحروس بسلامته ابنك همس الاحباب ...جاااى بزعابيبه زى امشير

همس الاحباب :-ايه فى ايه ؟؟ ساعة واقف على الباب ما تفتحى بسرعة يا مقصوفة الرقبة

الرايق :- انت ياض مش بالراحة على الباب؟؟؟ مسروع على ايه ؟؟؟هتكسر الباب

همس الاحباب : يا عم انت محسسنى انه باب التوبه ... وبعدين انا عندى خبر بمليون دولار ..لا مليون ايه ؟؟ ده خبر بعشره وتلاتين مليون دولار
حنين القلب :-والله وبقينا بنتكلم بالملايين ... خير يا سبع الرجال جبت الديب من ديله

الرايق :- ديب ايه !!!؟؟؟ هو فييين .. مافيش غير حرمنا المصون فرنسا هانم كعب الغزال

همس الاحباب :- اااااه الاول اخد نفسى اجرى يا بت يا حنين هاتى 15 جركن عصير مانجه و15 بيضة و2 كيلو لحمة و5 فرخيات من فصيله الديصنانور علشان ابل ريقى واخد نفسى واقولكم على الخبر

الرايق :- ههههههه ..ديصنانور ...الله يرحم جدك الرايق الكبير ...اسمه ديصانور يا ولد .. وبعدين ايه 15 جركن عصير مانجه ؟؟ انت فاتح عصاره فى بطنك ؟؟؟

حنين القلب :- من يومه مفقوع يا بابتى وهو فى بطن امه .

فرنسا هانم :- فكرتينى يا بت يا حنين انا و حامل فيه كنت اروح عند اى حد يسألنى تشربى شاى ولا ساقع يا فرنسا ؟ اقولهم الحقونى بالاكل بسرعه ...كان فاضحنى فى كل حته ...وفى الاخر نزل وزنه نص كيلو

همس الاحباب :- على اساس انى فار مسلوخ يا مامتى ؟؟؟ أومال الاكل ا للى اكلته راح فين؟؟؟ فى بطن القطة مثلا ؟؟

الرايق :- قولى يا قطة قصدى يا همس يا حبييى ايه الخبر اللى جاااااى مسروع عليه

همس الاحباب :- خبر ايه !!!؟؟؟ هوانا قلت انى جايب اخبار؟؟؟؟

حنين القلب :- صباح الزهايمر بالمخلل ما تفوق ياض وسيبك من عرق السوس اللى بتشربه ده

همس الاحباب :- ااااه افتكرت انا جايب عريس لحنين القلب بس مش هقولكم هو ميييين !!؟؟

حنين القلب :- عرييييييييييييييس؟؟؟؟؟؟؟؟؟ ...هييييييييييييييييه ...عريس بجد ؟؟؟ لحم ودم زينا كده يا واد يا همس ؟؟؟ يا بوى مين يا همس يا خويا يا حبيبى مييين !!؟؟؟

همس الاحباب :- اخوكى وحبيبك دلوقتى؟؟؟ جاكى خوت فى نافوخك اليمين والشمال ... من شوية كنت ياض

حنين القلب :- عديها يا عم عيلة وغلطت ..وبعدين طالما فيها عريس ..يبقى انا الياض والبت وانا كل حاجه ..وان كان ليك عند الباشا حاجه قوله يا بشبوشتى

همس الاحباب : اممممممم ماشى بقولك ايه يا بشبوشتى قلعينى الجزمة والشراب وهاتى الشبشب ابو صباع،وهاتى اللى قولتلك عليه علشان اخد نفسى ده عريس يا هبلة .

حنين القلب :- نهارك زى شعر راسك... ابيض وزى الفل ( بكل غيظ ) اممممم حاضر يا خويا يا ابن امى وابويا .

الرايق :- ما تقول ياض وتخلص انت شغال تتنى وتتفرد زى المكواة الرجل كده ليه .

