الأحد، مايو 10، 2009

هم المم ياروحى ..جيبالك مم

همس الاحباب اعزائى مشاهدى قناة الضاحكون الفدائية

جه للبرنامج اكتر من 27 مليون الف اميل بيطلبوا حلقه جديده من حلقات الهم المم .. وعلشان احنا عارفين ان برضه كلكم همكوا على بطنكوا ..يسعدنا ان نقدم لكم برنامجكم المفضل فى جميع القنوات الفدائية المشفرة وغير المشفرة والمشفرة طبعا غير الشفرة بتاعت.. بولو الحلاق .. انتم الان مع البرنامج الذى طال انتظاره لكل السيدات فى بر اسيا الشرقية والغربية والدقهليه والشجنوبيه انتم الان مع برنامج برنامج برنامج ..نهار ملون انا باين عليا نسيت .. هو البرنامج اسمه ايه يا رايق ؟؟؟

رايق اصحى ياعم الحاج احنا على الهواء البرنامج اسمه ايه ؟؟؟؟؟

ااااه افتكرت طبقك المفضل سيداتى انساتى يسعدنا ان نستضيف فى حلقتنا اليوم الشيف القبطان اعالى الحلل والطباق الشيف حوكشه ما تاكلش.. وفى بداية حلقتنا نرحب بالشيف حوكشه ونقوله ناوى تطفحنا ايه النهاردة ؟؟؟

حوكشة : اهلا وسهلا بالاخوات المشاهدات ..وياريت كل واحدة فيكم تجيب قلم وكراسة وتكتب ورايا واللى مش بتعرف تكتب خليها فاتحة بقها والكلام هيدخل لوحده ..النهاردة هقولكم على اكلة ممكن تاكلوا صوابع رجليكم وراها ومش هقولكم هى ايه لانى بصراحة مش عارف اسمها ودلوقتى نبدا بالمقادير 5 كيلو بصل اخضر و5 كيلو بصل ناشف – 5 كيلو قش رز – 5 كيلو سبانخ – 5 كيلو قلقاس وقول شايب وقول كومى – 5 كيلو بامية متقمعة – 5 كيلو نشارة خشب – 5 جرام لحمة بتلو
وطبعا واحدة تسالنى وتقولى يا شيف حوكشة ليه 5 كيلو ؟؟؟ ..اقولها خمسة وخميسة فى عينك وعين الحسود فيها شوكه يا حلاوه ..واحدة رزلة تانية تسالنى قش رز نعمل بيه ايه ؟؟

اقولها يا خايبة بدل ما الفلاحين يحرقوه ويعملوا سحابة سوداء احنا نفرشه فى الطبق ونحط عليه الاكل بدل الجرجير والخس...تيجى واحدة عبيطة تالتة تسال وايه لزوم نشارة الخشب ؟؟؟ ..اقولها ده يا ستى علشان نرشه على وش الطبق بدل البقدونس اللى مش بيتغسل فى محلات الكباب والكفته ...واى سؤال من واحدة خايبة هسيب البرنامج وامشى وتيجى هى تورينى شطارتها وبعد ما نجهز المقادير نجيب صينية كبيرة ونقطع القلقاس والسبانخ والبامية والبصل واهم حاجة البصل يظل بقشره علشان ما تنزليش دموع ونضطر نقولك امسحى دموعك يا امال نحط الخليط السابق فى الخلاط وتعالى قابلينى لو الخلاط اشتغل من اساسه نفرغ المحتويات فى الصينية ونحطها فى الفرن فى درجة حرراة 240 فهرنهيت ولو ماعندكيش فهرنهيت خليها 240سليزونية اتركى الصينية لمدة 3 ساعات فى الفرن واحتمال انها تتحرق وممكن البوتجاز ينفجر ولا يهمك اثبتى على موقفك وخليكى قدام التليفزيون وتابعى برامجنا على محطة الضاحكون الفدائية ،،كلها نص ساعة والمحروس جوزك يشرف وعصافير بطنه بتنهق قابليه بابتسامة عريضة المنكبين وقوليله ثوانى يا حبيبى هاكلك اكلة ما تحلمش بيها ولا عمرك هتنسى طعمها بس الاول اغسل صوابع رجليك كويس ربما تحتاج تحلى بيهم بعد الاكلة وبسرعة هاتى الصينية من الفرن وقوليله تفضل يا روحى بالهنا والشفا وفى هذه اللحظة الرومانسية جوزك هيعمل حاجة من الحاجات دى

