الأحد، مايو 03، 2009

عيله تجنن .... خناقه اخويه

فقره اعلانيه

**********

الضاحكون تلى شووب تقدم لكم اجمل منتجاتنا

مسحوق غسيل...تريه بلانش ...

عزيزتى ست كل بيت .... بيضى غسيلك من غير مشكلة .. مسحوق تريه بلانش له قدرة فائقة على التبيض للملابس البيضاء والالوان على حد سواء ... مسحوقنا مش بيفرق بين ملابس قماش ولا جلد مسحوقنا مش بيفرق بين قماش ولا بشرة مسحوقنا بعون الله يبيض كل حاجة مسحوق تريه بلانش على طول بارخص الاسعار

طريقة الاستعمال:عدد 15 كوز ماء مبلوله يوضع فى اناء واسع موجود بها عصاية للتقليب ولازم تكون من الخشب وبلاخص خشب الليمون يوضع اى شىء مراد تبيضة من جماد او حيوان او انسان و مع التقليب المستمر لمده تتراوح بين ربع قرن او 40 عام تخرج ابيض ناصع البياض

خلاص خلاص وداعا لاغنيه اسمر ملك روحى

دلوقتى مع مسحوق تريه بلانش .. ابيض ملك روحى

اتصل على 03000333

سعر المنتج فقط 299 جنيه زائد مصاريف الشحن

لا استنوا شويه لسه عرضنا منتهاش ... مع مسحوق تريه بلانش ..ليفه هديه .... تخلى البياض مضمون ..مضمون ...مضمون

************

الطائر الحزين ...والان اعزائى المشاهدين مع حلقه جديده من مسلسل عيله تجنن .. بطوله فريق العمل بمدونه الضاحكون

وحلقه اليوم بعنوان... خناقه اخويه ...

الطائر الحزين وهمس الاحباب بالاشتراك مع فرنسا والرايق


الطائر : يا همس انت يا عم فين البنطلون بتاعى اللى كنت كاوية امبارح ؟؟؟

همس : ايوة هتلاقيه مرمى عندك فى الغسالة

الطائر : مستعجبا ومستنكرا غسالة ايه بقول لك كنت كاوية امبارح

همس : ايوة انا لبستة امبارح بعد ما انت كاويتة وخرجت بيه واتزحلقت وقعت فى الطين

الطائر : يا دى نهارك اللى مش فايت اكيد البنطلون اتروب واتبهدل ...ثم تعالى هنا انت اصلا ازاى تلبس بنطلونى انت مقاسك مش مقاسى اصلا

همس : يا سيدى مش هتفرق اللى لقيته ادامى لبستة اصلى كنت مستعجل

الطائر : يا مثبت العقل والدين يارب طيب لما نشوف اما يجى ابوك هيتصرف ازاى لما نقوله ... بس اهو ابوك وصل اهوه يا رايق انت يا حاج ما ترد عليا يا عم

الرايق : هاى ايفرى بدى ايه وجع الدماغ ده منك ليه فى ايه ..واات هابنت ؟؟؟؟؟

الطائر : ابنك همس بعد ما كويت البنطلون لبسه و طينة فى الطين

الرايق : طيب ومالة مش هو اخوك ايه المشكلة لما تلبسوا مع بعض يو كان دوو إت بكل بساطة ..هههههه ..ذاتس فيرى ايزى

الطائر : انت يا عم مينفعش اصلا ده مش مقاسه خالص وبعدين لو فرضنا كدة اللى عاوز يلبس حاجة ميكويها هو

الرايق : اه فكرتنى يا بنى بالذى مضى وتنهد تنهيده عميقة تعرفوا يا ولاد الشيرز اللى انا لابسة وقصير عليا ده وضيق ومصمم انى مقلعوش بتاع عمكم كنت بتسحب اخد منه الهدوم زى الواد همس كدة يا سلام فعلا اللى خلف ماماتش

الطائر : طيب كل واحد يخلى باله من حاجتة وقد اعذر من انذر يعنى مينفعش حد هنا يكون له ملكية خاصة