حنين القلب :- لا والنبى يا رايق ... الا همس حبيبى ... محدش يزعله ولا يقوله ياض

همس الاحباب :- بلاش انت يا رايق لانك لو عرفت العريس هتقوم تبوسنى واحتمال ترمينى من الشباك من الفرحة

الطائر الحزين :- ليه يا عم همس انت جايب جاك شيراك عريس

الرايق :- واد يا طائر ميين جاك شيراك ده قريب صلاح الدين الابنودى

همس الاحباب :- ايووون... صح هو قريب الابنودى اللى حرر عزبة النخل وضمها على صفط اللبن

الرايق :- شت اب يور ماوس انا الدكاترة عبده باشا الرايق حفيد سلالة الرايق اسطورة التاريخ والفاصوليا البيضاء ..ايه اللى جاب عزبه النخل لصفط اللبن يا متخلف دى فى قاره اسيا ودى فى افريقيا

حنين القلب :- بس بقى لا اسيا ولا باسيا ...عايزين نعرف ميين العريس وجااااى امتى عايزة اتجوز يا بشر ..

همس الاحباب :- بصوا يا عيلة الرايق انا كنت قاعد على القهوة بشرب شاى فتله ..سكر بره

الرايق :- عارفه وشربتوا كتير .. شاى بره .. سكر فتله ده ..وكل مره بشربه بطنى بتوجعنى وبيجيلى مغص من الفتله
همس الاحباب :- هو انت كنت بتشرب الفتله يا رايق .؟؟؟ المهم وانا قاعد على القهوة وبشرب شاى فتله .. سكر برة

حنين القلب:- يا دى النيلة عرفنا انك بتشرب شاى فتله وبعده معلقة سكر مش بتحب الاختلاط بين الجنسين خلصنا بقى ... ادخل على المفيد

همس الاحباب :- المهم وانا قاعد على القهوة وبشرب شاى فتلة سكر بره لقيت واحد محترم كده قاعد جنبى لابس جلابية و كاب وكوتشى اميجو بينور

صبرنى يا رب :- جلابية وكاب وكوتشى اميجو بينور؟؟؟؟ اه اكيد العجل فى بطن امه .. وتلاقيه سارق كهربا للكوتشى كمان

همس الاحباب :- بلاش ظلم يا صبرنى يارب انا شايف بعينى العداد بتاع الكهربا ..المهم الراجل كان بيتكلم ايطالى وبيقول ليدز اند جنتل مين.... انا بقى سألت القهوجى رجب حوش صاحبك عنى وقولتله قصده مين بجنتل من الراجل ده؟؟؟ قالى يا استاذ همس ده قصده حضرتك قولتله لا كده حفر قبره بايده اهو هو وعيلته واللى يشددوله اللى جنتل من... احنا عيال شبيحة وما ياكلوش معانا الكلام ده ،قام رجب حوش صاحبك عنى قالى .. انت مش عارف مين ده اللى بيكلمك يا استاذ همس ؟؟؟ انا قلت لا مش عارف هيكون مين يعنى شوكت اباظه ولا فتحي كاريوكا !!؟؟ قالى . لايا عم مش رشدى اباظه ولا تحية كاريوكا ده اوباما رئيس الولايات المتحدة

الرايق :- اوباااااااااااما ..اوبااااااااما .... نو نو نو ماكنشى عندنا حد فى التاريخ اسمه اوباما رئيس الولايات المتحده الامريكيه

حنين القلب :- ما تشغلش تفكيرك يا بابتى انت ياض يا همس قصر ولم المتكسر وبلاش تسرح بينا

همس الاحباب : اسرح بيكى على اساس انك توكه ولا بنسه شعر ولا فلايا بتنزل الحشرات ، يا بنتى بقولك انا كنت قاعد مع اوباما على القهوة وطلبتله شيشة قص وبقوله تشرب ايه قالى تى فى الفيفتى
يعنى شاى فى الخمسينة يا جاهلة يبقى اوباما ولا مرات ابوه

فرنسا هانم : هو شرب قص وشاى فى الفيفتى يبقى اوباما ابن ام اوباما

همس الاحباب : المهم قعد جنبى يشكيلى من عياله ومراته وانه عايز يتجوز من مصر فقلت ما فيش غير اختى حبيبتى حنين هى اللى هتطلع من عينيه كل اللى عملته امريكا فينا واديته السى فى بتاعها ولما عرف انها اختى طبعا وافق على طول وجاااااااى يوم الخميس بعد صلاة الجمعة علشان يخطبها من الرايق ايه رايكم فى العريس

حنين القلب :- انت متاكد من كلامك ياض انه اوباما ولا بتشتغلنى زى عوايدك ؟؟؟.