( اختيار من متعدد )

ثارابعا : هيبقى قليل الذوق وعديم الاحترام وهيقفل محطة الضاحكون ويكسر التليفزيون على دماغى وفى الحالة دى مضطر اضحى بالمخرج الدكاترة عبده الرايق وانفد بجلدى

***********
سنعود بعد قليل
********

شركه الضاحكون تلى شوووب تعلن عن حاجتها للوظائف التاليه
1- سائق عجله رالى .. حاصل على ليسانس هندسه او بكاليريوس حقوق او شهاده نحو الاميه
2 - عسكرى مرور لتنظيم وتسهيل التنقل بين المراسلين ... خبره لا تقل عن 90 عاما فى مجال المرور
3 - عدد كبير من المراسلين عبر العالم .. بشرط الا يقل السن عن 33 عام وخمسه اشهر و10 ايام و 6 ساعات والا يزيد السن عن 33 عام وخمسه اشهر و10 ايام و7 ساعات
تقدم الطلبات الى اى قهوجى او شفهيا على تليفون الضاحكون 03000333
عدنا
**************

فرنسا هانم .. اهلا بكم اعزائنا المشاهدين مع نشره الضاحكون الجويه

سجلت درجات الحراره اليوم اقل من معدلاتها فى نفس الفتره من كل عام حيث بلغت درجات الحراره 785 لسعه على شارع الجيش من ناصيه ميدان الترعه .. و 788 لسعه على شارع الجيش من ناصيه ابو الحسن ..و781 لسعه على شارع الجيش من ناصيه المثلث بمدينه السويس .. هذا وقد هطلت امطار غزيره مصحوبه بكميات هائله من الثلوج على امتداد شارع الجيش من ناصيه الغريب
ومن المنتظر خلال ال 24 ساعه القادمه ان تزداد درجات الحراره على كل انحاء الجمهوريه
حيث تكون كالتالى
القاهره ... 985 لسعه
الاسكندريه ... 934 لسعه
اسوان ... 1044 لسعه
الجيزه .. 988 لسعه
السويس .. 922 لسعه
وبالنظر الى الخريطه الجويه لجمهوريه مصر العربيه
نلاحظ هبوب رياح شرقيه شماليه جنوبيه على مصر الوسطى والصعيد مع احتمال سقوط امطار الساعه الواحده و45 دقيقه صباحا
لذلك ننصح اعزائنا اصحاب برج الجوزاء والجدى والسرطان بعدم الخروج من المنزل نهارا
اما اصحاب برج الدلو والحمل فننصحهم بعدم الخروج من المنزل طوال الشهر القادم
كما ننصح اصحاب كل الابراج بدفع فواتير التليفونات قبل الثانيه عشر ظهرا والا سيتعرض الجميع للمد على الارجل
سنعود بعد قليل
**********
يسر موسسه الضاحكون تلى شووب ان تقدم لكم بكل فخر باكووره منتجاتنا فى مجال التليفون المحمول
تليفون محمول 16 بوصه للاستخدام العائلى نغمات مجسمه لاغنيه زوقينى يا لمونه - مع تليفون الضاحكون ممكن تتكلم مع اى شخص حتى لو كان فى محافظه غير محافظتك - ممكن كمان تدى رنات وتبعت احلى رسائل - تليفون الضاحكون فيه امكانيات كتييييييييييييييييييييير - فى اوقات البرد ممكن يتحول لدفايه وفى الحر احلى كولدير - تليفون الضاحكون ممكن يتحول لاجمل غساله فوول اتوماتيك وممكن كمان يبقى مكواه رجل -فقط اتصل على 03330300
*********
عدنا
**********
عبده الرايق :- هااااااااااى ايفرى بدى ... الجنرال الدكاتره عبده باشا الرايق يحييكم ويقدم لكم البرنامج القرنى ( احلى مستشفيات)
وكلمه قرنى تعنى فى اللغه العربيه قرن من الزمن اما فى اللغه الانجليزيه فتعنى قرن من الزمن وبلغه اهل الصين تعنى قرن من الزمن .. والان مع الدكتور الكبير سعدون ابو عبدون رئيس قسم الاعصاب والجراحه والباطنى والحاصل على اليوبيل الفضى فى المسالك البوليه والمسالك المناخيريه والحاصل على زماله مستشفى دقق بولايه فوس انجلوس اهلا وسهلا يا دكتور سعدون
سعدون :- مسا التماسى يا استاذ رايق مسا التماسى يا ورد قاعد على الكراسى
الرايق :- قولى يا دكتور فى شكوه من المواطنيين بتقول ان العلاج الموزع على المرضى فى المستشفيات العامه كله نوع واحد يعنى المرضى يكشفوا والكل خارج ماسك فى ايده نفس العلاج ... هو لا مؤاخذه احنا كلنا عندنا نفس المرض
سعدون :- شوف يا رايق احنا يابنى بنشتغل بالحصه .. بمعنى اننا بناخد من الوزاره حصه معينه من العلاج وكل واحد بقى وحظه
الرايق :- يعنى مفروض يكون فى علاج متنوع يا دكتور فى المستشفيات وكل مريض ياخد علاجه
سعدون :- ههههههههههه لا بجد ههههههههه والنبى صح هههههههه ضحكتنى يا رايق انت فاكر المستشفيات العامه سوبر ماركت هتشكل فى العلاج يابابا ..... لا يا حبيبى احنا عندنا مساواه والمساواه فى العلاج عدل
الرايق :- يا دكتور فى واحد صاحبى ابنى كانت عينيه وجعاه وراح يكشف فى المستشفى العام الدكتور كتب له على لبوس ودواء كحه
سعدون :- يابنى افهم ... اعوذ بالله من الشيطان الرجيم ... افهمك ازاى يا رايق ... يابنى حظه كده جه فى الحصه بتاعه اللبوس ودواء الكحه .... نعمله ايه احنا بقى ؟؟؟
الرايق :- مع انى مش مقتنع بكلامك الا اننى مضطر اقفل الحلقه دى وفى النهايه حضرتك تنصح الناس بايه
سعدون :- انا انصح الناس كلها اللى بتروح المستشفى العام تسأل الاول عن الحصه الموجوده فى المستشفى يعنى لو حصه دواء كحه لازم الناس تكح ولو حصه مكركروم لازم الناس تعور بعض ولو حصه دواء اسهال لازم الناس تسهل يعنى لازم الناس تطور بلاش جهل
الرايق :- شكر يا دكتور .. وانا من موقعى هذا اقول لو حصه تاريخ لازم الناس تلبس ملابس عنتره ابن شداد وتحارب المغول فى بيت المقدس ولو حصه جغرافيا يبقى تقعدوا بالعافيه
****************
مع تحيات فريق العمل
بمدونه الضاحكون