الرايق : ملكية خاصة ..نو نو نو ... ايه انت متعرفش ان قرار التامين لغى كل ده ؟؟؟

همس : اسمه تأميم يا بابا

الرايق : بس يا جاهل ... شط اب يور ماووس ... ايش فهمك انت .. احنا نعرف تأمين اجتماعى وتأمين صحى عمرك سمعت على تأميم اجتماعى ولا تأميم صحى... شوف يا ابنى .. التأميم معنها اللغوى هو قلب النون الى ميم عندما تأتى فى أخر الكلمة تأمين بقت تأميم وفيه رأى أخر معتبر هو رأى العلامة الكبير الجهبز عبده الفراش حيث قال فى احدى ندواته : ان التأميم هو جعل أم لكل من ليس له أم بمعنى هأممك يعنى هكون أمك ...وفيه رأى كمان خاص بلغة جنوب القاهرة وضواحيها بداية من الجيزة لأسوان وذلك فى حديثهم مع السياح لما السايح من دول عاوز يقول تعميم يقول تأميم فهنا نقدر نقول هو قلب العين الى ميم .. افهمومها بقى يا بنى مزار

طائر : بس بقى انت وهو متضيعوش الموضوع انا دلوقتى فى البنطلون نص البنطلون بقى طين اللى عاوز افهمه ازاى الباشا ده لبسه؟

همس : وهى دى مشكلة يعنى بعد ما بلبس البنطلون اقفل السوستة والبس عليه الحزام وبعدين اتني رجله خمس تانيات علشان اضبط الطول

الطائر : طيب والروبة دى جات له منين يا فالح ؟؟

همس : ايه يا عم كل ما امشى شوية تانية تتفك ولجل الحظ الدكر اتفك 3 تانيات مع بعض وانا كنت بعدى الشارع اللى كان مليان ماية فقام البنطلون اتروب الروبة دى

الطائر : لما نشوف رأى أمك لما تيجى من السوق

تدخل فرنسا والطين مغطى طرف الجلابية من تحت وعماله تجرجر فيها وتسأل

فرنسا هانم :- مالكم صوتكم جايب لأخر الشارع

الطائر : تعالى شوفى الباشا ابنك واخد بنطلونى اللى لسه كاوية امباح وطينة فى الروبة مش بيلبس حاجتة ليه؟؟؟؟؟؟؟؟؟!!!!!!!!!! يا عالم جننتونى

فرنسا هانم : طيب استنى يا بنى اروح اودى الجلابية لخالتك وارجع ارد عليك

************

انتهى   

هناك 35 تعليقًا:

همس الاحباب يقول...

ايه يا بشر
يعنى انا اغيب ساعة
واجى الاقى نفسى اول تعليق
مكتوبالى والله

همس الاحباب يقول...

وبما انى احتكرت اول تعليق
ممكن امنح نفسى جائزة اول تعليق للابد
ودى عبارة عن مسحوق غسيل تريه بلانش
اهو الواحد يقعد فى الطشت قد ربع قرن ولا حاجة
وبعدين نبقى نفكر نغسل البنطلون بتاع الطائر بدل الفضايح اللى عاملها فى المدونة
ده ما كانش بنطلون يا جدع
ومش كفاية انى لبسته وتنيته بس
كنت ناوى اظبطه عليه واسيبك انت تلبسه برمودا بس ما هونتش عليه

ومازلتُ أتعلم يقول...

مدونة دمها خفيف بجد
ربنا يكرمكم عليها
واكيد هتابعها كتير

همس الاحباب يقول...

ما زلت اتعلم
ربنا يكرمك يارب
وده شرف لينا متابعة حضرتك
وفى انتظارك دائما

حنين القلب يقول...

والله العظيم دى عيله تجيب شلل الاطفال

ايه العيله دى

يا ربنااااااااااااااااا

ممكن اتبره منهم ؟؟


يا رب توب علينا

حنين القلب يقول...