همس الاحباب :- ان شاء الله اعدمك لوكنت بشتغلك يا حنين

الرايق :- لو كان كده عايزين نفرض شروطنا اااه اللى اوله شرط اخره نور وبعدين هيتجوز حنين اخر العنقود سكر معقود

الطائر الحزين :- شروط مين يا رايق انت بتحلم ..انا كلام الواد همس ده مش نازلى من زور ...ده اوباما يا بشر


همس الاحباب :- وايه يعنى يا طائر لو كان هو اوباما فده الدكاترة عبده الرايق وماتنساش انى عزمته على شاى وحجر قص 2.50 كان زمانه بيغسل الشيش فى القهوة وبيكرس للزباين .

الرايق :- طب يا اولاد ايه رايكم نعمل قايمة ووصل امانة احنا لازمن نضمن حق وليتنا قبل ما تنضم لولاياته

همس الاحباب :- اه طبعا بس قايمة ايه هى بنتك حيلتها حاجة اصلا احسن حاجة يعمل تنازل عن 25 ولاية كمقدم صداق والمؤخر تنازل عن 25 ولاية ويبقى احنا كده طبقنا الشرع عليه .

يوم الخميس بعد صلاة الجمعة همس نزل القهوة علشان يجيب العريس والرايق والعيلة بيظبطوا البيت وبيجهزوا نفسهم

حنين القلب :- ما تزوقينى يا ماما قوام يا ماما ده اوباما هياخدنى بالسلامة

الرايق : - عايز نظام يا ولاد عايز برستيجى قدام اوباما

حنين القلب : الباب بيخبط حد يفتح بسرعة عريسى جه بالسلامة

همس الاحباب :- يا ساتر اتفضل يا مستر اوباما ما حدش كاشف راسه غير الر ايق ودى منها للسماء دايما

صبرنى يا رب : ميييين ده !!!!!؟؟؟ ده تؤام مرسى ابن ام مرسى

الرايق : مرسى !! أومال فيين اوباما !!!؟؟

همس الاحباب : اوباما سافر امريكا جبتلكم رجب شيشة الشهير باوباما المصرى

******************

مع تحيات فريق العمل بمدونه

الضاحكون

قناه الضاحكون الفدائيه ..البرامج التعليميه

تحديث هااااااام
************
الى كل اعضاء الفريق والى كل الاصدقاء الاعزاء مر عام كامل على انطلاق مدونه الضاحكون 8 - 6 -2008
فكل عام وانتم بخير
فرنسا هانم
***************
عبده الرايق ..والان اعزائى المشاهدين والمشاهدات فى كل انحاء العالم من البساتين الى بين السرايات موعدكم مع البرامج التعليميه

همس الاحباب :- الو... ايوه يا حنين ازيك

حنين القلب :- ايوه يا خالد مش وقت سلامات دلوقتى الحق المصيبه اللى هيعملها الرايق الاول

همس الاحباب :- ياداهيه دقى ...انا مش ورايا الا الرايق ومصايب الرايق .. عمل ايه تانى ؟؟؟

حنين القلب :- طالع دلوقتى حالا على الهواء مباشره فى قناه الضاحكون الفضائيه بيقدم البرامج التعليميه

همس الاحباب :- يانهار اسود ومنيل بستين نيله ... ميييييييييييين ؟؟؟؟؟ الرايق بيقدم برامج تعليميه ؟؟؟؟ ازاى ؟؟ ده ساقط ابتدائى اصلا ومش بيعرف يكتب اسمه.. ازاى ده يحصل ؟؟؟ دا احنا واخدينه معانا كماله عدد ...وفين الناس ؟؟؟ فين فرنسا هانم ؟؟وفين الطائر ؟؟وفين صبرنى يا رب ...دى فضيحه ..لا حول ولا قوه الا بالله ..كده اتخرب بيتنا يا حنين

حنين القلب :- هو انا بتصل بيك علشان تصوت وتطلم .. ارجوك اعمل حاجه يا خالد هنروح كلنا فى داهيه ... لا وايه ..داهيه على الهواء مباشره ...حاول تتصرف يا خالد البرنامج هيبتدى

الرايق :- اعزائى طلبه وطالبات كى جى 2 ..حبايبى القطاقيط ..بلاعم المستقبل وزهور الحدائق ..ده موعدنا مع البرامج التعليميه ..وانا جاى انهارده يا حبايبى وجايب معايا نفافيخ كتيييييييير وحلاوه وشيبشى ..كل واحد يرمى بقى البزازه اللى فى بقه ويخلى باله معايا كويس