هناك 34 تعليقًا:

همس الاحباب يقول...

يا نهار ابيض
ايه اللى جابك يا صعلوك بين الملوك
ينفع كده يا رايق

همس الاحباب يقول...

كل دى وظائف
يا نهار ابيض
ومال البطالة راحت فين
سائق عجلة رالى ليسانس هندسة
ياااااااه انا خريخ ليسانس هندسة قسم لحام كاوتش
عسكرى مرور خبرة 90 سنة
ستى الله يرحمها كانت هتفيدكم قوى فى الوظيفة دى يلا ما علينا
نشوف جدو تحمتس لو فاضى
يااااه مع الاسف فرقت 2ساعة و33 ثانية على وظيفة المراسل

همس الاحباب يقول...

فرنسا هانم
لسعات ايه يا فرنسا
انا اتلسعوت فى مكانى من كتر اللسعات اللى انا شايفها على الخريطة
الحمد لله انى من برج السرطان يعنى مسموح ليا الخروج بالليل
ابراج الحمام ولا ايه بالظبط
طب ولى كسر التليفون يدفع برضو
تسلم الايادى يا فرنسا

همس الاحباب يقول...

انا عايز من ده يا حزنبل
ممكن 3 موبيل وصلحه
لكل ربات البيوت اقتنوا تلبفون الضاحكون
وريحوا نفسكم من هم الاكل والشرب وكماان الكى

همس الاحباب يقول...

