الأحد، ديسمبر 21، 2008

بيت الاشباح

النهارده فرحى يا جدعان عايزه كله يبقى تمام
ايوه اخيراً
وبعد وجع قلب وجمعيات وسلفيات .ونوادر وحكايات
الشقه جهزت وطبعا علشان انا بنت حلال مصفيه ..وبحب اللوبيا والملوخيه ..لقينا شقه فى رشدى قريبه جدا من البحر... والراجل صاحب البيت الله يعمر بيته متساهل معانا جدا تخيلوا شقه فى رشدى 4 غرف وريسبشن ومطبخ و2 حمام لا وكمان سوبر لوكس بكاااام 5000 جنيه....طبعا مش مصدقيينى .. لكن هو ده اللى حصل ..وقال لينا كمان ان اول ايجار شهرين هديه منه لينا... بمناسبه جوازنا المبارك .... وكنا شويه وهنبوس ايده وامى تزغرد.. وانا ارقص وخطيبى يبوس فى الراجل زى ما يكون لسه راجع من العراق
لكن ...وما اداراك ما لكن ......

الجمعه اللى قبل الفرح حصلت حاجه غريبه اوى.....( الاطفال الصغيريين يبتعدوا ) .... بعد ما طلعنا العفش وفرشنا وروحنا خلاص ...تانى يوم لقيت الجيران اللى فى العمارة اللى فى وشنا بيتصلوا بيه وبيقولوا ليه الحقى العفش بتاعك كله فى الشارع...انا قولت ازاى ومين اللى نزله دحنا فى الخامس طيب ولو حرميه مش سرقوا العفش ليه؟؟؟؟؟.... قالت ليه مش عارفه تعالى وخلاص وطبعا لان العمارة اللى انا فيها مش فيها ولا بواب ولا جيران غيرى روحت وطلعت العفش تانى وفرشنا العفش من جديد ....وخلاص


وجه اليوم الموعود
والفرح خلص وجوزى عمال يغنى اسبقنى يا قلبى اسبقنى ع الجنه الحلوة اسبقنى ....وانا اغنى على عش الحب وطير ياحمام ....والمعازيم يغنوا الجوز الخيال والعربيه على راسى يا هانم وعنييا ... ووصلنا الشقه واحنا الاتنين بنغنى وابتدى وابتدى المشوار واه يا خوفو واه يا خفرع من اخر المشوار ... وفتحنا الشقه ولقيت النور كله مولع والتليفزيون والغساله والتسجيل والمرواح حتى الكشاف الاحتياطى ...كله كان شغال

بعلى العزيز بص لى وقالى : مين عمل كده ؟؟؟؟ قولتله وانا مزبهله : ولا اعرف انا كنت هنا امبارح وطفيت كل حاجه قبل ما امشى.... قالى وهو بيحاول يتماسك : يمكن تكونى نسيتيهم ....قولت: يمكن..... بس انا بقول فى سرى انا متاكده انى طافيه كل حاجه بس يلا خلى الليله تعدى.... قالى : قومى جهزى العشا ....دخلت اجهز العشا ومش لقيت عشا .. طبعا انا قلبى سقط فى رجلى ازاى ماما تنسى العشا ...اتصلت بماما . قالتلى : انا مجهزه العشا كله عندك فى المطبخ ...قولت ليها وانا فى حيره : خلاص يا ماما يمكن تكون قطه اكلته ....ماما سكتت ....راح جوزى سالنى فين العشا ؟؟؟؟ قولتله : مش لاقياه باين قطه اكلته... قالى: نعم نعم نعم ..هو من اولها هنصيع على بعض ولا ايه ؟؟؟ قطه هتاكل ديك رومى محشى حمام ...والحمام محشى فريك... وبرامين رز وصنيه بطاطس؟؟؟ ... قولتله : ممكن بتحصل فى احسن عائلات القطط ... قالى: لا يا حدوقه ..لا ياماما ..ده اهلك استخسروا الديك اللى مربينه ..عايزه تفهمينى ان القطه اكلت الديك بالعضم بتاعه ... وغمزت بالبطاطس .. وحدقت بالمخلل ؟؟؟ .. قولتله وانا بصراحه محتاره : ربنا يسامحك انا هتخمد من غير اكل.... قالى : خلاص يا روحى ولا يهمك ناكل اى حاجه خفيفه من التلاجه