عبده الرايق

حلوة اوى الدكتوراه اللى التاميم

طوووول عمرك جهبز ده انت مؤلف المعجم وحفيد سيباواى

بابتى
مش سيباواى ده اللى بيعلب فى الارجنيتين

وبعدين بقى يلعب فى الترسانه
هههههههههههههههههههههههههههههههه

حنين القلب يقول...

فرنسا هانم

اذا كانت مامتنا شحته الجلابيه من اختها يبقى العيال من حقهم يعملوا اكتر من كده

مامتى طيب اغسليها قبل ما توديها دى كلها طينه
ولا اقولك خلى بابا يشترى المسحوق اللى وحطيه ليهم فى الاكل وبكده تبقى خلصتى من العيله دى

ايه رايك؟؟

همس الاحباب يقول...

حنين القلب
شلل اطفال يس
وانتى با اختى تجيبى كساح ولين عظام
ايه رايك نبيعك ونجيب عبوة مسحوق من الرايق

حنين القلب يقول...

همس الاحباب

يعنى كل اخواتك مش طيقينك
الحمد لله
كنت فاكرة نفسى انا بس اللى عايزة اتخلص منك
بتاخد بنطلون اخوك ليه

وبتتنيه 5 تنيات يا لهوووووووووووى

كنت اخدت الشورت كان جه على مقاسك ورحمت اخوك من وجع القلب ده

هههههههههههههههههههههههههه

همس الاحباب يقول...

انت عارفة يا بنت يا حنين
هى فعلا العيلة دى شحاتة بجد
والدليل على كده انهم شحتوكى من الجيران وربوكى لله والوطن
يعنى انتى مش اختنا ياااااااااه
انتى واخدينك شحاته

همس الاحباب يقول...

حنين القلب
شورت
تصدقى فكرة
انا كنت هظبط البنطلون على مقاسى وهو يلبسه برمودا
بس ما علينا المرة الجااية هلبس البنطلون واعمله شورة
ايه رايك فكرة جامدة مووت

حنين القلب يقول...

الطائر الحزين

بص يا سيدى
بما اننا اخوات وانا تهمنى مصلحتك فى الاول والاخر فانا بنصحك بالاتى :

اولا حاول تتخلص من خالد ده
لانه هيخلص على هدومك كلها واكلك وشوربك كمان

ثانيا اتبره من العيله دى وخلى ناس غنيه تتبناك وخدنى معاك والنبى دنا اختك الصغننه

ثالثا انا بقى فرحانه فيك علشان انت كنت زعلان عليه وانا بكهربه
خد بقى السلك اهه وكهربه انت براحتك
ههههههههههههههههههههههه

همس الاحباب يقول...

طائر ما تسمعش كلام البنت حنين
دى بتوقع بينا
دى سوسة وانا عارفها
متخافش على حاجتك انا هاخدها كلها واشيلها عندى فى الحفظ والصون
ولو احتجت حاجة منها تعالى خدها احنا اخوات بردو
وابقى قابلنى لو لقيت حاجة مقاسك اساسا

حنين القلب يقول...

همس الاحباب

تصدق لو قعدت فى الطشت 67 سنه والله ما هتطول
يا ابنى افهم انت عمود الفقرى وقف لحد كده
خااااااااااالود
والنبى سؤال واقف فى زورى

هو انت ليك عمود فقرى زينا ولا من اللافقريات زى العرسه ؟؟؟

وانتوا شحتنى
يعنى انا مش اختكم ؟؟؟

ربنا يسامحك بس انا برضه مش هسيبكم لانى مقتنعه انك انت اللى لقيت مش انا

وش بيطلع لسانه وبيغيظك

فرنسا هانم يقول...

يالهووووووووووووووووى
يا فضيحتك يا فرنسا هانم امام اليونيسكو والامم المتحده والبردعى
وبان كى مون والمرحوم المأسوف على شبابه بشبوشتى
يا فضيحتك يا فرنسا هانم امام الفريق بتاع نيجيريا
كل وكالات الانباء العالميه والمحليه والغير محليه هتذيع نبأ الموسم فرنسا هانم بتلبس جلابيه اختها
لالالالالالالالالالالالالالالالالالالالالالالالالا
انا لايمكن البس جلابيه اختى ابدا يا طائر
الجلابيه دى اختى كانت شحتاها من جارتها وانا شحتها من اختى وشحتها لواحده صاحبتى فى العماره
ههههههههههههه
حلوه يا طائر
تسلم ايدك

maiosha يقول...