عبده الرايق
ههههههههه
فعلا يا دكاترة العبقرى مش يستضيف اى حد وخلاص
دكاترة لازمن ولابد يستضيف علامة جهبز فى برنامجه
ايه العلم الذى لايكيل بالبتنجان يا علامة
فعلا العيب فينا احنا لازمن نسال عن الحصة قبل ما ندخل الفصل
الله يعافيك يا رايق
ههههههههههههه
بجد بوست روعة
تسلم الايادى

همس الاحباب يقول...

ايه ده هو انا احتكرت التعليقات لوحدى ولا ايه
عامة كل تعليق مطلوب فيه 15000 جند
وعلشان خاطر فرنسا والرايق
ممكن نمشيها 15 جم
وعلشان خاطر المعازيم ممكن نكتفى بمصاصة
بس نشوف منكم اى حاجة يا عيلة مفلسة دايما

بسنت صلاح الدين يقول...

لو سمحت انا عاوزه موبايلين،و نسيتوا تقولوا برج الميزان هيخرج امتى كده احنا محبوسين فى البيت مستنيين الفرج،مجهود رائع،بالتوفيق

صيدلانيه طالعه نازله يقول...

يا سلام يعنى اللى برج الجوزاء زيى يتحبس فى البيت و لا ايه
و بعدين الدكتور اللى جابه الرايق ده اكيد قريبه و طالع فى البرنامج كوسه
بس تصدق انا بحس من كلام الناس اللى بتيجى عندى ان اللى قاله سعدون المجنون ده حقيقى بس ميمنعش ان عبده الرايق خد اكراميه عشان يطلع الراجل ده فى البرنامج و عايزه اسأل سؤال و لو فيها غلاسه هيا حصه بكره فى الدوا ايييييييييييه

بـِصَمتـِـ أميرة ــــى يقول...

ههههههههههههه
هييييه
انا لقتلى وزيفه
هههههههههه
بجد توبيك دمااااغ جدا
فكرته نوفى
عمو .. عمو .. عمو
ممكن اشتغل اى حاجة وخلاص
اهو اكسب أوت العيال الغلابة دول
والنبى ده انا لهلوبة
هههههههههههههه

همس الاحباب يقول...

بسنت صلاح الدين
منورة الضاحكون
وعندك 2 موبايل وصلحه والحساب على صاحب المخل
برج الميزان ممنوع من الخروج لمدة 13 سنة و6 ايام و3 ساعات و15 ثانية
بعدها مسموح الخروج

همس الاحباب يقول...

صيدلانيه طالعة نازلة
اهو مش احسن من الطلوع والنزول يا دكتورة
لا مش قريبه
ده ابن خالة ام بنت عم حسن باشا الفراش
لايا دكتورة ده العلامة الدكاترة سعدون
زميل الدكاترة الرايق من ايام الحضانة
يعنى خبير ببواطن الامور المستعصية
حصة بكرة فوتى علينا بكرة
ههههههههه
منورة دايما يا دكتورة

همس الاحباب يقول...

ملكة بحجابى
هههههههه
طبعا انتى تنورى
اختارى الوظيفة واحنا تحت امرك
ولا اقولك ايه رايك تشتغلى
عسكرى مرور بس لازمن خبرة 90 سنة
ابعتى الورق واعتبرى نفسك متعينة
شكرا لتواصلك

yoyo يقول...

صباحكم سكر

بصراحة بصراحة يا ابو همس يعنى انا لو من مكان الزوج المصون دا على دماغها بالحلة على طول ايه العك المقلى و المشوى دا هههههههههههههههههههه
هو كله من البامية والسبانخ و القلقاس دول على طول كدا طبيخك غامق يا سعاد
هههههههههههههههههههه

yoyo يقول...

ايه الوظايف الجامدة دى
خلاص بقى يا خالد خد ورقى شوف ليا اى حاجة عندكم بقى وهنيا لك يا فاعل الخير و الثواب
ههههههههههههههههههههههه

yoyo يقول...

الله بقى يعنى مش اخرج من البيت خالص الشهر دا على ضمنتك يعنى يا فرنسا ولا ايه ؟؟

ايه كل اللسعات دى انا اتلسعت خالص خالص بقى هههههههههههههههههههههه

yoyo يقول...