قولت: ماشى.... ولسه بجيب الاكل لقيت النور قطع راح جوزى قالى هاتى شمعه قولت ليه مش عندى نسيت اجيبه قالى ماشى هنزل اجيب مهو يوم باين من اوله.. وفضل جوزى يبرطم وهو نازل على السلم وانا مش عارفه بيقول ايه ...
هو نزل وانا قولت ادخل ادام المرايا افك شعرى واسرحه وفتحت الكشاف اللى فى الموبيل وابص فى المريا والقى ورايا واحد مشنوق وعينه حمرا وبيبص ليه ويضحك

طبعاً صرخت وجريت على باب الشقه افتحه مش بيفتح وكان فاضل ثوانى وارمى نفسى من البلكونه ولقيت جوزى بيقولى : فيه ايه؟؟؟

قولتله : فيه حد مشنوق فى السقف فى اوضه النوم .... طبعا دى ليله الدخله جوزى عمل فيها عنتره بن شداد وقالى :ازاى استنى كده ادخل اشوف ...دخل وانا حاسه انه داخل على اعصابه وخرج يقولى: مفيش اى حاجه قولتله : ازاااااااى ؟؟؟؟؟ دنا شوفته بعينى؟؟؟ .. قالى : والله ما فيه حاجه معلش يا حبيبتى يمكن يكون علشان مش نمتى كويس من امبارح قولت يمكن يلا ننام وبكرة يحلها ربنا قالى يلا يا ام عيالى طبعا انا فى سرى بقول عيالك ابقى قابلنى لو شوفت منى صرصار بعد الخضه دى ..

وصممت منا نايمه فى اوضه النوم ونمت على كنبه الانتريه ..ولسه هغمض عينى لقيت النور جه وحاجات فى المطبخ عماله تتكسر الحلل بتطير والمغرفه بترقص وانا وقفت اتفرج على الحفله الغنائيه فى المطبخ ومحمد فؤاد بيغنى كامننا وجريت اصرخ وانادى على جوزى... جوزى قالى : فيه حاجه غلط انا مش فاهمها ...قولتله : فعلا باين الجوازة دى عليها لعنه الفراعنه ولا ايه ؟

قالى ننام وبكرة ربنا يحلها وعلشان اضمن انى اتخمد اخدت قرص منوم وجوزى كمان اخد ونمنا ولسه بفتح عينى ولقيت نفسى نايمه فى ميداااااااااااااااان


العفش كله فى الشارع واحنا نايمين فى الشارع والناس ملمومه حوالينا.. واللى يقول محدش قالهم ليه يا جماعه ؟؟ واللى يقول منه لله 5000جنيه فى يوم وانا قومت جرى على الشقه اللى عرفنا فى الاخر انها مسكونه فعلا بالجن والعفاريت .........

وسبنا الشقه وحاليا بندور على عشه ايجار جديد كانت معكم حنين المعفرته من امام احدى بيوت الاشباح

هناك 58 تعليقًا:

حنين القلب يقول...

هيييييييييييييييييه
اول تعليق
وبما ان البوست بتاعى
اعلق براحتى بقى
اروح اقرى اهه زياده فهم برضه
هههههههههههههههه

kochia يقول...

صحيح الحكاية دي ولا هزار ؟؟
بما انها مدونة الضاحكون ممكن اعتبرها هزار

لكن انا سمعت قبل كدة عن الحكاية دي فعلا
بس طبعا مش من حد مر في الموقف بنفسه

لو حصل بقي انه صحيح
الفلوس تطلع من عنين الراجل

صبرني يارب يقول...

ايه ده بت يا حنين انتى بتشتغلينا ؟؟؟

شكلها اشتغاله وربنا

هو بوست حلو اوي ودمه خفيف اوي بجد

وعلى فكره حصلت مع سلفتي بس فى شقه مصيف

بس يا عنيه كان جن دمه خفيف كان بيزغزغهم بس
هههههههههههههههههههههههه
اه والله
ويفتح الحنفيات كلها ويمشي وحركات من دي

بوسلت حلو يا حنين تسلم اديكى

همس الاحباب يقول...

