الاثنين، يناير 19، 2009

الرايق ومزرعه السمك

الرايق :- هااااااااى ايفرى بدى .. اووووووه ... نو نو نو ... مسز سقراطه عندنا .. يا مرحبا يا مرحبا .. احنا ..اوور هاوس فيرى فيرى نور انهارده .. ايه النور ده ؟؟ ايه الجمال ده ؟؟ ازيك يا سقراطه


سقراطه :- نعم ؟؟؟؟؟؟؟؟؟؟؟؟؟؟؟؟


الرايق :- فى ايه يا اخت الرايق العزيزه ... طبعا اخت مراتى تبقى زى اختى بالظبط


سقراطه :- نعم ؟؟؟؟؟؟؟؟؟؟؟؟؟؟؟؟

الرايق :- انا مبسوط انا فرحان انا فيرى فيرى هابى تو سى يوو مسز سقراطه

مسز رايق :- نعم ؟؟؟؟؟؟؟؟؟؟؟؟؟


الرايق :- قومى مسز رايق حضرى اجدع غداء عندك لاختى وحبيبتى العزيزه الغاليه سقراطه هانم

سقراطه :- نعم ؟؟؟؟؟؟؟؟؟؟؟؟؟؟؟؟؟

الرايق :- ايه يا جماعه ؟؟ فى ايه ؟؟؟ مفيش على لسانكم غير كلمه .. نعم .. ايه ؟؟ الحروف الابجديه 23 حرف .. نسيتوها كلها ولا ايه ؟؟

سقراطه :- لا ابدا بس مش عوايدك يا رايق ... قولنا انت فى ايه ؟؟؟ .. وبعدين الحروف الابجديه 28 حرف يا شاطر

الرايق :- نو نو نو ... ناثينج .. مفيش اى حاجه .. انا بس فرحت لما شوفتك ...

سقراطه :- من الاخر كده يا رووقه .. عايز كام ؟؟؟

الرايق :- نو نو نو ...... فلوس نو .. مانى نو .. انا معايا فلوس كتير والحمد لله .. حتى اسألى اختك مسز رايق

مسز رايق :- ههههههههه .. فلوس كتير؟؟ .. اما اقوم ادور على حاجه ناكلها احسن من الكلام اللى مش جايب تمنه ده

سقراطه :- استنى ياختى ادخل معاكى المطبخ لحسن الشمس هنا سخنه قوى .. والظاهر كده فى ناس اخدت ضربه شمس فى نافوخها

الرايق :- بصى يا سقراطه .. من الاخر كده وعلى بلاطه .. انا عندى ليكى مشروع هيكسب الطاق طاقين .. يعنى لو دفعتى 10 الاف جند هتاخديهم بعد شهر واحد 30 الف جند .. يعنى هتكسبى 20 الف جند انتى النص وانا النص

سقراطه :- مشروووووووع ؟؟؟؟ ومعاك انت يا رايق ؟؟؟ هههههههههه اهه ده اللى مش ممكن ابدا .. وان كنت ناسى افكرك

الرايق :- بصى يا سقراطه .. بلاش نتكلم فى الماضى .. خلينا ولاد انهارده .. وانا اوعدك لو دفعتى واحد جند هتاخديه 3 جند

سقراطه :- طيب خلينا وراء الكداب لغايه باب الدار .. مشروع ايه بقى ده ؟؟؟؟؟؟؟

الرايق :- مزرعه سمك .. اللحمه دلوقتى ب 25 جند الكيلو والناس دلوقتى كلها سابت اللحمه وبتاكل سمك

سقراطه :- ههههههه اللحمه ب 25 جنيه ؟؟؟؟؟ ... صحيح مانت معذور .. مبتشتريهاش .. وبعدين انت بتفهم فى السمك ؟؟؟

الرايق :- اوبسلولتلى .. بالتاكيد بفهم فى السمك .. احنا عيلتنا كلها بتفهم فى السمك من ايام الفراعنه ... انتى شفتى لوحه نمرر ؟؟؟