صباحك روقان يا عبده باشا يا رايق

هو يعنى الدكتور هيعمل لك ايه بس هيقطع نفسه ولا ايه احنا اللى غلطنيين المفروض نشوف حصة الدوا ايه الشهر دا ونتعب على العلاج دا بقى نعمل جدول بلاش تسيب واستهتار بقى
ناس مش عندها دم واللهى
ههههههههههههههههههههههههههه

yoyo يقول...

دى اول متابعة ليا وان شاء الله مش هتكون الاخيرة
ميرسى اوى يا خالد على الدعوة الكريمة و الجميلة دى

دممتم جميعا صانعى البسمة و الابتسامة
تحياتى
يويو

الطائر الحزين يقول...

انا عاوز اشتغل ريس على العيال اللى عاوزة تشتغل

========
رايق هشوفك بحاجة على جنب وانت كمان يا همس هنبدل سوا

فرنسا هانم يقول...

همس الاحباب
تحيه خاصه ليك يا ابو همس

فرنسا هانم يقول...

الرايق
انت فين يا رووقه
بجد شغلتينى معاك
انت بتبنى السد السد العالى ولا الواطى
قر واعترف يا مذنب

فرنسا هانم يقول...

حنين القلب
مفتقداكى جدا يا نونه

الطائر الحزين يقول...

فرنسا هانم
منورة فينكم يا فندم

=========
يا عم الرايق انت خير؟

حنين القلب يقول...

همس الاحباب

ايه الطبخه المنيله دى
لا يا عم شكرا انا بعمل رجيم
وايه الخمسه وخميسه دى
ههههههههههههههههههههههههههه

تسلم ايدك يا خالد

حنين القلب يقول...

فرنسا هانم

طيب يا مامتى واللى برج الميزان يعملوا ايه ؟؟؟؟

يعنى تقولى لكل دول يعملوا ايه ومش تقوليلى
عااااااااااااااااا

والله دمك عسل يا مامتى

حنين القلب يقول...

عبده الرايق

والله فكرة حلوة
صح المفروض نتطور ونمرض على حسب العلاج

الحمد لله انا عندى كحه الحق اخد العلاج

تسلم الايادى يا روقه

م/ الحسيني لزومي يقول...

61عاما علي النكبة
ونحن أقرب للعودة
والعودة حق لا عودة عنه
شارك في الحملة الالكترونية لإحياء الذكري ال 61 للنكبة ( عائدون)
ضع شعار الحملة علي مدونتك

همس الاحباب يقول...

يويو
ههههههههه
انا بقول كده برضو
بس انتى عارفة من خاف سلم
والبلد فيها قانون الخلع
ولايرضيكى ابنك فى الشارع ينادوه يا ابن المخلوع
هههههههه
كل من الطبيخ الغامق يا يويو
نورتيا يا يويو بجد

همس الاحباب يقول...

يويو
هههههه
يا سلام
اعتبرى نفسك متعينة من النهاردة
ومن غير ورق ومستندات
ايه رايك فى سواق عجلة رالى
اهى رياضة وفسحة

همس الاحباب يقول...

يويو
ده شرف لينا انك نورتينا
وفى انتظار تواصلك يا ست الكل
دمتى بكل ود
تحياتى

همس الاحباب يقول...

الطائر الحزين
ريس انفال حضرتك
ومال الرايق هيشتغل ايه هينظم طابور الجمعية
لو كان كده انا موافق بس بلاش تسبح كده يا طائر

هههههه

همس الاحباب يقول...

فرنسا هانم
وحشانا يا ست الكل
ومفتقدينك انتى والرايق بصراحة
ربنا يطمنا عليكى
تحياتى لحضرتك

همس الاحباب يقول...

فرنسا هانم
الرايق
ههههههههه
خرج ولم يعد
الواضح انه بيبنى سور السويس العظيم
خايف من الهكسوس يحتلوا ميدان الاربعين من ناحية شارع الجيش
هههههههه

همس الاحباب يقول...

حنين القلب
ده الشيف حوكشة على سن ورمح
خسئت يا فتى
ثكلتك امك يا حنظلة
ايه رايك الاكلة دى ناوى اعزمك عليها
وبالهنا والشفا لوحدك

همس الاحباب يقول...

م / الحسينى لزومى
شكرا على مجهودك يا هندسة
وربنا يجازيك خيرا