هههههههههههههههههه

حتى أنتى يا فرنسا
هههههههههههههههههه

بجد إنتوا عيلة تجنن فعلا. وتفطس من الضحك كمان

ههههههههههههههههه

maiosha يقول...

اه صحيح
ياريت إتنين مسحوق تريه بلانش ده

ومتنسوش اللييييييييييييفة الهدية

اه .. كله إلا الليفة

جنّي يقول...

السلام عليكم

ايفري بدي على رأي الرايق..

زعلان ليه يا حزين .. دا همس طالع لابوه لأ ولامه كمان بأمارة الشرز وعباية خالتك ..
دا انتم عيله تفرس ..

بسنت صلاح الدين يقول...

انتوا عسل والله ،اول مره زياره و مش اخر مره ان شاء الله، و بعدين دى خناقات اللبس دى فى كل بيت اسألونى انا ،او بلاش انا ،اسألوا الجيران اللى بيسمعونا انا و اخواتى كل يوم....

الطائر الحزين يقول...

يا فتاح يا عليم يا رزاق يا كريم انتوا مش هتتهدوا شوية بتتناقروا على ايه شوف يا خالد انت وحنين احنا طبعا اخوات مهما كان هنعمل ايه قسمتنا كدة بس بردة مليش دعوة عاوز البنطلون بتاعى
==========
انا مش عاوز اتبرى منكم لان لو كلنا اتبرينا من بعض مش هنلاقى حاجة نبريها بعد كدة وهيبقى فيه حاجة بينا مشتركة انا مش عاوز حاجة تشركنا مع بعض خالص فكروا شوية وقولوا ايه الحل

الطائر الحزين يقول...

مازلت أتعلم اهلا بك

==========
فرنسا هانم
17 سنة وانت مفهيمانا ان الجلبية بتاعة اختك تطلع هى كمان شحتاها يا مغيث عليكم عيله

==========

جنى
مش زعلان ولاحاجة دا انا بس مفروس ومتغاظ وهيجلى الخفيف والثقيل ووزن الريشة كمان

=========
مايوشة
عندك اثنين مسحوق تريه بلانش لمايوشة واتوصى بالليفة

===========
بسنت صلاح الدين

اهلا يا فندم طيب انتوا الجيران بتسمع احنا مشاكلنا كلها على الفدائيات احنا عدينا خلاص

صيدلانيه طالعه نازله يقول...

ده انتوا عيله غرييييييييييبه يعنى الواد لطش بنطلون اخوه و الرايق برضه و فرنسا لاطشه العبايه من اختها
الواحد يلحق يقفل دولابه بالمفتاح
اه ماهو الامر معاكم ميسلمش خالص
عايزين واحد تريه بلانش عشان ازاله بقع الشمس من البشره مش ينفع برضه و لا ايه و لو سمحتم بسرعه عشان الشمس سخنت قوى و الواحد خلاص اتحمص

الدفاع يقول...

يا جماعه الطائر الحزين ده يبقى اخويا اخويا بجد وحقيقى اخويا ضنايا يعنى
ولو سمحتوا ترجعوله المنتلون بتاعه علشان ماضطرش اسفا الى التدخل وبكل حسم
ولقد اعذر من انذر
تحياتى للجميع

همس الاحباب يقول...

فرنسا هانم
هههههه
لا ما تخافيش يا مامتى
لسه فى اتنين فى القطب الشمالى المتجمد ما عرفوش الخبرده
نظرا لعدم وصول قناتنا الفدائية اليهم حتى الان اصلهم ما عندوهمش طشت غسيل

همس الاحباب يقول...