سقراطه :- لوحه مين يا خويا ؟؟؟؟

الرايق :- لوحه نمرر يا متخلفه .. الملك مينا .. موحد القطرين ولابس التاجين

سقراطه :- شفتها فى الكتب .. مشفتهاش فى الحقيقه

الرايق :- طيب كويس .. الحمد لله .. شوفى بقى يا سقراطه .. فى لوحه نمرر .. على الجنب كده .. مكتوب ان عيله الرايق اول ناس زرعوا السمك فى مصر القديمه اول ما نزل المصرى القديم على النيل طوالى .. والملك شبلليون اللى فك رموز حجر رشيد قال .ان زراعه السمك فى مصر اذدهرت ايام تولى عيله الرايق لحكم مصر سنه 9866 ق م

سقراطه :- الملك شبلليون ؟؟؟ ههههههه .. اسمه شمبليون .. وده كان عالم فرنساوى مش ملك ؟؟؟

الرايق :- ياستى عالم ولا عالمه ؟؟؟ ملك ولا كتابه ؟؟..هو احنا هنتجوزه ؟؟؟ المهم قولتى ايه فى المشروع ؟؟؟

سقراطه :- طيب وفين المزرعه دى ؟؟؟

الرايق :- هو ده الكلام ... بسبس اذ بسبس .. بصى يا ستى .. ابن عمى سعيد الرايق عنده ارض زراعيه فى الصعيد .. هاعرض عليه المشروع .. وبدل ما يزرع قطن وقمح والكلام الفاضى ده .. اخليه يزرع سمك

سقراطه :- نعم ؟؟؟؟؟؟؟؟؟

الرايق :- انت رجعتى تانى لنعم ؟؟؟

سقراطه :- ارض ايه وزرع ايه انت فاكر السمك بيتزرع فى الارض ؟؟؟

الرايق :- طبعا يا متخلفه ... امال بيتزرع فى الهوا .. طبعا بيتزرع فى الارض .. وانا سألت الواد العلامه الكبير حسن باشا الفراش قالى ..السمك يا دكاتره عبده باشا بيتزرع فى الارض الطينه مش فى الارض الرمليه والبذور بتاعته شوك السمك .. كل شوكه نزرعها تطلع لنا شجره كبيييييييييره وتطرح سمك بالهبل... ايه ؟؟ سقراطه ؟؟ مسز رايق ؟؟؟ انتم قمتوا ليه ؟؟ رايحين فين ؟؟ سيبتونى لوحدى ليه ؟؟؟ .... فى ايه ؟؟؟ فى ايه يا بشر ؟؟؟؟
ايه الناس الفالصو دول ..هو انا قلت حاجه غلط ؟؟؟؟

هناك 57 تعليقًا:

صيدلانيه طالعه نازله يقول...

و الله يارايق اللى سماك رايق ظلمك انت المفروض يسموك الناصح الفاهم العبقرى
انت صح يا بنى هما اللى مش فاهمين حاجه
و المعلومه الجديده ان اثناء زراعه السمك البورى يتسقى ميه مالحه و البياض ميه بيضه يووووووووه قصدى حلوه اما فواكه البحر بنسقيها عصير فراوله لو عايزها حمرا و عصير جوافه لو عايزها صفره
بس متنساش نصيبى من المحصول اما تيجى تلمه لانى شريكه معاك بالمعاليم يوووووه قصدى الانفورميشانز

عاشقه الرومانسيه يقول...

والله بجد
الله ينور عليك

معلومات قيمه فعلا

بيتزرع فى الارض الطينه مش فى الارض الرمليه والبذور بتاعته شوك السمك ..

ومين الواد العلامه الكبير حسن باشا الفراش ده؟


والله انت دماااااااغ ورايق فعلا

يعنى اسم على مسمى

تحياتى بوست جمييييييييل فعلا

أحــوال الهـوي يقول...

انا عندي مشروع ممكن نتشارك فيه
نزرع السمك في صوب والسمك البلطي يبقي حوت
و الله انت عسل و بسمه حلوه في وقت محتاجين الرواقان بتاعك

شكرا لك
و تحياتي

صبرني يارب يقول...

ههههههههههههههههههههههههههه

والله وحشتنا

طيب بالنسبه للسمك الى هايطلع بيبقى اخضر وبعدين يحمر ولا ايه ظروفه

بص بقى انا تعمل حسابي فى شويه سمك اخضر مبطرخ ههههههههههههههههه

تسلم يا رايق وربنا يكرمك يارب وعايزه اشوووووفك بليييييز لازم تزورني وتقولي رايك فى القصه الى انا باكتبها الايام دي

شفـقــة و إحســــان يقول...