انتم عارفين يا حبايبى الفلفسه .. بدءت الفلفسه يا قطاقيط من ملايين السنين ..ايام حكم الاغريق لمصر.. وان الفلفسه بدت متقوقعه فى بدايه عهدها الازلى الى ان بدء الفلفسوف الكبير ابو قراط فى تفتيح وتلقيح علم الفلفسه فاستمد جذورها من كتاب العالم المصرى الكبير عبد الله زويل ( علم الفينو ) ...ثم بدء ابو قراط فى تسريخ مبادئ علم الفلفسه ..وعلى اثر هذا العلم الجليل اكتشف الفلفسوف الكبير اشانتين نظريه النسبيه ..وتلك النظريه تعتمد على احترام الفرد لنسايبه اولا واخيرا.. طبعا اعزائى الصغيرين بعد ماتكبروا كده وتتجوزا هيكون لكل واحد فيكم نسيبه..والنسيب هو ابو مراتك او اخواها .. والشاعر الفلفسوف اشانتين الف النظريه دى علشان نحترم النسيب

المخرج :- تليفون يا رايق

الرايق :- اعزائى وحبايبى الكتاكيت فى تليفون وصل للبرنامج ...الو

همس الاحباب :- الو ...ايوه يا رايق انا همس الاحباب

الرايق يشاور بايده للمخرج يفصل صوت المتصل

الرايق :- الو ... الو .. ازيك يا خالووووووووود انا فرحان جدا انك بتشارك معانا فى البرنامج

همس الاحباب :- انا بقى مش متنيل فرحان يا رايق ... مين قالك تقدم البرامج التعليميه .. وايه الكلام الفارغ اللى بتقوله ده

الرايق :- اعزائى المشاهدين ..الظاهر فى مشكله فى الصوت ..وهنحاول نحلها ..وانا هنقل ليكم كلام خالووود حبيبى ..خالد بيقول انه مبسوط قوى من البرنامج وبيصحى بنته همس علشان تتفرج على البرنامج مع الحلوين الصغيرين

همس الاحباب :- اصحى مين يا جدع ؟؟؟ انت هتجنينى ؟؟؟ ..بقولك ايه يا رايق ... اقفل البرنامج دلوقتى حالا احسن مش هيحصل ليك طيب

الرايق :- طبعا يا همس وكل اصحابى بيحبونى زى ما انت بتحبنى ... وهاحاول افكر فى اقتراحك الجميل ونخلى البرنامج اربع ساعات بدل من ساعه واحده

همس الاحباب :- عبده يا رايق .... ودين النبى ..لو مقفلتش البرنامج ده دلوقتى حالا هيكون ليا تصرف تانى معاك

الرايق :- طبعا يا روح قلبى هاخلى حلاوه وشيبشى لحبيبتى همس هو انا اقدر انساها

همس الاحباب :- راااااااااااااااااااااايق ...ابوس ايدين اللى خلفوك ... هتودينا فى داهيه ... انا مش حمل سجن ومرمطه ..وكمان عندنا بنات فى القناه .. ابوس ايدك اقفل البرنامج .. انا خالد صاحبك وحبيبك

الرايق :-ايييييييه الخط قطع .. عموما يا احبابى خالد بيسلم عليكم وبيقولكم فتحوا ودانكم وعنيكم مع عمو الرايق .. احنا كنا بنقول ان زمان من ملايين السنين جه كمان عالم كبير قوى قد البحر اسمه ريتشارد قلب الاسد وده اللى اخترع نظريه المد والجزر ..والنظريه ده من اهم فروع علم الفلفسه ..وهى بتعتمد على المد على الرجلين .. وده طبعا اللى هنجربه فى مهندس الصوت اللى مش عارف يصلح صوت التليفونات وان شاء الله هنمده على رجله

المخرج :- تليفون تانى يا رايق

الرايق :- ودلوقتى مع فاصل اعلانى ....... مين على التليفون ؟؟

المخرج :- ده الطائر الحزين

الرايق :- قوله الرايق فى الحمام ..ولا اقولك الواد ده كلامه صريح قوى .. قوله الرايق نايم