حنين المعفرته ههه
وانا بقول ليه كل مابدخل المدونه الاقي حنين نايمه في الشارع بالعفش طلعت معفرته
يعني بعد كده الواحد يدخل بالمعوذتين

عبده الرايق يقول...

اشتاتا اشتوت
اشتاتا اشتوت
اشتاتا اشتوت
يااااااااااااااااااما
ايه ده ؟؟؟؟؟؟
وات ايز زيس ؟؟؟
انا خايف
انا
انا
انا جعاااااااااااان

عبده الرايق يقول...

عسل والله يا حنين
بوست جميل
والاحسن نوم الشارع
هههههههههههههههههههه
ده يابنتى تعود ليس الا
هههههههههههه
فاكره الايام اللى قضيتها العيله على الرصيف ؟؟؟
دى عيله الرايق يا ماما

عبده الرايق يقول...

عارفه يا حنين
انا زعلان على اول تعليق قووووى
بس كان عندى لقاء مع مشئولين فى الامم المتحده
قصدى فى القهوه المتحده
عموما
تسلم ايديكى
اجين
اجين كلمه انجليزيه معناها برافو عليكى

Adem Salhi يقول...

أخي العزيز؛
اكرر شكري مرة أخرى و لو يسمح لي المدونون المصريون ان أتمنى عليهم ان يضعوا لوغو التدوينة البيضاء منذ الآن لأن ذلك سيكون بمثابة الاشهار للحملة وهو ما سيزيد من عدد المشاركين انشاء الله؛ كما ان كل تدوينة تدعو الى المشاركة سيكون مرحبا بها
تحياتي و شكرا لكم

Punny_Punny يقول...

ده إيه الجوازة المتعفرتة دي
بجد تسلم إيديكي , و لا العفاريت هي اللي بتطلع الأفكار الحلوة دي !!!

vamo يقول...

ايه الحلاوة دي
بوست زي العسل
شكل القهر على الخمس تلاف جنية بيجيب بنوستات حلوة
مادام كده بقى
يارب تكون بوستاتك كلها حلوة
من غير ميتاخد منك فلوس ههههه

حنين القلب يقول...

kochia
هزار ايه يا كوشيا احنا هنهزر
نو
نو
نو
الحكايه طبعا تهريج مش هزار
بس عارفه فعلا فيه عندنا عمارة فى رشدى فيها جن وعفاريت
والله الناس اللى دفعوا فلوس ولا اخدوا ولا مليم
اخدو رعب بباقى الفلوس
ههههههههههههه
نورتينا

همس الاحباب يقول...

معلش بقى اول تعليق كان من الموبيل والنت كان ضعيف
نكمل تعليقات
الاول كل اللى يدخل المدونة يقرا اية الكرسى والمعوذتين طالما حنين هانم بقت معفرته والمدونة مسكونة يا جدعان

حنين القلب يقول...

صبرنى يا رب

والله عيب يا صبرنى انا برضه هشتغلك
طيب دنا بعمل زيك ومنزله البوست بصورة العفاريت
طيب هخليكى تصدقى
المرة الجايه تعالى اسكندريه وانا هاخدك العمارة ونبات فيها يومين
هههههههههههههههههه


انا العفريت اللى عندنا مش كان بيزغزغ لالالا كان عامل فيها عبيط حد يبقى مشنوق ويضحك

ربنا يخليكى ليه ولا يحرمنى منك ابدا
مووووووووووه دى لرحمه حبيبتى

همس الاحباب يقول...

هههههههههه
عفاريت فى ليلة الدخلة
والاكل اختفى انعملهم على بعض
طمعتى فى الاكل وتقولى القطة
نجيب القطة ونوزنها ونشوف الاكل راح فين
بلاش شغل عيلة الرايق ده

حنين القلب يقول...

همس الاحباب
اهه اديك عرفت ابعد عنى بقى لحسن ابعت ليك عفريتين يطولوك
هههههههههههههههههههههه
ااااه مهو انا اللى بنام فى الشارع مابلاش انت
انت اصلا يا ابنى ليل ونهار على الرصيف
ولا نسيت

لا مش تدخل خالص وريحنا منك

همس الاحباب يقول...