افادك الله يا رايق بقى يا راجل السمك بيتزرع وكل شوكة بتعمل شجرة كبيرة
طيب انا عندى حتة ارض ممكن تاخدها تعمل عليها المشروع والشوك بالنص اقصد الايراد بالنص ايه رايك؟؟
البوست تحفة
تحياتى

Che يقول...

انت كده لازم تتعرف على صاحبى وجدى ... دماغه فى المشاريع زى دماغك بالظبط

غير معرف يقول...

ههههههههههههه

لا والله
طيب اذا كان الموضوع كده ممكن تشركنى معاك فى المشروع وانا عليا شوك السمك

ههههههههههههه
سلامى يا اريق رايق فى الدنيا

حنين القلب يقول...

يا لهوووووووووووى

الرايق عمل المزرعه دى امتى ؟؟

يا بابتى انا معاك وهطلع على الشجرة والم كل السمك وهروح السوق اجيب السماد الزراعى كمان

ايوووووووووه ربنا يخلي دماغك يا بابتى يا ابو الافكار الجهنميه

حنين القلب يقول...

بابتى

بقولك ايه
ما تسيبك من مشاريعك اللى بتصرف عليها من فلوسنا والاخر تبوظ وتعبنا يروح على الارض

انت اخدت منى 29 جند اللى الباشا بتاع العربيه ادهملى بعد ما جرب عليه فرامل العربيه بتاعته وكسر رجلى


حرام عليك
مش انا اولى اجيب جبس ولا حتى ربع كيلو لحمه علشان الكسر ده

بابتى بطل اخترعات

حنين القلب يقول...
أزال أحد مشرفي المدونة هذا التعليق.
حنين القلب يقول...

روقه
نسيت اقولك الحق الواد خالد همس الاحباب اخويا مسكوه فى الاتوبيس وهو بيقنع الناس بفكرة مشروعك
خدوه على القسم وضربوه على قفاه لما احول
والاخر حولوه على مستشفى العباسيه وبياخد جلسات كهربا

زمانه مظبطينه على 220 فولت
يا بختك يا خالد زمانك من كتر الكهرباء نورت
ده انت بقيت احسن من السد العالى
ياااااااااا بختك

حنين القلب يقول...

روقه

تسلم ايدك
البوست زى العسل
ربنا ما يحرمنا من افكارك ولا بوستاتك يا بابتى

همس الاحباب يقول...

حمدلله على السلامة اسرة الضاحكون
انا كنت فاكر انكم اتكملوا لاخر الشتا بيات شتوى
المهم الفكرة تجنن يا روقة
انا معاك
انا عندى 5 كيلو شوك سمك مستورد
الشوكة بتطلع 3 شجرات وكل شجرة بتطلع حوالى 100 سمكة
وعندى ارض مناسبة كماااان للزراعة
ايه رايك
انت تجيب حسن الفراش وتيجى تزرعوها
ومش محتاج منكم ولا حاجة
هما بس 5 كيلو سمك كل يوم و200 جند ايجار وحلال عليكم الباقى
هههههههه

همس الاحباب يقول...

مزرعة سمك
وعايز تشارك سقراطه
يا جدع حرام عليك
مش كفاية 10000 جند اللى نمت عليهم
وهى سامحت فيهم علشان مسز رايق
وبعدين عيلة الرايق هى اول من زرع السمك فى مصر
وانا بقول ليه كل ما باكل سمك بحس بروقان ويبقى هاين عليا اكسر البيت
باللى فيه

همس الاحباب يقول...

حنين القلب
مسكوا مين يا بنت انتى
ويا ما انا هنضرب على قفايا انتى رحتى فين
ولا نسيتى لما كنا بنغيلك يا قفا اه يا قفا
وبعدين لو نفسك فى كهربا ممكن تنزلى عند البقال اللى جنبك وتشترى بنص جنيه كهربا ناشفة
ولا اقولك انا متبرع بكابل السويدى ضغط عالى ليكى علشان نشحنك بايه صباحا ومساء
وهيصى يا ستى اتبقى 2200 فولت مش 220 بس

حنين القلب يقول...