المخرج :- حمام مين ؟؟؟..ونايم مين يا رايق ؟؟؟ الناس شايفينك على الهواء

الرايق :- ايوه يا ناصح ..اشمعنى دى اللى فالح فيها ..خلاص ادهونى بس افصل الصوت تانى ..وربنا يستر

اعزائى الكرام مره اخرى نعود للبرنامج وكان معانا اتصال للطائر الحزين ..اهلا يا طائر

الطائر الحزين :- اهلا مين وزفت مين ؟؟؟ ايه المهزله دى يا رايق ؟؟ لو سمحت وقف التهريج ده دلوقتى حالا

الرايق :- طبعا يا طائر انا كمان مبسوط منك وبحييى اقتراحك اننا نخلى المحطه كلها للبرامج التعليميه الهادفه دى علشان نوعى جيل المستقبل

الطائر الحزين :- بلاش تهريج يا رايق لو سمحت ....انت على الهواء هتودينا فى داهيه حرام عليك

الرايق :- مش عارف فى مشكله فى الصوت ... لكن برضه بنحييى اخونا الطائر على اتصاله ومشاركته فى البرنامج وبنقوله هندرس اقتراحك يا طائر .. ونرجع تانى حبايبى الصغار للبرنامج وكنا بنقول

المخرج :-تليفون يا رايق

الرايق :- الو .. مين معايا

صوت :- انا مدير الامن

الرايق :- للاسف الشديد حبايبى القمامير وقت البرنامج انتهى .. وارجوكم متنسوش العيش والحلاوه ...وربنا يستر