حلوة قوى قوى
عفاريت بتفهم والله وعندها مزاج
بترقص وتغنى وبتكسر فى الحلل
وجايبين محمد فؤاد
وبيغنى كامننا ههههههه
ههههههه
الجعان بيحلم برغيف عيش
هههههههه
صح النوم وبلاش تحلمى
ههههههه

حنين القلب يقول...

عبده الرايق

بابتى
ايه يا بابتى ده انت خايف وربنا عيب
قش حال لو مش كنت ماشى فى السكه دى وهاريتنا تحضير جن وفك اعمال سفليه وعلويه
نو
نو
نو
مش عبده الرايق اللى يخاف من حبه عفاريت تعالى نطلعهم سوا مش انت حافظ التعويذه ؟؟؟
بص روح كل وانا هستناك هالعب معاهم عقبال ما تيجى

همس الاحباب يقول...

والصبح لقيتوا الناس بتتفرج عليكم فى الشارع
هههههههه
تصدقى منظرك يفطس من الضحك
ولا الشمس تلاقيها حرقتك يا ولداه
بس ممكن سؤال
هو العفريت ده من ولاد الشوارع ولا ايه
ايه كل ما تطلعوا العفش ينزلة الشارع
مش عايز ينسى اصله ولا ايه
ولا يكونش عرف انك بنت الرايق
وبتحبى الشارع والرصيف زى عينيكى

حنين القلب يقول...

عبده الرايق
وربنا انت اللى سكر يا بابتى
منتا اللى عودتنا على كده
ليل ونهار شحاته والاخر جنب اى رصيف وننام

فاكره الايام اللى قضيتها العيله على الرصيف

اه يا بابتى دى كانت اسعد ايام عمرى
خصوصا رصيف المرسى ابو العباس
ايوووووووووه يا جدعان على ده رصيف

اللى رايح يدينى سندوتش كبده
واللى جاى يدينى جيلاتى
واللى يدينى نص جنيه يقولى روحى اتمرجحى بيه
وانت تاخد كله على الجاهز
دى كانت ايام عز وهنا
الله لا يرجعها ايام
منا من العيله وعارفه

حنين القلب يقول...

عبده الرايق
وانا فرحانه اوى انى اخدت اول تعليق منك
شوف اهه البوست بتاعى بس انا اخدت التعليق رخامه بقى
طبعا تلاقيك كنت مع العلامه حسن الفراش بتشوفوا بوش راح فين بعد ما اخد بالجزمه

تسلملى يا رب ويخليك لينا كلنا
لا كده هنلغبط
أجين كلمه ايطالى معناها معاكى 50 جند سلف
انا فهماك يا بابتى

حنين القلب يقول...

آدم الصالحى
باذن الله كلنا نشارك معاكم

نورتنا

حنين القلب يقول...

Punny_Punny
دى جوازة منيله مش معفرته بس

اه العفاريت بطلع الافكار وبطلع الروح كمان
ههههههههههههه
نورتينا

حنين القلب يقول...

Zeroon
هو قهر وبس

انا اصلا مش بقى حلتى فلوس
ههههههههههه
ربنا يكرمك
نورتنا

حنين القلب يقول...

همس الاحباب
اول تعليق كان منين
موبيل ؟؟
ايووووووووه يا جدعان على الكدب موبيل ايه يا خالد
انت نسيت اننا مجمعين ليك الموبيل اللى معاك ده والاخر فلوسك مش كملت ومش جبت شاشه وقولت مش مهم اهم حاجه انه بيرن وخلاص
والنبى تلاقيك كنت قاعد فى سيبر والساعه بتاعتك خلصت والراجل طردك قبل ما تكمل التعليق
صح ؟؟؟؟؟؟؟
اه المدونه مسكونه والنبى لسلطهم عليك يخلوك تمشى تكلم نفسك

حنين القلب يقول...

همس الاحباب

وربنا ما دوقته تلاقيك انت يا بتاع النمل اللى خدته
وعااااااادى خالص بتحصل فى احسن العائلات

انت نسيت يوم فرحك لما لقيت الحمام بيطير وسالتها انتى مش دبحتيه ليه قالت ليك ليه نربيه ونستفاد بيه احسن واتعشيت يومها بيض مسلوق وجبنه بيضه
فااااااااااكر

ازاى ابطل شغل الرايق وانا بنته ؟؟

حنين القلب يقول...