الطائر الحزين
ما تقول انت يا عم الفيلسوف
مش انت سبب المشكلة
قول الحل
ولا ايه رايك تيجى نولع فى المدونة ونسيب البت حنين جوه
فكرة جبارة خد البنزين اهو
وكماان ولاعة صينى

همس الاحباب يقول...

صيلانية طالعة نازلة
هههههههه
والنبى اقفلى الدولاب كويس
بس لو سمحتى قوليلى على مكان المفتاح انتى عارفة ان مش بحب البس حاجةمش بتاعتى
وعندك واحد تريه بلانش وكتر الدقة

همس الاحباب يقول...

الدفاع
ايه يا عم اسامه يعنى جاى تهددنا
ما احنا عارفين
وبعدين البنطلون رجع يا عم الحج هو اتروب فى الروبة بس رجع
ولا انت غاوى قضايا وتدخلات القوى العظمى ومجلس الامن
وبعدين اصدار مذكرة توقيف للدكاترة عبده الر ايق
سيبك انت من موضوع المنتلون وعايزك ترفع قضية على العيلة المستبدة بتاعت الضاحكون
منور يا سمسم

الفراغ يقول...

ربنا مايحرمناش منك
بس الحمد لله انى مش من العيله بتاعتكم دى
والحمد لله مقاسى مايجيش عدكم خالص
ّآل جلابية اختها آل
طيب مانا شيفاكى من كام بوست لابساها
دى بتاعتك وانتى بتأجريها بالساعه ..انا عارفه..طيب هاتستفيدى ايه يافرنسا لما تحوشى الفلوس على قلبك..مالرايق جوزك وحبيبك..هايعملك بيها مشروع

انا ماشيه من هنا..ماليش دعوه
انتوا عيله واحده وماليش اتدخل بينكم
وصحيح الفلوس بتاعتك..بس برضه ولادك اولى بيها
على الاقل يجيبوا كل واحد بنطلون عدل
بدل الفضايح..وكلنا سامعين اهو فى المدونات اللى جنبكم
ربنا يخليكم لبعض

Mysara يقول...

:)) :)) :))

أحلى حاجة في الحلقة نهايتها :)

بالتوفيق يا جماعة...

همس الاحباب يقول...

الفراغ
منورة يا ماما
والحمد لله ان مقاسك مختلف
احسن دى عيلة مشكلة
كان زمان دولابك اتنقل هنا
هههههههه
قوليها فكى الكيس يا فرنسا انتى والرايق
العيال حالهم يغم بقوا اطفال شوارع
تحياتى وتقديرى لحضرتك

همس الاحباب يقول...

ميسرة
الحمد لله ان النهاية عجبتك
ومنورنا دايما
وسعداء جدا بتواصل حضرتك

عبده الرايق يقول...

هههههههههههههه
هاااااااااااى ايفرى بدى
ههههههههههه
حتى انتى يا فرنسا طلعتى يتشحتى الجلابيه من اختك ؟؟؟
على راى الشاعر الكبير حين قال
بطلوا ده واسمعوا ده يا لسه نشوف وياما فرنسا هانم يا وقعه سوده بتشحت البيجااااااااما
بطلوا ده واسمعوا ده

عبده الرايق يقول...

الطائر الحزين
بجد والله يا ايهاب دايما بيعجبنى جدا القفله بتاعه البوست بتاعك
دايما متميز يا طائر
قشطه ياعم

عبده الرايق يقول...

ابنائى وبناتى الضاحكون والضاحكات
انا مشغول عنكم فعلا لكن معاكم بقلبى
والدليل انى جريت اول امبارح مسافات طويله حوالى 10 متر ولقيت نفسى مش بنهج وقلبى مش بيدق
فين قلبى يا بشر ؟؟؟؟؟؟؟
اتاريه مع الضاحكون فى المدونه
تحياتى القلبيه لكم جميعا

همس الاحباب يقول...

عبده الرايق
سلامة قلبك يا رايق
انت بعد ده كله مش حسيت بحاجة
احب اطمنك على قلبك
قلبك فى ايد امينة
لا مش امينة رزق
هو فى ايد حريصة
حريصة قريبة ونيس
من الاخر كده مفتقدينك يا روقة