همس الاحباب

مين اللى جابه ده؟؟
وربنا انت احسن حاجه ليك ينفوك لسجن جونتانامو

ولا اقولك
بص انا هبلغ عنك مش تتحرك من مكانك

وكنت بتغنيلى يا قفا يا قفا
بلا خيبه
انت عمرك غنيت غير ايها الراقدون تحت التراب وانت فى الترب بتلم القرص بتاعه الرحمه والنور

ولا اقولك انا متبرع بكابل السويدى ضغط عالى ليكى علشان نشحنك بايه صباحا ومساء

هتتبرع لا والنبى كفى نفسك يا بتاع الكهربا انت
يا ابنى ده انت اصلا سارق الكهربا بتاعه بيتكم
ربنا يصبرك يا ام همس يا حبيبتى

فرنسا هانم يقول...

مبروك يا ولاد عوده الروح لينا تانى بعد الاجازه
ومبروك انتصار المقاومه فى غزه
ومبروك رحيل المضروب بالجزمه

فرنسا هانم يقول...

هههههههههههههه
هههههههههههههه
هههههههههههههه
والله والله والله ضحكت من قلبى على البوست ده يا رايق
هههههههههه
ههههههههههه
هههههههههه
ربنا يجازيك عننا خير

فرنسا هانم يقول...

اما بقى عن المزرعه
انا موافقه
بس
مفروض يا رايق تعمل الشركه دى مع مجموعه قطط
ايوه
قطط
من بتاعه نياوووووووووووووو
احسن من يدلك على شوك السمك
اروح منك فين بس يارووووووووووووقه

فرنسا هانم يقول...

حنين القلب
الف سلامه ليكى يا روحى
والله والله والله
انا كنت الفتره اللى فاتت ماليش اى نفس ادخل نت ولا حاجه
كنت زعلانه من مشاهد الحرب على غزه
ومعرفتش ان انتى تعبانه
الف سلامه ليكى بنتى العزيزه
والعتب على ابوكى الرايق
مقاليش حاجه خااااااااااااااالص
مره تانيه الف سلامه ليكى

فرنسا هانم يقول...

همس الاحباب
ازيك يابو همس
ايه اخبارك ؟
وحشنى كلامك
ووحشانى اميلاتك
مبروك فعلا عودتنا بالسلامه
مع انى لسه عارفه انهارده ان فى بوست تزل
لكن اعمل ايه فى الرايق
دايما عنده مفاجأت

غير معرف يقول...

السلام عليكم ورحمة الله وبركاته
حمدالله على سلامتكم اخوانى فى الله
طبعا انتوا متعرفونيش لان دى اول مرة اعلق عندكم وتالت او رابع مرة اعلق فى مدونة على وجه العموم
لكن انا عايزة اقولكم ياريت متحرموناش منكم
وليا رجاء عند عبده الرايق
انا اول ماعرفت مدونتك ماسبتهاش الا لما قريتها كلها
وكنت هموت من كتر الضحك
ولما رجعت اشوفك كتبت جديد لاقيتك بعد ماضحكتنى من قلبى زعلتنى برده من قلبى عشان قفلت مدونتك
اكيد انت ليك اسبابك واكيد اللى حصل يزعل
لكن تفتكر عشان واحد ولا اتنين ولاحتى الف تحرم ناس كتيرررررررررررررررر من الابتسام عن طريقك منهم اللى بيعلقوا ومنهم اللى زيى بيقروا ويضحكوا ويشاركوا المدون بالقرأة بس بدون تعليق لسبب او لأخر؟؟؟؟؟؟؟؟؟؟؟ اتمنى الاقى مدونتك رجعت تانى
واتمنى محدش ابدا يقرر يقفل مدونته منكم خدوا اجازة براحتكم لكن ارجعوا تانى لمعجبنكم
اختكم فى الله ايمان مصرى

عبده الرايق يقول...