همس الاحباب

شكلك مش مصدقنى
بص تعالى انت والمدام وهموسه وانا هعزمكم هناك وانا اللى هغنى ليكم كامننا كمان لو مش لقينا العفاريت
مااااااااشى

والنعمه ما حلم ده كابوس

حنين القلب يقول...

همس الاحباب
اغلط فيهم اغلط
مااااااااشى
والنعمه لعملك عمل على سن جمل وذيل فار ارمل وريشه بومه يتيمه واعلقه فى فرع شجرة كل ما الهوا يهز الشجرة تهز انت دماغك يمين وشمال
وتقول حنين حنين حنين حنين

محنا الاتنين عيال الرايق يعنى كنا على نفس الرصيف ولا نسيت

Mafrousa يقول...

دستووووووووووووووووووور
ايه يا بنتى ده؟؟؟
العمارة ديه معروفة عندكم فى الاسكندرية
انا عارفاها و شوفتها مهجورة بعيد عنك
بس اقولك حاجه
شششش وطي صوتك بس مش عاوزة حد يسمعنا
اقولك مين اللى كان بيعمل كده؟؟؟؟؟
ده ابوكى الرايق
ايون قالك اشتغل للبت حينين
ديه العشوة ملوكي
ديك و محشي حمام محش كمان و برامين رز
يابنتى ديه العشوة لوحدها تخلى العفريت يتعفرت
ههههههههههههههه
قال عفريت قال
بس اسألى الرايق كان بيمصمص فى صوابعه امبارح ليه؟؟
و كان ماشي يقول كنت جعااااااااااان و شبعت
هههههههههههههه
اما خالتك فرنسا بقا
هيه اللى كانت عامله الحفلة فى المطبخ بتاعة الحلل
ههههههههههههههههه
ايووووون
هيه بس اتنرفزت لما دخلت تاخد نصيبها و لقت الرايق مكوش على الديك كله
ههههههههههههههههه


بوست حلو و جميل

جنّي يقول...

وبعدين صحيتي من النوم .. صح ؟

بس انا ما شفتش اسماعيل ياسين في الحكاية .. اما هو فين ؟

المهم احنا ضحكنا ودا الهدف ..

بس اللي حصل دا مش شغل جن ولا عفاريت .. اسأليني أنا جنّي ..

دا شغل واحد نصاب زي مسرحية البعبع ..

سلام

الدفاع يقول...

ايه ياختى العفاريت المتعاونه اللى بتشيل عفش دى؟ هى بتطفشكوا م الشقه ولا بتساعدكوا انكوا تعزلوا؟؟؟؟؟؟
تلاقيهم عفاريت من محطه مصر واصلهم كانواشيالين وكانوا بيصيفوا وسكنوا الشقه دى وماتوا قبل ماينزلوا البحر
وكمان انا شاكك ان رشدى له علاقه بالموضوع انا عارفه وعارف حركاته وبالنسبه لل5000 جنيه اللى لسه مارجعوش انا بعرض خدماتى انى ارجعهم من عين الراجل صاحب العماره ده واطلعلك العفاريت اللى فى الشقه كمان فوق البيعه بس هاخد اتعاب 10000 جنيه ماشى؟؟؟؟؟
تحياتى للجميع
وحمدلله على سلامة رجوع المدونه والضاحكون

غير معرف يقول...

حكاية عجيبة يبدوا أنى سمعتها زمان ......... ولكن فيها من الاسارة ما يجعلنا نخاف ........... كل الود وتمنياتى بالسعادة

أحــوال الهـوي يقول...

اهلا
ياعيني علي اللي قطع الخلف

بس عفاريت ايه اللي بتعيش و نور الشقة كله منور ؟؟؟؟


تحياتي

حنين القلب يقول...