عيله تجنن ...وزاره الرايق الجديده

فرنسا هانم :- صباح الخير يا رايق ايه ياخويا اللى مقعدك هنا فى الصاله بدرى كده ؟
الرايق :- هاااااااى فرنسيس .. ياخى جود بدرى مورنينج .. انا منمتش اصلا من امبارح بالليل
فرنسا هانم :- ليه بس كده يارايق .. ده مش كويس علشان صحتك
الرايق :- كويس مين ومش كويس مين يا متخلفه انتى .. على رأى الست ام كلثون لما غنت للشاعر الكبير نجيب محفوظ وقالت .. وما اطال النوم عمرا وما قصر فى الاعمار طول السهر
همس الاحباب :- صباح الخير يابابا صباح الخير ياست الكل ... اسمها ام كلثوم يا رايق والشاعر عمر الخيام هو اللى قال الشعر ده
الرايق :- انت صحيت يا فالح ؟؟؟ واات هابن ؟؟ وصاحى ليه بدرى قوى كده الساعه لسه 6 الصبح
همس الاحباب :- عندى مأموريه فى الشغل ولازم اوصل بدرى .. فين الفطار يا ماما ؟؟
فرنسا هانم :- من عيونى ياحبيبى .. بس شوف ابوك ماله .. مانمش طول الليل
همس الاحباب :- خير يارايق ؟؟ فى ايه ؟؟؟
الرايق :- روح يا ولد صحى اخواتك كلهم .. وجمعهم دلوقتى حالا .. كويكلى .. اند فيرى فيرى فيرى كويكلى
همس الاحباب :- والله انا خايف من حركاتك يا رايق .. وعلى كل حال .. حاضر هصحييهم .. يا طائر ..ياحنين ..يا صبرنى يارب .. اصحوا بسرعه .. اصحوا
الطائر الحزين :- خير يا جماعه فى ايه ؟؟.. ولا اقولكم صباح الخير الاول
صبرنى يارب :- ايه الدوشه دى ؟؟ مش عارفه انام .. فى ايه ؟؟
حنين القلب :- فى عريس مفيش عريس ..فى عريس مفيش عريس ..فى عريس مفيش عريس .. فى عريس مفيش عريس
الرايق :- عريس فى عينك يامقصوفه الرقبه على الصبح ... روحى اغسلى وشك الاول .. هيجيلك منين العريس بوشك ده
فرنسا هانم :- خير ياخويا وقعت قلبى حرام عليك
الرايق :- شوفوا بقى يا ابناء قبيله الرايق .. ويا حماه سلسال عائله الرايق .. انا قررت انى اتولى منصب فى التحبيشه الوزاريه الجديده
فرنسا هانم :- تحبيشه ؟؟؟
الرايق :- ايوه يا متخلفه .. مش بتسمعى عن التحبيش الوزارى الجديد
الطائر الحزين :- قصدك التشكيل الوزارى الجديد يا بابا
الرايق :- ايوه ... ييس .. ذاتس اوول رايت ... يو اار فيرى فيرى فيرى ولد ابن حلال مصفى ..هو التشليك الوزارى ده
همس الاحباب :- اصطبحنا واصطبح الملك لله ... حراااااااااااااام عليك يا رايق .. ابوس ايدك بلاش كلام فارغ على الصبح
حنين القلب :- ايه يا خالد ؟؟ سيب بابا .. انا من زمان بقول بابا اكيد هيكبر ويبقى وزير قد الدنيا ويجيب لى عريس بحق وحقيقى
صبرنى يارب :- الله ماطولك ياروح .. بقى مصحيينى من احلاها نومه علشان خاطر الكلام ده .. تصبحوا على خير
الرايق :- نو نو نو ... مفيش اى بندوم هيتحرك من هنا .. الكل لازم يسمعنى .. انا الرايق .. انا الحضاره .. انا حفيد احمس الملك العظيم بانى الهرم الاكبر .. انتم يا اولاد تقفوا على اعلى حته فى جبل المقطع وتقولوا .. تحيا جمهوريه عائله الرايق المتحده
الطائر الحزين :- اسمه جبل المقطم يا رايق
الرايق :- ماشى يا فلفسوف ..مقطم مقطم .. بس انا لازم ادخل الوزاره الجديده .. وامسك وزاره التربيه والتعليم
فرنسا هانم :- اشمعنى يعنى وزاره التربيه والتعليم ؟؟؟
الرايق :- شوفى يا فرنسيس ... شوفوا يا اولاد ..
خامسا - وزاره التربيه والتعليم هى الوزاره الوحيده اللى بتلغى اى سنه مش عجباها ومحدش يحاسبها .. يعنى سنه سته دمها تقيل .. تلغى سنه سته .. تالته اعدادى بوزها ناشف ..تلغى تالته اعدادى .. التحسين حلو ومفيد لعقل الطالب .. التحسين ابن جزمه ومضر بعقل الطالب .. الثانويه العامه سنتين ..الثانويه العامه اربع سنين .. الثانويه العامه 3 شهور
رابعا :- تيسيرا على اولياء الامور انا قررت انى اتولى الوزاره دى والغى الابتدائى والاعدادى بالكامل .. بمعنى ..الطالب يدخل من كى جى تو ..الى الثانوى مباشره
سابعا - قررت اخلى الثانويه العامه على 6 مراحل لمده 6 شهور .. كل شهر مرحله .. وفى نهايه كل شهر يبقى الامتحان عباره عن فزوره زى مثلا .. طبق بنور فى البحر بيدور .. يعدى البحر ولا يتبلش .. طاسه طاسه فى البحر غطاسه من جوه لولى ومن بره نحاسه
ثانيا - قررت انى احد نهائيا وقطعيا من ظاهره نط الطلبه من على السور ..وقررت انى اهدم كل الاسوار بتاعه المدارس
همس الاحباب :- انا بقول نفطر احسن ونروح شغلنا .. ولا اقولكم .. بلاها فطار ..سلام عليكم
الطائر الحزين :- رايح فين يا خالد ؟؟؟ عيب نسيب بابا كده لوحده .. ولا اقولك ..استنى خدنى معاك ..سلام عليكم
صبرنى يارب :- انا مش عارفه افتح عينى اصلا ..النوم كابس عليا .. اما ادخل ادور على فتاحه افتح بيها عينى ..سلام عليكم
فرنسا هانم :- وانا كمان اتأخرت على شغلى سلام عليكم
حنين القلب :- والنعمه الناس دى مش عارفه قيمتك يا بابا .... انا رايحه افرق السى فى بتاعى على الجيران سلام عليكم
الرايق :- وااات هابن ؟؟؟ كلكم سيبتونى ومشيتوا ... واااى ؟؟ ليه ليه ليه حظى معاكى يا دنيا كده ليه ليه ؟؟؟ .. عموما ..ماشى انا وراكم والزمن طويل ..تسيبونى كده كلكم ؟؟ طيب بلاها وزاره التربيه والتعليم ..وهامسك وزاره الداخليه واربيكم يا عيله الرايق

**************

مع تحيات
فريق العمل بمدونه
الضاحكون