صيدلانيه طالعه نازله

ذاتس فيرى فيرى جوووود
معلومات قيمه للغايه
والغايه تبرتر الوسيله
ووسيله المواصلات صعبه جدا
انا متشكر جدا على الانفورمايشانز
وانا فيرى هابى تو وورك ويز يوو
بس عايز اعرف هل من الممكن ان نسقى الزرع بعصير فواكه من الخلاط
عادى يعنى ولا بست
وهل نسقى بالكوبايه ولا بالشالمووه
ارجو الافاده
وبعدين انتى معايا فى المشروع
واحب اطمنك جدا لان مصدر موثوق من موسوعه حسن باشا الفراش قالى لو عايز سمك سهليه يبقى لازم تبدر الارض عسليه
بس فى حاجه واقفه معانا فى المشروع
وهى
هنبيع فى سوق العبور ؟
ولا هنصدر للخارج ؟؟
ولا هناكل احنا السمك كله ؟؟؟؟؟؟؟؟؟

عبده الرايق يقول...

عاشقه الرومانسيه
اووووووه
نو
نو
نو
ازاى متعرفيش العلامه الكبير حسن باشا الفراش ؟؟؟؟؟
عموما ملحوقه
اقولك
العلامه الكبير حسن باشا الفراش بيشتغل معايا فراش فى الحى
لكن عنده علم جهبز
ولا علم نيوتن فى الهندسه
ولا علم الحسن ابن الهيسم فى الاقتصاد
ولا علم احمد زويل فى الطب
ولا علم عباس العقاد فى الرياضيات
الجهبز الكبير حسن باشا الفراش هو منبر فكرى ومصدر الهامى وهو العقل المدبر للكون كله
وعلشان اثبت للكل امكانيات حسن باشا الفراش اذكر واقعه حصلت معاه من خمس سنين
كنت بسأله الساعه كام دلوقتى ؟؟؟
بص فى التليفون وقالى الساعه 12 وربع
شوفتى العظمه
شوفتى العبقريه
شوفتى العلم

عبده الرايق يقول...

أحــوال الهـوي
السمك البلطى يبقى حوووووووت ؟؟؟؟؟
نو
نو
نو
ثبت علميا بما لايدع مجالا مغناطيسيا للشك ان السمك البلطى لما بيكبر بيبقى درفيل
وانا واخد فى البلطى دكتوراه من جامعه بحيره ناصر ومسئول مسئوليه تامه عن كلامى

عبده الرايق يقول...

صبرني يارب
بصى يا صبرنى يارب
السمك حسب كلام حسن باشا الفراش بيمر ب 3 مراحل
المرحله الاولى مرحله الانبات
وبيبقى عباره عن شجر كبير طوله 82 متر مربع
وبعدين مرحله النمو وبيبقى عباره عن شجر صغير طوله مترين
وبعدين مرحله التفسيخ وبيبقى سمك عادى بس رجاء اللى ياكله يخلى باله من البذور

عبده الرايق يقول...

شفقة هانم واحسان بك
طيب هى الارض ملك مين ؟؟
شفقه هانم ؟؟؟
ولا احسان بيك ؟؟؟
عموما
انا موافق على المشروع
بس بشرط تكون الارض طينيه مش رمليه
وتكون اعلى من مستوى سطح البحر ب 500 متر علشان السمك ميهربشى مننا
وتكون قريبه من البترول علشان نشوى ونقلى براحتنا
ويستحسن تكتبوها باسمى علشان السمك ميزعلشى منكم

عبده الرايق يقول...

Che
وانا يسعدنى انى اتعرف على ناس دامغها صاحيه زى حالاتى وحالات الباشا الكبير حسن الفراش

عبده الرايق يقول...

shayma
وانا موافق يا شيماء
بس حاولى تتصرفى فى كام الف جند كده نمشى بيهم المشروع
وبعدين حاولى تجيب الشوك بسمكه
يعنى تجيبى 10 او 30 كيلو سمك
وانا اطلع الشوك منهم وازرعه على مهلى
طبعا كل شوكه وليها الموسم بتاعها

عبده الرايق يقول...

حنين القلب
طبعا بنتى العسووووووووووله معايا
تعالى هنا جنب ابوكى
ولمى السمك اللى واقع من الشجر
ده احنا هنكسب مكككككككككسب
ياناس يا شر
امنعوا القر
تعالى من هنا لحسن الناس يحسدونا يا حنين يا بنتى

عبده الرايق يقول...

حنين القلب

نو
نو
نو
نو
نو
نو
نو
نو
نو
نو
احنا لانقبل العوض ابدا
نيفر
نيفر
نيفر
نيفر
وخصوصا اذا كانوا 29 جند
لكن لو 100 جند ماشى نقبل
ولو 200 جند نرحب
ولو 400 جند نجرب فى رجلين وايدين فرنسا هانم

عبده الرايق يقول...