واحدة مفروسة

دستورك معاكى ياستى
شوفتيها بس كنت عايزاكى تسكنى فيها اسبوعين

ااااااااااااااه
وانا اقول الرايق تخن ليه اليومين دول كنت عايزه اوزنه بعد الفرح انا عارفه وزن الديك والحمام
لو هو اللى اكلهم هعرف وفعلا كان بيقول انا جعان

لالالالالالالالالا الا مامتى
دى كانت عايزة تنقذ ما يمكن انقاذه علشان خاطرى

ربنا يخليكى ليه

حنين القلب يقول...

جنى

لالالا مش صحيت من النوم لانى كنت صاحية
اسماعيل يس كان فى فيلم متحف الشمع

الحمد لله اننا حققنا هدفنا

طيب يبقى صاحب الشقه نصاب بلغ عنه
سلام

حنين القلب يقول...

الدفاع

لا دى عفاريت من وكاله البلح
هههههههههههههههههههه

اه غرقوا فى البحر ودفنوهم فى الشقه

رشدى ده السمسار
تصدق وتؤمن بالله انا غلطانه اساسا انى حكيت الحكايه دى ليك
هههههههههههههههههههههههههه

هتاخد كااااااااااااااام
مين اللى دخل الحج ده المدونه ؟؟
عم الحج
انا مش عايزة فلوسى ولا عايزة الشقه
بص كمان ولا عايزةالعفش

هههههههههههههههههههههههههه

وربنا نورتنا يا اسامه

حنين القلب يقول...

يوميات مصريه

يعنى انتى خوفتى
رغم ان الحكايه مش مرعبه خالص
ولا ايه؟؟

نورتينا

حنين القلب يقول...

أحوال الهوى

يا سيدى يعنى الموضوع كله مصدقه وهى دى اللى مش مصدقها
ههههههههههههه
فكرتنى بعم ايوب اللى فى مسرحيه الجوكر

اكل 12 كيلو بسبوسه وحته القشطه هى اللى وقفت فى زوره موتته
هههههههههههههههههههه

وبعدين انا قولت النور قطع وشوفت العفريت على كشاف الموبيل
صح ولا ايه؟؟؟

نورتنا

عالم ماريونت يقول...

حنين
اية الجنان ده؟
انتي مش بتدوري على عشة
سايبة كل ده ورايحة تلحقي اول تعليق؟
=========================
بوست تحفة ودمة خفيف جدا
قوليلي صحيح واحنا محدش سامعنا كدة
انتي حصل معاكي لموقف ده فعلا؟
======================
تحياتي ليكم
رنا

الطائر الحزين يقول...

فى الشقة اللى كنا مأجرينها قبل الشقة دى كنت بسم واحد بيغنى بالتركى فى نفس الميعاد اقول مين ده طيب بيقول ايه طيب هو فاكر صوته حلو وفى الاخر قلت كويس انه بيغنى احسن ما يعمل حاجة تانية

فرنسا هانم يقول...

اول امبارح كان شغال فى روتانا سينما فيلم التعويذه
وكانت الحلل بترقص
والحرايق بتولع
دخلت بالليل قريت البوست كنت ناويه امسك زماره رقابتك
اصلى خوافه حبتين

فرنسا هانم يقول...

تسلم ايديكى يا حنونه
بوست دمه خفيف وزى العسل
واحلى حاجه ان انتى اخدتى المقدمه من رووقه
يلا خد الشر وراح
هههههههه
تسلمى يا عيون ماما

فرنسا هانم يقول...

الطائر الحزين
انا قريت فكرتك فى الدرافت
ومستعده لتنفيذها
تسلم يابو الابناء
وسلامى لام الابناء كتيييييييييييير جدا

فرنسا هانم يقول...

الرايق
اشتاتا اشتوووووووووووووت
هههههههه
هو انت بتخاف ؟؟؟؟
ام بس عاملى المخ والعضلات
وتقولى انا الزناتى خليفه
وانا سبع البرومبه
وانا مش عارفه ايه
طلعت اشتاتا
ههههههههه
بلا وكسه

الدفاع يقول...