حنين القلب
خالد فى العباااااااااااااااااااسيه ؟
نو
نو
نو
انا زعلان منه
مخدنيش ليه معاه ؟؟؟
هى العباسيه دى فسحه ولا ايه ؟
اكيد هيقضى ويك اند زى العسل هناك

عبده الرايق يقول...

حنين القلب
ولا يحرمنا منك
والف مليار سلامه ليكى

عبده الرايق يقول...

حنين القلب
ولا يحرمنا منك
والف مليار سلامه ليكى

عبده الرايق يقول...

همس الاحباب
خالوووووووووووووووود
حبيب قلبى
واحشنى جدا
حمدلله على سلامتنا كلنا
اما بقى عن السمك
انا موافق
تعالى الارض وخد اى سمك يعجبك الشجر بالهبل
اما عن الايجار
200 جند كل سنه ؟؟
ولا كل عقد ؟؟؟
ولا كل قرن ؟؟؟
حدد يا باشا ده حتى انت راجل محاسب
تحياتى ليك يا خالوووووووووود

عبده الرايق يقول...

همس الاحباب
شفت بقى فايده اكل السمك بتاع الرايق
تكسير
وتحطيم
واصرار

عبده الرايق يقول...

فرنسا هانم
سلامات يا فرنسيس هانم
تحيا جمهوريه مصر العربيه ..بالعند فى فرنسا

عبده الرايق يقول...

فرنسا هانم
بلاش اسلوب التمحليس ده يا فرنسا
اكيد مزنوقه فى قرشين حكم انا عارفك
بقولك صح
فى اميل ضرورى بعته ليكى بالليل ياريت تردى عليا ضرورى جدا اول ما تدخلى على النت

عبده الرايق يقول...

فرنسا هانم
قطط ؟؟؟؟؟؟؟؟؟
هاعمل المشروع مع القطط ؟؟؟
نو
نو
نو
انا اشجب
انا اعترض
انا غير مبسوط
ماشى يا فرنساااااااااااااااااا

عبده الرايق يقول...

ايمان المصرى
والله انا كنت حفظت المدونه بتاعتى
وبعدين جات احداث غزه وماكنش ليا اى نفس انى اعمل اى حاجه او اكتب اى حاجه وخاصه ان كل كتاباتى كوميديه
والوقت ده مش هتنفع فيه الكوميديا
عموما
انا فعلا رجعت المدونه تانى
وشكرا جزيلا على اهتمامك

Mafrousa يقول...

عوداااااا حميدا عيلة الرايق
ازيكم جميعااااااا
و الله ليكم و حشة و خصوصا بعد الهم و النكد اللى الواحد كان عايش فيهم بسبب الاحداث
و الله رسمتوا البسمة تاني على وشوشنا
ربنا يكرمكم يارب
ازيك يا فرنسا ان شالله بخير يارب
اازيك يا رايق و صحتك ازيها دلوقتي؟
البوست كالعادة تحفة من مجاميعه
ههههههههههه
بس حلوة حكاية مزرعة السمك ديه
هههههههههههههههه
انا سمعت بقا ان السمك لو عاوزه بحري تسقيه بمية البحر
و لو عاوزه بلطي نيلي تسقيه بمية النيل
هههههههههههههه

ههههههه
و لو عاوزة مدخن
هههههههههههههههه
تولع فى المزرعة
ههههههههههههههههههه

و الله وحشتونا و نورتو من تاني

القلم السكندري يقول...

غلط مين لا سمح الله!!



تحياتي لقلمك الساخر

مهرة سالم يقول...

يا عم الرايق ...
غشتقت لكتاباتك..
لي فتره مش بدخل عندكم...
.......
هههه
السمك بيتزرع بالشوك...
وعارف إزي بيزرعو البقر..
بتاخد حتت أرض كده زي بتاعت مزرعة السمك...
وبترمي فيها سكر آه سكر وسيبها يوم وحتشوف بقر صغير قد النمله...
مالي الأرض...
.......
دمت بخير

عاشقه الرومانسيه يقول...

زيك ياريق النهارده
يارب تكون رايق يا رايق

اتفضل بقى عندى لان ليك امانه لازم تاخدها فى البوست الاخير عندى

لالالالالالالالالالالا
مش جنود انا مفلسه

بس ابقى شرفنى بالزياره

Doba يقول...