هو ايه الى مين دخلنى المدونه هنا ايه ست ام العفاريت ؟؟؟؟؟؟؟ انتى فاكرانى هاخاف من عفاريتك؟؟؟؟؟؟؟ اللى اكيد جايباهم معاكى المدونه هنا
ان ياست الحاجه بعرض خدماتى ومش قلت انى هارجع الفلوس بس انا كمان قلت هاطرد العفاريت دى يعنى هاتقدروا تقعدوا فى الشقه تانى وباخد اتعاب على شغلى عباره عن نسبه من المبلغ وطبعا عشان خاطرك ش هاخد نسبه على الخمسة الاف جنيه انا هاخد بس اتعاب على انى هاطلعلك العفاريت على كل عفريت هاخد 1000 جنيه وهما حوالى 15 يبقى انا مكارمك فى كام عفريت وفى كمان عفريته حامل واحتمال تجيب توأم يعنى شوفى انتى بقى صحيح خير تعمل شر تلقى
وبرضه احنا فى الخدمه
اه ملحوظه لو عاوزانى اقبضلك على العفاريت كمان واجيبهملك محبوسين فى فانوس او قمقم وتبيعيهم بالشئ الفلانى معنديش مانع وكلك نظر بقى ياست حنين
الدونه منوره بيكى وبكل صحابها نفر نفر
تحياتى وربنا يجعل كلامى خفيف عليكوا

الحرامي يقول...

بيا ن رقم 1
بيان تأسيس العصابة
يشرفني انا الاستاذ / حرامي لص نشال

ان اعلن لكم عن تأسيس اول عصابة لسرقة المدونين

واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه

ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت


4- يتم عمل نقطة بوليس (عندي في المدونه ) لتلقي البلاغات والشكاوي والتعليقات

5- لن يتم نشر اي موضوع الا اذا كان مسرووووق يعني انا مش هكتب حاجه من عندي

6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير

حنين القلب يقول...

يوميات نائمه فى الارياف

اه منا سيبت جوزى يدور وجيت الحق اول تعليق وبعدين منتى قولتيها
انا دماغى لاسعت بعد اللى حصل

ربنا يخليكى يا رونى

لا طبعا دنا كان زمانى فى العباسيه بجرى وراء العفاريت
ههههههههههههههههههههه

نورتينا يا رنا

حنين القلب يقول...

الطائر الحزين
الحمد لله انه كان بيغنى بس
عارف لقيت عفريت صغنن كده قاعد ادام الحمام وبيغنى
يا خارجه من باب الحمام وكل خد عليه خوخه بس بالتركى برضه
ممكن يكون قريب العفريت اللى كان عندكم؟؟
طيب قولى صرفتوه ازاى ؟؟

حنين القلب يقول...

فرنسا هانم

يعنى انتى سيبانا من غير عشا وقعده تتفرجى على التليفزيون يا مامتى

اهه ده عيب الرايق لو كان مش اشترى التليفزيون كان زمانك دلوقتى واخده بالك مننا
بابتى تعالى اتصرف مع مامتى
زمارة رقبتى طيب واقعد من غير زمارة

عاااااااااااااااااا

حنين القلب يقول...

فرنسا هانم
تسلمى يا حبيبه قلبى ومش يحرمنى منك ابداااااااااا

اه انا استغليت انه على القهوة مع العلامه حسن الفراش ودخلت اخدت اول تعليق
هههههههههههههههههههه
الصراحه يا مامتى
بابتى هو اللى سايبه ليه عن طيب خاطر
وهو اللى قالى ادخلى خدى اول تعليق
والله بابتى ده حنين وطيب
ربنا يخليكم لينا

حنين القلب يقول...

فرنسا هانم

والله بابتى بيخاف من خياله
هههههههههههههههههه
عضلات مين ومخ مين ؟؟

يا ماما هو مش خايف دى التعويذه
استنى شويه وهيصرفهم
والنبى يا روقه متكسفناش
واطلع من تحت السرير
هههههههههههههه

حنين القلب يقول...