كنت داخلة النهاردة وناوية اقولكم وحشتونى قوى ومفتقداكم مووووووت

لقيت بوست رسم احلى ابتسامه لليوم كله والشكر ليك يا روقه

ربنا يبارك فيك
ويخليلنا حسن باشا الفراش ابو افكار لووووذعية مذهبة
====================
وحشتوووووونى قوى قوى بجد
وربنا يديم البسمة والود

هبة

samourai 4 ever يقول...

فيرى فيرى فيرى فانتاستيك
اوه نو مونديو
يا مقطع السمك و ديلها انت
من شجرة بيتكم
هههههههههههههههههههههه

و دمتــــــــــــــــــــــم

david santos يقول...

Excellent work!
Congratulations!!!!
Have a nice week.

son's egypt يقول...

السلام عليكم
علي رايم السمك ارخص من اللحمة دلوقتي
بس السمك علشان يتزرع عاوز مياة كتير
يعني جهز نفسك لفواتير المياة اللي حتيجي

عبده الرايق يقول...

واحده مفروسه
ازيك يا مفروسه
انتى اللى وحشتينا بجد والله والله والله
اطمئنى على الرايق عمر الشقى بقى
انا بخير والحمد لله
ومتشكر على المعلومه المهمه بتاعه السمك المدخن
لكن مش هاولع فى المزرعه
هما حجرين شيشه جنب المزرعه والسمك كله يدخن لوحده

عبده الرايق يقول...

القلم الاسكندرانى
ايووووووووه ياجدعااااااااااان
وانا اللى كنت فاكر نفسى علطت
ادينا طلعنا مش علطانين والدليل شهاده القلم الاسكندرانى
يعيش القلم الاسكندرانى
ى ى ى يعيش يعيش يعيش

عبده الرايق يقول...

نهــــــــــار
اهلا وسهلا باحلى نهار
بس حكايه البقر اللى قد النمل دى مش كويسه
طيب هنطلع الجلد والكرشه والكبده والعكاوى منين ؟؟؟
ولا البقر ممكن يكبر ؟؟؟؟

عبده الرايق يقول...

عاشقه الرومانسيه
امانه ؟؟؟؟؟؟؟؟؟؟
الله انا بحب الامانات
بس تبقى ايه ؟؟؟
مش فلوس ؟؟؟
طيب مش مشكله اهى اى حاجه ممكن نبيعها ونجيب تمن المعسل
اروح بقى اتفق مع سواق لورى علشان اجى استلم الامانه

عبده الرايق يقول...

Doba
هبه
ازيك يا احلى اخت للضاحكين
شفتى حكايه الضاحكين دى علشان مجروره بللام وعلامه الجر الياء والنون
ههههههههههههه
ههههههههههههه
اصلى برضه واخد دكتوراه فى النحو والصرف
والله يا هبه انتى اخت لينا كلنا وبجد بنستنى تعليقك فى الضاحكون
سيبك من حرف الجر ال فى
هههههههههههه
كنت بقول والله بجد بنستنى تعليقك ربنا يخليكى اخت دايما لينا

عبده الرايق يقول...

samourai 4 ever
انا فيرى فيرى فيرى
ثانك يووو
بط ووز
قصدى لكن احنا معندناش لسه شجر
فى انتظار المشروع القومى لعائله الرايق
ودمتم

عبده الرايق يقول...

david santos
عليا النعمه احنا ثانكث
اند فيرى فيرى ثانكث
واذا كان العمل ممتاز فهو يعود لفريق العمل بالمدونه
شكرا لك
وسنه كامله ياسيدى لطيفه ليك مش اسبوع بس

عبده الرايق يقول...

son's egypt
لا متخافشى انا دارس كل حاجه
وهنقى بذور اتلسمك اللى تتحمل العطش
جذور جملى يعنى
هههههههه
تحيه طيبه لك

تايهه في زمن عاقل يقول...

معلومات جديده و قيمه

و البوست جميل قوي

بجد أنتم مجموعه جميله قوي لأنكم بتقدروا ترسموا البسمه في قلوب الناس

بس قولي صحيح هو شجر السمك دا هيتحصد أمتي