الدفاع
انا ام العفاريت لو انا امهم يبقى انت ابوهم
ماااااااااشى مش بتخاف
جمايكا واد يا جمايكا
تعالى وريه شغل العفاريت
ابقى قابلنى لو لقيت حد دخل مكتبك الا كشاف النور
خدمات ايه يا عم الحج
الا قولى هو انت محامى ولا بتاع زار ولا شيخ؟؟
هتطردهم ازاى ؟؟
هترفع عليهم قضيه؟؟
العفريت ب 1000 جنيه ليييييييه هو عفريت ايجار جديد وكمان فيه عفريته حامل فى توأم
انا عرفت انت بتشتغل ايه
انت دكتور نساء وتوليد صح؟؟
والنبى لما العفريته تقوم بالسلامه ابقى قولى نعمل ليها سبوع فى الشقه

مش عايزين الخير بتاعك يا عم الشيخ انا هروح اجيب عشه فراخ واقعد معاهم

اسامه
والنبى ما تتعب نفسك ولا تقبض ولا تعمل حاجه انا سبت الشقه خلاص
وانا نظرى شيش بيش
ارحمنا من خدماتك منكن ؟؟
ههههههههههههههههههههه
كلامك خفيف علينا؟؟
انا خلاص بعتهم ليك زمانهم شغالين عليك

ربنا يكرمك ويخليك يا اسامه

عبده الرايق يقول...

فرنسا هانم
نو
نو
نو
انا لن اخاف مطلقا بالتلاته
انا فعلا الزناتى خليفه
وانا من صغرى وانا معجب جدا بالزناتى خليفه وبتابع كل متشاطه وبشجع الاهلى مخصوص علشان الزناتى خليفه وفرحت قوى لما الاهلى فاز ببطوله كاس كوبا امريكا والزناتى خليفه جاب 10 اجوان لوحده
جاب خمسه قبل المباراه ما تبتدى واربعه بين الشوطين والجون العاشر جابه فى نفسه
مش مهم
المهم انه جاب 10 اجوان لوحده
وانا كنت بتفرج من حوالى شهرين على مباراه بين الاهلى وريال مدريد والزناتى خليفه الله يستره جاب 15 جون برجله و15 براسه و 15 جون بصدره والحكم لغى منهم جونين علشان الفانله بتاعه الزناتى كانت بره الشورت لكن طلعنا خسرانين لانى الزناتى جاب الجوان كلها فى جون الاهلى
برضه مش مهم
جونا ولا جونهم اهم حاجه الروح الرياضيه

عبده الرايق يقول...

الحرامي
بلاش شغل الالبنده ده
وطلع ال 75 قرش اللى كانوا على التربيزه
انا اخذت بصماتك
ومش هاسيبك
انت متعرفشى الرايق ولا ايه ؟
لكن لو فيها ابو قسم
ماشى موافق
ربنا يصلحلك الحال
شوف بقى يا حرامى خلينا نتكلم جد
فكرتك لو سرقه البوستات ونشرها عندك فى المدونه تبقى فكره مش كويسه لانها هتعمل لك مشاكل كتير
راجع نفسك
وحاول تفكر كويس

samourai 4 ever يقول...

بصى انا من اسكندريه
و اعرف انى فى عمارة فعلا كدة فى رشدى على شارع ابو قير

بس انتى محددتيش
تبقى حته تانيه

ههههههههههههههههههههههههههههه

بس جامده

و دمتـــــــــــــــــــــــم

حنين القلب يقول...

الحرامى

تسرق مين يا سيدى؟؟
ده بيت الرايق
يعنى الفار يدخله يطلع ناقص ورك
ابقى قابلنى لو عرفت تسرق مننا اى حاجه
هههههههههههههههههههههههههه

احنا عيله جااااااامده
ولو قربت ناحية مدونتنا
انت حررررررر

حنين القلب يقول...

samourai 4 ever
يا اهلا بأهل اسكندريه
هى فعلا حته تانيه خالص غير اللى انتى تقصديها
ههههههههههههههههههههه

بصى بما انك من اسكندريه

فانا يسعدنى ويشرفنى انى اقابلك واعزمك فيها اسبوع واهه منها نتفرج على العفاريت اللى نزلت السوق جديد ومنها نشتى شويه
هااااااااا ليه رايك ؟؟

نورتينا

الطائر الحزين يقول...

سيبنا احنا الشقة بحالها

حنين القلب يقول...

الطائر الحزين

الحمد لله
واحنا كمان
بس احنا كده اهزمنا يا رجاله بقى حبه عفاريت يطلعونا من بيوتنا
لالالا
انا رأيى اننا نرجع تانى
راجعين راجعين فى ايدينا سلاح
هههههههههههههه